Post: #1
Title: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 10:42 AM
إنه وبعد :
بـي إيد تهدهد
في الأمل
وبي إيد
تلملم في العقاب
بتفته المميزة يمشي (صالح) ليضيف للمدينة نكهةً أخري ! يذوبك في لجج حكاياه التي لا تنتهي تشعر وأنت جالس قبالته انك تلميذ في الصف الأول لمدرسة الحياة ! ولا غلو في ذلك فبعض الرجال حكايات تمشي تماماً كما الحكايات النساء ! يحكي ( للعوض ) عن ثقب الأوزون وعن أعمال (فيدور ديستوفسكي) عن الاخوة كارامازوف يحكي عن الجريمة والعقاب ، عن الامبريالية وأدواتهاعن الرأسمالية الطفيلية يحكي كل ذلك و(العوض) جالس كطوب الأرض فما للعوض بثقب الاوزون بل ما له وديستوفسكي ؟ العوض الذي كل علاقته بالأرض مصلاه وإبريق نحاسي يحمله معه أينما ذهب . وحقته المليئة ببعض خيرات الفاشر تمباكاً بلدياً يصر علي تمطيره بيديه . هو لم يعد يثق في محلات (العماري) منذ ان سرت في المدينة استخدام البعض لمواد كيميائية تزيد درجة الكيف لكن في المقابل تعجل بالرحيل و (العوض) لم يكن زاهداً في الحياة علي الاطلاق .
تتشقق الأرض ونبت الحكايا تخرج فيا للأوزون المسكين ويا لفجيعة (ديستوفسكي) فيك يا رجل !
يدير مؤشر الراديو تجاه أمدرمان يستجدي سهرات الإذاعة السودانية فيما مضي يغمغم وهو يسمع تقريراً إخباريا عن زيارات المسؤولين التي لم تكن لتنقطع ، هم هكذا المسؤولين في بلادي زيارات لا تنقطع وتواصل حميم مع السفر ،
يقرر بقلق يخصه إطفاء الراديو يتأمل في نجيمات ظهرن تباعاً ، يغطي رجلاه بملاءة قديمة صارت أشبه بشباك الصيادين رثة للغاية تماماً كحاله الرث ! لا يملك في الدنيا سوي عنقريبه الهبابي وراديوه الترانزستور وملاءته القديمة الي جانب حكاياه التي لا تنتهي .
باكراً استيقظ من نومه (إستاك) جيداً ثم خرج قاصداً دكانة صديقه (العوض) ذهب أولاً لقراءة صحف البلاد ذات المانشيتات الهزائم ذات الزيارات التي لا تنتهي ذات أي (حاجة) لم يكن بها جديد قرأها في لمح البصر ثم أعاد الصحيفة لبائع الصحف ، الذي لطالما حذره من القراءة المجانية غير انه رضخ مؤخراً أمام إصرار (صالح) وسخريته المفرطة :
( لما تجيب ليك جريدة فيها إخبار محترمة أنا بشتري منك ) يا لحنكك البيش !
يا فتاح يا عليم : هكذا ابتدر (العوض) ما إن وقعت عيناه علي (صالح)
والله بلد عجيبة ياخ ؟ أنت يا (العوض) القصة دي حتستمر كدة لمتين يعني ؟
قصة شنو يا (صالح) ؟ واياك تقول لي الأوزون وبستشسكي والامبررو ؟
ضحك (صالح) حتي فاضت من عيناه الدموع
هو في الحقيقة كان يبكي حاله وحال بلاده علي وجه الخصوص
لا ياخ أها أنا من الليلة قررت أهج من البلد دي بالعربي كدة وهسي أنا عايزك تسلفني خمسمية الف وبردها ليك متي ربنا سهل التساهيل وعارفك ما حتقصر معاي
خمسمية شنو ؟
خمسمية الف
فتاح ياعليم رزاق ياكريم
هو باللاهي انا لو عندي خمسمية الف البصحيني المواعيد دي شنو ؟
انا ما عندي ليك غير كباية الشاي وصحن الزلابيا
يا (حجة التومة) ادينا كبايتين شاي باللاهي
هكذا صاح (العوض) بحاجة (التومة)
حاجة (التومة) : أعمل ليكم في الشاي شنو يا (العوض)
آي حاجة ياخ أي حاجة انشاء الله سم !
توالدت الهزائم والانكسارات كجيوش الـ (نمتي) آوان الحصاد في كل شارع تجد هزيمة كاملة الدسم في انتظارك في كل بيت في تلك الاطراف حزن متمدد لم يعد في الحياة ما يسر علي الاطلاق ، غاب الفرح أو غيبوه من الطرقات قبيل ان يغيبوه في أحلام الناس وآمالهم ! لم يعد ثمة مؤشر لانعدال الحال ، تشابهت الأشياء كلها . الشوارع لكأنها فرغت من المارة والعابرين وأبناء السبيل والمتسولين أنفسهم ما عادوا يسألوك (شيئاً لله) .
