Post: #1
Title: لا تثق في الصوت عبر الهاتف.
Author: omar alhag
Date: 05-10-2009, 09:35 AM
اتتني هذه الرسالة عبر بريدى الالكتروني......
يرويها بطل القصه...
أخونا العارض
ياعمك مرة زمان في الزمان الغابر ، وانا راقد في نص الحوش زي
التمساح العشاري معاي الحجة نتجاذب اطراف الحديث ، والكهرباء ( كاطعة)
كعادتها و السخانة زي الشطة .
التلفون يقوم يرن ،،، ارفع السماعة يجيني ليك صوت زي الكمنجة :
العارض : منو معاي !!
هي : حسن موجود ؟؟
العارض : مافيش .... نقول لي منو ؟؟
هي : قول ليه ندي ،،، طيب باي !!
انا ما لايووق مُخاطة بس :
باي نق تربيع !!
دقيقة و الحكاية شنو انا غفير ولا بتاع كبانية !!؟
هي : ليه في شنو؟؟
العارض : طيب ما تتكلمي معاي ، انا ليه البنات بضطهدوني كدة انا ما بنو آدم !؟!
ما كرهتونا البلي زاتو !!!
هي : انا آسفة ما قصدت شئ بس لانو ما بعرفك ، انت منو طيب ؟!؟!
انا : انا العارض اخو حسن ( علماً باني لا اعرف حسن ولا زول بهذا الإسم
الا حسن الترابي وده بذات بيني وبينو مافي اي عمار ) يعني معقول اقول
ليها النمرة غلط ومافي زول إسمو حسن ( انا جنيت ) !!
ونظريتي في الحياة :
ما اجرح مشاعر الصبايا ورفقاً بالقوارير والمثل الخالد بقول ( عدم العروض جفا ) !!
هي : خلاص ياعارض اتونس معاي وليه لا ، ده حتي باين عليك زول ( لطييف) !!
المهم حنك شديد ، ساعة وانا بتراشق مع البت زي الفراشة ، رشاقة جد ، شئ نكات
وشئ شعر شئ غرويد عيون ، حكم وامثال و البت انكيفت لي شديد !!
هي : طيب باي ، هاك تلفوني وهات تلفونك وسلم علي ( حسن ) .
انا : ( في سري طبعاً ) حسن بتاع جنك ، حسن والصفارة !!
دقييقة ياخي ، ومال كنت ح احنكا كييف !!
لما خلصت المكالمة وجيت راجع للحجة :
سالتني :
ام العارض : انت يا ( عروضي ) ده منو البتنضم معاو ساعة ده !!
.... قلتا ادقس الحجة قلت ليها النمرة غلط .
الحجة : ساعة وتقول لي غلط الضارب ده هندي !!
انا : انت ياحجة في الامن ولا نكير خالك : مالك بتحكيها كدة .
الحجة : يحكك الجرب يامخوزق تلقاها واحدة من الغنم البضربو ليك ديك ...!!
العارض : انت ام رقيقة ولا ام فتفت
،،،،!!
... المهم سادتي دورت التلفونات بيني والحبيبة الوطن ،،
وكل يوم تلفونين تلاتة وانا خلاص الصوت الناعم يزداد
رسوخاً في ذهني .. اتعذبتا عذاب شديد .
البت اقرأ ليها شعر ( يحي فضل الله ) اقول ليها
انا كتبتو ... مرة قريت ليها :
( ياضلنا ) قلتا ليها دي بذاات كاتبا فيك لانك
عندي زي ضُل الضحي المترامي بين مسارب روحي !!
بعد مدة سمّعتا ليك في شريط لي ( مصطفي سيد احمد )
شاكلتني وقالت لي انت ماعندك مصداقية كييف تدقسني
وتقول لي كاتبا فيك !!
انا : ( مالئيم وما بتغالط ) .
العارض : انت ما سمعتي بي توارد الخواطر ،،،
اها ده توارد بيني والشاعر الإسمو / يحي فضل الله ده .
وبعدين هو زاتو متأثر بي و شعرو كلو
ضُل و شجر تقول ( مزارع ) .
اهن الدامة كلما اقول ليها نتلاقي تقول لي خلينا
شوية نأخد علي بعض !!
انا ( متفائل ) قلت النص ده ح يكون مبالغة زي
صوتا ده اصبر عليها و طول بالك ياحبة بكرة تُفرج
وتكتحل عيونك برؤية البدر ليلة تمامه .
