Post: #1
Title: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 06:44 AM
يسعد صباحكم الحلو ..
بصراحة عندي سؤال بريء جدا وليس وراءه أي أهداف أو أجندة ...
نحن كسودانيين طيبين وناس حارة وشيالين تقيلة إلخ .. لكن لماذا نتحدث دائما بأعلى تون بينما يتحدث
الآخرون بمنتهى الهدوء والرقة.. وعندما تشاهد سوداني يتحدث من هاتفه النقال في الشارع العام تعتقد
أن من يحدثهم يعيشون في جذر الواغ واغ أو (الواء واء ) كما يقول المصريون ..فالكل يعرف أنه أرسل
لزوجته 200 ألف جنيه للمصاريف ولوالدته مئة ألف والكل يعلم أن المقاول ضحك عليهوأن تكاليف البناء
تجاوزت الحد وأن ابن خالته الذي يعيش معهفي الإمارات لم يخبره بموعد سفره لكي لا يحمل له الشنطة
التي يريد أن يرسلها لهم بمناسبة العيد..إلخ..
وعندما تجبرك الظروف لتكون وسط لمة نسوان(سيدات) عشان ما نزعل حدا تفتكر إنه في مظاهرة هادرة تندد
بارتفاع سعر الخبز ..(كلهن يتكلمن وكلهن يستمعن في الوقت نفسه ولا تفوت على أي واحدة منهن أدق
التفاصيل ..(حاجة غريبة)..(وش مستغرب جدا).
زوجي قبل الزواج كان يكلمني بهمس حتى أكاد أن لا أسمعه وبعد الزواج يسمع الجيران هدير صوته,
وعندما يناديني لأناوله كوبا من الماء كانت ابنة الجيران هي التي ترد عليه لأنها تحمل الإسم
نفسه !!!..(وش ميت من الغيظ )..
أبناؤنا عندما يتعاركون يكون الصوت العالي سلاحهم وعندما يشاهدون التلفاز يغلق ابناء الجيران
أجهزتهم ويتابعون الرسوم المتحركة معنا(صوت بدون صورة ) وعندمايسافر هؤلاء الأبناء برفقتنا في
الإجازات لا يستطيع أي مسافر آخر معرفة موعد هبوط طائرته أو إقلاعها بسبب ما يحدثونه من
ضجيج وإزعاج .. الأمر الذي يدفعني بأن أجزم أن التلوث السمعي الذي يصيب مختلف أرجاء العالم لنا
نصيب 50% منه وللمصريين النصيب الآخر ..إذا ما ذنب الشعوب الأخرى التي ابتلاها الله بأنواع أخرى من
أنواع التلوث.
عندما تتحدث زميلتي الشامية مع زوجها يراودني شعور بأنهما لم يتزوجا بعد رغم مرور عشرين عاما
على زواجهما وعندما تتحدث إحدى الجارات السودانيات مع زوجها أكاد أن أجزم أن كل من بالبناية عرف
أنهاتريد خبزا وحليبا كما تحذره من التأخير في الشغل كعادته رغم مرور خمسة أشهر فقط على
زواجهما..أما زوجها فكل من يستمع إلى حديثه معها كان يعتقد أنه يكلم نفرا في الفرقة الرابعة مشاة..
عمومالا يزال سؤالي حائرا هل الصوت العالي نعمة أم نقمة؟ وهل الحديث بصوت هاديء سمة من سمات الحضارة
أم نوع من أنواع الميوعة وضعف الشخصية كما يعتقد البعض ؟؟ وفتكم بعافية..
|
Post: #2
Title: Re: قل لي ولو كذبا كلاما ناعما .....
Author: عماد محمود علي
Date: 05-20-2009, 06:57 AM
Parent: #1
عطوفة صباح الخير ...
السودانيين بطبعهم سواء رجل أو إمراة ناس خشنين ، أها من وييين ياأمي يجيبوا صوت نانسي عجرم!!! ولاّ هيفاء وهبي ؟!!!!!! كده أسالي شيقا الممسوخ بوريك الكلام بكون كيفن .... فتك بعافية أمي ...
|
Post: #6
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 08:18 AM
Parent: #2
عمدة ...
يسعد صباحك الجميل ..
والله زي ما الغنا بقت الناس تتعلموا حتى لو مافي موهبة المفروض نتعلم الكلام الهادي !!
شيقا دة مرات أنا بسمع صوته من مسقط وكأنه في ابوظبي ...
ويجعله عامر ..
|
Post: #10
Title: Re: قل لي ولو كذبا كلاما ناعما .....
Author: عماد محمود علي
Date: 05-20-2009, 08:26 AM
Parent: #6
| Quote: والله زي ما الغنا بقت الناس تتعلموا حتى لو مافي موهبة المفروض نتعلم الكلام الهادي |
عاد كيفن يابت أمي ... أبو طبيع مابغير طبيعته ... وعمره صوت الغراب ماببقى ذي هديل الحمام .. ما بتتبقى يابت أمي ... مابتبقى ...
هسه العريبي شيقااا ده ممكن في يوم من الأيام صوته ده ما يصل المغرب العربي ؟ يستحييييل !!!!!
|
Post: #14
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 08:40 AM
Parent: #10
كلامك صحيح 200 في المية الطبع غلب التطبع ..
شكر عمدة طلتك بالدنيا...
|
Post: #3
Title: Re: قل لي ولو كذبا كلاما ناعما .....
