|
Re: ايه قصة البواليس المدورة في المنبر دي! (Re: الطيب عثمان يوسف)
|
الطيب سلامات كسره يا ابوعلي حقتنا دي بتاعت حسن عطية الله يرحمو و الاكسبرشن ده جا من انو حسن عطية كان رائد الكسرة (تخفيف الايقاع في نهاية الاغنية) و ده كان اول تطوير لي كسرة إغنية الحقيبة. و ابوعلي في كلامي هو معروف سند العريس المطرطش البخاف من البوليس و حمانا الله و إياكم يا الطيب الكسرة إياها
يا الطيب نحن اتلاقينا في جدة سنة 1995 متذكر ؟
| |
|
|
|
|
|
|
Re: ايه قصة البواليس المدورة في المنبر دي! (Re: Marouf Sanad)
|
يامعروف ما بواليس ياخي
قول "ضباط شرطة" إكراما للتراتبية البوليسية
عندهم بوستات قيَمة جدا
تجدني دائما في دواس خفيف مع واحد منهم
مابعجبو كلام اخوانا "الملكية" في الحاجات العندها علاقة بعملو "زمان"
مثلا يقولو فلانة صدمتها ركشة خوفا من الكشة يقول ألف لا ويجي بعد داك يعتذر لما الشغلة توضح ليهو
الله يهديهو ويهدينا
_ ياعمر ماتزعل
| |
|
|
|
|
|
|
Re: ايه قصة البواليس المدورة في المنبر دي! (Re: أسامة عبد الجليل)
|
ديل أهلي البقيف في الدارة وسط الدارة واتنبر وأقول للدنيا ديل أهلي
عرب ممزوجة بي دم الزنوج الحارة ديل أهلي
ديل قبيلتي لما أدور أفصّل للبدور فصلي
أسياد روحي والاحساس وسافر في بحار شوقهم زمان عقلي أقول بعضي الاقيهم تشربوا في مسارب الروح بقوا كلي
محل قبلت القاهم معاي معاي زي ضلي
لو ما جيت من زي ديل وا أسفاي وا مأساتي وا ذلي
تصور كيف يكون الحال لو ما كنت بوليس وأهل الحارة ما أهلي
| |
|
|
|
|
|
|
Re: ايه قصة البواليس المدورة في المنبر دي! (Re: omer osman)
|
سلام يا سادة يا زينين ويا طيبين ويا أكرم شعوب الدنيا في الدارين وأعز الناس أنوف وسيوف ولكن برضو متواضعين بدور الليلة أقول أبيات من الدوباي وأقول شعري ومعاني غناي فوق أم زين وأفصل قولي للعارفين وما عارفين أصلوا أم زين قبيلة الريدة والعاشقين يضوي شبابها حتى الشابو في أحضانها مو شايبين ولادها غلابة.. ديمه تعابة إلا الحكمة ريادين وعذريين نحب الناس وكل الناس وعشان بنحب وأهل الحب صحيح مساكين لما الناس تنوم ترتاح نكون صاحيين نغالب الشوق وسهرانين سنين ما ضقنا غمدة عين نحسب في نجوم الليل ونرجى نجوم وليها حساب وألف حساب لما تضوي فوق الكاكي والترلين وعشان الريده شوق وحنين نهارنا وليلنا متشابهين داقين الكدر ماشين
| |
|
|
|
|
|
|
Re: ايه قصة البواليس المدورة في المنبر دي! (Re: omer osman)
|
نخفف محنة المسكين نكفكف دمعة المظلوم ونبقى الضلة والراكوبة للتايهين ونفرد ريش جناح منتوف على الخائفين وندي الزاد.. حتى أكان نقص أو زاد ونفضل نحن مريوقين وكيفن عاد ونحن الريده مالكانا وبقت زي عبره ما سكانا وحمتنا الزاد ..و كيف الزاد وناساً غيرنا محرومين عاد يا سادتي الزينين عرفتو أم زين ؟ نحن قبيلة مالها تنين وليها فروع وفيها بطون وإتخن زول يدق صدره ويقول أنا جعلي ولا بشاري وحتى إن كان من المجانين في أحشاها يبقى جنين وصوتو يروح وذاتو يروح وتب ما يبين إلا يتوب يضم أيدينه في الجنبين ويفتح سبعه في الكرعين ويمشي يقيف يدق تعظيم
| |
|
|
|
|
|
|
Re: ايه قصة البواليس المدورة في المنبر دي! (Re: omer osman)
|
ينادي الأولياء الصالحين ومعروفين وياما رجال وليها رتب شيوخ الفزعه والنجده الملت صفحاتهم الحجبات من القوانين وديل الرجعو الرايحات واعادو البسمه للسمحين وتمو الشينة للشينين وكان بخراتهم البارود والتعويذه حرف السين دحين يا سادة يا زينين عرفتو أم الزين؟؟ صلوا على نبينا الزين.. عشان العين ولادي كتار ومنتشرين وما بتعدوا إلا الحكمة معدودين عيالي على حدود دارفور برام وكتم .. نيالا ضعين عيال دينار.. عيال تورشين وواحدين في محمد قول وفي سنكات وفي قلابات عيال دقنه الجسور وفطين وناسي كمان.. على هيبان في كادقلي.. وأم روابة دار شيكان.. ودار الثورة والمهدي الأقام الدين
| |
|
|
|
|
|
|
Re: ايه قصة البواليس المدورة في المنبر دي! (Re: omer osman)
|
