بعيدا عن زقاقات السياسة... حكاية قرنتية كريمة...

زقاقات السياسة مثل زقاقات الأنادي... إذا دخلت تتفرج لاتسلم,
وإذا دخلت تسمع نمة نمتين لاتسلم, وإذا دخلت إنتكيت علي عصآتك,
وخلفت كرآعك فوق الثانية, وحشرته أصبعك في أضآنك ودوبيت لاتسلم,
وكان مريت مرور الكرآم بالزقاقات برضك لاتسلم, وكان شفطت لك عبار
عبارين, إيآك المطين ومسجم ومرمد...

عموما... الحديث الذي أريد أن أصيغه هنا, بعيد عن هذه الزقاقآ...

قالوا:... الله يكفينا شر قلنا, وقالوا...
في كريمة, ظهرت قرنتية, محنت الناس محنة شديدة. كملت الجروف, وسدرت
لافوق كملت المزروع في الحيضان, وكان في جرايد نخل مهدلات أكلتن, قش
الواطة لحستو, البروس عدمتو نفااخة النار, التقاعدمتهاأسم الحبة,
الفي بطن المطآمير برضو لحقتو...
الناس حاولوا المستحيل للقبض عليها أو قتلها, كل المحآولآت بآءت
بالفشل... أعيان البلد عقدوا إجتماع طارئ وقرروا إرسال برقية لشـرطة
أتـبـرا...

وصلت البرقية, وردت عليها شرطة أتبرا بإرسال إثنين شاويشية لكريمة...
نحآف زي المساويك, قدآم من زمن الأردية والعمم, كل وآحد دآرع في
كتفو بندقية أبوعشرة, كان علقها في كتفو اليمين يميل معاها يمين,
وكان علقها في كتفو الشمال يميل معاها شمال. يآالله شايلين روحهم
وقالين البنادق...

وصلوا كريمة مواعيد الفطور. ناس البلد كلهم مرقوا لإستقبالهم
فوق المشرع. ركبوهم فوق الحمير وزفوهم علي المضيفة...
حليل المضيفة. ( المضيفة عبارة عن غرفة كبيرة, تبني في مكان
منعزل غير بعيد عن المنازل, وغالبا يبنيها ناس البلد عن طريق
النفير. وهي مأوي لكل عابر سبيل, يتفقدها ناس البلد في مواعيد
الطعام عسي أن يكون لجأ إليها عابر سبيل. )

بعد فاصلوهم, وأخدوا خبارهم, الفطور وصل. الجاي بملاح دمعة
بقراصة, والقراصتو مملحة بملاح ورق, والجاي بعمود, ووأحد بصحن
كبير مغطي بكبديق, ووأحد كسرتو بايته مملحها بلسان طير. إنكسروا
فوقهم ناس البلد من كل صوب وحدب, بأصناف متعددة من الطعام. الجماعة
أكلوا تمام, ومصمصوا أصابعينهم. بعد دآك وصل الشاى. كل وآحد
شرب تسعي. وحقبوا بنادقهم, وبقو مندلين علي البحر...

الوقت منتصف النهار, والسخآنة تقلي الحبة. النسوان قامن
علي(التكلة) شدن الحلل فوق النار. الحلل يجقجقن, والبلد,
صآآآنة, وصوت الفنان الكاشف منبعث من راديو قديم حجارته قديمة,
يحاول بصعوبة أن يوصل صوت الكاشف للسآمعين وهو يردد (حبيبي آه
وقلبي تآه يوم الزيارة). الصاجات مولعة, والقراريص مردومة في
الطبآقة. القرية صآآآنة, الدخآخين منبعثة من التكلة ورواكيب
العوآسة. قطع هذا الصمت صوت حمار بدأ ينهق, أزعج قمريتين في
رأس التمرة, طارن وركن فوق شدرة سنط, قوقن لفترة بسيطة, وسكتن,
وعاد الهدؤ يعم المكان, وبدأ صوت المذياع يظهر من جديد, ضعيف
متقطع, والنعام آدم يردد(يقولوا لي يا مسكين عليك ظلم الحسن
وحسين, يا دآب قل نوم العين).
الجماعة مصنقرين فوق البحر والقرنتية ما منها خبر...