Author: SHIBKA
Date: 05-20-2009, 06:57 AM
Parent: #1
والله سؤالك سؤال
لكن احنا اتعودنا على الحيشان والصوت مهما كان عالي بروح
لكبر الحوش طبعا
لكن جينا للحتت الضيقة والشقق اتغير ما حولنا وما اتغيرنا احنا
دا مجرد تخمين
|
Post: #7
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 08:20 AM
Parent: #3
شبكة ..
صباح الورد ..
أكان بقت على الحيشان هينة ولكن ما رأيك في صراخ الموظفين في المكاتب والممرضات في العنابر
وضباط الجوزات في المطار .. حاجة تجنن ..
شكرا على الطلة ..
|
Post: #16
Title: Re: قل لي ولو كذبا كلاما ناعما .....
Author: SHIBKA
Date: 05-20-2009, 08:48 AM
Parent: #7
Quote: أكان بقت على الحيشان هينة ولكن ما رأيك في صراخ الموظفين في المكاتب والممرضات في العنابر
وضباط الجوزات في المطار .. حاجة تجنن ..
|
استاذة عواطف
ديل كلهم صوتهم عالي لانهم جايين كلهم من الحوش
وتربية الحوش تعلم الصوت العالي لانو البتكوني بتتكلمي معاه في الحوش التاني او اكيد بعيد منك
وما تنسي من خلا عادتو قلت سعادتو
|
Post: #20
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 12:00 PM
Parent: #16
آخ يا شبكة ..
اللي شبكنا يخلصنا ..
طيب إذا قلنا الجماعة المذكورين أعلاه تربية حيشان فما سبب صراخ تربية الشقق والأستدوهات(غرفةواحدة)
والبنت هاوس ؟؟
عايزة إجابة رسيعة قبل ما أنتحر ...
|
Post: #28
Title: Re: قل لي ولو كذبا كلاما ناعما .....
Author: SHIBKA
Date: 05-20-2009, 05:30 PM
Parent: #20
عواااااااااااااااااااااااطف
|
Post: #4
Title: Re: قل لي ولو كذبا كلاما ناعما .....
Author: Zomrawi Alweli
Date: 05-20-2009, 07:08 AM
Parent: #1
التحية لك عواطف
| Quote: زوجي قبل الزواج كان يكلمني بهمس حتى أكاد أن لا أسمعه وبعد الزواج يسمع الجيران هدير صوته, |
ضحكت شديد والله ولكن عفارم على زوجك العزيز
زوجتي قبل الزواج كانت لا تتحدث في وجودي اطلاقا خوفا من ألحظ عليها شيئا من خطأ في اخراج الكلام او طريقة الرد وهكذا.. وكانت اذا تصادف وجودنا سويا في مجتمعنا النوبي الريفي كانت تولي وجهها شطر اليم الآخر واحيانا تسترق النظر..
اطفالنا والصوت المرتفع ناتج من ان حياتنا في البيوت المفتوحة والحيشان الكبيرة في الهواء الطلق لا يسمح بسمع الكلام الهادي او الصوت المنخفض، لذا فالانسان السوداني تعود على رفع الصوت حتى ولو كان همساً غزلياً..
وشكرا...
اعتقد لي عودة
|
Post: #8
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 08:23 AM
Parent: #4
زوزو ..
عفارم على زوجتك فيما يتعلق باستراق النظر وعدم الكلام .. أها وبعدين ؟ أقصد بعد الزواج شو صار؟
الكلام عينك عينك مش ؟؟
شكرا على مرورك الجميل .. في انتظار عودتك ..
|
Post: #5
Title: Re: قل لي ولو كذبا كلاما ناعما .....
Author: Adil Osman
Date: 05-20-2009, 07:14 AM
Parent: #1
ده كلو من الفول يا عواطف
|
Post: #9
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 08:25 AM
Parent: #5
عدولي ..
اسعدت صباحا ..
فعلا والله وما تنسى الفلافل كمان ..
هذه الصورة شطرت قلبي إلى نصفين رحم الله وأدخلها فسيح جناته مع الصديقين والشهداء ..
|
Post: #11
Title: Re: قل لي ولو كذبا كلاما ناعما .....
Author: مدثر محمد ادم
Date: 05-20-2009, 08:28 AM
Parent: #5
طوفه سلامات وصباحك سعيد
يمكن يكون من حرارة الشمس الصخانة
|
Post: #12
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 08:38 AM
Parent: #11
أكيد يا دودي ..
شكرا على الطلة الجميلة ..
|
Post: #13
Title: Re: قل لي ولو كذبا كلاما ناعما .....
Author: عزام حسن فرح
Date: 05-20-2009, 08:40 AM
Parent: #11
عواطِف ...
صباح/مساء الخير ...
لو عِرفتي ديل بِتعرِفي جواب لسؤالِك
- ليه كُبري < الحُرِية > بِنزِلِك على < السجانة > طوالي
- ليه سمو < الكِبريت > < الوردة > والإسم ده لايِق على العِطر
- ليه سم العِطر النِسائي < الصاروخ > والإسم ده لايِق على الكِبريت
- ليه أهلي المحس بِيدفِنو موتاهُم على < الكورنيش > في حله حمد وخوجلي وبيسكُنو في
في الضهره < الكلاكلات >
في واحِد كان بِيقرا قصيدة إساعيل حسن لِصاحبو الزهجان مِن السودان وإفريقيا زاتا
< تخَيل لو ما كُنت سوداني > قُبال ما يِكمِل رد عليهو < إنت غبي ولا شنو ما كُنت
حأتخَيل إني أمريكي وراكِب شُفروليه >
|
Post: #17
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 11:42 AM
Parent: #13
عزام فرح ..
