Post: #1
Title: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:33 PM
Parent: #0
قرر حاج صديق وهو ' معاشــى ' من سكان أركويت بالخرطوم ، قرر أن يستثمر جزءآ من المكافأة ويفتح صالة للبكاء .
يذهب إليه كل من يريد أن يبكى ويفش غبينتو. كتب فى دراسة الجدوى أن الممغوسين من الشعب السودانى رجالآ ونساءَ
يحتاجون إلى صالات واسعة لكى يتنفس ويبكى ويتشفى ولندب الحظ السيىء... ولكى يلطموا ويجعروا ..
--------------
وصلتى فى إيميل من صديقى ربيع موسى مقيم فى الإمارات من سنة حفروا البحر
أشتم رائحة المبدع الفاتح جبرا و عابر سبيل
ش
|
Post: #2
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:36 PM
Parent: #1
قال له صديقه وجاره مأمون : إتوكل على الله يا حاج صديق وأعمل المشروع ده وأوعك تتردد ..
والله تكسب دهب وكمان تفش غبينة الناس دول وتلقى أجر .. أول حاجة تعمل ليك قسم للناس الكبار فى السن ، غبينتهم شديدة بالحيل ..
وقسم لى ناس الصالح العام .. وقسم لى ناس الركشات ..
وأهم قسم فى غرفة خاصة للمغتربين وخليهم يدفعو بالدولار أو فى أسوأ الحالات بالريال السعودى ..
الريالات التانية حقت ناس قطر وسلطنة عمان وأبوظبى ما تقبلها ... وما تنسى ناس الطيارات الوقعت ..
وأهم حاجة ناس السدود بالذات ناس كجبار ودال يجوك من الكلاكلة ومناديل الورق كان جبتها بالدفار ما حتكفيهم ..
نواصل
|
Post: #3
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:38 PM
Parent: #2
حاج صديق مشى للفاضل السمسار فى شارع جوبا فى سبيل إيجاد مقرللمشروع ( بيت البكاء) :
والله يا الفاضل أخوى أنا عايز لى بيت كبير .. كبير جدآ .. يا حاج صديق أنت ما ساكن فى ملكك عايز شنو بالبيت ؟
يا الفاضل أخوى أنا ما عايز البيت للسكن .. عاوزو تجارى !! قصدك مخزن يا عم صديق ؟؟ مخزن شنو يا الفاضل ..
عاوز أعمل بيت بكاء !!! بكاء شنو !! المات ليكم منو !! ما تدق ليك صيوان فى الشارع وخلص نفسك ..
وما أن أنتهى حاج صديق من شرح المشروع حتى بادره السمسار : والله دى فكرة بت ستين كلب .
الشعب كلو عاوز يبكى ويتفشى وما لاقى ليهو طريقة .. والله أنا أول زول بجى بفش غبينتى .. ناس المحلية مغصونى جنس مغصة ...
كل يوم رسوم وضرائب وزكاة ..
نواصل
|
Post: #4
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:41 PM
Parent: #3
المهم أنا عندى ليك بيت كبير ولقطة جنب البلابل .. ستة غرف وصالة كبيرة وصالون وحمامين ..
بس يا الفاضل ما حيكون فى إزعاج للجيران وبعدين نخش فى إشكالات مع ناس النظام العام ويجو يكشونا ..
إزعاج شنو يا حاج .. أنا حأعمل ليك عوازل ضد الصوت عشان الناس تبكى لامن تقول كفاية..
بعد أن عاين حاج صديق للبيت وأبدى إعجابه طلب من السمسار بإحضار سبَاك يعمل فى كل
غرفة حوض غسيل وحنفية ويوصلو بالسايفون عشان الزول بعد الجعير والتفشى يقوم يستغفر الله ويغسل وشو ..
دفع الحاج مقدم الإيجار للسمسار تلاته شهور ورجع البيت شايل ترخيص وعقد إيجار .. ' يا نفيسة ' !! نفييييســــا ...
أيوة يا حاج ، فى شنو ؟؟ خلاص لقيت بيت البكاء ودفعت الإيجار !!
ش
|
Post: #5
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:44 PM
Parent: #4
أها يا حاج . كان كده ما فضل ليك إلا الزبائن .. والله يوم الإفتتاح حأجيب ليك نساوين الحلة كلهم يحرروا ليك البكاء جنس حرير ..
أعمل ليك جنس إفتتاح يا حاج .. وووووب وأحييا ما تديك درب .. ناس كلتومة عندهم أتنين ماتو فى الجنوب ..
حليمة راجلها عمرو 39 نزلوه الصالح العام .. ورقية بت التومه أختها زرعت الكلية فى الأردن وماتت فى الطيارة الأتحرقت!!!
