Post: #1
Title: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-18-2009, 06:47 AM
الموضوع دا عاوز ليهو قعده كدا وانا اليوم قاعد ليكم وعشان أفيدكم والحاضر يكلم الغائب
أوقفوا تحويلاتكم عبر البنوك في الفتره دي فهناك سوق عاد من جديد
سوق التحويلات عن طريق الأشخاص
لحدي أمس سعر الريال السعودي ما يقارب 650 جنيه بالقديم
والدولار رغم أنو ما متأكد لكن هو أكتر من 2600 جنيه بالقديم
في حين سعر البنك يا شباب للريال 612 بالقديم !! وأعلاها الفرنسي 624 جنيه بالقديم
وعادت السوق من جديد للظهور
ونسبة لصعوبة الخراج الجاي بدم الحجامه ..
ها انا أبلغكم بترك التحويل عن طريق البنوك يا أبناء الغربه
الحاله هناك صعبة وفي حوجه لكل جنيه
والحله هنا أصعب وفي حوجه لتوفير آي حاجه ممكن تتوفر
فارقوا تحويل البنوك - بطلوا كسل
عـمـولتي عاوزها ما شكر ---- عاوزها كاش داون !!
هشام
|
Post: #2
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: سيف النصر محي الدين محمد أحمد
Date: 04-18-2009, 07:12 AM
Parent: #1
ليه ما في صور يا هشام؟..على الأقل خت صورة خمسماية ريال.
اعتقد أن للموضوع تعقيدات عديدة :اولها أن هذا النشاط هو نشاط غير قانوني و مؤخرا حسبما قرأت في
الصحف فقد تمت مداهمة بعض الناس و وجهت لهم تهمة مزاولة اعمال بنكية بدون ترخيص و هم كانوا من
الاجانب الذين يعملون في مجال التحويلات.
و هنا ايضا يفتون بحرمة هذا النوع من التعامل لإذ أن بيع النقد بنقد يحتم أن يتم التقابض في
نفس المجلس..و هذ الرأي يعقد الأمر زيادة (يبقى عليهم مخالفة قوانين و حرام كمان).
انا شخصيا كنت ارتاح لهذه الطريقة و افضلها على البنك الى أن قرر الشخص الذي كنت اتعامل معه
لايقاف نشاطه لأنه حسب كلامه لم يعد مربحا.
|
Post: #3
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-18-2009, 07:36 AM
Parent: #1
ما تستهينوا بي كلامي دا - سمح ؟
وبلغوا كل من تعرفوا يا حبايب نا
هشام
|
Post: #4
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-18-2009, 07:47 AM
Parent: #3
Quote: بيع النقد بنقد يحتم أن يتم التقابض في
نفس المجلس..و هذ الرأي يعقد الأمر زيادة (يبقى عليهم مخالفة قوانين و حرام كمان).
|
يعني بي كلامك دا يا سيف النصر يا خوي البحول قروش بي البنك يمشي يستلمها كاش
من كاونتر البنك ويسلمها لي المستفيد منها ! ويجي راجع ..
على العموم مع تقديري لي مشاركتك البدون عمولة لي دي !!
منتظرين
هشام
|
Post: #5
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-18-2009, 08:51 AM
Parent: #4
إتصل على واحد أخونا في وقال لي حول 10000 ريال سعودي في حساب 640 جنيه بالقديم
يعني فرق من البنك كتير
العشره الف دي بي سعر البنك 6166000 بالقديم
وبي سعر السوق التاني دا بي 6400000 بالجنيه القديم
الفرق يساوي 234 الف جنيه بالقديم
يعني الفرق بقى تقريباً 365 ريال سعودي
شوفوا الفرق كيف يا شباب
أنتو ريالكم دا ساهل والا شنو ؟
يعني القروش البطلعوها دي بالــســاهل والا بي دم الحـجـامــــه ؟؟
تعالوا جاي بي عمولاتكم !!!
هشام
|
Post: #7
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-18-2009, 08:58 AM
Parent: #5
وكان في واحد عاوز يحول قروش عشان يشتري ليهو قطعه أرض
مثلاً بي 120 مليون في الحاج يوسف
مفروض يحول بي السوق دا 187500 ريال سعودي
ولو بي الـبـنـك مفروض يحول 194805 ريال سعودي
الفرق بساوي 7305 ريال
وبالسوداني قريب 4 مليون ونص : خليها تبقى حق السماسره بس
والا حق تصديق الخــرطــه - وبي الأسمنت 8 ونص طن أسمنت !!! أحسبها ليكم بي الطوب ؟؟؟
والا حق الحكومه في التسجــــيل
يعني بتساعـــدكم يا شباب ما كعبه مش كدا ؟
دا بلاغي للـــــــــــــناس
وبالمثال الحـــــــــــي
هشام
|
Post: #6
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: elfadl abdellatif
Date: 04-18-2009, 08:53 AM
Parent: #4
الاخ هشام
تحياتي وتقديري
هل هذا يعني عودة السوق السوداء الى (الاضواء) مرة اخرى?
ان كان الامر كذلك فالاحرى عدم التعامل معها لانها سوق كيزان وحرام كما افاد الاخ سيف .. وبعدين ياخي نحن يهمنا المكاسب الوطنية ولا الواحد يعمل ليهو 1000 جنيه زيادة يكسبها من بيع الدولار للتجار عشان يجو يخلصوها منو 10 الف .. دعوتي هي محاربة هذه السوق .. لانو المتضرر منها المستهلك وليس التاجر
|
Post: #8
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: محمد عمر الفكي
Date: 04-18-2009, 09:14 AM
Parent: #6
بلاغ الي السيد بكري ابوبكر
توجد في هذا البوست عمولات ولم ينل منها المنبر نصيباً نرجو مراجعة السيد هشام واستخلاص عمولة المنبر نقداً والا تم سحب الباسويرد.
