كوابيس نهارية

وافق صديقي الأمريكي ( جيسي) على مساعدتي اخيرا، و بدأ في التدرب على أداء الدور الذي رسمته له بصورة يومية، بدأنا بشراء الثياب التنكرية من سوق الملابس المستعملة في ( ألن تاون رود)، بذلة سوداء لعل صاحبها كان سفيرا ، أو قسيس او استاذ جامعي، و حذاء ( بوسطونيان ) على مقاسه او اوسع قليلا، ربطة عنق و حمالات بنطال كلاسيكية، موشاة برسومات قوطية، و من دكان الرهائن، اشترينا بطاقة رسمية من الجلد الأسود، تتوسطها قطعة من النحاس المحفور على هيئة صقر و شعار فيدرالي عنيد، كانت مزيفة ، و لكنها كافية للوفاء بالغرض.

( جيسي) صديقي، رجل ابيض في منتصف العمر، مديد شديد، تقاطيعه مطمئنة، تدل على نزاهة و مكر في آن معا، يعمل في تنظيف حدائق البيوت ، و المداخن و عديد من أعمال الصيانة، تنتشر على أفق شعره الأسود اسلاك فضية رفيعة ناعمة، طيب يعشق البيرة ولعبة ( البولينغ) في الأمسيات، مطلق، يسكن لوحده، تزوره ابنته الوحيدة في عطلة الجامعة في الصيف، سعيد بحريته، ولكنه لا يخفي اشفاقه على حال اصدقائه و خاصة المتزوجين منهم، دائما ما يتدخل لفض النزاعات، يصلح الشقاق حتى وان لم يطلب منه أحد التدخل، بيد انني طلبت منه ذلك، و عرضت عليه مشكلتي و خطتي الجهنمية لعلاجها، فقبل مساعدتي بعد تردد لم يطل قائلا ( وت ذي هيل).

في الصباح الباكر، ارتدى ( جيسي) بذلته السواء، و حذاءه الجديد العتيق، وضع نظاراته الشمسية بأحكام، صفف شعره، و استأجر سيارة ( تاون كار) سوداء، و عطف في طريقه على المدرسة التي تعمل فيها زوجتي، كنت قد غذيته بما يحتاجه من معلومات، راجعنا كل التفاصيل بدقة و حذر في الليلة التي سبقت نهار المؤامرة، تحسبا للمفاجآت، فبدا كل شيء على ما يرام.

