Post: #1
Title: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 02:39 AM
Parent: #0
>font size=4>
العام,1988... سيول, فيضانات, أمطار, بعوض, ذباب, غلاء, مجآعة,
إنعدام مواصلات, صعوبة في السفر, حرب في الجنوب, فصل تآم للأقاليم
عن العاصمة, إنعدام الكهرباء, أحزاب, خراب. خراب, أحزاب... وهلم
جـرا...
|
Post: #2
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 02:44 AM
Parent: #1
>font size=4>
وأحد من نوع المستهبلين الممكن يقنعوا الثعلب يطلع من جحرو, وبسهولة
كمان, إستطاع في هذه الظروف السيئة أن يسافر من الخرطوم إلي جهات مناطق
النيل الأبيض.
متسكع في السوق. الناس عرفواإنه جاي من الخرتوم. في تلك الفترة الناس
كانت تصلهم أخبار الخرطوم بالتواتر, لكن أخونا ده جاهم عديل من الخرتوم.
الجماعة متلمين حوالينو, وبيسألوا عن الحاصل في الخرتوم.
قال ليهم: الحالة صعبة شديد. والأحزاب واقفة لمبة, ومتناقرين
مناقرة شديدة, وعلي وشك أن يحصل ضرب بيناتهم, والسبب الوحيد المانعهم
يتكاسروا الخرتوم فيها أزمة عصي, العكاز بالشئ الفلاني ومعدوم زاتو.
واحد من الجماعة المستمعين بحلق عويناتو, وشررف إضيناتو. لقط
الخبر وبراااحة إنسرق من وسط الجماعة, ودخل الغابة. وقع في الأشجار
قطع. السنط ماخلآ فيهو حاجة, اللعوت كملوا كلو, السيال عدمو نفاخة
النار, السلم, القنا...الخ. ما ترك شجرة واحدة واقفة عشان يطقو فيها
صمغة. 8 لواري ملاها عكاكيز ودور علي الخرطوم.
|
Post: #3
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 02:52 AM
Parent: #2
وصل جنب الجامع الجامع الكبير. ردم عصيهو فوق الشارع وقعد.
المكان مزدحم بالناس, والباعة. واحد فارش سبح, واحد فارش مساويك,
واحد فارش ظهرة, سم فار, عروق, أحجار غير كريمة, كتب من زمن جدي حي,
ودآعية, حجبات, موية بآردة...وهلم جرا.
الراجل فارش العكاكيز, وقاعدمتمحن بعد أن إكتشف إنو الوضع مستتب,
ومافي أحزاب متكاتله, وعرف أنو الحكاية مقلب إبن ستين فتلة...
في هذه الأثناء, وأخونا في حيرته ومحنته. المستهبل إبن اللزينة
قدر بقدرة قادر يسافر ويصل لمنطقة الدندر. الناس متعطشين لأخبار
العاصمة. بمجرد أن عرفوا إنه جاي من الخرتوم إتلموا, وهاك يا أسئلة.
الزول طمنهم تب.
قال: الخرتوم حالها زين تب, هدؤ, وعمار. الحالة السياسية مستقرة,
والتجارة منتعشة. المواصلات راقده, الكهربا ما بتقطع. الناس حالهم زين,
ومبسوطين. بس في حآجة وآحة مغرودين فيها بالحيل. لكن معدومة عدمة
لبن الطير.
الجماعة بنفس وآحد: الحاجة دي شنو???
المستهبل: ريش النعآم. معدوم والناس مغرودين فيهو بالحيل, وممكن
يشتروهو باي تمن.
وآحد أخو بنات, الخبر قبل الناس تستوعبو, إتسلل من بين الصفوف
ودخل حظيرة الدندر. وقع في النعام ظعييط ومعييط شديد. ما خلا نعامة
وآحدة حايمة بريشها.8 لواري شحنها ريش نعام وقبل علي الخرطوم.
الجماعة لمان إستوعبوا الخبر, ودخلو حظيرة الدندر, لقوا النعآم
زي البخس المعلقة في المشلعيب, كلو ميطي جل.
