Post: #1
Title: مع نانسي عجاج في هارلم- نيويورك ( اشجان مهاجرة)
Author: Manal Mohamed Ali
Date: 04-25-2009, 02:04 PM
Parent: #0
انا عاوزة اشاركم واحدة من حكاياتي في بلاد العم سام يا جماعة . وحا ابدا لكم بحكايتي مع غناء نانسي والجري والجرسة
مدخل اول ( زي مابقولوا ناس الشعر ومثقفاتية ايام الجامعة)
اها ...
ولأن الدم بحن صرت من سكان هذا الحي العريق.... واتجول في شوارعه بروح انتماء عاليه لهذه السحنات
الوجوه مثل تلك الوجوه في امدرمان ..والخرطوم وعطبرة
اها.. هنا توجد موضة السماعة في الأذن واي زول قافل اضانه بسماعة وعايش في عالمه.. قررت ان اعيش عالمي ايضاً
ونزلت ليك اغنيات في الموبايل بتاعي واشتريت السماعه الماخمج ... وللزوم الغربة والشجن والكلام الصعب داك قمت نزلت اغنية رفيقي للجميلة نانسي عجاج ومعاها بلدا هيلي انا وتميت الناقصة بالطير المهاجر لوردي.. واها من اليوم داك بقيت طرشا
في الغادي والرايحة غازا سماعتي وماجايبا للدنيا خبر... ومرات كتيرة اطلع السماعة عشان الجنبي يسمعوا الغنى السمح ده بدل دش دش حقتن دي (استعلاء ثقافي ومقدره على الهامش الامريكي).
اها الليلة قررت اعمل رياضة الجري (طبعا دي كلها محاولات عشان نخش السيستم الامريكي ياجماعة وننسى الغبار والكتاحة بتاعت عطبرة ونتأمرك شوية).
اها ركبت السماعة وشغلتا اغنية يارفيقي ... لكن مع الجري ليقت انها مابتظبت الا على ايقاع الله فوق زوزو ياحلاة زوزو
الله فوق وزوز ياحلاة زوزو.. وانا جارية ونانسي تغني معاي يارفيقي بلحن الله فوق زوزو ياحلاة زوزو ( دي الموصلي ما حايقدر عليها)
ضحكت على نفسي وعرفت انه دخول السيستم ده مشروع فاشل ...
مش لو جرينا في نيويورك وطلعنا ناطحات السحاب .وكتاحة عطبرة مباريانا مباريانا ..وجرينا الزمان داك وراء الجياشة في الداخلة ونشيل معاهم الله فوق زوزو ياحلاة زوزو دي ما حاتفكنا ليوم الدين.
اها بعد مسافة 20 متر النفس انقطع والحيل اتهد وقلبتا الاغنية لبلداً هيلي انا وهاك يا بكاء ومخاخيط في الشارع
وطبعاً الجماعة هنا حساسين لما يشوفو ا زول ببكي
Are you ok?
I am ok. Thank you
حتى عباسية (إمرأة بوليسية بمصطلح السودان) سالتني..
المهم قررت من اليوم داك ما اركب سماعة وما اسمع نانسي الا في البيت عشان فضايح القلب الرهيف
ويانانسي شكرا لهذه الروعة منتظرنك بشوق ولهفة يانانسي في امريكا ... وبكاء حار وشديييد
منال
ذات صباح من ايام الجرسه
هارلم شرق. نيويورك
ابريل 2009
|
Post: #2
Title: Re: مع نانسي عجاج في هارلم- نيويورك ( اشجان مهاجرة)
Author: الفاتح يسن
Date: 04-25-2009, 06:37 PM
Parent: #1
سلام منال بصراحة غلبنا نتصالح مع السستم وما أدراك ما السستم النجضونا بيهو ده ياكلو ماكونالد ناكل ويكه يشربو كولا نشرب عرديب عيالنا ركوبوا هاي وي السستم ونحنا في السيرفس رود ننضم برانا نعمل استوب والاشارة خدرا غايتو السستم في وادي ونحنا في وادي مع ده كلو برضو نحنا ok وتسلمي
|
Post: #3
Title: Re: مع نانسي عجاج في هارلم- نيويورك ( اشجان مهاجرة)
Author: MAHJOOP ALI
Date: 04-25-2009, 08:50 PM
Parent: #2
| Quote: هارلم شرق. نيويورك |
تلقي الجماعة بتاعن الاسبنش هارلم شابكنك لاتينو تقيل
هارلم غرب.نيويورك
|
Post: #4
Title: Re: مع نانسي عجاج في هارلم- نيويورك ( اشجان مهاجرة)
Author: Rawia
Date: 04-25-2009, 08:58 PM
Parent: #3
سلامات يامنال
جربي الـزومبا Zomba*
مابتبكي
______________
Zomba تمرينات رياضية راقصة
|
Post: #5
Title: Re: مع نانسي عجاج في هارلم- نيويورك ( اشجان مهاجرة)
Author: naeem ali
Date: 04-26-2009, 00:46 AM
Parent: #4
Quote:
ذات صباح من ايام الجرسه
هارلم شرق. نيويورك
ابريل 2009
|
اريتو صباحنا...
بعد (ده الحر)..
________________
بختكم والله بنانسي..
