Post: #1 Title: بلو بلو للمرة الثانية في واشنطن الكبرى..للنساء فقط Author: Tagelsir Elmelik Date: 04-14-2009, 06:54 PM
Post: #2 Title: Re: بلو بلو للمرة الثانية في واشنطن الكبرى..للنساء فقط Author: azhary taha Date: 04-15-2009, 03:40 AM Parent: #1
ثقافة كيزانية......سوا اكانت بوعي او بدونه.......
Post: #3 Title: Re: بلو بلو للمرة الثانية في واشنطن الكبرى..للنساء فقط Author: heba Elmahi Date: 04-15-2009, 03:52 AM Parent: #2
Quote: ثقافة كيزانية......سوا اكانت بوعي او بدونه.......
أخونا أزهري سلام هو شنو الثقافة الكيزانية ؟ قصدك عشان الحفل للنساء فقط ؟ والله و علي حسب علمي هن من طلبن ذلك عشان ياخدن راحتن في الجبجبة و الفضفضة عن النفس !
المشكلة شنو ؟ و الجاب الكيزان شنو هسة ؟ غايتو بس عالم تحب اللخبتة ( وش مطير عيونو )
تحياتي يا ملك
Post: #4 Title: Re: بلو بلو للمرة الثانية في واشنطن الكبرى..للنساء فقط Author: نجوان Date: 04-15-2009, 06:15 AM Parent: #3
"ممنوع إصطحاب الأطفال"
____ عجبتني شديد..
لحواء أن تلبس أحلى ما عندها وتخرج لقضاء وقت ممتع.. مع الحواءات الأخريات واللاتي يحتجن لنفس الترويح .. دون شفّع ..
أهم شيء تقفل الموبايل.. أو بالمرّة تسيبو في العربية.. عشان سي السيّد ما يزعجها بـ "الأولاد كسروا شنو.. البت أبت العشا، الولد بيبكي مما طلعتي،.."..
ياخ إتصرّف!
____
Post: #5 Title: Re: بلو بلو للمرة الثانية في واشنطن الكبرى..للنساء فقط Author: SAIF MUstafa Date: 04-15-2009, 01:41 PM Parent: #4
الأخت هبة
أزييك
إنت محتجة على ثقافة كيزان دى ليه؟؟؟
فعلا دى ثقافة ما بتشبه الحتة دى.. عليك الله كم مرة سمعتى بى حفلة زى دى هنا ..غير حفلة أيمان لندن؟؟ ياربى يكون السبب شنو ؟؟
هسى أنا كنت مسافر وما حضرت حفلات بلوبلوالسابقة.. . نفسى أحضر الحفلة دى ... ممكن ولا ما ممكن ؟؟؟ هى مش حفلة عامة فى مكان عام وبفنانة عامة وبقطعوا ليها تذاكر...؟؟؟
طيب تانى رجال ونسوان دى لزومة شنو؟؟
يا ربى أرلنقتون دى فى ياتو قارة ؟؟؟
غايتو لو صحى دايرين تاخدوا راحتكم أعملوها حفلة خاصة .. لكين بى الشايفو دا دى حفلة عامة...ولو جاكم ضهب ماأظن بتقدروا تمنعوه..