يا بت الناس ما نتلاقي خلاص ،، تقول لي اصبر
بطل شفقة انت مالك لايوووق كدة !!
انا اللايووق انا الويكة انا السرسيون .
واشيل واطمن في نفسي واقول البت دي بي صوتا
ده بالميت بتكون قريبة ناس المغربي ، وعيونا
بكونوا كبار وغلاد و حلوات زي عيون الحمار .
... اها مرة قُرحتي قايمة علي و عندي حرقان
وزهجان الف، قامت ضربت لي تلفون في المكتب .
العارض : هووي انا حركات المراهقين دي ما
بتنفع معاي ،،، نحن لازم نتلاقي يا كلّ قرد
يطلع شجرتو، شنو شغّالين خيال علمي !!
هي : ما تخلينا شوية مالك الليلة !!
خلينا نخلق مساحات للشوق !!
العارض : مساحات شنو،،، دي الاراضي!!!!يا نتلاقي
يا شتات تاكلي نارك .
كرهتينا التلفونات بقيت عامل زي رأفت
الهجان كدة !!
هي : خلاص بكرة نتلاقي في نادي الاسرة ،،
بس انت خليك ( ريلاكس)
.. وقد كان اليوم الموعود .
الحلة كلها عارفة انو العارض جادع زمن وح يلاقي الحبيبة
( ستات الشاي... نسوان الكسرة... بتاع الدكان
...عوض الترزي حتي عايدة شمار ) .
ياعمك خشّيت ليك في المحشي من العصر ونجيب الريحاني
( اباطي اتهرد من الريحة ) قربت اعمل (الفاتح الصباغ)
لي شعري بس خفت من شيلة الحس ، اها وشتات لي نادي الاسرة !!
مشيت قبل ساعة من المواعيد
( الخفة الكتلت اب تفة والرشاقة الكتلت إشراقة ) .
وقلتا اعمل كاسحة ألغام ،،، هو ده ما مهرجان فرح كرنفال عشق !!
اها الدنيا مغربت كدة ، جات ليك بت زي الليل زي السم
انا بي خفتي المعهودة جريت عليها :
العارض : انت ندي !!
هي : لا ابداً وقبلت علي الجهة الثانية
( بس ،، الله يكسر حنكك عامل وشك العريض ده ) .
العارض : هووي يا العولاق اصبري علي بس تجي
القطعة النضيفة دي وجاهتك دي الا اطيّرا ليك من راسك .
.. بس بعد شوية تجي ليك بت زي ( السحلية )
لا لا لا زي الدبيب ... ... لا دبيب شنو ... زي الصارقيلة الصايمة !!
وانا خلاص من الضحك داير اقع علي وشي ،،،
وهي طواااالي جات ليك علي !!
الصارقيلة الصايمة : انت العارض ؟!
انا : آي انا العارض عارض السجم والرماد .
وفي سري قلتا دي بتكون مرسال الشوق الحبيبة
رسلتا ( للإعتذار وكدة ) انت منو يختي !!
الصارقية الصايمة : انا ما ندي ندوية قلبك
يا قلب ، يخسي عليك ياعروضي ما عرفتني !!
... انا خلاص بقيت مخدر وكداري ما شايلاتني
وقلت ياعمك دي الكاميرا الخفية ولا شنو ؟!
اواصل الفيلم للنهاية و الشباب في الحلة
راجينك ح تقول ليهم شنو؟!
ده ماآكشن الآكشن ، المهم لملمت اطرافي وقلتا
( خربانة ام بناية قش) !!
وهاك ياضحك وغرويد عيون وشعر ،، اي نعم كنت
داير اطرش وانا بقرا الشعر لكن اهو نمشي الحال .
... وقلتا لازم امتص الصدمة و اعمل فيها روحي رياضية .
وهي دايرة تطير من الفرح ،، وتعطش ليك في ( الجيم)
انا قايل الجيم صايمة اليوم داك !!
وهاك ياغرويد عيون و تتلولح وتتمايص زي الياي !!
وماسكاني من يديني انا قايل نفسي ( هاني شاكر)
و لو جاء زول فيكم بهناك ما حا يعرف الجكساية منو فينا ..
... لكن النصيحة البت ما مبالغة حنضل بس !!