منور الحتة ..
غايتو حأجاوب على أسئلتك لو عرفت لي سواق البوكسي ليه كاتب على بوكسيه ( ياربي دة من شنو)؟
ولو عرفت لي ليه ناس زقلونة زعلوا من الكمساري لم اختصر الإسم وقع ينادي على الركاب زقل زقل زقل
ولو عرفت لي الكلاكلة صنقعت ليه سموها كدة؟ وسعد قشرة دة منو؟ وحنان لبط دي بت ناس منو؟
يسعد مساك ..
|
Post: #15
Title: Re: قل لي ولو كذبا كلاما ناعما .....
Author: Huda AbdelMoniem
Date: 05-20-2009, 08:43 AM
Parent: #5
عطوفى تحياتى
ليك و حشة قدر صوت السودانية جارتك الفى البناية المقاصداكم
(يا ربى جنبك سودانية )
زمان كان صوتى منخفض ماكان فى اى حد ممكن يسمع لى و خاصة لمن كنا نجتمع فى منزل الوالدة يوم الجمعة رحمة اللة عليها طوالى انا ضايعة فى الزفة
لكن الحمداللة انا الان لمن اتكلم مع اولادى سابع جار بسمعنى و عينك ما تشوف الا النور لمن اتكم مع اخواتى فى السودان
لكى حبى
|
Post: #18
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 11:46 AM
Parent: #15
الحلوة ست الناس ..
هدهد...
ما تشوفيش وحش يا بعد عمري ..
شكرا على طلتك التي لا تشبه سوى النسمة في رقتها ...
ذكرتيني قصة واحد قال لمن كانوا مخطوبين كانت خطيبته بتتكلم وهو بيستمع وبعد ما اتزوجو بقوا
يتكلمو الإتنين وبيسمعوا الجيران (وش ضاحك ).. هي هي هي ..
|
Post: #19
Title: Re: قل لي ولو كذبا كلاما ناعما .....
Author: ismeil abbas
Date: 05-20-2009, 11:54 AM
Parent: #18
ألأخت الرائعة..عواطف..
Quote: نحن كسودانيين طيبين وناس حارة وشيالين تقيلة إلخ .. لكن لماذا نتحدث دائما بأعلى تون بينما يتحدث
الآخرون بمنتهى الهدوء والرقة.. وعندما تشاهد سوداني يتحدث من هاتفه النقال في الشارع العام تعتقد
أن من يحدثهم يعيشون في جذر الواغ واغ أو (الواء واء ) كما يقول المصريون ..فالكل يعرف أنه أرسل
لزوجته 200 ألف جنيه للمصاريف ولوالدته مئة ألف والكل يعلم أن المقاول ضحك عليهوأن تكاليف البناء
تجاوزت الحد وأن ابن خالته الذي يعيش معهفي الإمارات لم يخبره بموعد سفره لكي لا يحمل له الشنطة
التي يريد أن يرسلها لهم بمناسبة العيد..إلخ..
|
نحن حارين حسب جونا وبيئتنا..
نكتسب ألأشياء الجميلة من الشعوب.ولكن سرعان ما ننكشف عند الحارة..
أنا سعيد بكتاباتك...................مودتى..إسماعيل محمد احمد عباس...
|
Post: #21
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 12:04 PM
Parent: #19
سمعة ..
إن ثناءك العظيم هو ..
أكبر من لغتي ومن مفرداتي ..
وأكبر من طاقتي ..
هو قلادة الوفاء في عنقي ..
واللحظة الباهرة في حياتي ..
شكرا لك أخي العزيز ...
|
Post: #22
Title: Re: قل لي ولو كذبا كلاما ناعما .....
Author: مزمل التريكى
Date: 05-20-2009, 12:08 PM
Parent: #18
عطوفه ازيك
الكلام خلى .. الغناء زاتو نهرى
عليك الله اسمعى "قلبى هام مالو خديدك وجمالو" عند اولاد المورده
عشان تآمنى بالنهرى زاتو
مع انه الكلمات رقيقه جدا
|
Post: #23
Title: Re: قل لي ولو كذبا كلاما ناعما .....
Author: عزام حسن فرح
Date: 05-20-2009, 12:39 PM
Parent: #22
عواطِف ...
والله بالغتي وشذيتي عديل كده ... معقول تكوعجي كُل الأسمو ولامِن تصلي
لِعزام الشقي ده تقولي ليهو < عزام > كده حاف ... يعني < عزومي >
أكان بِتضُرُك في شنو؟ ... كدي عيِبِيها لي ... مالي فارزاني مِن الخلق
يخسي عليك زعلتيني والله ...
وعلى رأي الشاعِر:
وا أسفاي على صاحبي البِقى مِهَمِلني ...
لا يِسويني زي واحدين ولا يِنفلني ...
أكان يِديني ملحوظ مِن بدري ما يِغفِلني ...
|
Post: #25
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 01:09 PM
Parent: #23
والله يا عزام إسمك عاجبني فبقدر أهل العزم تأتي العزائم وكمان فرح ذاتها تفرح القلب عشان كدة ما
عايزة أخت ليهم توم وشمار ..
يا جماعة ما تفهمونا بأة هو أيه العبارة ؟؟ ...
خلاص يا عزومي بلاش تزعل من الآن فصاعدا دلع للطيش واللي بدو يصير ..
|
Post: #24
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-20-2009, 01:01 PM
Parent: #22
ميزو يعد صباحك ...
