عندما لا يتم الرد علي مداخلتك في احد البوستات بتزعل وتدق راسك في البورد؟

عايزين نعرف شعور اي واحد فيكم عندما يجتهد في قراءة احد البوستات ويجد في نفسه تفاعل مع الموضوع المطروح وينحت راسه ويضيف مداخله يتوقع انها ستضيف الي البوست ولكن لا يتم الرد عليه في عدة حالات :
* ان يقوم صاحب البوست بالرد علي بعض المداخلات ويتجاهل مداخلتك , ( لاي سبب مثل النسيان او التجاهل او غيره )
* ان يقوم صاحب البوست بالرد علي المداخلات بالترتيب وعند ما تكون مداخلتك المقبلة (يطنش البوست ويفتح لي حنانو )
* ان يقوم صاحب البوست بالرد علي المداخلات حسب علاقاته الشخصية بالمشاركين فبعض المداخلات يوليها اهتماما رغم انها كلام ساكت ويرد علي مداخلتك ردا من غير اهتمام رغم انك تري ان مداخلتك متعوب عليها وافضل مما قام بالرد عليه اعلاه
الخ ...
ماهو رد فعلك في مثل الحالات اعلاه هل ستقرر انك لن تشارك في بوستات هذا الشخص السخيف , هل تجد العذر للبعض في ان الرد علي المداخلات مهلك واحيانا لايوجد يرد به عليك
ام هل تتوقع كلمة شكرا علي اقل تقدير لمداخلتك ؟
هل تحرد البوست حتي لو تم الرد عليك ولكن متاخرا بعض الشي؟
هل تقرر انك ستعامل مثل هذا الشخص بالمثل في بوستاتك؟
وفي النهاية هل ترون معي ان الرد علي المداخلات متعب بعض الشي و لايوجد الكثير ليقال بعد عرض الكاتب لموضوعه الرئيسي
وان بسبب الرد علي المداخلات يجعل الكثيرون يعزفون عن الكتابة
انا شخصيا اري ان الرد علي المداخلات التي تصب في نفس رايك هي عبارة عن تحصيل حاصل لاداعي له وان الرد يجب علي المداخلات المختلفة معك في الراي لانها تولد نوعا من الحوار

هذا البوست ذي علاقة بالموضوع وفيه اجملت بعض النظريات في طريقة الرد علي المداخلات

كشف الحال في اسداء النصح لطلال

والله يا عمكـ
أنا بخت كلامي وبمشي!

هسي زاتو لو داير تطنشني عادي ياخ!

ما إنت أكبر زول في البورد دا بفتح بوستات ويعمل ميت!

محمد عبد الماجد الصايم

Quote: ما إنت أكبر زول في البورد دا بفتح بوستات ويعمل ميت!

ما علشان كِده سوا البوست ده ... علشان يِشوف رأي القُراء ... ده < حركة >
صِحِية مِنو

عليك الله يا أساسي أفتح لِحنانو ظاتوو

عزام الـ ( الطحنية ) عطفا علي بوست هويدا والدشدشة الحصلت

مرحب بيك يا وجيه

Quote: ما علشان كِده سوا البوست ده ... علشان يِشوف رأي القُراء ... ده < حركة > صِحِية مِنو

والله انت مفتح كشافة بس لقطها وهي راكة ( اسع تجي واحدة تقول لي عين الحسود بتقد الـواطــة )
لو الحلوين قرو الرابط الجبتو دا بيلقو اخوك شتتها زمان

Quote: والله يا عمكـ أنا بخت كلامي وبمشي!

اها يا ابو الدقيق منو البخت كلامو ويمشي ؟؟
انت بتقعد في البوست اكتر من سيدو
يا عمك انت بتجي البوست بي (حلتك) وبتختمها بـ (الشيشة)
قول كلام غير دا يا لذيذ

بعدين قلت لي

Quote: هسي زاتو لو داير تطنشني عادي ياخ!

اطنشك وين يا عمك وانت دايرني صحوا تراني عيان
والله فعلا مالو لو في بعض الاحيان
تصدق امس زرزروني ليك زي العصفور قالوا لي ود الصايم (يا كبير)

اساسي

لك كل الود

اخوك جديد ولسه في مرحلة تكوين الافكار عن المنبر وناسو، مرت علي الحالة الانت ذكرتها دي ؟ وقريت بوست لواحد جديد قال المنبر ده كيمان كيمان خليتو في بكاهو وجيتك بي جاي .

اساسا بعد تكتب ردك للزول بالبوست

البيخليك ترجع تاني وتشوفوا هو رد والا ما ردّ شنو ؟

والا عشان تأكل الناس في لحمها ..

غايتو انا بكتب وما برجع تاني طالما انه الموضوع فكرته الرئيسية وضحت وانا قريتها ..

اما مواضيع الحوار والشد والجذب فبالضرورة ترجع تاني وتشوف الزول قال ليك شنو ..

يمكن علّ الكورة حبتين فتساعده انه ينزلها واطة ..

