Post: #1
Title: اول الولاية الحقيقي اخاف عليك من القادم
Author: حافظ حسن ابراهيم
Date: 05-12-2009, 12:08 PM
الف مبروك يا الصديق و لكن اخاف عليك من القادم؟
من باب الحياة السري كان دخولهم و نخشي عليهم الخروج من نفس الباب.... اتوا الي هذه الحياة دون توقع او رغبة احد.....اتوا الي هذا الجحيم فقط بحكم قانون الصدفة الفوضوي ... لم يفرح احدهم بمجيئهم و اخاف ان لا يتفقد احد غيابهم ... اطفال مدن الصفيح اطفال يعيشون فقط لانهم لايملكون حق ان يموتوا....
الوو انا الصديق.......
الصديق مين؟ هكذا رديت انا
بتلعثم و تردد ... حافظ انا الصديق كنت بجي بنضف سلم العمارة لناس عارف اخوك و مرتو امل
انا: اهلا يا الصديق ... كيف انشاء الله كويس و كيف ناس بيتكم؟
الصديق: والله كويسين بس انا نجحت و جبت 218
حافظ: الف الف مبروك يا الصديق و عقبال للجامعة و الدكتوارة .... انت وين هسي؟
الصديق: انا في دار السلام و داير تلفون عارف في السعودية ... تلفونك دا شلتو من ست العمارة
حافظ: ايوا يا الصديق خلاص انا بخلي عارف يتصل عليك هسي من السعودية؟
والله انت يا الصديق اول الولاية الحقيقي .......هكذا رددت في سري
الصديق طفل ابنوسي و بتعبير مخالف لونه لون الفقر الاسود... عيونه دائماً سارحه في شئ ما و ربما اشياء كثيرة ... اعتاد علينا الصديق و عليه اعتدنا كل يوم جمعة يأتي لنظافة سلم العمارة التي نقطن شقه منها ... انا و شيقي و زوجته و طفلة عنيدة ودودة ...لا ادري من هدي الصديق لتلكم المهنه و لكن الاجابة واضحة و لا تحتاج اي مجهود ..... في احد تلكم الجمع الحزينة اتي الصديق لعمله المعتاد ... قام بنظافة السلم و التحايا و مشاغلة منال الصغيرة ببرائته المعهودة ... اختلي بامل زوجة اخي ... اميمه هذه اجمل امرأة عرفتها و دوما تعليقي لشقيقي عارف ( والله يا عارف انا لو ضامن القي لي زوجة زي امل مرتك دي والله هسي بتزوج) ... المهم ما علينا فامل تتماهي في مشاكل الغير بصمت و بصمت اكثر تعطي... المهم انتهي برنامجها مع الصديق و لم ندري ماذا حدث الي ان أتي الصديق بعد كم جمعة و بكل ادب قال:
امل انا كدي حساب معاكم خلص و الليله مفروض تديني قروش النضافة.
امل: اوكي يا الصديق هكذا كان ردها .... دخلت و اعطت الصديق 50 الف؟
الصديق: مندهشاً رد ... لا انا داير الفين بس؟
امل: يا الصديق القروش دي انا اديتك ليها عشان الايام دي ما تشتغل و تقدر تقرأ
الصديق: لا يا امل انا شلتها دين؟
هنا حسمت امل الموضوع قائلة يا الصديق لو انت جاعلني زي اختك الكبيرة ما كان قلت لي الكلام دا ... انصرف الصديق و ترك لامل كثير من الدموع و جمعة حزينة لثلاتنا...
قصة ال 50 الف ... بكل بساطة الصديق استدان من امل زوجة اخي مبلغ 50 الف لسداد الرسوم علي ان يرجعها و فعلا قد كان....
218 درجة و طفل بين 5 اخرين لام عذباء دون زوج؟
218 درجة و طفل يقطن راكوبة في دار السلام ... و الماء و الكهرباء رفاهية؟؟؟
218 درجة لطفل يشتغل ايام الجمع و العصاري لتأمين جزء من مصروف البيت؟
218 درجة لطفل ليس كأي من الاطفال؟
فبربكم من هو اول الولاية هنا؟؟؟؟؟؟؟؟
الف مبروك و لكن اخاف عليك يا الصديق من القادم
|
Post: #2
Title: Re: اول الولاية الحقيقي اخاف عليك من القادم
Author: 3bdo
Date: 05-12-2009, 02:11 PM
Parent: #1
زولك ده مجموعة 812 مش 218
مجهوده براه ... لا زول يراجع ليه ... لا مدرس خصوصي ... وشغل يوم الجمعة
|
Post: #3
Title: Re: اول الولاية الحقيقي اخاف عليك من القادم
Author: حافظ حسن ابراهيم
Date: 05-12-2009, 02:21 PM
Parent: #2
شكراً عبده علي المرور .... وهو فعلا مجهوده براهو والله و اكثر
|
Post: #4
Title: Re: اول الولاية الحقيقي اخاف عليك من القادم
Author: Elawad
Date: 05-12-2009, 04:29 PM
Parent: #3
شكرا ليك يا حافظ و تهانينا للصديق و لأمل و لكم جميعا.
|
Post: #5
Title: Re: اول الولاية الحقيقي اخاف عليك من القادم
Author: Nasr
Date: 05-12-2009, 06:11 PM
Parent: #4
هذا من قبيل المفرح المبكي
خبر نحمله للقادين جيوب أهلهم مدرسين خصوصين، شاي بلبن بالكيك وأيس كريم(ويا ولد أسكت أخوك بيذكر)، وبرضو ما ينجحوا.
|
Post: #6
Title: Re: اول الولاية الحقيقي اخاف عليك من القادم
Author: حافظ حسن ابراهيم
Date: 05-13-2009, 08:40 AM
Parent: #5
شكراً نصر و العوض
|
|