|
|
|
 Re: كيتاً فيك يا الزوووول زاااتو والجماعة ليهم يوم ... (Re: HAIDER ALZAIN)
|
كتب لي احد اصدقائي قبل فترة :
منذ قرون سبعة
هبت سبع حمامات
من واد سحيق تحلق إلى قمة الجبل وقد كساها الثلج الناصع
وقال رجل من الرجال السبعة الذين كانوا يشاهدونها وهى تطير
إنى أرى بقعة سوداء على جناح الحمامة السابعة
واليوم فى ذلك الوادى يروى الناس
خبر حمامات سبع سود قد طارت إلى قمة الجبل التى كساها الثلج
| |
 
|
|
|
|
|
|
|
|
Re: كيتاً فيك يا الزوووول زاااتو والجماعة ليهم يوم ... (Re: HAIDER ALZAIN)
|
حبيبنا حيدر ،
ياخي دي شكرا بتاعتك على الاقل البوست بتاعي لفت الانظار للمسئولين وقاموا مشكورين سريعا بارجاع الباسورد بتاعك
بعدين انا ما من العرب العاربة عشان امشي مع امثالهم انا من العرب المستعربة قالوا النار تلد الرماد لووول يكه بي مناسبة النار دي انشاء الله تكون عملت ليك نار تسخن ليها كباية شاي عشان الواحد يقدر يزوركم مش عربكم العاربة النار بتاعتهم مابتنطفي
اكون شاكرا ومنون للدراسة بتاعتك على الاقل الواحد يشوف عيوبو وين ويصلحها والحاجات الكويسة فيهو يمشي عليها ويكتر منها طبعا الحاجات الكويسة دي غير مشتملة على عمل بوستات لفاقدي الهوية والناس المابتستاهل لووول يكه
عودا حميدا انشاء الله في فترة الاستراحة دي تكون اخدت نفس طويل ومليت البندقية بتاعتك زخيرة كافية واشتغل فيهو طق طق طق طق
تحياتي
زاتوووو
| |
|
|
|
|
|
|
|
|
|
Re: كيتاً فيك يا الزوووول زاااتو والجماعة ليهم يوم ... (Re: ALZOLZATOO)
|
يازاااتو يا حبيب
صباحك ابيض زي التلج الحا اكسروا ليك هنا دا ...
بعدين مالك خالط الكيمان افرز العرب العاربة ديل براهم والدراسة عن الاساطير
وشغل الهلوكوست براها .. لوووول
انا هنا حبيت بس اشكرك علي بوست الاعلنت فيهو انك غير متضامن معاي لكن بتطالب لي بالعودة
يعني باختصار مافي نيران صديقة هنا في محبة بس ونار مولعة اربعة وعشرين ساعة ومعاها آلة كابتشينو كمان
شفت كيف .. انت اصل بس
فالعيوب بتكون لناس العوووك عوك الحقنا يا ريس الزول دا قال لينا وقال لينا
والزول قصدنا وشكلهم عاوزين يبدونا في افران الغاز
وعييك سيك ميك يقوم يجي الاخو يقول لا كدة ما يجئ ديل عنصر حياة ووجودهم ضروري
وسحقاً للملتاسين من امثالي انا ..
اقوم يا فردة الملم اطرافي واقول خلاص نحن بنكتب كما هو العهد بصورة اشمل
وياريت اصحابنا الساميين عشان ما تكون هناك معاداة ليهم يقدروا يقولوا كلمة طيبة .. ماطيبة الخواض هههه
المهم يا ملك تحياتي ومودتي وما يفوتك الكابتشينو !!!
| |
|
|
|
|
|
|
|
|
|
Re: كيتاً فيك يا الزوووول زاااتو والجماعة ليهم يوم ... (Re: ALZOLZATOO)
|
هلا حبيبنا ذااااتو
ياخ لغة العرب دي غريبة خلاص وحمالة اوجه كمان عشان كدة اهم حاجة تفهم المواقف
مش بيقولوا ليك عشان تفهم التفسير في القرآن يفترض تعرف سبب النزول .. بس بعدين ما تعرج وانت نازل ..لوول
المهم ..
وقت نرجع للغة حمالة الاوجه دي بنلقي برضو في مواقف بتكون حمالة اوجه برضو
يعني الليلة تقيف موقف وباكر موقف مختلف مع انه الاحداث متشابهة واحد ومفروض يكون موقفك واحد
لكن لاعتبارات خاصة تغير وقفتك وبدل ما تتجه شرق تلقي نفسك شمال ..
