د.عثمان الريح....بالله تعال بدبابة عشان تقنع الناس دي

الاصل في البلد ما انك تترشح... انك تقلع السلطة زندية
ياخي كتر خيرك
اقلاها عندك طرح حتي لو فطير ولا كسرة ياهو طرح
بوستاتك كتيره؟؟؟ما اكتر من بوستات الكهربا والسرير
متعجرف ومتعالي؟؟ ما اكتر من ناس كتار حايمة هنا
اهو قبليك نميري حكم ستاشر سنة وآخرها قال العسكري قرشين والملكي قرش واحد والقرش والاتنين حسابهم مختلف
وعبود باع حلفا كووووولها بـ 15 مليون
والبشير قاعد ليه 20 سنة ما في زول قادر يقول ليه تلت التلاتة كام
يا مرشح بإختصار كدة عندك دبابة تركبها وتحكم بيها تعال ده اسمه دفع كاش والكاش بقلل النقاش
ما عندك ببقي عليك طرحك ده والناس الماسكة في رقابك
وقبلك كيجاب وسواق التركتر ودكتور ع ع ابراهيم برضو في نفس وضعك لكن ما فرش بضاعته اسفيريا
وكتر خيرك تاني













لي بعد الصلاة برضو... الواحد بقي يرفع مع الآذان بوست الجمعة

ياقريبي ..انا بس عايز ابقي رئيس سابق واعمل تيم انافس بيهو في المنتخبات بتاعة الرؤساء السابقيين عالميا ...انت خليك برضو رئيس الاتحاد ...وانشاءالله ما حد حوش ؟؟

Quote: ياقريبي ..انا بس عايز ابقي رئيس سابق واعمل تيم انافس بيهو في المنتخبات بتاعة الرؤساء السابقيين عالميا ...انت خليك برضو رئيس الاتحاد ...وانشاءالله ما حد حوش ؟؟

قمر بوبا معليش تخريمة صغيرة للعزيز الباشمهندس ابو بكر
ما عايزين نبقى رؤساء ولا حاجة لا حاليين ولا سابقين
بس سؤال انت المنتخبات بتاعة الرؤساء ديل مافيها خدمات وكافتريات؟؟
عايزين نقدم عطاء فيها لو ممكن :)

Quote: بس سؤال انت المنتخبات بتاعة الرؤساء ديل مافيها خدمات وكافتريات؟؟

ياانعام .."لب الموضوع" دة بخلوه الرؤساء السابقون امثالنا كخطوة "استراتيجية " وليست "استبافية " فالامر فيه نواحي "ترويجية " من صميم اختصاصاتهم !! شايفة كيف ؟؟ يعني تلفي وتدوري علي "لب الموضوع " دة ماكو فيه فايدة ؟؟؟

Quote: يعني تلفي وتدوري علي "لب الموضوع " دة ماكو فيه فايدة ؟؟؟

ليه بس كدا؟؟؟ (وش حزين لكن برضو ما فقد الأمل) هههههههه

خلاص انا ح أفكر أترشح للرئاسة برضو ونتلاقى قدام ههههههه

Quote: خلاص انا ح أفكر أترشح للرئاسة برضو ونتلاقى قدام ههههههه

تترشحي ليه ؟؟ اول رئيسة بعد الكنداكة اماني ريناس من غير ترشيح وبعدين الرئاسة تشوف .. عموما حنديكي ديسكاونت وانشا الله ماحد حوش ؟؟

يا قريبي رئيس سابق دي حسب الدولة
عندك الصادق خرمان للكلام وحايم
ومحمد نجيب ادوه بسكلته
ونميري لسة قايل نفسه رئيس

غايتو لو انت اترشحت نحن حنمسك المسألة جد وعلي بروبوسال انتخابي ومديرة حملة انتخابية وناطقة باسمك تقول يا ليل


تحياتي هندسة

Quote: الاصل في البلد ما انك تترشح... انك تقلع السلطة زندية

Quote: اقلاها عندك طرح حتي لو فطير ولا كسرة ياهو طرح

يعني لو عندنا طرح ما بنفع نمشي نجيب دبابة ولا شنو؟؟؟

قمر بوبا سلامات ونهارك سعيد

الأصل إنو نتقبل الآخر ونتحاور ونتناقش معه في طرحه الذي طرحه
وقبلها أصل الأصل ان يتقدم المرشّح بطرح يحترم فيه عقولنا
وإسلوب الطرح أهم من الطرح نفسه لأنه به يكسب وبه يخسر أيضاً
بس بفتكر انو من الأوجب على الجميع النقاش بهدؤ بعيد عن التجريح
وبمزيد من الموضوعية نرتقي بالحوارات هناوفي كل مكان