غير كدة شكراً لمرورك بتكفي

وهسع شكرا للموضوع

Quote: اساسا بعد تكتب ردك للزول بالبوست البيخليك ترجع تاني وتشوفوا هو رد والا ما ردّ شنو ؟ والا عشان تأكل الناس في لحمها .. غايتو انا بكتب وما برجع تاني طالما انه الموضوع فكرته الرئيسية وضحت وانا قريتها .. اما مواضيع الحوار والشد والجذب فبالضرورة ترجع تاني وتشوف الزول قال ليك شنو .. يمكن علّ الكورة حبتين فتساعده انه ينزلها واطة .. غير كدة شكراً لمرورك بتكفي وهسع شكرا للموضوع

عارف طريقك دي زي الجماعة الزمان ايام بيكتبوا في الحيطة بالليل يسقط السفاح وعاش نضال الشعب والكلام دا اكيد تاني ما بيجو يشوفوا كتابة بالليل دي اصبحت كيف عشان الشبهات وكدا , ياخي الزول البوزع الكتشينة بقعد لي نهاية العشرة يتجادع مع الجماعة ما سمعنا زول وزعها قبل كدا وكفا ورقه وشتت
كلامك دا بينفع في البوستات الاجتماعية وبس بتاعة البركة فيكم ومبروك المولود ومبروك التخرج وحمد لله علي السلامة لكن دي زاتها عندها ناسها البيقعدوا ليها

Quote: خوك جديد ولسه في مرحلة تكوين الافكار عن المنبر وناسو، مرت علي الحالة الانت ذكرتها دي ؟ وقريت بوست لواحد جديد قال المنبر ده كيمان كيمان خليتو في بكاهو وجيتك بي جاي .

والله يا اخوي الجديد وليد التلب راجياك جنس مشاكل وعداوات وصداقات مفيدة وغير مفيدة عشان تكون افكار
ياخي انا لي تسعة سنوات بحاول للان اكون فكرة ما كونت وجهة نظر خليك من فكرة

Quote: انا شخصيا اري ان الرد علي المداخلات التي تصب في نفس رايك هي عبارة عن تحصيل حاصل لاداعي له وان الرد يجب علي المداخلات المختلفة معك في الراي لانها تولد نوعا من الحوار

اساسي

مرات بكون البوست نفسو مافيهو فكرة عشان تتحاور حولها !!
عشان كده بتكتر المجاملات من ناس صاحب البوست ويمكن ينحرف البوست من مساره الاساسي لمسار من مداخلة تانية

Quote: * ان يقوم صاحب البوست بالرد علي بعض المداخلات ويتجاهل مداخلتك , ( لاي سبب مثل النسيان او التجاهل او غيره ) * ان يقوم صاحب البوست بالرد علي المداخلات بالترتيب وعند ما تكون مداخلتك المقبلة (يطنش البوست ويفتح لي حنانو ) * ان يقوم صاحب البوست بالرد علي المداخلات حسب علاقاته الشخصية بالمشاركين فبعض المداخلات يوليها اهتماما رغم انها كلام ساكت ويرد علي مداخلتك ردا من غير اهتمام رغم انك تري ان مداخلتك متعوب عليها وافضل مما قام بالرد عليه اعلاه

والله صراحتن كدي يا السماني يا حبيب انا عندي إضافة للتلاتة حالات الكاتبهم فوق ديل..بقت عندي طبيعة زي الزفت إتعلمتها لي شهور كدي..بفتح البوست...والناس بأمانة ما بيقصرو..في أمان الله بجي أرد على الناس بالترتيب و كل شي بيكون تمام..وبلاقي روحي إتشغلتا و للا بعمل في شي غبتا..ولمن أرجع ألاقيهو يا إتأرشف يا الأحداث حتمت فتح بوست جديد..لكن بالجد ناوية أنكت البوستات دي كلها و أرد على الناس..لأنو تعبو و داخلو..ودي فرصة أقول ليهم غلطانة و حقكم عليْ..
لنا

يا اساسي

انا غايتو ملاحظ انك داقي لي طناش شديد

زمنك العذابي كنت زول كويس

المال والبنون زينة الحياة الدنيا الاولاد عرفناهم المال شفنا صورتك مع عصام الخواض وسمعنا تحت تحت كده برادو جديدة

ياخي على اسوا الفروض اعتبرنا من ضمن الباقيات الصالحات .

يعني المواضيع البيناتنا خلصت بانتهاء مراسم زواج هناية وهناية يخس عليك

ح اكون احسن منك واقول ليك تحياتي

زاتووو الزعلان بس مش شديد لوووول

اساسى

محاورك فى هذه المداخلة يعتبر نفسه من ملوك البوستات التى لا يتم الرد عليها
يعنى ببساطة أغلب البوستات التى اقوم بفتحها لا تجد ردود وممكن ترجع لإرشيفى القريب

المهم بالنسبة لسؤالك الأمر عادى بالنسبة لى

بالعكس بعد مرات بأرتاح جدا لمن ما القى زول يرد على ما اكتبه


ما أكون مرقت بعيد عن الموضوع - يعنى هسى لو ما رديت على فى الموضوع دا . عادى جدا لأنى اصلا بيكون الشى الداير اقولو قلتو ووصل

Quote: * ان يقوم صاحب البوست بالرد علي بعض المداخلات ويتجاهل مداخلتك , ( لاي سبب مثل النسيان او التجاهل او غيره ) * ان يقوم صاحب البوست بالرد علي المداخلات بالترتيب وعند ما تكون مداخلتك المقبلة (يطنش البوست ويفتح لي حنانو ) * ان يقوم صاحب البوست بالرد علي المداخلات حسب علاقاته الشخصية بالمشاركين فبعض المداخلات يوليها اهتماما رغم انها كلام ساكت ويرد علي مداخلتك ردا من غير اهتمام رغم انك تري ان مداخلتك متعوب عليها وافضل مما قام بالرد عليه اعلاه الخ ... ماهو رد فعلك في مثل الحالات اعلاه

