Post: #1
Title: فراق الزول,,,,,الحى,,,,حار ولا في زول ما جربو؟؟؟
Author: Solafa Alagib
Date: 04-23-2009, 00:21 AM
Parent: #0
منو فينا ياتري ماجرب لحظة خروج من البيت الدافي الحنين لداخلية في مكان بعيد ومع ناس غريبين
منو فينا ماعاش دقايق وداع عزيز مسافر
منو فيناما حس بلسعة رحول من بيت ايجار كون فيهو ذكريات دقاق وناس لذاذ
منو فينا مازعل علي لبس اللبني برغم المجموع الكبير ,عشان اللبني دا باعد بينو وبين احلامو ,,,الصغيرة
منو فينا بيمر عليهو شهر ما بيقول,,,,,والله ياحليلهم,,,كانو ناس طيبين خلاص
منو فينا السعيد,,,,اللى لا عاش فراق,,,,لا جربو ؟؟؟؟؟؟؟؟؟؟؟؟؟؟؟؟؟؟؟؟
د:سلافا
|
Post: #2
Title: Re: فراق الزول,,,,,الحى,,,,حار ولا في زول ما جربو؟؟؟
Author: د.نجاة محمود
Date: 04-23-2009, 01:24 AM
Parent: #1
| Quote: منو فينا ياتري ماجرب لحظة خروج من البيت الدافي الحنين لداخلية في مكان بعيد ومع ناس غريبين |
1980 نوفمبر لاول مرة اخرج للدنيا العريضة.. الى الان وجه امي في شباك القطار وه تكثر في الادعية والتوصية
لا يفارقني والقطار ينهب ارض وامي تتحول الى نقطة هنااااااااااك
ومن يومها الى الان لم اعد انا....
عملي الان كمستشارة تعليمية ومديرة لشركة جزء من عملها تنسيق قبول في الجامعات
احرص ان اكون في انتظار طلابي حين يحضرون من المطار
ارى الخوف والضياع في عيونهم.. من اللحظة التي يروني فيها تنفرج اساريرهم
واكسب لي ولدا او بنتا جديدة..
واعيد واكرر تلك اللحظة حين تركنا امنا انا واخي لاول مرة ليأخذنا القطار الى المجهول..
كيف كان الفراق مؤلما وكيف ان الحنين للمألوف يوجع قلبك..
وكيف تفتقد كل شئ في بيتكم الدافئ الحنون..
حتى غسيل العدة وقش الحيشان..
عظم الله لحظة الفراق الابدي واكيد الفراق المؤقت ايضا لحظة عظيمة..
|
Post: #3
Title: Re: فراق الزول,,,,,الحى,,,,حار ولا في زول ما جربو؟؟؟
Author: معتصم مكاوي
Date: 04-23-2009, 06:27 AM
Parent: #1
والله يا دكتورة ..
حسيت بأني زي الكنت ساكن معاكم ..
هو البيت كان وين ؟؟
وحسيت بي شوق عشان ألاقيكي ..
وأقعد أحكي ليكي عن حرارة الفراق ..
بس حضري دموعك سااااكت !!
|
Post: #4
Title: Re: فراق الزول,,,,,الحى,,,,حار ولا في زول ما جربو؟؟؟
Author: Solafa Alagib
Date: 04-23-2009, 01:42 PM
Parent: #3
د:نجاة محمود
سعيدة انا وممتلئة فخرا بمرورك الكريم ومداخلتك الجميلة,,,,واصلي وصف لحظات حنينك خلينا نتفاعل كلنا ونفضفض
اخي معتصم مكاوى ,,,,الزول السودانى معروف زول حنين وما دايرة اقول (بكاى) لكن بالجد الولف ممكن يخلينا نتعود
حتى علي الحاجة الكعبة ,,,ودا احساس مجرب انو ما حاجة مؤلمة وبتحرقك من جواك زى انك تفارق ليك عزيز وهو حي يرزق
وتجبرك الايام وتصاريف الحياة انك تمشى حياتك من غيرو وانو يمشي حياتو من غيرك,,لكن مهما مرت سنين وعرفتا ناس تانين
تأكد انو بمجرد ما يزيح الزمن ستارة ايامو فجاة ويظهر عزيزك قدامك ,,,,,ترجع كل مشاعرك ومحبتك وتقديرك وتذكرك وكل
اللحظات الحلوة اللى خلتو عزيز عليك وخلتك عزيز عليهو,,,,ترجع بنفس الرونق والبريق
ابكى يا معتصم,,,ابكى زكرياتك والم فراق عزيزك,,,وكضاب البيقول البكا ما للرجال,,,البكا للزول الطبيعي البيحس وبيتفاعل وبيعبر
|
Post: #5
Title: Re: فراق الزول,,,,,الحى,,,,حار ولا في زول ما جربو؟؟؟
Author: معتصم مكاوي
Date: 04-23-2009, 04:51 PM
Parent: #4
والله يا دكتورة البقول البكاء حتى للرجال
عيب ده زول رايه تلفان ساكت أنا شخصياً
يمكن أكون حالة خاصة في دنيا الرجالة أبين شنبات
زول دموعي قريبة جداً فيلم هندي يبكيني المهم
أفرغ الشحنة الجواي ..
سؤال : بتجيك حالةبتقفلي عليك باب الأوضة وترقصي
مع أغنية أو موسيقى كاربة كده ؟؟ أنا بعمل كده
ياستي وأفرغ الشحنة بتاعتي وأعرق استحم أبقى
زول تاني ..
يقولوليك الراجل ما ببكي ؟؟ باللللللللاهي !!
بس أحمد الله الحاجات ديك خليت البكا عليها !!!
أخووووووك جاااااااااامد في الحته دي !!
|
Post: #6
Title: Re: فراق الزول,,,,,الحى,,,,حار ولا في زول ما جربو؟؟؟
Author: Solafa Alagib
Date: 04-23-2009, 07:05 PM
قلت لي جامد,,,,,هيهيهيهي
ذكرتني يا معتصم بقصة من ايام الجامعة كانت عندنازميلة بتفرغ شحنات زعلا وغضبا بطريقة فريدة جدا,,,كان عندنا مولد كهربا كبير
جدا فى طرف حوش الكلية بشغلوهو لما الكهربا تقطع بيكون فيهو صوت,,,خيالي,,,تقوم هي من الداخلية لابسة وقاشرة ومتلبساها ليك الحالة
جيم اياها تمشي تقيف قدام المولد وتدى قفاها للكلية كلها وتبدا تصرخ تصرخ تصرخ مرات لحدى ما صوتا يبح وتجى راجعة مبسوووطة التقول
التقول القبيل دي ما هى,,,,رايك شنو في التفريغ دا !!
انا بقي ياعزيزي بكتب,,,ايوة ما تندهش ,,,اكتشفت الطريقة وانا طالبة في الخرطوم القديمة بنات سنة عشرمية ,,,بكتب لما ازعل ,,لما
احلم,,لما افكر,,,وبعد زمن لما اجى اقر الكلام دا في غير لحظة كتابتو والله اتملي دهشة معقولة انا كتبت الكلام دا ,,مرات درر,,مرات
كلام فارغ ,,,مرات كلام يودي ورا الشمس عديل كدا
|
|