في مكتب الأستقبال، التقت به زوجتي بعد سماعها اسمها يتردد في ابهاء المبنى عبر الميكرفونات، أتت في عجل كعادتها، تدق الأرض بخطواتها دقا، لتجد السيد ( جيسي) في انتظارها متنكرا، سالته في لهفة أن كان الأمر يتعلق بأحد ابنائها، فأجاب محركا راسه بالنفي و هو يمد يده بالمصافحة، طلب منها أن تصحبه الى الخارج، و هنالك اتكأ بظهره على ( التاون كار) السوداء، فاكتسب سواد بذلته بعدا رسميا جديدا، سألته عني دون أن يبدو عليها الأنزعاج هذه المرة، و اضافت ( كنت متوقعاكم تسجنو من زمان)، و لكنه خيب ظنها هذه المرة ايضا، ثم ابتدرها قائلا ( السيدة ( اميرة) ، اعرفك بنفسي اولا، اسمي ( روبرت ماكلوفلين)، صفتي رئيس مكتب العلاقات الأسرية بوكالة المخابرات الأمريكية – سي-آى-أيه، و قد تتعجبين لمجيئي لمقابلتك في مكان عملك، و لكن لن يطول عجبك اذا أخبرتك بأن زوجك عميل لدينا بالوكالة، منذ سبعة عشر عاما، هي عمر زواجكما على ما اظن، اتسعت عينا ( اميرة) بالدهشة، و همهمت بكلام مختلط ، ذكرت الكلب و الجحيم و اشياء اخرى و امي، و هنا اعترضها ( مستر ماكلوفلين) قائلا (أنا سعيد جدا بأنه لم يطلعك على طبيعة عمله الحقيقي، و قد يساعدك أعترافي هذا على ايجاد تفسير لكثير من تصرفاته المريبة) ، تنفست ( اميرة) الصعداء وهي في موقف عدم التصديق، اختلجت مشاعرها فلم تقو على أخفاء حيرتها، بينما واصل ( جيسي) حديثه مكتسبا ثقة لا حدود لها، مواصلا في كذبه دون وازع ( زوجك يا سيدتي، مسؤلنا الأول في مناطق قرن و يلملم و جحفة و عرق، و نيسابور)، وأضاف ( و الآن نعد الى سبب زيارتي) ، قاطعته بقولها ( هل هو بخير)، ( هو بخير) أجابها ( و لعله الآن في هاواى في زيارة سريعة لقضاء مهمة عاجلة، و قد يعود في المساء و يحدثك بأنه كان مع صديقه كمال طيفور، لأداء واجبات عزاء في ريستون، نحن في الوكالة نهتم بصحة عملاءنا النفسية و الجسدية، نراقبهم و نراقب الناس اللصيقين بهم ، و أفراد اسرتهم، و نركز على سلوك زوجاتهم بالتحديد) شهقت زوجتي من الرعب ، و هاجمتها الكوابيس النهارية، و همت بالأعتراف بما لا يجوز ذكره، و الأعتذار، اغرى فزعها ( جيسي) بالخروج عن النص و فتح ثغرة لتلقي الشمار،و لكنه عاد الى النص الأصلي موصدا الباب في وجه فضوله العنيد، عاد الى حديثه عاقدا ما بين حاجبيه ( و قد صبرنا كثيرا على صنوف العذاب و النقة غير المبررة التي يتعرض اليها عميلنا الجليل على يديك، كل يوم من ايام الأسبوع، صباحا و عشية، و شهدنا في صبر و تأثر، كيف اثرت هذه النقة المتصلة على ادائه المتميز، مما اضر ضررا فادحا بمصالح البلاد العليا و سلامة المواطنين، و لم يعد الوضع يحتمل السكوت عليه، فأجبرنا تحت ضغط ( ابو كبير)، و بعد مشاهدة افلام ثلاثين كاميرا منصوبة في منزلكم، و سبعين جهازا لألتقاط الأصوات و تسجيلها، اتضح لنا انه لا مفر من التعامل معك باعتبارك عدوا للشعب من الدرجة الأولى، و قد انزعجنا في الوكالة من محاولاتك المتعددة لأغتيال هذا الرجل، مرة بصب الصبغة في شاى الصباح، و مد سلك الكهربا ( العريان) في حوض استحمامه، و قد قمنا بأفشال كل هذه المحاولات كما ترين، بأعلامه قبل أن يقع الفاس في الراس، وقد تجدين جوابا على تساؤلاتك عمن افشل هذه الخطط، و الكف عن القاء اللوم على اخته و اولياء الله الصالحين في بلاده).

شهقت اميرة مرة أخرى و هزت رأسها تعجبا و استسلاما ( كان بأمكاننا الزج بك في السجن، او ايداعك بين أسوار غوانتانامو، حتى تتعلمي معني الحياة الزوجية الحقة، و بالمناسبة فأن الحسان اللاتي يحادثهن زوجك بأستمرار، لسن سوى طاقم واكسسوار، مثلما يحدث في افلام بوند، كل ذلك حتى نموه على الأعداء بتبيانه في مظهر الرجل السفيه ، غير المسئول، لا اكثر ولا اقل) و هنا قاطعته اميرة( حتى بسينة؟؟)، فأجابابها في ثقة ( بسينة زاتا).

و في ختام لقاءه و قبل أن ينصرف، حذرها من مغبة أن يعلم اى أحد عن ذلك اللقاء ووقائعه ، لما في ذلك من عواقب وخيمة، علينا و على اطفالنا، و على امن و سلامة الوطن.