ياخ دي وشها زي اللين ( مثلث ) وخاتة ليها
قطعة كرتونة في صدرها زي المريلة ،، ح تقولوا لي ليه :
ما عشان صدرا ما يتقدّ لو نزلت حنكا ودنقرت
لي تحت ،،، مش قلنا حنكا سنين ولا شنو !!
وبعدبن مجلطا ليك شعرا تقول بي ( مخاطة ) ،،،
وكمان لابسة ليها 15 قطعة قماش ده،،، مسلسل
الجوارح ولا شنو أنا زاتي ما عارف !!
طبعاً دايرة تسمن وكدة : في سري
( لن يصلح العطار ما افسده الدهر يا حبة ) !!
المهم سادتي اليوم داك مرّ بي خيره وبي شره !!
بعدما طمنتها انو البينا سوف يستمر ونحن كيان واحد ..
ولازم نواصل المشوار ولا نامت اعين الجبناء ، وانت
إمرأة حلوة ومستنيرة وروحك حلوة !!
... ولما رجعتا الحلة فكيتا ليك في الشباب
قلتا ليهم : البت طلعت زي الليل زي اللبلب ،
هم صدقوني لكن بإرتياب عارفين حظي !!
اهن هي بقت تضرب في المكتب وانا عامل
( حظر عاطفي ) إستنفار شديد اي بت تضرب لي
ان شاء الله بت لعاب : انا مافيش انا في الجنوب
مشيت العمليات جاني قبول من سراييفوو
اي حاجة بس جلوني منها !!
انا ما شليق يوم جيت المكتب بدري التلفون يرن ،
رفعتا السماعة القاها ليك دي ( حبيبة قساي )
ومين قسّا قلبي !!
هي : وييين اتا،، وشنو الحكاية من ديك وعيك !!
انا قايل ده يوم القيامة ،، لساني الطويل داك
بقي زي حق الطيرة، وخشمي بقي ناااشف و حلقي مُرّرّرّرّو ،،
جاني الطُمام بتاع الملاريا داك و كلما ابلع ريقي
احس كأنو في حلقي فيه علبة ( صلصة مصدية)
ولا لستق عربية محروق و !!!؟؟ ماعارف بالضبط شنو !؟!؟
وهي مواصلة في الاسئلة زي نكير :
الصارقيلة الصايمة : مالك ما باين ويا حليلك
وياحليل ايامك وشنو ما بضرب ليك طوالي ما بكلموك
سكرتيرتكم العاملة زي الورل دي ما بتكلمك !!
ورل انت كمان بتتكلمي في الشكل ( في سري طبعاً ) .
لما خلاص زهجت مني وانا زي الابكم !!
الصارقيلة الصايمة : ماعشان كدة قلنا
ما نتلاقي ،،، رجال ماعندهم نظر ، و المراة
عندكم بس جسد .... وكركرب قفلت السماعة !!!
نصيحة :
... تاني مافي واحد فيكم يرد علي التلفون
لو في ناس تانين في البيت !!
همسة :
انا لو بقدر علي الحمام الميت ده ووجع
القلب ده كان مشيت الشرطة الشعبية !!
حاشية :
لا تثق في الصوت عبر الهاتف ان بعض الجكس يؤذي !!
حاشية الحاشية :
... لو في زول فيكم وهو حايم في الخرطوم
و شاف لي بت زي الحربوية خاتة كرتونة
في صدرا (قطع شك ) دي الحبيبة الوطن ...
ولازم يقطع فيها كف علي مسؤليتي انا ،،،،،،!!!!
... وبرضو تقولوا لي سموك : ( العارض ) ليه !!
إنتهت ..
|
Post: #2
Title: Re: لا تثق في الصوت عبر الهاتف.
Author: ناصر جبريل
Date: 05-10-2009, 09:50 AM
Parent: #1
تعرف يا جميل لي نص ساعة قاعد اضحك
في العارض دا عليك الله كتر من ايميلات العارض دا
ابداااااااااااااااااع عديل كدا
|
Post: #3
Title: Re: لا تثق في الصوت عبر الهاتف.
Author: omar alhag
Date: 05-10-2009, 10:14 AM
Parent: #2
متشكرين
يااستاذ ناصر...
والله موضوع عبارةعن نص وصورة وصوت
سخرية حد الاضحاك وشكوي من الحال المائل بصورة دارمية متفردة وسخط علي الوافد الجديد وتمر علي القديم..............................
مودتي وتقديري..
|
Post: #4
Title: Re: لا تثق في الصوت عبر الهاتف.