حان موعد الغداء...
نادوهم للمضيفة, وناس البلد يعجبوك, ردموا قرآريص, وملحآت
تكفي يأجوج ومأجوج. الجماعة دفسوا تمآآآم, وشربوا الشاي, تآني
كل واحد تسعى, وقاموا علي البحر...
الجو أصبح معتدل نوعا ما. لحظات العصاري جميلة. النيل هادئ,
وساكن, لايعكر صفوه إلا مركب حوآتة تعبث بمجاديفها خالقة فوضي
في وسط السكون الممتد يين الضفاف.
الجماعة حاقبين بنادقهم وقاعدين, البيناولهن سيجارة,
البيناولهن سفة, واحد يديهم تمرآت, ترمس كبكبيق... الخ...
وكت الواطة بقت المغيرب, نادوهم للشاى. شاي المغرب طبعا
شئ أساسي في البلد, وبلبن طبيعي. البرآريد, والكبابي, وقداحة
اللقيمآت ما تديك الدرب, وكل زول يحلف عليهم لآزم يضوقوا
شاهيهو وزلابيتو, وهم طبعا أسكت كب...
ضربوا تمآآآم وبقو مندلين علي البحر...

بدأت حالة الرباط من جديد تحت ضوء القمر الذي أطل في تلك
الساعة من خلف النخيل, جاعلا جزء من ظلالها ممتد علي الرمال البيضاء,
والجزء الآخر منعكس علي صفحة النهر. القمر متسلل للأمام, والظلآل
متراجعة للخلف, والقرنتية لم تظهر بعد. حتي تناقصت الظلآل وإختفت,
وأصبح القمر بلونه الفضي منعكس علي صفحة النهر...
حان موعد العشاء...
الجماعة حقبوا بنادقهم وبقوا سادرين. كمية غير عادية من الفطير
باللبن, والقرآصة بالسمن والسكر, وقرآصة التمر كانت في إنتظارهم.
ضربوا تمآآآم, وكل وآحد كتحلوا كورية لبن, ورقدوا ناموا...

الصباح, عيونهم فتحن فوق براريد الشاي وقدآحة الزلآبية, لهطو تمآآآم,
ما قصروا, وبقوا مندلين علي البحر...
ثلاثة أيام بالتمام والكمال وهم علي هذه الحالة, والقرنتية كأنها
ما وجدت ولا خلقت...

يوم في ساعة الغداء, البروش مفروشة, وعليها كمية من صواني الأكل
لاتجد كميتها في أجعص دكان عدة في البلد, والجماعة عرقانين وشغالين
لهط نضيييف.
واحد من ظرفاء البلد علق قائلا: والله يا جماعة الأكل الأكلوهو
الجماعة ديل القرنتية زآآآتها ما أكلتو...

hhhhhhhh i am laughing in the public library

all the people looking to me ya wd Almudir

really the soldiers are full now

we wait to see if they can kill the hippo or not


seif

adjust for repeat

والله يا ود المدير قربت اقيف فوق


الجروف واكورك ووووووووووووووووووب


يالقرنتية حلينا من الجماعة ديل


تسلم يا معاوية.. واصل ابداع

سيف الدولة كامل

معاوية

يديك العافية على الحكي المنسرب زي غنا أهلنا الشوايقة ...