ولادي في كوستي والجبلين سنجه ومدني والكاملين بلاد مرتاحه بين نهرين وفارده الخضره .. مد العين وناشره عليها ضلالات من الياسمين عيالي هناك في فنجاك في كنجور وفي كاكا في توريت وتركاكا بلاداً فيها كل أصيل تلاقي الظبيه فيها مقيل والخرتيت يصافي الفيل ودايماً ناسها مبتهجين على النقارة مجتمعين بناتها تسوي كالوزين وشبانهم حباب العافية فيل وحصين ولادي هناك في حلفا دغيم وفي أرقين في شندي وكريمه وأرقو في نوري وحفير وبدين بلادي يتغنى ليها النيل يردد في العديل والزين ولما يلاقي شتلات النخيل عاشقين ومتقالدين
| |
|
|
|
|
|
|
Re: ايه قصة البواليس المدورة في المنبر دي! (Re: omer osman)
|
يميلو شمال يميلو يمين تقول بالعجوة سكرانين وهم واعيين عيالي هنالك وناسي هنوك ناسي في مفرد النيلين فيهم ناس مشلخة تي وفيهم ناس مشلخة اتش وناس فصداتها مترادفين وناساً ساده لكن برضو معروفين دحين ياساده يا زينين عرفتو أم زين؟؟ عيالها اسود وليها زنود فراساً عيال فراس بيملو العين شعاره العين وكفاً تقبض الظالمين عليها غصون من الزيتون نمت في الطور على سينين وإتفرج عليهم وشوف وقت مارقين صلي على نبينا الزين داك أبو قاش بحز الصفحه والجنبات ود أبو لطاش .. وبوتاً يغرم العضمات دواخله فرن وقعره حديد على الأسفلت ليهو رنين وده الفارسي البشق العضمه والمجهول حوافر فرسه متطابقين ومتناغمين إيقاعها يصحي الليل قوافي ملحنات تلحين وده الفارس الترس مندلي في العتمور زوامله هجين وليها أنين وليها حنين بشاريات ولما تقابل الهمباته والشفاته والضايعين تتكامل مع الهجاني تفتح عين وتقفل عين مع التنشين وداك الفارس المصلوب علي الساحات على الطرقات وفي الميادين أخو السمحات تنوشه الريح ونار الصيف يودي شمال يجيب ليمين يلاقي الموت.. وأحزان جاريه في العجلات تنهش في حشا الأمات وفي الجايين وفي الماشيين وفي أعمامنا والخالات وفي أكبادنا والمستقبل الحلوين وداك الفارس المجهول داجي وماشي كالماشين رامي أضانو بين الناس وفاتح عين ومزروع في بطون الليل كما السكين عاد يا سادتي الزينين عرفتو أ م زين؟؟
| |
|
|
|
|
|
|
Re: ايه قصة البواليس المدورة في المنبر دي! (Re: omer osman)
|
بكل الفخر اتشرف بالانتماء إلى هذه القبيلة فمن عمل بالشرطة لا يمكن في يوم من الأيام أن يتبراً من قبيلتها حتى وإن تقاعد
بالمعاش فهي القبيلة التي نفخر بالانتماء إليها وهي الشجرة التي نتكيء عليها في الملمات والمحن.وختاماً أخوتي بقبيلة الفرسان لكم مني
ألف تحية ومليون سلام لكل أفراد القبيلة إبتداءاً من السيد المدير العام وإنتهاءاً بآخر مستجد واقف انتباه الآن وحكمداره يرفع في
التمام...
نقلاً عن موقع رئاسة الشرطة (بتصرف)
| |
|
|
|
|
|
|
Re: ايه قصة البواليس المدورة في المنبر دي! (Re: ابراهيم الرشيد عبدالرحمن وراق)
|
Quote: عمر عثمان
سلام
انت يا عمر مابتسمع النصيحة ولا شنو؟ اعمل حسابك البوست ده ملغم (مرسال وكده)
عذرا صاحب البوست انا برضو من البواليس
لكم الود |
تعرف يا سيادتو ابراهيم في (بعض) الاحيان في (بعض) الملكية لازم تفهمم حاجة ياسيادتك خش في حقل الالغام ده
واضرب صفارة لباقي البوليس خلينا نشوف القصة دي حدها وين ؟
| |
|
|
|
|
|
|
Re: ايه قصة البواليس المدورة في المنبر دي! (Re: omer osman)
|
قصة عجيبة ياخ !!
هي بقت تهمة يعني يا عريس ؟؟ البوليس بقى جنس من المهن معيب يعني ؟ في رجال بواليس من أنقى و أشرف و أكرم العناصر الوطنية الممكن تمر عليك يا عريس .. و زيهم زي الخلايق التانية .. فيهم الكعب الما بيتشكر و فيهم السمح الما ليهو حد . بعدين الكاكي ما لون سياسي ، الكاكي لون وظيفة .. تسودها الممارسة ، و برضو الممارسة بتبيضها ( زيها و أي مهنة ) .. المشكلة لو في .. ما بتكون فيها .. بتبقي في تواريخ ذواكرنا عنها . ثم ياخي هذا الوطن السوداني العجيب مليان بالمهن المليانة بالقبح علي أظرط ما يكون .. و كذا بالجمال بأبدع ما يكون .
يكتب عمر عثمان الدايرو في حدود حريتو .. يكتب معروف الدايرو برضو في حدود حريتو .. و علان و فرتكان .. المحك في إعمال أدوات الحوار الصاح .. و المساجلة المبرأة من النوايا سابقة الإحتقان . بدون الغمز و اللمز و الوصايا .. و تجييش الإشارات و الإيحاءات .
