محمد نعيم سعد والجمع بين الممثلتين ..!!

امبارح حضرت برنامج في قناة النيل الأزرق تقريبا إسمو رجال ونساء أو حاجة بالشكل ده من شاكلة اسماء البرامج التقليدية المكررة والمتشابهة في معظم القنوات ..
ومع هذه التقليدية إلا إنو حلقة امبارح اللي شاهدتهادي كانت حلقة مختلفة في نوعية الضيوف وإن كانت مستهلكة وتقليدية في نوعية الاسئلة ..
المميز إنو الحلقة ضمت الاستاذ الممثل والمخرج محمد نعيم سعد وزوجتيه الممثلة رحاب عبد الرحيم (بت خالته) والممثلة سحر ابراهيم إضافة لوجود عازف الفلوت الدكتور كمال وزوجته الأستاذة أروى الربيع ..
الجديد كان في وجود محمد نعيم سعد الممثل في وجود زوجتيه الممثلتين واللي ممكن يكون اكتر من مشاهد تفاجأ بي إنو الإتنين القاعادت ديل زوجاته بحكم تكتم كتيير من الفنانين على حياتهم الخاصة ..
اجمل ما في الحلقة إنو ما كان فيها فنان كما تعودنا في كل حلقات البرامج الحوارية اللي بعد كل سؤالين يحاولوا عنوة إقحام الفنان متعللين بكسر الروتين ومعرفة رأي الفنان في ما قاله الضيوف وقبل ما يقول رايو يقولوا ليهو :
" طيب ياخ ما ترد علي الكلام دي بي لحن هاهاهاهاهاهاها " ..
كلام الضيوف في حلقة الامس ما خلانا محتاجين لكسر اي روتين بل الواحد إتمنى إنو الحوار يكتمل دون تدخل من مقدمة البرنامج اللي كانت دون مستوى الحوار" نجود "..
الجديد والمثير كان في الشجاعة المتناهية في جدية الحوار على غير العادة في مثل هذه البرامج واللي بيحاول فيها الناس يخلوا الموضوع فيهو نوع من الهزل والضحك وما راي الزوجة الاولي في التانية لترد الاولي بضحك وهاهاهاها وتضحك التانية وهي هي هي ..
امبارح شوفت الوش التاني للفنانة الممثلة سحر ابرايهم وهي تتكلم بعيد عن الضحك وعدم الجدية ولمست في ملامح وجهها انسانة تتكلم بصدق وان كانت في بعض الاحيان تميل للنظري من الكلام والغير مطبق في حياتنا العامة ..
رايت الممثلة رحاب زوجة محمد نعيم وهي تتكلم بواقعية وبساطة الزوجة الاولى دون تجمل ..
بعض التناقضات او خلوني اقول بعض الكهارب كانت من خلال ردود متباينة بين الزوجتين ..
سحر بتقول رحاب صحبتي شديييد ونحن اصدقاء قبل ما نكون ضرات وتحاول في الجانب ده رسم صورة في شكل احلام وردية لعلاقة بين زوجتين فنانات لزوج فنان ..
رحاب ما حاولت ابدا تطرق لي النقطة دي ولم تشعرنا اصلا بأن هناك صداقة بين الاتنين بقدر ما حاولت توضيح انها تنظر لي سحر بعين الزوجة التانية الشالت راجلا منها ..
محمد نعيم سعد وبكل صراحة كان ضعيف جداً في تبرير واقناع الحضور بسبب زواجه التاني واكتفى بكلمة وااااحدة اعتبرها انا إنها المراااقة :
" القـــــــــــــــــدر "..
وقال ليهم انا اسة عندي ولد اسمو ابراهيم من سحر يعني لو ما عرست سحر دي ما كان ابراهيم اتولد !!!
اجمل والطف ما في الموضوع لمن سألو محمد نعيم سعد عن عرسو مرتين كمال زوج اروى كان يصر ويلح على المقاطعة ويشيييل وينظر لي محمد نعيم وفي رأيي وانا اعتقد ولو الزواج وانه وحيث ..اها بالله فجأة كده المزيعة سالتو قالت ليهو هو وزوجته اسة انت ممكن تعرس في اروى دي ؟؟؟
زننننننننننننننننننننننننن كمال ده لبد ليهو لبدة اظن تاني ما نضم الا لمن جو يودعو المشاهدين :)
مع ان اروى الربيع تكفلت بالرد وإن تلعثمت بعد ان لخبطت كلمات فقالت " بقيل" بدل " قبيل" وحولت الحاء إلى هاء في كم كلمة :)
اجمل ما في الموضوع هو تعليق والدتي لمن سألوا اروى هل ممكن كمال يعرس فيك ؟
وفي اثناء كلام اروى الكان كتييير أمي قالت :
" يا بتي انضمي ساااااي عااااارفة روحك حليونة وما بيعرسو فيك ..!!"

