Post: #1
Title: يا جماعة .. أرحموا أولادكم !!
Author: صلاح أبودية
Date: 05-05-2009, 09:58 AM
نعم الله على العباد كثيرة ..
أجلهن نجابة الأبناء ..
بس معقول ياجماعة أولادنا كلهم يجوا الأوائل ؟؟
أعتقد أن الكثيرين منّا يضغطون على أبنائهم بغرض التفوق ..
ويطالبونهم بإحراز نتائج ممتازة !
ولا يفوت على فطنة الكثيرين أن الله قد خلق البشر بعقول متفاوتة !
فمثل ما خلق الله بشراً أذكياء ونوابغ ..
خلق مثلهم قليلى الذكاء أو متوسطى الذكاء !
فلولا هذا التفاوت لكانت نتيجة الإمتحان الأول مشترك فقط !!!
وأظن يا جماعة مستحيل أولادنا كلهم يجوا الأوائل !
فارجوا أن ترحموا أولادكم !
وأن لا تقسوا عليهم إذا كانت نتائجهم ليست كما تريدون !
فكثيرين تفوقوا فى المدارس ..
لكنهم فشلوا فى الحياة !
وكثيرون كانوا فاشلين فى الدراسة !
لكنهم نجحوا فى الحياة وأثروها !
فلا تحزن إذا لم يتفوق إبنك أو بنتك !
فلعله فيما بعد يصبح ممتفوقا فى مجال آخر ..
أو تصبح بنتك إمراة عظيمة أو أم أعظم !
|
Post: #2
Title: Re: يا جماعة .. أرحموا أولادكم !!
Author: عزام حسن فرح
Date: 05-05-2009, 10:37 AM
Parent: #1
ما أهو إنت ضاغِط على أولادك ومُلبِسُم نجمة إسرائيل بِلون شِيوعي ... بِخلَفِية صفراء شاحِبة
|
Post: #3
Title: Re: يا جماعة .. أرحموا أولادكم !!
Author: محمد هشام
Date: 05-05-2009, 10:47 AM
Parent: #2
Quote: ما أهو إنت ضاغِط على أولادك ومُلبِسُم نجمة إسرائيل بِلون شِيوعي ... بِخلَفِية صفراء شاحِبة
|
يا عزام انا بعتقد انو حب المريخ دا فطرة عند الانسان وديل اطفال (-:
لكن ياخوانا كدي النشوف المشكلة من منظور تاني
يعني الليلة نسبة النجاع العامة ما اظن حصلت السبيعن في المائة على ما اعتقد
والخرطوم اغلبيته ناجحين بدرجة غريبة
طيب نسبة الرسوب كبيرة وين
اكيد في الاقليم اذا دي كدا مشكلة قولو واحد
تاني حاجة نجي للخرطوم النسب الكبيرة البحرزوها الطلبة دي
هل بتدل علة تفوقم ؟
ولا انو المناهج بقت عامل كيف كيف
واسلوب التعليم بعتمد على التلقين و الحفظ بس..
اذا الموضوع اكبر من ضغط على اولاد
|
Post: #6
Title: Re: يا جماعة .. أرحموا أولادكم !!
Author: صلاح أبودية
Date: 05-05-2009, 12:07 PM
Parent: #3
| Quote: الموضوع اكبر من ضغط على اولاد |
أكيد يا محمد هاشم !
لك التحية !
|
Post: #4
Title: Re: يا جماعة .. أرحموا أولادكم !!
Author: صلاح أبودية
Date: 05-05-2009, 10:49 AM
Parent: #2
Quote: ما أهو إنت ضاغِط على أولادك ومُلبِسُم نجمة إسرائيل بِلون شِيوعي
... بِخلَفِية صفراء شاحِبة |
عزام !
غلبتنى والله !
لكن الموضوع أكبر من كده !
|
Post: #5
Title: Re: يا جماعة .. أرحموا أولادكم !!
Author: صلاح أبودية
Date: 05-05-2009, 11:20 AM
Parent: #4
مساهمة مقدرة من البوليس (المدام)
على الإيميل ..Quote: ليس بالضرورة أبدا ان يتفوق أبناءنا كلهم ويطلعوا الاوائل اصلا هذه ليست عدالة ولا تنافس ولا تباين خلق الله الدنيا ببشرها وكل ما فيها متباينا كثير او قليل الشبه ببعض.