ألصق ليك الختم اللايووق بتاع : مالكم كيف تحكمون ؟؟ ....
و صباحية مباركة يا عريس .
| |
|
|
|
|
|
|
Re: ايه قصة البواليس المدورة في المنبر دي! (Re: Emad Abdulla)
|
هوي يا ناس هوي .. هداك ليهو عمر واقف في الدروة ... دايرين تشوتوهو .... دايرين تعملوهو كوارع ذاتو مخيرين ...
إلا بالله البوليس دا أخاتوهو .... ما بنقبل فوقو...... و جنابو عمر دا ذاتو لو غلط.... دا ما معناتو البوليس كلو غلطان .... هسي لو شفنا لينا واحد لابس عمه و بشاغل في البنات .. .معناها أي واحد بتاع عمه متصابي و بتاع بنات ؟ :)
ود بوليس سابق
| |
|
|
|
|
|
|
Re: ايه قصة البواليس المدورة في المنبر دي! (Re: سارة علي)
|
Quote: اخوي آخر دفعة في الاحزاب الدفعة(59) علي ما اعتقد..
بوريك اسمو بس اصبر علي |
الدفعة (59) الجونير بتاعين دفعتنا (56) طبعا في (57) و (58) وديل من الصف وشرطة فنية
الدفعة (59) اخر دفعة تدخل كلية الشرطة من الثانوي مباشرة ومن بعدها اصبح الدخول للجامعيين
طبعا ناس (59) ديل اكاد اكون بعرفم كلهم يا بالاسم يا بالشكل
على العموم تحياتي له ولكل ضباط (59)
| |
|
|
|
|
|
|
Re: ايه قصة البواليس المدورة في المنبر دي! (Re: سارة علي)
|
الاخت سارة
الدفعة 59 نسميها اخر وليد شرعى لكلية الشرطة لانو بعدها جات الدفعة 60 وكما قال المرحوم الزبير من هنا تبدا الشرطة.
بعدين ياعمر كان تقول ليهم القصيدة كتبها السيد اللواء محى الين محمد على وهو غنى عن التعريف.
ولكم الود
| |
|
|
|
|
|
|
Re: ايه قصة البواليس المدورة في المنبر دي! (Re: ابراهيم الرشيد عبدالرحمن وراق)
|
الاخ الصادق عوض
اسال الوالد عن الاسماء الواردة فى الرسالة ادناه وستجد الاجابة
والله فعلا ود بوليس, واى بوليس؟
لك الود
Quote: رساله للسيد الفريق شرطه .. محمّد الحسن يوسف .. بقلم: مقدّم شرطه "م" محمّد عبد اللّه الصّايغ السبت, 23 مايو 2009 10:07
مقدّم شرطه " م " محمّد عبد اللّه الصّايغ
ليته كان بيد عمرو سعادة الفريق محمّد الحسن يوسف جلسنا يا سيدي الى السيد سيد احمد الحسين وزير داخليّة الديمقراطيّه الثالثه في ذلك الاجتماع والّذي جاء في يوم شتوي من شهر فبراير من العام 1987 وكأنّما على رؤوسنا الطّير . كان الجّوّ ثقيلا مفعما برائحة ال .. خيانة ربّما .. كانت هنالك بعض الوجوه يبدو عليها " الارتياح " .. نعم .. ولكن .. لا تبتئس يا سيّدي فهي لم تكن بذلك الحجم لا كمّا ولا كيفا . جلسوا عصبة .. متجاورين و .. صفّقوا في ذلك اليوم حتّى أدمت أكفّهم .. نفس الوجوه .. رأيتهم يصفّقون لك ، في مرّات سابقه ، حتّى يخرجوا عن الوقار ان كان ثمة . توجّست خيفة وانا اضع نفسي داخل تلك القاعه بدار الشرطه ببري والتي كان ملحوظا فيها غيابك والفريق اوّل فيصل محمّد خليل ، للمرّة الاولى ، عن اجتماع في ذلك المستوى .. حاولت ، بلا جدوى ، طرد تلك الافكار " السوداء " وجلست أحدّث نفسي .... انّنا في عهد ديمقراطي صنعناه بأيدينا ال " حاضره " هذه .. أذن الامر لم يكن حلما بل حقيقة ماثله ولا يمكن أن يكون هنالك ضرب " تحت الحزام " أمّا هذه القلّة المستبشره والّتي بدا عليها " الارتياح " فلربّما تسعها عبارة " ... واذا تفرّقوا ضاعوا " . سيدي الفريق وأنت تبني هذه القوّه في تمهّل " طوبه طوبه " بقوّة خارقه كانت فيك .. تشعلها قمحا و .. وعدا وتمنّي لم تكن ترمي الى العلاقات " الرخيصه " بينك وبين زملائك .. بل كنت تحفر في دواخلهم حتّى تصل الى الارض الثابته كي تقيم عليها بنايتك من أجل أن يمضوا بهذه القوّه الى حيث أردت لها أن تكون ... تعلّمنا منك يا سيدي كيف يكون الحزم والحسم مبدأ وكيف يكون القائد عنوانا و .. هيبه وكيف يكون الضّعف سبّة .. كيف ولماذا يفخر الرجال برجل مثلهم يأكل الطّعام ويمشي على ساقين ولا تأخذه في الحقّ لومة لائم .. تعلّمنا الشجاعة والقوّه وأخذ الحقّ لصاحبه " حمرة عين " .. تعلّمنا كيف نتّخذ القرار في اكثر الاوقات حرجا وتعلّمنا .. أن رضاء الرئيس ليس سلعة تباع وتشترى ولكن هو شيئ لا يتأتّى الاّ من خلال الأمانه و البذل والعطاء والتفاني .. علّمتنا يا سيدي كيفيّة التمييز بين القيادات العظيمه .. القويّه والتي خلقت لتلعب دورا في التاريخ وتلك الرخوه والتي لوجودها وعدمه