عدت كعادتي مساء ذلك اليوم، فتلقاني صبيتي عند الباب صائحين ( جبتا الحاجات..جبتا الحاجات؟؟)، أحتضنتهم في فرح مخابراتي حازم، و أومأت لزوجتي بالتحية المقتضبة، كانت ترغي على الهاتف، مع اختها حسب ظني، حيث انها قامت بقطع المكالمة دون وداع، و أظنني رأيتها و هي تمسح السقف و الأركان بعينيها بحثا عن أجهزة الترصد دون جدوى، حيتني في رقة طال عهدي بسماعها، سالتني في رفق بلاستيكي شفاف ( اتأخرت كده مالك الليلة؟؟ ضربت ليك ما رديت!!)، لم اتوان عن أجابتها بما اتفقت عليه مع ( جيسي) (مشيت مع ناس كمال طيفور لبيت بكا في ريستون)، بدت بيارق النصر في عينيها، و ابتسامة مبتسرة ، طنطنت ( بى ياتو خطوط؟؟ الفرنسية؟؟ ) ثم بالصوت العالي (مشيتو بي شنو)، تظاهرت بعدم سماعي للطنطنة، و اجبت ( بالمترو)، و لم تكن تعلم أن المترو لا يمر بريستون.

عادت ايام العسل، و سنوات التشيز كيك، تغيرت لغة زوجتي الى لغة العشق الأولى، و اتخذت موقعها في طابية ( انا راجلي ما برضى فيهو و لا كلمة)، و توافقا مع فكرة عملي فقد اصبح كل سائقي التاكسي من الشرق الأوسط مجرد ارهابيين، و تحول زعيق الصباح حول فراشي الى همس رقيق ( امشو برة يا اولاد ابوكم نائم تعبان يا حليلو، انتو ما عارفين حاجة ساكت)، ثم قبلة على خدي، و في نصف اغماضتي ، رأيتها و هي تتأملني في وله و أعجاب، فكأنما وجهي لم يعد مثل (البونية) كما كانت تطلق عليه في الأسابيع الماضية ( انا ما اخترتك ساكت ، من زمان عارفاك ما هين...هسة لكن يقشرو بيك كيف؟؟).

توالت الأيام، و قضت زوجتي كثيرا من مشاويرها دون أن تدفع اجرا لسائقي التاكسي من فقراء البنغال و الأفغان، و صارت كلما تحدثت الى صديقاتها، تختم حديثها بجملة (عندنا ناس ما تخافي، مش القرين ده بنحرك ليك الكيس، يجيبو ليك في خشم بابك)، و لكنها رغما عن تحذيرات ( جيسي) بتحري السرية، فأنها لم تكف لحظة عن تعليق الطعم في وجهي ( و الله مرات كده، انت بتكون غامض خلاص، ده العاجبني فيك بالمناسبة)، أو (البلد دي الزول ما يضمن يكونوا مركبين ليهومكرفون في الحمام، الخوف كاميرا في اوضة النوم، ياب شرا).

و في شهور قليلات، اتسعت دائرة الأحترام، فشملت كثيرا من الأسر و أفراد الجالية، ما حللت بتجمع أو منشط عام، الا و انحسر( فوليوم) اللغط حتى قارب الصفر، الا و رافقتني نظرات الحسان حتى مقعدي، سعدت بتحلق القوم حولي بنظراتهم الواجفة، و تذكير بعضهم لى ( يا حليل الدويم و ايام الدويم)، بالرغم من انني لست من الدويم.

و اتى صباح ايقظتني فيه زوجتي من النوم في عجلة، و قالت و رنة الفخر تعلو صوتها، بأن جماعة من ناشطي المناطق المنكوبة ببلادنا يودون مقابلتي، قمت على ( مهلي و اقل من مهلي)، قابلتهم في صالون البيت، فبادر زعيمهم بالأعتذار (و الله نحنا البيت كان ما بيتنا ما بنجيك توش كدة)، طمأنته بهزة من راسي ، فمضى يقول ( جايينك نوضح ليك حاجة، نحنا و الله والله والله ، القروش حقت الأغاثة دي بنرسلا اول بأول، شوف، الشفافية دي نحنا لو كانت ملاح ما بناكل غيرها، ما تشوف البيوت الأشتريناها دي ، و الله كلها من قروش الديليفري)، و في ختام الأجتماع قال رئيسهم ( و الله نحنا ما سمعنا من الزول الأسمو حسين ده، لكن عارفين بوضعك ده من زمان، فياخي شوف لينا جماعتك ديل يسهلو لينا ورق الكونتينرات ديل).