إنت في دة يا وادأمي ولا في فنان من فنانين الدرجة الأولى غناه كله نهير مرة جابوه في عرس لما بدا
ينهر في الناس بالغنا العروس خافت وقامت فلللي ...
شكرا على العبور الزاهي ..
|
Post: #26
Title: Re: قل لي ولو كذبا كلاما ناعما .....
Author: مجدي عبدالرحيم فضل
Date: 05-20-2009, 02:07 PM
Parent: #24
سلام ست الظواهر الأجتماعية الصاخبه .....
السودان ده جميل بصوتوا العالي وبتربتوا الرملية الناعمة وبحمرة الرقيطة وطمي النيل الجاري بأنحدار نحو شمال الوادِ الشقيقة مصر بالنسبة للسودان السودانيين كاتم صوت ،
وهنا عدة عوامل في تركيبة السودانية بتخلي الفولت عالِ وحرارة الشمس المولعة بتخلي الدم يغلي في العروق ولو ماتنفس بطق لينا عرق
الملاحظة جيدة وبتطلب دراسة بس كما الجوانب الأخري السودانية الجميل أكبر من السالبة مودتي للجميع عودة تحرك الظواهر الأجتماعية الي سطح المنبر.
،،،،أبوقصي،،،،
|
Post: #27
Title: Re: قل لي ولو كذبا كلاما ناعما .....
Author: الطيب شيقوق
Date: 05-20-2009, 04:01 PM
Parent: #26
طوفي
افو افو دا كلام شنو نحن معشر السودانيين اكان مشينا اسرعنا وكان حكينا اسمعنا وكان لبعنا اوجعنا ؟
تسحبي البوست ولا بدك لبعة؟
|
Post: #29
Title: Re: قل لي ولو كذبا كلاما ناعما .....
Author: malik_aljack
Date: 05-20-2009, 08:41 PM
Parent: #27
أستاذه عواطف قلمك يسعدنا و يهبشنا دائما
ما أعتقد هم السودانيين فقط فالمصريين أهل الصعيد عندهم نفس الكهرباء العلية
غايتو أعتقد أن بيئة الحيشان الكبيره المسورة و الغير مسوره
و البيوت الكبيره المختلفة تماما عن الشقق الضيقة
و عدم وجود مصدات الرياح و الغبار من مباني عالية و غيرها
سبب أساسي إنونحن في السودان قاعدين نعلي صوتنا و يادوبك يتسمع للطرف التاني
لو اتكلمنا الهمس بتاعك دا يا ما اتسمعنا يا اتفهمنا غلط؟؟؟!!!
إنت شفتي (قصد سمعتي) ناس بوركينا فاسو أو الكنقو الديمقراطيه بيتونسوا أوبيتناقشوا في موضوع؟
أنا سمعتهم و كنت قايل في شكله مدوره على مدار الساعة و غيرها
بالمناسبة إتريت سماعات (headset) لبعض الضيوف (الأهل) البزورزني عشان القبلهم شرطوا سماعات التلفزيون و أضنينا بالصوت العالي
هسه من ما جو بصرف لكل واحد سماعه (لا سلكيه موصوله بالتلفزيون) و على كيفهمما ما دام أنا ما سامع حاجه
|
Post: #30
Title: Re: قل لي ولو كذبا كلاما ناعما .....
Author: مصطفى البشير
Date: 05-20-2009, 08:55 PM
Parent: #29
| Quote: وهل الحديث بصوت هاديء سمة من سمات الحضارة |
أكيد.
وقالوا الشعوب على دين ملوكها........؟؟؟؟؟
|
Post: #31
Title: Re: قل لي ولو كذبا كلاما ناعما .....
Author: الوليد محمد الامين
Date: 05-20-2009, 09:15 PM
Parent: #30
الامر لا يخلو من بداوة وربما جلافة يا عواطف .
مودتي .
|
Post: #32
Title: Re: قل لي ولو كذبا كلاما ناعما .....
Author: محمد على طه الملك
Date: 05-20-2009, 11:35 PM
Parent: #31
| Quote: زوجي قبل الزواج كان يكلمني بهمس حتى أكاد أن لا أسمعه وبعد الزواج يسمع الجيران هدير صوته |
عفيت منه..
|
Post: #33
Title: Re: قل لي ولو كذبا كلاما ناعما .....
Author: الفاتح ميرغني
Date: 05-21-2009, 06:14 AM
Parent: #32
شكرا يا عواطف
بوست خفيف ولطيف ولكنه يسلط الضوء على خصائص الشخصية السودانية.
بعدين عجبتني نظرية الحيشان في تفسير الجهر بعقيرتناحتى في الونسة.
وقبل كده عبداللطيف البوني فسر نظرية " المهلة في تعاملنا مع الاشياء" على انها تعود لمساحة بلدنا الكبيرة.لذلك بنعمل اي شيء بمهلة حتى الحرب بتاعتنا ما بتنتهي إلا بعد عشرين سنة وكده.
تسلمي
|
Post: #40
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:37 AM
Parent: #33
Quote: شكرا يا عواطف
بوست خفيف ولطيف ولكنه يسلط الضوء على خصائص الشخصية السودانية.
بعدين عجبتني نظرية الحيشان في تفسير الجهر بعقيرتناحتى في الونسة.
وقبل كده عبداللطيف البوني فسر نظرية " المهلة في تعاملنا مع الاشياء" على انها تعود لمساحة بلدنا الكبيرة.لذلك بنعمل اي شيء بمهلة حتى الحرب بتاعتنا ما بتنتهي إلا بعد عشرين سنة وكده.