نفس الاثر الى أن يقضي اللّه أمرا كان مفعولا .. لم يكن اي شخص ليجرؤ على الدخول الى مكتبك قبل مراجعة هندامه وزيّه العسكري وقبل التثبّت والمراجعه الدقيقه لما أتى او استدعي من أجله .. والجميع يعلمون ان الرجل الّذين هم بصدد الدخول اليه ليس أيّ رجل ولكنّه المتعمّق المترفّع عن سفاسف الأمور العارف لكلّ صغيره وكبيره .. بواطن الامور وظواهرها .. دقائقها والعين الفاحصه والّتي لا تقنع أبدا بما هو باد . في بداية الثمانينيات عندما تمّ نقلكم مديرا لشرطة العاصمه القوميّه كنت انا ضابطا بشرطة المرور والنجده . وصل خطاب يحمل توقيعكم لكل المناطق في اليوم التالي لاستلامكم بانّه على كل ضابط بطرفه اجراءات محكمة شرطه الحضور لمكتبكم صباح اليوم التالي ومعه كل الاجراءات المتعلّقه بتلك المحكمه . في السويعات التي سبقت ذلك الموعد عكف الجميع على تكملة اجراءاتهم وسافر البعض الى حيث يوجد الشهود لكل انحاء السودان مدني .. الابيض .. الدامر .. كسلا .. ومنهم من حضر مباشرة الى مكتبكم من تلك السفريّات وقد هالني حجم تلك المتأخّرات من عدد الساده الضبّاط الذين ضاق بهم مبنى المديريّه على سعته .. كانوا هنالك في الوقت المضروب بالثانيه .. ومن ذلك تعلّمنا ان العدل انّما هو في سرعة الفصل وان مصائر الرجال شيئ مقدّس لا يجب التلاعب به .. تعلّمنا من هو القائد "المهيب" الذي توزن كلماته بميزان الذّهب ولا يذهب حرف منها ادراج الرياح
سيّدي الفريق
لقد كنّا نندهش من النظام الذي كان يسود المباحث المركزيّه تحت قيادتكم .. كل هذه الادارات .. الحضور في مواعيد محدّده .. رفع الدفاتر .. نزول الاوامر .. المتابعه الدقيقه للتنفيذ ..التنسيق بين الادارات المختلفه الميدان .. التحقيق .. الانتربول .. السجلاّت ... كيف كنت تقاتل من اجل ضؤ الشمس والهواء الطلق .. تحارب الظّلام وخفافيشه وهوامه .. وتبني اراءك في البشر على التعامل المباشر معهم فانتفى عن محيطك ناقلو الاخبار ومروّجو الاشاعات وماسحو الجوخ والوالغون في اعراض ومحارم الاخرين .
سيدي الفريق
لقد كان ذلك الاجتماع في ذلك اليوم الشتوي من فبرائر من العام 1987 هو بداية التقويم الفعلي ل " ثورة " الانقاذ الوطني " بيد " السيد وزير داخليّة الديمقراطيّه الثالثه .. في ذلك الاجتماع دفن الوطن الّذي عرفنا ، دفنت الشرطه ودفنّا نحن ومعنا أيضا دفن أصحاب الوجوه الّتي بدا عليها " الارتياح " .. ومن المقابر عاد رجلان ما زالا يبحثان ، حتّى الان ، عن سرادق العزاء ... انت والفريق أوّل فيصل محمد خليل عليه رحمة اللّه ورضوانه .
سيدي الفريق
انا ضابط عمل تحت قيادتك ..كنت أنوي الكتابة في شكل مختلف ولكني عجّلت بكتابة هذه الرساله اليكم لاسباب أولها أنّني انّما أردت أن أسمعك صوتي ... بكلمة وفاء ، في زمن عزّ فيه الوفاء ، من على بعد سحيق بحساب المسافة والمكان.. بحقّ في حقّك في هذه الحياة الفّانيه . وثانيها انّ الرجال امثالك يجب التوثيق لهم .. يجب أن يعرفهم شعبهم .. ان يعرف ذلك الشّعب أي قائد فقد ومتى وكيف .. أيّ قائد فقد .. ليس في ظلمات الصالح العام الاخيره .. ليس بمعاولهم والّتي ما عادت تؤاخذ ولكن ويا أسفي من " ولكن " هذه ....يا ليتها كانت يا سيّدي بيد عمرو... فالقائد الذي يقول لجنوده " اتبعوني " هو غير القائد الذي يقول لهم ، من مكمنه الآمن ، " اهجموا " ... انّه هو من كان يتطلّب الموقف وجوده .. في الّليل الحالك ذاك ..... و " النّي للنار " . وثالثها يا سيّدي حتّى أضم صوتي للزميل العزيز المقدّم " م " تاج السر محمد حسين لتحريضكم على ان تكتب لان الامر ليس ملكك .. فدعه يكون أوّل شيئ في حياتك يخرج عن طوعك ..لأنّه صفحة نابضة من تاريخ هذه القوّة التي أحببت .. هو جزء من تأريخ السودان ويهم شعب السودان العظيم الذي عملت من أجله .. هذا الشعب الّذي ما زال " ينقّب " ، ومعه أيضا " ينقّب " السيد وزير داخليّة الديمقراطيّه الثالثه ، في " أسباب " انهيار الدّوله الّتي كان اسمها السودان وأيضا انهيار الديمقراطيّه الثالثه بتلك الصوره " الهشّه " نعم الهشّه و.. " المزريه " و " المهينة " أيضا ...
|
| |
|
|
|
|
|
|
Re: ايه قصة البواليس المدورة في المنبر دي! (Re: سارة علي)
|
Quote: قصة عجيبة ياخ !!