و في مساء ذلك اليوم، اتصل بى السيد ( هاشم الحسن) قائلا (يا خي القاش ده جنن اهلنا، شوف جماعتك ديل يمسحوهو ولا ينقلو نا س غرب القاش ديل لجبيت) ، أما عبد المنعم الجزولي اللدود، فقد توقف عن مغالطتي المزمنة، و بلغني عنه انه قال( هو قطع شك في المخابرات، مافي ا تنين تلاتة، صاحبي و بعرفو، جندوه قدامي في الحلفاية من زمان، لكن ما تسمعو كلام انو عب كبير و بتاع، مشغلنو صبي طباخ، و في احتمال ينقلوهو يلملم).

تماديت في العسل و غوايته، حتى صدقت نفسي، ازدادت ثقتي بنفسي و أنا اشهد زوجتي تتحدث بالصوت العالي و كأنها قد اهتدت الى مواقع الكاميرات الوهمية، فتصيح بافادتها ( اها قصرنا معاهو في شي؟؟ )، يعقب ذلك سقوطها جثة هامدة على السرير و سرعان ما يملأ صوت غطيطها المكان.

و أتى اليوم الذي لم تقدر فيه مفاصل صبرها على الصمود، فصارحتني بقولها ( عارف..انت وكت اصلك بتصل لغاية يلملم..ما تغشى بالمرة عمي عوض الكريم في ابها و تجيب لى دهب من هناك)

فأسقط في يدي.

Quote: و قد صبرنا كثيرا على صنوف العذاب و النقة غير المبررة التي يتعرض اليها عميلنا الجليل على يديك

غير المبرره؟ اسي احنا خاتين عليكم؟ شوف الافكار الشيطانيه دي عليك الله

اقعد ادي الناس دي في افكار كده، لمن تلقي ناس السي اي ايه جوك جد جد

لسبب ما اتذكرت فيلم True Lies
the action comedy film directed by James Cameron
esp. the bit where A. Schwarzenegger (true agent posing as the USA enemy)
asks Jamie Lee Curtis (his wife, who was bored of her wits being a house wife)
to Strip-tease for him in the name of serving the USA

I truly enjoyed the vivid imagination






-----
هاشم يا سيليبرتي! قاش شنو ليك كان بتعرف ليك عميل في السي اي ايه lol

الاجراام رجل !!!

Quote: الاجراام رجل !!!

punishment is ( Naswana) ya Rihan salam

Quote: الاجراام رجل !!!

Punishment is a female

((هاشم يا سيليبرتي! قاش شنو ليك كان بتعرف ليك عميل في السي اي ايه lol))
لولين يا رحاب، هو ياخ كان ما عميل كانت الفيروسات من أمس مانعاني عن التداخل...
لكن بيني بينك صاحبنا دا ما داير يمرق النصيحة، و شايفو بمرر في حلبسات استخبارية مكشوفة،
أنا ما جبتا سيرة غرب القاش و لا سيرة شرقو، كل الموضوع اتصلت بيه عشان أكلمو
إنو ياخي رسلت ليك نسخة من السيرة الذاتية للعلم فقط لأنو الإفادة بـ(العمالة)
جاتنا من جهات عليا و كدا.. قام طوالي حنبك و زعل مني!
ما شايفاهو كيف بقول عني (السيد) و عن منعم الجزولي (اللدود)...
و تيييب؟


يمين يا جانكوف أحلامك (الفرارية) تجاوزت عطارد ذاتو.
بس وين يا ملك... كان ليك...:)

Quote: هاشم يا سيليبرتي! قاش شنو ليك كان بتعرف ليك عميل في السي اي ايه lol

Ya 7lail Moniem

:)

مبالغة لكن...


الله يديك العافية

بالله منعم بتاع تبخيس؟

تهئ تهئ تهئ تهئ

يلملم دي في القرآن في

وتاني

تهئ تهئ تهئ تهئ

Quote: بالمناسبة فأن الحسان اللاتي يحادثهن زوجك بأستمرار، لسن سوى طاقم واكسسوار، مثلما يحدث في افلام بوند، كل ذلك حتى نموه على الأعداء بتبيانه في مظهر الرجل السفيه ، غير المسئول، لا اكثر ولا اقل) و هنا قاطعته اميرة( حتى بسينة؟؟)، فأجابابها في ثقة ( بسينة زاتا).

