الجنريتر يا أزهري

Quote: دايرين جنريتر للبيت يشغل مكيف صحرواي ومروحتين ولمبة وتلاجة كبيرة وبس . كم سعره ويكون ماركة كويسة يعني ماصيني والأحسن شنو ديزل ولا بنزين وبستهلك كم جالون تقريباً في اليوم ولو كان الجنريتر البشغل الحاجات دي كلها غالي نقوم نشيل المكيف برة نخليهم على المرواح مافي مشكلة لأنه الفلس حاصل

من باب المشاركة بالقليل الذي نعرف

تنبيه كاتب هذا البوست من غير المتخصصين في الكهرباء, لذا يرجى الإستعانة بذوي الإختصاص لتأكيد أو نفي أي معلومة واردة في هذا البوست


قرار أمتلاك مولد (إحتياطي) كهربائي يجب أن يبنى على عدة عوامل اهمها

1 القدرة التي ترغب في توليدها من خلال المولد

* قم بتحديد الأجهزة الكهربائية التي تريد تشغيلها بواسطة المولد

أغلب الأجهزة المنزلية تعمل بموتورات مختلفة من حيث الحجم والقدرة والإستهلاك , يجب أن تكون قادرا على
تحديد قدرة تلك الموتورات (وات, كيلووات kW, Watt ),
لاحظ أن الموتورات الكهربية لديها معدل بدء إدارة starting rate ومعدل تشغيل running rate ويكون الأول هو الأعلى و يتم الحساب عليه في العادة

* أجمع قدرات الأجهزة مع ملاحظة عدد الأجهزة (مثلا 5 لمبات 1000 W = 5000W)

* في السودان نستخدم بكثرة مصطلح (شمعة) بدلا عن وات
1 شمعة = 1 وات

* أجمالي القدرة التي تحصلت عليها بالجمع هي القدرة المطلوب توليدها بواسطة المولد الإحتياطي

* أضف 10% هامش امان, ولاتنسى ان تراعي الفرق بين الوحدات ( كيلو وات, وات , حصان, كيلو فولت أمبير) عند التجميع والتحويل

* تعمل المولدات بكفاءة أفضل عند تشغيلها على 80% من الحمولة الأسمية, خطأ شائع ان يتم تشغيل المولد بحمولة خفيفة (عشان يشتغل مرتاح), هذا قد يسبب تلف المولد على المدي المتوسط

!

2 نوع المحرك

* المولد عبارة عن جزئين أساسيين المحرك engine و المولد alternator
المحركات تنقسم من حيث نوع الوقود ل: الديزل, البنزين أو غاز البيوتان (بيوتاجاز)
كما ان بعضها يعمل على التبريد الهوائي (أغلب المحركات الصغيرة) أو التبريد بدورة مائية (المحركات الكبيرة والمتوسطة)

محركات الديزل أفضل من تلك التي تعمل على البنزين للأتي:
* وقود الديزل أرخص من البنزين
* محركات الديزل أطول عمرا على المتوسط
* وقود الديزل أكثر امانا من البنزين عند المناولة والتخزين
عيبها انها أغلى من محركات البنزين عند الشراء

!

3 الأسعار والعامل الأقتصادي

بعد جولة قصيرة في شارع الحرية والمنطقة الصناعية الخرطوم

مولد صيني 20kVA بمحرك ديزل ماركة Jian Dong 6500 جنيه سوداني
مولد صيني 5 kVA بمحرك ديزل ماركة Jian Dong 3000 جنيه سوداني
مولد 5kVAبمحرك ديزل ماركة Robins 2000 جنيه سوداني
محركات البنزين أرخص بمعدل 1000 جنيه سوداني عن مثيلاتها العاملة على الديزل

حتى الأن لم أجد من يدلني على مولدات تعمل بمحركات Honda , Suzuki

!