توقفت عمليات البيع والشراء فكان لزاماً علي (العوض) مسايرة اقتصاديات السوق الجديد فبدل نشاطه التجاري الذي ورثه أباً عن جد بنشاط هامشي ، غابت لوحته المميزة (جزارة آل العوض) وحل محلها لوحة صغيرة لا تكاد تري بالعين المجردة علي ورقة فلسكاب كتب عليها بخط لم تسمع اذناه بالخطوط (العوض لتحويل الرصيد) كل شئ يصغر في هذه المدينة عدا آلام الناس ومعاناتهم وضنك معيشتهم كل شئ يصغر عدا أعداد المسؤولين والحركات والجيوش المنتشرة كل شئ يصغر عدا أرصدة المسؤلين في البنوك كل شئ يصغر حتي الوطن كجغرافية صغرت وتآكلت أطرافها وخيل التاريخ يجقلب والشكر أجزله للمليون ميل مربع !
سيذهب (صالح) فما عاد في الافق شيئ يستحق الغياب سيذهب الي أي مكان آخر في كوكب الارض يجد فيه بعضاً من انسانيته التي صار يستجديها في طرقات هذي المدينة الرثة !
سيذهب هرباً من الباعوض وجيوش المسؤلين والجيوش الأخري التي تملأ الطرقات ، لكم هو حزين كونه ظل يقاوم الهجرة بهققهات (العوض) وشاي (التومة) والنظر في عيون البسطاء ! لكم تحمل الجوع في ليالي الشتاء الباردة سيذهب مليئاً بحلم يخصه بحلم كلفه كثيراً أمر تحقيقها في بلادة تخصه تشبه سحنته السمراء تشبه الحالة الافريقانية التي لطالما افتخر بها ،
إهتدي أخيراً لبيع ممتلكاته كل ما يمكن أن يأتي بفلس عرضه للبيع حتي ملاءته الرثة ابتاعها منه رجل سبعيني يقضي ما تبقي من ايامه تحت شجرة كبيرة ظلت علي مواسم الجفاف التي انتابت المدينة محتفظة بظلها ليتخذهاالرجل سكنيً له .
أما الراديو فأهداها لصديقه (العوض) قدمها له وهو يضحك بسخرية منفلتة :
بالله الراديو دة لو حصل في يوم ساكت ما جاب سيرة المسؤولين وديهو لي بتاع الروادي يصلحوا ليك !
احتضن صديقه طويلاً بكي كليهما وهما في ذاك الحال تحول حضنيهما لحضن وطن افتقداه سوياً بكيا حتي شارفا الإغماء ، حاجة (التومة) بدورها انتحبت كثيراً فها هو (صالح) يقرر الرحيل (صالح) الذي كان يملأ أركان الأرض بالتفاؤل والغناء الجميل (صالح) الذي ولما يقارب العشر سنوات يشرب من يديها الشاي الأحمر الموزون حد وصفه ، (صالح) الذي (صالح) الذي ....!
قدم (العوض) لـ(صالح) بعض الجنيهات وكذلك فعلت (التومة) حتي الرجل السبعيني استجاب لنداء اللحظة استجاب كل من في الشارع ساعتها لهذه الحميمية التي في طريقها للرحيل ، المشهد كان مؤلماً احتماله لم يكن كأي مشهد سينمائي مؤثر ان الفارق هنا أن الممثليين كانوا علي سجيتهم حتي الكومبارس لم يأتوا لينالوا أجور ظهورهم لدقيقة في مشاهد تنتهي حميميتها بإ نتها ء التصوير ، بكي (صالح) كثيراً وبما تبقي من مروءته مضي دون أن يلتفت الي جمهور مودعيه مشي ممتلئاً بجمال أولئك الفقراء المتعبين مضي بعيداً حتي تلاشت الأشياء خلفه لم يعد في المدينة ما يستحق البقاء ! قالها لنفسه ثم أخرج زفيراً حاراً ثم مضي ورغوة الحياة تسيل من فمه .