خُطة مُحكمة و مُتقنة...
كُررررر عليكِ يا أميرة!

لو لقيت لي صاحب زي جيسي تاني عوجة تب ما بتجيني

كان في لزوم يعنى..
اهو خم وصر..

بدل واحده ح يتلملمن عليك ..
بعداك لا ينفعك جسي ولا ملاسي..

حقيقة لله أنا زاتي لما الحكي وصل الحته ديك فصلت..
قبال صاحبك يفصل بحثا عن شمار..

إمتاع ما حصل.

هو القاش دا من الليلي?
ياخوي هاشم دا كايسلو سبه ساكت.

معليش التعديل لإضافة السطرين الأخيرين

Quote: كان بأمكاننا الزج بك في السجن، او ايداعك بين أسوار غوانتانامو، حتى تتعلمي معني الحياة الزوجية الحقة،

دي ابداع
بس ما عارفين يزجو منو ذاتو اميرة ولا الراوي...

سلامات يا ملك.

Down Down colonization

All this travel you never bought a ticket from red sea

Kamal just call he is so ubsett

so please your next secret trip you need to get your ticket from red sea

we will keep the secret

Galal

Quote: من زمان عارفاك ما هين...هسة لكن يقشرو بيك كيف؟؟).

يا بي الدس

يا بي الفرنسية




-----------------------------------

كعبة الانّدراوة

Quote: ( جبتا الحاجات..جبتا الحاجات؟؟)،

أشهد للصبية انك جبت الحاجات كلها ياتاجو
ياخ يديك العافية
وربنا يريحك دنيا وآخرة
ولو ما فيها ثقالة سلفني جيسي دة شوية يا ملك !

مودتي ياصاح

Quote: (يا خي القاش ده جنن اهلنا، شوف جماعتك ديل يمسحوهو ولا ينقلو نا س غرب القاش ديل لجبيت)

بس عليك الله ركز لى معا جماعتك على الحته دى.
وياريت كمان لو حولو لينا جبال توتيل على غرب القاش عشان نستمتع بالغروب وكده.

مودتى

مباريين إبداعاتك بي مختلف الحيشان
نظام سلبطة وكده

أسامة الكاشف
انا ما خليتك بهناك!!!
مرحب بيك في اى زمان ومكان
الملك

Saif salamat

Quote: All this travel you never bought a ticket from red sea Kamal just call he is so ubsett so please your next secret trip you need to get your ticket from red sea we will keep the secret

discount???

Quote: كعبة الانّدراوة

method to the madness ya Ibrahim

Quote: ولو ما فيها ثقالة سلفني جيسي دة شوية يا ملك !

Jessie fil sijin ya khidir

Quote: بس عليك الله ركز لى معا جماعتك على الحته دى. وياريت كمان لو حولو لينا جبال توتيل على غرب القاش عشان نستمتع بالغروب وكده.

I told the to do that

Quote: بس ما عارفين يزجو منو ذاتو اميرة ولا الراوي...

دكتورة نجاة
البزجوهم ديل ناس الأغاثة و منعم الجزولي ههههه

Mallasi
There is a Jessie for everyboy



M Ali Almalik
khammi o sarri
started @ the new years eve
salamat
Elmelik

يا ممكونة
اطلالاتك على قلتها جميلة
كرر على اميرة ولا أنا الراجياني سفرة لأبها؟؟
تحياتي

Quote: تهئ تهئ تهئ تهئ

Quote: وتاني

salam ya Mohammed Yousif

Quote: تهئ تهئ تهئ تهئ

Quote: وتاني

salam ya Mohammed Yousif

الصديقة الودودة ايمان أحمد
لك الشكر على المرور و الأبتسام




دكتورة نجاة
صاحبك ده ( بخسو) تتطاقش
تحياتنا لك و للأسرة

الملك

ود الملك ..
يا خى نحنا ناس حسام و لا نادر و لا ابوشام بيدونا فرصة

Quote: فتح ثغرة لتلقي الشمار،و لكنه عاد الى النص الأصلي موصدا الباب في وجه فضوله العنيد،

بعدين ما صحى ياخى وكت انت بتصل يلملم دى .. ما تغشى أبها ..