والله يا أساسي انت فتحت موضوع هام حقيقة في شكل العلاقات بين الناس

يحز في النفس حقيقة أن لا تجد الردود بالذات بعد الاجتهاد في الكتابة وخاصة إنه الكتابة ترفع البوست وتعيد له الحياة في كثير من الاحيان,

عندما اكتب في مكان اشعر بأنه اصدقائي ايضا يكتبون في نفس المكان وبعض خصومي ايضاً يكتب مداخلات باسمي بدلاً من اسم صاحب البوست وعلى صاحب البوست أن يقدر هذا ويمكن لأي شخص ان يتوقف عن فتح بوستات جديدة إذا لم يتوفر لديه الوقت الكافي للرد والتداخل,

بعض الكتاب في البورد ربما يفكر بان الرد على الناس يلزمه بعلاقة خاصة معهم وهذا غير صحيح في الغالب الأعم فإقامة علاقة أو صداقة هو أمر شخصي لا تقرره مجرد مداخلة أو رد سواء كان الرد لطيفاً أو كان عنيفاً,

هذا البورد وسيلته الوحيدة هي الكلمة المكتوبة ولا سبيل لنقل المشاعر الخاصة عبره إلا من خلال ما تستطيع الكلمات أن تعبر عنه وبالتالي فالكلمات محمولة على ما قد يتبادر منها للأذهان وبالتالي فمن الصعب ومن الخطأ الاتكال على الكلمات وحدها في فهم حقيقة ما يحمله الشخص الكاتب من قصد أو انطباع,

شكرا اساسي


أحمـد

حبيبنا الأساسى اساسى
وينك يازول ووين اراضيك.آخر عهدى بيك وانت لسع عريس جديد لنج.واما الآن اكيد حسكنت واتمليت شفع.
والله مامنعنا من مداخلتك الا ظروف العمل التى تحتم علينا قضاء فصل الخريف خارج الخرطوم .
بالمناسبة البسبوسة هديتى ليك بمناسبة زواجك لغاية هسى قاعدة فى النملية,ورينى ارسلها ليك كيف .
ماتخاف ماحتسـمـمك .
مع تحياتى لك ولأسرتك الكريمة .

أساسي حبابك

أساسي
إيمو

شكراً على المرور

وبس

حبيبنا ايمو

ياخي مشتاقين ,
كيف الدنيا وياك والاخبار والعيال
ربنا يحفظ الامورة
تحياتي يا صديقي

قلقو

والله قربت اقول ليك طلعت اشاعة , ياخي بسبوستك دي انا جيت السودان براي وتاني جينا اتنين وتاني جينا تلاتة واسع اربعة وانت بسبوتك في النملية ؟؟؟
نمليتك دي يا قلقو في المتحف ؟ اسع الزول يقول ليك زي ما قال لي اوكامبو . بسبوستك دي بلها بمويتك السكر وقابلني بيها شهر تزعة ف يالمطار ان شاء الله
والله مشتاقين يا رجل؟

والله يا الشايقي
ما عندي كلمة اضيفها ليك انت كتبت عن اوجاع حقيقية وامكن عن شريحة كبيرة انا شخصيا عندي راي في المداخلات احينان اجدها مهلكة جدا لكن في نفس الوقت لما زول يجليني بتاكل معاي فما عارف زاتو الحل شنو ؟

Quote: محاورك فى هذه المداخلة يعتبر نفسه من ملوك البوستات التى لا يتم الرد عليها يعنى ببساطة أغلب البوستات التى اقوم بفتحها لا تجد ردود وممكن ترجع لإرشيفى القريب المهم بالنسبة لسؤالك الأمر عادى بالنسبة لى بالعكس بعد مرات بأرتاح جدا لمن ما القى زول يرد على ما اكتبه ما أكون مرقت بعيد عن الموضوع - يعنى هسى لو ما رديت على فى الموضوع دا . عادى جدا لأنى اصلا بيكون الشى الداير اقولو قلتو ووصل

اووووو اخونا ود العجمي الزمان
ياخي حرام عليك ما سمعت بالمثل الدارفوري (ام جركم ما بتاكل خريفين) ما اكلتوها زمان من سنة شختة لما تنزل بوست انحنا متاوقة ما نقدر نتاوق
بعدين ياخي امكن بقيت زي تجليها ثابتة . عارف يا ود العجمي الفكرة في المنبر دا من يومها التفاعل زي شغل البكيات حقت النسوان جيتنا في فراشنا بنشيل معاكم الفاتحة
ما جيتونا بنفتح ليكم , شفت الجندرة بتوصلنا لحدي وين ؟ فيا عمك انت بتجي في السنة تلاتة مرات تفك ليك بوست وترد مداخلتين وتاني بتجي السنة البعدها
بعدين امكن العلة في حنكك بقي ما سنين هههههههههههههه علي وزن ضحكات الزول زاتو