صاحبنا عيييك شحن وكسح...
|
Post: #4
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 02:57 AM
Parent: #3
باحة الجامع الكبير...الواطة سخانة, الغبار قايم, وأبوالفرار
حايم,وصاحبنا بتاع العكاكيز قاعد فوق قطعة كرتونة, ومضاري رويسو
بقطعة كرتونة من الهجيرة. مافي زول بالغلت عشمو والا قال ليهو إنت
بتسوي في شنو?. عندو عقاب قريشات مرقن من جيبو, وكورك: يا ولد يا
بتاع الموية تعال. الموية بكم?...
بتاع الموية: بطراة يا عمنا...
قرطعلوا ورجع الفاضي...
بتاع الموية: يا عمنا شايفك ليك زمن متمحن وكده,الحاصل شنو?
بتاع العصي: والله يا ولدي العصي ديل بارن علي...
بتاع الموية: يا عمنا عصيك ديل مافي حل غير توديهن لعبد الله بزقة...
صاحب العكاكيز:ى عبد الله بزقة ده منو كمان?
بتاع الموية: عبدالله بزقة ده واحد في أمدرمان, في سوق الجلود. قطع شك
بيخارجك منها...
بتاع العكاكيز: الله يفتح عليك دنيا وآخرة يا ولدي...
صاحبنا شحن لواريهو ودور علي سوق الجلود. قبل ما يدخل الكبري, بتاع
ريش النعام وصل. محل العكاكيز ملاهو ريش نعام وقعد. الناس إتبهطوا
عديل كده. ريش نعام???!!!
أحد المارة قال لصاحبو: الناس دي جنت ولا شنو? يوم عكاكيز, يوم ريش
نعام!!! حيرونا زاااتو!!!
الراجل حاول يخفي نفسو بعد إكتشف المقلب. لكن هل يخفي القمر في سماهو?
نظرات الناس كانت تحيطه من جميع الإتجاهات, ولسان حالهم يقول: يأخي معقولة بس?! بالغته عديييل كده...
وأحدة حنكوشة ما قدرت تستحمل الموقف, مشت عليهو وبإنفعال قالت ليهو:
لكن يا عمو ما بالغت عديييل كده! ريش نعام? يعني نحن حا نقدر نواجه
ناس العالم الأول كيف مع عمايلكم دي?! ياااااااي. قرف...
صاحبنا, لعن اليوم الطلعوا من بطن أمو زاتو مش من الدندر...
|
Post: #5
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 03:00 AM
Parent: #4
بتاع العكاكيز لافي في سوق الجلود إلي أن وجد عبدالله بزقة.
مجموعة من الناس في دكان قديم. عنقريب على الكراب, كم بنبر, كمية
جركانات فاضية, وشوالات . الجماعة طاقين الحنك, والجبنة والصعوط مدورات.
صاحب العكاكيز: السلام عليكم.
الجماعة: وعليكم السلام.
صاحب العكاكيز: يا جماعة داير عبد الله بزقة.
واحد من الجماعة: أيوه, أنا عبد الله بزقة. في شنو?.
صاحب العكاكيز: ياخي والله مغرود فيك. عندي عكاكيز بايرة, وقالوا لي
إنت الوحيد البتقدر تصرفها.
بزقة: بنجيهك تب, بس نحن مابنشتري. بنقايط.
صاحب العكاكيز: ياخي المهم تخارجني منها بأي وسيلة.
بزقة: يا ولآد. (يصيح)...
مجموعة من الشباب حضروا, وبسرعة.
بزقة: فضوا شحنة عمكم دا, وأرفعوا ليه البضاعة من المخزن.
الشباب نزلوا العكاكيز, وشحنوا للراجل اللواري مسلات.
(المسلة أكبر من الإبرة كانت تستعمل لخياطة , والخيش, والبالات.)
صاحبنا دور على الجامع الكبير. الشحنة نزلها جنب بتاع ريش النعام.
الناس مبحلقين فيهم, والجماعة كان لاقيين مرادهم, الوآطة تنشقه,
وتبلعهم...
|
Post: #6
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 03:03 AM
Parent: #5
بحكم الجيرة, دخلوا مع بعض في ونسة.