بقول كدة وفي راسي موقف البعض من الحريات ( وانا اولهم ) كنت بتكلم عن الحرية واتاحتها للبعض
لكن فجاة تلقي نفسك في موقف لا تحسد عليه وتنجبر كراعك فوق رقبتك تغير الموقف دا ليه لانه
بعض المتعلقات والمرفقات ماعندها علاقة بالحق والحقيقة مجرد استهلاك للشعارات والجمل المحفوظة ..
وبغض النظر عن الحق والحقيقة بتلقي بعض النحيب والعويل باسم الظلم والبكا بيخلي قلبك يرق ويرهف شويتين
وتتغاضي عن بعض التجاوزات هنا وهناك بس من اجل انه الباكي يكفكف دمعته شوية .. ودي سياسة يهودية
متبعة بنجاح من وقت ما فتشوا ليهم قطعة واطة ووقت غلبتهم لانها ما حقهم مشوا يبكوا زمن سايكس بيكو
وقالوا هتلر وما ادراك ما هتلر حرقنا وقطعنا ورغم عدم احقيتهم فيها برضوا ادوهم الواطة دي ..
المواقف هنا اتشابهت لي في بعض الجماعات القعدت برضوا تروج لمفهوم انها مقصودة وحقوقها منتهكة
وعاوزة تروج لهولوكوست آخر فكري بامنبر العام دا ..
غايتو طول بالك معاي وكبر قلبك انا سلمت الميزانية وفاضي اليومين ديل .. ههههه
| |
|
|
|
|
|
|
|
|
|
Re: كيتاً فيك يا الزوووول زاااتو والجماعة ليهم يوم ... (Re: HAIDER ALZAIN)
|
تقوم اسطورة الهولوكوست الديني الحديثة علي الراي :
* انه هناك عداء بالمنبر للاسلام والاسلاميين
* انه العلمانيين والكفار ومن شابههم يمارسون عنف لفظي واغتيال شخصية للمتحدثين باسم الدين
* ان صاحب المنبر يقف موقف المتفرج كما وقفت الدول الاوربية سلبية امام هتلر وهو يحرق اليهود
* ان جميع الاعضاء يقفون ايضاص موقفا سلبيا
* ان المتحدثين باسم الله هنا مظاليم ومساكين والغنماية تاكل عشاهم
* انهم ( اي المتحدثين باسم الدين ) ابعد ما يكونون عن الاساءات والتجريح وهم اصحاب خلق رفيع
* هؤلاء النفر اتوا ليخرجوا الناس من غياب الظلمات لذا وجب نصرتهم
وبعد ذلك يحملون ما يخدعون الناس به انفاً ويولولون به في كل كبيرة وصغيرة ليس لسبب سوي محاولة خلق
اسطورة جديدة وان من يمسهم انما يعادي الاسلام حتي ولو سبوا هم وشتموا واساءوا فهو جهاد في سبيل الله
| |
|
|
|
|
|
|
|
|
|
Re: كيتاً فيك يا الزوووول زاااتو والجماعة ليهم يوم ... (Re: HAIDER ALZAIN)
|
حبيبنا حيدر
نعم المواقف بتتغير يعني مرة يودوها ابو جنزير ومرة قرب استاد الخرطوم ومرة ميدان جاكسون اها انت لو ماشي امدرمان لازم كمان موقفك يتغير عشان تمشي امدرمان لازم تمشي للبصات ما ح تقيف في ابو جنزير وتقول انا موقفي ده اصلو انا مابغيرو والباصات تمشي من ميدان جاكسون بي شارع الغابة وانت بي جاي واطاتك تصبح .
وقالوا الرجال مواقف والمواقف تصنع الرجال يعني الوقفة زاته ليها اثرها يعني اسع ناخدك مثال كده
البشوف الوقفة يقول بكره العيد لووول يكه .
لو سالتني عن موقفي انا بالمناسبة انا مابغير موقفي حتى لو ركبت تاكسي لووول يكه
انا في نظري الدميقراطية عندنا عبارة عن كمية اصوات بغض النظر عن كيفية الحصول عليها اها الاصواتو كتيرة
يجي يحكم ويطبق في خلق الله ماشاء له من التطبيق مثنى وثلاث ورباع
عشان كده ياحبيبنا الحشاش يملا شبكتو مش الشغلانة ديمقراطية وكده وراي وراي اخر اسحمل يطلعوك كافر او منافق لازم تستحمل طالما انت اخترت موقف الجريف شرق والجريف شرق عندها باصين تلاته بصات وده موقفكم ودي باصاتكم
تستحملوا شوية ياكمان ترحلو الصحافة وسط بي شرق تركبو وبي زلط تركبو لووووووووووووووول يكه
تحياتي
زاتووووو
| |
|
|
|
|
|
|
|
|
|
Re: كيتاً فيك يا الزوووول زاااتو والجماعة ليهم يوم ... (Re: ALZOLZATOO)
|
باقي الحكي
خليني اتكلم ليك عن الدميقراطية في السودان من وجهة نظري
اول حاجة انا ماحصل طبقت التجربة الديمقراطية في السودان في الفترة الاخيرة لانو مابيحق لي التصويت لانو الزمن داك كنت في المتوسط .