الزول زاتو ابو البكور

ياخي الله ما ساترني معاك من زمن شميتني من سنة الفين وتلاتة وشخت لي اربعة سنين بعدها وانا معاك من حفرة لي حفرة ههههههههههههههه
دايما طالع مني زعلان . والله عمليتي دي ما يعملها ابراهيم نفخو قدس الله سره
ياخي والله ما مطنشك ولا حاجة بس اخوك بقي يجليها ثابتة , الواحد كان كويس قاعد براهو لا هم عصف لا ريحا كسح اتشالق علي روحه براهو
اسع بالله حدد موقفك الاخير والنهائي مني زعلان شوية ولا ما زعلان
بالمناسبة ما قاعدين تجو بيت الله ؟

الاخت لنا عزاز المهدي

تحايا

والله دي المشكلة زاتها الانت لمستيها دي انه احيانا البوست يكون فات فيهو الفوات والاحداث اتغيرت ولما تجي تتداخل مع واحد من الناس الشاركوك بتكون محرج
فعشان انحنا نلقي الية نزيل بها الحرج دا كتبنا البوست دا
وربنا يديك الوقت لردود بس ما شافة انه المواضيع الحترفعيها من زمان حتكون تحصيل حاصل ومجاملة ما اكتر ؟

.
بايخه يا اساسى


ولكن ما رأيك فيمن كتب بوست للسؤال عن أسـاسى شخصيا ولم يتكرم بالرد عليه ؟؟؟


مع تحياتى


.

الغالي بشير وين الحي بيك

والله فعلا بايخة مني بالله نزلت بوست ؟ ياخي الشباب مافي واحد منهم يقول حاجة مع اني كل يوم معاهم
عديها المرة دي يا ملك وتقبل عذري يالغالي بس ما كحلتو يا بشير

.

أساسى ... أين أنت ؟؟؟؟ http://

ولا يهمك يا باشا أهو البوست كله جبناهو ليك ، لكن ما حتقدر ترد عليه
لآنه راح للإرشيف .

تحياتى يا غالى وكن بخير

.

حبيبنا أساسي ..

تحياتي ،

والله حركة أبيخ من بايخة ..
تصدق أنا عملت مداخلة لي زول كده .. ونجرته راسي نجرة مكلفة ..

تصدق بعد ده كله جلاني .. رده على الذي أمامي والذي من خلفي .. وعن يميني وعن شمالي ..
ثم تركني ..

والله صاريها ليه لي أسع دي ..

وحلفته تاني ما أدخل ليهو أي بوست ..

تحياتي
الأرباب

ايواااا يا الارباب جيتني في جرح

دا الكلام الداير اسمعه من قبيل
تعرف مشكلة الطناش او الفتح او الشخيت دا انه المودة قد تتغير الي عداوة لكن احيانا الزول مفروض يلقي لي اخوه العذر قد يكون نسي او اتخيل انه رد عليك واتعامل مع الموضوع علي هذا الاساس او ما لقي كلام يقوله ليك لكن بيني وبينك انت زولك دا طنش عديل وما تخليهو فلو نسي شوفة صورتك واسمك دا مفروض يرجعنه انا مني ومنك افتح بوستك للزول دا عديل واختها ليهو اخلق لي اي سبب وجيه او غير وجيه بس ما امررها ليهو ويعرف انه مكجن اسع انت افتح البوست وليك عليك امدد ليك اقامتي فيهو للصباح ههههههههه

Quote: * ان يقوم صاحب البوست بالرد علي المداخلات حسب علاقاته الشخصية بالمشاركين

أساسي حمد الله على السلامة ..
تعرف في واحد محسوب من قبيلة المبدعين قام بالإنضمام للمنبر و فتح أول بوست و تقاطر الناس لتهنئته و كنت أنا من ضمنهم و جد كنت سعيد بإنضمامو للمنبر ..
أها زولك بعد قريب الكم و تسعين مداخلة جاء و عزل ليهو تلاتة أو أربعة أشخاص سلم عليهم و الباقين والله العظيم و لا حتى شكراً ما قالها ليهم ؟؟؟؟!! و كأنو الترحيب بيهو كان شي مفروض على الناس و أنو الناس ليها الشرف إنو هو بجلالة قدرو أنضم للمنبر مع إن المنبر مليان مبدعين في غاية التواضع ...

والله الزول ده كرهتو و بقيت لو جابو في التلفزيون أغير المحطة ..بلاء يخمو زاتو ..

تسلم يا خالد عبد الله

ياخ ما تاخد فيني الاجر وترسل لي اسمه بالماسنجر لاني زولك دا انا شاكي فيهو وبيني وبينك بعد كلامك دا انا ذاتي شميته لو مستعد تعال نشتغلوا مقصات لو بشارك والله يشوف المكشن بلا بصل . قول ويعرف انه مبدع دي هناك في الشاشات هنا النت دا عنده شفوت وناس ما سائلين فيهو زاتو

حلو انت يا اساسي وموضوع شيق جدا بس اوع تهمل مداخلتي دى

في راي انت كصاحب بوست زى سيد البيت والضيف الجاييك اكان جاك كزائر لتسجيل حضور ومتابعة فقط فمن واجبك ان تطيب خاطره بكلمة كلمتين . وفي تقديري تفاعل صاحب البوست مع المتداخلين بيكشف ليك دواخله الحقيقية اكان كريم حقيقة او بخيل .