Author: أبو عبيدة البصاص
Date: 05-10-2009, 04:13 PM
Parent: #1
مباااالغه
شكرا
|
Post: #5
Title: Re: لا تثق في الصوت عبر الهاتف.
Author: طارق جبريل
Date: 05-10-2009, 04:33 PM
Parent: #4
لكن عارضك دة ما بالغ
ههههههههههههههه
|
Post: #6
Title: Re: لا تثق في الصوت عبر الهاتف.
Author: اساسي
Date: 05-10-2009, 04:45 PM
Parent: #5
من اجمل ما قرأت منذ القرون الوسطي
عليك الله كان ما هو عارض رسالته ما تلقي دربها للمنبر الا عبر عمر الحاج
ويردوا عليها رجال المنبر البؤساء
ــــــــــــــ
هو يا الفوق كلامي دا ما بزعل زول وعمر الحاج ما عندك معاك اي حاجة بس لزوم ما يلزم
انا بطلت المشاكل من زمن جلدني الحلبي في الفسحة
|
Post: #7
Title: Re: لا تثق في الصوت عبر الهاتف.
Author: باسط المكي
Date: 05-10-2009, 05:05 PM
Parent: #6
Quote: ياعمك مرة زمان في الزمان الغابر ، وانا راقد في نص الحوش زي
التمساح العشاري معاي الحجة نتجاذب اطراف الحديث ، والكهرباء ( كاطعة)
كعادتها و السخانة زي الشطة |
متابعةيامبدع
|
Post: #8
Title: Re: لا تثق في الصوت عبر الهاتف.
Author: سارة علي
Date: 05-10-2009, 05:10 PM
Parent: #7
اول بوست افتحو..
وفتح لي نفسي خاااااالص..
ياخ العارض دة حقو يدوهو عضوية هنا..
بضحك لمن اشرقتا بالشاي..
شكرا علي الضحك
|
Post: #9
Title: Re: لا تثق في الصوت عبر الهاتف.
Author: بشير أحمد
Date: 05-10-2009, 05:12 PM
Parent: #1
الاخ العارض -اقصد-عمر الحاج
تحياتي؛؛
قصة جميلة جدا والله ؛ناس المكتب اتفرجوا علي الضحك.
قلت لي شنو ياعارض:
Quote: وعيونا
بكونوا كبار وغلاد و حلوات زي عيون الحمار . |
تشبيه بليغ
| Quote: انت ياحجة في الامن ولا نكير خالك |
| Quote: مساحات شنو،،، دي الاراضي!!!! |
الله يعطيك الف عافية حسن.
|
Post: #10
Title: Re: لا تثق في الصوت عبر الهاتف.
Author: ismeil abbas
Date: 05-10-2009, 06:36 PM
Parent: #9
ألأخ/عمر الحاج...إبداع ..
وإمتاع مبالغة..
تسلم يا رائع.....................إسماعيل محمد احمد عباس...
|
Post: #11
Title: Re: لا تثق في الصوت عبر الهاتف.
Author: عليش
Date: 05-10-2009, 06:55 PM
Parent: #10
ههههههههه
القصة دي حصلت لي منو?اعترف
|
Post: #12
Title: Re: لا تثق في الصوت عبر الهاتف.
Author: sanaa gaffer
Date: 05-10-2009, 08:03 PM
Parent: #11
Quote: ياخ العارض دة حقو يدوهو عضوية هنا..
بضحك لمن اشرقتا بالشاي.. |
يا سارة الزول دة عضو هنا باسم شهاب شكوكو ..
الباسوورد بتاعو ضاع مع التهكيرات الكتيرة ..
ولسة ما زال بانتظار بكري عشان يديهو اذن الدخول تاني ...
غايتو عندو اطول لسان شفتو في حياتي ... وبيسخر حتى من روحو ..
اريتو يجي هنا عشان نرجع نبتسم تاني واحنا بنفتح المنبر العام بدل تقطيبة الهم البندخل بيها خوفا من الحنقراهو ...
|
Post: #13
Title: Re: لا تثق في الصوت عبر الهاتف.
Author: هيثم درار
Date: 05-10-2009, 08:46 PM
Parent: #12
ايميلك ده جا متاخر شوية
قبلو كان نازل بى هناRe: خيمه بت الهنا
قلت لى شنو يا أس أس! بطلت شنو؟ ومن متين؟؟؟
ارجع تانى اخير ليك
|
Post: #15
Title: Re: لا تثق في الصوت عبر الهاتف.