لكن مع صغر سننا كنا شديدي الملاحظة وكنا عن قرب من حملات الانتخابات اذ ان دار الحزب الاتحادي الديمقراطي كان بالقرب من بيتنا وكل الحملات الانتخابية كانت تنطلق من ذلك الدار .
انا شخصيا في اعتباري ان الديمقراطية الاخيرة تم الاستعجال عليها من قبل الحكومة الانتقالية وكانت هذه العجلة الطامة الكبرى للديمقراطية فيما بعد .
لو جينا من ناحية الممارسة الدميقراطية مثلا نجد ان بعض افراد الاحزاب كانت ممارستهم هي اقصاء الطرف الاخر ليس عن طريق صندوق الانتخاب ولكن من خلال الحملة الانتخابية كأن يقوم بعض الاشخاص بتمزيق كل الملصقات والاقمشة الدعائية للحزب المنافس . وبعضهم قام بتضليل بعض الناخبين وهذا الحكي من نفسه كان قال لنا شخص من حزب ما انه خدع بكس كامل مليان انصار كبار السن وقال لهم حزب الامة رمز الشجرة ورمز حزب الامة كان هو القطية والشجرة هي للاتحادي الديمقراطي قال هذا بمل فمه واكد انهم عندما ذهبوا للتصويت صوتوا لي رمز الشجرة .
دي اذا افترضنا مثلا انها ممارسات فردية نجيك للمارسات الحزبية الكبيرة ودي كانت سبب البلاوي كلها
في دائرة الصحافة كان المرشح الاقوى هو حسن الترابي اها قامت جميع الاحزاب بالتصويت لمرشح الحزب الاتحادي الديمقراطي على ما اعتقد المحامي شبو وفاز شبو وسقط الترابي بي مؤامرة .
نفس الحال على ما اعتقد كان في دائرة الديم والعمارات وفاز نقد وسقط على عثمان على ما اعتقد .
في اعتقادي كانت هذه العملية نقطة التحول الديمقراطي في السودان وبعد سقوط اقوي المرشحين في الجبهة الاسلامية القومية وخروجهم من البرلمان تفتكر ح يستكتوا ويتكرر المشهد كل اربعة سنوات بالاتفاق ويتم اقصاءهم بهذه الطريقة . لا اعتقد ذلك وماحصل في انقلاب 89 ماهو الا حصاد مازرعته الاحزاب من سؤ ادارة للانتخابات الاولى والاخيرة فيما بعد .
انا بعتقد انو لو لم يتم التحالف ضد الجبهة القومية لكان الوضع اختلف ونفترض انو فاز جميع ممثلي حزب الجبهة اكيد من خلال قيادتهم للبلاد الناس ح تعرف مدي صلاحيتهم من عدمها خلال الفترة بتاعتهم .
اذا كانت سيئة لن يتم انتخابهم في الاعوام المقبلة . بعدين الشئ الغريب انو معظم دوائر الخريجين كانت من نصيب الجبهة الاسلامية القومية ودي طبعا الطبقة المستنيرة .
الان ياحبيبنا حيدر الحكومة قاعده في الحكم 20 سنة يعني الولدوهو سنة 89 ح يصوت في الانتخابات وطبعا اجهزة الاعلام كلها ملك الدولة تفتكر لو حصلت انتخابات تاني هل حزب الجبهة سيكون لقمة ساهلة ابدا على العكس .
عشان كده موضوع الانتخابات والديمقراطية في السودان كلام جرايد زي مابيقولوا يعني ماتفتكر ح تتطبق فيهو ديمقراطية 100% انت تكون في الشغل ح يجوا جماعة يسوقوا ناس بيتكم بي حافلة ويمشوا يصوتوا ليهم لوول .
لو جينا للديمقراطية ذاته هل تفتكر انو ديمقراطية السودان ح تكون نفس بتاعة امريكا
من وجهة نظري انا لا انقر لي شنو لانو الحرية الشخصية بتاعة امريكا بتختلف عن الحرية بتاعة السودان يعني واحد في امريكا عايز يمشي عريان ولابس شرابات بس اها ده لو جه في السودان ح يقولوا مجنون ويسوقوهو مصحى الامراض النفسية .
كمان في السودان ماممكن يسمحو للشواذ جنسيا الزواج ويطلعوا ليهم قسيمة زواج من المحكمة اها دي ممكن تكون في وجهة نظرك ديمقراطية لكن في السودان ممكن تكون قلة ادب وممكن تروح شمار في مرقة لو ناديت بيها .
