Post: #1 Title: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 02:40 PM Parent: #0
مدخل "بالرجل اليمين ( مع احم و دستور ) بصوت خفيض من غير مكبرات صوت " :
قال ليها : سألتني ان اكلمك عن بلدي ؟ . . . كأنك سألتني ان اكلمك عن نفسي . . . ليس في سيرتي ما يخجل و لا في سيرة بلدي . . . في الحقيقة انها اسيانة . . .
او كما قال
اولاً بالتبادي انت وين غاتسة ؟ و تاني هام مشتاقين شديد
هي محاولة لنبح باقي الحشرجة المحرقة الروح من جوووووووووة دي و متاوقات برقراق الشمولية و ومضات الديمقراطية الشوييية ( التقول حتة طايوقة مشحداها مراة فسلة لجارتها ) البرقها لاح حرية كاشفه عن شوية ابداع و كتير من الفوضى و الجنون المطبق و استجلاء الصورة الحزينة مع الكوارث الطبيعية ( فيضانات ) زائد ( المجاعة ) و الحروب الاهلية و كل مكتسبات مايو الما اتكنست زي الناس بسبب رداءة المقشاشة او لعدم صفاء نية القشاش . . . ايهما اقرب لزعيق الشعارات . . . و اقامة سرداق لبكائية تليق على ما ضاع بين محن الشمولية و احن الديمقراطية و سبر الاماني الاتسربت ما بين كوارث الطبيعة و كوارث البني آدميين و ما مات من اغنيات و نشوف كمين طفل جميل راح . . . ضاع . . . او مات او ماتت امنياته . . . سيان . . هل في فرق ؟
Post: #2 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 02:54 PM Parent: #1
دي كان محاولة سابقة لكن اشفوه الباكراب على تصحيف صديقنا خضر حسين
Post: #3 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 03:04 PM Parent: #2
حكم انقلابات التساب دواره دنيا فرندقس نتجارى فيها سبق سبق نخسر بعض فى هين تراب نتلاوى فى فتح اللبق فاكرين برانا اهل العقاب تارى البحر عوافى عندو معانا حق يا الدنيا زى سكرة وتفك من راسو فك ما الحالة اصلا من بعض حكم انقلابات التساب الدنيا كلها حلتك تنضم مع الفى اخر الفريق من غير تفوتا محلتك الا الماسحين الدقون ختوها بين اهلك قرض بالدين وبالطين بالنسب بالمكرفونات بالخطب بى البنطلونات بالرتب ( فـرق تسـد ) ارخيلى اضانك يابلد وللا اسمعينى من البعيد ولا طارشينى وللابد من حبلى ماتت شتلتى . . . مات بيتى ماتت حلتى لكن يوم ماتو اتولد جواى الف عشم جديد وانا ذاتى من ذاتى اتولدت
Post: #4 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 03:13 PM Parent: #3
قدر الله ما عندنا فيهو قول . . . الا الحيكومة بنقول فيها و نعيد و نزيد و بلادة الحس الانساني بنجر فيها النم مسدار حار يحاكي كجة عين ابو السرة لليانكي و صرة عينو . . . ان بقت سواتم جنس رادي الدندهوب الغادي ام درمان الينادي : حبيبي آه . . . و حبيبي و ين ؟ معقولة بس ؟ و قديماً قيل في سنة تشبه عام الرمادة بل ادهى و أمرّ من سنة ستة ذاتا :
التشادي الجانا غاير لا بزرع لا بتاجر في صفوف العيش يدافر
معقولة بس القال الكلام الفارغ دا منو باللاي ؟ ياها الزراعة و التجارة الخلتك ارفع انسانية منهم ؟ الحمد لله ما كنت بتصنع كان عملت فيها خلقتهم
في نفس الوقت داك كنا بنسمع : ان رأيت الشيخ يرعاه السقم اترى في النفس شدوى من نغم ام الى قلبك يمتد الالم انت انسان بحق و انا بين قلبينا من الحب سنى هي انسانية ربطت بين قلبينا في ربط وثيق او نحو ذلك ، دا كان " Sudan Call " و سودان كول ما اسم محل اتصالات في جدة . . . و لا هو شركة الاتصالات القومية في السودان . . . دا كان نداء السودان ما عندي أي رغبة احقق او اتحقق من صحة النص الفوق دا . قلت ليكم المتذكره من ذاكرتي . . . لانو هي – الذاكرة – موضوعنا هنا و للايضاح اكتر انا مساق علمي ما شايل أي شي ادبي معاي - في الحقيقة انا مع مفارقتي للمساق العلمي لكن احتفظت بكره الادبيين بالضبط زي ما بطلت اشجع الهلال و متمسك بكرهي للمريخ و مع اني خليت الجعلية لكن متمسك بأصلي القرشي الشريف و دي ح نجيها بعدين - وعلى عكس ذوق القطيع البهمهم الرتم و الايقاع و النسق و تفاصيل الادبيين المملة دي انا بهمني المضمون لانو الانسان ابن بيئته و وعيه بتشكلوا المادة و التاريخ حوله في حركتها و سكونها و تفاعلها و تفاعله هو معاها و لتسقط الانساق و الاتساق و لتسقط الحداثة و ما بعدها ذاتها و لتتخير مكان سقوطها جمب يو اس أيه و يونس بيه و السي آي ايه و شر اولئك رفيقاً . ولا جا على عقل بالي أتاكد من معلوماتي عن مبدع النص لانو بشبه جماع يبقى بالنسبة لي هو حق جماع و جماع شاعر مطبوع . . . مرهف الحس . . . رقيق الشعور زي ما كان بتقول كتب الاناشيد و شائعة خبيثة في المدينة قالت مجنون مجنون ؟!! مجنون الحزن المسجون ياخ . . . ليه ما يكون فايتكم بمليون سنة ضوئية في الاحساس المرهف الثبتتو ليهو كتب الاناشيد لكنه اخطا الزمن و القوم المبعوث ليهم رحمة . . . انا غايتو في دي بس مصدق كتب الاناشيد. . . مرات مرات . . . كتب الاناشيد اصدق من كتب التاريخ عندنا . . . التاريخ ما عندو أي قيمة. . . و نصيحة لي الله ما تصدقوا الخريف مافي مطر ملون و لا ترجوا العاصفة تبر بوعدها . . . دا كذب منها ساي لا في انخاب شديدة و لا عندها اقواس قزح . . . القوس الوحيد الح يجيبوا ليكم الانتظار ح تشوفوه في المرايا لما تشوفوا ضهركم ودا بعد ما تجيدوا لحس الكوع لو ما عندكم حق مرايا و لا في جدول فيهو موية نضيفه في حلتكم او ما اتوفر ليكم الزمن تتأملوا الصورة المنعكسة على سطح الماء دي في يوم من ايامكم الكالحة كل زول يبقى على أغنيته و بالعدم يبقى عشرة على كتاب الاناشيد في الابتدائية . . . كتب التاريخ مضروبة . . . و غلفة سلاطين ما زالت تقبح وجه تاريخنا حكاوي اجدادنا القدماء محض افتراء . . . الجا منهم منو ؟ كلو تخمين و احتمالات استاذ التاريخ دائماً كسلان و نجار . . . مرة قالو نام في الكرسي و لما انتبه لقى الفصل منتبه راجيه يكمل حكي قال : هكذا كان ينام اجدادنا القدماء . . . يا الدليبة الشقت الحوش . . . وهم !!!
كذب هو التأريخ حين يصعد بالشعوب إلي حواف الاشتعال, ثم لا نجد الحريق كذب هو التصفيق في ذكرى بطولات الشعوب الزائفة
Post: #5 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 03:50 PM Parent: #4
يا طالع الشجرة جيبلك معاك خيمة خيمة السعودية ... دفو ما بتدفيك لبن اليهودية ... بلدك ينسيك قمحا من امريكا ...خازوق ركب فيك يا طالع الشجرة ... من خيمتك التوبة
Post: #6 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: منوت Date: 04-10-2009, 04:03 PM Parent: #5
بس مداخله أوليه!
" ... القوس الوحيد الح يجيبوا ليكم الانتظار ح تشوفوه في المرايا لما تشوفوا ضهركم ودا بعد ما تجيدوا لحس الكوع لو ما عندكم حق مرايا و لا في جدول فيهو موية نضيفه في حلتكم او ما اتوفر ليكم الزمن تتأملوا الصورة المنعكسة على سطح الماء دي في يوم من ايامكم الكالحة ... " .
ويظل باب الحكو " الأماني " موارياً حتى طلوع النجم !!
Post: #7 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: د.نجاة محمود Date: 04-10-2009, 04:10 PM Parent: #6
الله ياقيقا مدد مدد مدد هادي سلطنة..
Post: #8 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 04-10-2009, 04:13 PM Parent: #7
غايتو انا الصحبة البين قيقراوي الشيوعي ود. نجاة الكوزة دي اصصصصصصله مامريحاني!!!؟؟؟؟؟؟؟؟
Post: #10 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: د.نجاة محمود Date: 04-10-2009, 04:19 PM Parent: #8
Quote: قيقراوي الشيوعي ود. نجاة الكوزة
الود قيقا زول فشفاش اقصد شفاف عارف كل حاجة لانه برضو زول بقرأ كويس شديد لو قريتي كويس شديد لا تملكي الا ان تحبيني و تعلني حبك كمان موش بالدس ذي بعضهم..
بعدين في ريدات كدابتقع براها موش بيقولو عنذنا الارواح جنود مجندة؟ اسع في سبب واحد الزول يحبك انت ولا صاحبنا العندكم داك كان ما الغبا؟
Post: #12 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 04-10-2009, 04:25 PM Parent: #10
Quote: لو قريتي كويس شديد لا تملكي الا ان تحبيني و تعلني حبك كمان موش بالدس ذي بعضهم..
أجي يا نجاة..................بعد العمر ده كله جايا تسألي عن حبي ليك في أسافير لا جات لا راحت...وعن ودي واحترامي ليك في بوست وكمان لي قيقراوي حبيب الكل...عاد بالغتي والله وزعلتنيني جد جد....كان كدة انتي بالجد ضهبتي من الدرب وضهب الدكاترة صعب...عاد بالغتي لكن ياحبيبة... بقتي تقري الحروف زي الناس مابقروها حرف حرف...ووين البين السطور...انتي اظنك كتر عليك شايفا عجاجتك من بوست لي بوست....
المابحب الدكتورة الله قبحوا...والمابحب الشيوعيين الله ظلموا...
محبتي التي كنت أتوهم انك تعرفينها.....
Post: #16 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 04:35 PM Parent: #8
Quote: غايتو انا الصحبة البين قيقراوي الشيوعي ود. نجاة الكوزة دي اصصصصصصله مامريحاني!!!؟؟؟؟؟؟؟؟
ولد دا قوالب صناديق اصلح سراير . . .
مشتاقين يا بلد و الله وينك انت ياخ ؟ كدي خليك من صحبة الكيزان و الشيوعيين ما سمعتي هناية الغناية السجمانة بتغني : عاجباني الصداقة البين احمد و محمد
اسي انا ما صاحبك ؟ تغيبي ساي على كيفك و تعملي نيو لوك و تجي خاشة توش دايرا تلخمينا ؟
عموماً البورد نور و كلو زينة
Post: #14 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 04:29 PM Parent: #7
Quote: الله ياقيقا مدد مدد مدد هادي سلطنة..
كيفك يا فردة اهو قلنا نفتح الذاكرة دي و نجرب كبكنا ؤ كدا احتمال يقيف الانين . . . احتمال
شكرن لوجودك هنا
Post: #9 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 04:19 PM Parent: #6
قل إنّ المساء مساحة البوح الوحيدة و قل إنّ الظّلام يقودنا نحو الصّباح متى يشاء و قل إنا تواعدنا- ليالي الظّلم أن نبقى هجائيين-حتى يستفيق الحرف من حمى التآكل و قل إن الذين يعرقلون مسيرة الأشياء نحو ختامها-يتسابقون على رقاب الصابرين- ليقتلوا طفل الطبيعة و قل إن الطبيعة مسرح الأحياء لا مسرح الموتى و لا مشروع مقبرة النكاية قل إنا بدائيون إذا .. و إنا هالكون و إن قطعنا بالسيوف بحار تسويف القضية أصمت إذا و دعني أستبيح الآن مهزلة التواتر و التوقع
(أ)... لأن الظلم يحدث ارتباكا في التوازن, ما بين أطفال الرغيف – و أنبوب التكثف - عقل كان الكادحون يعمدون الأرض كي تبقى دليلا دامغا ضد التحرك نحو ما ليس احتمالا للتنازع و كانوا يزرعون الأرض حتى تحتملنا واقفين على رموش الموت و التعذيب و كانوا يحصدون الزرع كي نمشي إلي الفوضى بحفنات الرغيف على يدينا, و ننسى أننا كنا نحاول أن نعيد توازن الأشياء , ما بين أطفال الرغيف – و أنبوب التكثف – عقل
(ب) لأن الصبح يبدأ دائما في الزحف و ذاكرة الشعوب تغط في نوم عميق كان الضوء يبدو اقتحاما لقانون الغياب العمد و كنا نحسب الصبح احتفالا مبدئيا بالنهار- لنرقص رقصة الموت الأخيرة و نفتح محضرا لليل - في كل الخلايا- و ننبش ذاكرات الدم دم لا يرعوي لسياسة التحريف أو حتى صلات الدم دم يرتاح في كل الشوارع, كي يؤسس غرفة الوطن- الحقيقة
من "المشنقة " نص شعري ........ دكتور تاج السر جعفر الخليفة طه الريفي
Post: #13 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: شادية عبد المنعم Date: 04-10-2009, 04:26 PM Parent: #9
وهنا يتجلي قيقراوي قال ليك
تعرف جيت أتاوق لقيت ليك أنهار العسل والسمن قلت من شر حاسد إذا حسد
تعرف مودتك تجاه نجاة محمود أحمد دي خير ما فعلت في هذا الزمن الكسيح
وبها أشعر بالإطراء اليست نجاة صاحبتي ولي معها تذكارات وذكريات أوع تسأل
يا حنين والله مشتاقين
يعني صحبة قيقراوي مع نجاة ما مريحاك وصحبتي معاها كيف؟؟
مشتاقين صحص صحي
Post: #15 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 04-10-2009, 04:33 PM Parent: #13
Quote: يا حنين والله مشتاقين
يعني صحبة قيقراوي مع نجاة ما مريحاك وصحبتي معاها كيف؟؟
مشتاقين صحص صحي
شادية
مداخلتي الأولى اختصار لما اوردتي حول العلاقات الحلوة بين الناس من جهة، والتصنيفات العشوائية الافتراضية من جهة، وفرز الكيمان من جهة... وغيرة للصحبة البين نجاة وقيقراوري فكلاهما صديق لي..