اضف الى ذلك الضيوف خشم بيوت منهم من ياتيك لينفق مافي وسعه وحسب مقدراته وهنا تتبين لباقة سيد البيت من حيث تقديره لعطاء المتداخل فان كان المتداخل يملك ان يقدم اكثر مما قدم فهنا يمكن التعامل معه بالمثل وان كان ما قدمه في حدود ثقفه الفكري فمن واجب سيد البيت المتمكن ان يرد اليه اناءه باطيب مما جاد به عليه .

وهنالك سيد بيت بحر وفيضه داشر بره . ده ما بميز مطمورتو فاتحة ليتكيل منها البستحق وما بستحق .


جاييك ما تفطني

تسلم يا بشير وان شاء الله مردودة في اول غياباتك في الربع الجاي هههههه


الطيب شيقوق

والله كلام بتاع شيخ عرب يعني لو ما السايبر دا كان جريت لزوار البوست بتاعك بكري من اضانه وتكيته وكبرت هلا هلا

يا الطيب لكن احيانا الكلام بيكون تحصيل حاصل واحيانا مجاملات متكررة واحيانا مافي كلام يتقال زاتو ومرات كتيرة بتبقي مشغوليات ولما ترجع تلقي الاحداث اتغيرت وطفا في السطح الجديد فلو قمت راجع تاني لي ناس ود البشري وود الصايم العاصرين الفراش بتكون بتسقي في حواشة مهجورة
لكن النصيحة لله لو زول فتح ليك بتاكل معاك
اسع بعد قريت كلامك ولقيت نفسي ما عندي الامكانية ارد عليك باحسن مما قلت فكرت انزل ليك صورة واهدي ليك اغنية ولا ان شاء الله اطالب بكري يعمل ليك مكتبة تانية لو عندك مكتبة
افوو انا اخوك يالطيب

اساسى يا حبيب مين يقدر يطنشك انت ياود جدة


عادى وبتحصل كتير على العموم انت سنير ومفروض ما تتاثر بالحاجات دى

وتخلى النفسيات دى للبرالمة فقط

مع تحياتى

عادل عبد العزيز
تحياتي
ياخي بالعكس انا فاتح البوست زي ما قال عزام نظام زوغة وكدا لو قريت الرابط النزلته ما بتقول لي كلامك دا , يعني اتوقع المرة الجاية انه الواحد يجليك ههههههههههههه

شرفتنا يا الغالي

اساسي

كيفنك

زمان زمن الزمن زين و الشعر مغطي الأضنين
وزمن الباندوث ما مهدر في الفارغه و الملايانه
كان في زعل


لكن اسي و حاتك بداخل مع الناس و ما بردو علي
وأنا ماشغاله بي الفارغه
عندي و قت فراغ بهدر فيه


بس

بت الهنا
تعرفي زي ما قلتي لكن انا عكسك زمان الواحد وقت فراغه عريض يكفي سبعة بوردات الواحد بيرد علي الرد والما شارك في البوست لكن المشكلة اسع الواحد بلقط البوستات البيفتحها تلقيط عشان يكسب زمنه ومن ناحية تانية ما يتورط ليهو في قراية بوست يخليهو يلعن اليوم الدخله المنبر

مرور للتحية و السلام

مراحب يا عبد المحسن

وين الحي بيك ؟

ليك وحشة والله

شنو ما جيت بلدنا ولا ضربتا

اساسي الاساسي في ثياب الباحث الاجتماعي

ما عرفتك؟

ازيك؟

كتبت ليك كلامات كتارات و انا في المكتب، و كنت خاتة القلم فوق اضاني عملات النجارين
و جركانة القهوة الما خمج تبعث بأبخرتها في المكتب ...
قوم يا النت اقطع قومي يا انا احردي البورد و امرقي البيت
و لكن أبت نفسي الامارة بالتحشر إلا أن أعود و أدلي بدلوي في الحوار ...


مدخل اساسي ..

انا شخصيا ما بزعل لو ما عبروني خاصة لو كلامي امتداد لفكرة صاحب البوست و ما بحب حكاية
ردي لي و أرد ليك لانو اعتقد انو الفكرة الاساسية هي انك تعبر عن بعابيرك ،
بعابيرك دي ممكن تمدد كرعينها من خلال مداخلات الآخرين و هكذا دواليك دواليك دواليك ...

الشاهد، و ما متأكدة لو الكلمة دي لافقة هنا بس ده ما موضوعنا، انا شخصيا كتابتي كسولة
كان في الفكرة الأصيلة المارقة من نافخوي كان في التفاعل، يعني لو جيت لقيت بوست مكتوب
وفي نفس الفكرة بتاعتي، اكتفي بعذب القراءة و ادعو للكاتب بحسن المآل و امشي انوم نومي

وفي حالة الفكرة الأصيلة، و المقصود انها من بنات افكاري المسرحات شعرهن و عاملات ضفاير
بخجل و بخش في ضفوري لما ما أرد على الناس، بس من محبتي للناس ما دايرة اجاملهم و ارمي
ليهم زلابية عجينها بايت وكلام مكرر، بس مرات بأعملها على مضض علشان بس خاطر عيون الغالين ...