مؤشر جيد ان تهتم الاسرة خصوصا الامهات بهذا الكم الكبير بدراسة اولادهم واصرارهم على التفوق خرجنا من وهدة كنا لا نعرف في أي سنة بقرا الولد او البت الى فوبيا المنافسة والتفوق ولكن:
انا مثلا ام اتمنى ان يتفوق ابناءني طوال سنوات دراستهم ومؤمنة بان الاولاد اذا لم يعتادوا على ان يكونوا متفوقين ومثابرين منذ صغرهم فلن يفرق معهم طعم النجاح من الفشل وأمارس كل أنواع الإغراءات والترهيب والترغيب في متابعة الأمر من قولة تيت والى نهاية العام ولكن كل هذا يصب في خانة الخطأ .
أمهات أخريات كثيرات اعرفهن يصنعن من أيام الامتحانات زوبعة نفسية للأطفال ولكل سكان المنزل ويتحول البيت الى قلعة محصنة بالكتب والمذكرات وجيوش الأقلام وبراجل الهندسة ، واذا اطرت الام لزيارة اذا بها تقوم مخلوعة فجأة وتجري بدون استئذان أولادي عندهم امتحانات و خلال اربعة او خمسة ايام يضغطوا هذه العقول الصغيرة المستريحة طول السنة من تلفزيون الى بلي ستيشن لكل يطلعو عصارة الاول وتقدير ممتاز ولكن 100% النتيجة سلبية على الام قبل الاولاد.
اما الامهات العاملات والائي لا يجدن وقتا اصلا حتى لقليل من الونسة مع العيال ناهيك من متابعة دروسهم اليومية ومتاعبهم الدراسية فتأخذ الام اجازتها السنوية قبل موعد الامتحان بشهر عادة فيتضارب زمن راحتها التي هي في اشد الحوجة لثلاثون يوما من 366 يوما من الشقاء المستمر فيستمر الشقاء ومزيد من المجهود مع الابناء بكثير من النرفزة والعصبية والضغط و100% حسب الواقع والمشاهدة والتجربة الشخصية تكون النتايج سلبية جدا على الام التى تتوقع ناتج لمجهودها هي قبل مجهود الاولاد المساكين الذين ضاعوا بين مطرقة البيت وسندان المدرسة التى تطلب ولا تفعل.
في رأيكم لماذا صار عندنا فوبيا اسمها امتحانات وهذا لايرتبط بالسنوات النهائية انما في الوقت الحالي منذ الصف الاول، في تقديرى البسيط الغياب التام لدور المدرسة التى تحولت لجباية فقط دون ادنى مسئولية للغير لدى المدرسة وتحول المعلمين الى جلادين اشداء غلاظ يحملون الهراوات ويطاردون التلاميذ كالفئران في رسوم ومصروفات مقطوعة من الراس وبالمزاج الشخصي وهذا عن تجربة ومشاهدة وليس تهجم على المعلمين الذين ليس لنا الا ان نقول الفاتحة على المباديء والقيم .
|
طيّب يا جنابو ..
إنت ما دام عارف كده !!
ما تخف على العيال شوية ..
وخليهم يمتعوا بالإجازة !
|
Post: #7
Title: Re: يا جماعة .. أرحموا أولادكم !!
Author: صلاح أبودية
Date: 05-05-2009, 12:28 PM
Parent: #5
لا يفوتنا أيضا أن نهنئ أبناء زملاءنا ..
الذين تفوقوا وأحرزوا نتائج ممتازة هذا العام ..
وتمنياتنا للذين لم يحالفهم الحظ ..
بالتوفيق والنجاح فى المرة القادمة!
|
Post: #8
Title: Re: يا جماعة .. أرحموا أولادكم !!
Author: omer osman
Date: 05-05-2009, 12:59 PM
Parent: #7
| Quote: يا عزام انا بعتقد انو حب المريخ دا فطرة عند الانسان |
|
Post: #9
Title: Re: يا جماعة .. أرحموا أولادكم !!