هي بقت تهمة يعني يا عريس ؟؟ البوليس بقى جنس من المهن معيب يعني ؟ في رجال بواليس من أنقى و أشرف و أكرم العناصر الوطنية الممكن تمر عليك يا عريس .. و زيهم زي الخلايق التانية .. فيهم الكعب الما بيتشكر و فيهم السمح الما ليهو حد . بعدين الكاكي ما لون سياسي ، الكاكي لون وظيفة .. تسودها الممارسة ، و برضو الممارسة بتبيضها ( زيها و أي مهنة ) .. المشكلة لو في .. ما بتكون فيها .. بتبقي في تواريخ ذواكرنا عنها . ثم ياخي هذا الوطن السوداني العجيب مليان بالمهن المليانة بالقبح علي أظرط ما يكون .. و كذا بالجمال بأبدع ما يكون .
يكتب عمر عثمان الدايرو في حدود حريتو .. يكتب معروف الدايرو برضو في حدود حريتو .. و علان و فرتكان .. المحك في إعمال أدوات الحوار الصاح .. و المساجلة المبرأة من النوايا سابقة الإحتقان . بدون الغمز و اللمز و الوصايا .. و تجييش الإشارات و الإيحاءات .
ألصق ليك الختم اللايووق بتاع : مالكم كيف تحكمون ؟؟ ....
و صباحية مباركة يا عريس . |
دا الكلام يا عماد .. . .
| |
|
|
|
|
|
|
Re: ايه قصة البواليس المدورة في المنبر دي! (Re: حيدر حسن ميرغني)
|
Quote: تحية للشرطة بواليس وضباط
وللعزيز عمر كيفما يكتب
هذا لوزم توضيح إن اعتقد احدا انني قد اسئت لاي شيئ يتعلق بالشرطة |
الاخ حيدر يا اخي انت زول محترم شديد وموقفك واضح ومفهوم حتى بدون التوضيح ده.
قريبك بابكر دفعتي برضو زول راقي شديد والله التقول شوايقة.
| |
|
|
|
|
|
|
Re: ايه قصة البواليس المدورة في المنبر دي! (Re: حيدر حسن ميرغني)
|
( تحية للشرطة بواليس وضباط
وللعزيز عمر كيفما يكتب
هذا لوزم توضيح إن اعتقد احدا انني قد اسئت لاي شيئ يتعلق بالشرطة )
حاشاك يا حيدر انت ماك الزول البتسئ وماك محتاج لاعتذار , وأخونا معروف ذاتو ما ظنيتو عايز يسئ لأحد وأظنو غرض البوست المداعبة والمعاكسة , يا معروف ياخ ما تشلت لو العرس سخن معاك ممكن نطلب من بت الشيخ ترخى ليك شوية , وندخل أخونا عادل حمزة واسطة خير . تحياتى لصاحب البوست ولكل المرور الكريم .
| |
|
|
|
|
|
|
Re: ايه قصة البواليس المدورة في المنبر دي! (Re: فيصل عثمان الحسن)
|
اها .. براك جِبتَ الكُمر .. لنفسك !!! ..
شوف يامعروف ... لو الموضوع موضوع بوليس بس ؟ !!!!
انا زاتو بوليس !!!! .. { وشوف علامات التعجب دي } .. لأنو البوليس مناي ومنى { مامنى أختي} منى عيني !! وماتسألني ليه ؟ !!!! ..
ولاحظ اني تربية عساكر (دَيش) .. !! مابوليس !! .. وحتى يامعروف (هنا) في منبر السجم والرماد ده ، مابلقى نفسي إلا مع كتابات (البواليص) .. ومهوس بيها ومتابعة زي متابعة ظلي لي !! .. لأنها الأبدع والأظرف والأقيم لي !! ..
اها انت عَرستَ وإنتفت جواك حاجة الــ (حِرمان من شئ ماااااا ) جاي تفكها فينا في البوليس وماأدراك مابلويص !!!! .. شنو ياأخي هو نحن ناقصْينَك ولا شنو ؟؟ !!! ..
!!!!!! !!! !! !
ـــ خَليِتنا نستهلك كمية من علامة التعجب !!!!!! لا يعلم مَداها إلا الله !!!! ...
وبس !!
