Post: #1
Title: حبوبات اخر زمن (الالفية الرابعه) ... ياحليل زمان!!!!!
Author: علوبه
Date: 05-14-2009, 04:16 PM
Parent: #0
فى ذلك الزمن سيتغير كل شيء ... ستبلغ حبوباتنا درجة عالية من التشرب بمعطيات التكنولوجيا .. فهيا لندخل في عالم حبوبات الألفية الرابعة...................
قالت حبوبة (رؤية) مخاطبة حاجة "شاهيناز" التي كانت منهمكة في فرك البامية المحورة جينياً:
- والله يا شاهيناز أنا ما عارفاك بتفركي كيف بي (مفراكة الكهربا) دي الناس خلوها زمان وبقو يفركو بى (مفراكة الليزر)!! ..
ردت عليها حبوبة (رؤية) وهي تطفئ البوتجاز الذي يعمل بنظرية الأوتار الفائقة
- نسوي شنو يا بت أمي نحنا لسه ما دخلنا في عصر الصرخة العلمية لكن أسكتي ساي ما وريتك
أمس حاجة هيام بت ود الهانى عملت شنو؟! ..
نطـّطت حاجة شاهيناز عيونها تهيؤاً لاستقبال الشمار وقالت:
- مالا ؟! .. أنا عارفاها دي زولة عندها (ضلالات عولمية)!!
أجابتها حبوبة رؤية:
- أمس مشيت ليها البيت كنت دايرة لي (ثالث كرومات السايكوبالتيك) عشان ألون بى الخبيز .. لقيتا ليكي ماسكة (اللاب توب) بتاعا وعاملة (شات) مع واحد عجوز من (هضبة التبت) .. طبعا كلها قطيعة الكترونية.. تصوري المرا الما بتخجل دي! ..
ومواصلة قالت حاجة شاهيناز:
أنا زاتي المره دي (كجنتها) من ما سوت لينا القهوة في الجبنة (التيتانيوم) ، السبب لى حرقان ابا مايفكنى 3 يوم.. يعني ما سمعت بي (جبنة الألياف الضوئية)؟!
وواصلت حاجة شاهيناز:
أمس بعيد عنك مشيت أفحص (الجينات) بتاعتي .. أصلو عندي (جين) كده مغلبني قلت أقلعو أرتاح منو مرة واحدة .. وبالمرة غشيت الصائغ غيرت غوايشي بي معدن نفيس جديد إسمو (الزرانكلينيوم) جابوه من كوكب ما متذكراهو لكن بدور حول نجم اسمو (لالاند) مننا زي تمانية و تمانين سنة ضوئية.!
هزت حبوبة رؤية رأسها وقالت:
والله بقيتي خطيرة عديييل .. غوايشك بتاعت القلتيهو ده أنا زاتي ما سمعت بيها .. كدي وريني واحدة
قالت لها حبوبة رؤية:
ديل يا اختى للمناسبات بس ما بطلعو بيهن ساي ثم رفعت حاجبها الأيسر باندهاش مفتعل وأضافت
وبعدين إنت الظاهر عليكي برضو ما سمعتي بي شنطة اليد الجديدة العاملنها من (رقائق السيلكون)
سحبت حاجة شاهيناز نفساً عميقاً وهي تجهز عبارات مناسبة لترد بها هذه الهجمة الشرسة لترد لها البوبار بمثله ثم قالت:
حاجاتك القلتيها دي أنا صاح ما مرت علي .. لكن إنتي برضو ما سمعتي بي الكفتيرات الجديدة البتعمل بي (موجات ألفا) ....
وعندك كمان (الحلة الفوتونية) ودي بتنجض الملاح بـ (الطاقة القمرية.....)
وفي هذه اللحظة دخل عليهن (حاج رامي) زوج حبوبة رؤية وهو في الثمانينات .. وتوقف موارباً للباب ليتصنت على هذا (البوبار) المعتق، سمع حاجة شاهيناز تواصل حديثها لزوجته حبوبة رؤية وهي تقول: وبعدين أنا ولدي المغترب في (كوكب نبتون) جاب ليهو (ولد آلي) سغيروني يساعد مرتو في تقطيع السلطة وغسيل العـدة .. وفي هذه اللحظة دخل حاج رامي وقال:
قومن يا نسوان.. ان شاء الله تقوم بيكن قنبلة (بوزوتروجينية) تريحنا من نقتكن الكتيرة دي... قومن سون لينا الغدا!
|
Post: #2
Title: Re: حبوبات اخر زمن (الالفية الرابعه) ... ياحليل زمان!!!!!
Author: BitAlhana
Date: 05-15-2009, 09:50 AM
Parent: #1
لوووووووووووووول يا علوبه
خيااااااااااال واسع شديد
كويس ما ح نحضر الكلام ده ....
و يااااااااااا حليل حبوبات زمان و الله
|
Post: #3
Title: Re: حبوبات اخر زمن (الالفية الرابعه) ... ياحليل زمان!!!!!
Author: علوبه
Date: 05-16-2009, 11:04 AM
Parent: #2
سلام BitAlhana
اول حاجة مشكورة على الاضافة
تانى حاجة كل زمن بى ناسو
تالت حاجة ياحليل ناس حاجة فاطمة وحاجة سعيدة وحاجة BitAlhana
ســــــــــــــــــــــــــــــــــــــــــــــــــــــلام
|
Post: #4
Title: Re: حبوبات اخر زمن (الالفية الرابعه) ... ياحليل زمان!!!!!
Author: waleed dawash
Date: 05-16-2009, 12:17 PM
Parent: #3
الاخ علوبه
قصتك دي معادله لقصص الخيال العلمي
في السنوات السابقه ومنها ما اصبح واقع.
لصديقي ابن يحمل اسم( وليد ) و كنت ازورهم باستمرار
وفي مرة من المرارير لقيتو (وليد) عامل كبسيبه وزعلان
جدا... كيف و كيف يسموه وليد؟ وقال ( يعني انا لمن اكبر
يقولو لي يا جدو وليد؟)
وكان حاضرا ابن عمي (الشفيع)الله يطراه بالخير .. فقال له
(ماتزعل لانو حايكونو معاك ناس حبوبه نيرمين وحبوبه شاهنده
وجدو هيثم).
( ياعلوبه .. انا والله ماعندي مانع في حبوبه
حنكوشه لكن كمان ماراكبه لي حكاية (جد) حنكوش.
بصراحه كده.
|
Post: #5
Title: Re: حبوبات اخر زمن (الالفية الرابعه) ... ياحليل زمان!!!!!
Author: علوبه
Date: 05-17-2009, 11:35 AM
Parent: #4
سلام ياwaleed dawash
جدو وليد كيف حالك
طبعا جدودنا زمان وصونا على الوطن على التراب الغالى
ناس جدو وليد ديل وصيتهم حاتكون على شنو ؟؟؟
|
|