وداعاً أيتها البلاد الما خمج
وداعاً أيها الناس الما خمج
وداعاً أيتها الشوارع
ليغيب بعدها عن ذاكرة المدينة التي بالتأكيد ستدخل في همومها بإشراق صباح جديد، وحدها الشوارع يا (صالح) ستفتقدك وحدها الشوارع وربما (العوض) و(حاجة التومة) وكرسيك الذي سيظل فارغاً في دكانة (العوض) طوال غيابك غيرهم لن يفتقدك أحد علي الاطلاق ،
فأنهض
لحرفك صاحبي
أو لحبك
فكلاهما
من نبت صدق لا مفر
والله في !
|
Post: #2
Title: Re: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 10:52 AM
Parent: #1
فمن رأي منكم صالحاً فليرمه ببلاد !
|
Post: #3
Title: Re: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 11:22 AM
Parent: #2
والشكر موصول كذلك للشوارع التي إفتقدها !
|
Post: #4
Title: Re: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 12:54 PM
Parent: #3
حيكومة عايزة تلجنا
تدينا مشروع نزرعوا
تدينا جيهةً نسكنا
لو وقفوا الحرب الحرام
الـ الله زاتوا هو لاعنا
كان البلاد إنطامنت
كان الف خزان إنبني
(حميد)
وكان ما كان وكان كان أكسيكي در!
وأقول قولي هذا واستغفر الله لي ولكم قوموا الي منافيكم يرحمكم الله!
|
Post: #5
Title: Re: لن يفتقدكـ أحداً علي الاطلاق يا صالح !
Author: Emad Abdulla
Date: 04-22-2009, 01:03 PM
Parent: #4
الله عليك يا صاحب ..
و الله لهذه البلاد .. و ناس هذه البلاد .
......
نسأل الله أن يقيض له ارضاً ..
و أن يبدله ناساً بأناس ..
|
Post: #6
Title: Re: لن يفتقدكـ أحداً علي الاطلاق يا صالح !
Author: حمور زيادة
Date: 04-22-2009, 01:54 PM
Parent: #5
إن وجدنا بلادا رمينا بها صالحا و رمينا انفسنا فيها كي تنتهي الحيرة.
|
Post: #8
Title: Re: لن يفتقدكـ أحداً علي الاطلاق يا صالح !
Author: Amjed
Date: 04-22-2009, 02:44 PM
Parent: #6
زمناً مو دا ...
الحيكومة كانت بت حلال
بي حالها .. بي حرب الجنوب
بي قلة المال في الجيوب
كانت رخية العيشة الا ترا
العوين الكبرو مليسين ...
***
أبوي وفر ضراعك للبلد
وادخر مروتك آ ولد
لي يوم بحين
احفض كرامتك تحفضك .. الموت ولا العيش المهين
الموت نفاد الما نفد .. الموت حياة الميتين
أختاها جنة مع الفقر .. وادخل جحيم المتعبين
وإن ما قدرت على دا أبوي .. رب لك دقين
|
Post: #9
Title: Re: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 02:50 PM
Parent: #6
حمور العزيز
علي نيل بلادنا سلام
وشباب بلادنا سلام
ونخيل بلادنا سلام
يالفرش متاعنا يا حمور ! شئ عجيب كأن اللعنة تطاردنا وين قبلنا !
أحكينا ياصاحب الكلام البديع أحكي ياحمور فالحال من بعضو !
|
Post: #12
Title: Re: لن يفتقدكـ أحداً علي الاطلاق يا صالح !
Author: khatab
Date: 04-22-2009, 03:02 PM
Parent: #6
خضر حسين خليل
سلا مات واشواق كتيره .. لكن عندى كلام عن صالح
الزي صالح ما بمرُق يا خضر !! امكن امش مدينة ً
تانيه .. لاكين قطع شك ما بمرُق ..
وكان قلت لى الاكيده دي جبتها من وين !
بقول من بيئة نصك .. السمح ده ..
غايتو يا زول حبيت جداً اقول ليك انو صالح ينضح حيويه
واول ما تهيأت للتجول معاه فى دروب اليوم .. قمت سفرتُه
.. وقمت َ اتحيرت َ
.
لك الحب دائما ً
.
|
Post: #13
Title: Re: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 03:12 PM
Parent: #12
العزيز ك(خطاب)
ازيك يافنان
ماعايز أقول ليك إنك استعجلت شوية للنص بقي والله لكن الشهادة لله يقينك دة جهجهني
يا صديقي وكما قلت فأمثال صالح آ بمرقوا بأخوي وأخوك !
جاي باقي الكلام يا خطاب بس انت خليك قريب يازول ياشواف !
والله لاوراك حيرة ياصديقي !
بالمناسبة رسلت ليك شوالين سلام مع الزولة البديعة آسيا الربيع !
علهم وصلوك !
شوق ومحبة
|
Post: #7
Title: Re: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 02:44 PM
Parent: #5
ياصاحبي هناك
مافي غير تلكع تسافر
وتمشي بينات الشعوب
(حميد) قدس الله سره
والله اني اخشي كثيراً لقادم ايامنا يا عماد مافي حاجة تطمن ياخ
أما صالح دة فما ظنيت يلقالوا جيهة تلموا
كملن الدريبات يا صديق
كملن بالحيل ياصاحب !
|
Post: #10
Title: Re: لن يفتقدكـ أحداً علي الاطلاق يا صالح !