!!!!! !! ! .
| |
|
|
|
|
|
|
Re: ايه قصة البواليس المدورة في المنبر دي! (Re: محمد الجزولي)
|
يا معروف و يا عماد و فيصل و الجميع سلام والله يا عماد يا صاحب غضبتك على معروف غير مبرره ابدا, لانو واضح انو يتهكم على بعض الاشخاص هنا و ليس على الكل. و معروف قطعا ما من الناس البيجو شايتين بالاحكام العامة. ياخوى انت برضو ماسكاك قصة "الغيرة على الشرطة" الشابكنا بيها عمر عثمان دى? مع انك الكلية ما تميتا و يشاع انك رفدوك لانك كسرت التعلمجى? لو تميتا كان اسا الا نقوم صوف ... بالجد, كلنا عندنا في اسرنا و معارفنا و اصحابنا ناس في البوليس, من اهلى كان محمد احمد صالح - معروف بالمصري - و ولدو اسامة , بيتنا في مدنى كان مؤجر ميز لضباط البوليس , صاحبناهم و كانو الذ ناس رغم انو البيت انتهى و مفروض يتجدع في الكوشة بعد رحيلهم ... ده كلو معروف و مفهوم
اها انا كلام معروف ده زاتو ريحنى و لسبب واحد اسمو عمر عثمان, العرفتو انو الزول ده اول دفعتو و كان بمعايير ناس البوليس ضابط ناجح و شاطر. من حق عمر عثمان انو يكتب زى ما عاوز و ينتمى لاى جهة عاوزا زيو و زى الباقيين. لكن ينصب نفسو المتحدث الرسمى و المدافع الاوحد عن الشرطة لتجيير مواقفها لصالح الانقاذ و المؤتمر الوطنى دى ما مبلوعة, و يصل الامر مرحلة نفي رسمى و غير رسمى لاحداث شهد الجميع بحدوثها زى قصة مقتل نادية ست الشاى الماساوية, ده كلو و هو متقمص شخصية الغيرة على الشرطة, و هو الاعلى صوتا و انتشارا هنا. البزهج هو حركات ناس المهنة الواحدة دى ما بيجو يختلفو مع بعض مراعاة للزمالة و ايه كده ما عارف , باستثناء الاخ الطيب عثمان يوسف اللى حاول كذا مرة توضيح انو داخل الشرطة في مواقف و اراء مغايرة عما يقول به عمر , و انا اعرف انه داخل الشرطة زمان ناس قدموا على كل المستويات المهنية و الانسانية و الثقافية و غيرها الكثير جدا, و كفاية انو الدنيا لمت الواحد في "اريرة" زى فيصل عثمان الحسن من اندر البشر في النبل و الصدق و المبدئية و الاستقامة و الظرافة كمان رغم حماقتو العجيبة.
يا عماد و الطيب و فيصل و من لف لفكم من البوليس السابقين و الحاليين , سكوتكم على انتحال و سرقة صوتكم بواسطة عمر او غيرو هو البيقود لحلق صورة خاطئة عنكم .... دى مسئوليتكم قبل ما تجو تزرزرونا نحن الملكية ديل
ممكن تكملو لينا رسالة مقدّم شرطه "م" محمّد عبد اللّه الصّايغ و تشرحو شوية ملابسات الاحداث دى لانها مهمة
و يا فيصل انت زاتك ليه ما تكتب عن تجربتك الما ساهلة من الانتفاضة لغاية الاعتقال و التعذيب الاتعرضتا ليهو في الانقاذ .... عشان الزميل عمر و امثاله يعرفو حاجة
سلام تانى
| |
|
|
|
|
|
|
Re: ايه قصة البواليس المدورة في المنبر دي! (Re: فيصل عثمان الحسن)
|
سلامات يا عريس تعرف شرطة السودان دى أكثر الأجهزة الأمنيه تهميشا,وحتى الآن بعد أن فصلوا خيرة ضباطها وزادها تهميشا بأن حشروا فيها موالين لهم ,ثم زادو الطين بلة بعد تقسيمها,والأنكأ من ذلك خلقوا أجهزه موزاية لها. لو إتكلمت عن (أبوطيره),الما معروف جيش ولا بوليس ده !!!ديل الكنا بنهتف ضدهم(يا بوليس ماهيتك كم?) وكانوا بيسكونا زقاق زقاق وبيتلبوا وراك حيطه ورا حيطه, والحبوبات بيساههن فى المظاهره بما تيسر ,جردل مويه ويسقوا المتظاهرين,وممكن طبعا يدخلوك البيت وتقعد لغايه ما الكريهين ما يركبوا الكومر ويغورا .وكمان كانن بيفتحوا البيبان البيودو على حوض المواسير(لما السودان كان فيهو موية,كان حوض فيهو تلاته أربعه مواسير فى حوش الرجال أو حوش الصالون,للضيوف عشان الغسيل والوضوء) ويفتحوا المواسير وتلقى بنات البيت ماسكات ليهن قطع مبلوله,طبعا للتقليل من آثار البمبان,ليهن أجمل تحايا ..رحم الله من تغمدهن.
كذلك التحايا لشرفاء الشرطه المهمشين.
| |
|
|
|
|
|
|
Re: ايه قصة البواليس المدورة في المنبر دي! (Re: محمد مكى محمد)
|
مع احترامى وتقديرى لكل ضباط الشرطة والجنود بس والله الحال فى الشرطة وخاصة مرتبات الافراد يغنى عن السؤال ..!! معقولة الشرطى يشتغل 24 فى اليوم ويأخد راحة يوم واخر الشهر ياخد مرتب 221 جنية بس ؟ والصول ياخد 350 جنية .؟ والله دا السبب الاساسى البيخلى ناس الشرطة ينهبوا المواطن لمن يقبضوهو فى حتة ( ضيقة ) والعجب كمان ناس المرور .. ديل كمان كوم براهو و طبعاناس المرور متخصصين فى لوارى القش والخضار . ماعارف السر فى كدة شنو ؟
قريبا بوست خاص بشرطة المرور وعمايلهم السودة ضد المواطن المغلوب على أمرة ..!!
