Post: #1
Title: وللإنقاذ عيون عسلية ايضاً !.
Author: عبد الله الشيخ
Date: 05-14-2009, 10:02 AM
Parent: #0
وللإنقاذ عيون عسلية
خط الاستواء
عبد الله الشيخ
رمت الإنقاذ أمس بسهم جديد من كنانتها، بعد أن ردحت فينا لعشرين سنة وهي مستمسكة بخطبة الحجاج بن يوسف في أهل العراق والتي قال فيها: (أنا ابن جلا وطلاّع الثنايا.. متى أضع العمامة تعرفوني)..
وقال فيها أيضاً: (والله لئن بقيت لكم لأؤدبنكم أدباً.. ولتستقيمن لي ولأجعلن لكل امرئ منكم في جسده ومن نفسه شغلاً).. انتهى..
السهم الإنقاذي الجديد خرج من القوس في سياقين، سياق المناسبة التي هي مؤتمر الإعلاميين السودانيين العاملين بالخارج، والسياق الآخر، وهو سياق (تاريخي) يتمثل في تقليد ثورة الإنقاذ الظافرة لثورة مايو المنتصرة أبداً بإذن الله!..
ولولا أن الأستاذ كمال عبد اللطيف نسي أو تناسى الإشارة إلى بدلة منصور خالد و(تباينها) مع الجلاليب والعمائم والصديريات! ولولا أنه أهمل في خطابه الضافي ذكر قهوة بت أم الحسن ووحل اللوري في القبولاب والباحا، وبيت الشعر الذي يقول (الأرض تنبت ألف ثائر), لولا هذا النسيان، المتعمد أو غير المتعمد لقلنا إن خطاب الأستاذ كمال هو نسخة معدلة من خطاب شهير للدكتور عمر الحاج موسى قاله امام لجنة مايو الكبرى بحضور اب عاج الذى صفق وابتسم كيفما اتفق!.
وعلى الإعلاميين السودانيين العاملين بالخارج الذين لبوا النداء ملاحظة فروق الوقت أيضاً..فقد استمعت اللجنة المركزية للاتحاد الاشتراكي للنسخة الأصلية من هذا الخطاب على لسان الدكتور عمر الحاج موسى في بواكير سنوات مايو، مما يعني أن الإنقاذ بدأت بمؤتمرهم الجامع هذا استهلالية عهد جديد.. عهد آخر، ترك وراءه التمكين وخطبة الحجاج فى اهل العراق واستبشر عهداً ليس فيه تجيير أو تحبير للآخرين.
ذهب الأستاذ كمال عبد اللطيف إلى (إحصاء أو تعداد) محاسن السودان وجماله..
وذكر بالاسم بت مسيمس وتاجوج وحواء الطقطاقة والرقابة القبلية وقانون الأمن ونزاهة الانتخابات, والهندي عز الدين وعثمان ميرغني وأكد أن الإنقاذ- في وضعها الراهن- تؤمن بـ(كلام الببكيك أحسن من كلام البضحكك) ودخل رويداً رويداً في عهد الإنقاذ الجديد قائلاً للإعلاميين العاملين بالخارج: (لا تبخلوا علينا بأية نصيحة ولو كانت رأياً مخالفاً)..
وقال أيضاً: (نريد أن نجند عقولكم وأقلامكم وكاميراتكم لترسموا لوحات مشرقات لوطنكم المشرق.. يا أحفاد الكنداكة).. وأضاف متوغلاً في شريعة الإنقاذ الجديدة: (ليست هذه محاولة من الحكومة لتجييركم لخدمة مصالحها، ولا لتقوم باستقطابكم لمصلحة أحزابها.. ولا نريد منكم أن تكونوا هتيفة للإنقاذ أو المؤتمر الوطني)..
ثم خلص الأستاذ كمال إلى ما يلي: (هدفنا من هذا الملتقى هو أن نتيح لكم الفرصة لتشاهدوا وطنكم عن قرب وتقرأوه بعيون عسلية)..
ما يهمني في هذه التغييرات (الجوهرية) فى سيرة الانقاذ الطويلة ، والتى ستحتفل بعيدها العشرين بعدشهر ونصف يهمنى أمر واحد.. هو أن الإنقاذ بعد التجربة صارت تعرف الفرق بين العيون العسلية، وبين (العيون السود كاحلات، يجرحنك وما سائلات.. ويا حلاتن! هن أساس الريد والجنون)!!
كيف نتصرف مع هذه الإنقاذ؟... بتنا هياماً في العيون السود، ويا حلاتن !..
فإذا بالانقاذ في ليلة واحدة تقوم بتركيب عدسات لاصقة من نوع العسللي!..
وهذا حقاً زمان العسل!..
|
Post: #2
Title: Re: وللإنقاذ عيون عسلية ايضاً !.