هشام
عليك الله ممغصني مالك؟ كنت تخليني في "ريالي" القديم حولت ب 618 وقايل رقبتي خميت العالم اتاريني انا المخموم.
|
Post: #9
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: سيف النصر محي الدين محمد أحمد
Date: 04-18-2009, 09:38 AM
Parent: #8
Quote: يعني بي كلامك دا يا سيف النصر يا خوي البحول قروش بي البنك يمشي يستلمها كاش
من كاونتر البنك ويسلمها لي المستفيد منها ! ويجي راجع |
ما ظبطت معاك يا هشام..التحويل من حساب لحساب يقوم مقام المجلس أو هكذا قالوا.
شوف هنا:
Quote: الحمد لله والصلاة والسلام على رسول الله وعلى آله وصحبه أما بعد:
فلا حرج في بيع وشراء العملات إذا انضبطت أمور بيعها بالضوابط الشرعية، ومنها أن يتم التقابض في المجلس بما يتراضيان عليه، أوما يقوم مقام المجلس من انتقال العملة من حساب البائع إلى حساب المشتري وانتقال العملة الأخرى من حساب المشتري إلى حساب البائع ثم إن عملة كل بلد في نفسها تعتبر صنفاً لا يجوز المفاضلة فيه، فلا تأخذ مائة منها ولو كانت من فئة مرغوب فيها بمائة وعشر مثلاً ، لأن العملات من الأصناف الربوية فهي قائمة مقام النقدين الذهب والفضة ، لأنها أصبحت ثمنا لكل مثمن وقيمة لكل مقوم ، وقد قال صلى الله عليه وسلم: "لا تبيعوا الذهب بالذهب إلا مثلاً بمثل، ولا تشفوا بعضها على بعض، ولا تبيعوا الورق بالورق إلا مثلا بمثل ولا تشفوا بعضها على بعض ولا تبيعوا غائباً منها بناجز"…متفق عليه.
فإذا بيعت ريالات بدولارات أو جنيهات بدنانير... أوغيرها، فيشترط التقابض في المجلس ولا تجوز النسيئة فيها. فعن أبي المنهال قال: باع شريك لي ورقاً بنسيئة إلى الموسم أو الحج فجاء إلي فأخبرني فقلت: هذا أمر لا يصح، قال: قد بعته في السوق فلم ينكر علي أحد. فأتيت البراء بن عازب فسألته فقال قدم النبي صلى الله عليه وسلم المدينة ونحن نبيع هذا البيع فقال: " ما كان يداً بيد فلا بأس به، وما كان نسيئة فهو رباً". متفق عليه واللفظ لمسلم. كما أن التفاضل (الزيادة) يمنع كذلك في الجنس الواحد ويجوز بين جنسين مختلفين، لقوله صلى الله عليه وسلم: "الذهب بالذهب، والفضة بالفضة، والبر بالبر، والشعير بالشعير، والتمر بالتمر، والملح بالملح مثلاً بمثل، سواء بسواء،يدا بيد، فإذا اختلفت هذه الأصناف، فبيعوا كيف شئتم إذا كان يداً بيد" رواه مسلم من حديث عبادة بن الصامت. والله أعلم. |
|
Post: #10
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-18-2009, 09:41 AM
Parent: #8
| Quote: عليك الله ممغصني مالك؟ كنت تخليني في "ريالي" القديم حولت ب 618 وقايل رقبتي خميت العالم اتاريني انا المخموم. |
يا عمر يا اخوي
أنا الخلاني أكتب البوست دا ما عشان المساكين الزييك ديل ما يتمغصوا
ويضيعوا قروش هم اولى بها
على العموم لتفادي الجايات يا حبيب
شكراً لدعمك البوست - وبرضو البوست دا عشان بكري ذاتو ما يدقس !!!
باقي بكري بيتو ما تم لسه !! وكان تم عليهو ديون لي اولاد أختو الدينو !
هشام
|
Post: #11
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-18-2009, 10:04 AM
Parent: #6
الفاضل
رغم انو في كتاباتي تجدني متحاشي كتابة ( السوق الأسود ) دي
لكن دا سوق بتفرضـو سياسات الدوله الخاطـئة بـراها
والناس البره دي دمـها محروق حريق في قـروشها دي !
والناس ما قاعد يجيهم من الحـكـومه الا الســـياسات الغـلط !
وأها السوق جانا جاري جري - ( الأسود)
وبعدين القروش دي لمن يلموها التجار الكبار في بلد الغربه يلحقوها!
عشان يفكوا بيها البضاعه الواقفه في - الصين واليابان وما شابه ذلك
أبقى عافية
هشام
|
Post: #12
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-19-2009, 04:41 AM
Parent: #11
أمبارح بي النهار المنبر دا جاب ليهو دقسه والا انا غلطان ؟
الحكايه شنو - يبدو الهكر متواصل معانا في المنبر دا لسه والا كان في حاجه تانيه ؟
على العموم نصيحه مني آي واحد فينا يعميل ليهو مرجع - لمن تجيهو حاجه كدا على غير العاده يرجع لي مرجعو عشان يتأكد أنو الحاله العندو دي !!!
برضو أكيد أكيد حا أواصـــل !!!
هشام
|
Post: #13
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-19-2009, 08:50 AM
Parent: #12
البوست دا قلت يجي فيهو
صديق الموج ناطي - وجاري معاهو أبو حراز ( جـــرحــى الغربه والرياض ديل ...)
وحجر بتاع مــكـــه
ومكاوي بتاع البحرين
وهارون بتاع قطــــر
وكم مان كدا من أمريكا وأستراليا
وناس جده برضو يجو هنا
لكن يبدو فعلاً الغربه ما فيها حاجه خلاص - حفلتها إنتهت زي ما قال لي واحد قريبنا ( الحفلة إنتهت )
وبرضو حكاية المغتربين يشتروا في العشوائي دي !!! ما غريبه
يعني مغترب ليهو طاشر سنه وتلقاهو عندو قطعه في أمبده والا مكان جايي فيو كبري والا طريق والا تخطيط !!
