ياناس المنبر العام الفيكم اتعرفت وخاصة بورداب الدوحه؟؟ ياعيب الشووووووم؟؟؟

المنبر اصبح ناسات وقروبات ووجاهات وشيلنى واشيلك وبوستى وبوستك؟ اوكى ماعندنا مانع لكن
فى اشياء معروفه لنا كسودانيين تمثل ثوابت وقيم كالمشاركة فى الافراح والاتراح والمواساة
اجتمعنا هنا اخوه نختلف فى الالوان والافكار والتوجهات لكن تجمعنا اشياء عديده وروابط وثيقه
اهمها الوطن والتراب .
مالفت انتباهى واثار حفيظتى هنالك العديد من البوستات فتحت امس خاصة ببعض زملاءنا هنا من مرض
وعافيه وووفاة كبوست الاخت اسيا ربيع ومرض والدة الاخ الاستاذ محمد السنى دفع الله وخبر وفاة
والدة زميلنا بالمنبر من بورداب الدوحه الشاب الخلوق/اليسع نورين حيث حدثت الوفاة يوم امس
الجمعه صباحاوكعادته تفضل الاخ هرون دياب بفتح بوست عزاء ومواساة له فى صباح امس الجمعه
المؤسف لم يتم التداخل فيه خاصة من بورداب الدوحه رغم مشاركاتهم التى لاتخطئها العين فى كثير
من البوستات خاصة بوستات الترحيب ببعض البورداب الضيوف وبعض البوستات الاخرى ولاحظو مشاركاتكم
فى تلك البوستات مع العلم ان هرون دياب هو الذى انزل بوست مرض والدة السنى وخبر وفاة والدة
الزميل اليسع نورين ولفت انتباهى ايضا امس بمقر العزاء فى الدوحه لم اجد بوردابى واحد من بورداب
الدوحه حيث غادرنا امس الزميل اليسع لتلقى العزاء بالخرطوم.
في ذمة الله...والدة عضو المنبر اليسع نورين....صادق التعازي
صفا.. انتباه..حنين للبلد شرفت الدوحة..(مش حتقدر تغمض عينيك)...

؟

أخي الحبيب ضحية

كل ما ذكرته هنا صحيح
وسلامات لكل مريض
وأخلص التعازي لكل حالة وفاة

بس أفيدكم بأن يوم الجمعه قد يكون يوم راحة ونادراً ما تجد الناس تدخل البورد
والأهم من ذلك أننا كسودانيين مهما اختلفت توجهاتنا فإننا نلتقي في المناسبات حلوها ومرها
وبيني وبينك فقد تغيبت عن البورد لايام لأسباب مرض والدي الذي أدخل أيضاً مستوصف النيل الأزرق ومستشفى الشعب وحالياً هو طريح الفراش في مستوصف آخر بأم درمان

أسأل الله أن يمن عليه ولكل المرضى بالشفاء والسلامة
وأن يجعل كل من غادر هذه الحياة الفانية ضيفاً عزيزاً في جناته.

وشكراً

الحبيب / ضحية

والله حقيقة دا لوم مهذب جدا واهلنا قالو الما لامك ما دارك ..
فشكرا ليك للتنبيه واعذرنا ان لم نتداخل في بوست العزاء خاصة
وانا لا افرق ابدا في تلك البوستات الاجتماعية ...

نحن مكانتك زاتا ما ساهلة عندنا ..

شكرا ليك

سلامات يا ضحية,,
كتب الأستاذ عادل التجانى,,

Quote: بس أفيدكم بأن يوم الجمعه قد يكون يوم راحة ونادراً ما تجد الناس تدخل البورد والأهم من ذلك أننا كسودانيين مهما اختلفت توجهاتنا فإننا نلتقي في المناسبات حلوها ومرها

كلام الأخ عادل أعلاه هو الحقيقة وفى إعتقادى أن بوستات العزاء والمجاملات الإجتماعية كثيرا ما تدخل الناس فى بعض الحرج واللوم ولكن تبقى الحقيقة بأن إختلافنا أو إتفاقنا
لا يجب أن يؤثر على تلك الواجبات وهو ما يمكن ملاحظته هنا وفعلا أيام آخر الأسبوع تكون غالبا أيام
مزحومة ويكثر فيها البعاد عن المنبر وكل بأسبابه خاصة هذه الأيام,,

