Post: #1 Title: سمعتو بي بت ,,,جنت,,,عشان ادوها شاكوش !!!! Author: Solafa Alagib Date: 04-23-2009, 00:32 AM Parent: #0
اصلا سبب سؤالى الغريب انى كنتا برتب في شوية اوراق قديمة(مش اوى يعني) من ايام ماكنا طلبة في السنة النهائية في الجامعة وكان عندنا
فترة عمل اكتر من شهر في مشفي التجانى الماحي للامراض النفسية,,وكانت فترة جميلة وايام لها لون وطعم ورائحة(سقا الله تلك الايام)واتاحت
لينا الظروف اننا نعمل لفترة مع الطبيب الصوفي الراحل د:الادريسي,,,والكلام عنو عايز بوست منفصل,,,المهم بعد نهاية الفترة كانت عندى
ملاحظة مدهشة يمكن تكون ما لفتت انتباه زول غيري,,,,شفتا اكتر من حالة لشباب(زى الورد) مصابين بحالات نفسية بدرجات متفاوتة بسبب,,,,
(اسفة على التصريح الصادم)لكن بسبب البنات,,,وكنتا ولازلت بتساءل,,,
هل انحنا (البنات) بندى مشاعرنا بحساب ؟؟ولا انتو (الاولاد)بتغرقو في شبر موية,,,يعني بالواضح ما بتعرفو تختارووووو
د:سلافا العاقب
Post: #2 Title: Re: سمعتو بي بت ,,,جنت,,,عشان ادوها شاكوش !!!! Author: علاء الدين حيموره Date: 04-23-2009, 00:40 AM Parent: #1
والله يا دكتورة اظن الكلام دا كان بدري شوية لكن هسي علي الجزيمة الولد كان اتشوكش من ليلى العامرية الجننت قيس ما بتجيه الحبة ...
ايقاع الحياة اختلف الان يا دكتورة ومفهوم الحب زاتو قد يكون مختلف الان والبنات بقو على قفا من يشيل ... يعني لو راجعتي المستشفى دي تاني ما اظن بكون في زول مشوكش دخلها ... وبقو شغالين باغنية
الناسيك يا قلبي انساه والساليك يا قلبي سيبو
معاي في الحتة دي ؟
Post: #3 Title: Re: سمعتو بي بت ,,,جنت,,,عشان ادوها شاكوش !!!! Author: نوفل عبد الرحيم حسن Date: 04-23-2009, 01:59 AM Parent: #2
يقال : من المؤلم ان تحب بصدق وتخلص بصدق وتغفر بصدق ثم تصطدم بنهاية تخذل كل الصدق ومن العذاب ان تشعر بمن لا يشعر بك وتكتب لمن لا يقرأ لك وتحتاج الي من لا يحتاج اليك ثم تكتشف أن أجمل سنوات العمر كانت سراب
يقال علي قدر الحب تأتي الكراهيه .. رغم اني لا اوافق علي هذا القول لان البحب عمرو ما بكره .. لكن اقول علي قدر الحب تأتي الصدمه اذا كان الحب عميق جدا تكون الصدمه اكبر واقوي .. واذا كان سطحي وغير صادق لا تكون هناك اي صدمه زي قانون الفيزياء البقول لكل فعل رد فعل مساوي له في القوة ومضاد له في الاتجاه هو جنون بس يا دكتوره ؟ من الحب ما قتل
تحياتي
Post: #4 Title: Re: سمعتو بي بت ,,,جنت,,,عشان ادوها شاكوش !!!! Author: باسط المكي Date: 04-23-2009, 02:36 AM Parent: #3
Quote: الناسيك يا قلبي انساه والساليك يا قلبي سيبو
Post: #5 Title: Re: سمعتو بي بت ,,,جنت,,,عشان ادوها شاكوش !!!! Author: Baha Elhadi Date: 04-23-2009, 03:02 AM Parent: #4
سمعنا بشاكوش جنا عشان ادوه بت!!! دا كان زمان شاكوش وغيرو الآن لم يعد هناك وقت لمثل هذه الأحاسيس اللهاث وراء لقمة العيش أدي الناس كلها شواكيش حب إيه دا النتي بتتكلمي عليه؟؟؟ بهاء/طوكيو
Post: #6 Title: Re: سمعتو بي بت ,,,جنت,,,عشان ادوها شاكوش !!!! Author: علاء الدين حيموره Date: 04-23-2009, 03:22 AM Parent: #5
دي اغنية يا دكتورة زمن الشباب كان فايق ورايق والبنات سمحات وفرصة المشاهدة كانت صعبة