والواحد تحويل أهلوا دا ما بفوت ليهو 1000 ريال يحولها بي الماوس والا في الصندوق البارد داك ( الصراف الآلي ) !
حليل زمن المغترب كان بحول !!
وكان بشيل معاهو كاش !!
هسه المغترب وعائلتو لمن ينزلوا السودان -
قبل سنه بكون بجهز في الشنه وهي ما فايته دلاقين بي 700 ريال هدايا -
ودلاقينو هو ما تساوي 200 ريال بي البشكير الملون ومعجون السيجنال !
وأتفه موبايل شايلو هو بين الناس .
على العموم برضو حا نواصل رغم دحرجة البوست لي مكان سحيق في قادمات الليالي
بدل نقول فوق نكتب حاجه - مش أحسن ؟
هشام
|
Post: #14
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-19-2009, 08:55 AM
Parent: #13
أحسن ليكم تجوا هنا والا بفضحكم فضيحة السنين كلكم !!
أنتو صحي المرتب بتاع المغترب بقى ما بكفيهوا - لحدي يوم عشره ؟؟؟
رايكم شنو في الفضـيحــه دي ؟
هشام
|
Post: #15
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-19-2009, 09:10 AM
Parent: #14
دا كوم والبطاقات حقت الحرام ديك كوم براهو
واحدين عاملين حُرفاء واولاد مفتحين وبتاعين فهم عالي
الواحد قبل كم سنه كدا خش ليك في بطاقات - ماستر كارد وفيزا كارد
ويشيل ويشخت في المواقع - بنده - العثيم - والمحلات بتاعت البيع بي البلوه دي
ويجر في العربات - ملانه أكياس - كلها غير صالحه للإستهلاك الآدمي - مثال - التفاح من سوريا ولبنان ومن محل ما قطعو يرشوا فيهو بي الكيماويات لحدي ما يصل خشمو !! والموز البجي أخضر ونديان دا - وعلى كدا أوزنو !!
وعن الجداد واللحم الميت حدث ولا حرج
الدجاج يجيك من البرازيل والأرجنتين ومن تايلاند !! دا دجاج والا مردونا ،،
والعصائر الما معروف شجرها وين ! بودره في شوالات ويضيفوا ليها سكر !
دا كوم وأكل التيك أوي دا - دا بعملوا بي زيت كان كشحو في الواطه دي ما ينزل ! شيء عجيب !
كلوا دا وبعدين يجي الواحد يقول ليك - سكرى وضغط وسرطان جاء من وين ؟
والله الحاله تحنن البعيد - وتجنن العايش فيها
ـــــــــــــــــــ
أصابعي وجعتني بجيكم أكيد راجع
هشام
|
Post: #16
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-19-2009, 09:13 AM
Parent: #15
وسمع أصاني !!
واحدين سوا ليهم حساب في البقاله ،، زي البنغال ونوته !!
دي الغُربه ؟؟ با أخوانا ما ترفعوا غادي والا شنو ؟؟
بس باقي بتاع اللين البجي بي الحمار والتُمـن داك !
هشام
|
Post: #17
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-19-2009, 09:18 AM
Parent: #16
نسوي شنو؟
قاعدين مجبورين ؟
مكنه مركبها كل مغترب !
هشام
|
Post: #18
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: محمد عمر الفكي
Date: 04-19-2009, 09:32 AM
Parent: #14
هشام
مالك شغال معانا بنظرية المديدة حرقتني؟ اكان المرتب ما بكفينا لحدي يوم 10 لكن برضه احسن منك، على الاقل ضاربين الهمبريب وبالنا مرتاح وانت تلقاك سخانتك الف هسي.
الناس ديل اصبر لهم شوية هسي بتلقاهم قاعدين يتشاكلوا انت مستعجل على التحويل مالك وانت لشنو ما كلمتني وواحدين تلقاهم يعضعضوا في ايديهم زي كدا
|
Post: #19
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-19-2009, 09:44 AM
Parent: #18
| Quote: الناس ديل اصبر لهم شوية هسي بتلقاهم قاعدين يتشاكلوا انت مستعجل على التحويل مالك وانت لشنو ما كلمتني وواحدين تلقاهم يعضعضوا في ايديهم زي كدا |
حكايه جـد حزينه ! وتمغص الواحد !
الريال دا بقى يطلع بي دم الحجامه !
وفي روايه - زي الشعره من شنب الأسد !
وكمان جابت ليها ( ازمه عالـمـيه ) شماعة تسـريح المغتربين !!
يعني نصيحه كدا خليكم خفيفين - وما تغرررقوا شديد !
الله يستر !
هشام
|
Post: #20
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: elfadl abdellatif
Date: 04-19-2009, 10:18 AM
Parent: #19
Quote:
لكن دا سوق بتفرضـو سياسات الدوله الخاطـئة بـراها
والناس البره دي دمـها محروق حريق في قـروشها دي !
والناس ما قاعد يجيهم من الحـكـومه الا الســـياسات الغـلط !
وأها السوق جانا جاري جري - ( الأسود)
وبعدين القروش دي لمن يلموها التجار الكبار في بلد الغربه يلحقوها!
عشان يفكوا بيها البضاعه الواقفه في - الصين واليابان وما شابه ذلك
|
سألت عن الاسباب قالو انو بسبب الحصار الاقتصادي حدد بنك السودان سقفا للتعامل النقدي بالعملات الاجنبية .. مما سبب ازمة سيولة وجعل التجار يلجأون الى تلك السوق الخفية
على كل حال نحن امام احد موقفين اما ان نحارب تلك السوق لانها كما ذكرت تضر بالاقتصاد الوطني كما تساهم في ارتفاع اسعار السلع ..