الكتابة دي زي الابتسامة عندي، ليها مواقيت و بواعث خاصة قاطعاها من راسها، لا بقدر اجبرها
لا بأقدر الوي ليها يدها ... و كذلك كتابة الآخرين، هم مخيرين وعافية ليهم لـ الله و الرسول
كان ما ردو علي وإن تعمدو ذلك، في النهاية مخيرين يا اخوي ... نقبقب الناس إلا يردو علينا؟

مدخل شرس ...

لو الموضوع شكلة رابة و الكلام فيهو مسدسات،
باعتبر الرد يا علم ابيض للسلام يا كشحة بنزين للنار
وفي الحالتين باستغفر الله و اتوب إليه،
و امشي اتم نومي تاني لانو الاسفير يضل اسفير فلم نشق عليه بكثر العشم؟

يا اخوي الفكرة موش تبادل أفكار ولا رد دين و طوق ورد لافف في اعناق بنات هاواي؟

اعتقد، وقد يكون اعتقادا مطرطشا كأغلب حالي، انو الحرية دي سمحة خلاس
الزول مفروض يحس انو مخير لمن يتحير ..
وبالذات في هذه الفُسحة الجميلة الوارفة (ده كسير تلج لبابا بكري)

ومن منبري هذا انا عافية لأي نفر و نفرة ما ردو علي
و النبي اعفو لي لو تقاعست يوما عن الرد،
وحاة الله من غلاوتكم علي لأنو السلام يرد بأحسن منه
والكلام لو جا مارق من قلوبكم حقو الرد زاتو يكون على ذات القدر مارق من الفشفاش

بالمناسبة،

ما طالباك رد نوهائي (الوش داك الضاحك بس الاخدر الزرعي ما عندي الكود في البيت)

اساسي العسل

Quote: يا الطيب لكن احيانا الكلام بيكون تحصيل حاصل واحيانا مجاملات متكررة واحيانا مافي كلام يتقال زاتو ومرات كتيرة بتبقي مشغوليات ولما ترجع تلقي الاحداث اتغيرت وطفا في السطح الجديد فلو قمت راجع تاني لي ناس ود البشري وود الصايم العاصرين الفراش بتكون بتسقي في حواشة مهجورة

كلامك ده كلام ناس بندر لمو عندك بس اوع تطلعو بره ( وش ضاحك) . اسمع كلام اخيّك ده تخصص في السايكولوجي والانثربولجي والبايولجي ذاتو


اسع بعد قريت كلامك ولقيت نفسي ما عندي الامكانية ارد عليك باحسن مما قلت فكرت انزل ليك صورة واهدي ليك اغنية ولا ان شاء الله اطالب بكري يعمل ليك مكتبة تانية لو عندك مكتبة
افوو انا اخوك يالطيب

عليك النبي تسمع كلام اخيّك ده - اقول ليك كلام؟ بطلاق انا من ردك بعرف اصنفك زول بندر ولا زول خلاء . وفي البندر ذاتو بقدر اصنفك زول الطائف ولا زول امبدة .


اها كدا لقيتني كيف ؟

العميل اساسى
(صاحب برادو مستقبلا)

هسع دى فى واحد اسمه عمر الفاروق مجلينى وفاطينى لايف (كلمة واحد ابتسرت لتعميق الازمة)
يااخى الزول دة انا كتبت ليه مداخلة متعوب عليها سبقها اجراء بحث فى النت وتفتيش عن صورة
علبة حليب الاطفال المناسبة واجراء اتصال مع ام العيال عشان مقارنة السعر مع حجم العلبة
وفى الاتصال زاته اتجليت المرة الاولى والمرة الثانية بعد تم تاكيد المعلومة حصل استجواب
الكلام دة عايز بيه شنو وبتسال ليه لذلك نجرت لى كذبة تبعد عنى الشبهات وكدة دخلنا فى الذنوب
اها شفت مداخلتى دى مكلفة كيف ؟ بعد دة كله اجيك الفاروق فاطينى زى الماحاصل حاجة
عليه تانى لو شفت ليه اى كتابات من نوع عاااااااااااد هى ماصلصة وسوووووحى وكلامات
زى دى مابمشيها ليه ساااااى كدة عشان تانى لو شافنى مايفطنى حقارة كدة
لكن تعرف ياحبيب احيانا فى البعض بيكون فاتح بوست شرك للعصافير
يقوموا يجوا الصقور لافين يضيعوا عليه الزمن من غير فائدة والزيكم كدة متردد اسافير
ومنابر عليا مفروض بيشم بوستات الشرك من خلف البروكسيات

يا أساسى عاااااااااادى اجلوكـ زى الماف شئ

المهم انكـ قلتا الكلام العايز تقولو

ردا ماردا دى شئ بخصو ...

بعدين عادى زى حالاتى دى تفتح بوست بقصيده تلقى بوستك ادردق

للصفحه التانيه فى اقل من ساعه تقول فى شقلبان ولا ممسح بزيت

بعدين الشئ الطلعتا بيو من البورد ده انكـ لو ماعندكـ شرذمه وشله

وكتبتا حاجه اقنع منها وخليها للطير ...