Post: #7 Title: Re: سمعتو بي بت ,,,جنت,,,عشان ادوها شاكوش !!!! Author: SHIBKA Date: 04-23-2009, 05:47 AM Parent: #6
يادكتورة ما اظن في بت جنت عشان ادوها شاكوش لان البت بتقتنع اسرع من الراجل قال ليها ما عايزك تمشي تاخد ليها بكية ولي اتنين وانتهي الموضوع لكن ما يمنع ان الحب يكون لسة موجود داخلها لكن ما بتلهث وراه لان البدائل وظروف الحياة كلاهما متوفر
Post: #8 Title: Re: سمعتو بي بت ,,,جنت,,,عشان ادوها شاكوش !!!! Author: معتصم مكاوي Date: 04-23-2009, 05:55 AM Parent: #1
بس أوعى يكون .. ولا يكون .. ولا هاااااااااااااااا ؟؟ بس ممكن !! ولا ما ممكن ؟؟ يا ربي أنا مالي ؟؟
Post: #9 Title: Re: سمعتو بي بت ,,,جنت,,,عشان ادوها شاكوش !!!! Author: محمد فضل الله المكى Date: 04-23-2009, 06:27 AM Parent: #8
سلافه يا بتي
أنا القدامك دا أي سنتمتر مربع
في راسي فيهو ضربة (مرزبًه).
عادي...... مافي مشكله.
Post: #10 Title: Re: سمعتو بي بت ,,,جنت,,,عشان ادوها شاكوش !!!! Author: ناجية مصطفى Date: 04-23-2009, 12:06 PM Parent: #9
يبدو انك يا محمد فضل الله بقيت غير لائق (حبيا) علي وزن طبيا
***بعتذر لعدم التواصل الايام الماضية بسبب مرض صغيري (يزن) الذى مسخ علينا الحلة ,,ثم تعافي الحمدلله وربي ما تحرم بيت من الاطفال.
*** الشواكيش زاتا خشوم بيوت ,,يعني تلقي علاقة من اولا شكلها منتهية بشاكوش قدر الكوريك,,,زى علاقة الحب من طرف واحد,,,ياخوانى دا
براهو ما شاكوش
Post: #19 Title: Re: سمعتو بي بت ,,,جنت,,,عشان ادوها شاكوش !!!! Author: مريم بنت الحسين Date: 05-01-2009, 10:33 PM Parent: #18
د.سلافه.. ألف سلامة على يزن.. وان شاء الله ما يشوف شر.. فعلا سؤال يستحق الوقوف... موش احنا قالوا عاطفيات عشان كده ما عندنا حق الطلاق! والله احنا انصح منهم... والله الواحد منهم يكون متزوج وفي أمان الله.. ماكل شارب نايم.. بيته ضيفه واولاده مستحميين.. اها.. تقوم تمر شافعه في الجامعة، بي "ديانه" وخطوة لركبة.. تسيّب ركبه.. وتفلّس بيه بارد وساندوتشات.. وممكن تعرسه، وتمصر جيبه.. وتبيّعه الوراه والقدامه.. وبعد ده يجيكم في المستشفى القلت عنها يا دكتوره
حسي العاقل منو والمجنون منو عليك الله؟
البنات يمكن "بشتروا" دماغهم... أولاً.. البت ما بتمش "تتشوبر" وتعرض مشاعرها للهواء الطلق.. عشان كده لما ما يحصل اتفاق والعلاقة ما تستمر، هي ما خسارنه "كتير".. الحاجه التانيه.. انه هي ما بتصرف على العلاقة.. عشان كده خسارته اقل طبعا..
والاهم من ده كله.. نمره تلاته... صرّة الوش والبكا، بخلو الوش يتملي تجاعيد من بدري..
Quote: هل انحنا (البنات) بندى مشاعرنا بحساب ؟؟ولا انتو (الاولاد)بتغرقو في شبر موية,,,يعني بالواضح ما بتعرفو تختارووووو
السؤال مُرْبِك شوية
فالجزء الأول ( هل انحنا (البنات) بندى مشاعرنا بحساب ؟؟؟ ) مش كل البنات ... فهناك بنات يندلِقْن كإندلاقة الشباب. و لكن النسبة ضئيلة و لهذا أسباب. فالبنت السودانية و إنطلاقا من المجتمع الذي تعيش فيه شبه المنغلق لا بد أن تكون حريصة في دلْق مشاعرها ، و أن تكون مشاعرها بجرعات متأنية و حذِرة حتى تأمن جانب القيل و القال إن هي فشلتْ في الوصول بالعلاقة إلى نهابتها المرجوة.