وبعدين التجار ديل قاعدين يستوردو شنو عشان نحن نقيف معاهم غرف نوم ايطالية وحاجات بتاعت رفاهية بينما الحكومة تستعمل العملات الاجنبية لاستيراد ما يحتاجه المواطن .. دة طبعا باعتبارها حكومة وطنية وليست حكومة تجار .. تصور انو العملة الصعبة المتوفرة كلها تنفق على مخصصات و سفريات ما ليها اي لازمة ..
واللصوص يكافئون او على الاقل لا يحاسبون بل ان المسئولين عنهم يبررون سرقاتهم التي تتجاوز ملايين الدولارات بانها حفنات .. وعبد الرحيم حمدي يقول على المليارات المنهوبة من البنوك انها مبالغ تافهة
عشان كدة نصيحتي نصبر على ما اصابنا ان ذلك من عزم الامور وننتظر لحدي ما العملة الصينية اليوان تبقى عملة احتياط ونهيص .. وكما يقول الرسول (ص) ادي الامانة لمن ائتمنك ولا تخن من خانك .. فاذا كانت الحكومة فاسدة فليس ذلك مبررا لفساد المواطن .. ونحن ناس نؤمن بالله واليوم الاخر والقضاء والقدر وبالحساب وبعدين ما حيقبلو منا اعذار بانو انا والله ماكان عندي حل تاني وتبريرات غير مقنعة حتى في المحاكم بتاعتنا ناهيك عن المحكمة الاعلى
|
Post: #21
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-19-2009, 12:13 PM
Parent: #20
ما قصرت تب يا الفاضل
بس يا أخوي الناس تحول بعدين نصبر
وش حاري التحويل
هشام
|
Post: #22
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: كمال ادريس
Date: 04-19-2009, 12:45 PM
Parent: #20
هشام شكرا على البوست المفيد
|
Post: #23
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-21-2009, 05:16 AM
Parent: #22
شكراً لي مرورك يا كمال إدريس
أنت عارف أخونا ديل حكايتهم حكايه !
هسه البوست دا كان عنوانو مفروض يكون -
التحويلات الخارجيه - لي الأهل !! وناديه عثمان ،،،
كان العلماء يجوك طايرين من كل بقاع الدنيا والفقهاء !
غايتو انا تاني ما بسوي لي بوست الا وفيهو ناديه عثمان - الله يديها العافيه -
والبوستات الفي عنوانها بكري بقت ما بتساوي شيء ولا بتجيب دخل
أوع من السواقه بي النهار !!!
ــــــــــــــــــ
عاين تحت يا حبيب بعد شويه !!
هشام
|
Post: #24
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-21-2009, 05:39 AM
Parent: #23
ونعود بعد ما تهكرنا 24 ساعه
الله يجعلوا خير
ونرجع
ـــــــــــــ
شنو حكاية المغتربين مع دهــب المره دا ؟؟؟؟
دي حكايه عجيبه وغريبه
بقى كل واحد مافي في لسانو غير دهــــب المره
وهي المسكينه دي - دهبا دا الطلعت بيهو منكم بعد مر السنين في الغربه !
الواحد يكون عاوز يشتري ليهو قطعه في مكان سحيق ( عشوائي)
وبدون شهادة بحث وبس بي توثيق محامي وحيازه بي تسوير في مكان -
بتاع طبلية الموبايلات في السوق العربي يسوي احسن منها !
وطوالي يرمي ليك -- وأشيل دهب المره اتم عليهو - وبعدين شويه شويه أرجعوا ليها !!
كان ليك !
والمره طبعاً عارفه الراجل دا طلع بره الشبكه - أقصد بره الغربه -
وبقى ماسوره ساكت - لا برجع دهب ولا حايجيب تيمان !! في المستقبل !
وبقى ما بقدر يسوق كويس مع زحمة مدن الغربه ديك !
ويمشي يكلمها ! ويسوي حاجات ما كويسه كدا ! ويوزع في الضحكات في أسخف الطرائف ،،
ويمطـــق خشــمو ويعاين في الواطه !
ويرميها ليك بردلب ( شحدة الدهب ) !!
سجمي سجمي سجمي !!
خلاص يا حاج كلو كملتو بقيت على دهبي ؟ وتزيد الكهرباء تعليه !
والفولت يصل الف - والحراره في الســــــــقـــــف !
والمره ترفع الموبايل وترمي الكلام دا لي جارتها في الغربه القضــت معاها عشره سنين ديك في عماره واحده !!
وإسبوعين المان دا ما بفتح قدومو معاها ولا بسالم ولا بكالم - وهي برضو -
وهو والاولاد ياكلوا براهم وهي تاكل براها بس عشان ما تشوف وشو الصبوح داك !!
ووسط أصحابو عامل فيها هو صاحب وسايق البـــص !
لكن بعد ما حمودي خش العام بقى هو ضيف في الغربه عندهم !!!
ــــــــ
برجع تاني أكيد أكيد ،،،
هشام
|
Post: #25
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-21-2009, 06:28 AM
Parent: #24
أها هاكم زي دي !! تسريح في تسريح !!!!
عاوزكم تكونوا خـفـيـفـيـن
وما تضيعوا حـصـيلة البطلع بي دم الحـجامه في فارغات الأمور ،،
وكل واحد يسوي ليهو ضراء ( بيت - كوخ - قُطيه) المهم حاجه تغـطـيهـو وعـيالو
وزي ما قال جدنا الزمان رحمة الله عليه
البيت الفـيهـو عيال الـفـقُر فيهـو ضــيف !!
ومثل برضو تاني ( يكبروا الصغار ويزيلوا الغبار )
يعني حتى لو كان الحصاد بسيط - يجب إستغلاله صاح -
بالذات سنة الغربة بي 4 سكن !! دي فهمتوها ؟
أكيد أكيد راجع ليكم !!
هشام
|
Post: #26
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: أيمن دياب
Date: 04-21-2009, 06:52 AM
Parent: #25
ياهشام انت مغترب مفنش ولا شنو..