بتاع المسلات: ياخوي شايف ريش نعامك ده مآ مآشي في السوق!
بتاع الريش: باير الهينة دى, والله ما عارف أودي وشى من الناس وين!,
يا أخي مبحلقين فينا اليوم كلوا?. الله يقطعها دي عيشة دي.
بتاع المسلات: يا أخوي والله ريشك ده, ما يخارجك منو غير عبد الله بزقة.
بتاع الريش: ياأخي عبد الله بزقة, عبد الله مرقة, المهم إتخارج.
بتاع المسلات أعطاه وصف دقيق لدكان بزقة. صاحبنا ما صدق, دفس ريش
النعام في اللوآري وكسح .
بزقة وجماعتو قاعدين نفس القعدة. ونسة, جبنة, بزيغ, تفاف, صعوط...
بتاعاالريش: السلام عليكم.
الجماعة: وعليكم السلام.
بتاع الريش: يا جماعة وينو عبد الله بزقة?.
بزقة: حبابك.. بتدور شنو?.
بتاع الريش: والله عندي ريش النعام ده. وموصيني ليك قالوا بتاخدوا.
بزقة: يا أخوي نحن ما بنشتري بنقايط.
بتاع الريش: يازول ما في مشكلة, بس خارجني من ريش الزفت ده.
بزقة: يا ولاد... الأولاد بسرعة حضروا...
بزقة: جيهوا عمكم ده. نزلوا بضاعتو دي, وارفعوا ليهو البضاعة.
الأولاد نزلوا ريش النعام, ورفعوا للراجل العصي بتاعت أخونا. الراجل
ما صدق إتخارج من ريش النعام ...
|
Post: #7
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 03:06 AM
ردم العصي جنب المسلات, والونسة دورت...
بتاع المسلات: ياخوي أناالعصي دي مابتغباني, شايفها قبل كده.
بتاع العصي: قايطني بيها عبدالله بزقة, والله عبدالله خازوق بتاعك ده.
بتاع المسلات: ما قلت ليك, بزقة بيجيهك.
بتاع العصي, بزهج شديد جدا: ياخي بزقة زفت بتاعك ده, تديهو
السـجمـ يديكـ الرمآد...
|
Post: #8
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 12:57 PM
Parent: #7
تحـ...تـ...
|
Post: #9
Title: Re: بعيدا عن زقاقات السياسة... حكاية عبدالله بزقة...
Author: Seif Elyazal Burae
Date: 04-25-2009, 04:24 PM
Parent: #8
i am laughing until cry wd almudeer
seif
|
Post: #10
Title: Re: بعيدا عن زقاقات السياسة... حكاية عبدالله بزقة...
Author: سيف الدولة كامل
Date: 04-25-2009, 06:12 PM
Parent: #9
يا ود المدير ,,,, انا عندي جركانات
باقي ليك بتبور
و لا امشي لعبدالله بزقه
تسلم يا شاعرنا الظريف
|
Post: #11
Title: Re: بعيدا عن زقاقات السياسة... حكاية عبدالله بزقة...
Author: Seif Elyazal Burae
Date: 04-25-2009, 06:44 PM
Parent: #10
ود المدير
تسجيل حضور دائم وإعجاب
شئ من عمق واقعنا
السوق والاشاعات
شئ متكرر كل يوم
واصل يا رائع
سيف
|
Post: #12
Title: Re: بعيدا عن زقاقات السياسة... حكاية عبدالله بزقة...
Author: Seif Elyazal Burae
Date: 04-25-2009, 09:58 PM
Parent: #11
فوق ..فوق ..فوق
عاليا للقراءة ةالاستمتاع
وفي انتظار الفييد باك
|
Post: #13
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-25-2009, 11:52 PM
Parent: #12
نديدي الافندي...
بـزقة بيخارجك من الجركانات, لكن بيقايط...
بما إنك زول مدرس, مطلوب منك في وطن الجدود
إحصاء الأتي:
1) كم عدد أمثال المستهبل ود الهرمة?.