تحياتي

قرنتية / الشاعر هاشم صديق

قرنتية .. ما غواصة روسية
قرنتية
لا دبابة برمائية
لا جاسوسة مدسوسة .. لا غواصة روسية
لا جندية في "حركة" .. لا مختلسة مال شركة
لا قصفت حدود "فشَلا"
لا كسرت صريف كسلا
لا معروفة ختمية .
قرنتية
لا صعلوقة لبست "شورت"
لا بتعرف شنو البظبورت
لا محتاجة جنسية .
هي قايلة النيل سقِف بيتها
وقايلة ضِفافو "محمية" .
جات منسابة عز الصيف ..
قايلة الناس بِكِرمو الضيف ..
وقايلة النيل أمان والقيف
وقايلة "الحاضرة" عصرية
قرنتية ..
جات بصغارها دايرة الخير
لا شافت يٍفَط تحذير
لا نزحت تكوس توزير
لا جاطت حركة السير
لا دارت وسام تقدير
لا مستلفة عشرين وش
ولا بتعرف تعيش بالغش
كان محتاجة بس للقش
وجات أحلامها دوغرية
قرنتية
لا بلعت عديل السوق
لا نضمت بدون طايوق
لا كنزت دهب أو ماس
لا ظلمت بدون إحساس
لا عصرت شباب الناس
لا كتمت على الأنفاس
لا قطعت عشم بي فاس
لا داستنا زندية
قرنتية
لا دست سلع في الخيش
لا شربت مريسة عيش
لا ضبطوها في التفتيش
لا خانت قسم أو ديش .
لا اجتمعت "بمستر جون"
لا أكلت "مؤنة العون" .
لا سدّت علينا الكون
لا سبت كتاب أو دين
لا سامتنا حمرة عين
ولا باعتنا ضهرية
قرنتية
جات مشتاقة للخرطوم
تزور أحبابها خايفة اللوم .
تصيح وتنادي بالحلقوم :
"جنينة النزهة" وين يا زول .
"جنينة النزهة" وين يا زول .
***
لقت حال الجنينة خلا .
حليل زمنها وحليل أهلها
لا قرنتية .. لا أصلة
لا صوت ككّو .. لا بغلة
لا حلوف .. لا أسداً مهاب بالخوف
لا نمراً يشد للشوف .
لا ضل فيل .. لا تيتل جريهو جميل
ولا غزلان .. ولا طاؤوس يباهي النيل
لا زفة طيور ونعام
لا نمراً دفر قِدّام
كل الشُلّة ياقرنتية غمضة عين
أحالوهم لصالح عام
تقول الدنيا "مهدية"
قرنتية .. ؛
جات زي ضيفة ما غارة .
لا محتاجة لي فيزا .. ولا تصديق على زيارة .
جات والشوق دموع حارة .
تجدد في العيون الشوف .
بين توتي وعلالي أبروف
قايلة الدنيا لسة سلام ما خيم زمان الخوف
لسة هناك ضفاف حرة .
ما مطمورة للمُرّة
قايلة الناس بعزو الضيف
ما بسوقوهو لي حفرة وجوار القيف .
ما بياكلوهو في الصفرة ومصيرو مخيف
قايلة الحاضرة ما غابة .
وقايلة حقوقها محمية
قرنتية ..
لا قدلت في شارع القصر .
لا حامت في وكت الحظر
لا خشت على المأمور .
ولا نطت سلك أو سور
لا دخلت على أمد رمان
ولا كسرت قفل دكان
لا دفرت على التلفاز
ولا عضّت كراع فنان
لا ذاعت بيان للناس
لا احتلت كمان "حيشان"
ولا نصبت شبك للحشّ
جات بصغراها كايسة القش
تلاقي القوت صبح محظور .
وخير البقعة جوه السور
سماحة الدنيا منسية
قرنتية
لا بتعرف عجن أو لخ
وجات أحلامها دوغرية .
عجب .. ساقوها جوه الفخ
عجب .. من طولها وقعت تخ
عجب .. سلخوها صبحية
عجب .. ونحنا بنسلخ الإنسان
كيف ما نغدر الحيوان
عجب .. والدنيا عصرية
قرنتية ..
لا دبابة برمائية
لا جاسوسة مدسوسة
لا غواصة روسية
لا جندية في حركة
لا مختلسة مال شركة
ولا حزبية بعثية
قرنتية !][`~*¤!||!¤*~`][

nice poems dear kamil

أخي السيف...

شر البلية ما يضحك...

Exactely

forget it....

أخي الريس أبوجهينة...

أشكر لك حضورك, وأنت تأتي متخطيا قضبان السكة الحديد,
منساب خلال الفجوات التي بين عربات القطر, لتوصل لي هذه
الكلمات الجميلة...

ود المدير...من السيالة القديمة...

نديدي سيف الدولة...

أرجي الله في الكريبة...


أشكرك علي النص الجميل, المتوآفق مع الحكي...

يا ود المدير

ياخي انت زول رائع وكتاب جدا

الحمد لله الذي اظهر موهبتك

وعقبال الباقين


مودتي


سيف

ود المدير

الجماعة بعتوا ليهم اثنين شاويشية عجاف نشفوا ما لم تنسفه القرنتية..

ده لو بعتوا ليهم فريق معاش (والي بونشاف) كان فرض ضريبة القرنتية على المزارعية..

وعممها على جميع ريفي مروي

المسافر أخوي...
كيف حالك...

أهلنا ليهن أللا نام, لا أكل الطعام...

يا أخوي إنت وين? تجيبونا هنا وتزوغوا!!!

تحياتي ليك, ولكل الأهل طرفك...

Quote: في كريمة, ظهرت قرنتية, محنت الناس محنة شديدة. كملت الجروف, وسدرت لافوق كملت المزروع في الحيضان, وكان في جرايد نخل مهدلات أكلتن, قش الواطة لحستو, البروس عدمتو نفااخة النار, التقاعدمتهاأسم الحبة, الفي بطن المطآمير برضو لحقتو...