عادى بتلقى بوستات ... غير موفق ... انصرافى ... متزمزغ ... وهلم جرا

وردود راقده رز بس من عصبة الكاتب

للصفحه التانيه فى اقل من ساعه تقول فى شقلبان ولا ممسح بزيت

يضحك نهارك يا قولة محسن خالد

Quote: يضحك نهارك يا قولة محسن خالد

آميييين وجمعا

أصلو البورد ده غير دعوات مابنمرق منو بحاجه

يا اساسي
تعال رد
وبطل حركات الدبابين
والميل اربعين
دي

عني انا مرات كثيرة بتعب من البوست
بالرغم من وجود مداخلات تستحق الرد
في السد
او
في التنك

فبجمل لي رد للجميع بغية أن اسكر الموضوع
لكن في اولاد حانوت ما بيخلوك
ويشبكوك مداخلات
عايزين عليها الرد

كيف عروستنا الصغيرة آ السماني ؟

أساسى الأساسى،

والله زى ما قلت و قالو الجماعة،
تتعدد الأسباب، و المحصلة واحدة،،،

التجاهل
التجاهل
التجاهل،،،*

تصدق،
أنا الطبيعى،
ولا يهمنى،،،،
إذا ثبت أن القصد (النية الأكيدة) غير متوفر،،

بالك لأنو زى ما قال الطيب ود شيقوق،
بالخبرة،
(طبعا خبرتنا ما بتحصل قدر دة، لكن....)
بتعرف إذا الزول دة جلاك عن قصد،
ولا الموضوع طرطشة ساكت، أو عدم إهتمام،،

و فى كل الأحوال،
موقفى ما بعرفو إلا فى وقته،،،،



فهمت حاجة؟؟؟؟



_____________________________
* تحياتنا للدكتور،،،،،

خليك من الرد علي المداخله لكن اتخيل لما تتعب وتجتهد وتنزل ليك بوست وما في زول يرد عليهو بتحلف انك تاني ما ترد علي بوست اي زول

اساسينا الجميل جدا

دا ما إطراء بأي حال من الاحوال

القضية عندي لها وجهان وجه معرفة اسباب التجاهل كما عند البعض هنا تجاهل المشاركات
والوجه الاخر هو الموضوع أحيانا الموضوع يشدك ولو كتبه من لا تتفق معه فتكتب مشاركتك وتمضي
في سبيل حالك لكن في اوقات اخرى بكون في تواصل مطلوب في بعض الموضوعات فلا سبيل غير العودة
وانتظار الرد لكن اذا هرب صاحب البوست ورفض الرد بكتب واستمر في التوضيح حتى اوصل فكرتي


مودتي لك .


............................................................................حجر.

Quote: اها يا ابو الدقيق منو البخت كلامو ويمشي ؟؟ انت بتقعد في البوست اكتر من سيدو يا عمك انت بتجي البوست بي (حلتك) وبتختمها بـ (الشيشة) قول كلام غير دا يا لذيذ

والله ياعبد العزيز دكين

عجبنى ردك ل ود الصائم دا,,,قلت لى مقيل فى البوستات
لكن والله هو زول ضكران خلاص ..مو قاعد يقصر مع الجكس

انا اسى قايل نفسى براى البقيل فى البوستات
لكن ما دخلت على بوست الا لقيتو قدامى
والله الزول دا وصال ارحام
ودائما بكون قدام
ياسلام
يا ضائم ياتمام

أساسي

بعد موضوعك دهـ فعلاً عرفت ليه بيقولوا ليك أساسي زمان انا قايل دهـ إسم دلع (وش ضاحك)

المهم عدم الرد أو التعقيب على البوستات وما يترتب عنه من زعل او برود فى العلاقات نتيجة طبيعية لا يختلف عما يدور وجهاً لوجه فالمسألة رغم انها حارة وخاصة فى حال تعقيب صاحب البوست لكل المتداخلين ويستثني مداخلتك ولكن ما أراهـ غير مناسب هو أن تكرهـ شخصاً لم تقابله وجهاً لوجه.

Quote: الزول زاتو ابو البكور ياخي الله ما ساترني معاك من زمن شميتني من سنة الفين وتلاتة وشخت لي اربعة سنين بعدها وانا معاك من حفرة لي حفرة ههههههههههههههه دايما طالع مني زعلان . والله عمليتي دي ما يعملها ابراهيم نفخو قدس الله سره ياخي والله ما مطنشك ولا حاجة بس اخوك بقي يجليها ثابتة , الواحد كان كويس قاعد براهو لا هم عصف لا ريحا كسح اتشالق علي روحه براهو اسع بالله حدد موقفك الاخير والنهائي مني زعلان شوية ولا ما زعلان بالمناسبة ما قاعدين تجو بيت الله ؟

ياحبيبنا ياخي انا ماكلمتك قلت ليك كنت زعلان منك عشان ماباركت لي العرس ومالامك الا الزول البدورك

لكن يامعلم الموضوع ده نسيناهو خلاص وعرفنا انو انت كنت على حق وزول دائما تفكيرك لي قدام لانو انا ندمت انو عرسته زاتوووو لووووووووووول

بالنسبة لي بيت الله الحرام الحمد لله الحجات الاخيرة دي كلها كنت مشارك فيها وكم عمرة رمضان كده لكن تصدق جدة لي منها زمن والله

اول زيارة لي جدة ح يكون ليك فيها نصيب الاسد انت كمان نقدم ليك دعوة تجينا بي جاي ونحتفل بيك احتفال دكاكيني كبير ولا توجد صور للشمشاره