شكلك كده حاكيها شديد..
المغتربين مستورين والحمد لله.. وعايشين في أمن وأمان..
وما مقصرين في حق الأهل.. وبعرفو كيف بحولو الريال..
شكراً لنصايحك..
|
Post: #27
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-21-2009, 07:45 AM
Parent: #26
| Quote: الريال اليوم بي 665 في السوق الابيض طبعا |
اها دا كلام معتصم محمد صالح هناك في بوست مجاور
أيمن :
يعني قصدك حاقد والا شـــنـــو ؟؟؟
في شــنو يحقدوا عليكم فيهو يا مغترب ؟
أنت لو عارف كيف بتحول غيرك داقس !!
وبحول بي الماوس والATM
وانت لو عارف مالك ما كلمت الجماعه ؟ ( وش من قدام الكاونتر )
نسيت : شكراً لعبورك ،،،،
هشام
|
Post: #28
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: أيمن دياب
Date: 04-21-2009, 08:47 AM
Parent: #27
Quote: يعني قصدك حاقد والا شـــنـــو ؟؟؟
في شــنو يحقدوا عليكم فيهو يا مغترب ؟
أنت لو عارف كيف بتحول غيرك داقس !!
|
ياخي العفو..
أنا حاشا أقصد انك حاقد..
أول حاجة شايفك بتكتب براك.. وترد على نفسك..
الشيء التاني هجومك على المغترب فيهو تشنيع شديد.. وكشف حال..
المغتربين ديل لو ما مرتاحين في مكان الاغتراب أكيد بعرفو طريق المطار..
ومافي زول فيهم مربوط على الكرسي بتاعو.. وكل زول حر في اختيارو..
وأزيد حاجة كمان.. زيادة الريال طبعا جات في صالحنا..
وكل زول عندو طريقة مناسبة للتحويل.. وأكيد المسألة فيها حسابات..
كلام أخير:
كان في حاجة واحدة نحمد عليها ربنا.. كهربتنا أصلو ما بتقطع..
(وش شمتان في الناس المهرودين بالسخانة)..!
|
Post: #29
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: كمال ادريس
Date: 04-21-2009, 10:08 AM
Parent: #28
ياهشام شوف عدد القراء الذين مروا على البوست حتعرف كيف انك افدت الناس ، وبعدين اقول لاخونا ايمن انو هشام قاعد وسط الكندشة وكهربتم مابتقطع.... اقول ياهشام ولله يكفي!!!
واصل بالله قصة الدهب دي
|
Post: #30
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-21-2009, 12:02 PM
Parent: #29
| Quote: واصل بالله قصة الدهب دي |
يديك العافيه يا كمال إدريس و أكيد أكيد حا نتلاقا في مكان ما !!
الحكايه يا قريب ولدي محمد:
انو كل الناس الفي المكان الكهربتو ما بتقطع دا بقت بس الحيله كلها
وكل حلم يراود المغترب بس دهب المره قبلتو !!
والمسكينه دي تلقى ولدت ليهو بنتين والا ثلاثه والحمـــد لله ،
وديل ما عاوزين دهب لي قدام ؟ أكيد عاوزين !!
والراجل على إعتبار أنو هو الجابو ليها بس لامي فيها نبيح وسعال ديكي،
كتير كدا عشان يملصها ليهو ويعمل بيهو المشروع الما حققوا من ما ورد بلد
الغربه وفي راسو مافي شعره بيضاء !
وعاوز يحققوا بعد ما بقى الراس أبيض وفي مكان معين وراء الراس -
لأنو القدام بقت فجوه شعريه !!!
وطبعاً مكنتو المركبها لي الشغله دي بس للأولاد وعشان ينفعهم وللمستقبل بتاعهم -
ونحنا الفينا إتعرفت وعشان تعينهـم وتساعدهم على كدا وكدا !!
وكأنو رزق أولادو بس عندو لحدي آخر عمرهم ! من الحنك حقوا ..
على العموم
المهم الكهرباء في علاها دا ما بتاخد أكتر من إسبوعين لآنو بتجي سمايه والا زيارة ترجع الود الإنفقد لمده دا -
وعن من رجوع الكهرباء في الغربه بينهم !! كفى ،،،،
المهم ياكلها حنك وياخد دهــب المره الا ربع !! ويمشي قبل الصاغه ما يقفلوا ويوزن الدهب !!
ويقعد يفتش في المكان البيخت فيهو القروش ومافي غير الحساب الفيهو الفيزا داك !
وأكيد أكيد عليهو رصيد عاوز تسديد !!
ومكالمات لي السودان حول العشوائي داك - لي أخوهو هناك وشويه رسل للسماسره وحق شهادات البحث ووووو
لحدي ما يعدي 3 شهور ويجي سكن طاير كدا بي الجنبه ديك !!!
والسكن في الغربه دي زي القراحه في الإبتدائي !! بخلي أعلى المرتبات تترنح وتتهاوي وتتواري !!
المهم لمن يلقا الأرض ويحول ما تبقى من نفايات بكون المكان الهو حددو لسه يمكن آه ويمكن لا ؟؟؟
يمكن سكن ويمكن ما صالح لسكن الآدمي !!
ويستمر العراك والعناء للوصول لإتنين من الأشياء !!
دهب المره ،، و بناية البيت في المكان داك !!!!
ودي براها 20 سنه تانيه !!!!!!!!!!!!!!!!!!!!!!!!
بالله عليكم التنظير بي دهب المره دا بعيد منو نظروا !!!
ــــــــــــــــــ
أكيد أكيد برجع بس عشان ناس الفيزا والماستر كارد البشختوهـــــــــــــتن ديل ،،،،،
حقات الحرام ديل !!!!