عشان كده ياحبيبنا طرح الراي عندنا بيعتمد على اقصاء الخصم يعني مثلا يجي واحد يقول لي شيخ الطقي يا وهابي
اها بديهيا كده شيخ الطقي يجي يقول ليهو ياملحد ده شئ طبيعي لكن لو جاء قال ليهو الاخ شيخ الطقي بعد التحية والاحترام شيخ الطقي ح يقول ليهو شنو اكيد ما ح يقول ليهو ياملحد ولكل فعل رد فعل مضاد له في الاتجاه والسرعة تعتمد على نوع العربية وشارع الزلط
بجيك تاني لو حبيت
زاتوووو
| |
|
|
|
|
|
|
|
|
|
Re: كيتاً فيك يا الزوووول زاااتو والجماعة ليهم يوم ... (Re: حيدر حسن ميرغني)
|
استاذنا حيدر ( حنين )
التحايا والمودة لك ..
لا والله بكري الليلة كان اكرم من الكرم
اتلحس الباسوورد فما حوجني لاكتر من نص ساعة ومعاهن زي سبعة ايملات كدة .. لووول
لكن بنحاول تاني نحافظ علي العدة
رغم القناعة انه ما بنصل مرحلة الزول زااااتو ( دي خبرة سبعة* سنين )
مودتي وشاكر لك
* انت يا الزول زاااتو اخر شئ وصلت لشنو سبع والا سبعة ...
| |
|
|
|
|
|
|
|
|
|
Re: كيتاً فيك يا الزوووول زاااتو والجماعة ليهم يوم ... (Re: HAIDER ALZAIN)
|
انا لاقيك وين يا زووووول ..
حكيك جميل
ووقت نقارن بين امريكا والسودان في الممارسات الديمقراطية ما ننسي برضو ابان الحملة الامريكية
للرئاسة الدش وكسير العضام القاعد يحصل هناك في بلد العم سام ..
بيصلوا لدرجة تصوير دعايات عديييل تعرض في الشاشات للتقليل من شأن المنتخب المنافس ..
غايتو انا في السودان وتجربته يمكن اكون دفعتك عديل
بذكر استاذنا في المتوسطة اسمه خدر العدار وبعد الاجازة من اولي لتانية فتحت المدسة واحد من الطلبة
اتاخر كان في الخرطوم وصادفت تشكيلات وزارية وتغير حكومة مرة بتاعت ائتلاف ومرة اختلاف ومرة وحدة
مع الاتحاديين ومرة مع الاحزاب المستقلة وجوووطة شديدة وكل يوم يغيروا وزير
اها يوم اخونا وصل المدرسة تاني يوم الحكومة سقطت وغيروها بوزراء تانيين
الاستاذ قال ليهو والله ما عندك حظ تجي هسع من جنب البرلمان كان لقيت ليك وزارة لو صبرت .. لوووول
تصدق نحن اقتنعنا انه اي زول ممكن يكون وزير بس يكون حظك قوي وتمشي في وقت بتاع تغييرات وزارية .. ههه
فيا حبيب تجربتنا الديمقراطية مهزوزة في السودان ناس بيقولوا ليك ما وجدت الزمن الكافي وقام
الظلاميين ديل استولوا عليها وتانيين بيقولوا لا الشعب نفسه ما عنده الحس الديمقراطي
وزول تالت يقول ليك في العالم الثالث لا تصلح الا الانظمة الشمولية والديكتاتوريين ..
وانا بقول ليك البيخرب الحكومات الديمقراطية ويلحقها امات طه في السودان ياهم امثال الطقي وتلامذته دا
وكمان ضيف عليها ناس سيدي وسيدك الوقت الناس غرقانة وما لاقية التاكلها البرلمان والاذاعة
كلها شغالة تعويضات آل المهدي
وتعويضات آل الميرغني
ودرء اثار مايو
في حين البيوت مكسرة والحيط واقعة للناس ومافي تعويض .. بح
والفيضانات والموية مالية الشوارع دون محاولة لدرء اثار الفيضان ..
الديمقراطية لو عاوزنها تطبق مظبوط وقول بنسبة 80% بس ولا 100%
يلزمنا اول حاجة محاربة الطائفية الما بتعشعش الا في الجهل
ومحاربة العقليات الاقصائية اللي لو ما فازت حا تجي بعد سنتين بس تنط ليك بدبابة ..
محبتي ،،،
| |
|
|
|
|
|
|
| |
HAIDER ALZAIN
ALZOLZATOO
حيدر حسن ميرغني
فيس بوك
تويتر
انستقرام
يوتيوب
بنتيريست