Author: صلاح أبودية
Date: 05-06-2009, 09:18 AM
Parent: #8
يا عمر !
عزام ده شكلو هلالابى مضغوط !!
|
Post: #10
Title: Re: يا جماعة .. أرحموا أولادكم !!
Author: Dalal Ezzaldin
Date: 05-06-2009, 10:41 AM
Parent: #9
يا ابو الاولاد
فعلا الطلبه قاعدين يشيلو هم للقرايه لدرجة انو اغلبهم بقى ما مهتمي
والسبب .. البيت عايزهم شاطرين والمدرسه دايراهم متفوقين وكدا
ومافي سؤال عن هم دايرين شنو ؟؟
في السودان ما عندنا تقافه المناشط والهوايات البنشوفها في الافلام الامريكي ..
يعني ما لازم كل الاولاد يطلعو دكاتره ومهندسين
لي ما بساعدوا البحب الكوره عشان يبقى لاعب مثلا ... في ( الهلال  )
ولا البتميل للرسم عشان تبقى فنانه
ولا حتى يحاولوا يزرعوا فيهم حب لاي رياضه او هوايه في فترة الاجازات
بعرف ولد ما عندو في القرايه نهائي بس تمسكو اي ديجتل او موبايل او كمبيوتر
يضبطو ليك احسن من احسن محل بتاع اجهزه .. ما جاب مجموع كويس للجامعه
امو دخلتو جامعه التقانه علوم حاسوب بي قروش
بس برضو لانو الجامعه بمسكو فيها الورقه والقلم الولد.. ربت
ساعدو الاولاد يعملوا الحاجه البحبوها وبقدروا عليها واكيد ح ينجحوا في الاخر
|
Post: #11
Title: Re: يا جماعة .. أرحموا أولادكم !!
Author: doma
Date: 05-06-2009, 10:53 AM
Parent: #10
عشان كدا بلدنا ما فيها حرفيين بمهارات عاليه لان التعليم كلو بتاع وايت كولور
|
Post: #13
Title: Re: يا جماعة .. أرحموا أولادكم !!
Author: عزام حسن فرح
Date: 05-06-2009, 11:10 AM
Parent: #11
وأنا في إجازة المُتَوسِطة عِتِرت لي فوق كتلوج فوقو صُور مصنوعات جِلدِية
شُنط نِسائِية / أحزِمة / أحذِية ... إلخ عجبتني الحِكاية مشيت شارِع الجمهورِية
لِشرِكة < سِنجر > كانت أُمي دايماً بِترسلني ليها أجيب ليها إسبيرات لِماكينة
الخِياطة الخاصة بيها ... المُهِم ... سألت عن ماكينات خِياطة الجُلود أدوني
كتلوج صغير عن ماكينات الجلود ... الحِكاية رِكبت لي في راسي ركبه مُبالغة
كلمت أبوي قُلت ليهو أنا عاوِز أدخُل < التدريب المِهني > خصوصاً وإنو مُديرو
كان أخو أُمي ود خالا ... قام أبوي .... قام ....
ماف داعي ...
حاولو تتخيلو الحصل شنو ...
بس بتذكر قالي عاوِز تطلع < نُقُلتي > يا إبن الكلب ... غايتو بشكُر مِن هِنا
ناس الشعبِية حله فريق المُجاهِد وعلى الأخص الأعمام عَوض حسين وشمت صالِح ومُصطفى
الحضري لأنهُم لو لاهُم ما كُنت هسِع قاعِد أكتُب ليكُم ...
|
Post: #18
Title: Re: يا جماعة .. أرحموا أولادكم !!
Author: صلاح أبودية
Date: 05-06-2009, 11:29 AM
Parent: #13
Quote: غايتو بشكُر مِن هِنا
ناس الشعبِية حله فريق المُجاهِد وعلى الأخص الأعمام عَوض حسين وشمت صالِح ومُصطفى
الحضري لأنهُم لو لاهُم ما كُنت هسِع قاعِد أكتُب ليكُم ... |
عملوها فينا والله ناس الشعبية !
عليك الله ما تنسى تشكر لى الناظر حسين والناظر على أبودية !