Quote: فقد تغيبت عن البورد لايام لأسباب مرض والدي الذي أدخل أيضاً مستوصف النيل الأزرق ومستشفى الشعب وحالياً هو طريح الفراش في مستوصف آخر بأم درمان

عاجل الشفاء والعافية لوالد الأخ الأستاذ عادل التجانى
وربنا يواليه بالعافية ويصبغ عليه أثواب الشفاء والصحة وعلى جميع الأهل والناس,,,

مودتى,,

Quote: كلام الأخ عادل أعلاه هو الحقيقة وفى إعتقادى أن بوستات العزاء والمجاملات الإجتماعية كثيرا ما تدخل الناس فى بعض الحرج واللوم ولكن تبقى الحقيقة بأن إختلافنا أو إتفاقنا لا يجب أن يؤثر على تلك الواجبات وهو ما يمكن ملاحظته هنا وفعلا أيام آخر الأسبوع تكون غالبا أيام مزحومة ويكثر فيها البعاد عن المنبر وكل بأسبابه خاصة هذه الأيام,,

ايمن الطيب

سلام وتقدير

كلامك ميه فى الميه بس انا لاحظت مشاركات البعض فى المنبر دون الانتباه لبوست العزاء وايضا لم الحظ حضورهم
لتقديم العزاء للاخ اليسع قبل ان يغادر .

Quote: كل ما ذكرته هنا صحيح وسلامات لكل مريض وأخلص التعازي لكل حالة وفاة بس أفيدكم بأن يوم الجمعه قد يكون يوم راحة ونادراً ما تجد الناس تدخل البورد والأهم من ذلك أننا كسودانيين مهما اختلفت توجهاتنا فإننا نلتقي في المناسبات حلوها ومرها

شكرا استاذى الفنان/عادل التجانى

وانا قصدت فقط الفت انتباه الزملاء وصادق امنياتى ودعواتى لوالدكم العزيز
بالشفاء التام واجر وعافيهانشاء الله

Quote: والله حقيقة دا لوم مهذب جدا واهلنا قالو الما لامك ما دارك .. فشكرا ليك للتنبيه واعذرنا ان لم نتداخل في بوست العزاء خاصة وانا لا افرق ابدا في تلك البوستات الاجتماعية ...

علاء الدين ودحيموره

ناس الرياض ديل ناس مشاركات وناس واجب الا اللوم بجى بالغفله
شكرا لمرورك وكلماتك الطيبات وانت ذاتك والله ماك ساهل.

ضحية
لك التقدير
وتعازينا الحارة للاخ اليسع في فقده العزيز
شخصيا لم انتبه لبوست الاخ هارون دياب

Quote: ضحية لك التقدير وتعازينا الحارة للاخ اليسع في فقده العزيز شخصيا لم انتبه لبوست الاخ هارون دياب

شكرا يا امير انت معروف زول واجب والزول ده جارك فى بن عمران

أخي الكريم ضحية إبراهيم
شكراً لك عزيزي على هذا التنبيه المهذب جداً ..
ولك أن تعلم بأننا ( ضحية ) لعدم وجود نت بالمنزل ... وهو ما يجعلنا ندخل في حرج مع الاخوة والاخوات .... وصادق المواساة لاسر جميع المتوفين وخالص الامنيات لكل عضو جديد وكل طائر مرتحل .

أخي ضحية

شكراً لك ولأخي ايمن الطيب
وأرجو التفضل بتزويدنا عبر هذا البوست بهاتف للاخ اليسع في السودان ما أمكن

استاذ ضحية
انا عن نفسي تداخلت في كل البوستات المشار اليها
وامس الجمعة الناس بين نيام وبين قضاء واجبات منزلية وبين السفارة

احنا كسودانين لا يمنعنا الا الشديد القوي من المجاملة

وشكرا لعتابك

لها الرحمه والمغفره وجعل الله قبرها روضه من رياض
الجنة ..احر التعازى للاخ اليسع وللاسرة ...
لم انتبه للبوست المعنى ..واول مرة اعرف ان الاخ اليسع مقيم
هنا فى ا لدوحة ..