Author: طارق جبريل
Date: 04-22-2009, 02:59 PM
Parent: #7
الله عليك يا صاحب
|
Post: #14
Title: Re: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 03:14 PM
Parent: #10
طارق يا جبريل
ازيك ياصاحبي
والله ليك وحشة طولنا منك شديد ياخ
اظهر وأحكيلنا عن الدروب الضلمن يازول ياحكاي !
|
Post: #11
Title: Re: لن يفتقدكـ أحداً علي الاطلاق يا صالح !
Author: خضر حسين خليل
Date: 04-22-2009, 03:00 PM
Parent: #7
يا أمجد ياصديقي
شاكر لك حضورك (بالسرة بت عوض الكريم)
وعلمن يطير
ان كان هو ما صلح عوج
دة زمن ضلالة اونطجية
زمن حقارة زمن مهين
والشوق فيضان ياصاح
|
Post: #15
Title: Re:
Author: خضر حسين خليل
Date: 04-22-2009, 05:10 PM
Parent: #11
تصويب :
المقصود في العنوان أعلاه هو :
لن يفتقدك أحد علي الاطلاق ياصالح !
وليس
| Quote: لن يفتقدكـ أحداً علي الاطلاق يا صالح ! |
والفقد واحد !
|
Post: #16
Title: Re:
Author: الشفيع عوض شوشتا
Date: 04-22-2009, 06:14 PM
Parent: #15
غادرتها تلك البلاد وفي طريقي الى المطار , مغنى لا اعرفه يدندن على موجة ال FM (شوقي لو غلبو الصبر) ودمعة خجولة على خدي بمداد حبر صباحي والى الشوارع مددت راسي وهي التى دحرجتني الى جفاف حليب اللحظة .... وعلى مقربة من الشارع المؤدى الى المطار عبارات كتبت بعدة لغات اجنينة تاييداً للسيادة الوطنية ضحكت انا الذي بحثت عن الوطن فوجدته في نوم عميق والسيادة اتمرمطت مرمطة السنين وحامي حمي البلاد اوكما يقال يجلس في قاهرة المعز ومن خلفه خريطة السودان تمام النقصان وحلايب مصرية .. والاطفال الجوعي ابناء الخيبه يتسكون في الطرقات من صباح الرحمن في وطن اشجارها عاطلة عن استقبال الطيور ناهيك عن ابرياء حفظوا النشيد ... والأزقة تعاني وحشة الاستقامة وسطو العاهرات العائدات الى اوكارهن صباحاً.... وياتيني صوت بعمق (جميل انت يا وطن برغم قساوة المحن)
كلنا صالح يا صالح
سلام يا صحبي
|
Post: #17
Title: Re:
Author: doma
Date: 04-23-2009, 00:30 AM
Parent: #16
| Quote: والأزقة تعاني وحشة الاستقامة وسطو العاهرات العائدات الى اوكارهن |
وسطو العاهرون يا صاح فالعائدات الي اوكارهن يهربن من جحيم الي جحيم .
|
Post: #18
Title: Re:
Author: الشفيع عوض شوشتا
Date: 04-23-2009, 04:07 AM
Parent: #17
وسطو العاهرون يا دومه
وسطو العاهرون
وسطو العاهرون
وسطو العاهرون
وسطو العاهرون
وسطو العاهرون
----
كامل التحايا
|
Post: #19
Title: Re:
Author: أبو ساندرا
Date: 04-23-2009, 04:24 AM
Parent: #18
خلاص !
فكيتها فينا
و فكيتو يمشي بينات الشعوب ؟
شكرآ آآ الحبيب
|
Post: #20
Title: Re:
Author: haroon diyab
Date: 04-23-2009, 05:30 AM
Parent: #19
خضر يارائع
صباح الخير
وجمل الله صباحك بكل جميل
فقد صنعت يومي بابداعك في هذا النص .
وانا مثل صالح
مطارات الوداع ضجت قدامك وراكـ
----
يوماتي بتلاقيك مدن
يوماتي راجيك كم مطار
مودتي واحترامي
|
Post: #21
Title: Re:
Author: صالح عبده
Date: 04-23-2009, 06:40 AM
Parent: #20
الخضر
يااخي انت ما شايف ليك زول غيري انا؟؟
اولا كل الكلام القلتوعني دا ما حاصل... لابعرف
دكان ود العوض .. ولا دكان ودالبصير
انا ود الخرطوم.. بشتري حاجاتي من عفراء
وبقرأ الجرايد في القبة الخضراء.
بتعشى في مطعم امواج شارع المطار والعمارات
شارع واحد.ومطعم شهي والكبابجي
وبسهر في الرفيرا والهلتون والقرين فلدج
وقصر الصداقة وكازينو النيل الازرق.