اسمعيني بخصوص الشوق الصح صح ده انا جاية الشهر الجاي ده السودان عاد لاااازم المرة دي نتلاقى...ولا شنو؟؟؟؟
Post: #18 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: شادية عبد المنعم Date: 04-10-2009, 04:41 PM Parent: #15
عاد من أسة بفرش السكة ورود ياخ والله ده أحلى خبر
يعني حأقعد أتبسم وأتكشم من أسة لغاية جيتك
ياخ والله مرات أقول الله يجازي السافير الحرمت المرأة السودانية من الزي نجاة تعرفي دي تغمر بلد بحاله بي كل حاجاتها ثقافتها وعلمها ديل العارفنهم الناس لكن عليها خفة روح وجمال وجدان قادر الله
Post: #28 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 07:41 PM Parent: #13
Quote: تعرف مودتك تجاه نجاة محمود أحمد دي خير ما فعلت في هذا الزمن الكسيح
وبها أشعر بالإطراء اليست نجاة صاحبتي ولي معها تذكارات وذكريات أوع تسأل
ليه ياخ البيسأل ما بيتوه
اصلاً انت و الغابة و الصحراء الورطتوني في المسألة
الله في
خليك قريبة
Post: #11 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 04:24 PM Parent: #6
د. منوت يا فنان وينك انت ياخ
كميات من الاشتياقات و تشكرات على الدعوات و التبريكات
تحذير : ما اظن تستمر في رأيك انو الجاي
Quote: الحكايا الطاعمات
لكن ما تحبط و خليك معانا للآخر
Post: #17 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حامد محمد حامد Date: 04-10-2009, 04:39 PM Parent: #11
قيقراوى يا رقيق مش رفيق
هذه والله دعوة وبوح
بل هى الثنائيات المتباينة الى الاندماج
ارتباط الكتابة بالذاكرة
ومعنى ان تكون ابن بيئتك كما قلت
اتابع كتاباتك فان لك فيها ذوق ولى منها طعم خاص
واصل يا حبيب
Post: #20 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 04-10-2009, 04:44 PM Parent: #17
وحدثته عن حكايات جميلة..وامنيات مستحيلة...و.... وحدثها عن زمان لا الزمان...وبعد المسافة والأمكنة...وعن ...وعن حنين.. صار الحديث همسا حزين...صار شوقا وحبا لايفسر...توحد الهم والقضية... وتناجيا.... بعضه عن شوق روح وجسد..وبعضه عن هم جيل...وكله عن وطن ممزق ... استطال الحزن وتمدد ......وثارت براكين..
"حنين في سعيها للبعد عن الرهط"
Post: #30 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 08:39 PM Parent: #17
Quote: هذه والله دعوة وبوح
بل هى الثنائيات المتباينة الى الاندماج
ارتباط الكتابة بالذاكرة
ومعنى ان تكون ابن بيئتك كما قلت
سلام يا حامد يا صحبي هي فعلاً دعوة للفضفضة و البوح و لاعادة صياغة التاريخ بعد ما نبت في صلاح الذاكرة دي اصلاً . . . ماشين سنة سنة في القصة دي و احتمال اقامة دعوى برضو وارد كان لقينا نفسنا مظلومين
Quote: عارف زمان كنت مؤمن بنظرية (قرأتها عن الدكتور محمد اركون).. أن كتابة التأريخ دوما مغلوطة.. لأنها تركز على الرؤساء و الأباطرة..و الحكومات..و الناس العاملة فيها مهمة خالص..الخ..و لم تنتبه لرؤية الإنسان العادي..ولا فكرته عن الأحداث..و بالتالي التأريخ دوما منقوص..
و بما انو المرحوم د. محمد سعيد القدال قال :
" ان دراسة التاريخ ظلت تخضع خضوعاً مغلقاً للتسلسل الزمني للاحداث ، و ظلت حبيسة الفترات التاريخية للحكام ، و كأنما التاريخ مجرد سرد للتسلسل الزمني للاحداث . . . و لانجازات الحكام دون الاهتمام الكافي لتطور المجتمع . "
اها الحكام ديل الينتظروا الالتقتطه ذاكرة الناس العاديين ديل و عملت ليهو save و هنا بنحاول نشوف اثر الزمن عليها و كيف المعالجات تمت للداتا دي وفق الثنائيات التانية الجاطت معاها و نختبر قدرة الذاكرة دي في انتقائيتها او استحقاقها لقب " رام " المعطون في العشوائية
اها يدك معانا و راجين جكتك
Post: #19 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: د.نجاة محمود Date: 04-10-2009, 04:43 PM Parent: #11
Quote: ده انا جاية الشهر الجاي
لالالالالا الكلام دا ما بجي انت لو متجنباني تكلميني بالله ما ممكن انا امشى انت تجي...
اعرف مودتك وباقية لي سند في الزمن الاليم بس عايزة اشاغلك ساكت
محبتي ليكم قيقا وشدوية وحنين
والماعندو محبة ما عندو الحبة
Post: #21 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 04:49 PM Parent: #11
Quote: الود قيقا زول فشفاش اقصد شفاف عارف كل حاجة
دا قيقراوي و لا العالم " ود كلنكيت " الرجل الذي يعرف كل شئ لكن دي مقروءة مع قصة المدد ممكن اي انا زول من اهل الكشف عديل بدليل مرة في الحج كان معاي واحد متصوف جدجد سماني اصلي . . . و انا كنت شايل سبحتو و ماشين . . . لما ليك فينا واحد اتلحني ليك بوس يدين لما استغربت الزول دا ما لو معاي ؟ وكان بردد : يا البتشوفوه المهم صاحبي المتصوف جداً شرح لي انو القصة انو قاصد سيدنا النبي ( صلعم) المهم قلت ليهو يا زول نشوف شنو ؟ اصلاً ما حصل جاني في منام و لا صاحي مريدي الوحيد تاريخياً طبعاً ما اقتنع شبكني ليك : عارفكم ما بتحبوا تقولوا !! سمح اعمل ليك شنو ؟ آي احمونا . . . قالوا لينا ما تحدثوا و مديت ليهو يدي خليتو يبوس
Post: #22 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 05:06 PM
ح تحبطوا خالص لو مشيتوا تنبشوا في وكيبيديا و راح تصدموا
Quote: التاريخ الإنساني مخالفا لما قبل التاريخ بدأ باختراع الكتابة ، بغض النظر عن الموقع الجغرافي . الكتابة هي التي هيأت و خلقت النية التحتية لتراكم المعارف و الذكريات و بالتالي انتشار العلم و المعرفة . الكتابة بدورها أصبحت ضرورة في ضوء الثورة الزراعية التي انتجت الحضارة أي الاستفرار الدائم للجماعات البشرية التي طورت لاحقا أشكالا متنوعة من التجارة و التبادل السلعي .
يعني بداية التاريخ ذاتو مربوطة بالقراية و الكتابة - امة امية ما عندها تاريخ - البداية لا تتجاوز 6000 سنة و الحفريات بتأكد وجود حياة منذ دهور سحيقة لملايين السنين او يزيد . . . و الاحاثة بتأكد وجود ديناصورات في زمن ما و لكنها انقرضت و بقى النمل حليفاً للسكر و مخلد في ذاكرة القرآن الكريم حاجز سورة كاملة بإسمه زي ما قال بوصالح كأفارقة تمام . . . الايقاع عندنا هو المهم . . . تم تم . . . ريقي ، مردوم ، سيرة ، المهم نهيص و نعرض و نتباطن و نستبطن عظمتنا و نعيش زهو تمتع يليق ببطولات صنعت خصيصاً لنا لما شعرة جلدنا تغز ذاتو . . . او تكلّب في رواية اخرى مجيدة خاضوا اللهيب و شتتوا كتل الغزاة الباغية و النهر يطفح بالضحايا . . . بالدماء القانية و الله محيرني فرحتك بالضحايا الطفحوا ديل !! . . . يا عمك الضحايا هنا تبعنا نحنا ياخ . . . دا شنو دا ؟ . . . الفرحان ليها شنو ؟ ما تقول لي القال ليك فرحان منو ؟ آي فرحان . . . كان تسميهم الشهداء طيب ! ما داير احرجك و اسالك هم ضحايا منو ؟ حسب الروايات طاشرات الآلاف شهيد في ساعة زمن واحدة . . . قليك الانقليز بآلة الحرب الحديثة . . . مدافع و اسلحة آلية قصاد سيوف عشر و ريسين بدخلوها في فوه المدفع تسدها . . . في فلم عمر المختار الجماعة بعقلوا رجليهم بحبل زي الجمال في بوادي البطانة و كردفان بالضبط . ما كمان الحرب صبر و اللقاء ثبات و تجي الدبابات المجنزرة تخليهم كفتة . . . مش ختيت الدرب بس ( و الكلام موجه لوردي ما عارف مبدع النص . . . بعدين وردي بخستكاتو الاخيرة دي مفروض نقش فيه اي حاجة ذاتو ) . . . كمان الثيمة ذاتا يا قريبك . . . امسك في قيمة الفداء و التضحية و الثبات دا النصر الحقيقي لكن نتيجة المعركة ما كانت لصالحنا و الغزاة غزو و احتلوا و عاثوا فساداً في امدرمان . و لا كان في كُتَل غزاة و لا دقارات ساي تتصدى او تعيق لواري عسكرهم . ماسكين في الزيف زي البردد بيت المتنبي عن كافور " العبد عبد و لو طالت عمامته . . . الواقف مع ابو الطيب اليتحسس قلبو و عقلوا يا شباب كافور منا آل البيت السوداني و العهدة على العفيف
Post: #23 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 05:11 PM Parent: #22
ستنا شادية و حامد مشوار و بجيكم راجع باقي نضم كتييير
ابقوا عشرة على العقاب و نجي نتمو
Post: #24 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Yassir Bainwi Date: 04-10-2009, 05:19 PM Parent: #23
احم احم
حبيت اثلم بث
وبعدين بجيكم صادي للنضمي
خالص الود
Post: #25 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: د.نجاة محمود Date: 04-10-2009, 05:22 PM Parent: #23
لا ادري لماذا الان يتملكني الاحساس بعيد الوحدة في 3 مارس في زمن بعيد واهزج بنشيد نحنا نهبو قيقا و قيقا يهبو الينا
مودتي لكم جميعا... قلت لي اقنعك تمد يدك تبوسها خبارك يا جنا ما قلت ليه انا شعوعي
ننتظر حكيك ونأسف للهترشة الحب بعمل اكثر من كدا
Post: #26 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 04-10-2009, 05:26 PM Parent: #25
Quote: ننتظر حكيك ونأسف للهترشة الحب بعمل اكثر من كدا
والله عندي جنس هترشة ...بس مادايرين نحرف البوست ونفتله لي قيقراوي...قيقا متابعين واصل..
حاشية...شادية خلاص حاتواصل معاك قبل اجي عشان نتفق..
نجاة..بس ما محظوظة دائما انا كدة مع الناس الحلوة،، امشي يجوا.....اجي يمشوا...
Post: #27 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 06:35 PM Parent: #26
Quote: والله عندي جنس هترشة ...بس مادايرين نحرف البوست ونفتله لي قيقراوي...قيقا متابعين واصل..