أما الجزء الثاني : ( ؟؟ولا انتو (الاولاد)بتغرقو في شبر موية,,,يعني بالواضح ما بتعرفو تختارووووو)
أعتقد غير جازم بأن الذي يغرق في شبر موية ما هو إلا مراهق عاطفيا مهما كان عمره. لأن الحب ليس لهاث وراء وجه أو أنثى مجرد أنثى مكتملة.
من يحب ثم ياخد شاكوش مؤدي للجنون أظنه محب صادق لم يستطع أن يوفق في خلْق التوازن النفسي الذي يجعله يتقبل في دواخله فقدانه محبوبته .. ربما كان موفقا في إختياره ... و لكن هناك أكثر من ظرف للشاكوش الذي إنهال على رأسه .. ربما كانت الفتاة مجبرة على تركه لظروف أسرية لم تعلنها له. ربما خدعته .. و المحب يكون مغمض العينين عن أشياء كثيرة .. و لا يرى إلا الجوانب التي تجعل قلبه يخفق كلما رآها. ربما أعطته إشارات لم يفهمها .. و قام بتفسير هذه الإشارات لصالحه .. فالمحب يفتح قنوات الإيجاب و يغلق كل نوافذ السلب و النواقص... و هنا يكمن الخلل في العقل المؤدي للجنون ...
تحياتي د.سلافة .. فى رأي ان بعض الرجال يعتبر الشاكوش ضربة فى الصميم لكبرياءه و من هنا يأتي الاهتزاز النفسي اذا تعرض للرفض ,, فالمسألة مسألة كبرياء و بعضهم لديه Big Ego عشان كدة بتفك منو لمن واحدة ترفضوا اما نحن معشر النساء لا نعاني من تلك النزعة -فى الغالب - هذا لا يعني ان "الشاكوش" اقل ألما للمرأة ,, لكن المجتمع اصلا لا يساعد المرأة على أن يتولد عندها احساس بتضخم الذات.. خاصة مجتمعنا الذي يفضل الولد على البنت منذ الصغر ....
اما التفسير المنطقي الاخر هو ان الانسان-رجلا كان ام امرأة- اذا اختل نفسيا او عقليا بسبب شاكوش فالسبب ليس الشاكوش بل الشاكوش ما هو الا القشة التي قصمت ظهر البعير .. يعني انسان اصلا لديه مشاكل نفسية اعظم و اخطر من اي شاكوش و مصيره فى النهاية الى الجنون -بشاكوش او بدونه. ... و الله أعلم .....
Post: #22 Title: Re: سمعتو بي بت ,,,جنت,,,عشان ادوها شاكوش !!!! Author: Dania Elmaki Date: 05-02-2009, 03:12 AM Parent: #21
انا بنت جيراننا جنت و دخلت المستشفى عشان ادوها شاكوش, رغم انه العلاقه كلها كانت من بنات افكارها يعني الولد ما صارحها, لكن غايتو جنها جاء بفايده حنسنا الولد و عرسها و من يومها قاطعت كل الناس الحنسوه ليها, ما عارفه بتغير عليه ولا عشان عارفين القصه
Post: #23 Title: Re: سمعتو بي بت ,,,جنت,,,عشان ادوها شاكوش !!!! Author: نادية عثمان Date: 05-02-2009, 03:29 AM Parent: #22
د. سلافة
سلامات
موضوع لطيف تسلمي
فقد أضحكتيني في زمن ندر فيه الضحك من القلب !
كوني بألف خير
Post: #24 Title: Re: سمعتو بي بت ,,,جنت,,,عشان ادوها شاكوش !!!! Author: وليد الطيب قسم السيد Date: 05-02-2009, 11:42 AM Parent: #1
تحياتى د/ سلافه
بالفعل سيدتى انا لغاية يومنا هذا ما قابلتنى بنت جنت بشاكوش اما الاولاد فحدث ولا حرج بالكوم.......
انا القدامك ده اتشوكشتا لمن لقطا لى 3 ورقات من الشارع ولو ما كان الشارع خالى من الورق لكنت رحتا فيها لا محاله.......