تحت النص
__________________________
والله ياخى كلنا دايرين نمشى "يلملم" دى!

up 4 wesal nasir

Quote: هنا قاطعته اميرة( حتى بسينة؟؟)، فأجابابها في ثقة ( بسينة زاتا).

لوووووووووووووووول والله لقيتيها يا بسينة


يا حليل ايام الدويم...والله يا تاج بتبالغ .. أقول ليك..لاتعليق غير انك مبدع[/ مبدعB] مبدع

Quote: يا حليل ايام الدويم.

maskakil ya 7anin grrrrrr

Quote: يا خى نحنا ناس حسام و لا نادر و لا ابوشام بيدونا فرصة

يا اسعد يا ريفي
اخبارهم شنو البني كجة ديل
و الله مشتاق ليهم شديد بلغهم تحاياي بالأنابة
نجيكم في صنعا زاتا لو دايرين قايلني خايف
تحياتي للأسرة و عقاب اهلنا من الجزيرة مساوي
لغاية الكنيسة
الملك

Quote: ( امشو برة يا اولاد ابوكم نائم تعبان يا حليلو، انتو ما عارفين حاجة ساكت)

طلعنا كلنا ما عارفين حاجة ساكت
الاستاذ عميل ختاراي عديييييييل
حركة زي دي الس اي ايه زاتا ما بتكون عملتها

Quote: طلعنا كلنا ما عارفين حاجة ساكت الاستاذ عميل ختاراي عديييييييل حركة زي دي الس اي ايه زاتا ما بتكون عملتها

I7im
salam ya Muzan

Quote: ( عارف..انت وكت اصلك بتصل لغاية يلملم..ما تغشى بالمرة عمي عوض الكريم في ابها و تجيب لى دهب من هناك)

اهاااااا
هنا بس....
عملتة شنو؟


الله يمرقك...من دي..




الدهب...الدهب..
الا تنادي..جيسي..و يكلم المـــــــــدام
ويقنعها بانه الدهب..
ارهابي..
ومشترك..مع القاعدة..
ههههههههههههه
تسلم...يا فنان..
و كعادتك...
روعة..

Quote: الله يمرقك...من دي..

Ameeeen ya Hawari

هذا يضم لدفتر ابداع المهجر بجدارة ومن ناحية أخرى تعبير عن الحب عن طريق مسك الاذن القريبة باليد البعيدة.لكن ألم تترك ثغرة لصديقك جيسي هذا كي يبتز بها أميرة باعتباره BOSS زوجها؟
لا تذهب بالخيال بعيداً في نوع الابتزاز أيها الكاتب الشيق فالمراة السودانية ( شديدة ولضيضة)؛ لكن ربما يفرغ الابتزاز الذي أعنيه محفظتها أولاً ثم جيبك.

شكرا استاذ بشرى الفاضل
الثغرات متعمدة في كل القصة و اولها ان القصة برمتها فيكشنال ولا شنو؟؟
يا رجل المراة السودانية ( شدتا و لضتا) مع الغلبانين ( امسالنا) ‘ لكن اول ما تجيب ليها سيرة الخواجة
( على الأقل هنا في امريكا)‘ قنابيرا بتقيف‘ اختيار جيسي القوقازي لترسيخ الكذبة اشتغل ‘ اهم عنصر هو
عنصر الأبتزاز في هذه الحكوة‘ و اشتطاط الخيال يقابله شوق عظيم الى السلام في العلاقات الزوجية‘ و الفكرة
الأساسية هي ( ما الذي سيحدث لو؟؟) ‘ تدفع الفكرة حالة من الياس و الأحباط‘ و البقية املاء شيطاني قمنا بتسجيله بحذافيره‘ و صاحبي الذي تخيرته
من نوع العامل القنوع الذي سيكتفي بست علب باردة هدية لينفذ ما تطلبه دون الخروج عن الحدود الأخلاقية
للمهمة‘ يسمونه هنا ( البروفشنال)‘ تمنيت من قلبي ان تنطلي الفكرة على ( اميرة)‘ وقد كان‘ و لكنني كنت اتشوق الى اعترافاتها في لحظة الخلعة
التي اصابتها‘ القصة دي زاتا ما كانت طلعت‘ الا من وراء اسوار( ابوزعبل)‘ حمانا الله و اياكمو
لك شكري و تقديري
الملك