عارفة انا بحبك ليه ؟ عشان بتديني فرصة انزل سجعتي دي : يا ستهن بعد ما بقن ستة هن
يا زولة الدبيب ان سكر يا دوب ما استعدل الدرب و البوست دا ان انفتل يا دوب ما استعدل
Post: #31 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 09:00 PM Parent: #29
Quote: قيقراوى يا صاحب
الرابط ادناه ذو صله
سلام يا صديقي رديت عليك بهناك في قصة مقاربة و برضو فيها رابط و ربط و تشبيك بالجد شاكر لكم انت و لنا جعفر على الجرجرة دي للاتجاه الاشتعال و وضعنا في احدى مدارات حمى الحقيقة و لهبها د. تاج السر جعفر
Quote: تمثل قضايا الهويه والتاريخ المزيف عنوة وانهزاميه المثقف وسقوطه فى وحل ذاته المتضخمه وتعريه الشخصيه السودانيه من شوائب كذبها وتلفيقها لحقائق وجودها فى جغرافيا الارض وتواريخ الانتماء اهم ما تناوله تاج السر فى مشروعه الشعري .. واتحدث هنا عن نصوص كتبت فى النصف الاول للتسعينيات .. ويفاجأك ادراكك الحضور الضاغى لكل النصوص فى التعبير عن الوضع الآنى مما يفيد دقة تشخيص القضايا وفضاء مآلاتها فيما سياتى من حريق يلفح وجوهنا الآن
كان لي تعليق قريب من دا اول ما مست عيني النص المجلوب جزء منو فوق دا و شفت التاريخ المزيله بعد اسم مبدعه ( 1994 م ) نص مازال طازج مكتوب منذ 1994 يخاطب القضايا في يومنا هذا . . . بالجد دي الكشوف الشاعرية التي لا يلقاها الا ذو حسٍ عظيم. . . تاج السر مسرف في ايفاء وعيده دائماً
ما عشنا معاكم التسعينات دي ياخ لكن مرت عليناالقصص دي و ما حسينا بيها ذاتو كأن لم يكن
سعيد بوجودك هنا يا صاحب لاكثر من سبب بس خلينا نركز مادمنا في حضرة تاج السر لاني متردد من زمن في استخدام نصوصه في جوبكتي البعمل فيها دي خليك قريب و فرحان بيك ياخ
Post: #32 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-10-2009, 11:09 PM Parent: #31
البحر طلعلوا معانا حق في العقاب . . . عوافي عليهو اخدوا تب و دخل علي حقنا . . . و طفح تماسيح و زي ما ورد في النص " التماسيح مجرمين لابسين دقون شايلين سبح "
نحنا حقنا وين ؟ الماتو مننا كم بزيادة الموية ؟ و كم قبلهم ماتوا مننا قبيل من قلة الموية و نقص الزاد ؟ دا كلو على القدر ؟ . . . امتحان ؟ . . . غضب ؟ و الحيكومة بتعمل في شنو طيب ؟ . . . و حاكمانا لشنو نان ؟
و كم ماتوا بجور و جهل العساكر و صبابات الدم او لمجرد اشباع لنزق الساسة و نزواتهم السلطوية ؟
Quote: إن المراحل تغتصبنا في الحروب لتشتري دخانها اليومي من سوق العساكر إن العساكر باعة يتجولون على أزقتنا ,يبيعون الدعارة للذين يراهقون بشعبنا كانوا كهولا ملتحين و راهقوا ربحت تجارتهم و مات البائعون دماءهم من اجل أن نمشي على أقدامنا, و نحسها تمشي – فنمشي نحو أفق لا يصله الباعة المتجولون دعارة أن تشتري من عسكر شيئا لتحكم دولة الجوعى
تحذير واجب : ( على غرار افخم شركات التبغ العالمية ) لزيادة احتمالات تسويق جليلة و امعاناً في تحري الدقة و لضبط المصطلح : المقصود بالجنود / العساكر هنا ما العموم الملتزم بواجبه الوطني الدستوري و زي ما كان بقول جعفر : الأكل الحلّو داك لما يقع على جلابيتك البيضاء المكوية بتقول عليه وساخة. . . يعني أي تموضع غلط يتحمل مضامين جديدة في الغالب عكسية . . . النعمة تبقى وسخ و الخدمة تبقى نغمة و الشربات تبقى فسيخ اها المقصودين العسكر خارج ثكناتهم و في غير خدمة سد الثغور أو الحانثون بيمين الخدمة العسكرية.
مرات كدا بخطر لي انو في قوى خفية شغالة تنتج لينا في المفاهيم و المضامين و القيم و العيب و اللغاويس دي . . . الخ منو القال انو الوردة وجدت بس عشان تزين جيوب السترات ؟ و ليه قندول العيش لا يصلح الا للأكل ؟ اها انا داير اعكسها . . . عندي رغبة قوية أتناول وجبة دسمة من الورود و ازين جيب سترتي بقندول عيش ! و بالمناسبة انا عندي بدلة وحيدة بعد ما حقت العرس بقت ضيقة . . . و كمواكبة للمرحلة التاريخية و النقلة النوعية و الظروف الطبيعية و الاحوال المناخية و كنوع من الفرز الاجتماعي و تاكيداً لوضعي الطبقي و كإرتقاء طبيعي ظهرت في حياتي بدلة المعاينات . . . و في تطور مجتمعي لاحق بقت بتاعة القشرة في تجمعات البورداب . . .
Post: #33 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 00:21 AM Parent: #32
شايف جيلنا محسود ؟ ليكم حق فيا سادتي انا من جيل الشحادين زي ما قال سعادتو و فرزت هي عيشتا مننا و الله يا اماني سنة 81 فضلة خير سعادة المستشار كان عندنا تلفزيون اربعة وعشرين بوصة ملون بي ضلفتين و عندو اربعة كرعين بقيف عليهن براه في الحوش - آي و الله تلفزيون ، ما دولاب و لا حمار في دولاب و لاحمار ماركتو ناشونال ؟ - و عشان تآمنوا و تصدقوني كمان جابوني فيهو انا و كبسون ( كبسور ) صاحبي . و لو ما كبسون كان راحت اللحظة التاريخية دي سدى و بدون توثيق . قعدت اكورك دا كبسون دا كبسون . . . جاتني خبتة في داقوسي . . . طيب الجمبو دا منو ؟ طبعاً ما عرفتو لاني ما شفت نفسي قبل كدا . . . ما تجي يا امجد تقول لي دا ما تاريخ ؟! تاريخ السجم و الرماد يا فردة طلعونا من المدرسة نستقبل اب عاج لما جى يفتتح كوبري كوستي الجديد وكتها . . . حكمة الله لي اسي اسمو " كوبري كوستي الجديد " كوبري كوستي ربط البلااااااد من سواكن للمجلد . . . بلحن هندي . . . تحديداً لحن اغنية الحصاد . . . حليلا كوستي . . . شفتها في اكتوبر الفات و كأنها مدينة خارجة من حرب تواً و حليلو قبلوا الحساب 16 سنة + عمالة و ارتهان و ترحيل فلاشا + القاب مضروبة ( الامام + المشير + القائد + اب عاج ) ناقص سفاح نقسم الحاصل الجبري على كوبري و قاعة صداقة و سلسلة كتب ( النهج الاسلامي . . . لماذا و كيف و اين " هنا و لا في البلد ؟ " و لزوموا شنو ذاتو ؟ ) + شريعة طبقها كويس ( ما يعادل " سفطها " الخليجية ) وقعد فيها الامام معلي بيها الكرسي . . . ( احكام شريعة جزائية + محاكم عدالة ناجزة - روح الشريعة ) . . . و كُشيب ظريف المدينة يسخر من حالو و حالنا بعد جلدوه 40 سوط حد السكر طالب بقسيمة عشان ما يلاقيه عسكري تاني يقوم ينجلد بنفس السكرة . . . انا مدين ككوستي ذاتها لكشيب هذا و لحكاوية التي تتداولها المدينة بقدرة البقاء و الصمود و العصيان ليهو حق يطالب بالقسيمة لانو حكى : انو في واحد كان جاري لما سالوه قال الحكومة قررت تقطع من اي زول عندو 3 اضنين اضان واحدة لما سالوه طيب انت عندك 2 بس قال ليهم الناس دي بتقطع اول بعدين بحسبوا ! و كان طلعن اتنين ذاتو ما بعتذروا ليك . . . اسي المعادلة دي نتيجتها كم ؟ سلبية و لا ايجابية ؟ و لا بيضاء زي ما كان بقول الرشيد بدوي عبيد . . . ياااهـ . . . ذكرتوني كاس العالم 82 في اسبانيا . . . اه ما ذكرتوني اي حاجة . . . هو اصلاً ماحضرتو شهادتي ح تبقى شهادة زور ساي . . . شاهد مشافش حاقة . . . عشان تحضر مباراة الساعة 10 مساء كان لازم تبيع الدافوري العصر عشان تلقى ليك موقع كويس في صف العيش للعشاء و لما ترجع مهدود تعرف النتيجة الصباح حتى تفهم الحاصل شنو ؟
ابوكم مين ؟ قشيري . . . اي و الله الاولاد المتمردين كانو بقولوها كدا . . . و ينجوا بفعلتهم بسبب الجوطة . . . نحن جيل الهتاف و كان الضجيج حليفنا التاريخي يا عمك لقيناالقبلنا بهتفوا ! . . . قمنا لمينا متعوس هتافنا على خائب رجاء امانيهم . . . و بقينا كلنا نزعق و علّينا الهتاف : داون داون يو اس ايه . . . و المصحفين شغالين داون داون يونس بيه . . . شغب و شقاوة و عدم عرفة ساي برئين كنا ياخ لن يحكمنا البنك الدولي . . . و الوكت داك تلفزيونا لسه ما جاب " ريا و سكينة " عشان كدا سقطت سكينة من الهتاف جهاز الامن جهاز فاشيستي . . . و كبسون يسألني فاشيستي يعني شنو ؟ التقول عارف ريا و سكينة ديل منن و لا سبب شغفن بالدهب و غنائم الغافلين ؟ و التقول بعرف يونس بيه دا منو ذاتو ؟ انهروا ليك : يا معلم فاشيستي يعني ( كعب ) ياخ . . . دوس ياخ مع الناس دي ساي . . . جهاز الامن جهاز فاشيستي الناس دي كان زعلانة شديد عشان كدا انا كنت مصدقهم و انا ذاتو كنت زهجان من صفوف العيش و مدافرتها و معاها غبينة انها ضيعت علي متعة كاس العالم و شاعرهم كان بقول : فال البخونك ويزدريك يا ويلوا من غضبك عليهو و الهتاف صاخب : لن ترتاح يا سفاح الكلام دا زي الايام دي سنة 85 ذات مارس ماسك كتف ابريل . . . اعظم شعب و اعظم جيل الليلة !!! انا بره . . . دا زعمهم هم . . . مساهمتي في الثورة دي ما اتعدت ترديد الهتاف مع الجماعة في غير اوقات الدافوري ( هاتف بارت تايمر يعني او في اوقات الفراغ ) و الهتاف ذاتو مرات مصحّف او كما تقتضي الشقاوة و دائماً الصخب و الضجيج كان حليفاً لنا حتى لما حمونا نشارك في ثورة الاصابع البنفسجية في 1986 قالو ايه ؟ ما كملنا السن القانونية . . . كيف الكلام دا . . . ياخ انا شدة ما كنت كبير لما ابوي مات ذاتو . . . لكن تقول شنو ؟ منطق مافي ... ديالكتيك تك . . . اكلونا حنك بس . . . و اسي كمان الجاية دي ذاتا قالوا مغتربين ؟!! آي ما بقينا سقط متاع ساي بعد ما البترول طلع . . . ناكرين قريشاتنا القاسموا فيها و ليداتنا و ضرائب قسمت ضهرنا . . . اقول ليكم حاجة اناحاكيتكم كمايوي اها انتو يا انقاذيين وينو عرضحالكم ؟ كان عندكم مظاهرات زينا ؟ و برضوا عملتوا هتافات ؟
دي المداخلة الفتحت السيرة الانفضحت دي يا اماني مش ؟
Post: #34 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 00:51 AM Parent: #33
اهايا اماني شفتي كيف ؟ و انا بقلب في دفاتر قديمة لقيت ليك ( ثلاثة مقاطع لفخامته . . . أو سباق الحمير مع خالص التحايا لليد الرئيس ) للفنان خالد عباس الطاهر بتكلم في مسألة استقبال الرؤساء دي و فتح عيني على حاجات تانية . . . نحن كنا اطفال و الاطفال تخدش ذاكرتهم الاشياء بنقوش راسخة كما تواتر في اثر مقاربة التعليم و النقش في الحجر و البحر لكن يفوتهم الوعي بما يجري حولهم الابداً ما ممكن تخطر على بال براءتهم . . . نبهني لوجود المثقفين و دورهم المشبوه و تورطهم في المسألة . . . و المراهقين . . . و وجهاء القوم و المعتوه . . . ذكرني انو لكل مدينة ذاكرة و مبخوتين اشتهر في كوستي جميلها الذي مافتئا ينازع فنانها " صلاح كوستي " اللقب اما كوستاوي بتاعنا دا فدخل المنافسة دي في زمن قريب خالص . . . زمن الاسافير يا دوب . . . جميل كوستي مولع بالاحتفالات خاصة و عامة . . . و نبهني انو تاريخياً كل الرؤساء كانو بمشوا على اربعة بين الرعية ليحلوا مشاكلهم و يضيفوا اليهم مشاكل بوعيهم او بدونه ، كانوا بستخدموا الحمار سابقاً قبل ظهور العرباتذات السقف المفتوح . . . و كلوا بي اربعة
جاء في المقطع ( 2 ) :
Quote: ( إن تهيئة سباق للحمير لاستقبال الرئيس ود حمد لن يشغلنا عن مهامنا التاريخية بل يضيف إلي سيرة النضال الوطني الكثير )
هكذا كان يقول المثقفين في بلادي والقرية تستعد لأكبر استقبال جماهيري يخدش ذاكرة الأطفال بمنظر العربة ذات السقف الذي يسمح للرئيس بتحية الجماهير بعد قليل يحضر رجال الأمن ربما الإطفاء هكذا عودونا تأتي صبايا المدارس ليبصقن ما تم تلقينهن إياه من نشيد وطني ويهرعن لمقابلة عشاقهن إذ أن حضور الرئيس إلى قريتي لا يعني أكثر من ذلك ، إذ يعني فيما يعني إطلاق سراح عباءات الوجهاء من سجونها في خزانة الملابس التقليدية لتستمتع بالحرية في ذلك اليوم هذا الفعل لا يساهم بأدنى حد في إطلاق سراح المعتقلين السياسيين من سجون بلادي ، و إذ يعني فيما يعني إغلاق الأسواق ، إغلاق المرافق الصحية والخدمية ، إغلاق كل شيء إذا كان الرئيس قادماً لافتتاح دار جديدة للحزب الحاكم ، حتى " علي " المعتوه لا يعني له حضور الرئيس غير جبال من كتل الأنوثة يمر بينها متذرعاً بالزحمة ومنتصراً لبعض رغباته الخاصة ، باختصار يمكننا القول أنه لا أحد ممن يستقبلون الرئيس يستقبل السيد الرئيس ،
الوهم بس بصدق لمات ذوي الحاجات الخاصة من معتوهين مراهقين و وجهاء بلا وجه و لا واجهة و مسغفين بلعبوا دور مشبوه و بشتركوا كلهم في تصعيد دورنا نحن كشعب من الشكم ساي لوضع ما دون الجزم . . . مع خالص التحايا للسيد الرئيس . . . لو سمحت ارفع الجزمة شوية عندنا كلام عاوزين نقوله
اها يا اخوانا واحد يورينا نحن دورنا شنو كشعب الله المحتار ؟ بس متمم حسابي زي ما في معادلة الزعيم " عادل امام " ( لا بد للحكومة من شعب تشكمة ) بس نتشكم و نتخارج طوالي يفكونا بيوت ؟ ما بتاخرونا يعني ؟ و لا عشان نطلع نستقبل الرئيس كل ما جانا زائر ؟ و نسمع خطبه و نصفق للصمت الزاعق و نردد وراء الريس الشكر لمواطننا الحبيب ( علي حسن سلوكة ) الاكسبنا لقب " المحتار " في محنة عرفة منو عمك ( سلوكة ) دا ؟! " على حُسن سلوكه " اسي في علاقة بين النصين ديل ؟ ما قلت ليكم نحن شعب أمي . . . قبل ما انسى خلوني اثبت انو لازم تكون قادي عربي عشان تزيد فرص تحقيق احلامك الرئاسية . البعرف يقرأ و ما بقرأ او ما بجيد القراءة امي كهربتو تضلم بلد عديل . . .
