إستعجلت مشيت مالك ؟ الي زهير راسخ

استعجلت مشيت مالك ؟

الي زهير فيصل راسخ وهو يلوح لنا بمنديل عطر
اليه في غيابه العظيم ، حضوره المهيب في شوارع ذاكرتنا الخربة
الي طفلتيه سهي وسارة والي العظيمة رفيقة الدرب إقبال ! والي اصدقائه وصديقاته ورفاقه
والي مشروع الثورة الوطنية الديمقراطية وهو يفتقد ساعد أمهر وأصدق بنائيه !



(1)

لكأنك مارق لي رجعة
لكأنك بتدندن لحن جديد
لكأنك مارق لي واجب
والحاصل كلو ولا هماك

إتفضل ياخي اتفضل
هاك أدخل جوة الاحضان
بي ايدك أمسح أوجاعنا
و بي صوتك غني وأشجينا
لي بكرة وبعدوا وللثورة
لي عرق الشغيلة البنتظروا
للثورة نشيدها وآلآمها
للخط الثوري الاتمدد
للأمل الجاي علي مهلك

(للوهم الداير يسوقنا)
( للأصبح مفضوح الحال)

سل سيفك يا أملي الحاضر
بضراعك واصلين لي باكر
بي عرقك وصدقك
واصلين
بي غبنك وقهرك مارقين
الخطوة الاولي مشيناها
ما فضل الا شوية زيف
ما فاضل
يا صاحب غير خطوة
لي شمس أيامنا الراح تشرق
سل سيفك يا أملي الحاضر



(2)

(الطارق مين)
أهلاً يا راسخ اتفضل !

الطارق مين ؟
أهلاً بـ زهير

الطارق يا طارق يا طارق
الطارق ما قاسم أمين
لا راشد لا أبداً جوزيف
لا القرشي لا كل العابرين

الطارق مين ؟

الطارق بعضاً من نفس الكداح
زول دوغري وواضح وحبوب

أهلا يا زميل

الاسم الحركي : سمير
العمر الحركي : مشاوير
الحلم الثابت : إنسان

طول عمروا
بيعمل للغير
طول عمروا بيهتف في الناس
في (القادم) لازم انجاز
الخط الثوري
وتجميع
الواجب الثابت
تطوير
النقد الذاتي
قضايا العصر
تجديد الحزب
(مقوي) الشهر
جند الترحيب
مرحب يا زميل
الخط الثابت إنجاز
يا زول يا زوز ياكيكـ
استعجلت مشيت مالك ؟
شن لاحق يا زول بهناك
خليت الحاصل لي مين ؟

(3)

دة (الخامس) كان مستنيك
مستني حضورك بي هيبة
الخامس يا خامس يا خامس
فتشنا السككـ البتودي
لي خاطرك يا راسخ الأحلام
عاينا في كل الوجوه
كل الغلابة المتعبين
في السكة كانت ضحكتك
والهمسة كانت غنوتك
وضربوا النحاس
ومرق الرفاقا
المرهقين الطيبين
الانقياء الاولياء
الأنبياء المرسلين !

(4)

الاك ما حمل الطريق
الي هناك !
الاك يا من حملت وحدك
هم العابرين الي هناك
فلم الغياب ؟
لم
لم تقل
أن الريح يمكن أن تخون
العاشقين
لنصحوا هكذا فلا نجد الطريق

لم
لم تعلمنا
جسارة أن نواصل
دون ضحكتك البريئة
يا أيها الوطن الجريح !
قتلوك أم قتلتنا الشرائع
والشعائر والعشائر
وإمتهان الزيف في الزمن
الضلال


(5)

لكنك كنت هناك
في الشمس الطلعت
رغم القهر
في هتاف الناس المغلوبين
البحلموا زيك بي
عالم دوغري ومطامن وحبوب
بي وطناً شايلنوا مناديل
والغيرهم (خاميهو) بنوك
عدمان السكر في التموين
لا كهرباء موية
لا صحة
طول عمرك بتبشر بالثورة
يا نبي الثورة الوطنية
يا الزيك أبداً ما فيش


يا زول يا كيك
أخلاقك وأحلامك أحلام
أمجادك وأمجادك أمجاد
أيامك كانت أيام




(6)


لو كان للعالم أن يتوقف لحظةً
لكان من الانسب أن يتوقف يوم فقدك يا زهير يا راسخ
لكنه العالم يا رفاق دوماً يفجعنا في أجمل من نحب !
في الخالدين زهير فيصل راسخ !
في الخالدين صديقي

إلاك ما افتقد الطريق !

يا ماشي يا كم زول يجوا
يا جايي بي كم زول مشوا
يا ماشي في كم زول تصل
رسِّل سريع
وبلِّغ سلامنا
الشوق فظيع
سلِّم على المحجوب
وجوزيف والشفيع
سلِّم على حلمك محمد والمسيح

(حميد / هاشم الاخضر حبابوا)

Quote: الي زهير فيصل راسخ وهو يلوح لنا بمنديل عطر اليه في غيابه العظيم ، حضوره المهيب في شوارع ذاكرتنا الخربة الي طفلتيه سهي وسارة والي العظيمة رفيقة الدرب إقبال ! والي اصدقائه وصديقاته ورفاقه والي مشروع الثورة الوطنية الديمقراطية وهو يفتقد ساعد أمهر وأصدق بنائيه

الحزن كثيف
ياخضر علي مثل هولاء .
والعريبة الموت بلقطهم لقيط
عزل ..الحزن كثيف ..