هشام
|
Post: #31
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-21-2009, 12:09 PM
Parent: #30
| Quote: أول حاجة شايفك بتكتب براك.. وترد على نفسك.. |
أخونا أيمن
أنت بدل ما تقعد تصاقرني حرف بي حرف ما تكتب ليــــ الناس دي
موبايلي عامله تخــفــيض على المكالمات الدوليه من 8 مساء الى 8 صباحاً
بي سعر 55 هلله للدقيقه !! وطبعاً السودان دولي ،،،
مش كان احسن للجميع ويمكن تجي فايده من البوست دا للغلابه ديل ،،
كل هلله في غربتكم دي محــتاجين ليها لشيخوخــتكم قــدام !!
أكيد أكيد كلامي عن موبايلي صـحـيح يا أيمن مـــــــــــش كــدا ؟
هشام
|
Post: #32
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: أيمن دياب
Date: 04-21-2009, 02:12 PM
Parent: #31
الحبيب هشام..
ياخي نحنا معقول نقعد لحدي الشيخوخة في البلد دي؟
لو السد اشتغل تمام وبدأ في تصدير الكهرباء أكيد بنرجع
الواحد يشوف ليهو (مصينع) صغيروني في بحري
أو الصناعية الجديدة في الحاج يوسف..
بعدين ياهشو.. الريال ده كل ما يزيد اكيد في صالحنا
لانو لما نزل ودق الدلجة ووصل 500 كان معانا بالخسارة..
أسه نحنا شغالين تعويض في القريشات الحولناها بالنازل..
وكلام تاني.. الريال لو نزل ووصل 250 جنيه مافي أي تأثير
السوق السوداني ده ماعندو أي محكومية.. وشغال بنظريات خاصة واستثنائية..
عشان كده خلي الريال يطير السما.. ويارب الشهر الجاي يصل 700
موبايلي ما بعرف ليها درب..
ولا حصل سعيت ورا التخفيض حقها..
انا شغال بي شريحة سوا.. أكتر من سبعة سنوات
عليك الله اعمل لي رنة
0554009252
|
Post: #33
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-22-2009, 04:41 AM
Parent: #32
Quote: موبايلي عامله تخــفــيض على المكالمات الدوليه من 8 مساء الى 8 صباحاً
بي سعر 55 هلله للدقيقه !! وطبعاً السودان دولي ،،،
|
بدل ما نقول فوق ساكت
نعيد المعلومه دي
أكيد أكيد يا أيـمـن بــــجـيـك راجـــع بعدين !!
هشام
|
Post: #34
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: abuguta
Date: 04-22-2009, 04:53 AM
Parent: #33
هشام سلام,,متابعين طبعا جوا وبرا
بس مسعول من الخير الليلة وصل كم
فى باب شريف او شارع غبيرا العام,,
باقى ليك الدنيا اخر شهر,,,
انا مش اقتصادى ,,لكن الريال دا بصل ال700
وبعدها يطلع ينزل ما بعرف
تسلم على البوست المنفعى
|
Post: #35
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-22-2009, 10:19 AM
Parent: #34
Quote: الخال الرائع هشام
نرسل التحايا لكم ونعطرها باريج شوقنا وشوقكم للاهل والبلد
شكرا كتييييير على البوست الروعة ( التحويل للاهل ) بس أوعك من دهب المره ،،،،،،،،،
|
دي بنت أختي في قطر
والله ما قصرت في دا لكن ما قاعد تحول لي قروش يعلم الله !!!
الليد تبكي الدفع دي ما سمعت بيهو ؟
كتير تقديري ليك يا قريبتي - وأوصيك بي دهــبك !!!
ما يلحسوا منك !
وكان خوفتي جيبيهوا لي أمسكو ليك !
الدهب ما تجيبي الراجل سمح ؟
أشواقي
هشام
|
Post: #36
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-22-2009, 10:29 AM
Parent: #35
| Quote: فى باب شريف او شارع غبيرا العام,, |
والله يا أبوقوته إتأخرت كتير بس برضك أحسن من صديق الموج وأبو حراز داك !!
السعر في باب شريف مختلف عن سعر غبيره
السعر هناك عالي شويه لأنو الناس بتجيب خبرو بالباخره والطياره وكدا
على العموم السعر في جده اليوم 655
وفي غبيره ناقص 10 يعني 645 --
بعد كدا امسكوا وضربوا تحويلاتكم ومحــنكــم !!
والله يا أبو قوته مال المغتربين دا بقى زي مال اليتامى -
حرام الواحد يشوفوا بيطير في الفاضي ويقعد يعاين ليهو !!
واحد أخونا قلت ليهو أنت ما بياكلوك-- إنت مالك دا زي مال اليتامى - قال لي يا أخوي
(( أنا ما اليتيم دا ذاتو )) وهو أبوه ميت قبل 25 سنه !!
يدي وجعتني ،،، أكيد أكيد راجع ،،،
هشام
|
Post: #37
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-22-2009, 10:59 AM
Parent: #32
أيمن أخوي
شكراً لي مرورك الكويس دا
ومش حا تقعد لحدي الشيخوخه بس ! والله مقابر هنا دي منظمه بشـكـل -
زي الشوالات في الشاحنات هنا- بي مكنه !!
وتاني غايتو كان عندك كرت الجـزيرة الرياضـيه دي براها 20 سنه زياده في القعدو دا !!
وتاني انت إياك ومع ناس الحكومه ديل بي مشاريع ومصـانع والوهم دا ،، إياك أسـمـع كلامي دا ،،
( التعديل هنا ) ####
بس شفت العقار - بس العقار - ما ليك الا العـقار !!
ما تــــــقـول لـــي كيف ؟
بس عندك قطعه في مكان سويها غرف وحمام بس - بجيك البأجرها منك بأسرع وقت !
يعني 300 متر قسمها على 3 وكل غرفة وحمام بي 600 الف بالقديم !!
يعني في الشهر مليون و 800 الف !!
على كدا خليك وازن الماسوره !
لو عملت ليك إتنين بس أنت في نعيم لي يوم الدين !!
يعني في الشهر 3 مليون و600 الف !