Post: #30 Title: Re: سمعتو بي بت ,,,جنت,,,عشان ادوها شاكوش !!!! Author: عبد الدائم سيد أحمد Date: 05-04-2009, 08:20 AM Parent: #29
سمعتو بي بت ,,,جنت,,,عشان ادوها شاكوش آآآى سمعنا وشفنا كتير
بل بالعكس الولد لو ادوهو شاكوش الموضوع عادى حتى اصاحبو بتريقو عليهو ويبقى نكتة طويلة لكن البت لو حبيبها شراها ساكت فى محطة ( سبعة ) ترجع البيت كدارى والغبار لاحق الركب من الزعل ده غير الشواكيش غير المعلنة ، يبقى سؤالى ؟ شفت ليك بت صاحباتها اتريقو عليها عشان فسخوا خطوبتها من جانب الولد
وفى الاخير الجابرى قال حواء من زمن بعيد زايدة دايما فى عنادا ما اصلو كان ادم بريدا يبرا فى حواء وحلاتا لما فات الجنة زاتا
شكرا يا محمدفضل الله علي دعوتك ليزن ,,انشا الله تسلم
***** عبدالدايم سيداحمد وكيل الخرطوم القديمة بنات فرع سودانيزاون لاين,,,,سلام مربع ,,,بالغتا والله ,,البنات البنات الطف الكائنات على
قول سعاد حسنى ,,ما ممكن تكون دى وجهة نظرك فيهم ,,,
تخريمة: انتا حصل شريت ليك واحدة في محطة سبعة؟؟؟اعترف فالاعتراف سيد الادلة
Post: #35 Title: Re: سمعتو بي بت ,,,جنت,,,عشان ادوها شاكوش !!!! Author: وليد الطيب قسم السيد Date: 05-06-2009, 08:39 PM Parent: #34
Quote: !!!انت ما سمعتا بورق جورجيت بتاعة بورسودان؟؟
القصة رومانسية ذات نهاية مؤلمة زى روايات يوسف السباعى لو عندك مزاج تعرفا قول لي
اظنها زميلة تلقيط يا دكتورة بكون سعيد لو سمعت قصتها لعلى اعتبر واركب الشارع صاح ياخى الحب ده صعب بشكل
Post: #36 Title: Re: سمعتو بي بت ,,,جنت,,,عشان ادوها شاكوش !!!! Author: SHIBKA Date: 05-07-2009, 06:11 AM Parent: #35
د. سلافة البنات بقوا بياعات لاسباب اقتصادية اولا وعدم ثقة في الرجل الذي يبيع لاتفه الاسباب وباتفه الاسعار عشان كدا بقت الواحدة تحب وتعمل احتياطي اذا الهدف زاغ بيكون في الاحتياطي
دي واحدة من الحاجات الحاصلة وشفتها قدام عيني واحدة خاتة واحد للحب واتنين احتياطي واهم شي كل واحد ما عارف التاني لما سالتها عن دا شنو دا قالت لي واحد في الكف وواحد في الرف والتالت ما متذكراهو شنو (لكن على نفس الوزن)
المهم دي بت من القديمة قرت معاي القديمة ومشينا الجامعة سوا اها عرست واحد من التلاتة ديل واحنا في سنة تانية تاني لي هسة ما شافت الجامعة بعينها
دا مثال بس لكن ما قاعدة
Post: #37 Title: Re: سمعتو بي بت ,,,جنت,,,عشان ادوها شاكوش !!!! Author: Dalal Ezzaldin Date: 05-07-2009, 07:58 AM Parent: #36
يادكتوره الزمن اتغير وبقى في عدم ثقه متبادل بين الشباب والبنات الانفصال بقى خيار وارد بالنسبه للطرفين .. يعني ما في واحد فيهم بيتفاجأ ولظروف كتيره اقتصاديه واجتماعيه او ساي كدا
الشاكوش علاجو بقى موية نار .. ربك الحفيظ
Post: #38 Title: Re: سمعتو بي بت ,,,جنت,,,عشان ادوها شاكوش !!!! Author: Mohammed Ibrahim Othman Date: 05-07-2009, 08:13 AM Parent: #37
يعني حتى في المشاعر يمكن الأشياء تفرق!!! في مجتمعناالسوداني البنت في الغالب تمثل الدور السالب في الحب, بلا مشاعر بلا احاسيس متجاوبة مع القدر الكبير الذي يجود به الولد.. صمت البنت وسلبيتها هذه تجعل من الولد ان يبذل مجهود فياض من العواطف لإستنطاقها ولو همسا بمشاعرها.. لو بي همسة قولها أحبك لو ترسل لي سلامك ولو بتحلم في منامك قولها أحبك..