ممتع جداً

تعرف !!
الابداع دا كائن عوير خالص في رائي
أسالني قول لي كيف ؟؟
طيب سألتني (او ح اعتبرك سألت )
وح اقوم اجاوب عليك (دون ان التفت يمين او يسار ولا ورا ولا قدام كمان
وماني خايف من حد طالما ان الابداع (مسجون)
و مسجون دي (هي دي العوارة زاتها القاصدها انا )
وعوارته وعلاقتها بالسجن يا ملك بتلقاها
في ان الابداع باطلاقه (وفي الغالب) بتلقاهو يقوم يجمع ويكوم نفسة في زول زيك كدا
مليان بابداعاته (ويلا بيسجن نفسه فيك ) لانه الزيك بيكون مهموم بلوحة في لحظة وبنوته موسيقيه في لحظة اخرى
ويهتم اكثر بتركيب ايقاع عامل كيف كيف في زمن اشتر عشان يرتبو للزينا ويريح بيهو قفاهم وبقصة زي دي برضو
وحاجات تانيه كتير بالحيل يصعب حصرتها لكنها مصبوبة في نفس القالب (وقع ليك مش؟؟)
ويلا الزيك دا لانه ماسك بيديه مكونات وادوات كل التفاصيل الفاتت دي ولانه الزمن دايما بيكون معاة اضيق
من حذائة الجديد ،، بيقوم يطلع لينامن انتاجة شويه شويه واقل من نقط القطارة-بتاعة العين (شفت كيف ؟؟) لحدي مايجي يوم نلقى الزول (مبدعنا) كتلتوا (بدعايه سغمبروتيه كده اتعارضت ليهو في حلقو)
وفي اللحظة ديك (لحظة الموت) يقوم عمك الابداع يلملم باقي حاجاتو وادواتو ويتخارج هاربا من الموت
ولان الابداع كائن مميز جدا وحساسية جسده عاليه جدا وما بيقدر يتعايش مع الاجواء المكشوفة -خاصة المعتمة بغبرتها-
بيقوم يشوف ليهو اقرب زول وينحشر فيهو وبكرة صاحبنا الانحشر فيهو الابداع دا يصير (مبتدع) شوفتا عوارته (ما بيقع ساي
,, وقعة خوف ) مسكين والله ...


ويلا عليك الله انت حاول تساعدنا شويه وتفرغ لينا مابك من (بدايع) خاصة وانك من القلايل الذين يعرفون جيدا
كيف يضعوا افكارهم في قوالب مستساغة ويسهل هضمها (دا طبعا راي خاص والما عاجبو كلامي يضرب راسه في كورة
ماشة في اتجاه القون لتطلع في الاوت -اذا كان بيلعب في خانة المهاجم)

السر الملك
شكرا لهذي التخمة التي غادرت الامعاء وسكنت في منتصف الارجل واقعدت حركتنا ..
(اتقي الله فينا فينا عندنا عيال دايرين اللكل ,, خلينا النقوم نشوف شغلتنا)

ياخ اقول ليك شئ انسى مسالة العيال مشكلتهم بتنحل.(بنشوف كرسي متحرك ولا مصيبة زمان نتحرك بيها)
وبالله عليك افرغ لنا ما بك من (بدع ) لتساهم بها في تطهير صدر هذا المنبر.
اخرجها يا ملك حتى لا تقتلك (بداعية)نجدهافي اخر الوقت ملصتقة في جدار حلقك ويصعب علينا تفسيرها.

قول خير عليك ديييييييييييينك ،فقط لتضييق مساحة العوارة الابداعية او المبتدعه القاعده هنا وهناك وفي اي حتة
وحينها تأكد انك ستصاب بدعوات طيبات.
وبث ..

Quote: وحينها تأكد انك ستصاب بدعوات طيبات.

اخي فيصل عباس
تجدني عاجز عن الرد على هذي المشاعر المتدفقة
أخجلت تواضعي و البستني رداء مسؤلية أخاف ان يتسع قليلا
علىقامتي
لكن صالح الدعا ما بناباه
تحياتي لك و للأسرة
تاج السر الملك

حبيب نورة السعيد
قعدتك دي هي الممتعة
تحياتي