أنا زول مسكين لو قلتوا لى ما تجى ما بجى لكين لو جوكم أمريكان رجال ولا جنس تالت حا تعملوا شنو...؟؟؟ شفتى نوع الحاجات دى هنا ممكن تكون معقدة كيف؟؟؟
تسلمى سيف
Post: #6 Title: Re: بلو بلو للمرة الثانية في واشنطن الكبرى..للنساء فقط Author: Mohammed Ahmed Saeed Date: 04-15-2009, 04:05 PM Parent: #5
تذكرت حفلة اقيمت فى داخلية البنات بجامعة الخرطوم فى اوائل الثمانينات للطالبات فقط وكنا حضورمن وراء حجاب ( سمع فقط)
Post: #7 Title: Re: بلو بلو للمرة الثانية في واشنطن الكبرى..للنساء فقط Author: heba Elmahi Date: 04-15-2009, 05:19 PM Parent: #5
سـلامـي و تـحـيـاتـي يـا سـيـف
محتجة انا علي كلمة ثقافة كيزانية عشان الفكرة أصلا" ما ليها دعوة بي الكيزان ولا غيرهم ! الفكرة كلها نبعت من ان بعض السيدات كانوا متفاعلين مع حنان بلوبلو في الحفلة السابقة من مقاعدهم و كان نفسهم في الهجيج بي راحتهم زي ما بحصل في السودان في الحفلات الخاصة و رقيص العروس في الفترة الاخيرة و بي طلب منهم للفنانة شخصيا" و لمنظمي الحفل قالوا عاوزين حفلة نسائية ، لحدي هنا افتكر مافي أي إشارة تقول للكيزان دخل في الفكرة دي أو الوحي بها صاااح ولا انا غلطانة ؟
ناس السياسة ديل الكيزان جننوهم و بقوا شايفين انهم متدخلين في كل شئ حتي لو واحد قام بس شرب ليهو موية اكييييد الكيزان وراء قيامه من مكانه و اتجاهه لي شرب الموية في هذا الوقت تحديدا" هههههه والله العظيم كرهتونا !
بخصوص سؤالك عن امكانية لو جاء أي امريكي أو جنس تالت قال عاوز يحضر الحفلة انا و انت و كلنا عااااارفين انه افتراض زي ما ممكن يحصل لانهم ما قاعدين يجوا الحفلات السودانية دي إلا بي دعوة من شخص معين يعني براهم كدا يقرروا يجوا يحضروا حفلة لي مجتمع تاني و بي لغة تانية ما بتحصل آللهم إلا الحفلات المقامة في الحدائق و الاماكن المفتوحة . المهم انت لو نفسك تحضر الحفلة دي انا بجازف طريقة بس نسًق معاي ( قرقرقرقر )
تـحـيـاتـي و مـرفـق ودي
Post: #8 Title: Re: بلو بلو للمرة الثانية في واشنطن الكبرى..للنساء فقط Author: Kostawi Date: 04-15-2009, 06:15 PM Parent: #7
الأستاذ سيف مصطفى
ياخ إستشارة قانونية. لو أنا إشتكيت الناس المنظمة الحفلة العامة دي لناس البوليس بطلع لي بكم?
شا بكننا المساواة المساواة هسع عملوها لينا خرخرة و عنصرة و جنجسة
أنا جاي جاي
جيبوا لي البوليس ____________________________________ ياجماعة ما محتاجين ليكم لبودي قارد!!!??
Post: #9 Title: Re: بلو بلو للمرة الثانية في واشنطن الكبرى..للنساء فقط Author: SAIF MUstafa Date: 04-15-2009, 07:14 PM Parent: #8
الأخت هبة قلت لى دى ما سياسة... ؟؟ غايتو حسب علمى التفرقة على أساس الجنس سياسة محافظين وهم ربائب ألأفانجلكاز اللى هم كيزان البلد دى وأولاد عم كيزانا لزم...شفتى السياسة دى حا تكرهكم قدر شنو...
بعدين أنا قلت ضهب.. .ضهب.. يعنى بدون دعوة وديل هنا بسموهم البارتى أنمالز... وليك على لو فكيت ألأشاعة ،عينك ما تشوف إلا النور...ودى سى بى حالها بتكون عندكم بى غادى: شى سود.. وشى حبش.. وشى كاريبى..و..و.. ولو منعتوهم أنا ما مسؤول...
بخصوصى ... والله الرغبة فى.. لكين احتمال لو مالقيت طريقة أنتظر التسجيل ينزل فى اليوتيوب ... قولى ما حايكون فى تصوير كمان..
بالمناسبة التفرقة على أساس الجنس دى موضوع جاد... سياسة.. سياسة.. ولو ما سياسة أكل عيش... أها حا تنسقى معاى ولا أجيب ألأمريكان الضهب الفوق ديل وأجى؟؟؟ أصلى جايب عبايات وخمارات ضمن الوصايا من السودان وأنت عليك بالباقى... يعنى ما عليك ألأ الحنك..: أنو أيوة.. الناس البلبسوا خمارات ممكن يمشوا الحفلات النسائية حتى لو بى بلوبلو ظاتها... الليلة.. دى شكلها سياسة برضو.. تطير عيشتك يا سيف..