لرجل للمثل مثال
وللقيم قوام
ارحمه يارب رحمة واسعة
ولدمعة سهى الما بتقيف
ولسارة الطفلة الما شيعت من قولة بابا

ولتلك النخلة الباسقة العطيمة اقبال

لمحمد غاندي السكنو الحزن وما غاب

الى تلك الاسرة الصامدة

ربنا يصبركم....

هكذا هي الحياة تنتقى الجميلين فقط فيرحلو..
ثم نبقى نذكرهم مابقينا ..
نسأل الله الرحمة والمغفرة للفقيد زهير ..

الاخ \ خضر
تحياتي
في دروب الغربة التقيت الراحل \ زهير باسماً وبشوشا رغم المرض يبادرك بالسوال عن صحتك قبل ان تساله عن صحتة مهموما بقضية شعبه اكثر من اهتمامة بصحتة ...... ثم رحل كالطيبون في بلادنا يرحلون دوما ويتركون في القلب حسرة لرحيلهم
وكل ماطالعت قصيدة محجوب شريف يايابا مع السلامة تذكرت زهير
ولا املك الا ان اقول طبت حيا وميتا يازهير

يابا مع السلامة يا سكة سلامة
في الحزن المطير
يا كالنخلة هامة
قامة واستقامة
هيبة مع البساطة
اصدق ما يكون
راحة ايديك تماماً متل الضفتين
ضلك كم ترامى حضناً لليتامى
خبزاً للذين هم لا يملكون
بنفس البساطة والهمس الحنون
ترحل يا حبيبي
من باب الحياة لباب المنون
روحك كالحمامة بترفرف هناك
كم سيرة وسريرا من حولك ضراك
والناس الذين خليتم وراك
وعيونم حزينة بتبلل ثراك
ابواب المدينة بتسلم عليك
والشارع يتاوق يتنفس هواك
يا حليلك حليلك يا حليل الحكاوي
تتونس كانك يوم ما كنت ناوي
تجمع لم تفرق بين الناس تساوي
نارك ما بتحرق ما بتشد تلاوي
ما بتحب تفرق من جيبك تداوي
الحلم الجماعي والعدل اجتماعي
والروح السماوي والحب الكبير
في الزمن المكندك والحزن الاضافي
جينا نقول نفرق نجي نلقاه مافي
لا سافر مشرق لافتران وغافي
وين عمي البطرق جواي القوافي
يا كرسيه وسريرو هل ما زلت دافي

يا مرتبتو امكن في مكتبتو
قاعد يقرا وزهنو صافي
يا تلك الترامس وينو الصوتو هامس
كالمترار يساسق يمشي كما الحفيف
كم في الذهن عالق ثرثرة
المعالق والشاي اللطيف
تصطف الكبابي اجمل من صبايا
بينات الروابي والضل الوريف
احمر زاهي باهي يلفت انتباهي
هل سكر زيادة ام سكر خفيف
ينده للبنية يديها الحلاوة
والخاطر يطيب
يدخل جنو منو محبوب الشقاوة
يستنى النصيب
الدفو والنداوة السنا والعبير
كالغزلان هناك في الوادي الخصيب
حيث الموية عذبة والغصن الرطيب
كم تحت المخدة اكتر من مودة
للجنا والغريب
عش وعشب اخضر جدول من حليب
يابا ابوي يا يابا
الشمس البتطلع بلت منو ريقا
والنجمة البتسطع فيه تشوف بريقا
الندى في حركتو يطفيها الحريقة
ننهل من بركتو زي شيخ الطريقة
شاييهو وطرقتو والايدي الصديقة
يلا نسد فرقتو حب الناس درقتو
يا موت لو تركتو مننا قد سرقتو
كنا نقول ده وقتو لكنك حقيقة
النفاجو فاتح ما بين دين ودين
نفحة محمدية دفئاً كالضريح
ميضنة كم تلالي جيداً في اليالي
مجداً في الاعالي
مريم والمسيح
قلباً نبضو واصل ما بين جيل جيل
ما بين كان وحاصل او ما قد يكون
ما بتشوف فواصل الا الذكريات
وآلام المفاصل بعضاً من شجون
يابا مع السلامة يا سكة سلامة
في الحزن المطير

يالله ..............

ياخدر ...

كتبت .. ومسحت .. وكتبت .. ومسحت

لم أجد كلمات توازيه

ولا أستطيع التعبير عن حزنى.. و.شوقى .. و.. حبى له

ألهم أرحمه ..

رحماك يا الله ....
ربنا يرحمو و يغفر ليهو و يصبر زوجته و بناته

الاعزاء
باسط مكي
هشام الطيب
د- نجاة محمود
عثمان الشيخ
أسامة الكرور
أمين محمد سليمان

شاكر لكم حضوركم في مأتم القلب هذا ، جبر الله كسوركم ولا أراكم مكروهاً في عزيز لديكم
زهير كان حالة إستثنائية قلما أن يجود الزمان برجل مثله ، عاجز عن الشكر لكلماتكم
في حق الرجل وإن كنت اعتقد أن صحائف الارض كلها لو ملأناها لن نفي الرجل بعض بعضه
لكنه الموت عملاق لا نملك الا أن نتقاذم أمامه .
مودتي الخالصة لكم !

Quote: يلا نسد فرقتو حب الناس درقتو يا موت لو تركتو مننا قد سرقتو كنا نقول ده وقتو لكنك حقيقة

وجعني فقده دون ان اعرفه جسدا وألتقيه
هرولت لصيوان العزاء كأني لم ابتلي بفقد عزيز قبله

لك الصبر الجميل ايها المخلص الوفي .. خضر
وللعزيزه الهاشه الباشه اقبال
ولسهي وساره التي تحدت الاحزان وأدت امتحان الثانويه هذا العام
ولكل ذويه ومعارفه واحبابه