Post: #35 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 01:17 AM Parent: #34
نحن اتسرقنا يا اماني . . . امانينا اتسرقت يا جدعان . . . و باعوا لينا احتمال ان يسكت الانين بالشعارات و الهتافات و الضجيج في شكل لفافات مطوية بعناية فائقة و مكتملة الاستدارة ، مع وضع تحذير على غلاف العبوات الفاخرة جداً بخط واضح و صريح " التفكير ضار بالصحة " للتمويه على السلطات الرسمية . . . او بالتواطؤ معاها . . . مين عارف ؟ . . . كل شئ جائز . . . دا زمن الميديا و الاستهلاك و التسويق و التسويف يا صحبتي بانت سوءة الشعارات ، و انفضح عيبنا نحنا ذاتو . . . نحن شعب ما بقرأ و لا براجع ما قرأه . . . و لا قاعدين نحاكم النصوص و لا الخطابات و لا مطلقيها . . . كذب هو التاريخ حين يصعد بنا الى حواف الاشتعال ثم لا نجد الحريق يا اخوانا البقول حاجة يبقى قدرها ( قل ما تشاء . . . كن ما تقول ) . . . ما تكرهونا الضجيج ياخ و تلخبطوا علينا الشعارات بالكترة ياخ ما في دراويش بتصدق ياخ ؟! . . . الببيّن طريق خروج يبقى إمام و أمام و يموت واقف على حيله . . . البطل سقوطه بيكون عمودي نحن دراويش ساي ياخ . . . " عفا الله عما سلف " . . . سيه جديد . . . نفتح صفحة جديدة . . . هي !!! كدا ما ممكن لكن ؟! . . . فط السطر ساي بوديك السرايا الصفراء . . . التجاني الماحي عِدِل . . . و اها طيب كتابة سطر حتى لو كان بالدماء و فط الصفحة لواحدة جديدة دا ما بودي الشكينيبة و بدورلو قيد عديل ؟ قبل كدا قلت لامجد و قبله للنا ذاكرتنا اصيبت بثقب كبير في دهور سحيقة و تم نثر تراب ناعم على سطحها و بقينا نتاوق للتاريخ عبر الثقب دا و بغشاوة ما تناثر من غبار . و يتزلق نص التاريخ - للاسف النص المليان في الغالب - من على سطحها بالتراب الناعم داك للديمقراطية نكهة و طعم . . . كان خلاصتة ما انسرب من عبير " ميثاق الدفاع عن الديمقراطية و ميثاق الانتفاضة " فاح معبق الاجواء و داعب عصب حساس جداً فينا و اكسبنا انتشاء و قدرة على الحلم . . . و كما تعودنا – و الخلا عادتو قلت سعادتو - انو الاحلام كائن ليلي او تأتي تحت جنح خدر عظيم فقط . . . استفقنا على تبين انه مجرد بهار قوي . . . فقط شمار لا غير الشمار دا كلو راح في مرقة شعارات الانقاذ المتدثرة بالاسلام و مدياها كمين ( كوز ) موية " مشروع حضاري " و مجرجر وراه كمية من التبعات " البعث الحضاري " " تعظيم شعيرة الصلاة " التقول الناس ما كان بتصلي ؟! او زول غيرهم انتهك قدسية الدين لدنيوية السياسة . و باقي الشعارات الساي " تثوير الخدمة المدنية " " الصالح العام " " ثورة التعليم العالي " . . . " الخطة الاقتصادية الخمسية " و ايييييييك الكيزان مائيين منذ بدايات الانتماء " الدين بحر . . . " اسي بقوا لينا مرقة لتذويب الشمارات و موية لتمامة الشعارات
و كانوا يبدءون القول بسم الله وبسم الله كانوا يأخذون حصادنا لجيوبهم و بسم الله كانوا ينتهون إلي المقاصل و المذابح, يسفكون دماءنا و بسم الله كانوا يتركون الله , و ينتمون إلي قريش- باحثين عن الإمامة إن الإمامة من قريش.. هكذا فكوا الطلاسم حينما درسوا تواريخ الديانة و بسم الله كنا نستقيم إلي الصلاة وراءهم و بسم الله صاروا يملكون الأرض و الأطفال و الأموال ( الطين في احتماله الاخير ) د. تاج السر جعفر
Post: #36 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 01:39 AM Parent: #35
يا اماني نحن جيل محاصر بالجنود و بالجنون بامتياز . . . و حلفنا مع الضجيج مصنف تحت باب " راسخ " تعال نحسبا : سطاشر زائد اربعة زائد عشرين فيها عشرينين نخت الصفر و نطلع بالاتنين نضيفا للطرف التاني من المعادلة تدينا اربعين نخت الصفر و نطلع بالاربعة يا ها الطالعين بيها من كل الحسبة دي . . . اربعة نضيف ليها كوارث طبيعية و كوارث صناعية و قلة خبرة في ممارسة الديمغراطية و دي كلها قيم سلبية . . . كدا احتمال كبير نطلع مطالبين . . .
نحن اتسرقنا يا جدعان
رايكم شنو نفتح بلاغ سرقة ضد مذكورين ؟
نعم نحن الجيل المذكور أعلاه نتقدم بدعوى ضد الجنود و الجنون بسرقة أحلامنا و أصابتنا بمرض نقص المناعة المكتسبة ضد الضجيج و الفوضى و المنافي . . . و شلل عام في مفاصل الابتكار و الإبداع و قدرة التمييز و التمايز و نتهمهم بإصابتنا بشلل الأطفال ذاتو و نقولها - في قمة العصر كشهود اثبات - بحزن و غضب يليق : انا شهدنا المهزلة متأنقة بسفور بذئ فاضح لكامل عورتها في انتهاك صريح لطفولتنا في حيثيات شهادة الإثبات نقدم " الشعارات " أدلتنا الدامغة كأداة للجريمة المرتكبة في حقنا . . . مطالبنا واضحة و محددة : ( الحقيقة و جبر الضرر ) و بعدين نشوف لو في مصالحة و لا لا ! . . .
و لانو ما اظن للعدل على الارض وجود . . . يبقى حلول كارثة ماحقة احتمال وشيك جداً ما اظن زول يشتغل بينا . . . طيب دمنا الكان مقياس زيت روحنا الطلعت دا يروح هدر ؟
Post: #37 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 02:10 AM Parent: #36
عشان كدا عندي انكم تختاروا واحد من حلين : واحد هارد و التاني سوفت . . .
الهارد و اشفق عليكم منو هو تنظيم طقس انتحار جماعي لكامل الجيل . . . و تدمير الرامات دي نهائي . . . مرة و الى الابد امجد اتكلم عن سعادة مساعدة الجيل اللاحق . . .
Quote: و المثل الصيني قال : “If you want happiness for a lifetime - help the next generation.” لكن اعمامنا و اعمامكم اضاعو فرصة السعادة دي النلحقها نحنا كان كدا
يا امجد يا فردة براك جبتا آخرهامادام المثل صيني يعني الشغلة مضروبة ما اصلي الحل دا لكن مادام فيها بسمة اطفال . . . يبقى بترجح كفة الحل دا لكن برضو انتحار لجيلنا بإلغاء احلامنا ( الكانت معقولة و قيل قدّر ظروفك عديل ) و ( او ) – التركيز هنا ضروري لانها بتأثر على قيمة الاحتمال - تجييرها لجيل لاحق . . . صبايا و فتية يمرحوا في صباح الغد جايين لبكرة اجمل من ظروفنا . . . و صدقوني في حال التجيير ح يقولوا فيكم ما لم يقله مالك في الخمر برضو . . . احلامنا ما بتلبّس غيرنا لانها مقاسنا زي ما احلام القبلنا ما سترت عري البينا ودا الطف انتحار . . . و ح تطلع صحف اليوم التالي تطالع الحقيقة - الكلام الفات دا بعربي البطانة تطالع الخلا - و ح يتصدرها مينشيت بخط عريض لم ينتحر الجيل . . .وافاه الاجلُ . . . و لا عزاء يليق
و لا اقول ليكم ركزوا على السوفت احسن . . .
تعالوا نفرغ محتويات الذاكرة دي هنا و نحتفظ بيها في نسخ سوفت في " فلاش ميموري " و نفرمت الذاكرة الرئيسية . . . و نعيد Upload لذاكرة بي Setup جديد اهم حاجة ما يكون فيها و لا شعار و لا هتاف و بدون ضجيج . . . و خالية من الجعجعة . . . ذاكرة بكرة و بتحمل بالحلال . . . لا عساكر لا درادر لا مظاليم لا مظالم . . . و نحكي عن الطين في احتماله الاخير . . . الاحتمال الممكن او هو الاكثر احتمالاً بس . . البناء . . ما الغفران . . . لسنا من نور لنغفر نرص احلامنا السمحة . . . بدون شعارات و هتافات و ضجيج
رغم انها افكار ناتجة من ذاكرة مغتصبة لكن حزمة احلام معقولة مش ؟ معقولة ؟! . . . . ما اظن ! كدي يا عمك راجع في كم شعار في احلامك دي ؟ و قصة مايكون فيها شعار دي ذاتا ما شعار ؟ هو فضل فيها عقل اصلاً . . . او في شئ معقول او قابل للعقلنة . . . من قمنا كلو مقلوب . . . قلبنا عاقل الا عقلنا مقلوب ؟ ياخ اقول ليكم قولة انا تاعب نفسي معاكم مالي ؟ كل زول يبقى عشرة على جنونة و ثبات عقلة . او يقوم على درقتو و سيفه و اهداك الفيل و ديك الظلال بتستخف الهينين منكم والخطوة البعد داك نقوم نراجع الفلاش و ما تبقى من هتاف و ضجيج نشوتوا بالـ C او نضغط على Delete بعد ما نكون عملنا ليهو برنت آوت و بي كدا بتكون بقت ذاكرة هارد كوبي غير مرغوب فيها نقوم نبلها او " نموصا " و نشرب مويتا - عاجباني ياخ اللغة المستلفة من القاموس الرئاسي دي قلت استخدمها في جملة مفيدة في اقرب فرصة ممكنة – ادوني رايكم كان لغتي ظبطت اكون مشيت خطوة في تحقيق حلمي الرئاسي و يكون كدا باقي لي تعليمة الرقيص . . . و شبال للبستورد لينا كبك رئاسي فاخر يليق بدوس راس أي حقيقة و دوس راس من يتشدد ليها ذاتو
نسيت اقول ليكم لي ما حكيت ليكم عن حلمي الرئاسي و لا اقول ليكم انسوا دي فكرة طفولية مخجلة
زي ما قال ود الزين الكان وحيد امو " جاهزين " مع خالص التحايا للسيد الرئيس ستار . . . اقصد نزل الجزمة خلاس خلصت حكي
Post: #38 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: هاشم الحسن Date: 04-11-2009, 02:36 AM Parent: #37
Quote: يا (اماني) نحن جيل محاصر بالجنود و بالجنون
ياخي مالك عايز تدبرس بينا؟
أكتر من الواقع علينا!
Post: #39 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 02:52 AM Parent: #38
Quote: أكتر من الواقع علينا!
ما دا الواقع علينا ذاتو
فكيتا فيكم مش ؟ و الله يا الحسن لي مدة مكتوم و الحاصل في البورد الصباح دا / مساء عندكم حاجة تسد النفس قلت افتح لي نفاج اخستك فيهو بمزاج و اهو بعد دا الواحد عادي ممكن يفرمت الرامات بما فيها الليلة دي ذاتا بكل احداثها العجيبة دي و اتعامل مع شمس بكرة دي كأنها اول يوم في تاريخ البشرية . . . عاااااااادي
و الله يا الحسن حباً ليك من جووووووة القلب و ياهو حال الاسافير دي فيها الجواهر و فيها الصَدف حظنا كويس طلعنا من النوع الفي رمل الشواطي بلقى الجواهر بالصُدف
Post: #40 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-11-2009, 03:09 AM Parent: #38
المتني ووجعتني يا قيقراوي.. ليه؟؟ الصورة دي وجعتني شدددددددديد.. صورة الصقر الراجي الطفل يموت..عشان ...