الأخ كوستاوي سلام كيفك والأسرة أنا بى سببى كنت مسافر انت عايز تحضر الحفلة المرة دى مالك؟ على أى حال ممكن تنسق معاى.. وموضوع البوليص دا نأجلوا شوية لحدى مانشوف... ويا هبة قولى أتنين... تسلموا سيف
Post: #10 Title: Re: بلو بلو للمرة الثانية في واشنطن الكبرى..للنساء فقط Author: Kostawi Date: 04-15-2009, 07:22 PM Parent: #9
يا سيف هبة دي كانت مستلمة الحفلة المرة الفاتت كمان دايرا تستلم دي
دا مش شغل الكيزان ظاطوووو (ناكل مما نزرع)
Post: #11 Title: Re: بلو بلو للمرة الثانية في واشنطن الكبرى..للنساء فقط Author: Kostawi Date: 04-15-2009, 07:32 PM Parent: #10
غايتو يا سيف أنا بايعك بايعك حنان ضربت لي تلفون قالت لي لازم تحضر عشان وزنة المايكرفون و كدا لأنو الجماعة ديل (ناس هبة الماحي) ديل ح يجوطوا ليها السماعات (بشترتم) دي
Post: #12 Title: Re: بلو بلو للمرة الثانية في واشنطن الكبرى..للنساء فقط Author: SAIF MUstafa Date: 04-15-2009, 07:49 PM Parent: #11
كوستاوى انت مش حا يعملوك بودى قارد..؟ ياخى ماتخلى شغل الساوند سيستم دا لى أخوك؟؟ خليك بودى قارد أحسن...عشان أنت عندك حماية أضافية ...أنا زول وحدانى... و براك شفتنى وشفت ناس فرجينيا..تفتكر بقدر أبقى بودى قارد ؟؟ ولو مارضيان بديك عباية وخمار... سيف
Post: #13 Title: Re: بلو بلو للمرة الثانية في واشنطن الكبرى..للنساء فقط Author: Tagelsir Elmelik Date: 04-15-2009, 08:30 PM Parent: #12
Ladies night
Post: #14 Title: Re: بلو بلو للمرة الثانية في واشنطن الكبرى..للنساء فقط Author: heba Elmahi Date: 04-15-2009, 08:39 PM Parent: #12
سيف و كوستاوي سلام تاااااني
Quote: ياخ إستشارة قانونية. لو أنا إشتكيت الناس المنظمة الحفلة العامة دي لناس البوليس بطلع لي بكم?
شا بكننا المساواة المساواة هسع عملوها لينا خرخرة و عنصرة و جنجسة
ما طول عمركم عاملين تفرقة يا اولاد ادم و ما راضين بي فكرة المساواة دي بتاتا" حيييي انا هسة واجعاكم الفكرة ليه ؟
Quote: بعدين أنا قلت ضهب.. .ضهب.. يعنى بدون دعوة وديل هنا بسموهم البارتى أنمالز وليك على لو فكيت ألأشاعة ،عينك ما تشوف إلا النور...ودى سى بى حالها بتكون عندكم بى غادى: شى سود.. وشى حبش.. وشى كاريبى..و..و.. ولو منعتوهم أنا ما مسؤول...
يا أخوي ناس البارتي كراش ديل حنان بلوبلو دي ما بتجذبهم ولا زولتهم إلا غايتو يجونا محرشين عديل كدا منك ولا من كوستاوي
Quote: بالمناسبة التفرقة على أساس الجنس دى موضوع جاد... سياسة.. سياسة.. ولو ما سياسة أكل عيش...