اسحب البوست قبل ما ارفع فيك شكوى.
|
Post: #30
Title: Re:
Author: خضر حسين خليل
Date: 04-24-2009, 06:30 PM
Parent: #21
العزيز صالح عبدة
والله ضحكتني يا (صالح) ومبروك عليك
(المقاضي) بتاعت عفراء وعشوات (أمواج)
تصدق يا صالح حسيت بيك إنك نهائي ما بتعتب
الاماكن التاريخية دي ! والحال من بعضوا
قال ليك يا صالح مرة راكب بكسي من بكاسي سوق ليبيا
من الرميلة المهم في الكوبري الجدير لفت انتباهي
عبارة مكتوبة بخط واضح في القزاز أو (الزجاج) الخلفي
لعربة أمجاد بائسة وزيتها طالع ودخانها ولا مداخن
المصانع المهم الزول دة كاتب بي وراء الاتي نصه :
بكرة بتهون القواسي
ويبقي عندنا كم بكاسي !
فما تشيل أي هم بكرة بعدوا حنتعشي في الريفيرا وفي امواج
وقد نشرب شاي الصباحات في اوزون مافي شئ بعيد
فقط الينصلح الحال ياصالح
الينصلح
|
Post: #28
Title: Re:
Author: خضر حسين خليل
Date: 04-24-2009, 05:49 PM
Parent: #20
هارون العزيز
إزيك ياخ
معليش للتأخير معايش ياهرون والله ليس الا
وليت أيامك كلها جميلة ياهرون
أما قصة الفيافي والمنافي والمطارات الهزائم دي
فربك رب الخير يصلح الاحاويل
عارف مرات بصحي من النوم مخلوع
أسأل نفسي بعدها :
انت قاعد لي شنو هنا من اساسو؟
فقدنا الطمأنينة يا صديق الاحاويل
فقدناها وراحت تماماً كمشية صالح !
خليك قريب ياهرون
|
Post: #27
Title: Re:
Author: خضر حسين خليل
Date: 04-24-2009, 05:19 PM
Parent: #19
Quote: خلاص !
فكيتها فينا
و فكيتو يمشي بينات الشعوب ؟
شكرآ آآ الحبيب |
عزيزي أبو ساندرا
جمعة مباركة يا سيدنا
وأنا حيلتي إيه
قولليلي ياقمر
الزمان !
الزول دة ما فكيتوا أنا يا بركة فكتوا الظروف (والحال الحرن)
تري كم صالح في الطريق صاحبي ؟
|
Post: #23
Title: Re:
Author: خضر حسين خليل
Date: 04-23-2009, 09:37 AM
Parent: #17
الخالة دوماً
مرحباً بمرورك من هنا
كلها هزائم خالتي كلها يا دومة!
|
Post: #22
Title: Re:
Author: خضر حسين خليل
Date: 04-23-2009, 07:52 AM
Parent: #16
Quote: غادرتها تلك البلاد وفي طريقي الى المطار , مغنى لا اعرفه يدندن على موجة ال FM (شوقي لو غلبو الصبر) ودمعة خجولة على خدي بمداد حبر صباحي والى الشوارع مددت راسي وهي التى دحرجتني الى جفاف حليب اللحظة .... وعلى مقربة من الشارع المؤدى الى المطار عبارات كتبت بعدة لغات اجنينة تاييداً للسيادة الوطنية ضحكت انا الذي بحثت عن الوطن فوجدته في نوم عميق والسيادة اتمرمطت مرمطة السنين وحامي حمي البلاد اوكما يقال يجلس في قاهرة المعز ومن خلفه خريطة السودان تمام النقصان وحلايب مصرية .. والاطفال الجوعي ابناء الخيبه يتسكون في الطرقات من صباح الرحمن في وطن اشجارها عاطلة عن استقبال الطيور ناهيك عن ابرياء حفظوا النشيد ... والأزقة تعاني وحشة الاستقامة وسطو العاهرات العائدات الى اوكارهن صباحاً.... وياتيني صوت بعمق (جميل انت يا وطن برغم قساوة المحن)
|
شوش
يا صاحبي كيفنك
فيا الخرطوم إذا نامت عليك هموم !
متذكر الكلام دة يا شوش ! قرأتك بكائيتك العجيبة وآمنت أنو البني آدم من السهل جداً أن يموت بالوحشة
والشوق ! ولا عتاب عليك يا صاحبي تلك مشيئة الرب وضعها هكذا في قلوب سودانييه الماعارفين لي هسي في
شنو وفوق كم البحصل دة كلو أو علي قول ميمي صاحبي عندما كثرت الهزائم سألني ذات ماسنجر :
انت ياخضر نحنا عملنا شنو ؟
والله ان سؤال ميمي كان مدخلي في تناول صالح ؟ وربما استبدلت ميمي بصالح أو صالح بميمي لشيئ في نفسي
لكن الشهادة لله يا شوشتا السودانيين ديل كلهم صالح في الزمن اللئيم الشوم دة .