ويا دار ما دخلك شر -
لا تمشي ناس الحكومه ولا ناس الحكومه يجــــوك !!
ولو عندك كمان إمكانية تعمل ليك فرن - آآآآ] فرن - بتاع العيش دا !
الفرن دا بجي واحد يأجرو منك بي 2 مليون ونص في الشهر ولو زهجت منو !
أقلب محل الفرن مطبخ وعيش فيهـو !
لكن أطمنك المكان البيكون فرن لي يوم الدين ما بتغيير !!
لأنو فيهو الرحمه والناس فتحة عيونا دايره تاكل !!
شوف كلامي دا وتعال راجع - بس بي عزيمه أقوى سمح ؟
وانت يا أيمن عاوز ترجى السد ؟ هو البترول الضمنوا بيهو السد في البناء ما جانا منو حاجه !
تجينا من السد ؟؟ هسه البترول دا لمن وصل لي 140 دولار الجانا شنو ؟
ولمن حذفوا منو الميه - شنو الجانا ؟ يا أخي دي نظريه في علم
الغيب مافي - خليك من الإقتصاد !! وش عاضي أصبعو ) !!!
والله أنت متفائل خلاص --
Quote: موبايلي ما بعرف ليها درب..
ولا حصل سعيت ورا التخفيض حقها..
انا شغال بي شريحة سوا.. أكتر من سبعة سنوات |
يا اخوي أنت عندك فيها حجر دغش ؟ أمشي لي أقرب محل إتصالات يديك شريحه فاضيه -
وأحشر فيها 30 ريال موبايلي وشتت الحروف خارج المملكه لمده كويسه ووفر !! الدرب طويل يا قريبي !!!
يدي وجعتني وخليك متابع الحكايه دي معانا سمح ؟
هشام
|
Post: #38
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-22-2009, 12:17 PM
Parent: #37
Quote: أكيد أكيد برجع بس عشان ناس الفيزا والماستر كارد البشختوهـــــــــــــتن ديل ،،،،،
حقات الحرام ديل !!!!
|
حسب وعدي الفوق دا
البطاقات ديل طبعاً جات في ( محافظ المغتربين ) ( البوك) المفحضة) بي فهم ركبوه فيهم الموظفين السعوديين بي فهم واحد في كل مكان !!
أنت لو إحتجت لي حاجه ( يعني ) جاك ضيق مالي في شهر من الشهور تمشي تاكل وتشخت وتشتري وتشخت !
ووين ما إنحشرت وإنحشكت تشخــت ! ومافي داعي تمشي تشحد من الناس ( الزول )
ويقعد يتبسم ويضحك ليك !! ويقول ليك قبل ما يجي تاريخها في السداد أمشي سدد وما عليك رسوم !!
ويتورط صاحبنا في الحرام دا ،،،
وأول شهرين ما يستخدمها وتاني شهرين يشخت ويلحقها قبل ما تجي الرسوم !!
ومن الشهر الخامس يفقد السيطره وهاك يا جقلبه وهي العملوها عشان تمحى البنود -
هي ذاتها تبقى أكبر بند لأنو فيها رسوم ورسوم الرسوم !!
وما واحد يجي ناطي يقول لي ما اخير من الشحده !1 والله الشحده أحسن منها الف مره !!
وهسه كل الناس المشوا في الدرب دا ندمانين وسافين التراب !!
في الورطه دي وقبل ما يحاول يخلصها او يقرب ينهـيها تلقاهو رجع - شخت تاني !!
وانا ما فكي ولا مولانا واعـــظ ــ بس صدقوني هي في الحرام غارقه !
والحللوها ديل علماء مأجرين !!
لو كانت مباركه ما كان شكا منها الناس أجمعين
فنصيحتي أبعدوا عنها - ياخ دي تلحقك لحدي نهاية خدمتك !!
وتمحق ليك رزقك ! وتادبك بي مالك !
غايتو انا بلغتكم ووريتكم البلاوي في الحاجه دي كيف
اللهم فأشهد ،،
أكيد أكيد راجع ،،،
هشام
|
Post: #39
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-22-2009, 12:22 PM
Parent: #38
يا أخونا المغتربين أو (المتغـربين )....
أنتو العقار دا مابينــــــــو مالكم ؟
مالكم ما عاوزين تـركــزوا على العقار ؟
دا الكلام الجاي انشاء الله ،،،،
أكيد أكيد راجع ،،،
شكراً ليـــ ( أم أمـجــد) ...
ـــــــــــــــــــ
هشام
|
Post: #40
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: أحمد الشايقي
Date: 04-22-2009, 12:33 PM
Parent: #39
هشام سلام
ياخي على الاقل نزل لينا صور الدولارات,
طولنا ماشفناها,
أحمـد
|
Post: #41
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-22-2009, 12:44 PM
Parent: #40
ود الشايقي
المشكله لو لاقتنا في الصــور بقينا ما بعرفها وما بنفرزها !
غايتو نحاول $$$
وعد مني في البوست دا انشاء الله
أكيد اكيد بجيكم راجع ،،،
هشام
|
Post: #42
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-22-2009, 12:46 PM
Parent: #41
أها دي يا ها والا أنا ما شايف ؟
شيلها وأرجع يا قريبي
أكيد أكيد جاييها راجع ،،،
هشام
|
Post: #43
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-25-2009, 05:54 AM
Parent: #42
فـــوق بــــثـــ !!
هشام
|
Post: #44
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-25-2009, 10:42 AM
Parent: #43
دهب المره
يبدو انو دا المسكوت عنه في البيت السوداني في الغربه !!
يعني الناس ما بتتكلم فيهو لأنو حاجه كدا غير مباح الكلام فيها !
زي حطب الدخان في بيوت الغربه !! مـسـمـيـين بيهو بس !!!
الدهب دا لقطتو المره بي قروش الراجل ووعودو ليها !