فعلا" كلامك في محله و إيدي علي إيدك نناقشه في بوست جاد
حأنسق معاك يا سيف ياخي بس خليها بالكروباوي ما تفضحنا و ما يسمعنا هاشم دبس
Quote: هبة دي كانت مستلمة الحفلة المرة الفاتت كمان دايرا تستلم دي
ياخي هم ناس التوب الفيروزي المشغول بالقليتر ديل أدونا فرصة عشان نستلم حاجة ؟ المرة دي إن شاءالله ميرلاند يقفلوها و ما يطلع منها زول لغاية ما الحفلة تنتهي ( وش شمتان )
Quote: كوستاوى انت مش حا يعملوك بودى قارد..؟ ياخى ماتخلى شغل الساوند سيستم دا لى أخوك؟؟
قرقرقرقر والله ضحكتني يا سيف كوستاوي شنو ياخي البقدر يعمل بودي قارد انت لو ما شفته شخصيا" ما سمعت اصلو قبل كدا انه خردة ههههههه خليهو ياخي يحاول في الحاجات القدر طاقته زي الساوند و كدا و رًكز انت في محاولاتك للتنسيق معاي .
Post: #15 Title: Re: بلو بلو للمرة الثانية في واشنطن الكبرى..للنساء فقط Author: SAIF MUstafa Date: 04-15-2009, 11:54 PM Parent: #14
Ladies Nights كويس إنو جات منكم يا ناس الحفلة.. Ladies Nights هو تقليد تسويقى تتبعه البارات والملاهى الليلية بمنح أسعار مختلفة حسب جنس المستهلك وذلك إنو النساء وفى أيام محددة يمكنهن الدخول للمحلات دى أو الشراب فيها بأسعار مخفضة وأحيانآ مجانا... منذ صدور القانون الفدرالى بمنع التمييز فى 1967 ، توالت القضايا اللى بتستهدف النوع دا من التمييز حتى تكون فهم قانونى محدد إنو ما يسمى الLadies Nights دى فى معظم الحالات غير دستورية، وبعض الولايات طلعت قوانينها الخاصة بالممارسات دى... من أشهر السوابق القانونية العندها علاقة بى موضوع حفلتكم دى هى Seidenberg v McSorleys' Ole House فى عام 1970 وهى دعوة ضد بار يسمح بدخول الرجال فقط. رغم إنو القضية دى فى نيويورك إلا أن المحكمة العليا إستندت عليها فى أحد قرارتها الخاصة بالمعاملة الأحسن للنساء بخصوص سعر البيرة... الخلاصة إنو أى ممارسة بتشبه الLadies Nights دى يمكن ببساطة تحديها والمسألة فقط بتبقى مدى الجدوى ألأقتصادية من التحدى دا شنو. .. يعنى زول زى كستاوى دا لو أشتكى المنظمة العاملة الحفلة دى وكسب ... المنظمة دى تدفع ليهو من وين ؟.. ود ا بالمناسبة هو السبب ألأساسى اللى بخلى الناس تعمل حاجات ما قانونية بدون ما زول يسألهم ... وقيسوا على كدة فى كل مناحى الحياة فى أمريكا...وبالأخص ممارسات المهاجريين الزينا كدة...
أخيرا أتهنو بى حفلتكم وما تحكوها شديد... يعنى قرطواعلى كدة...
ويا هبة الماحى أمسكو منى الناس الزى ديل... لأنو أنا كل العايزو إنو تخلونى أحضر وكلامى الفوق دا للعلم فقط عشان لو أى ضهب إتلولو معاكم ماتقولو أطرشنا... أصلو ناس المنطقة دى متعودين يعملوا فيها حملان...
سيف
Post: #16 Title: Re: بلو بلو للمرة الثانية في واشنطن الكبرى..للنساء فقط Author: Kostawi Date: 04-16-2009, 09:30 PM Parent: #15
Quote: زول زى كستاوى دا لو أشتكى المنظمة العاملة الحفلة دى وكسب
والله أقلع ليك دهبهم دا كلو و لوكتروا أقلعهم تيابم
لكن جماعتك محظوظين رسلو لي تذكرة مجانية _____________________________________
يا هبة أعملي ليك طبلة للحجاب بتاعك دا
Post: #17 Title: Re: بلو بلو للمرة الثانية في واشنطن الكبرى..للنساء فقط Author: heba Elmahi Date: 04-17-2009, 01:18 AM Parent: #16
Quote: والله أقلع ليك دهبهم دا كلو و لوكتروا أقلعهم تيابم
Quote: يا هبة أعملي ليك طبلة للحجاب بتاعك دا
تياب شنو و حجاب شنو يا خردة ياخي قلنا ليكم حفلة نسائية و حنان بلوبلو وفي امريكا يعني جدًيع صااااح ، بس ما تدس لينا كاميرات البث الحي ديلاك في طرف بلوزة المدام .