اجمل ما سمعت في الحلقة كلام الاستاذة سحر عن الراحل مجدي النور وكانت هي المرة الأولى التي اعرف فيها إنو سحر كانت زوجة الراحل المخرج مجدي النور ..
حلقة كانت جديرة بالمشاهدة استمتعت بيها واوصي من فاته ان يستعد للاعادة لو ما كانت الامبارح دي الاعادة ..

والله يوسف السماني ليهو ألف حق وأنا متبرع أشهد معاهو علي بياض!!

دا عنوان شنو التشهيري دا!

اخوي عمر الفاروق
مسكاقمي

Quote: " يا بتي انضمي ساااااي عااااارفة روحك حليونة وما بيعرسو فيك ..!!"

الحاجة أمك دي مرا عظيمة وكلها نظر وبتنصح في ولدا
إياك اقصد واسمعوا يا الناس الجوا التلفزيون

أنا مش قلت ليك ما تكتب بالعربي
وما تتكلم في السياسة

Quote: زننننننننننننننننننننننننن كمال ده لبد ليهو لبدة اظن تاني ما نضم الا لمن جو يودعو المشاهدين :)

Quote: وإن تلعثمت بعد ان لخبطت كلمات فقالت " بقيل " بدل " قبيل" وحولت الحاء إلى هاء في كم كلمة :)

Quote: " يا بتي انضمي ساااااي عااااارفة روحك حليونة وما بيعرسو فيك ..!!"

رحاب عبد الرحيم ما برضها حليونة!

الاخ عمر الفاروق

كثير التحايا

والله فاتتني الحلقة دي ، الغريبة امبارح شفتها ومريت عليها
لكن ما عارفة ما ركزت فيها وجوه نفسي قلت دي شكلها نوع البرامج البتكون كلها ( في الحغيغة والواغع) واللذي واللذين والكلام الغياظ داك مع الحر الشديد

لكن اتمنى تعاد تاني عشان اشوفها

الاخ عمر
شاهدت حلقة الامس
وما عجبنتنى النسخة السودانية للحاج متولى
محمد نعيم
حاول تمرير فكرة نجاح الزواج الثانى وصداقة الضرات فكرة مستحيلة
اعتقد اى امراة فى الواقع ما ممكن تقبل انها تكون
نصف زوجة
المذيعة ضعيفة
محاولة تطبيع الزواج الثانى

فاشلة لانها تناقض الواقع

ايضا حديث اروى الربيع

والتفريق بين الفنان والزول العادى
فكرة متعالية جدا
الفنان الاصيل هو البتحقق فيهو انسانية الزو ل العادى

تاني حاجة .. الأقرب للاستيعاب – و التصديق - أن تكون رحاب هي الزوجة الثانية.

والله يا عمر الفاروق كمال ده يعرس في أروي دي أنا أمشي ألفها معاهو ... جادي والله
عليكـ الله زي أروي دي بعرسو فيها ؟؟؟؟؟؟؟؟؟؟



بعدين البتين ديل صغار على محمد نعيم سعد .. الزول ده عجوز ومن سنة حفرو البحر ..