فيا لعهر من مارسوا فينا كل هذا الهوان يا صاحبي !
والمعزات تغشاك ياشوش
|
Post: #24
Title: Re:
Author: خضر حسين خليل
Date: 04-23-2009, 01:36 PM
Parent: #22
لكنهم يأتون !
|
Post: #25
Title: Re:
Author: خدر
Date: 04-24-2009, 09:16 AM
Parent: #24
الله الله الله
غايتو يا خدركة لا تفوت ولا تموت
انت و الوغد عماد عبدالله علي رأس قائمة كُتابي المفضلين هنا
|
Post: #26
Title: Re:
Author: haroon diyab
Date: 04-24-2009, 09:25 AM
Parent: #25
وجمعة مباركة
لك....
ياصالح اينما كنت
وعديلة عليك محل ماتمشي تمشي
خضر ....
صباحات شوقنا بي خيرن
|
Post: #29
Title: Re:
Author: حنين للبلد
Date: 04-24-2009, 05:56 PM
Parent: #26
تعرف يا خضر الفجيعة وين.....أنه كون صالح مات في بلد من بلدان الله البقينا مشتتين فيها هنا...والموت سنة الحياة...لكن خوفي من صالح يكون مات وزول مااتعرف علي " زي مرحوم السعودية الحنسوا السفارة بالشهور تجي تتعرف علي رحمه الله"...
والبوجع جد ود أمي...انه صالح مات بي شوقه...لي بلده.. ومات بحلم بي يوم بكرة المابيجي...وبي سودان مابرجع هو السودان...ومات بردان...بردان لي حضن اي حضن يدفيه...
والبوجع اكتر ود امي..
احنا ديل..اهل صالح الراجينوا.. ومنتظرنوا...ونتمناه...
خضر....صالح مات..
|
Post: #35
Title: Re:
Author: خضر حسين خليل
Date: 04-27-2009, 05:18 PM
Parent: #29
حنين
يا أنتي يا شبه الملائكة الطيبين
أمثال صالح لايموتون علي الاطلاق يا حنين ! فالموت لا يطالهم بفكرة الموت التقليدية بل هم يبقون
في ذاكرة مواطنيهم ، شوارعهم ، جدران منازلهم، في الاسواق تبقي رائحتهم ، أمثالهم لايعرفون الافول
يتمددون هكذا في لحاء الاشجار تجديهم في وجوه الناس ، عرقهم ، أحلامهم ، أمنياتهم بغد لائق ،
وإن ماتو يا حنين لايموتون !
ياخ شاكر لك حضورك واعذريني للتأخير فالحال من بعضو يا حنين !
|
Post: #34
Title: Re:
Author: خضر حسين خليل
Date: 04-26-2009, 07:22 PM
Parent: #26
هرون يادياب
الشوق الشوق
كالعادة جيتك متأخر يا حبيب لكنك عارف البير وغطاه
جري وحوش ومقابضات وفي الآخر (مافيش فايدة) كما قال سعد !
شاكر لك أنا حضورك الجميل يا صاح
وربك رب الخير يعدل الأحاويل
أما صالح فقد مشاها ياهرون !
مشاها ياصاح مشاها عديل!
|
Post: #31
Title: Re:
Author: خضر حسين خليل
Date: 04-26-2009, 09:00 AM
Parent: #25
الله علي حضورك يا صاحب
نسوي شنو ياخدر؟
والله الواحد بقي متحير في روحوا
ثم انت غطست وين تاني ؟
شوق وسلام ياخدر
|
Post: #32
Title: Re:
Author: الارقم عبدالله طلب
Date: 04-26-2009, 02:34 PM
Parent: #31
اعرف صالح جيدا
واعرف انه لن يقوى ان يعيش فى وطن اخر
لقد ادمن هذه الصحف الفارغة
ادمن الشاى يالزلابية
ادمن هذه الشوارع التى ترتدى النقاب ولا تغتسل من دم الحيض
لذا فهو لن يقوى على الحياة بعيدا عن هنا
وسيعود
سيعود
لانهم راحلون لا محالة
وما بين عودته ورحيلهم
بضع لحظات من الامل والنصر والتشاؤم والهزيمة
لكن فقط ..........
اعلم انه عائد وهم راحلون
اذا لن نرميه بوطن
سنرميه بامال عراض يا خضر ..
ازيك يازول يا جميل
ابقى عافية
|
Post: #33
Title: Re:
Author: Egbal Elmardi
Date: 04-26-2009, 03:28 PM
Parent: #32
صالح حملته خطاه الى مطار ما فى تلك المنافى البعيده
وقد حمل الوطن فى ظهره حقيبه...