القرنتية دي شكلها مؤتمر وطني يا معاوية
تحياتنا للاهل المعاك وماتقطع تلفوناتك .

أفو يا وليد!!!

ما قلنا بعيد عن زقاقآت السياسة,
بتدور تجيبلنا كلآمات مالك...

غايتو في ناس كتار في الحيكومة, وناس كتار من الشعب,
دي شغلتهم. وديل يا وليد, كحماري العبادي...
سألوهو: أي حماريك شر?.
قال: هذا, ثم هذا, وأشار إلي كليهما.

سلامي كتير للأهل حداكمـ...

يجازي محنك يا ود المدير...

قريت حكاية القِرِنتِيِّي علي قول أهلنا الشايقية... بي نفس وااااااااااحد...

وعجبني شديد... كلمة "التَكَلَة" جمع تُكُل... بمعنى المطبخ لي شوايقة لندن...

لك قواسيب مودتي يا الحبيب وواصل حكي... هادِي كِوِّيعة...


أبو الحُسين...

we waiting for you wd Almudir

الله يجازيك بالخير, يا أبو الحسين, أخوي...

عارف...
أنا كنت داير أكتبها ( خسسة ) بفتح الخاء
والسين, والسين, مفردها ( خس ) بضم الخاء..
لكن خفت تبقي صعبة شديد...

ليك مطامير مودتي... لقدآمـ...

سيف اليزل ود البرعي...

ليك قوآسيب شكري...

زي ما بيقول أخونا أبو الحسين...

معاوية المدير

أضحك الله سنك كما متعتنا بالحكي يا لذيذ


سيف

فرس النهر، و الذي يُسمى أيضا فرس النهر المألوف حيوان إفريقي ضخم عاشب إجمالا يعد أحد النوعين المتبقيين على قيد الحياة اليوم من فصيلة البرنيقيات (الآخر هو فرس النهر القزم). يعرف فرس النهر باللغة العربية أيضا بالبرنيق وسيد قشطة كما يسمونه في مصر، و يشتق اسمه اللاتيني و الإنكليزي "هيبوبوتاموس" ( Hippopotamus ) كما العربي من اليونانية ( ἱπποπόταμος ) حيث أن "هيبو" (باليونانية : ιππος) تعني حصان و "بوتاموس" ( باليونانية : πόταμος ) تعني نهر.

فرس النهر حيوان نصف مائي وهو يستوطن البحيرات و الأنهار في إفريقيا جنوب الصحراء الكبرى وقد إمتد موطنه في السابق عبر وادي النيل حتى يصل إلى فلسطين و الأردن شمالا. تعيش أفراس النهر في مجموعات يبلغ عدد أفرادها حوالي 40 رأسا، وهي تبقى معظم النهار في الماء أو الوحل حتى تتبرّد. يحصل التزاوج و الولادة في الماء حيث تقوم الذكور الإقليمية بالتقاتل مع بعضها للسيطرة على مجال صغير من النهر، و تخرج أفراس النهر عند الغسق لترعى الأعشاب و يعتبر الرعي نشاطا فرديا يقوم به كل فرد لوحده أي أن الأفراس لا تتجمع كما تفعل عندما تكون في الماء قرب بعضها البعض.

تعتبر الحيتانيات مثل الحيتان و خنازير البحر و أقربائها هي أقرب الحيوانات لأفراس النهر على الرغم من تشابه تلك الأخيرة مع الخنازير و غيرها من الحافريات المزدوجة الأصابع. يقدر العلماء أن السلف المشترك للحيتان و أفراس النهر إنفصل عن باقي مزدوجات الأصابع منذ حوالي 60 مليون سنة، أما أقدم المستحثات لفرس النهر فيقدر عمرها بحوالي 16 مليون سنة وقد وجدت في أفريقيا وهي تنتمي إلى جنس "فرس النهر الكيني" ( باللاتينية: Kenyapotamus ).