يا انعام كيفنك ونهارك اسعد
انتي خاشة شمال كايسة البزنس طوالي


والله يا انعام بالشايفه في سودانا ده مافي طرحا كان قوي ولا ضعيف بمرق له زول للرئاسة
الآليات مختلفة تماما

وبتفق معاك في كل القلتيه وشاكر لكلامك المدغلب ده

Quote: بس سؤال انت المنتخبات بتاعة الرؤساء ديل مافيها خدمات وكافتريات؟؟ عايزين نقدم عطاء فيها لو ممكن :)

انعام عبحفيظ!
باللاي متذكرة كافتيريا الجامعة ديكـ؟
الحصل شنو في الموضوع دا؟


غايتو مداخلة بتشبه: أسماء في حياتنا!

خلاس ياعمك
جيت قلبت البوست كافتريا واسماء الجزلي
لعلمك البوست ده هادف جدا
وبناقش أيلولة السلطة للدبابات من المنابر

وعشان حركاتكم دي انشاء ودالريح ده يفوز وتسفوا من مرسي الفاشر ولا الوطنية تاني

وبالجد يا ود الريح ما ظريفة منك توتر حنين بالطريقة دي


تعال انا بعمل موقع الكتروني وموبايل واسكراتش ...خلي المنبر ده
المنبر ده ناسهم بتوعين غلات ولخبتة ساي

صاحبك ده أشد فتكامن الدبابة...ده أولا


ثانيا

Quote: المنبر ده ناسهم بتوعين غلات ولخبتة ساي

كتر خيرك يا شين...

يادكتور لو الموية ما رجعت للمغرب كلمنا بالله عندي موبايل بتاع زول عنده كارو موية والله حلال عليك

حتي موية الحكومة بقولوا ما نضيفة

والله يا حنين انا متضامن غايتو مع الزول ده
وشينين شناة
الحمد لله الزول بقي ما وجيه عشان ما يعمل زي ود الريح ده

يا موسى عندي مداخلة ماعارفة أبركنها وين..موجهة لود الصايم، عن اذنك





يا ود الصايم ياخي من يومين واحنا شايلين حسك وانت عامل فيها رايح...كتاب الوش

يا حنو
والله ما رايح لكن وشي قاطع ياخ!
ما بقدر أخش من المكتب قافلين الوش من السيرفر
وبرجع البيت متأخر!


ما تجيبيهو لينا هنا!

كتاب الوش ده مش قلنا ليكم يا تنقلوا العدة كلها يا خلوها قبلها؟؟
هسة بحصل اشتباك ونبكي علي الزمن الجميل



يا عمك خش بالكرباوي يعني من الام اس دوس...الشاشة السودا بتجاوز ليك السيرفر

Quote: ما تجيبيهو لينا هنا!

ود الصايم ده لكن مابتجاب...انت ماعارف حاجة ساكت...




طيب خلي..


لكن صدقني فاتك نص عمرك...

يا ود الريح
طلة بجاي برضو ما كعب
شايفك بترفع في بوستاتك

قلنا ليك لا الفيس بوك ولا سودانيز بحلوك

عندك دبابة اركب وتعال استلم
ما عندك دبابة طرحك ده باير وياهم الناس ماسكنك في رقبتك

الاخ قمر بوبا والاخوة المشاركين خصوصا حنين البلد اشكركم شكرا جزيلا على هذا البوست الرائع .
==============================================================

http://www.sudaneseonline.com/vb/showthread.php?t=64883

اخوة المنبر الاعزاء

أؤكد لكم اننا سنعمل على اعطاء السودانيين المقيمين خارج السودان الفرصة فى الانتخاب ، ثانيا أؤكد لكم اننى حرصت على المواصلة معكم بنفسى طيلة هذه المدة لثلاثة اسباب ، الاول لأعرفكم على نفسى ليعلم كل سودانى ان كان داخل السودان او خارجه ان هنالك جيل جديد وسياسة علمية جديدة فى السودان .
ثانيا لأعادة ثقة المواطن السودانى فى ساسته ووطنه ولكى احض السياسين فى السودان ان يحترموا عقلية المواطن السودانى وليساعدوه لكى يكون فاعلا وان يشارك فى صنع القرار بدلا من ان يفضل الغربة على الرجوع لوطنه .
ثالثا حرصت على ان ارد بنفسى على اسئلتكم لكى اعبر لكم عن الفكر الذى احمله بين جنبى ولا اظن ان احدا سيوصله بالنيابة عنى ، ولعلمى بلهفة السودانين المغتربين الذين يحلمون بتغيير افضل لواقع بلدهم المرير ، وما يؤكد ذلك انه وبالرغم من طلبى اكثر من مرة من الذين يختلفون معى فى ايدلوجياتى وسياستى فى المنبر ، بالرغم من اننى قلت لهم ان كانت بوستاتى تضايقكم فيمكنكم ان تمروا فيها ولا تفتحوها فهنالك متصفحون غير مشتركين فى المنبر يريدون قراءة البرنامج الانتخابى كما ان هنالك اسئلة ارد عليها ، اجدهم وللهفتهم بشؤون السودان يعودون ويفتحون البوستات دون ان يشعروا بالرغم من ان هنالك عشرات البوستات التى تعاد وقد وصل عدد القراء فيها 57 الف ولكن لأنها لا تحمل معنى التنافس السياسى لم يعترض عليها احد .