وكم العواطف الكبير الذي يبديه الولد يكون قد بناه من دواخله بصدق حتى قبل ان يصل للمرحلة استنطاق البنت, وفي نفس الوقت تظل البنت متشككة ومنتظرة المزيد المزيد خاصة اذا كان هنالك شخص آخر منتظر.. احتياطي يعني.. كمية المواد التي استنفذها الولد في بناء هرم الحب تكون قد خلفت فراغا كبير بداخله وهوة من الصعب ردمها الا بالحب المقابل.. وإلا لكانت هنالك الصدمة.. أو الشاكوش الذي تختلف حمولته من الحمى الخفيفة إلى التجاني الماحي..
Quote: فى رأي ان بعض الرجال يعتبر الشاكوش ضربة فى الصميم لكبرياءه و من هنا يأتي الاهتزاز النفسي اذا تعرض للرفض ,, فالمسألة مسألة كبرياء و بعضهم لديه Big Ego عشان كدة بتفك منو لمن واحدة ترفضوا اما نحن معشر النساء لا نعاني من تلك النزعة -فى الغالب - هذا لا يعني ان "الشاكوش" اقل ألما للمرأة ,, لكن المجتمع اصلا لا يساعد المرأة على أن يتولد عندها احساس بتضخم الذات.. خاصة مجتمعنا الذي يفضل الولد على البنت منذ الصغر ....
اما التفسير المنطقي الاخر هو ان الانسان-رجلا كان ام امرأة- اذا اختل نفسيا او عقليا بسبب شاكوش فالسبب ليس الشاكوش بل الشاكوش ما هو الا القشة التي قصمت ظهر البعير .. يعني انسان اصلا لديه مشاكل نفسية اعظم و اخطر من اي شاكوش و مصيره فى النهاية الى الجنون -بشاكوش او بدونه. ...
لا لا لا يا أخت Outcast الرجال صادقين أكثر من النساء خاصة في هذا الزمان.. لذلك وبعد التجارب الكثيرة المرت بالرجل.. فالحال بدأ في التغير.. الشاكوش لو أقل ألما للمرأة هو بالضبط كما ذكرت آنفا أن المرأة لا تحب بصدق مثل الرجل..
الزمان تغير الآن.. يعني الشاكوش لا يؤثر في الجنسين.. سبحان الله..
بعدين يا سعادتك والله باقي مداخلاتك بس زكرتني قالوا واحد جا لي مرتو بالليل قال ليها أنا خلاص من بكرة حأبطّل شراب الشاي، يعني من الصباح ما تعملي لي شاي.
صحى من الصباح .. المرة ما عملت ليهو شاي .. قعد شوية وقال ليها: أها أنا ما شربت شاي جاني شنو يعني؟ ... بعد 5 دقايق قال ليها: والله حكاية كيف الشاي دي إشاعة ساكت الناس عاملينها .. أنا هسي ما نصييييييح الجاني شنو. المهم، من الصباح لحدي وقت الفطور قال ليها جملة (الجاني شنو) زي 150 مرّة ... المرة زهجت وقالت ليهو (جاك جنس البتسوي فيهو ده .... يا راجل قوم أشرب شاهيك سويت لينا منخوليا).