Quote: مولد صيني 20kVA بمحرك ديزل ماركة Jian Dong 6500 جنيه سوداني مولد صيني 5 kVA بمحرك ديزل ماركة Jian Dong 3000 جنيه سوداني مولد 5kVAبمحرك ديزل ماركة Robins 2000 جنيه سوداني محركات البنزين أرخص بمعدل 1000 جنيه سوداني عن مثيلاتها العاملة على الديزل

يا صلاح
برضو الجنريترات رخصن زي البلطي..؟

محرك Jiang Dong الصيني




مولد صغير 5-3 kVA




راجع لوحة المعلومات الخاصة بإجهزتك الكهربية حتى تتمكن من تقدير القدرة الكلية المطلوبة

!

Quote: برضو الجنريترات رخصن زي البلطي

أريت أي شيئ في البلد دي زي البلطي

للأسف أسعار المولدات إرتفعت لعدة أسباب

1 زيادة الجمارك على الواردات وضعف حركة الوارد
2 عدم إستقرار الإمداد الكهربائي و إرتفاع درجات الحرارة


فوق عشان الأزهري يشوف

!

طريقة أخرى لتحديد القدرة المطلوبة عندما لا تستطيع معرفة حمولة الاجهزة

قم فقط بتشغيل الأجهزة الكهربائية التي تريد تقييم حمولتها

أدخل الكود الأتي في شاشة عداد الدفع المقدم المزود من قبل NEC (الهيئة القومية للكهرباء)
الكود: #1#
ستظهر قراءة بالكيلووات و هي عبارة عن معدل التشغيل الكلي للأجهزة التي تعمل لحظة قيامك بالعملية

أضف 15- 20 % هامش امان (معدل التشغيل أقل من معدل بدء الإدارة)

ما ستحصل عليه هو القدرة المطلوبة للمولد

!

غايتو يا صلاح الدين لو مساعيك لأخونا الأزهري دي فيها أي ثواب،
من المؤكد لأخونا محمد فرح نصيب فيهو.
حتى لو كان لا يعبئ موبايلك.



________
شايف تقريرك عن الإمدادالكهربائي كلو من برّي ...
إنت وين في بري يا اللخو؟

Quote: من المؤكد لأخونا محمد فرح نصيب فيهو

ما بنابا السمح لي زول وعسى الله يحط عنه بها سيئة ويزيد له بها حسنة

Quote: إنت وين في بري يا اللخو؟

شارع محمودشريف

بس ما تكلم زول لأني عامل فيها من بورداب ناغورنوكارابخ

!

طيب ياخ ما نعزمك هنا:
بـُــري

ابو الصلح..
اكبر مشكله في المكنات الصينيه , انها (صينيه)..
وديدنها (ديدن السواد والرماد)
واخونا الازهري ده قال عندهم مولود جديد
ركز علي الهوندا يا عمك..

.
.

الأخ الكريم صلاح الدين

ياخي الكلمات تعجز عن شكرك على إهتمامك ووقتك ، لكن ماغريبة ياهو (ديدن) أهلنا السودانيين .

أمبارح مادخلت النت إلا دقائق في البوست بتاع محمد فرح قلت أشوف ردك ن وماشفت البوست ده إلا هسع الصباح.

عشان كده بعتذر منك جداً على تأخر مداخلتي .

تصدق قعدت شوية كده أشوف كلامك عن الموديلات والأسعار وماعرفت الأرقام دي أرقام الموديلات ولا الأسعار بي العملة الجديدة:)

ياصلاح كان الجرنيتر بي ستة مليون ونص ياهو مولودنا الإتفسخ بالحر مابقدر أشتريه والله :)

والله حاجة مؤسفة مولد صيني ويكون بالاسعار دي ! لكن زي ما إنت قلت أكيد الجمارك وإستغلال ظروف قطع الكهرباء والسخانة بتكون أدت لرفع سعره بالشكل ده .