تسلمي |
عارف يا فوفو أنا جني وجن الصوت العالي يعني لو اتشاكل معاي زول صوته عالي وحاولت أجاريه على طول
صوتي بروح وبجيني وجع حلق لمن أمشي الدكتور (سبحان الله ) عشان كدة بحسد الناس الأصواتهم عاليو وبكتب
فيهم بوستات ..
أما حكاية المهلة دي في الحقيقة نحنا بنعمل أقل من مهلنا زي ما بقولو المصاروة ودرب السلامة للحول
قريب حتى أمثالنا كلها مهلة وقعاد سهلة ..
شكرا لك طلتك تسعدني ..
|
Post: #39
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:31 AM
Parent: #32
الملك ...
إنت الملك ..
الله يعافيك ويبارك فيك يا وأدمي !!!
|
Post: #38
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:29 AM
Parent: #31
ولو ...
صباحك عنبر ..
غايتو الجلافة دي في ناس ماجستير وناس دكتوراة ...
ويجعله عامر ..
شكرا على الزيارة ..
|
Post: #37
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:28 AM
Parent: #30
صفصف ..
صباحك ورد ..
أضحكتني جدا ..
ربنا يسعدك وبدون تعليق طبعا !!!
|
Post: #36
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:26 AM
Parent: #29
Quote: أستاذه عواطف قلمك يسعدنا و يهبشنا دائما
ما أعتقد هم السودانيين فقط فالمصريين أهل الصعيد عندهم نفس الكهرباء العلية
غايتو أعتقد أن بيئة الحيشان الكبيره المسورة و الغير مسوره
و البيوت الكبيره المختلفة تماما عن الشقق الضيقة
و عدم وجود مصدات الرياح و الغبار من مباني عالية و غيرها
سبب أساسي إنونحن في السودان قاعدين نعلي صوتنا و يادوبك يتسمع للطرف التاني
لو اتكلمنا الهمس بتاعك دا يا ما اتسمعنا يا اتفهمنا غلط؟؟؟!!!
إنت شفتي (قصد سمعتي) ناس بوركينا فاسو أو الكنقو الديمقراطيه بيتونسوا أوبيتناقشوا في موضوع؟
أنا سمعتهم و كنت قايل في شكله مدوره على مدار الساعة و غيرها
بالمناسبة إتريت سماعات (headset) لبعض الضيوف (الأهل) البزورزني عشان القبلهم شرطوا سماعات التلفزيون و أضنينا بالصوت العالي
هسه من ما جو بصرف لكل واحد سماعه (لا سلكيه موصوله بالتلفزيون) و على كيفهمما ما دام أنا ما سامع حاجه
طالع |
ود الجاك ..
شكرا على مداخلتك وكلماتك التي أسعدتني ..
يعني أنا لو مشيت بوركينا فاسو حأنتحر عديل كدة من أول يوم وبعدين فرة صرف السماعات دي عجبتني
بجد ..من الليلة ما أحارجع سماعات الطيارة عشان أقدر إلم أكبر عدد من السماعات ..
شكرا على الطلة الحلوة ..
|
Post: #35
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:21 AM
Parent: #27
| Quote: تسحبي البوست ولا بدك لبعة؟ |
شيقا يسعد صباحك ...
كل شيء ولا اللبع ..
بس لكل مقام مقال ..
|
Post: #34
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:19 AM
Parent: #26
شاعرنا الكبير أبو قصي ..
صباحك فل وياسمين ..
شكرا على هذه الإضاءة ولكن ..
الصوت العالي لما يكون في المكان المناسب بون شيء رائع وجميل ولكن أن أتحدث على الموبايل بأعلى
صوت والماعجبه يبلط البحر أكيد حاجة ما جميلة ..
عموما أشكرك يا سيد الكلمات مع تحياتي لقصي وإخوته ..
|
Post: #41
Title: Re: قل لي ولو كذبا كلاما ناعما .....
Author: هاشم أحمد خلف الله
Date: 05-21-2009, 06:43 AM
Parent: #34
| Quote: قل لي ولو كذبا كلاما ناعما ..... |
عطوووووووفة!!!
مشتاقين كتير والله يا عسل
نحن والحمد لله بنقول كلام ناعم قبل الزواج وبعد الزواج ظاتوووووووو
|
Post: #43
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:53 AM
Parent: #41
Quote: عطوووووووفة!!!
مشتاقين كتير والله يا عسل
نحن والحمد لله بنقول كلام ناعم قبل الزواج وبعد الزواج ظاتوووووووو |
هشوووووووووومي ...
عدت والعود أحمد ..
والله كان بتقول الكلام الناعم قبل وبعد الزواج تبقى إنت العسل مش أنا ..
شكرا على العبور الجميل ...
|
Post: #42
Title: Re: قل لي ولو كذبا كلاما ناعما .....
Author: الحاج حمد الحاج
Date: 05-21-2009, 06:48 AM
Parent: #34
عواطف
تحياتي
فعلا هي عادة سيئة و يصعب تغييرها و لكن علينا ان ناخد العادات الطيبة من الشعوب الخرى
تذكرت طرفة: كنت اعمل في احدى شركات القطاع الخاص في السودان ، المدير المالي من كريمة و عندنا سكرتيرة اسمها كريمة و الايام ديك الاتصالات صعبة تقوم كريمة السكرتيرة تتصل و بالتلفون الداخلي بالمدير المالي و هو مشغول و قالت ليهو معاك كريمة بالله المدير مسك السماعة و وقف علي حيلو و بدأ يصرخ الووووووووو الووووو منو معاي ، السكرتيرة قالت ليهو : بسم الله معاك انا كريمة ما كريمة البلد.
|
Post: #44
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-21-2009, 06:59 AM
Parent: #42
الحاج ...