لعمنا التجانى والد الاستاذ عادل التجانى ولوالدة الاستاذ محمد السنى
امنياتى ودعواتى بعاجل الشفاء و سرير عافيه ان شاء الله ..

Quote: لم انتبه للبوست المعنى ..واول مرة اعرف ان الاخ اليسع مقيم هنا فى ا لدوحة ..

الزعيم/محمدعبدالرحمن
الاخ اليسع نورين مقيم بالدوحه ويعمل بوكالة الخليج قطر منذ سنين وهو صديق
للاخوه هرون دياب ويسرى صلاح

Quote: انا عن نفسي تداخلت في كل البوستات المشار اليها وامس الجمعة الناس بين نيام وبين قضاء واجبات منزلية وبين السفارة احنا كسودانين لا يمنعنا الا الشديد القوي من المجاملة وشكرا لعتابك

الاخت العزيزه/شبكه

والله للامانه انا بشهد ليك بمشاركاتك الملحوظه والسريعه فى كل بوستات الافراح والاتراح والنداءات الانسانيه
لكن قصدن فقط كماذكرت لفت انتباه الاخوه بالمنبر خاصة بورداب الدوحه مكان الحدث

Quote: ولك أن تعلم بأننا ( ضحية ) لعدم وجود نت بالمنزل ... وهو ما يجعلنا ندخل في حرج مع الاخوة والاخوات .... وصادق المواساة لاسر جميع المتوفين وخالص الامنيات لكل عضو جديد وكل طائر مرتحل .

عماد محمود
ماكفايه اناالضحيه ولا برضوا عاوز تجاملنى وتبقى(ضحيه)

ندعو لوالدة الاخ اليسع نورين بالرحمة والمغفرة.. ...

البركة فيكم جميعا..

أخونا العزيز ضحية

ده تنبيه كويس للناس عشان تنتبه للمسائل دي ، لأهميتها..
في بوست تاني غير بتاع هرون وفي ناس عزت فيهو وأنا منهم
لكن بأمانة ما عرفت إنو في الدوحة ولا مكان العزاء

دعواتنا بالشفاء لوالد أخونا عادل التجاني.

سلام يا ضحية
ولومك علي العين والراس يا ضحية
والاخ نورين اول مرة اعرف والله انو قاعد في الدوحة
وكل التعازي والاسي لمصابه الجلل...


بوست والدة السني شفت بتاع هارون مع تنبهك ده
وكنا قد كتبنا في بوست اخر لامر الشيخ عن مرض الخالة ستونة


وشكرا يا ضحية علي هذا اللفتة وان كانت حاارة لكن الواجب واجب

والله يا ضحِية أحَرجتنا ساي بلا سبب ... يعني بِقت فينا إتنين
عارِف نِيتك بيضا لأني عارفك زول أبَيض جُوه وبره عِلا الإحراج
تم وخلاص ... أنا مثلاً ما بقدر أتابِع كُل العناوين بفتح أول
ما أخُش المنبر البوست/البوستات العاميلا أنا وبعدين بعرِج
على البُوستات المُتداخِل فوقا وبعايِن سريع على عناوين
الصفحة الأولى ... ومرات بلقى بيت فُراش منصوب في المنبر
ما بمشي عليهو ... بتكون حالتي ما ياها ... زي ما مرات
بسمع بِوفاة في الواقِع وما بقدر أمشي أعزي فوقا علشان
حالتي في الوكِت داك ما بِتكون طَيِبة ... بعد بوستك المُحرِج
ده تاني الواحِد عِلا يِقنِب يقرأ عِنوان عِنوان مِن الصفحة الأولى
حد الصفحة الخامسة علشان يُمرُق مِن اللوم ... عِلا بتكون
المُجاملة فوقو ظاهرة ... حقو بوستات مِتِل دي زاتا ما تكون
في المنبر (الموت/الفرح) مُش كِفاية شيل الحِس في الواقِع كمان
تبقى فينا في الأسافير ...

يا ضحِية وين الجِبنه ولا زيت السِمسِم ما فاكِر ... المُهِم إنت
وعدتني بِواحدة فوقُم ... أها دي فضيحة على الملأ ...