كفاية يا نفيسة .. إنتى عايزة تطرشقى لى المشروع من أول يوم .. إنتى ما عارفة الإختلاط ممنوع عايزة تجيب لى نسوان كمان يبكن ويتشخنفن قدام الرجال ؟؟؟
فى هذه اللحظات يستيقظ حمادة الطالب فى الجامعة من النوم ويتمطى ويذهب نحوهم
نواصل
|
Post: #6
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:47 PM
Parent: #5
والله يا أبوى أجيب ليك كترة جكسويات ... شواكيش سااااااااكت ...
وبالمناسبة يا أبوى عشان نحل إشكالية الإختلاط أحسن نعمل الغرف للرجال والحوش للنساوين !!
تتدخل الحاجة نفيسة : لا . أنا رأى كل ناس ( غبينة ) نعمل ليهم قسم بى حالو ..
يعنى ناس الصالح العام براهم وناس الحور العين براهم وناس الطيارة براهم ... طيب المغتربين ...
المغتربين يكونو مع ناس الركشات .. وكمان يا أبوى فى ناس عندهم Double Gabina يعنى زول شالهو الصالح العام قام جاهو ضغط ..
أو مغترب عندو ضغط وسكرى ...
نواصل
|
Post: #7
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:49 PM
Parent: #6
قبل الإفتتاح بيوم تم الإعلان فى الصحف المحلية لزوم الدعاية : يتم فى الساعة السابعة مساء بتاريخ 27/7/2008 إفتتاح محلات فش غبينك ..
صالات مكيفة تحتوى على عوازل الصوت للبكاء الحار والسكلى والحى وووووب ....
يوجد قسم خاص للنساء والمحل مزود بمناديل الورق وأحواض الغسيل والبراطيش والجزم والشباشب القديمة لزوم اللطم ..
الأسعار فى متناول الغلابة .. السعر ألفين جنيه بالقديم .. البندول مجانى وكذلك البصل لزوم الإفاقة فى حالات الهستيريا !!!
ش
|
Post: #8
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:51 PM
Parent: #7
لم يصدق حاج صديق وهو يرى أفواج المواطنين تتداعى نحو المحل .. إضطر لطلب عدد من قوات حفظ النظام العام لتنظيم الصفوف .
إنتابت بعض الواقفين خارج المحل حالات الإجهاش البكائى قبل وصول البوابة الرئيسية وغرف البكاء ..
عندئذ طلب حاج صديق من رجال الأمن بالسماح للذين على ( الهبشة ) للدخول أولآ .. صار المتماسكين قليلآ يحتجون ..
يا جماعة شوية .. ناس الطيارة يجو بى جاى .. ناس الصالح العام عشان عددكم كتار خليكم بى هناك فى الصف داك ..
المغتربين تعالو بالباب الخلفى عشان ممكونين شديد .. المغتربين دورو شكلة .. ناس مشروع سندس بى جهة وناس المطاعم فى شارع غبيرة بى جهة .. الأمن يتدخل ..
ش
|
Post: #10
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:54 PM
Parent: #8
فى اليوم الأول إمتلأ المحل Full .. ألو حمادة ؟؟ أغشى السوق المركزى أشحن بصل زيادة .. حالات الإغماء فى إزدياد ..
جلست الحاجة نفيسة فى كاونتر النساء بينما جلس زوجها فى كاونتر الرجال ..
يدخل المواطن فى غرف فش الغبين ويخرج محمر الوجه متورم العينين مستريح الأعصاب بعد أن قام بفش غبينته ..
بعد أن رأى حاج صديق الغباين المختلفة لكثير من الحالات وسمع الجعير والسكلى والنحيب لم يعد ينظر إلى الربح بقدر نظره إلى خلق
جو بكائى مثالى مما جعله يحدد يومآ فى الأسبوع مجانآ وبكاء جماعى مره واحدة وذلك لغير القادرين على دفع الرسوم ..
بعد ثلاثة أيام دخل عليهم شخصان يحمل أحدهما كاميرا والآخر دفترآ وقلم .. نحن من جريدة الإثارة وعاوزين نعمل لقاء ..
تقدم حمادة إليهم ورحب بهم وجلس معهم فى الكاونتر .. طلب الصحفيان المرور فى الغرف والصالات المختلفة ليروا كيف أن المواطنين ( يفشو غبينهم ) ..
هذه صالة الغبين الجماعى .. فى هذه الصالة أكثر من مائة شخص من مختلف الأعمار ينتحبون بطرق مختلفة
منهم من يبكى بحرقة ومنهم من يتمتم ومنهم من يلطم وجهه ويصيح بهستيريا ..