أنا كنت متفائل جداً إنه المولدات في حدود سعر اتنين مليون قلت ادخل لي جميعة مع زميل زميلين وأخد اول واحد وأرسل ليهم القروش .

يامحمد فرح ياخي شوف لينا حل ينولكم ثواب في الطفل الما ليه يومين في الدنيا وإتملا حمو نيل والسخانة فسخت جلده. على الاقل شوف لينا ناس المؤتمر الوطني واسطة يبيعوا لينا واحد جنريتر هوندا او سووكي بالتقسيط لأنه أنا مركز على الألآت اليابانية عشان الصينية ماكويسة و(ديدنها) الخراب بسرعة .

عزيزي صلاح الدين

عارف تعتبك معاي لكن مساعدة أخيرة :

جنرتير يشغل بس مكيف صحرواي كبير ومروحتين وتلاجة ولمبتين وبس يكون قوته قدر شنو ؟ 5 ولا 10 .

ومرة تانية ياخي الف شكر ليك وربنا يملأك عافية وربنا يملأ صلعتك شعر مسبسب خالي من الشيب كامل السواد كأنه شرب ينابيع السحر (حقت أغنية حمد الريح أحبابنا أهل الهوى)

خالص المودة والتقدير
.
.

Quote: جنرتير يشغل بس مكيف صحرواي كبير ومروحتين وتلاجة ولمبتين وبس يكون قوته قدر شنو ؟ 5 ولا 10 .

يا الازهري اخوي...انت قول ليه فتّش لينا جنريتر
في حدود اتنين مليون جنيه...واكيد حا يلقاه...
اسعلني انا من السودان وتجار السودان...
الواحد يقول ليك الحاجة دي بي عشرة...ان قلت ليه لا غالية
يا دوب ما اتفسح فيك...وكان جاملك بنقصك نص في المية
وبكلم رفاقتو ...عشان كلهم يقولو ليك بي عشرة...
بس تقول ليه ياخ انا ببيع ليك حاجتك دي زاتا بي تلاتة..
حا يقول ليك لا والله انا طالعة معاي بي اقل من كدة...
وشوية شويتين حا يديك ليها بي خمسة والله ستة...وحا يقول
ليك نحن بندفع ضرائب وزرائب..وزرائر...ويهرج زيييين
ما تشتغل بيه شبل حاجتك وامش...(ما شفتهم عملو في عماد عبدالله شنو؟
غنوا ليه وطن السدود نديك.....وظووووووط...لانو بس قال غالية

وتجربتي مع تجار الاسبيرات بهذه المكنة اثمرت ماكنات
عارضنها بي مليونين...وانا عااادي اجي اشيلا بي مليون
واحد...باعتباري عمك المنقطة وكدة...(انت قايل في زول
فاهم حاجة؟ ما كلهم فاهمين طريقة الثراء السريع وبس)

Quote: جنرتير يشغل بس مكيف صحرواي كبير ومروحتين وتلاجة ولمبتين وبس يكون قوته قدر شنو ؟ 5 ولا10

الأخ الأزهري

كفاية عليك مولد kVA5 ووسعره المتوسط 3000 جنية جديد (يعني 3 مليون) max للديزل, البنزين أرخص ب مليون جنيه
لكن زي ماقلت ليك ح تدفع اكتر للوقود

دي المولدات الصينية
أنا للأسف لسه ما اتيحت لي فرصة أسأل من Honda بس أكيد ح تكون أغلى

نعيم

قانون جريشام بيقول: العملة الرديئة تطرد العملة الجيدة من السوق

الصيني أبو الرخا وقدر ظروفك وماشي في السوق وإسبيرو راااقد

الأصلي تفتش ليه ما تلقاه, البائع يقول ليك: ماماشي ف السوق
ياخ انا اليوم داك إشتريت لي clamp meter إشتغل لي 3 مرات و قرا لي غلط وباظ
وانا حسع مستعملو تقالة ورق


الأزهري
أمرق التلاتة مليون يا أخوي

!