والله يا كيكي وعزام لو في إحراج عاد اناالإتحرجت






يا ضحيةابراهيم ياود امي اسه كان في داعي لوضع الامثلة الحية دي ماكان تعمم الكلام بدون خت رابط....اسه انا اودي وشي وين ؟؟؟


النصيحة يا الله اتعقدت.

Quote: والله يا ضحِية أحَرجتنا ساي بلا سبب ... يعني بِقت فينا إتنين عارِف نِيتك بيضا لأني عارفك زول أبَيض جُوه وبره عِلا الإحراج تم وخلاص ... ... بعد بوستك المُحرِج ده تاني الواحِد عِلا يِقنِب يقرأ عِنوان عِنوان مِن الصفحة الأولى حد الصفحة الخامسة علشان يُمرُق مِن اللوم ... عِلا بتكون المُجاملة فوقو ظاهرة ... حقو بوستات مِتِل دي زاتا ما تكون في المنبر (الموت/الفرح) مُش كِفاية شيل الحِس في الواقِع كمان تبقى فينا في الأسافير ... يا ضحِية وين الجِبنه ولا زيت السِمسِم ما فاكِر ... المُهِم إنت وعدتني بِواحدة فوقُم ... أها دي فضيحة على الملأ ...

عزام حسن فرح انت عامل زى قلم الرصاص المبرى من جهتين يعنى زول شيخ من ناحيتين
والعيب مابشبهك واللوم مو حقك نحنا فقط حبينا نببه الاخوه عشان اللوم
ومافى احراج بين الاخوان والاخوان زى الايد للخشم.



الجبنه جاينها تانى الا نحنا طالبنك جيه مع بت ابراهيم وتعال بنديك زيت سمسم ونمسحك

Quote: سلام يا ضحية ولومك علي العين والراس يا ضحية والاخ نورين اول مرة اعرف والله انو قاعد في الدوحة وكل التعازي والاسي لمصابه الجلل... وشكرا يا ضحية علي هذا اللفتة وان كانت حاارة لكن الواجب واجب

شكرا ياكيكى والرجل من الدوحه وصديق عزيز ومشارك

Quote: ده تنبيه كويس للناس عشان تنتبه للمسائل دي ، لأهميتها..

الاستاذ/صلاح عبد الله
هذا هو الهدف من البوست ليس الا شكرا لمرورك

Quote: والله يا كيكي وعزام لو في إحراج عاد اناالإتحرجت يا ضحيةابراهيم ياود امي اسه كان في داعي لوضع الامثلة الحية دي ماكان تعمم الكلام بدون خت رابط....اسه انا اودي وشي وين ؟؟؟ النصيحة يا الله اتعقدت.

اختنا حنين ماتتعقدى ولا حاجه وانا والله ماقاصدك انتى كل مافى الموضوع لفت انباه اخوانا بورداب الدوحه ليس الا
وماتتحسسى اكتر من اللازم .

فوق

الرحمة والمغفرة للفقيد ونسال الله حسن العزاء

عاجل الشفاء لكل المرضي بدون فرز

اخي العزيز ضحية

نسال الله تعالي الرحمة والمغفرة لكل اموات المسلمين.

الحمد لله الكثيرون يواسون ويعزون من خلال المنبر حتي لمن لا يعرفونهم.

فالدعاء لاموات المسلمين اراه واجب علي كل مسلم.

وكما قال صديقي عادل التيجاني الاجازات الاسبوعية او الانشغال قد يكون السبب ليس الا.

ولكن صدقني ليس هناك تعمد في الاهمال

ومثل هذه الامور لا يجوز فيها تعمد الاهمال.

انا شخصيا مثلا في هذه الايام نادرا ما افتح المنبر واذا فتحته يكون ذلك لهدف معين ولموضوع معين.

وأثناء ذلك قد تقع عينك علي اسم تعرفه سواء كان كاتب او مكتوب عنه.


ويقيني ان الكثيرين مثلي.

والعزاء في جميع اموات المسلمين سائلين المولي عز وجل ان يتغمدهم بواسع رحمته ومغفرته وان يلهم ذويهم الصبر والسلوان

والدعاء الخالص لكل مرضي المسلمين بالشفاء التام.


وشكرا للفت النظر .