لا يستطيع أن يحط رحاله وإن اراد...ولا ينبقى له...
حقيبته عظمت...وتضخمت حتى منعته وللوج الأبواب التى إنفتحت له مرحبه...
منعته النوم...حيث لا مكان لها فى الغرف التى ضاقت عن سعة الحلم...
تقوست ساقاه...من ثقل الحقيبه...
لا يستطيع التنفس إلا حين يفتح الحقيبه...تأتيه رائحة الوطن...فيتفتق محياه زهوراً
وينهمر النشيد...
آه يا وطنى
------------------------
أغفر لى تتطفلى......
إقبال
|
Post: #38
Title: Re:
Author: خضر حسين خليل
Date: 04-29-2009, 05:24 AM
Parent: #33
Quote: صالح حملته خطاه الى مطار ما فى تلك المنافى البعيده
وقد حمل الوطن فى ظهره حقيبه...
لا يستطيع أن يحط رحاله وإن اراد...ولا ينبقى له...
|
ومافي غير تلكع تسافر
وتمشي بينات الشعوب
ماف يا اقبال ، كثيرون هم أؤلئك الذين لطالما حملوا أوطانهم في سوداء العيون
الامر ليس بيدهم يا اقبال ، الامر بيد وطننا الذي يهد في دواخلنا كل ذلك الحنين
والانين وهتون الدمع ، الأمر يا أقبال أننا كسودانيين لا نستطيع علي الاطلاق الغياب
لم نتعود علي ذلك ، يقولون أننا شعب طيب غير أنني أضحك من حالنا فلا علاقة للطيبة
بالأمر علي الاطلاق يقولون أننا شعب مسالم وأضحك أنا يا اقبال فحتي ذلك لم يعد
بيننا ، الي أين نمضي ؟ ما القادم ؟ كيف سيكون حال شعبنا بعد عام ؟
هي تراجيديا الواقع الذي يفاجؤنا كل شمس بغياب جديد وبشئ يفوق التصور .
مودتي يا اقبال وعذري للتأخير
|
Post: #36
Title: Re:
Author: خضر حسين خليل
Date: 04-27-2009, 05:37 PM
Parent: #32
الارقم صاحبي
أينك في هذا الزحام صديقي
وجوه كثيرة هنا وهناك يا أرقم جميعهم يبحثون عما نفتقد !
أنا علي يقين أن صالح سيعود أكثر ألقاً سيواصل فيما بدأه
ذات يوم ، سيمضي بغنائه المر الاليم نواحي التومة ، سيضحك
من حال أيامه في بلاد مشاها بخطاه المثقلة ! لاشئ
يوازي الاوطان يا ارقم لاشئ علي الاطلاق .
|
Post: #37
Title: Re:
Author: Egbal Elmardi
Date: 04-29-2009, 03:38 AM
Parent: #36
خضر إزيك تانى
خابتنى خاطره...زى التقول صالح ده شيوعى مختفى...
إكون ...مش...؟؟
|
Post: #39
Title: Re:
Author: خضر حسين خليل
Date: 05-09-2009, 06:40 PM
Parent: #37
عذراً للتأخير إقبال
عذراً يا عزيزة
Quote: خابتنى خاطره...زى التقول صالح ده شيوعى مختفى...
إكون ...مش...؟؟ |
وهو كذلك يا اقبال وهو كذلك
شكري لعبورك من هنا وخليكي قريبة يا قريبة .
|
Post: #40
Title: Re:
Author: ibrahim kojan
Date: 05-09-2009, 07:46 PM
Parent: #39
ولأن صالح لم يختبئ إلا داخلنا ولم يذهب إلا بعيدا في ذواتنا .. وعندما يظهر..عوووك عندما يأتي يكون حال الحال أصبح محتملا وسخيا تماما
وليس به من موقع ورم ولا كدمة لأثر ضربه ولا خربشه من مخالب (كلب السجم) والرماد وتذكرت هذه اللحظه سيرة صديق مخيف ومستعجل (قالو بيكمل سيجارتو في شفطتين) ولله الحمد.. المهم في سيرة صالح .. تذكرته وأنا أكتب عن بي بي كنج فأوردته لك دون قصد وجاءت سيرتك يا اخ صالح المنعول يبحث عن إنسانيته.. ثم كيف يحدث هذا .. يا خضر..
مازلت مندسيا في جفاك ..
مرات كدا بحس انو انا عندي حضره لانو البوست دا كنت بفتش عليهو من زمن.. وكنت قبلها بيومين مهكر (وصلنا الهكر) والله لكن كتلر خير خدر اتصل بي صاحب الحوش وجابو لي باص وورد جديد لنج وسمح ياخ زي البت البتديك من مشيتا ريحه كدا تدوخك..