Author: omar alhag
Date: 05-11-2009, 06:46 AM
Parent: #13
البصاص.... متعك الله باصحة والعافية
طارق .. دمت موفور الصحة
اساسي ... مودتي وتقديرى
باسط مكي .. شكرا للمرور والتعليق
سارة علي .. ربنا يديك الفي نيتك (قولي امين).
بشير احمد.. ابو احمد جزيل الشكر والتقدير.
العم اسمعيل عباس (كما يحلو لصديقي محمد عكاشة)منورنا.
عليش (بطل غتاتة وحركات وماتزوغ مني فى الماسنجر وبالمناسبة السودان بقي فيهو وسترن ينوين ال50$ضرورى)
سناء جعفر ... شكرا للمرور والمتابعة...
والله الواحد انبسط من العارض ذى ماانبسطو انتو كمان.
وبالمناسبة ح تدعوكم جمعية معجبي العارض السودانية بالداخل والخارج الي إجتماع هام وعاجل واشياء اخر مفيدة والحاضر يكلم الغائب.....
المكان : هنا فى البورده
الزمان : اختارو الوقت البعجبكم...
الامضاء : كلنـــــــــــــــــــــــــــا.
مناشدة المناشدة
لاتبخلو بالمرور والتعليق...
|
Post: #16
Title: Re: لا تثق في الصوت عبر الهاتف.
Author: omar alhag
Date: 05-11-2009, 07:09 AM
Parent: #15
الافاضــــــــل
هيثــــــــــم
فيصل نوبي...
شكرا للمرور ورفدنابراوبط تلك المادة الدسمة التي لم اتحصل عليه الا مؤخرا عبر الE.mail..
لكم الشكر للمرور والتعليق
|
Post: #17
Title: Re: لا تثق في الصوت عبر الهاتف.
Author: Shihab Hamadnala
Date: 05-11-2009, 08:52 AM
Parent: #16
فن و أدب و ضحك راقى
تسلم يا اديبنا عمر الحاج
|
Post: #18
Title: Re: لا تثق في الصوت عبر الهاتف.
Author: Hala Hassan
Date: 05-11-2009, 09:11 AM
Parent: #16
لكن العارض،
عندو تشبيهات مبالغغغه،،
و حظه الله يعدلو ليه،،
منتهى الإمتاع،،،
|
Post: #19
Title: Re: لا تثق في الصوت عبر الهاتف.
Author: omar alhag
Date: 05-11-2009, 09:24 AM
Parent: #18
د. شهاب حمدنالله (المريخابي المطبوع)
تشكر للمرور والمساهمة فى هذه (النفرة الضاحكة)
.
.
.
.
.
الاستاذه هاله حسن
شكر الشكر ياستي
|
Post: #20
Title: Re: لا تثق في الصوت عبر الهاتف.
Author: طارق جبريل
Date: 05-11-2009, 09:40 AM
Parent: #19
Quote: عليك الله كان ما هو عارض رسالته ما تلقي دربها للمنبر الا عبر عمر الحاج
ويردوا عليها رجال المنبر البؤساء
|
؟؟؟؟؟؟؟؟؟؟؟؟؟؟؟؟؟؟
|
Post: #21
Title: Re: لا تثق في الصوت عبر الهاتف.
Author: حامد محمد حامد
Date: 05-11-2009, 09:47 AM
Parent: #18
شكرا عمر الحاج
للعارض شكوكو التحية
|
Post: #22
Title: Re: لا تثق في الصوت عبر الهاتف.
Author: omar alhag
Date: 05-11-2009, 10:10 AM
Parent: #21
الاستاذ حامد محمد حامد
للعارض شكوكو التحية
منون للمرور والمشاركة.......
الشكر لكاتب هذه القطعة الادبية الرائعة والساحرة والساخرة
اتتني عبر البريد فى عز النهار الحار استمتعت بها حد الامتاع...
وجدت نفسي ناقلا لها عبر هذه البراحات الاسفرية علي انشر ذلك الادب البديع مخففاعن نفسي واخرين خارج الوطن رهق العمل واخرين داخل الوطن سوء المواصلات وكتاحة لاتبقي ولاتذر وإنقطاع فى التيارين (المائي والكهربائي) .......... واشياء اخرى مفيدة
|
|