يا سيف وينك ياخي تعال اعمل للخردة دا برنامج يوم السبت عشان حيكون يا حرام براهو في البيت طبعا الشباب بتاعينه ما بقعدوا يوم السبت في البيت و المدام معانا في حفلتنا النسائية غايتو بس تعالوا اتونسوا معاهو
Post: #18 Title: Re: بلو بلو للمرة الثانية في واشنطن الكبرى..للنساء فقط Author: سامى عتبانى Date: 04-17-2009, 05:12 AM Parent: #7
Quote: محتجة انا علي كلمة ثقافة كيزانية
الكوزه المندسه هبه الماحى اول شئ مبروك العربيه والحفله شايفك واقفه ليها الف احمر والله لو لقيت لى زوله تصوره لى تكون عملت خير عشان نشوف جبجبه الكيزان
تحت تحت ممكن اجى اربط مع بتاع الاورغن الاورغن؟؟
Post: #22 Title: Re: بلو بلو للمرة الثانية في واشنطن الكبرى..للنساء فقط Author: heba Elmahi Date: 04-18-2009, 02:34 AM Parent: #18
سـامـي إزيـك
Quote: اول شئ مبروك العربية
يباركوا ليك السمح إن شاءالله يا يابا و يتباركن ايامك
Quote: والحفله شايفك واقفه ليها الف احمر والله لو لقيت لى زوله تصوره لى تكون عملت خير عشان نشوف جبجبه الكيزان
كيف يعني يا سامي نصورها عشان تشوفها ؟ هو نحنا طالبناها نسائية بحتة لي شنو ! طيب ما كان نخليكم تحضروها معانا بالباب عديييييل الجهجهة فوق شنو ؟
و مـغـس مـغـس يـالـعـزابـة ( وش ميت من الضحك )
Post: #19 Title: Re: بلو بلو للمرة الثانية في واشنطن الكبرى..للنساء فقط Author: سامى عتبانى Date: 04-17-2009, 02:06 PM Parent: #3
*****
Post: #20 Title: Re: بلو بلو للمرة الثانية في واشنطن الكبرى..للنساء فقط Author: محاسن أحمد محمد Date: 04-18-2009, 01:19 AM Parent: #19
Post: #21 Title: Re: بلو بلو للمرة الثانية في واشنطن الكبرى..للنساء فقط Author: Galaleldin Abdalla Date: 04-18-2009, 01:36 AM Parent: #20
I will be there
no joke
Galal
Post: #23 Title: Re: بلو بلو للمرة الثانية في واشنطن الكبرى..للنساء فقط Author: heba Elmahi Date: 04-18-2009, 03:00 AM Parent: #21
Quote: I will be there
no joke
Galal
Will See
Post: #24 Title: Re: بلو بلو للمرة الثانية في واشنطن الكبرى..للنساء فقط Author: محاسن أحمد محمد Date: 04-18-2009, 04:39 PM Parent: #23
بصـراحه فكرة نسوان براهم ورجال براهم انا ضدها تماما ومعليش ياشباب نديهم فرصه يعبرو عن رغباتهم فهذا من حقم
واكيد اليله حيكون فى هجيج شديد وحت كلوش
وفرصة الواحد اختار من الرقاصين فرقة الفنون الشعبيه بواشنطون ويا ا خ جلال مرحبيك واكيد يا هبه حاشوفك هناك
Post: #25 Title: Re: بلو بلو للمرة الثانية في واشنطن الكبرى..للنساء فقط Author: Galaleldin Abdalla Date: 04-18-2009, 07:55 PM Parent: #1
Mr Elmalek
The post should be
Hanan again in Washington for ladies if there is any
so can you change it please
Galal
Post: #26 Title: Re: بلو بلو للمرة الثانية في واشنطن الكبرى..للنساء فقط Author: سارة علي Date: 04-18-2009, 08:16 PM Parent: #25