المهم مشتاق ليك لامن تقوم الساعه ولنا ان نتذكر صالح في كل صلواتنا وسجودنا عسي ...فقط عسي
الله يجمع
اخوك في الله وكدا!
|
Post: #42
Title: Re:
Author: الوليد محمد الامين
Date: 05-09-2009, 08:21 PM
Parent: #41
ياسلااااااااااام يا خضر
ياخ انت مشيت وين ياخ
ضربت ليك تلفون في النمرة العندي لكن بتجيني رسالة انو لا يمكن تحويل المكالمة ...
والله والله مشتاقين
لو ممكن رسل نمرتك في المسنجر الداخلي او في الهوتميل .
|
Post: #44
Title: Re:
Author: خضر حسين خليل
Date: 05-10-2009, 08:43 AM
Parent: #42
أنا قاعد يا صاحب
قاعد يا الوليد بتفرج في حاصل الحاصل
معليش اخوك فقد التلفون
أهو ضاع ضمن ملايين الحاجات البتضيع كل يوم
شاكر لك حضورك يا صاح
|
Post: #43
Title: ما درتوا نختار يات حياة خلونا نختار يات أجل !
Author: خضر حسين خليل
Date: 05-10-2009, 08:01 AM
Parent: #40
كوجي العزيز
تحياتي الحارة والأشواق صفاً صفاً
أما بعد :
أتعشم يا صديقي في حال جديد سخي كما ذكرت جميل ومفرهد يحتمل صالح وغيره من أولياء الله
الصالحين ، تعبنا يا صاحبي من مضايرة الهزائم والنحيب تعبنا أي والله ياكوجان من حاصل
الحاصل ثم إنني مؤخراً بقيت ما فاهم الحاصل شنو زاتو ؟ أغريب في الديار أنا أم الديار
أضحت غريبة ؟
(ما درتوا نختار
يات حياة
خلونا نختار يات
أجل !)
كربك كرب
والشوق نهرين ووريد !
|
Post: #45
Title: Re: ما درتوا نختار يات حياة خلونا نختار يات أجل !
Author: tayseer alnworani
Date: 05-10-2009, 09:03 AM
Parent: #43
بكرة بتهون القواسي
ويبقي عندنا كم بكاسي !
خضرشوق بحر
لولا هذا الامل لمتنا الف مره
|
Post: #47
Title: Re: ما درتوا نختار يات حياة خلونا نختار يات أجل !
Author: خضر حسين خليل
Date: 05-10-2009, 09:30 AM
Parent: #45
تيسير العزيزة
وينك ياخ مختفية !؟
مشتاقين يعلم الله
فلنحلم صاحبتي فلنحلم يا تيسير موش يمكن ؟
بالله ماتغيبي قدر دة تاني !
|
Post: #46
Title: Re: ما درتوا نختار يات حياة خلونا نختار يات أجل !
Author: Tabaldina
Date: 05-10-2009, 09:07 AM
Parent: #43
..
.
عندما تعتزم الرحيل لابد ان تقرأ الامك
بتأني وعمق وتشعر أنك بحاجة لان تضمد جراحكـ بعيداً
وان تعيد إكتشاف نفسك من جديد..
وترتيب أوراقك و حاجياتكـ واغراضكـ
وحياتكـ المبعثرة ...هنا
فتقرر ان تغادر لتكتشف الوجه الآخر للحياة
وربما الوجه الاخر للانسانية
وذلك حينما تشعر ان بلادك ..وبما وسعت قد ضاقت !!
ووصدركـ وما حوى من حب للتراب واحلام
ليس متاح لها وقت واملا لتتحقق .. قد نضب !!
فتغادر ....
__________
المعاناة والشعور بالهوان
وهذا الطقس .. يجعلان هذا ممكناَ
_ شكراً يا رائع _
|
Post: #48
Title: Re: ما درتوا نختار يات حياة خلونا نختار يات أجل !
Author: خضر حسين خليل
Date: 05-10-2009, 09:37 AM
Parent: #46
العزيز تبلدينا
تحياتي ياعظيم
أذكر مرة إنني قرأت أبياتاً للراحل المقيم مجدي النور علي ما أظن قال فيها :
حلماً تهدهد فيه
إنهد فيك هدمك
قاعد تلتق فيه
طمبور لمن ظلمك
القصيدة دي ما لميت في باقيها قدر ما سعيت ! العايز أقولوا انو القصيدة دي أو
الأبيات أعلاه هي بالضبط حاصل ما حصل ل(صالح) ويحصل لغيره من الصالحين والصالحات
وبشكل يومي ! نزيف غير مبرر ووضع همباتي ، وحياة علي ما أظنني ليست بحياة
غايتو ربك يسهل .
أنا شاكر لك مرورك الوسيم من هنا يا تبدلينا ودمت عزيزي .
|
|