و(تمثال الحريه)..
|
Post: #6
Title: Re: مع نانسي عجاج في هارلم- نيويورك ( اشجان مهاجرة)
Author: سيف الدولة كامل
Date: 04-26-2009, 01:00 AM
Parent: #5
منال,,,,,, كيفنك وان شاء الله ما تشوفي شر
والله هارلم حلوه بتذكر الزول بالبلد لكن
عسه اتملت اسبنش ,, ان شاء الله يا منال
ما تكوني نسيتي عزومتك لبورداب نيويورك
ان شاء الله نعمل ليهم دعوة من خلال المنبر
تسلمي علي السرد الجميل, المرة الجاية
لامن تجري غني ,,نانا يا نانا,, سريعة
مودتي
|
Post: #7
Title: Re: مع نانسي عجاج في هارلم- نيويورك ( اشجان مهاجرة)
Author: Hawari Nimir
Date: 04-26-2009, 01:43 AM
Parent: #6
| Quote: اها الليلة قررت اعمل رياضة الجري (طبعا دي كلها محاولات عشان نخش السيستم الامريكي ياجماعة وننسى الغبار والكتاحة بتاعت عطبرة ونتأمرك شوية). |
منال ازيك ......
و شكرا علي الشجن..الجميل و اليم..
ولكن ما عندك حق
جري..ومع نانسي..
ما بتلمو..
انت عارفة انا في شغلي ..بخلص الصباح..7:00
واها قبل ما امشي البيت..
بطلع بره الشغل في الباركنق..
واطلع اللابتوب
واشغل نانسي (شقي ومجنون)...
واديها ديــــــــــــــــــك يا الرقصة و جبجة صاح...
وافتو تمام...ووبعداك البيت
ونومة بي مزاج..
ههههههههه
يا سلام علي نبوبورك..
كانت لنا ايام جميلة فيها..(بروكلين).. وكان الشغل في(منهاتن)
لك كل الامنيات الطيبة
هواري
هيوستن\تكساس
|
Post: #8
Title: Re: مع نانسي عجاج في هارلم- نيويورك ( اشجان مهاجرة)
Author: Manal Mohamed Ali
Date: 04-26-2009, 05:02 AM
Parent: #7
الفاتح. اخوي. انا قبل ما أجي البلد دي كان فضلت لي صامولة واحدة .. قضى عليها المدعو السستم هذا.. المشكلة حجار هنا مافي عشان نطقع بيها
العزيز محجوب ..والله انت الصادق الاسبانيش قايلني منهم ( عشان عرق الحلب الوارثاهو من حبوبتي ديييك ) وشابكني اسبانش صعب خلاص ..اليحلني منهم ماعرفته.
راوية الجميلة.. طبعاً اختك بتحب الرقص جداً عشان كده حا اجرب الرقصة القلتيها دي لكن برضو الجري في الشوارع ده عاجبني شديد بعد حبسة السودان ديل وخمخيمه ومشروعه الحضاري.. .
النعيم اخوي انت بس ما عارف حاجه .. عشان كده بتقول عدس
والله ياخي انا مشتاقه لي حركم ده شدييييد
الاستاذ سيف.. افتح البوست وزي ماقلت ليك الزلابية وسرامس الشاي علي والناس تتقابل في السنتر بارك ... قشة ما تعتر لك..قوم انت بالدعوة بس
ياهواري ... انت زولي تب ..
لكم الود
منال
|
Post: #9
Title: Re: مع نانسي عجاج في هارلم- نيويورك ( اشجان مهاجرة)
Author: طارق ميرغني
Date: 04-26-2009, 05:40 AM
Parent: #8
بالفعل اختنا منال نانسي عجاج فنانه واستمعت اليها مؤخرا في اغنيه غناها المرحوم الكحلاوي
كانت في قمة الروعه ربنا يوفقها.
انتي صورة الفاتح يسن الشرط دي من وين ؟
البوم جديد ولا new look
|
Post: #10
Title: Re: مع نانسي عجاج في هارلم- نيويورك ( اشجان مهاجرة)
Author: maia
Date: 04-26-2009, 06:51 AM
Parent: #9
الاخت منال
صباحك او مسائك صافي بلون سما عطبرة بدون كتاحة
شكرا ليك على هذا البوست الانعش صباحي في الخرطوم اللي تقريبا وصلت الحدود الغربية لكوكب الشمس
يا زولة ادخلي في السستم انشالله بالاوصفوك ولا يهمك وكل ما تحسي ببكية اتذكري الحراية ديك وكتاحة عطبرة وبربر ديلاك البتخلي الخياشيم تلتصق بالبطين الايمن
بشكرك كتير بالجد بوست لذيذ وجميل
دمتي بخير
|
Post: #11
Title: Re: مع نانسي عجاج في هارلم- نيويورك ( اشجان مهاجرة)
Author: Abdel Aati
Date: 04-26-2009, 12:30 PM
Parent: #10
هارلم .. عطبرة .. نانسي عجاج
من هذا الثلاثي المقدس لن يخرج الا مثل هذا البوح .
تحاياي يامنال .
|
Post: #12
Title: Re: مع نانسي عجاج في هارلم- نيويورك ( اشجان مهاجرة)
Author: Abdel Aati
Date: 04-27-2009, 10:44 AM
Parent: #11
|
Post: #13
Title: Re: مع نانسي عجاج في هارلم- نيويورك ( اشجان مهاجرة)
Author: بابكر عثمان مكي
Date: 04-27-2009, 02:32 PM
Parent: #12
اها يامنال
أ نا قلت لازم اكتب مباشرة تحت الجمال الهادي ده ..
غابريل غارسيا .. حلم ذات حنين بموطنه الاصلي بذاكرة طفولية
مليئة بالتفاؤل الفتيات الجميلات والهواء النقى ورائحة الورود والنعناع والشواطيء المشمسة
ولكنه عندما شد الرحال ووصل هناك
وجد اطنان من البعوض ورائحة السمك المتعفن .. ونساء وصبية تعساء
احسن تظبطي الايقاع بعيدا عن هكذا وطن
فقد اصبح خاوي .. انفض السامر يامنال..
زيكو
|
|