Post: #41 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-11-2009, 05:31 AM Parent: #40
صاحبي العزيز أبو همس:
وللا أحسن أبو فادي عشان العقليه الذكوريه وكده ..
جبتني وأنا ببعد.. أمبارح بالذات كنت بديت أقبل وأدي ضهري للبورد.. مكانكم ده حار يا قيقا.. بيوجع.. ونحن الفينا مكفينا .. المزاج معكّر يا صاحبي.. وحراق الروح في اخره.. فسامحني لو جيتك متأخره.. ولو مشاركتي كانت بطيئه.. عندي رصيد في الدنيا ما بقدر أفقده.. احترامي لنفسي, ورثتي من أهلي, الأهم لي من الدكتوراه العايزه اخدها, وأهم لي من نقاشات مافيها زول سامع التاني.. واخرها اساءه ..
الحاجه التانيه ياصاحبي, اني بلملم في أطرافي .. اخر شهر لي الصين.. وشغاله 24 ساعه تقريبا.. يعني نايمه بفكر.. صاحيه بشتغل.. دعواتك يا صاحبي..
المهم.. أبداك من وين؟ خليني أبدأ من الصحبه البينك وبين د.نجاة ليك وليها الاحترام.. لأنها سلّطت جواي ضوء علي حاجه مهمه.. عندي نظريه بتقول انك كل ما تكبر.. نوعية الصداقه بتقل, مع أنه العدديه بتكتر.. رأيك شنو في العلم ده؟ يعني أصحابك بتاعين المدرسه ياهم أصحابك الصحي, لما كنت انت ياكا انت.. وكنت بتعرف تصاحب.. وكان بينك وبينهم حاجات مشتركه كتيره جدا, أولها الحيز الجغرافي نفسه.. واخرها الاهتمامات.. بعدين الحاجات المشتركه بتضيق مع التقدم في العمر.. وانت بتبقي ما انت.. بس بيفضل في حاجات مشتركه ولو بسيطه جدا مع أصحابك الجداد (بضم الجيم).. مالنا بقينا بنفتش علي الاختلاف ونسينا المشترك؟ مالنا بقينا مامستحملين بعض في بلدنا دي؟ يعني الاخر الماعاجبني ده لو ما أنا ما ياهو أخوي وللا أبوي وللا ولد خالتي, وللا زميلي في الجامعه.. أو في البورد !! وهو المفروض لا برضي فيني لا بتمني لي حاجه كعبه.. وأنا كاااااااان اختلفت معاهو لممممممممن اختلفت ما بستحمل فيهو الهبشه..!! وما بعرّضه للمابرضاهو لروحي !!
مبسوطه لأنه لسه في ناس زيك وزي د. نجاة بيعرفوا يشوفوا المشترك, والبيختلفوا فيهو ما الأساس, الأساس بيتلاقوا وين..
المهم دي شوية هضربه وجاياك.. كلامك وجعني زياده.. وأنا الليله علي اخري زي ما قلته ليك .. لكن ما بقدر أفوّت المولد بتاع النواح أو الصراخ ده..
--- تحيات كتار للناس الحلوه, حنين وساره وشاديه ..
Post: #42 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Rihab Khalifa Date: 04-11-2009, 05:42 AM Parent: #41
Quote: امانينا اتسرقت يا جدعان . . .
حذروكم و قالو ليكم: يا تدفعو، يا يشيلو العده و انتو بصراحه ما خفتوش ع العده
---------- بوست حلو كالعاده يا قيقا..
Post: #58 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 11:57 PM Parent: #42
Quote: حذروكم و قالو ليكم: يا تدفعو، يا يشيلو العده و انتو بصراحه ما خفتوش ع العده
---------- بوست حلو كالعاده يا قيقا..
حلوة العيون ياخ الحلاة جات معاك انت دي
اها اسي نسوي شنو يعني ؟ نمشي ننتحر و نجي نشوف الحاصل شنو و لا كيف ؟
يا رحاب تعالي ياخ اعتبريهو بوست الهترشة بتاع رمضان داك ياخ يا سلام ياخ و الله متقريف لهترشتك انت و الملك ديك . . . زمن ياخ !
Post: #43 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-11-2009, 06:07 AM Parent: #41
يا قيقراوي:
Quote: و لا اقول ليكم ركزوا على السوفت احسن . . . تعالوا نفرغ محتويات الذاكرة دي هنا و نحتفظ بيها في نسخ سوفت في " فلاش ميموري " و نفرمت الذاكرة الرئيسية . . . و نعيد Upload لذاكرة بي Setup جديد اهم حاجة ما يكون فيها و لا شعار و لا هتاف و بدون ضجيج . . . و خالية من الجعجعة . . . ..
ياسلام عليك.. دي فكره جهنميه.. بس ما تسألني جهنميه يعني شنو لأني ما عارفه.. ما في أحسن من السوفت.. نبدأ ياسيدي: سنة 88 ياقيقا سنة السيول والأمطار كان عمري سبعه سنين.. (شفت الشجاعه دي كيف) لكن كنت في رابعه ابتدائي (برضو ماتسألني كيف لأنه دي قصه طويله), ونحن ياسيدي ناس الخرطوم القالوا مركز ورفاهيه.. مدرستي حقت الابتدائي مدرسه حكوميه طبعا, الخاص ده كان بتاع الماناجحين وما شطّار.. اللي أهلو ما لقوا ليهو مدرسه حكوميه تقبلوا لأنه مستواهو تعبااااان أو فشل في امتحان, بيشوفو ليهو مدرسه خاصه يعدي بيها.. لكن نحن كنّا شطاااار يا قيقا, وفي مدرسه حكوميه (شفت الدنيا بقت ماشه عكس كيف؟) المهم ياسيدي جات السيول ومدرستنا اتكّسرت.. كل الفصول انهارت تماما.. كأنو جاء زلزال وهدّاها.. ولما بدأ العام الدراسي جابوا لينا خيّم, في نص الحوش, وقعّدونا فيييي الواطه, وجابوا سبوره ودرّسونا ليك.. هسي الله يسألك وينو المركز هنا؟ في تهميش أكتر من كده؟ بس خلق الله دي ماعايزه تفهم انه كلنا في بلدنا دي مهمّشين .. كله تهميش ياقيقا السودان كلّه مهمش ياصاحبي .. نبقي حاجه واحده وللا كلو زول يقلع حق أهلو؟
المهم كانت شهور عصيبه.. بس تمشي وين؟ تخلي القرايه وللا تعمل شنو؟ ما تمت ثلاثه شهور تقريبا وسافرنا من السودان.. لفت السنين ياقيقا ومشيت رحله علميه مع الجامعه سنة 2003 لي حظيرة الدندر... ومرينا علي قري في سكتنا, المدرسه فيها فصل واحد ومدّرس واحد والطلبه برضو قاعدين في الواطه.. أهو 88 لي 2003 ياقلبي لاتحزن.. كلو واحد ياقيقا.. بس الفرق انه مدارسنا في مركز التهميش بقت خاويه علي عروشها.. وبقت محل اللي حتي لو كانوا شطااااااار مافي أمل ينجحوا .. عشان المدارس الخاصه بقت بوابة النجاح الوحيده ...
التهميش أنواع ياصديقي. الأول انك ما ممكن تتحصل علي الحاجه لانها غير موجوده.. والتاني انها تكون موجوده لكن برضو ماتقدر تتحصل عليها.. عشان الكده الخرطوم مركز التهميش, لأنو عندنا النوعين ياقيقا ..
قول واحد ياصاحب ..
Post: #44 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-11-2009, 06:57 AM Parent: #43
نواصل ياقيقا :
Quote: هكذا كان يقول المثقفين في بلادي والقرية تستعد لأكبر استقبال جماهيري يخدش ذاكرة الأطفال بمنظر العربة ذات السقف الذي يسمح للرئيس بتحية الجماهير بعد قليل يحضر رجال الأمن ربما الإطفاء هكذا عودونا تأتي صبايا المدارس ليبصقن ما تم تلقينهن إياه من نشيد وطني ويهرعن لمقابلة عشاقهن إذ أن حضور الرئيس إلى قريتي لا يعني أكثر من ذلك ، إذ يعني فيما يعني إطلاق سراح عباءات الوجهاء من سجونها في خزانة الملابس التقليدية لتستمتع بالحرية في ذلك اليوم هذا الفعل لا يساهم بأدنى حد في إطلاق سراح المعتقلين السياسيين من سجون بلادي ، و إذ يعني فيما يعني إغلاق الأسواق ، إغلاق المرافق الصحية والخدمية ، إغلاق كل شيء إذا كان الرئيس قادماً لافتتاح دار جديدة للحزب الحاكم ، ..
ياسيدي سنة 2008 القريبه دي زارنا سيدهم الرئيس .. في افتتاح مجمعنا الاسلامي مجمع الشيخ خوجلي أبو الجاز للي اتبني بمجهود وتبرعات أبناء الشيخ خوجلي.. يعني مجهود خاص .. يوم افتتاح المركز كان يوم التقاء أسره كبيره أكتر منها أبناء حي واحد,, وسعاده بمجهود الاسره الكبيره دي في تجديد مسجد الشيخ خوجلي وانشاء مجمع اسلامي متكامل .. حيّنا أهله كلهم أقارب وجدهم (الشيخ خوجلي) واحد .. يعني صلة دم قبل جيره .. وزي ماعارف صلة النسب والمحبه اللي بتجمع أبناء الشيخ خوجلي بالساده المراغنه.. يعني العصريه وانت قاعد في حوش البيت يوم الجمعه.. كل جمعه بتسمع المديح عبر أجهزة التكبير بمنتهي الوضوح.. من مسجد السيد علي الميرغني .. وزمان حكومة الزعيم الأزهري كانوا مسمينها حكومة حلة خوجلي عشان اللقاءات والاجتماعات الكانت بتتم في حلة خوجلي بين السيد علي والزعيم الأزهري وبقية الحكومه .. ومعروف انه السيد علي عرض الرئاسه قبل الزعيم الأزهري علي أحد أبناء الشيخ خوجلي اللي رفضها ولكن بقي الود والعلاقه القويه والمحبه للمراغنه, عند كل أبناء الحي شئ فطري منذ الميلاد.. المهم ياسيدي يوم افتتاح المركز كان الكل سعيد لأنه الافتتاح حيشرفوا مولانا السيد أحمد رحمه الله.. وهو وسط أهله وأحبابه وعشيرته .. لايحتاج لحرس ولا بودي قارد .. فجأه قالوا لينا سيدهم الرئيس جايي يفتتح المجمع برضو.. ماعارفه لييه, لكن زي ماعارف في وزارة شنو كدا الأوقاف, استلمت ليك الموضوع فجأه .. المهم يوم الافتتاح من الفجر والحي مزروع ألغام, ستمية بوكس أمن, و مية كومر احتياطي, و و و و حيّنا المادخلوهو عسكر قبل كده اترشّه عساكر زي النمل.. ده كلو لييه عشان سيدهم الرئيس جايي يفتتح مسجد !!!! وسيّدنا أحمد الميرغني جايي في عربيته مامعاهو حرس ولا هيلمانه .. سيّدهم زي ما دخل زي مامرق, زول عبّرو مافي.. وسيّدنا دخل بالهتافات ومرق بعاش أبو هاشم .. واهتز الحي كله لمقدمه الميمون, هي الشعبيه دي كيف ياقيقا ؟ الاستفتاء ده كيف ؟ العسكر ذهلوا .. سألوا النساء والأطفال ماعبّرتوا رئيسنا لييه؟ الناس ضحكوا .. وقالوا نحن حيينا رئيسنا البنعرفوا .. المننا وفينا ..
وماغادر السيد محمد عثمان السودان بعد العزاء في السيد أحمد الا لما جانا وصلي الجمعه في مسجدنا .. واهتز الحي مره تانيه لمقدمه ..
طبعا عشان ماتفهم غلط زولتك لا اتحاديه لا ختميه .. بس دي محبه لله في لله .. أو يمكن نفس فكرتك بتاعة مابشجع الهلال لكن بكره المرّيخ.. كله جايز ..
دي حكايات وذكريات عن زيارات الرؤساء والعسكر والهرج والمرج ..
تحياتي ياصاحبي العزيز..