Quote: " يا بتي انضمي ساااااي عااااارفة روحك حليونة وما بيعرسو فيك ..!!"

إنما أهلك من كان قبلكم الركون لمثل هذا الخدر.

سامي الخصال:

Quote: دا عنوان شنو التشهيري دا!

والله بس كايس ليك سبب تقشر بي تشهيري دي ..
ياخ تعرف من يوم ما خليتني اركب المواصلات وانت عندك عربية وانا جاييك زيارة في بيتكم وانا قلبي ابااااك:)
في تشهير يا اخوانا اكتتتر من كده ؟

عمنا حمزاوي:
سياسة وييين ياخ انا زول اقتصاد سااااااااااااااااااي:)

سحس يا ملاسي:

Quote: إنما أهلك من كان قبلكم الركون لمثل هذا الخدر.

:D:D:D:D:D:D:D:D:D:D:D

Quote: تاني حاجة .. الأقرب للاستيعاب – و التصديق - أن تكون رحاب هي الزوجة الثانية

لو ما Nooooooooooooo القالتا بي الانجليزي دي كنت دعمتك يا حسين ..
ولو ما محاولتها اقناع الناس بي انها تدرس وهي الان في السنة الثالثة بررررضو كنت دعمتك ..

Quote: الفنان الاصيل هو البتحقق فيهو انسانية الزو ل العادى

كلام مليان يا محمد سيد احمد

لك التحية أخي عمر الفاروق

Quote: ياخ تعرف من يوم ما خليتني اركب المواصلات وانت عندك عربية وانا جاييك زيارة في بيتكم وانا قلبي ابااااك:) في تشهير يا اخوانا اكتتتر من كده ؟

Please try to forget this car.

الاخ محمد سيد احمد :
شكرا للمداخلة ..
محمد نعيم سعد حاول جاهداً إقناع المشاهد إنو استطاع التوفيق بين الممثلتين وفي بعض الاحيان حاول الزوغان باضافة تعاليق مضحكة اما لتلطيف الاجواء واما للهروب من زنقة متوقعة ..
صراحة موضوع ضعف اداء مقدمي البرامج من النساء خصوصا في قناة النيل الازرق شي مؤسف ..
بدءا بي سوركتي سابقا مرورا بي هيام و تسابيح وووووو ..
سلمى السيد ربما تكون هو وريثة الراحلة ليلى المغربي ..

Quote: Please try to forget this car.

والله مع ملك دي زولنا ده بيكون Forget المريخ زااااااااااااااااتو ..
:)

ابو الخلد :

Quote: بعدين البتين ديل صغار على محمد نعيم سعد .. الزول ده عجوز ومن سنة حفرو البحر ..

ما عارف ليي لكن بالجد انا كنت متخييل محمد نعيم ده متزوج مشلخة !!!
تخريمة :
غايتو لبدت دكتور الكمال الامبارح دي ماااااااا حبابا :) ..تحياتي للدكتور كمال ولأورى الربيع الناس الحلوين ورايقين وربنا يديم البيناتهم

محمد نعيم سعد
فنان جميل ومجتهد وصاحب انتاج وآفر
لكن اظن مكانه الاخراج وليس التمثيل


وبطل حساده يا عمر الفاروق . ان شاء الله يعرس التالته ذاتا :D

اخونا نوفل:
انا بحب محمد نعيم سعد جداً جدا جدا ..

Quote: لكن اظن مكانه الاخراج وليس التمثيل

اختلف معاك تماااااااااما في الحتة دي فالاخراج افقدنا ممثل من الطراز الاول ..
محمد نعيم سعد احححححسن سوداني بيعرف يمثل لانو اصلا اصلا هو ما قاعد يمثل ..
بيديك ليها طبيعييييية ..
تحياتي للزول العملاق محمد نعيم سعد الرجل الفنان