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
؟؟؟؟؟؟؟؟؟؟؟؟؟؟
؟؟؟؟؟؟؟؟؟؟
؟
|
Post: #11
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-07-2009, 06:56 PM
Parent: #10
وقف الصحفى بعيدآ قرب المدخل وهو يتابع هذه الحالات التراجيدية وصار ينظر إلى أحد المواطنين يضرب رأسه مع الحيطة بحرقة وهو يجهش بالبكاء وير
دد : أنا كان مالى ومال كده !!!
أنا كان مالى ومال كده !!!
سأل الصحفى حمادة ؟ الزول القاعد يضرب راسو مع الحيطة ده مالو ؟؟؟
رد حمادة : ده الوالد صاحب المحل ! حاج صديق !!
أمبارح ناس الضرائب جابو ليهو ضرائب أكتر من رأسمالو ..
عشان كده بيضرب راسو بالحيطة ...
إنتهى يا رقم صفر
قوم فتش خميسك و سيبك من قوقل
ش
|
Post: #12
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: سلمى الشيخ سلامة
Date: 05-08-2009, 01:14 AM
Parent: #11
ونسيت ناس كتار
نحنا منهم
الكنا حارسين التجمع وما مرقنا على بر
ياخ الواحد ضحك بهستيريا مبالغ فيها
شكرا لاضحاكنا رغم سوداوية الفكرة
تسلم حبيبنا
|
Post: #13
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-08-2009, 07:04 AM
Parent: #12
| Quote: الكنا حارسين التجمع وما مرقنا على بر |
سلمى بت الشيخ سلامة، حبابكم مليار فى بيت الفش و الغبن و البكاء !!!!
بختكم ! غبينتكم فى التجمع و بس !!!
نحن حكاياتنا طويلة، و غباينا تندرج تحت كل البنود الفى بين فش الغباين ده !!!
اللهم لا نسألك رد القضاء لكن نسألك اللطف فيه !!!
ش
|
Post: #9
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: رقم صفر
Date: 05-07-2009, 06:52 PM
Parent: #3
عارف يا شكري ، كرهتي البوست المقطع ده ـ وخاصة لمن يكون موضوع يهذا الجمال
اها انا من دربي علي عمك قوقل امشي افتش باقيهوا ، وانت تكون حرقته بوستك ساااي
|
Post: #14
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-08-2009, 03:43 PM
Parent: #9
Quote:
عندئذ طلب حاج صديق من رجال الأمن بالسماح للذين على ( الهبشة ) للدخول أولآ ..
صار المتماسكين قليلآ يحتجون ..
يا جماعة شوية .. شوية .. شوية
ناس الطيارة يجو بى جاى ..
ناس الصالح العام عشان عددكم كتار خليكم بى هناك فى الصف داك ..
|
ش
|
Post: #15
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: MOHAMMED ELSHEIKH
Date: 05-09-2009, 07:21 AM
الحبيب شكري تحياتي
جو بكائى مثالى مما جعله يحدد يومآ فى الأسبوع مجانآ وبكاء جماعى مره واحدة وذلك لغير القادرين على دفع الرسوم
مافي بكية قدر ظروفك؟؟؟؟؟
|
Post: #16
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: شكرى سليمان ماطوس
Date: 05-29-2009, 06:13 AM
Parent: #15
لك التحية الشقيق/محمد الشيخ
| Quote: مافي بكية قدر ظروفك؟؟؟؟؟ |
فى واحد خليجى (ثرى شديد) ممغوص جداً و ممكون خالص، قرر دعم المشروع
فتبرع من حسابه بدفع حق إسبوع بكاء كامل
و لكل الفئآآت و اليوم مفتوح من الصبح حتى موعد الإغلاق
سارع و لا تفوت الفرصة!!!!
الطوابير كيمان
ش
|
Post: #17
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: heba Elmahi
Date: 05-29-2009, 06:43 AM
Parent: #16
تـبـكـي بـس يـا مـواطـن !!
عـمـنـا شـكـري تـحـيـاتـي و احـتـرامـاتـي
|
Post: #18
Title: Re: تعالوااا فشواا غبينتكم !!! أياً كان نوعها و ثقلها و عمرها : مشروع بزنس رابح و آخر موووضة
Author: haroon diyab
Date: 05-29-2009, 08:14 AM
Parent: #17
شكري
جمعة مباركة
وعاوزين لينا حوش قدر ده او اكبر شوية
لاكبر مجموعة مغبونة في السودان....حاولت
جاهدة طوال اكتر من خمسين سنة انها تفرح
وماقدرت ...كانت دائمت تصاب بخيبات الامل
مع العلم انوا جيرانهم ...الحيطة ...بالحيطة
كل يوم في فرح جديد....
وناس افراحه زايدة
وناس بتالموا....!!!
---
اكان ماعرفتهم ممكن تسأل رقم صفر
|
|