Post: #1
Title: ام الفقراء وما ادراك ما ام الفقراء ....
Author: wedzayneb
Date: 05-04-2009, 10:01 AM
Parent: #0
علي ما اظن الكل يعرف من هي ام الفقراء الا وهي حرم الرييس (بت الجزيره) !!
كما قال المثل ( وراء كل رجل عظيم إمراه) .. وزي ما قالو من جاه الملوك نلوك ..
طبعا يعيش الشعب السوداني هذه الايام مشكلتين من اكبر المشاكل التي قد تواجه الانسان في حياته ( الضمير في كلمة الانسان هنا لا يعود علينا نحن السودانيين )
لأننا وبكل بساطة لا ننتمي للانسانية باي صلة ، المهم انسوكم من الفارغ دا ، الايام دي نعاني من مشكلتين :
1- ارتفاع حاد في درجة الحرار ( ناس الارصاد بقولو درجة الحرارة 45 درجة ) لكن الحقيقية بتصل 50 درجة .
2- انقطاع متواصل في التيار الكهربائي ( مع انو قالو الكهرباء استقرت على حسب مقولة مهندسين سد مروي العظيم ) . الغريب في الموضوع انو
حاولنا نسأل كل الجهات المسؤولة وصولا إلى السد في حد ذاته فقال السد بكل صراحة ( " غريبة !!!! الكهرباء دي ليها كم يوم طلعت من هنا زي الحلاوة ، ومن شدة ما قوية
قالو حتكون مجان .. لكن شكلها مشت في اتجاه تاني أو تكون من الشبكة ") ..
3- مع انو نحن ذكرنا مشكلتين فقط ، لكن المشكلة التالتة متكررة لذلك اهملت ، وهي مشكلة تلوث المياه ( الغريبة قالو ناس الخرطوم بدو يشتغلو بالجمرة الخبيثة ) ..
عليكم الله ده كلام !! ناس عندهم نيلين بدل واحد ومن كترت مويتهم لمن ملونين ( أبيض وارزق ، وعقبال البنفسجي) ..
اها ناس عندها مصادر موية قدر دا يقومو يعملوها بقروش ؟؟؟!!!!
يعني الواحد لو جاي من الشغل مسخن ودخل الحمام ( الله يكرم السامعين ويكرم أم المؤمنين ، اقصد ام الفقراء ) وقال ياخد ليو دش كدا فاهم
( وركزو على دش دي شوية حنرجع ليها ) تقوم الموية تقطع عليه وهو في نص الحمام ؟؟!!
المهم نرجع لي حمامنا .. اقصد موضوعنا :
الاستاذ الراحل المقيم مصطفى سيد أحمد قال ( ناس تطفر وناس تدفر ، وعم عبدالرحيم ، وعمك الحاج ود عجبنا ... و ..... ) الله يرحمك يا ابو السيد يا الماحضرت زمن ام الفقراء ..
لو الراجل دا كان حي وحضر الزمن الفلاني دا كان قال كلام عجيب وغريب ، ويا إنت ! شايفك سرحت وطلعت برة النص .....
ام الفقراء وما أدراك ما أم الفقراء
منذ أن أصبحت السيدة وداد بابكر السيدة الأولى في السودان وهي تتولى المناصب المهمة بين السيدات السودانيات وسيدات الاعمال والمنظمات الطوعية والخيرية ، وقد أبدت اهتماما
بمشاكل المرأة السودانية .. وقد شجعت العمل الطوعي وساهمت في مشاريع التنمية الأسرية ومشاريع الاسر المنتجة وهلم جرا ( جرا مشا وين ؟؟!!) . إن شاء الله تكونو فهمتوني
وللحديث بقية . طبعا زي ما عارفين في البلد دي انو أهم حرف في حروف اللغة العربية هو حرف (و) وهو يعني (الباسطة) .... باسطة شنو !!! قصدي الواسطة
يعني لو ما عندك وااااااااااااو كبيرة تموت فطيسي زي ما قال شيخنا (محمد الحسن) ..
في الغنية قالو ( نحن في السودان نبني أوطانا ) ونحن بنقول ( نحن في السودان رؤسا نسوانا ) ،،،، ومن هذا المنطلق بصوت الجماعة نناشد واو النسوه المتمثلة في أمنا النظر في أحوالنا
(ولو نظرة بالعين البايظة) المتعثرة ومحاولة إيجاد حلول ترضي الجميع ...
|
Post: #2
Title: Re: ام الفقراء وما ادراك ما ام الفقراء ....
Author: داليا حافظ
Date: 05-04-2009, 10:19 AM
Parent: #1
Quote: 1- ارتفاع حاد في درجة الحرار ( ناس الارصاد بقولو درجة الحرارة 45 درجة ) لكن الحقيقية بتصل 50 درجة .
2- انقطاع متواصل في التيار الكهربائي ( مع انو قالو الكهرباء استقرت على حسب مقولة مهندسين سد مروي العظيم ) |
صدقت والله في كلامك ، لكن تقول شنو الشعب مظلوم وما بيدو حيلة
Quote: عليكم الله ده كلام !! ناس عندهم نيلين بدل واحد ومن كترت مويتهم لمن ملونين ( أبيض وارزق ، وعقبال البنفسجي) ..
اها ناس عندها مصادر موية قدر دا يقومو يعملوها بقروش ؟؟؟!!!! |
ههههههههه ، بنفسجي دي حلوة شديد
الموضوع جميل ويستاهل النقاش ،، امشي مشوار وارجع
|
Post: #3
Title: Re: ام الفقراء وما ادراك ما ام الفقراء ....
Author: معاوية الطيب
Date: 05-04-2009, 10:26 AM
Parent: #2
بقيتو تدلعوها كمان !!
دي ما ام الفقراء ، دي ام الحرامية
|
Post: #4
Title: Re: ام الفقراء وما ادراك ما ام الفقراء ....
Author: معاذ منصور
Date: 05-04-2009, 10:36 AM
Parent: #3
يا عمنا مشكلة الموية والكهرباء دي ما حتتحل اساسا حتى يلج (الجمل) في سم الخياط
يا تتحنكش (زي ما بقول) وتشتري موية سوبا يا تشرب من النيل ، (احب النيل النيل ، احب النيل يا جميل)
وبالنسبة للكهرباء الصينيين ما خلو حاجة ، اشتري ليك عدد واحد جنريتر وسكسك أوضاعك ، وبلاش شكاوي ..
لأنو الشكوى لي غير الله مذلة .. والا شنو يا ...
|
|