Author: عبد الله الشيخ
Date: 05-14-2009, 02:31 PM
Parent: #1
up
|
Post: #3
Title: Re: وللإنقاذ عيون عسلية ايضاً !.
Author: مهيرة
Date: 05-14-2009, 03:02 PM
Parent: #2
فإذا بالانقاذ في ليلة واحدة تقوم بتركيب عدسات لاصقة من نوع العسللي!..[/B]
انت ما ناقش ولا شنو ياود الشيخ!!!!
الوزير عاوز يقول: انه أى سودانى يحمل جواز سفر سودانى فهو انقاذى...كان يرضى كان يابا
مش مكتوب فى جوازه: لون العيون: عسلى!!!!!
تحياتى
|
Post: #4
Title: Re: وللإنقاذ عيون عسلية ايضاً !.
Author: عبد الله الشيخ
Date: 05-14-2009, 05:12 PM
Parent: #3
والله يامهيرة انا بقيت ما ناقش حاجة ..
مسحت نهائى ..
وطشيت شبكة ..
لما قريت فى الاستراتيجية القومية الشاملة انو الانقاذ تخطط
لانشاء 3 استادات للرياضة بمواصفات عالمية فى مدينة اسمها الدامر !..
تفتكرى ..
بعد استراتيجية زى دى !!
ممكن الواحد
ينقش (منقاش) فى البلد دى ؟..
|
Post: #5
Title: Re: وللإنقاذ عيون عسلية ايضاً !.
Author: عبد الله الشيخ
Date: 05-15-2009, 12:42 PM
Parent: #1
عيون الانقاذ العسلية ..
|
Post: #6
Title: Re: وللإنقاذ عيون عسلية ايضاً !.
Author: مهيرة
Date: 05-15-2009, 02:53 PM
Parent: #5
Quote: لما قريت فى الاستراتيجية القومية الشاملة انو الانقاذ تخطط
لانشاء 3 استادات للرياضة بمواصفات عالمية فى مدينة اسمها الدامر !.. |
والله ياود الشيخ الاستراتيجية الانقاذية دى تستاهل يعملوا فيهارسالة دكتوراة
يكونوا ياربى ناوين يدخلوا بيهاموسوعى جينيس للانجاز الانغازى!!!!
تحياتى
|
Post: #7
Title: Re: وللإنقاذ عيون عسلية ايضاً !.
Author: سلمى الشيخ سلامة
Date: 05-15-2009, 03:49 PM
Parent: #6
| Quote: (نريد أن نجند عقولكم وأقلامكم وكاميراتكم لترسموا لوحات مشرقات لوطنكم المشرق.. يا أحفاد الكنداكة).. |
الله يكتلنى رسلت ايميل فى العنوان الكان منشور فى المنبر دا
ولغاية الليلة مافى زول عبرنى زاتو
ياربى تكون الكنداكة دى "جلتنى " خلفتنى ونستنى ؟
يا عبد الله يا ود امى وابى
صورة شنو ورسم شنو ؟
ياحبيب المؤتمرات دى نومتها مكشوفة
ناس جاية تشوف اهلها
الليهم زمن منهم
وناس جاية تتابع مصالح خاصة بيها
واهو يلاقو ليهم فندق نضيف واكل سمح وهبوب ساقطة
عشان ما يلاحظوا "فرق التوقيت"
وبعدين التجنيد دا ليه الان ؟
ما كانوا قاعدين فى امان الله شغالين ومبسوطين
فجاة كدا كل واحد لقى نفسه "صالح عام ـ وانفدع"
يعنى يشحد ولا يشوف ليهو حته تتاويهو
يا خلق ما تلمو اهاليكم وتريحونا
|
Post: #8
Title: Re: وللإنقاذ عيون عسلية ايضاً !.
Author: عبد الله الشيخ
Date: 05-15-2009, 07:12 PM
Parent: #7
وبعدين التجنيد دا ليه الان ؟
ما كانوا قاعدين فى امان الله شغالين ومبسوطين
فجاة كدا كل واحد لقى نفسه "صالح عام ـ وانفدع"
"""""""""""""""""""""""""""""""""""""""""""""
قلتى لى نظام ( المركز عام وانفدع ) يا بتنا ومش عارف ايه؟
الله يجازيك ..
ساضحك فى الفدعة دي لحدى ما الحوكمة تنقلب !
|
Post: #9
Title: Re: وللإنقاذ عيون عسلية ايضاً !.
Author: عبد الله الشيخ
Date: 05-15-2009, 07:14 PM
Parent: #6
قبل ما يدخلو ارقام جينس القياسية دخلوا فى اللحم الحى !
شكراً يا مهيرة ..
|
|