تحياتي الاكيده

زاتوووو

Quote: والله يا الشايقي ما عندي كلمة اضيفها ليك انت كتبت عن اوجاع حقيقية وامكن عن شريحة كبيرة انا شخصيا عندي راي في المداخلات احينان اجدها مهلكة جدا لكن في نفس الوقت لما زول يجليني بتاكل معاي فما عارف زاتو الحل شنو ؟

شكرا يا أخ أساسي على الرد,

طبعا شكرا على الرد دي نفسها عبارة من واقع البوست وبدلا من أن تتلقى الشكر على المشاركة وتكبد عناء ضرب كبـد الكي بورد واستنزال الأفكار وتخصيص الوقت الثمين من بين ملفات العمل واجتماعاته واخفاء التعابير على الوجه والتي يكتشفها الزوار والزملاء وغير ذلك من الحالات التي (تتلبـس) الكاتب في سودانيز أون لاين, تجد التجاهل المصطفى محمودي سمة العديد من أصحاب البوستات

حالتين تفقعان المرارة والأنسجة المجاورة أولها هي حالة الكاتب/ـة الذي يعتقد أنه من الشعبية بمكان بحيث انه لا يحتاج لرد أو مداخلة من هذا الذي (لا يحبه/ لا يستظرفه/ لا يحب أفكاره/ ............) , بالتالي فسيبك من الرد عليه, ولو استدعى الأمر أية تكتيكات مثل تكتيكات الاخ بشاشا (حان أوان كسحـة بشاشـا.... ) أو غيرها من الذرائع .. لان (خير الله كثير.. )

والحالة الثانية هي حالة صاحب/ـة البوست الذي يرد على كل خلق الله ويمتنع عن الرد عليك فيجعلك تتحسس ياقة أفكارك وتراجع حروفك في المرآة وتقول يا رب العباد ماذا أذنبت في حق هذا/ـه ؟؟؟

المهم يا أساسي الردود قسمة الله والأغنية القديمة تقول : (ما بنمشي لي ناس ما بيجونا في القلعة قعدوا يعذبونا .... )


أحمد الشايقي

Quote: ماهو رد فعلك في مثل الحالات اعلاه هل ستقرر انك لن تشارك في بوستات هذا الشخص السخيف , هل تجد العذر للبعض في ان الرد علي المداخلات مهلك واحيانا لايوجد يرد به عليك

يجول في خاطرى مقولة عيسى عليه السلام"لا تلق الدر للخنازير"

وحماك الله يا اساسى من انفلونزا الخنازير

وسلااااااااااااااااااام شديد ليك

موضوع فعلا مهم وواحدة من ازمات البورد المزمنة

Quote: ان يقوم صاحب البوست بالرد علي المداخلات بالترتيب وعند ما تكون مداخلتك المقبلة (يطنش البوست ويفتح لي حنانو )

أساسي

أزيك ووينك ؟


والله الحتة دي هبشتني ..بالجد ..في شخصية كدة محيراني كل ما أدخل على بوستاتا اول ما تصل الرد عندي تقبل


مني وشها ، وتنسى ليك موضوع البوست نهااااائي ..وهي ليست مرة واحدة ولا إثنتان بل ثلاث مرات قاتلة...



معقول صدفة ؟ إمكن !



................................



تحسسي الأكتر من أكون خربتا مزاجا ...وبوستاتا بتكون ماشة زي الورد ..الغريبة لا في بينا عرفة لا عداوة...





المهم يا انت أعفي لي على التطفل وتاني تووووووووبة .

تعرف بتحصل لي كتير انو اتداخل سيد البوست يخليه لي عديل تاني ما يهببو ، واكتر واحد حيرني في المسالة دي اخونا محمد حامد جمعة رغم الاحترام الذي احمله له لكن مما اخل على بوست كاتبه
يحرده لي
اما النوع البفطني ده ببقى لي فرقبته
بعمل كوبي وبيست لي كلامي وبلصقه ليه في حنانه
لمن يآمن

أساسي ازيك ....

عايز الصراحة والا نكضب عليك؟
بايخة .. ولا تقل عن إنو واحد يوجّه ليك كلام .. تعاين ليهو وما ترد.
لكن المسألة درجات .. يعني في مداخلات بيكون الرد عليها مجرد مجاملة، بمعنى إنها لا تحمل إضافة. لكن كمان في مداخلات تحتاج بالضرورة رد وتبادل رأي .. دي لو طنشتها بتكون يا زول بايخ يا متعالي.

كمان في طناش بيحرق الواحد لما يكون كلامك موجه لي زول بتحترم رأيه، أو بتشوف إنو زول كلامه مفيد .. يقوم يديك الطرشا دي بس تاكلا في حنانك.

هسه حترد .. والا نختّك Black List؟

يعني اسع دايرني اقوم ارد عليكم واحد واحد؟

برد ان شاء الله .... لكن براحتي فبالله ما تستعجلوني جايكم واحد واحد لكن براااااحة

براحة دي زي بتاعة نكتة الشافع اللقي فرصة في سجارة ابوهو الخضراء الصباح وشال منها نفس ومشي المدرسة وصل الساعة اطناشر لما فيهو المدير قال ليهو متاخر مالك قال ليهو كان ساكيني كلب وقال ليهو كلب ساكيك لحدي اطناشر قال ليهو كان ساكني براااااااااااحة .