برضو لو ما ديل ما كنت هسع قاعد أكتب ليكم !!
|
Post: #15
Title: Re: يا جماعة .. أرحموا أولادكم !!
Author: صلاح أبودية
Date: 05-06-2009, 11:18 AM
Parent: #11
doma
شكرا على المرور !| Quote: عشان كدا بلدنا ما فيها حرفيين بمهارات عاليه لان التعليم كلو بتاع وايت كولور |
غلط !
والصحيح ..
عشان كدا بلدنا ما فيها حرفيين بمهارات عاليه لان التعليم كلو أكاديمى !!!
|
Post: #12
Title: Re: يا جماعة .. أرحموا أولادكم !!
Author: صلاح أبودية
Date: 05-06-2009, 11:09 AM
Parent: #10
دلال عزّالدين !
لك التحية والإحترام ..
| Quote: ساعدو الاولاد يعملوا الحاجه البحبوها وبقدروا عليها واكيد ح ينجحوا في الاخر |
أهم حاجة القدرة دى !
لأنو فى ناس بحملّوا أولادم فوق قدرتهم وقدراتهم !
|
Post: #14
Title: Re: يا جماعة .. أرحموا أولادكم !!
Author: طارق جبريل
Date: 05-06-2009, 11:13 AM
Parent: #12
ود خالتي
يمين عمك جبيرين ضغطنا لامن زيتنا مرق
في النهاية اديناهو الشهادة وسوينا العايزنه
ههههههههههه
|
Post: #20
Title: Re: يا جماعة .. أرحموا أولادكم !!
Author: صلاح أبودية
Date: 05-06-2009, 11:43 AM
Parent: #14
Quote: يمين عمك جبيرين ضغطنا لامن زيتنا مرق
|
ود الخالة !
والله إنت لو ما عملوا ليك كده ..
كان مشيت مع ود صليليح الطمبراوى !
|
Post: #17
Title: Re: يا جماعة .. أرحموا أولادكم !!
Author: Rihab Khalifa
Date: 05-06-2009, 11:25 AM
Parent: #12
Quote: ولا يفوت على فطنة الكثيرين أن الله قد خلق البشر بعقول متفاوتة !
فمثل ما خلق الله بشراً أذكياء ونوابغ ..
خلق مثلهم قليلى الذكاء أو متوسطى الذكاء !
فلولا هذا التفاوت لكانت نتيجة الإمتحان الأول مشترك فقط !!!
وأظن يا جماعة مستحيل أولادنا كلهم يجوا الأوائل ! |
ايوة التباين مهم، و ضروري جدا
لكن, احراز المراكز مثل الاول و التاني ديل يا صلاح، خصوصا بمقررات و منهجية
زي حقتنا الفي السودان دي، تعتمد علي الحفظ و الاجترار عموما، وتفتقر
للقدرات العملية و التطبيقية، ما مربوطة بالذكاء في نظري
الناس عموما رابطه الاتنين مع بعض; التفوق الاكاديمي و نسبة الذكاء
و ده مفهوم قديم، حقو الناس تنتقده
----------
ده كوم، و جيل ناس زمان ده كوم تاني، البيلاقيك كله يقول ليك انا كنت اول دفعتي!
|
Post: #16
Title: Re: يا جماعة .. أرحموا أولادكم !!
Author: ابراهيم الرشيد عبدالرحمن وراق
Date: 05-06-2009, 11:23 AM
Parent: #2
يسلم فمك ياعزام
اها ياجنابو شن قولك عاد الاولاد ديل هلالاب لكن ماقادرين يقولو بغم لانه انت ما مديهم فرصة
وكمان ملبسهم الاصفر , الله يعينكم ياولاد
لك التحية
|
Post: #19
Title: Re: يا جماعة .. أرحموا أولادكم !!
Author: عزام حسن فرح
Date: 05-06-2009, 11:35 AM
Parent: #16
صلاح أبودية ...
Quote: عملوها فينا والله ناس الشعبية !
عليك الله ما تنسى تشكر لى الناظر حسين والناظر على أبودية !
برضو لو ما ديل ما كنت هسع قاعد أكتب ليكم !! |
الأخ نُـقُـلْـتـي برضو؟
|
|