الأخ الكريم Salahaldeen Nadir


ياخي معليش ح اسألك عن المولدات اللافة في السوق - يعني الصينية -

قبل يومين واحد بعرفو قال لي انو المولد الصيني 2 كيلو سعرو 650 الف جنيه ، يعني 650 جنيه بالجديد ،

سؤالي 2 كيلو دي يعني بتشغل شنو كدا ؟ يعني مكيف موية وتلاجة وتلفزيون زي ما الزول قال والا دا كلام ساكت .



شكري مقدما .

Quote: 2 كيلو دي يعني بتشغل شنو كدا

قصدو 2 كيلووات


دي قائمة ببعض الأجهزة المنزلية و قدراتها الكهربائية

الأرقام تمييزها وات watt ولتحويلها ل كيلووات أقسم الرقم على 1000

Air Conditioner مكيف فريون (شباك)1350
مروحة سقف 75
جهاز كمبيوتر 360
swamp cooler مكيف موية (متنقل) 100
مكيف موية 3000-4000
Freezerديب فريزر 440
خلاط 110
1500Heater
مكواة كهرباء 1100
إضاءة 100
مايكرويف 1450
110Radio-Stereo
ثلاجة 265- 500
تلفزيون250
غسالة600
سخان3200


الأجهزة (الباعثة للحرارة) تستهلك كهرباء عالية مثلا
السيشوار hair dryer برغم صغر حجمة إلا انه يستهلك 1250 وات (1.25 كيلووات)

هذه الأرقام لجهاز واحد طبعا
مثال اخونا الأزهري:

مكيف موية متوسط 3000 واط
مروحتين 2*75= 150
ثلاجة كبيرة 500
أربعة لمبات 4*100= 400

المجموع 4050 واط (4.05 كيلووات)

لاتنسى إضافة 10% كهامش امان

يبقى الجنريتر المطلوب 5 كيلووات
لما تقسم كيلووات على 0.83 بتحصل على كيلوفولت امبير أو kVA
5/0.83 = 6.02kVA

يعني الأزهري يمشي يقول عايز جنريتر 5 كيلووات أو 6kVA



!

جيتك تاني يا صلاح

قلت

Quote: swamp cooler مكيف موية (متنقل) 100

وتاني قلت

Quote: مكيف موية 3000-4000

فهل في غلط في الرقم الاول ؟ يعني صاح 100 بس والا قصدك 1000؟

جننتك شوية لأنو المعلومات دي مهمة بالنسبة لينا في الحر الفاسخنا ده !

الأخ الوليد




ده هو مكيف الموية المتنقل swamp وهو في المتوسط بيجي بقدرة 100 واط خاصة الموديلات الصغيرة التي تعمل على موتور كهربي صغير واحد


اما مكيفات الموية العادية (شباك) فهي ما بين 3 كيلوواط ل 4 كيلوواط

!

إنت كدا يا صلاح في الطريق الصاح ..!!

وأن تأتي متأخرا خير من ألا تأتي أبدا ..


تمنياتي لك بمئة كيلو من الزبائن العجالي ..!!

Quote: تمنياتي لك بمئة كيلو من الزبائن العجالي ..!!

مش في أثرياء حرب؟ وأثرياء سد؟

انا حقو أعمل فيها ثري قطوعات

!

شكري الجزيل يا صلاح .

.
.

الأخ الزميل الكريم صلاح الدين

خالص شكري وتقديري ومودتي وأمتناني على هذا الإهتمام الأخوي النبيل ، والكلمات لن توفيك حقك من الشكر.

والمساعي جارية لتوفير المبلغ (الفلس كميات) لكن الله كريم .

(3) مليون يعني زي (4800) ريال .

.
.

الحبيب د. الوليد الله يعينكم على السخانة والكهرباء والحكومة الرشيدة :)


خالص التحية.
.