اريد ان اعلمكم ان ما نقوم به فى موقع سودانيز ان لاين وموقع الفيس بوك وموقع ماى اسبيس وموقع تاجيت وموقع تويتر وموقع النيلين ، لا يمثل كل مجهودنا فى صنع الحملة الاعلامية ، فهو مجرد خلق شعبية فى مواقع الانترنت ، وهنالك من يقوم بعرض البرنامج الانتخابى فى الاقاليم ، للمواطنين الذين لا يتعاملون مع الانترنت ، فلقد بلغ عدد المسجلين لدينا حوالى 722 الف مواطن .
اما عن الحملات الانتخابية الحقيقية فهى لم تبدأ بعد ، وستقوم بمجرد التقديم للترشح وتقديم الناخبين للتزكية .
اما مانقوم به فهو لا مثيل له هنا فى السودان ، فباقى الاحزاب السياسية لا تبذل ربع ما نقوم به من دعاية ، ولا داعى ان نقارن انفسنا مع دول الغرب وامريكا فظروفنا وامكانياتنا تختلف ، كما ان شعبنا يختلف. اما ان كنتم خارج السودان فيجب ان اعلمكم ان التحول الديمقراطى هنا يسير ببطء وما نقوم به يعتبر انجازا ضخما رغم المعوقات التى تضربها الحكومة فهى مسيطرة على الاموال والاعلام ، كما انك لا تسلم من المضايقات التى تنسف كلام الرئيس البشير الذى قال فى حوار صحفى فى صحيفة الصحافة : انه لا توجد مضايقات سياسية ولا توجد بيوت اشباح

والله المرشح دة رادم ليك موقع النيلين جنس ردم

http://www.sudaneseonline.com/vb/showthread.php?t=64885

يجب ان اخبركم ان هنالك اسلوب مستعمل فى هذا البورد كتب من قبل فى صحيفة الصحافة وهو ان البعض يهاجم بترتيب مسبق حتى يفرغ عنوان البوست من محتواه ، ولا يناقش محتوى البوست والبعض له اجنده حزبية حتى تجدى ان هجومه ليس مبررا ، انا لا اعمم اكيد هنالك من يريد الاستفسار فأرجو ان لا تنطلى عليكم مثل هذه الاساليب ، انا هنا قدمت مبررات واضحة لأدانة الصحفى ففضل البعض الجنوح فى امور فرعية لينحرف عن الموضوع الاصلى ، مما جعل منبر فى بعض المواقع مثلا موقع النيلين يكتب اعلان بأن لا يسى احد للآخر .
اما حريتى فى الكتابة فى بوستاتى فهذا حق لى وانا لم اذهب للبعض واكتب فى بوستاتهم ، كما اريد ان اعلمكم ان اغلب اعضاء المنبر مسيسون اصلا وما يفعلوه هذا للكسب السياسى هذه الحقيقة علمناها مسبقا غير اننا نميز ما بين النقد البناء والاستهتار ، اما اخى زيادة حمور فهذا البرنامج تم صياغته بواسطة علماء ولكن انا كنت المايسترو الذى وجه الفريق . اخيرا رجاءا هنالك متصفحون غير اعضاء فى هذا المنبر وهم سودانيون يتصلون بى يريدون مصلحة الوطن رجاءا اعطوهم فرصة ، صدقونى من خلال مراسلاتهم تأكد لى ان هذا الشعب زكى جدا صدقونى كلما زاد التهكم والاستهتار والسب رفع ذلك من اسهمى فهذا الشعب لا يستطيع احد ان يشوش على فكره .
تحياتى .

السيناتور عثمان الريح خلي الانتخابات وتعال بي انقلاب !!