Post: #45 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حامد محمد حامد Date: 04-11-2009, 08:00 AM Parent: #44
Quote: ذاكرتنا اصيبت بثقب كبير في دهور سحيقة و تم نثر تراب ناعم على سطحها و بقينا نتاوق للتاريخ عبر الثقب دا و بغشاوة ما تناثر من غبار . و يتزلق نص التاريخ - للاسف النص المليان في الغالب - من على سطحها بالتراب الناعم داك للديمقراطية نكهة و طعم . . . كان خلاصتة ما انسرب من عبير " ميثاق الدفاع عن الديمقراطية و ميثاق الانتفاضة " فاح معبق الاجواء و داعب عصب حساس جداً فينا و اكسبنا انتشاء و قدرة على الحلم . . . و كما تعودنا – و الخلا عادتو قلت سعادتو - انو الاحلام كائن ليلي او تأتي تحت جنح خدر عظيم فقط . . . استفقنا على تبين انه مجرد بهار قوي . . . فقط شمار لا غير
الله عليك يا قيقرواى لقد قلت الثقب
وترك هذا الثقب من غير رتق ولا رتاق
من غير ترميم لما تصدع من جرائه
حتى بات الثقب واسعا متسعا
لك ولامانى اجمل التحايا
ومتلبعين
Post: #46 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-11-2009, 11:52 AM Parent: #45
Quote: نعم نحن الجيل المذكور أعلاه نتقدم بدعوى ضد الجنود و الجنون بسرقة أحلامنا و أصابتنا بمرض نقص المناعة المكتسبة ضد الضجيج و الفوضى و المنافي . . . و شلل عام في مفاصل الابتكار و الإبداع و قدرة التمييز و التمايز
جاني جوابك يالمبروك وسابني اشوف الدنيا كويس واعرف غلط الصاح مظبوط سابني اميز واقدر افرز ارجع اميز فرحانابك يا احزان فرح النار بي لوح الزان مبسوطابك يالمبسوط
Post: #47 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Sana Khalid Date: 04-11-2009, 01:03 PM Parent: #46
Quote: جاني جوابك يالمبروك وسابني اشوف الدنيا كويس واعرف غلط الصاح مظبوط سابني اميز واقدر افرز ارجع اميز فرحانابك يا احزان فرح النار بي لوح الزان مبسوطابك يالمبسوط
..... قيقا يا صديقي
من بوستك لبوست حمور يا قلبي لا تحزن!
دي حفلات شواء قلوب الانتو عاملينها لينا دي!
....
زمان اول - يوم بوست اماني - هاجت ذكريات
و الذكرى مرة على حلاوتها
او حلوة برغم مرارتها
ما بيختلط عليك طعمها الا بعد تبقى ذكرى!
لكن زمان اول -الاول داك- كنا بنعرف فن المظاهرات
(قبال نعتزلو و نتجه لفن المسيرات)
مش كانت المظاهرات حلوة على مرارتها!
مش كنا فيها بنضوق طعم الحرية غصبا عن شرقة البمبان
حرية انك تصرخ باعلى صوتك و تقول لا
حرية انك تطلع (حتى لو تقل ادبك) و تقول عقر عقر غلو السكر!
لكن كنا ما بنرضى نشرب السكر بكباية ذل
كان عندنا حلقوم و بنعرف ننبح لامن حسنا ينقرش
صاح السكر ما كان بيرخص.. لكن نحن كمان ما كنا بنرخص!
و لا بنرقص
فوق دم بعض
و فوق كرامتنا
..
يوم الليلة كل شيء غلا
و نحن بنرخص!
و كرامتنا فرشناها سباتة
لعريس
قصدي
رئيس
رقاص!
ما حاقول ليك (خلي السلاح صاحي)
بس خلي الجرح فاتح
لامن اجيك صادة بمهل
Post: #48 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Yassir Bainwi Date: 04-11-2009, 01:29 PM Parent: #47
سلامات يا شباب
هسه ننضم نقول شنو ..... احييييييييييييييييي انا
متل ديل العارضين بره جربناهن كمين مرة
تاني نجرب شان ننضرة
غايتو البحصل بجيب للزول وجع ضهر فكري وطمام عاطفي
وشد عضلي في الرؤي وورم خبيث في الاحلام
Post: #49 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: اميمة مصطفى سند Date: 04-11-2009, 01:47 PM Parent: #48
Quote: مدرستي حقت الابتدائي مدرسه حكوميه طبعا, الخاص ده كان بتاع الماناجحين وما شطّار.. اللي أهلو ما لقوا ليهو مدرسه حكوميه تقبلوا لأنه مستواهو تعبااااان أو فشل في امتحان, بيشوفو ليهو مدرسه خاصه يعدي بيها..
غايتو البحصل بجيب للزول وجع ضهر فكري وطمام عاطفي وشد عضلي في الرؤي وورم خبيث في الاحلام
سلامات يا بيناوي يا فردة ياخ ياخ اشتياقات كميات شنو رافع القزاز عشان موصلي ح يغني ليك يعني . . . انتو صحي و صلنا وين ؟
تعرف حكاية الورم الخبيث الفي الاحلام دا بجيبو تطوير الكوابيس لاحلام كبرى و العهدة على البرغوثي
تعرفي بدايات الالفية التالتة دي جاني خبر صديقاً لينا انتحر طلع خزان سنار و توشك في الازرق سألت تبر تبر جياب الخبر : ليه قال : الدنيا ضاقت بآماله !!! هي لكن ان كان شايف نفسو مفروض يكون فرنسي عديل . . . و على قولو قال اقل حاجة كان مفروض يكون مصري !!!
اسي ضاقت الدنيا و لا سرطان الحلم وسع عليها ؟
سلام يا صديقي الجميل و ياخ شوف لي طريقة للوصل اليك . . . تلفون ايميل اي حاجة ياخ
Post: #59 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-12-2009, 00:23 AM Parent: #47
Quote: قيقا يا صديقي
يا سلام يا سناء يا ملكة انت ياخ تعرفي استاذة دي غالبتني لكن غلبتها و انتصرت للصداقة و الاستاذية حقك و مستحقك و الله و الغجرية ديك ذاتا وصتنا ان التقطنا المميزين في مجايلينا ( و انت الدفعة ) انو يحق لينا طوالي نتبجح اها الزول يتبجح ساي انو صديقك و معتز بيها جداً
Quote: و الذكرى مرة على حلاوتها او حلوة برغم مرارتها ما بيختلط عليك طعمها الا بعد تبقى ذكرى! لكن زمان اول -الاول داك- كنا بنعرف فن المظاهرات (قبال نعتزلو و نتجه لفن المسيرات) مش كانت المظاهرات حلوة على مرارتها! مش كنا فيها بنضوق طعم الحرية غصبا عن شرقة البمبان حرية انك تصرخ باعلى صوتك و تقول لا حرية انك تطلع (حتى لو تقل ادبك) و تقول عقر عقر غلو السكر! لكن كنا ما بنرضى نشرب السكر بكباية ذل كان عندنا حلقوم و بنعرف ننبح لامن حسنا ينقرش صاح السكر ما كان بيرخص.. لكن نحن كمان ما كنا بنرخص! و لا بنرقص فوق دم بعض و فوق كرامتنا .. يوم الليلة كل شيء غلا و نحن بنرخص! و كرامتنا فرشناها سباتة
لعريس
قصدي
رئيس
رقاص!
Quote: ما حاقول ليك (خلي السلاح صاحي)
بس خلي الجرح فاتح
لامن اجيك صادة بمهل
راجيك يا صديقة ما خليتي كلام يتقال دا كلام يتبروز و الى مزيد
Post: #123 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Sana Khalid Date: 04-17-2009, 10:34 AM Parent: #59
Quote: ( و انت الدفعة )
دفعة منو؟
متين حصل الكلام دا ؟
هووووووي يا قيقا انا عملت شهادة تسنين تخارجني من التجنيد بس
Post: #57 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 11:43 PM Parent: #45
Quote: حتى بات الثقب واسعا متسعا
القد خماسي و الرام قواعده بايت و البايت رباعي يا حامد يا صحبي
الله يعنين بس
Post: #56 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 11:33 PM Parent: #41
Quote: صاحبي العزيز أبو همس:
قولي ابو فادي ما بطريركية لكن على الاقل " فادي " انتصار لخيار يخصني تماماً قوى الرجعية وجننت الحكاية و بقت " وجن " اهو الواحد بقى يفرح بجنس الانتصارات التاريخية و الفتوحات النورانية دي تاني ما في " همس " الا كان في اضان سارة علي بس " وش خاتي اصابعه في اضنينو من اثر الضجيج و برضو مادي ليك لسانو يا ابو السا و لي ابو السا رفراف قلبي الشمال داك ذاتو "
Quote: بعدين زد على ذلك، ولصعوبة التحقيق (realization) صرنا نفرح ونهلل عندما ننجح في نيل بعض الحقوق الأساسية.. إقرأ ما قال مريد البرغوثي في مثل هذا الحال:
كَفّاَي بلا قَيْدٍ ولِساني لم يُسكَتْ بعد لم يصدر ضدي حٌكْمٌ حتى الآن ولم أُطرَدْ مِن عملي مسموحٌ لي بزيارة مَن سَجَنوهمْ مِن أهلي وزيارةِ بعضِ مقابرهمْ في بعض البلدان لا مشكلة لدي . لا يدهشني أن صديقي أَنْبَتَ قَرْناً في رأسه وأُحِبُّ بَراعَتَهُ في إخفاء الذيل الواضحِ تحت ملابِسِهِ وهدوءُ مخالِبِهِ يُعجبني قد يفتك بي، لكني سوف أسامحهُ فهو صديقي وله أن يؤذيني أحياناً لا مشكلة لدي . ما عادت بسمات مذيع التلفزيون تُسَبِّبُ لي أمراضاً وتعوَّدت على توقيف الكاكيَّين لألواني ليلاً ونهاراً.. ولهذا أَحْمِلُ أوراقي الشخصيةَ حتى في المَسْبَح لا مشكلة لدي . أحلامي رَكِبَتْ، أمسِ، قِطارَ الليلِ ولم أعرف كيف أودعها وأَتَتْني أنباءُ تَدَهْوُرِهِ في وادٍ ليس بذي زرعٍ (ونجا سائقُه من بين الركّاب جميعاً) فحمدت الله، ولم أبكِ كثيراً فلديَّ كوابيسٌ صغرى سأطوِّرها، إن شاء الله، إلى أحلامٍ كبرى لا مشكلة لدي
شفتي حالنا بقى كيف ؟
يا صديقة هوني عليك في شأن البورد و الله يهون عليك في قصة السفر و يرجعك سالمة غانمة بالشهادة الكبيرة يا رب تعالي قاسميناالهم و بنشيلوا سوا وريني المزعلك منو ؟
Post: #50 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-11-2009, 10:08 PM Parent: #40
Quote: المتني ووجعتني يا قيقراوي.. ليه؟؟ الصورة دي وجعتني شدددددددديد.. صورة الصقر الراجي الطفل يموت..عشان ...
سارة علي يا فردة انا معاكم ياخ !! ما لك دايرة تبقي لي زي وردي ؟ ( وش حاقد على وردي و مطلع ليك لسانو ) انا ما من الضحايا الطفحو ديلك ذاتم ياخ ؟
الفيل اهو داك . . . شايفاهو ؟
تعرفي بعد ما زغت منها في البوست الاول تاني شيطاني قال لي جيبا خشّن ذاكرة الناس دي
سرورة مشتاقين ياخ معليش الكلام دا انتو ما حضرتوه معانا شاركونا شوية ياخ
Post: #51 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-11-2009, 10:24 PM Parent: #50
بي قصة شاركونا دي يا قيقا حتخليني اعترف بي شئ.. انا ذاكرتي خربة جدا..جدا يعني بيدخل بي جاي ويمرق بي جاي.. لكن بوستيكم دة اجباري حينعش الذاكرة.. بالذات قصة اماني بتاعت السيول والامطار .. شامة ريحة مطرة وحياة ابوي.. ذكرتيني العيش الناشف.. وناس المويلح.. والقراصات ..واللمة في الكانون.. وبيتنا الفي الثورة.. في السيول دي جات خالتي من السفر ومشينا خور شمبات(بتاع الحارة العاشرة) عشان نتفرج في الفيضان.. بتتخيل انو عفش بيجي شايلو الفيضان في الخور دة..؟؟ طبعا انا من الناس البيمشو يخمجو في الفسحات مع الشفع في موية المطرة.. وبجي راجعة بي دقة من ناس البيت.. اححححح ايام..لو كنتا عارفة الهموم دي كلها بترجاني كان ثبتا في عمري داك.. وما تقول لي همك شنو...
Post: #52 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-11-2009, 10:29 PM Parent: #51
جعفر نميري ما بتذكر ليه الا...
الكهرباء جااااااااات.. املو الباقاااااااات.. وهسه بتقطع... يا جعفر.. يا جعفر...
تعالي اهمس ليك في اضانك : ياخ انا مبسوط بتشريف سناء خالد لينا دا جنس بسطة
ما تكلمي زول سمح ؟
Post: #61 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-12-2009, 01:13 AM Parent: #52
Quote: جعفر نميري ما بتذكر ليه الا...
الكهرباء جااااااااات.. املو الباقاااااااات.. وهسه بتقطع... يا جعفر.. يا جعفر...
يا سارة دا كلام سمح جداً البوست دا على غرار الحاصل برضو داير فيهو جمع ما جمع تبرعات ما تخافوا عاوزين نجمع اكبر قدر من ادلة الاثبات الشعارات . . . الهتافات . . . الاغاني البتزيف وعينا و اي زول يقدر يساعدنا بآلية لرصد الضجيج ؟
همتكم يا شباب
------------- و تشكراتي يا سارة ياخ ( بعدين بوريك ليه ؟ )
Post: #53 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Hawari Nimir Date: 04-11-2009, 10:32 PM Parent: #51
Quote: لكن كنا ما بنرضى نشرب السكر بكباية ذل
يا الهي... يا سناء خالد.. كــــــــــــــــــــــلام مليان حكي.. وحكمة...بليغه .للغايه
ـــ أأأأأأه يا زمن وقف شويه شكرا يا قيقراوي.. وبجيك راجع..
Post: #55 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-11-2009, 10:48 PM Parent: #53
Quote: يوم الليلة كل شيء غلا
و نحن بنرخص!
يا سناء..ركزتا في جملتك دي شدددددديد.. صحي الحاصل شنو؟؟ الناس ديل مالم؟؟ انحنا ذاتنا مالنا؟؟
نسيت اقول ليك.. قيقا قال مبسوط شديد خلاص لوجودك في البوست.. بس ما توريهو اني قلتا ليك..