لو العلاقة متوازنة والاساس سليم تاكد انو درجة الاحساس بتكون واحدة وزمن التعبير واحد وحرارة المشاعر واحدة,,,ما حيكون في طرف حاسي
انو بيدي والتانى بياخد,,,او انو هو الجانب الايجابي والاخر هو السلبي,,,انا عندى خلاصة بسيطة وصلت ليها انو الراجل(السودانى تحديدا)
بتختلف طريقة تعبيرو عن المرأة,,,يعني البت بتبكى وتنهار ويجيها اكتئاب وممكن تخلي الشغل وتاخد اورنيك مرضي من المدرسة,,,ممكن تجينا
في الحوادث ب HYS يعني هيستريا بكل بساطة ,,,لكن الراجل(اندينا) اتربي علي عدم التعبير وكبت المشاعر تحديدا السلبية ,,,,عينة ياولد
zعزيزتي سلافة
مجتمعنا شرقي وغارق في قيم عجيبة فلا اتوقع ان قيم الإحساس تكون متوحدة لان الرجل له مساحات ليست متوفرة للمرأة.. لكن فوق ذلك فإني ما زلت أقول أن العبء على الرجل أكثر من المرأة. طبعا انا أتكلم غن زماننا وليس ما صار فيه شباب اليوم.. لك تحياتي
Post: #49 Title: Re: سمعتو بي بت ,,,جنت,,,عشان ادوها شاكوش !!!! Author: Al-Mansour Jaafar Date: 05-10-2009, 01:50 AM
القارئي الكريم
الدكتورة سلافة العاقب
الإحترام والسلام
قولي ليزن سلامتك واليمن كرامتك
بوستك لطيف وأنيق وخفاق وهفهاف ونسيم
في الموضوع حاجة مهمة عن فهم البنات لطبيعة أحاسيسهن ولطبيعة مجتمعهن وفهم المجتمع الذكوري لطبيعة الحب والإثنين لشفرة التواصل والإتصال وقدراتهم على إحترام عواطفهم وإختياراتهم الوجدانية في مجتمع رأسمالي تسليعي إفقاري..إلخ
عشان كدا بتلقي الفروق وعدم التوازن والتأسيس الما سليم
في مرة نقاش إتفقنا إنه في معالم وقوانين في "الحب" أولها المعرفة (بتنوعها) وثانيتها الصداقة (بتنوعها) ثم الإلفة والإشتياق بتنوعهم وفي الرابعة ختينا الرغبة في إسعاد الآخر وإنه (التماثل أو التزامن أو التوافق) بين الإثنين في هذه الأشياء ضروري لنجاح العلاقة العاطفية.
إختلافنا كان في مشروعية التجكيس من حيث هو فرض إرادة على البت دون أن تدري شيئاً عن طبيعة المشروع في بدايته بل تجد نفسها فيه. فالآخرين قالوا إن البنت تصطنع البرآءة ولكنها بذات الأسلوب المضمر تجذب الولد (حينذاك) إلى شباكها.
إتفقنا أن الزواج هو مرحلة جديدة في الحب ذات شكل إقتصادي إجتماعي سياسي وثقافي ثنوي التكوين ولكنه في الغالب أحدي أو واحد إلى واحد إما في داخل البيت أو في خارج البيت وبعد ذا جاط الموضوع خاصة حينما وصلنا لتفسير الطلاق هل هو طلاق جسدين أو طلاق الذهن من طروحه ومشاعره القديمة.
ده طبعاً كله ممكن يكون معروف الآن إجمالاً أو في شكل خبرات متباعدة بس الما قدرنا نعرفه هل البت السودانية في الوسط في إطار العمر المألوف لزواجها بتكون واعية بالفرق بين الحاجة إلى التقدير أو الحاجة إلى الحنان أو الرغبة الجنسية والحاجة الى الزواج والحاجة إلى ما نسميه "الحب" ؟
الشاب السوداني لا يعي هذه الفروق والمسألة كلها بت تجمع في شكلها وبعض تفاصيلها بين بعض صور أمه أو أنضر نساء عائلته وبعض صور بنات المسلسلات والسينما والباقي ...متروك
وجدنا إننا كشباب وشابات ضعاف التكوين من كل النواحي لذا تكون حياتنا العاطفية دوماً ضعبفة وفي حاجة إلى مقويات المفاجئات السارة وإلى الأصدقاء والصداقات إن خلصت النية، وإلى الأهل وإلى الجيران لو خلصت النوايا وإن الإرتباط يتشيأ مع قدوم الأبناء ومسؤولياتهم .
المهم يا ستي شكراً على مساحة الفضفضة بس برضه ورينا شوية قصائد حب نسائية كالتي سمح بها المجتمع للرجال
كلام السيد نوفل لامس أوتار في شغاف الروح وقد كانت حبيبتي تبكي لأنهالا تستطيع مجاراتي في التعبير كتابة ولكنها كانت تعوض ذلك بلطف..... البحر كان يهيج أو يروق لمن يشوفنا اليد في اليد والشمس كانت بتطلع عشانا ولمن تغيب بتغيب خجلاً من جمالنا...
المهم يا دكتورة كتر خيرك ويسلم صفاك
Post: #50 Title: Re: سمعتو بي بت ,,,جنت,,,عشان ادوها شاكوش !!!! Author: Huda AbdelMoniem Date: 05-10-2009, 05:13 AM Parent: #49