( خلاص انشاء الله الشهر الجاي بديك 2500 ريال تشتري بيها دهب - لأنو بكون دافعين السكن )
دي البدايه لمن يجــيبها من الحُـُفره ديك !
وقبل ما تجيب ليهو ولي العهد ! أها هديتي شنو ؟ )
عارفك قاصده دهب ! ما عندك مشكله - شفتي قبل ما تلدي بي شهر بديك تشتري شويه دهب !
وفعلاً تصبر المسكينه لحدي ما يجي الموعد دا ويسوقها لي سوق الدهب يوم الخميس !! آه يا لئيم !!!
ويشتري ليها حاجه كدا بي 5000 ريال - غويشه -كردان صــغير - خاتم كبير مع غويشه !
المهم يلحسوا القوش كلها في دهب !
وشويه شويه كل إجازه المره عاوزه دهب والا عاوزه تغيروا !
وبعد عشره سنوات غربه يكون العندها بقى فعلاً دهــب مره !
لأنو والحمد لله بكون أنتجت منو وليهو أقل حاجه 4 أطفال والحمد لله !
ولو ولد بهديها دهـب - ولو بنت بشتري ليها دهب !
يعني كل ما تزلق ليهو جنا هي عايزه دهب !
وطبعاً لمن يجي النكبات والبنيان والإجازات حالياً بعد ما صفرت الغربه بي -
مافي عائد يذكر - بقى كل حاجه بس يلف ويحك راسو ويقول ليك دهب المره !
والمره عارفه بقت الراجل دا كان شال الدهب الغربه دي ما فيها شيء تاني برجع الدهب !! يعني نشفت .
ونرجع لي الكهرباء تعلا فوق في السماء !!
بقية الكلام دا قلناها في مداخله فوق ،،،
على العموم : نحنا عاوزين الرجال يبعدوا عن دهــــب المره بعيد !
ويركزوا على موضوع الصناديق داك !
ودي المداخله الجايه سمح ؟
هشام
|
Post: #45
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: abuguta
Date: 04-25-2009, 11:13 AM
Parent: #44
بعدين انت متزوج ولا زى دكين
الدهب كويتى بحرينى ب 105 للجرام
سعودى ب 89 للجرام,,ماليزى ودا بجى ختم كبيرة ب 107 للجرام
اه الليلة ريالك حصل كم,,,
|
Post: #46
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-25-2009, 11:54 AM
Parent: #45
| Quote: اه الليلة ريالك حصل كم,,, |
يعني يا أبوقوته في داعي ؟
والله يا أخوي انا ما بسأل عنو الا في الشهر الما فيو سكن !!
( حسب نظام دفعي للإيجار ) شهرين آه وشهرين لا ،، ( وش بينزف كاش )
لكن ناس الدمام قالوا 655 ريال
أنا بنتظر نهاية الشهر بعد المرتب بعدين أسأل عنو !
نحنا ناس وراء الطربيزه سـاكت ( مرتبات ) بث !!
هشام
|
Post: #47
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-25-2009, 12:37 PM
Parent: #46
يا أبو قوته
رسل لي رساله هنا !!
عندي ليك حاجه خاصه ليك عشان انت من أبوقوته ديك !!
[email protected]
منتظرك بكره الصباح انشاء الله
حاجه خاصه يمكن تنفع معاك ؟ ويمكن لا !
هشام
|
Post: #48
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-26-2009, 05:55 AM
Parent: #47
Quote: ويركزوا على موضوع الصناديق داك !
ودي المداخله الجايه سمح ؟
|
رغم أني ما من أنصارها لكن الحاجه دي بقت سايده في مجتمع الغربه بكل طوائفه وناسو !
الراجل يخش ليهو في صندوق مع ناس الشغل والا مع الناس الساكنين حوالينو - لكن ما مع اهلو !
ودا صاح لأنهم مرات بيكبوا الزوغه !
والمره هناك مع رفيقاتها في السكن والسكن المجاور تخش ليها بي شيء كدا شبه رمزي عشان تسوي ليها منو
(أواني منزليه ) ودا في حد ذاتو مكسب كبير لتفادي النقه ،،،، !!
والصناديق أشكال وألوان يعني ناس عاوزينو للولاده وناس للإيجازه وناس عشان يقطعوا بيهو
شـوط في البنيان هناك !
المهم الصندوق بخلي الواحد ينعصر وينكرب شويه عشان يحقق حاجه في خلال سته شهور أو زياده حبه !
والصندوق دا بخليك توزع المرتب من يوم نزوله الحساب - وترجى المرتب الجاي !! شيء عجيب !
بلد الغربه دي فيها المرتب بعيييييييييييييييييييييييد ، والسكن نتشـــه بس !
غايتو عن تجربتي الشخصيه - صندوق واحد انا وكميه كدا لي (أم محمد هشام)،،، !
وعندنا نجح والحمد لله بس ما بحبو أنا !
أنتو جربوهو وحا تلقوهو نافع بس بيعتمد على الناس الخاشين فيهو !
هشام
|
Post: #49
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: abuguta
Date: 04-26-2009, 08:50 AM
Parent: #48
رسالة على بريدك
ولو ما حصلتها هنا بريدى,,,[email protected]
تسلم
|
Post: #50
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-27-2009, 07:41 AM
Parent: #49
حبيبنا أبو قوته
تسلم يا غالي
بيناتنا كتير وممــــــــــــــــتد رغم قطوعات الكهرباء ،،،
أكيد أكيد حا اتصل عليكــــ زي أمبارح ،،
هشام
|
Post: #51
Title: Re: التحويلات الخارجية - لي الأهل !! جــد مـــهــــم!! ( أكيد ، ، أكيد مافي صور طبعًا) ...
Author: Hisham Ibrahim
Date: 04-27-2009, 11:07 AM
Parent: #50
يا ربي ممكن يكون الكلام دا صـحـي !!
صحي ممكن يكون حصل 690 جنيه ؟؟
هشام
|
|