----- جنابو عمر معليش ما قاصدك انت بالتحديد .. تسلم ..!!
| |
|
|
|
|
|
|
Re: ايه قصة البواليس المدورة في المنبر دي! (Re: مزمل خيرى)
|
الاخ مزمل
قلت...
Quote: مع احترامى وتقديرى لكل ضباط الشرطة والجنود |
دى كويسة منك وكل من يشارككك الراى....
ثم قلت....
Quote: والله دا السبب الاساسى البيخلى ناس الشرطة ينهبوا المواطن لمن يقبضوهو فى حتة ( ضيقة )
|
فاماانك تسخر وتتهكم على الشرطة بتقديمك الاحترام والتقدير ثم تورد انهم ينهبون المواطن...
فكيف يستقيم ذلك؟
او تطلق الكلام على عواهنه وتناقض نفسك بنفسك.....
فان كنت تسخر وتتهكم,لن نعيرك التفاتا...
وان كان غير ذلك,فاعلم اخى ان الكلمة سلاح (ما فيها كما كنت) وما تخطه بيدك يقراه الاخرون وبه يكون حكمهم
اما لك او عليك...
لك احترامى وتقديرى.
| |
|
|
|
|
|
|
Re: ايه قصة البواليس المدورة في المنبر دي! (Re: سارة علي)
|
Quote: لو ما عملتا كدة يعرفوك كيف بوليس يا عمر؟؟
تحياتي.. |
شكرا سارة حقيقة البوليس لايدركها الا البوليس او من عاشر البوليس عن قرب
معاً لمزيد من البواليس في هذا المنبر الحر الذي يريد البعض خنق حريته
وتحديد من يحق له التواجد فيه من عدمه ...........
| |
|
|
|
|
|
|
Re: ايه قصة البواليس المدورة في المنبر دي! (Re: ابراهيم الرشيد عبدالرحمن وراق)
|
المحترم ابراهيم اسف اذا وصلك اخر السوط وانا لا اقصد شخص معين بالمنـبر ، انا اتحدث عن الحالة العامة للشرطة ودا مابيمنع انى اكن ليها الاحترام وانا معليش عممت المسألة ولكن الشهادة لله فى عساكر كويسين جدا ولكن ( البعض ) نهابيييين عديل كدة ..!! والكلام دة بقولو وانا واثق من نفسى جدا ، امشى ضواحى المعمورة والفردوس بالليل وشوف البيحصل من بعض افراد الشرطة ..!! عليك الله امشى مبانى الأدارة العامة للشرطة الأمنية وشوف المخالفات المرتكبة من بعض الافراد ..!!
اكرر انا ماعندى قصد مع اى شخص ولكن دا الحاصل وكل الناس عارفة كدة ..!!
| |
|
|
|
|
|
|
Re: ايه قصة البواليس المدورة في المنبر دي! (Re: مزمل خيرى)
|
الاخ مزمل
فى رجال بوليس من انقى واشرف الرجال قدموا للوطن الكثير, والشرطة مثلها واى شريحة فى المجتمع فيها الصالح
والطالح
Quote: عليك الله امشى مبانى الأدارة العامة للشرطة الأمنية وشوف المخالفات المرتكبة من بعض الافراد ..!!
|
وحديثك هذا دليل على ان الشرطة تحاسب افرادها الذين يرتكبون المخالفات وقامت بانشاء محكمة شرطة بادارة
الشرطة الامنية, ويمكنك الاطلاع على السوابق القانونية للمحاكمات فى موقع رئاسة الشرطة.
لك الود
| |
|
|
|
|
|
|
Re: ايه قصة البواليس المدورة في المنبر دي! (Re: ابراهيم الرشيد عبدالرحمن وراق)
|
اتخيل يا عمر عثمان المفروض كان يكون بوليس وعن جدارة في العيلة منو؟؟
امي...
امي دي لو كان مسموح في زمنا المرأة تكون بوليس كان هسه بقوها مدير مخابرات..
ياخ امي لا بتفوت عليها شاردة لا واردة.. ما شاء الله عليها..
علي فكرة نسيت اقول ليك اخوها(خالي) اترفد من البوليس قبل اخوي برتبة عميد.. دة كمان ذكاءه كوم براه ..يا كافي البلاء العيلة كلها مرافيد انقاذ.. لمن حسسونا..
| |
|
|
|
|
|
|
Re: ايه قصة البواليس المدورة في المنبر دي! (Re: إسماعيل التاج)
|
عماد صاحبي
ان هال مندى,,,ان شا الله تمام
مرحبا بالشرطة, وناس البريد والبرق, ووقاية النباتات وكل الناس
لا نحجر على احد ولا ينبغي لنا!
الجزئية البريئة في كلامي دا انو لاحظت انو في ناس بوليس كتار فجأة كدا,
اغلبهم ناس تمام ومية مية وفيهم مبدعين اثروا الساحة والله, الخ,,,
الجزئية الغير بريئة, والتي اشرت اليها دون غمز ولا لمز وهي:Quote: واحد اسمو عمر عثمان, العرفتو انو الزول ده اول دفعتو و كان بمعايير ناس البوليس ضابط ناجح و شاطر. من حق عمر عثمان انو يكتب زى ما عاوز و ينتمى لاى جهة عاوزا زيو و زى الباقيين. لكن ينصب نفسو المتحدث الرسمى و المدافع الاوحد عن الشرطة لتجيير مواقفها لصالح الانقاذ و المؤتمر الوطنى دى ما مبلوعة, و يصل الامر مرحلة نفي رسمى و غير رسمى لاحداث شهد الجميع بحدوثها زى قصة مقتل نادية ست الشاى الماساوية, ده كلو و هو متقمص شخصية الغيرة على الشرطة, و هو الاعلى صوتا و انتشارا هنا. |
ولا ازيد على كلام عصام جبر الله
| |
|
|
|
|
|
|
Re: ايه قصة البواليس المدورة في المنبر دي! (Re: Marouf Sanad)
|
Quote: كان ناس البوليس الواقفين لينا في الباب ديل خشو لينا لي جوة شوية الدفار دا لسة بشيل |
بكرررررررررررررررررررري الحق معروف سند قال انو سودانيز اون لاين دفار.. قادر تتخيل معاي انو موقع(هادف) زي سودانيز يوصف بالدفار؟؟ معناها معروف قاصد يقول انك يا بكري فيما معناه انك سواق دفار...