2) في كم غشيم أتلفوا ثرواتنا بسبب الإشاعات, وغياب الرقابة.
3) في كم من العايشين علي هامش الحياة?. باحة الجامع الكبير خير مثال.
4) في كم متبطل, وفارغ أمثال بـزقة وجماعتو?
5) في كم واحد مضروب فيهم خازوق في البلد?
قول لي يا ود كامل...
|
Post: #14
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-26-2009, 00:33 AM
Parent: #13
أخوي ود البرعي...
بعيدا عن زقاقات السياسة...
هي محاولة لقراءة الواقع بطريقة خفيفة, وساخرة عسي
أن نجد الحلول.
كل الذي أوردته في هذه الحكاية وحكاية القرنتية من
صميم وأقعنا. مثلا إذ رجعنا لحكاية القرنتية نجد الآتى:
الناس فقراء ولكن يكرمون الضيف.
القرنتية مثال للمعانة.
سماع الأغاني رغم رداءة المذياع, تنبئ بان هذا الشعب ذواق رغم شظف العيش.
إرسال البرقية طلب للخلاص.
العسكر يحضرون عجاف ويخرجوا سمان. بعد أن يزيدوا الطين بلة.
بـزقة من صميم الواقع. عايزين نقول إننا عندنا مشاكل بعيد
عن مهاترات الساسة.
دائما أرفع هذه البوستات بعبارة (تحـ...ت...) لأنني أعرف أن
لاحياة لمن تنادي...
تسلم يا ود البرعي...
|
Post: #15
Title: Re: بعيدا عن زقاقات السياسة... حكاية عبدالله بزقة...
Author: سيف الدولة كامل
Date: 04-26-2009, 00:41 AM
Parent: #13
شاعرنا الظريف
والله الاشكال الذكرتها دي كتييييييييييرة
وشركوا لينا كتير منهم النجح ومنهم الفشل
لكن اخدنا مناعة ضدهم, وبالمناسبة بقي
فيهم ابوك,اخوك , ود عمك , صديقك والغريب
النفوس اتغيرت وربنا يصلح الحال وادينا روقة البال
|
Post: #16
Title: Re: بعيدا عن زقاقات السياسة... حكاية عبدالله بزقة...
Author: Seif Elyazal Burae
Date: 04-26-2009, 07:59 PM
Parent: #15
up
|
Post: #17
Title: Re: بعيدا عن زقاقات السياسة... حكاية عبدالله بزقة...
Author: Seif Elyazal Burae
Date: 04-27-2009, 11:32 AM
Parent: #16
up
|
Post: #18
Title: Re: بعيدا عن زقاقات السياسة... حكاية عبدالله بزقة...
Author: Seif Elyazal Burae
Date: 04-27-2009, 09:49 PM
Parent: #17
Where are you dear Mawia
i tried to call you, but i couldn't. i hope to hear from you again
saif
|
Post: #19
Title: Re: بعيدا عن زقاقات السياسة... حكاية عبدالله بزقة...
Author: Seif Elyazal Burae
Date: 04-28-2009, 03:16 PM
Parent: #18
i got ur message, i will call you soon
seif
|
Post: #20
Title: Re: بعيدا عن زقاقات السياسة... حكاية عبدالله بزقة...
Author: Seif Elyazal Burae
Date: 04-29-2009, 02:34 AM
Parent: #19
يا ود المدير
أعانك الله علي دحر الفايروس الضارب جهازك الايام دي
وردك الينا سالما
نفسي ياخ تعود لينا
السيف
|
Post: #21
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 04-30-2009, 01:26 PM
Parent: #20
شكرا أخي/ود البرعي...
عادت المياه إلي مجاريها...
كتر خير أخونا رآني السمآني...
|
Post: #22
Title: Re: بعيدا عن زقاقات السياسة... حكاية عبدالله بزقة...
Author: سيف اليزل برعي البدوي
Date: 05-01-2009, 00:53 AM
Parent: #21
حمد لله الف علي السلامة
والعود احمد
|
Post: #23
Title: Re: بعيدا عن زقاقات السياسة... حكاية عبدالله بزقة...