لا بالجد..الحكومة دي زي المنومة الشعب تنويم مغنطيسي..
عدلتا عشان كتابتي عاملة زي..مكلوجة
Post: #62 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-12-2009, 01:24 AM Parent: #53
Quote: يا الهي... يا سناء خالد.. كــــــــــــــــــــــلام مليان حكي.. وحكمة...بليغه .للغايه
ـــ أأأأأأه يا زمن وقف شويه شكرا يا قيقراوي.. وبجيك راجع..[
مش كدا يا هواري ؟
اها راجنك
Post: #64 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-12-2009, 01:47 AM Parent: #62
Quote: جاني جوابك يالمبروك وسابني اشوف الدنيا كويس واعرف غلط الصاح مظبوط سابني اميز واقدر افرز ارجع اميز فرحانا بك يا احزان فرح النار بي لوح الزان مبسوطا بك يا المبسوط
صباحك ورد و فل
سلام يا صديقة الوجع و رفيقة النواح
انتي الفاتحة علينا طاقات الشجن الما بنتهي دي ؟ يا بتي ادميتي الروح وجع في بوستك داك تعالي تمي باقي المناحة للجرح النازف كلام دا
ما عرفت اسميه اندياح و لا صهيل ام نياح ؟ كلنا في حلقومنا مغصة محتاجين ننبحها و نحتها برانا . . . احتمال نرتاح . . . احتمال
ليك امنياتي بالتوفيق دائماً و دائماً ليك جميل الفال
--------------- اها استلموا المايك معاكم يا وردية الصباح سارة يا فردة عارفك ما بتقصري ابقي عشرة على السر و ما تكلمي زول
Post: #65 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: د.نجاة محمود Date: 04-12-2009, 02:27 AM Parent: #64
عايزة اعمل الاضاءة دي
صديقتي الصدوقة كلما الاقيها رغم انهااصغر منا بكم سنة قعد تشكي شكية كثيرة جدا(0مرضية) تعبانة زهجانة قرفانة في ىخر زيارة لاقيتها قالت لي والله انا كنت قايلة السودان هو المشكلة لكن اكتشفت مشكلتي فلان(زوجها) لانه من سافر انا بقيت كويسة..
اها دي حالتنا نحنا الجيل العمل ابريل
حضرنا ندوة الميدان الشرقي بكينا وغضبنا لاعدام محمود محمد طه ومشينا في مظاهرات ابريل وتغير النظام ولا جديد تحت الشمس هل المشكلة في السودان ولا في الناس,,,
كان الحلم اكبر واكبر من ان تحده السماء
في كوبر كان في جبار زميلنا الذي يحبه الجميع ويحترمه هذه المحبة جعلت عدد لا يستهان به يذهب الى كوبر لاخراج العتقلين
نقابة الاطباء تلعب دورا رائعا في الانحياز للشعب ثم الجيش والبوليس
ابريل دي كانت مظاهراتها طول اليوم كل الاوقات على عكس من المظاهرات الباقية التي تنتهي بالدوام الرسمي انا كنت من المحظوظات لاني بديت الانتفاضة في الخرطوم وصلت عطبرة قبل يوم من بيان سوار الذهب حضرت مظاهرات الفرح في عطبرة وكان الفرح عارما وذلك اليوم طردت عطبرة الكتيبة الاستراتجية وهي كتيبة تعمل بدل العمال في تسير امور السكة حديد حين يضرب العمال رغم ان كان لدي نوبة ازمةمن بومبان الخرطوم الا انني وجدت من الاوكجسين للمشاركة في تلك المظاهرات الفرحة تلك السنة قدمت لمصلحة الثقافة للعمل فيها واذا يكتب في طلبي لا يوصى بتعينها لاكتظاظ الملحة بالعنصر النسائي يعني ابريل ماابريل الناس ياها الناس ممكن يجاسفو حقوقك الدستورية ساكت كدا ولذلك عرفت حينها لا عزاء للسيدات لان بتاع المصلحة دا ما شاف الانجاز والتخرج من شعبة النقد بالثانية العليا حيث هذا لا يحدث الا نادرا ولم يحدث ابدا ان تخرجت طالبة من هذه الشعبة بالثانية العليا
عشان كدا ياشباب لا تحلمو بعالم سعيد ولا تفتكروا انه المشكلة الحكومة المشكلة في السودان العقلية السودانية العقلية الاقصائية التى لا تتقيد باي مرسوم دستوري وتعمل الفي بالها قوانين معطلة وقصر مشيد ودا العملتوا الانقاذ حين احالت الناس لصالح العام وايضا في الانقاذ كنت قد عدت من امريكا وقدمت لوظيفة مساعد تدريس في المعهد بعد ان بلغت انه قد تم تعيني عرفت ان ابراهيم احمد عمر طلب ملفات مساعدين التدريس وكانت تلك المجذرة حيث رفض اكثر من 16 مساعد تدريس في مختلف الجامعات انا منهم..بعضهم كان قد بدا فعليا التفرغ للدراسات العليا
شوفتا كيف يا قيقا مافي ثورة حتغير اي حاجة لكن الانتخابات ممكن تغير لانه نقدر نحارب الجايبنهم نحنا بثورة الاصبع البنفسجي
مع التحية لاماني وقيقا حنين
Post: #66 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-12-2009, 03:15 AM Parent: #65
يعني يا دكتورة انا وسناء مافي اي تحايا لينا؟؟؟
خلاص الحكومة زي العسل ....هههههههههههههههههه بهظر طبعا..
Post: #67 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: د.نجاة محمود Date: 04-12-2009, 03:44 AM Parent: #66
اوووووووووووه سارة
انت جوة القلب وجوة العين
المحبة كلها ليك
Post: #68 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-12-2009, 05:32 AM Parent: #67
صباح الخير عليكم: قيقراوي أبو فادي, ساره علي السكر, حنين, د.نجاة, سناء خالد .. وكل المروا علي البوست.. سلام مربع..
شكرا يا سناء لأنك قلتي كلام يستاهل يتبروز ويتعلق في ميدان أبو جنزير (سابقا ماعارفه هسي عملوهو شنو !!!) وجات د. نجاة وصاغته بصوره مختلفه باحساسها وأدي نفس المعني .. أنو المشكله فينا.. نحن الاتغيرنا.. اتعلمنا فقه الاستسلام .. وكترت النقه .. جيل البطولات وجيل التضحيات كان زمان, هسي بقينا جيل المنافي وموت الابداع ..
الله غالب..
Post: #69 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-12-2009, 06:03 AM Parent: #68
ساره علي: ليه بس تذكرينا أيام الفيضانات ووجع القلب ده ؟؟ أي نعم أنا بديت لكن عين مغمضه وعين مفتحه عشان قلبي مايوجعني شديد ..
عارفه ياساره, أنا لو يوم بقيت متسااااامحه, وسامحت ليك الحكومات دي كلها علي أي حاجه عملتها فيني أنا شخصيا.. موضوع الكهرباء ده مابقدر أسامح فيهو ..!! معقول ياساره سنينا كلها تروح في الكهرباء جات والكهرباء قطعت ..؟ يعني نبدع متين وللا نفكر نبدع متين ونحن كل البنحلم بيهو مروحه شغاله عشان الحر والبعوض ..؟ ومويه بارده طعمها ما ملح ملح عشان تلجها من البيت ما من السوق؟ مش زمان كنا بنقرأ بالشموع؟ جد والله تولعي ليك شمعتين وتقعدي تقري لمن يكملوا, وتاني يوم تكوني ممتحنه شهاده كمان ..!! كل ما أتذكر كأس العالم اتخيل لي سنة 90 , عشان نشوف المباريات كنا بنطفي البيت كله.. ونخلّي بس التلفزيون ولمبه واحده, المراوح ذاتها نطفيها ونقعد في الحر, عشان ناس الكهرباء قالوا كده!! هسي ده براهو مش ابداع؟ أنا غايتو انتظاري للكهرباء ده دايراهو بعد رحمة ربنا يدخلني الجنه انشاء الله ..!! ياساره ده ما عذاب الهدهد ذاتو.. انتظاري للكهرباء عايزاهو يطوطح اللي كان السبب في جهنم محل الحر الصحي صحي .. شعب لي يوم الليله والناس وصلت القمر وبتهدد بالقنبله الذريه, لسسسسه في الكهرباء جات والكهرباء قطعت ..!! الحاله عندهم نيل حدادي مدادي .. حظهم المصريين وادي حلفا تغرق وهم مستمتعين بالكهارب.. ونحن شعب التضحيات ..!! أها نتكلم عن المويه وللا مافي داعي؟ ساره ياخ هو شعب لسه بحلم بي مويه نضيفه وكهرباء شغّاله مستنيين منو شنو ؟ لكن تشتغل كيف الكهرباء كان مديرها كان خريج اسكول أوف ماس؟, ووزير الزراعه كان طبيب؟!! هي بلد ما عارفه كلية الزراعه براها والطب براها يجوا هسي فييييي 2009 يقولوا عايزين يعملوا فيها طاقه ذريه؟؟؟!!!!! الماشّي يعملها منو الطاقه الذّريه؟ خرّيج فلسفه وفي نفس الوقت وزير موارد مائيه ؟!! دي زي حكاية قيقا بتاعت هكذا كان أجدانا القدماء ينامون ..
الرحمه اني استغيث..
ساره سلامات كتارات ياصاحبتي.. تاني ماتجيبي سيرة البحر الله يرضي عليك ..
Post: #70 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: مجدي عبدالرحيم فضل Date: 04-12-2009, 06:26 AM Parent: #69
Quote: قل إنّ المساء مساحة البوح الوحيدة و قل إنّ الظّلام يقودنا نحو الصّباح متى يشاء و قل إنا تواعدنا- ليالي الظّلم أن نبقى هجائيين-حتى يستفيق الحرف من حمى التآكل و قل إن الذين يعرقلون مسيرة الأشياء نحو ختامها-يتسابقون على رقاب الصابرين- ليقتلوا طفل الطبيعة و قل إن الطبيعة مسرح الأحياء لا مسرح الموتى و لا مشروع مقبرة النكاية قل إنا بدائيون إذا .. و إنا هالكون و إن قطعنا بالسيوف بحار تسويف القضية أصمت إذا و دعني أستبيح الآن مهزلة التواتر و التوقع
بالأماني الفي السفر وأواعي في زمبيل بلاستك والزاد كرتون مخرمه تهوية لمحمول من التخمُر واصل بينا محطات الغياب وتعال علي كل الجروح أمشي.
،،،،أبوقصي ،،،،
Post: #71 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-12-2009, 06:28 AM Parent: #69
ساره كلامك كلو واجعني, مالك ياساره معاي..؟؟
Quote: .لو كنتا عارفة الهموم دي كلها بترجاني كان ثبتا في عمري داك.. وما تقول لي همك شنو...
زمان كان أهم حلم طفولي انك تكبر .. تبقي زول مسئول وراشد وزي الناس الكبار البتكلموا وبيمشوا برّاحه ديل.. مش زيّنا كنا بنطير طيران .. هسي يادوب عرفت انو أبيخ حاجه في الدنيا انو الناس بتكبر !! وعرفتهم كانوا بيمشوا برّاحه ليه؟ الهم ياساره الهم .. لما أتمشي في بكين, اللي هي عالم تالت برضو, أو هكذا قالوا عنها..!! وأشوف الأطفال حلوين ونضاف وبيلعبوا مع أهلهم ومع الحيوانات الأليفه.. بفرح وبزعل .. بفرح لأني بحب الأطفال يكونوا مبسوطين, وبزعل لأني بتذكر صوّر زي حقت قيقراوي الجايبه لينا فوق دي .. بتذكر الضياع اللي عايشنوا أطفالنا .. بتذكر المتشردين وحلم البحث عن خبز يابس وسليسيون ينسي الجوع وانعدام المستقبل .. الصينيون ليسوا أغنياء لكنهم ليسوا فقراء .. يعملون ويكسبون قوتهم.. وفي دولتهم رجال نهضوا بالأمه الي عليّين ... ونحن نهوي للأسفل بسرعة الجاذبيه الأرضيه .. والشعب مازال يحلم بالقوت ..
الله غالب ..
Post: #72 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Shazaly Magzoub Date: 04-12-2009, 10:13 AM Parent: #71
قيقراوي ...وصحبه
امتعتونا......لكن بالحلق غصه
وعسانا...........ماالعمل
Post: #73 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-13-2009, 09:30 PM Parent: #72
Quote: قيقراوي ...وصحبه
امتعتونا......لكن بالحلق غصه
وعسانا...........ماالعمل
العزيز شاذلي
مرحب بيك في ساحة الاندياح الحر تعالوا نقلبلا جاي جاي اكيد بنلقى حل بالعدم نبقى على الحلا بله بس بالمناسبة بله اتحلا من القيد و الزِلة برضو . . . سيم سيم وضع هيك
تعال ياخ فك القصة و لا هي الغصة هنا ياهو محلها
يا بقية الشباب كرمشتوا مشاعري صراحة كدا !! يعني ما نغيب و لا كيف ؟
التعديل التاني عشان افرز القصة من الغصة
Post: #74 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-13-2009, 10:51 PM Parent: #73
انا لي ساعة بعاين وبعيد قراية البوست دة...وباكل ياخ انا اكلتا اكل.. بي سبب بوستيكم دة..
ربنا يجيب العواقب سليمة..