ومن هنا الرجاء تطبيق اللائحة عليه.. اسحب باسويردو.. منها بتلقي ليك كم دعوة من المدام.. ومنها انحنا(المرافيد واهل المرافيد) نتجدع في البوست دة..
| |
|
|
|
|
|
|
Re: ايه قصة البواليس المدورة في المنبر دي! (Re: ابراهيم الرشيد عبدالرحمن وراق)
|
Quote: عرفته... اول حرف فى اسمه ي... وعنده صلعة... وصحبه معتز خوجلى... |
انا لو ما شقية البيدخلني شنو في جرجرة مع البواليس.. ههههههههههههههههههههههههههههههههههههههه
يا ابراهيم.. اخوي دة من شدة ما بريدو لمن ما عارف اوصف ليكم كيف.. والله ما شايفة ربناخلق في الدنيا غيرو.. ما عارفة انا ذاتي فارقتو كيف؟؟
هيجت علي المواجع.. الله يسامحك.. ــــــــــــــــــــــ معروف دة لسه قاعد في الدفار دة(علي قولو)..
| |
|
|
|
|
|
|
Re: ايه قصة البواليس المدورة في المنبر دي! (Re: ابراهيم الرشيد عبدالرحمن وراق)
|
المحترم جنابو وراق احكى ليك قصة حصلت قريب فى احدى اقسام الشرطة بولاية الخرطوم ، وصل بلاغ سرقة للقسم المعنى بوقوع حادثة سرقة فى منزل دبلوماسى باحدى ضواحى الخرطوم الراقية وتحرك المتحرى المناوب مع تيم من مباحث القسم لزيارة مكان الحادث ، تتخيل حصل شنو ؟ اثناء تجول افراد المباحث فى ارجاء المنزل للعثور على اى دليل يقود للجانى عثر احد الافراد على كروت اسكراتش فى احدى الغرف موضوعة فى طربيزة طوالى شالة وختاها فى جيبو وانتهت مهمة فريق البحث ورجعوا القسم ، بعد خروجهم مباشرة الخواجية فقدت الكروت ومشت القسم وقابلت رئيس القسم واشتكت من تصرف فرد المباحث باخد كروت الشحن بدون اذنها وطبعا رئيس القسم زعل من الاتهام دا ودافع من زولو دفاع شديد بس صاحبتك الخواجية جابت الدليل القاطع وهو شريط كاميرا المراقبة الموزعة فى كل ارجاء المنزل والضابط المسكين شاف زولو وهو بيشيل كروت الشحن وبيختها فى جيبو وكانت فضيحة بجلاجل .!! تم الاعتذار للخواجية وتشكيل مجلس تحقيق للرقيب المعنى وتحويلو لمحكمة شرطة وتم عزلو من رتبة الرقيب الى رتبة العريف ونقلو لرئاسة المحافظة فى تلك المحلية .. مع احترامى تانى للشرطة ياوراق دا انت بتسميهو شنو ؟ مش حاميها حراميها .؟؟
| |
|
|
|
|
|
|
Re: ايه قصة البواليس المدورة في المنبر دي! (Re: مزمل خيرى)
|
Quote: وتشكيل مجلس تحقيق للرقيب المعنى وتحويلو لمحكمة شرطة وتم عزلو من رتبة الرقيب الى رتبة العريف ونقلو لرئاسة المحافظة فى تلك المحلية .. |
الاخ مزمل
تحياتى
لم نقل ان افراد الشرطة منزهون عن الخطا, وكما ذكرت لك سابقا انهم شريحة فى المجتمع فيها الصالح والطالح
وهو ما اتفقت فيه معنا, ولا ندافع عنها بالباطل, والشرطة ليست فوق النقد, والاقتباس اعلاه دليل على ان الشرطة
تحاسب منسوبيها لذا انشات المحاكم التى اشرت اليها بادارة امن الشرطة للفصل فى الاتهامات الموجهة الى رجال
الشرطة.
لك الود
| |
|
|
|
|
|
|
Re: ايه قصة البواليس المدورة في المنبر دي! (Re: ابراهيم الرشيد عبدالرحمن وراق)
|
الأخ العزيز (العريس) معروف
تعرف لما أخونا علي سر الختم فتح البوست بتاع دفتر أحوال الشرطة قلتا ليهم يا ناس البوليس ما تعملو لينا إنقلاب في البورد ده... ويعلم الله الحذزت منه شكله صايير!
يا أخي مشكلتهم بس إنهم ناس كويسين الجونا ديل... يعلم الله إنهم ناس راقيين ما ناس إنقلابات
التحية لكل أشراف البوليس كان جوه كان بره....
| |
|
|
|
|
|
|
|