يسعد صباحك ..
بصراحة مداخلتك ظريفة جدا يديك العافية ...
أما حكاية كريمة دي حكاية عجيبة جدا في واحد سوداني سمى ولده ظبي عشان الناس تقول ليه أبوظبي ..
فأيه رايك بقى ؟؟؟
|
Post: #45
Title: Re: قل لي ولو كذبا كلاما ناعما .....
Author: رأفت ميلاد
Date: 05-21-2009, 07:31 AM
Parent: #44
عطوفة صباحك خير
والله غادة محرجة وبايخة .. أمى الله يرحمها كنت بفتشا عند الجيران بمباراة الحيطان .. شغل حيشان زى ما قالت ليك شبكة .. لكن تعالى شوفى ناس مرتى الفى نص السوبر ماركت أخخخخخخ ..
هسة فى الفورم الكتابة بالصوت العالى لما تصنج أضانك
سعد زغلول قال مافيش فايدة
|
Post: #46
Title: Re: قل لي ولو كذبا كلاما ناعما .....
Author: الطيب شيقوق
Date: 05-21-2009, 08:30 AM
Parent: #45
| Quote: بس لكل مقام مقال .. |
لكن في واحدات في التلفون بقولن لى ارفع صوتك اسوى ليهن شنو ؟ التزم بقواعدك ولا اطيع اوامرهن ؟
ولا It depends upon the cirecumstances of each case
|
Post: #49
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-23-2009, 08:53 AM
Parent: #46
مهما يحصل ما ترفع صوتك ...
ومهما كان الكيس برضه خلي تقيل زي ميزان الدهب وما ترفع صوتك ...
|
Post: #47
Title: Re: قل لي ولو كذبا كلاما ناعما .....
Author: Ammir Mohamed
Date: 05-21-2009, 08:37 AM
Parent: #45
ذكرتني حاجة لطيفة جدا بالنسبة لي كلام النسوان كلهم في وكت واحد دي..
قبل سنة كدة جوني أهل المدام (أبو القدح وزوجته وأخواتها 2 من السعودية وخالتها 3 من السودان) فمشينا الحديقة المائية بتاعت أم القوين دي عشان أخليهم يتجدعوا بالبكيني وكدة :) المهم أبو المدام راكب معاي والنسوان كلهم لميناهم في سلة (حافلة) واحدة .. ونحن ماشين أبو المدام بقول لي تعرف منو الحيدخل الجنة الليلة!!! قلت ليه منو؟ قال لي سواق الحافلة لأنو حيتحمل النسوان ديل وصوتهم الكبير ده!!! وبعدين كل شوية يعاين للحافلة ورانا ويقول لي والله سواق الحافلة يؤجر!!
البوست خفيف وأحلى حاجة فيه كراتين الدلع البتوزعيها على المتداخلين (حمودي، عطوفي وهلم جرا:)
لك التحية
|
Post: #51
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-23-2009, 09:16 AM
Parent: #47
أموري ..
صباح الورد
| Quote: قبل سنة كدة جوني أهل المدام (أبو القدح وزوجته وأخواتها 2 من السعودية وخالتها 3 من السودان) فمشينا الحديقة المائية بتاعت أم القوين دي عشان أخليهم يتجدعوا بالبكيني وكدة :) المهم أبو المدام راكب معاي والنسوان كلهم لميناهم في سلة (حافلة) واحدة .. ونحن ماشين أبو المدام بقول لي تعرف منو الحيدخل الجنة الليلة!!! قلت ليه منو؟ قال لي سواق الحافلة لأنو حيتحمل النسوان ديل وصوتهم الكبير ده!!! وبعدين كل شوية يعاين للحافلة ورانا ويقول لي والله سواق الحافلة يؤجر!! |
صراحة مداخلة زي العسل يعني لا يفتي وأمير في المدينة ...
شكرا على ها الطلة ...
|
Post: #48
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-23-2009, 08:51 AM
Parent: #45
ريري ..
يسعد صباحك الجميل ..
والله زمان ..
أن غايتو أكتر حاجة بتزعلني لما الستات كلهن يتكلمن مع بعض وبي صوت عالي ولمن أشوف واحد في الشارع
بتكلم في الموبايل بأعلى صوت ..
شكرا على الطلة ..
|
Post: #50
Title: Re: قل لي ولو كذبا كلاما ناعما .....
Author: الطيب شيقوق
Date: 05-23-2009, 08:59 AM
Parent: #48
طوفي
نامن تجي ورينا انك جيتي عشان نعرف انك طليتي
|
Post: #52
Title: Re: قل لي ولو كذبا كلاما ناعما .....
Author: Abdlaziz Eisa
Date: 05-23-2009, 03:25 PM
Parent: #50
أستاذة عواطف
سلام
زارنا سوداني من ناس لندن المعروفين كأكبر جالية تحترف نضمي السياسة والمظاهرات هناك..
أمام مجمع تجاري بقلب سنغافورة بدأ النقاش.. الناس مندهشة وبعض الجيكسويات أصابن الهلع وناس السيكيورتي سجلوا حضور واستعداد, فاندفعت لأفض الحوار وفي غاية الحرج بهذا السلوك المتخلف..