Author: سلمى الشيخ سلامة
Date: 05-01-2009, 01:19 AM
Parent: #22
استمتعت جدا بالحكايات
والسرد البسيط العميق
اطلع لينا بحكاياتك
باين عليك زولا كبير مقام فى الحكى
تسلم
|
Post: #24
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 05-01-2009, 12:02 PM
Parent: #23
استمتعت جدا بالحكايات
والسرد البسيط العميق
الأخت/سلمي...
متعك الله بالصحة والعآفية...
أرجو أن أكون عند حسن ظنك الجميل بشخصي الضعيف...
لك من الشكر أجزله...
|
Post: #25
Title: Re: بعيدا عن زقاقات السياسة... حكاية عبدالله بزقة...
Author: سيف اليزل برعي البدوي
Date: 05-01-2009, 08:51 PM
Parent: #24
up
|
Post: #26
Title: Re: بعيدا عن زقاقات السياسة... حكاية عبدالله بزقة...
Author: hamid abdalah
Date: 05-02-2009, 05:48 AM
Parent: #25
سلامات ياود المدير
تابعت سردك الجميل للحكاية وللاسف كما قلت الحكاية تعبر عن لسان حال كثير من الاهل بالسودان..
واعجبني فيها تناولك لها بحسك الشاعري الرهيف ...
المهم ساتابع معك البوست وواصل في الكتابة.
|
Post: #27
Title: Re: بعيدا عن زقاقات السياسة... حكاية عبدالله بزقة...
Author: هند محمد
Date: 05-02-2009, 06:51 AM
Parent: #26
يامعاوية تسلم على السرد التلقائى المرتب والفكه
حقيقى أعجبت جدا بالمساحة
يسعد صباحك
|
Post: #28
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 05-02-2009, 11:52 AM
Parent: #27
الحبيب/ حامد...
أسعدني مرورك, ولفح زمهريرك...
إن شاء الله ساكون بكالقري بعد إسبوع.
أتمنى أن أراك هناك...
كلما مررت من هنا لاتنسى أن تحمل عاطر
التحايا مني للأخوان بإنيوفك...
|
Post: #29
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 05-02-2009, 12:00 PM
Parent: #28
صاحبة الحروف المنمقة المموثقة/ هند...
مرورك أسعدني, وإعجابك شهادة تدفعني
دوما للأمام...
صباحك كله خير...
|
Post: #30
Title: Re: بعيدا عن زقاقات السياسة... حكاية عبدالله بزقة...
Author: سيف اليزل برعي البدوي
Date: 05-02-2009, 07:30 PM
Parent: #29
up
|
Post: #32
Title: Re: بعيدا عن زقاقات السياسة... حكاية عبدالله بزقة...
Author: سيف اليزل برعي البدوي
Date: 05-03-2009, 05:58 PM
Parent: #30
ود المدير
نحن في انتظار الجديد من ابداعاتك
|
Post: #31
Title: Re: بعيدا عن زقاقات السياسة... حكاية عبدالله بزقة...
Author: hamid abdalah
Date: 05-02-2009, 09:53 PM
Parent: #25
سلامات ياود المدير
تابعت سردك الجميل للحكاية وللاسف كما قلت الحكاية تعبر عن لسان حال كثير من الاهل بالسودان..
واعجبني فيها تناولك لها بحسك الشاعري الرهيف ...
المهم ساتابع معك البوست وواصل في الكتابة.
|
Post: #33
Title: Re: بعيدا عن زقاقات السياسة... حكاية عبدالله بزقة...
Author: علي الكرار هاشم
Date: 05-03-2009, 09:05 PM
Parent: #31
قريبنا ود المدير
تسلم
...
ود بزقه دا نفسو قال لينا القروش في السعوديه مشتته في الشارع
والحكاية بقت سنوات طوال
...
واصل نحن مستمتعين معاك
|
Post: #34
Title: Re: بعيدا عن زقاقات السياسة... حكاية عبدالله بزقة...
Author: معاوية المدير
Date: 05-03-2009, 11:31 PM
Parent: #33
سرى, ماك براك...
الله يكون فى العون...
|
|