يعرف فرس النهر بواسطة جسده الأسطواني الشكل و العديم الشعر، القوائم القصيرة، و الحجم الضخم. يقارب فرس النهر وحيد القرن الأبيض في حجمه و لا يفوقه في القد سوى الفيلة، وعلى الرغم من قصر قوائمه فإن هذا الحيوان قادر على أن يسبق إنسانا بسهولة في الجري فقد تمت قياسة سرعته بحدود 30 ميلا في الساعة و بالتالي فيمكن اعتبار أنه قادر على أن يسبق عدّاء أولمبيا في سباق للمسافات القصيرة . يعتبر فرس النهر من أشد الحيوانات خطورة على الإنسان على الرغم من شيوعه في حدائق الحيوانات و إظهاره بمظهر "العملاق اللطيف". يعيش حاليا حوالي 125,000 إلى 150,000 فرس نهر في البريّة جنوبي الصحراء الكبرى، و تعتبر زامبيا (40,000 رأس) و تنزانيا (20,000 - 30,000 رأس) الدول التي تأوي أكبر أعداد من هذه الحيوانات، و لا تزال أفراس النهر مهددة حاليا من القنص الغير شرعي للحصول على لحمها و أنيابها العاجيّة ومن فقدان المسكن.

http://ar.wikipedia.org/wiki/%D9%81%D8%B1%D8%B3_%D8%A7%...84%D9%86%D9%87%D8%B1

ود البرعي يا موسوعة...

تشكر علي المعلومات القيمة...

وأحب أضيف إنه عندنا في السودان يسمي أيضا
(العيسيت). ويجيد اللهط, لكن مالدرجة أخوانا الشاويشية...

وحات نضري ماك نصيح شي
ههههههههههههههههههههههههههههه




يديك العافية ياخي

الأخ/طارق جبريل...

هسع المو نصيح فينا منو?

عملت لك مدآخلة في بوست(القمح المصوبر في التقا)

وجاييك قريب في كتابات عن المرحوم النعام آدم...

أشكرك يا طارق...والله ضحكتني جنس ضحك...

up

.

فوووووووووووووووووووووووووووووووووووووق

جميل هذا السرد

بالمناسبة .كنت شاكه انك تكون ود ناس المدير في السيالة عطبرة ..اهل والدتي

حا اكون مبسوطه لو طلعت قريبي

أختي, وقريبتي/منال...

والله إني لأكثر إنبساطة, وفرحة بك...

نعم أنا معاوية ود ناس المدير...السيالة القديمة ـ اتبرا...

أنا سعيد جدا بوجود أهلي, وناس أتبرا هنا...

أشرك على الإطراء يا بت أهلي...

تحـ...ت...

تحت ل..فوق

Quote: تحت ل..فوق

ود البرعي ابقى علي واحدة
يا تحت يا فوق...

هسع نديدي يجي طاير...

والله مشتاقين...

انا شايل طوريتي وقفة الحاجي الله يديها العافية

كنت ماشي اقلع حوض البصل لكن ماني ماشي اما عرفت

اتر القرنتيي دي

Quote: بعيدا عن زقاقات السياسة...

ود المدير،
إنت خليت شنو في السياسة؟؟
ونستك سمحة ،
والرسالة وصلت ،
مزيداً من الإمتاع والمؤانسة .
تحياتي.

أبو الحسين،

إنت الولد دا ماعنده مدرسة؟؟

تحياتي.

Quote: كنت ماشي اقلع حوض البصل لكن ماني ماشي اما عرفت اتر القرنتيي دي

أخوي عبد المجيد, أهآ قول مشيت لقيت بصلك

وقلعتو, البمرقك من العساكر الرسلوهن ناس

أتبرا شنو؟؟, والله داير تسوي حكاية, البياكلو

الأسد أخير من البتاكلوا الضبعة...

شكرا علي طلتك من طاقة مارقونا...

Quote: والرسالة وصلت ،

الدرديري أخوي, قررررط علي كده...

ما قت لك الزقاقات دي البيدخلهاما بيسلم...

ود المدير سلامات ....

بعضهم قال إنو ما في قرنتية ولا حاجة إلا ديل الجماعة طلقوا الإشاعة عشان بي تحت يفضالن الجو .

والبعض الآخر قال شافا تتحاوم من عند المدوقة لي بيارة المقبول.


الأيام دي بقى البحر كلو أصل (جمع اصلة).

Quote: بعضهم قال إنو ما في قرنتية ولا حاجة إلا ديل الجماعة طلقوا الإشاعة عشان بي تحت يفضالن الجو .

يا زول أنضم بالرآحة ما يسمعوك ويجونا

أنا ما بقدر أجري في البرود, يقوم يضربني

جضل يشق لي أصبعي...


كتر خيرك كتير يا ود الطيب علي الطلة...

Quote: الأيام دي بقى البحر كلو أصل (جمع اصلة).

بماإنو الأصلة بتبلع, الحكاية بقت

فيها لهط وبلع...

قالوا خمسة في سندوتش فرد وحييد, حرآآآم كده...