وهو ما يمكن ان يؤدي للمساءلة القانونية هنا.. إثارة شغب وازعاج عام..
هذه عادة قبيحة ومحرجة جدا جدا..
لكن عندنا أقل وأفضل بكثير من شعوب غرب إفريقيا.. خاصة النجيريين والكاميرونيين..
Quote: والله بالغتي وشذيتي عديل كده ... معقول تكوعجي كُل الأسمو ولامِن تصلي
لِعزام الشقي ده تقولي ليهو < عزام > كده حاف ... يعني < عزومي >
أكان بِتضُرُك في شنو؟ ... كدي عيِبِيها لي ... مالي فارزاني مِن الخلق
يخسي عليك زعلتيني والله |
العزيز عزام.. أقصد عزومي
كلامك ده لطيف جدا.. أضحكني كثيرا..
نحاول شيخنا ابوبكر وعمو كمال يستخرجا ليك اسم دلع رطاني كمان..
بس المسنوح شيقا ممنوع من استخدامه..
تحياتي
عبدالعزيز
|
Post: #58
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-24-2009, 10:34 AM
Parent: #52
عزو
سلامات ..
والله حاجة مخيبة للآمال فعلا .. أمبارح كنت في عزومة عشا سيدات بتصدق لمن رجعت البيت بلعت بندول
كانن كلهن بتكلمن وبتضحكن في وقت واحد وأنا بقيت في وسطهن زي المجنونة أتلفت لي دي ألقى التانية
بتحكي .. أستمع لي دي ألقى واحدة تانية بدت موضوع .. وآآآآآآآآآآآآآآآآآآآآآآآآآه يابلد !!
شكرا عزو على الطلة ..
|
Post: #53
Title: Re: قل لي ولو كذبا كلاما ناعما .....
Author: Nagi Ahmed
Date: 05-23-2009, 03:28 PM
Parent: #50
سلام عواطف
نظرية الحيشان دى ما داخلة راسي
لانو المصريين في القاهرة شقهم صغيرة زي الزنازيين و بعد ده كله مزعجيين اكتر مننا
عايزين تفسير تاني
|
Post: #54
Title: Re: قل لي ولو كذبا كلاما ناعما .....
Author: حبيب نورة
Date: 05-23-2009, 04:42 PM
Parent: #53
الليلة يا منقة جارة ناعم
ودايرة الحديث الطاعم
مع أني ما عايز أفلسف ليك الأمور
و أقول ليك الطرح السوداني بعاني من عدم المقدرة
علي التوصيل بأسلوب اكثر حضارية
والنفسية قائمة علي أساس
بعتبر مثلاً أنو الصوت العالي حاجة تكميلية للرجولة
وبالبلدي
الساعة الراجل يقول لي مرتو هووووي
الجوطة دي شنو؟؟
ود عمتك الجابو شنو في الوقت دة
هو العيد عندكم في السودان؟
انا ما رسلت ليك المرة الفاتت 200 ريال
القروش الأنا بتعب فيها الليل والنهار
كملتيها لي حنة وتياب و بوبار
والقصة تجوط
والمرة المسكينة الصابرة علي هجرو
ونيران فراقوا
وتربية العيال
ويا بت هيي و يا ود تعال
الله يديها الصحة
ياخي ثقافة الهدية الحضارية التمدنية
مافي
ومع أنها نهج أسلامي
(تهادو تحابوا)
دة كلام كولن ولسون
واللا سمون دي بفوار بتقول فيه لي راجلا سارتر
بعد ما مسك منها أيدوا!!!
الموضوع ثمح
وداير ليه رجعة تاني
وانا سياستي مع بوستاتك
بخت نص الكلام
والباقي بجيه مرة تانية
شكلِ قزقزة كدة
|
Post: #60
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-24-2009, 10:41 AM
Parent: #54
حبيب نورة ..
مساء الفل ..
سعيدة جدا بالقزقزة بتاعتك ..
بصراحة إنت تنفع كانب سيناريو ..
شكرا لهذه الكتابة الجميلة ربنا يديك العافية ...
|
Post: #59
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-24-2009, 10:36 AM
Parent: #53
ناجي ...
صباحك ورد ..
أنا برضه نظرية حملان في الحيشان دي ما عاجباني لأنه الإماراتيين ما بعيشوا إلا في بيوت فيها حيشان
ومع ذلك صوتهم منخفض جدا ..
شكرا لدخولك الحوش .. بس اتكلم بصوت منخفض ...
|
Post: #57
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-24-2009, 10:29 AM
Parent: #50
شيقا ...
أنا جييييييييييييت
تسلم
|
Post: #55
Title: Re: قل لي ولو كذبا كلاما ناعما .....
Author: سيف الدين مصطفى كرار
Date: 05-23-2009, 05:19 PM
Parent: #1
مساء الزرد
هذا صحيح,تجدى هذا السلوك (رفع الاصوات فى المكالمات التلفونية)شائعا بين السودانيين وجميع
باقى الجنسيات الاخرى.
اما الكلام بالهمس فهذا ياتى اوتوماتيكيا لحالة حسب اهمية المكالمة.
نحن هنا فصول دراسية مضيفات ومضيفين وكباتن من جميع انحا العالم لذلك لامحل للاصوات المرتفعة
داخل المبنى الا بالهمس.
طابت ليلتك
|
Post: #61
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-24-2009, 10:44 AM
Parent: #55
أبو السيوف ..
طاب مساؤك ...
أجمل حاجة الهمس لأنه حيوفر عليك الكثير ..
عشان كدة إسماعيل حسن قال ..
لو بهمسة قول أحبك ..
لو بي بسمة قول أحبك ..
لو بتحلم في منامك
قول أحبك ..
لو ترسل لي سلامك ..
قول أحبك ...
شفت الرقي دة كيف ؟؟؟
|
Post: #56
Title: Re: قل لي ولو كذبا كلاما ناعما .....
Author: الشفيع محمد صادق
Date: 05-23-2009, 08:48 PM
Parent: #1
من يستمع إلى حديثه معها كان يعتقد أنه يكلم نفرا في الفرقة الرابعة مشاة..
---------------------------------
يسعدك مساك أستاذة عواطف ... واضحك الله سنك ...
أنا عندي غيتو إترقو بعد ١٥سنة لرتبة صول ... وعملت فيني نظام صمويل دو ... وبقينا نفر قصاد صول
شكرا لك علي فش غبينتنا من المراية
|
Post: #62
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-24-2009, 10:46 AM
Parent: #56
أخي الحبيب الشفيع ..
يسعد مساك الجميل ...
ومبروك الترقية ...
بس ما قلت الجماعة في سلاح الجو ولا البحرية؟؟؟
|
Post: #63
Title: Re: قل لي ولو كذبا كلاما ناعما .....
Author: بت قضيم
Date: 05-24-2009, 12:20 PM
Parent: #62
بوست ذي العسل
تعليقات لذييييييييييييييذة
ضحك عااااااااااالي
انت شفتي يا عواطف كمان لما الشاعر قال لي حبيبته (الكنينة يا بت مالك)
طوالي بتخيلها كاع ترد عليه (أم بنتو إن شاء الله)
في حفل زاهي المفروض أنه عرض أزياء ثياب سودانية لمصممة سودانية في مدينة جدة
المقدمة (وهي نفسها المصممة) كانت تقدم الثياب دون مايك (لزومها شنو التكاليف) وبعدين في نص العرض واحدة كوركت (الفعل نفسه صوته عالي) (يا فلانة يا فلانة) وكانت المقصودة المصممة (أهوووووووووون دي أنا ،،، شان ما تقولي ما جيتك)
وهكذا
وتقولي لي كلام ناعم يا هناية
|
Post: #64
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-24-2009, 01:03 PM
Parent: #63
العزيزة بت قضيم ...
يسعد مساك الحلو ...
أولا أشكرك على مداخلتك الظريفة في الحقيقةالصوت العالي مشكلة كبيرة بتميزنا عن غيرنا حتى غنانا
مخالف عن غيرناأصوات الفنانين والفنانات جهورية وهتافية ومع ذلك نقدمهم على أنهم أصحاب الأصوات
الرخيمة..
ضحكتيني بقصة عرض الأزياء والصوت العالي في الحقيقة إسمك ذاتو يا بت قضيم قاعد يضحكني لأني أول
ما أقراه بتجي صورة بت قضيم قدامي على طول بسنينتها المكسرة ديك ..
شكرا على الطلة ..
|
Post: #65
Title: Re: قل لي ولو كذبا كلاما ناعما .....
Author: سلمى الشيخ سلامة
Date: 05-24-2009, 02:58 PM
Parent: #64
يقول ليك كيف كلام ناعم وهو جواهو سيف المك نمر
وبراهو جينز
يا عواطف بت امى
النصيحة الثنائية دى كاتلانا
بالله الذى الواحد يكون حابى
احلى كلام
من تدخلى معاهو البيت تحت سقف واحد
الله لا وراك
واحد من شدة حبه لواحدة
كان معجب بسنونها وفلجتها
اول ماعرسا
يوم اتاشكلو
الساعة اليقول ليها
ـ امشى عاملة سنونك المفرقات ديل
ياخية القصة ما الكلام الناعم ، الكلام التفاهم والتناغم
عدم الكلام دا الجننا زاتو وحمانا العرس
|
Post: #66
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-25-2009, 12:13 PM
Parent: #65
سيدة الزمن الجميل ...
كل الحب ..
سعيدة بعبورك الذي لا يشبه سوى نسمة عابرة في مساء صيف عابر..
في الحقيقة كما تفضلت الموضوع بيكون قبل الزواج شكل وبعده شكل آخر للأسف ما عارفة البتغير أيه
شكل الزوجة ولا مشاعر الزوج؟؟
قالو في واحد لما كان في شهر العسل كلما تعتر زوجتو في سلم الفندق يجري يمكسها وهو يصرخ بأعلى
صوتو حاسبي ..حاسبي .. وبعد عشرة سنة جابها لنفس الفندق لما عترت قال ليها إنت عميانة ما بتشوفي
العمى إن شاء الله ها.. ها.. ها ..
غايتو ذكرتيني إنية السبب الحماني العيد هناك أحضرو ..
فعلا السبب الحماكي وجيه قوي ..
|
Post: #67
Title: Re: قل لي ولو كذبا كلاما ناعما .....
Author: Mohammed Haroun
Date: 05-25-2009, 12:30 PM
Parent: #66
أستاذة عواطف إزيك
عاوزة كلام ناعم ولا كلام طاعم؟؟ ولا كله عند العرب صابون؟؟
تحياتي
|
Post: #68
Title: Re: قل لي ولو كذبا كلاما ناعما .....
Author: عواطف ادريس اسماعيل
Date: 05-25-2009, 01:00 PM
Parent: #67
حمودي ..
يسعد مساك ..
والله إن بقى ناعم بدون شك بكون طاعم ..خلاف ذلك كله عند العرب صابون ..
|
|