اماني كيفك؟؟ ياختي عشان ننداح ونفك الغصة بتاعت قيقراوي القالا دي ..لازم نجيب سيرة البحر
Post: #75 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-13-2009, 11:07 PM Parent: #74
Quote: عشان ننداح ونفك الغصة بتاعت قيقراوي القالا دي ..لازم نجيب سيرة البحر
سارة انداحي ساكت ياخ البحر عوافي عليهو عرف اخد حقه النيل فاض و انتنا و كشح كل المحرقه براهو كشح كل الموية الما عاوزها خارج حدود ضفافه في زول قال ليهو اتعديت حدودك ؟
واجعني في البحر السكات و سكتني في البحر الوجع
---------------- سارة قلت مشتاقين ؟ ياخ طيب مشتاقين شددددددددددددددددددددديد ( زي ما كنا بنقولا زمان بالضبط )
Post: #76 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-13-2009, 11:45 PM Parent: #75
انا حاسداهو لكن.. البحر
يا ريت لو عندي مقدرة اتدفق وافيض زي البحر.. بدون ما اذي الحواليني..
بالاكتر شدددددديد يا قيقا..
Post: #77 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-13-2009, 11:50 PM Parent: #76
لكن احاول اتدفق شوية يا قيقا هنا... ياخ يا قيقا ياخ انا ما قادرة احب زي زمان... ليه حب وريدة زماااان بيختلف من الحاجة البتحصل دي؟؟ مع ملاحظة انو الكهرباء زمان بتقطع ..وهسه بتقطع..يا اماني.. لكن الحب مختلف بين الزمنين.. ربطو لي الكلام دة..
ملحوظة الي المخهم مقفل:-
انا قاصدة حب ابوي وامي...
Post: #78 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-14-2009, 00:24 AM Parent: #77
Quote: مع ملاحظة انو الكهرباء زمان بتقطع ..وهسه بتقطع..يا اماني.. لكن الحب مختلف بين الزمنين.. ربطو لي الكلام دة..
سمبلي يا سارة
عدّى فـات زمن الوسامة .. والعيون الإلفـة والحضن الملاذ ورهـافة الحس البلوّن . ضحكة الناس العـزاز بعد الحنان .. الكان زمان إستوطن المطر .. الحراز
ودا مننا زي ما قالو الجماعة فوق ( بيان و ايدتها اماني )
Quote: و نحن الساكتون عن القضية كي نحوز على جواز الانتماء.. عاديون في أعيادنا... متسامحون مع اللصوص... نصلي صوب أحزان المساء و نشرب في ليالي العرس نحلم بالبنات و ندعي مجدا من الأسمنت, أو طقسا من البارود, و الكرم المؤزر بامتلاك الأرض و الثروة فلو كنا من الغابات حقا .. لما تركت جموع الناس هذا العسكر المأجور- يرفل في الخضار بإسمنا و لو كنا من الصحراء حقا .. لقاتلنا الرعاة على جذوع النخل, ذدنا عن مياه النيل- آخر ما ادخرنا- للبقاء على مسارحنا و لكنا كما نبدو هجينا نيئا لتلاحم الغابات و الصحراء, إذ يرتاح فوق رؤوسنا التجار و السمار و الفوضى و تحكمنا القبائل و الجنوووووووووود تبا لهذا الإنطهاق المستفز فهذا الخصي يشنق كل أحلام الطفولة
فيا عزيزة :
Quote: لكن احاول اتدفق شوية يا قيقا هنا...
ادفقي . . . و ما تبقي رقراق ابقي يا ضل يا شموس
Post: #79 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-14-2009, 00:59 AM Parent: #78
Quote: ملحوظة الي المخهم مقفل:-
انا قاصدة حب ابوي وامي...
المذكورين اعلاه انتوا انتظروني انا . . . سمح ؟ اكيد ح نحكي عن الحبيبات في الزمن الجميل نانو شنو ؟ بس شيلوا الصبر . . . مخكم تخين و متعجلين كمان !!
اول خلونا نحكي ليكم احتكاك مباشر مع العساكر ديل و في عقر دارهم " تجربة الدفاع الشعبي " و تاني نجي نحكي ليكم عن تجربتي لما كنت رئيس
بعدين اوعدكم نختم بالحب . . . كل الحب . . . و لا شئ غير الحب
اقول قولي هذا و انا محتقب اجمل امنية بلقاء تحت شجرة الحرية ام همبريباً طالق لي وكتها او حتى الغد ايهما اقرب للحقيقة او تحقق الصباح البهزم مشيئة الظلام
تصبحوا على وطن خيّر ديمقراطي
Quote: قل إنّ المساء مساحة البوح الوحيدة و قل إنّ الظّلام يقودنا نحو الصّباح متى يشاء و قل إنا تواعدنا ليالي الظّلم أن نبقى هجائيين حتى يستفيق الحرف من حمى التآكل
Post: #80 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-14-2009, 01:47 AM Parent: #79
Quote: تجربة الدفاع الشعبي
وشكلها تجربة مريرة...خلاس
بس بعد ما تحكي..انا حاكي ليك قصص لذيذة اخوي كان بيحكيها لينا دائما عنو وعن اصحابو لمن كانو في كلية الشرطة ..حكايات ممتعة..مقالب ومصايب..
اخوي دة كان اخر دفعة في عهد الاحزاب.. الدفعة 59,,, طبعا اكيد ما حتجتهد كتير يا قيقراوي عشان تعرف انو زمااااان ودوه الصالح العام... مااااااا قلنا ليك دفعة احزاب.. عارف اخوي دة فيه ذكاء خرافي (جبدتو امي)..ما عرفو يستفيدو منو....
احكي لينا بالدفاع الشعبي.. وانا برضو حاحكي ليك بي محاولات زوغان باقي اخواني منو...الفاشلة..
عاين... انا اخواني خمسة ربنا يخليهم لي..لكن مافي طريقة يزيدم
Post: #81 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: بابكر عثمان مكي Date: 04-14-2009, 09:34 AM Parent: #80
قيقراوي ..
أحيانا حتي الاسي يصبح جميلا ..في حضرة الماضي النبيل
كنا جوعي مكتفين ..كنا شبعي بالحنين ..
لقد ازكيت قلب لا يرهقه الا العشق ..
ولايتعبه سوي الجمال ..
ياخ انت اتاريك برلوم عفريت جدا
زيكو
Post: #82 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-14-2009, 11:38 AM Parent: #81
قيقراوي مساء الخير بتوقيتنا.. حبيت أرفع البوست لغاية ماربنا يبارك في الوقت وأجي أقعد ليهو بمزاج .. وحبيت أسلم عليك وساره علي وكل المرور الكريم .. عندي حكاوي ووجع كتير, بس زي ماقلت ليك الحاله صعبه والوقت فارق معاي .. واصل ومتّعنا بحكيك البديع ووصّف حالنا ياقيقا .. الطوّل مايل وماعارفين حينعدل كيف ومتين .. سلام كتير ليك ياصاحبي ..
---- سروره كلامك الأخير ده عندي معاك فيهو كلام كتير.. أبقي عليهو عشره لغاية ما أجيك راجعه ..
تحياتي ..
Post: #83 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: داليا حافظ Date: 04-14-2009, 02:49 PM Parent: #82
بوست زي نسمة باردة في صيف مولع ...تلف وتلف في البور وتخاف تدوس على لغم ..والخوف ما من اللغم ..الخوف عليهو ..
تضطر تسكت وما تتكلم وجواك وضميرك بقول ليك ...كتمت الحق ..تخاف تقول كلام ..يتحكم عليك بالتنظير ..ثم تولي هاربا ولسان حالك
بردد ...انا مالي ومال كدة ..
تعرف يا قيقراوي أكتر بوستات بخاف منها وبتحاشها المعنونة بأسماء ناس ..بخاف التطفل ..وبخاف الشهادة
لكن البوست ده ملغوم بالمحبة والنوايا الطيبة ..والحكي المغري والمخيف في الوكت ذاتو
داليا ياخ مرحب بيك كتير وسعيدين بطلتك كالعادة بدون كسير تلج ؤ كدا العاقلين في المضارب دي ما كتار و انت ستهم . . . انتي قايلة شنو ؟ الدنيا دي آخرتا كوم تراب . . . قلت اهي فرصة اخلص ذمتي و اكلمك ساي
مداخلتك تشريح بمهارة جراح حاذق لأدواء البورد و كلام زول حادب . . . هكذا يكون الموطن الصالح و لا بلاش حتى مسألة البوستات المسماة بدون خروف سماية دي كلامك مية مية . . .عنوان النص مدخل للاستجابة انا غايتو زيك لكن فايتك بالشمار بجي اتاوق و بمشي من سكات . . . بس الحركة دي ما بعملا طوالي الا يكون احد الطرفين بمهني لكن اسوي شنو اماني صديقة عزيزة و بالجد فقدتها و ما خاب حدسي . . . طلعت مغبونة ( مع اني ما عارف من منو لي اسي ؟ )
يا داليا هنا ما عندنا نقاش و دا طلع البضرب الحيط بوهية . . . و لا عندنا حوار دا طلع " حوار " بفهم كرة القدم يعني مراوغة و لا الحاجات البتخليني اتلبش من اسمعا ديك " بوست فكري " و شنو كدا سغافي . . . يا اخوانا قليل من الرحمة هنا مجرد حكي و ذاكرة بتتحت و اكيد كلو زول حر في ذاكرته مش ؟
تشكرات كميات على الطلة الباهية و خليك معانا و انداحي ساي ياخ
Post: #89 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-15-2009, 00:37 AM Parent: #82
ان شاء الله تتسهل عليك يا اماني و نشوفك هنا زي اول
تعرفي بديت في تنفيذ فكرة تفريغ الذاكرة في سوفت كوبي و محتفظ بي جزء كتبتو النهار في فلاش ميموري فعلاً وبقيت جاهز للفرمتة لكن نسيت اني اروش ! الاوفيس عندي في المكتب 2007 و في البيت 2003 م
غايتو لي بكرة
لك الفال يا صديقة
Post: #87 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-14-2009, 10:18 PM Parent: #81
Quote: قيقراوي ..
ياخ انت اتاريك برلوم عفريت جدا
زيكو ما شوك الشوق للشوفة يا خي ؤ كدا ياخ قبل ما انسى ما تلز لي تلفون للمفاهمة ؤ كدا ؟
في طاري العفرتة دي اتصل بي محمد حسن بعد غيبة طويلة دي عشان يعلق على البوست دا محمد حسن اخو سامر حسن طبعاً . . . اسي يا محمد يا حسن حكاية يعرفوك باخوك السغير دي ما بتحز في نفسك ؟ ( ودي كية ليهو لانو بقرأ و ردو بقولوا لي براي )
Quote: أحيانا حتي الاسي يصبح جميلا ..في حضرة الماضي النبيل كنا جوعي مكتفين ..كنا شبعي بالحنين .. لقد ازكيت قلب لا يرهقه الا العشق .. ولايتعبه سوي الجمال ..
زيكو
بالضبط كدا يا زيكو و عشان كدا استحق تسمية الزمن الجميل
واصلنا الحياة بالحب وحده , و الكل يعرف بأناَ نزفنا دما , حينما شوهت النجمة , على يد قمر الخسوف الجهم ,
.
Post: #85 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-14-2009, 09:30 PM Parent: #80
Quote: عاين... انا اخواني خمسة ربنا يخليهم لي..لكن مافي طريقة يزيدم
في طريقة يا سارة حتى اسألي حنين
هي برضو كان عندها خمسة و بقوا ستة
هنا في البوست دا في اشارة لي كدا
خليك تفتيحا ياخ !
عايني شوتي ساي ياخ خليك من فارق التوقيت دي اصلها ما عندها حل اماني و سناء و بيان شرقنا بكم ساعة ضوئية - توقيت مكة و الخرطوم واحد بالمناسبة - و انتو في اقصى الغرب يعني متقاسمين حراسة العالم دا
فيا حبايبنا اكتبوا ساي . . . عني شخصياً انا ما بقدر على البوح الا في مساحاته الليلية المباحة
Post: #86 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-14-2009, 09:55 PM Parent: #85
انا داخلة فيني خلعة.. ما حتمرق مني بالهين.. ود اختي ممتحن شهادة سودانية... حيدخل الجامعة..الانا متذكرة اني دخلتا قررررريب.. عشان كدة قلتا ليك يا قيقراوي ذاكرتي خربة.. كنتا متذكرة اني دخلتها قريب..لكن مع ود اختي اعدت حساباتي..طلع الزمن ما قريب ..بعييييييد.. ود اختي داخل الجامعة؟؟؟ ود اختي يعملا فيني.؟؟ يحسسني انو زماني فات وغناي مات.. الولد دة متذكرة يوم ولادتو زيي القبال خمسة سنة..مش 17 سنة.. سجمي .. الشئ دة جاري جري.. ياااا حليلي الما وصلتا لي شئ.. قضيتا غربة.. المشكلة هسة في الغربة الجواي دي..اعمل ليها شنو يا اماني؟؟
Post: #90 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-15-2009, 00:45 AM Parent: #86
Quote: احكي لينا بالدفاع الشعبي.. وانا برضو حاحكي ليك بي محاولات زوغان باقي اخواني منو...الفاشلة..
ح يحصل يا فردة ح يحصل
يوم بكرة جميل و باكر ضواي
Post: #91 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-15-2009, 06:16 PM Parent: #90
سامة بن زيد قائد شاب لجيوش المسلمين في كم معركة لكن اسامة بن زيد 2 دي بدعة الإنقاذ او ( الانكاس ) في رواية غير ناطقة بها و جمهور العلماء - ما عارف علماء الفقه ببدو يطلقوا على الجمع جمهور من كم ؟ لكن الجمهور هنا عدد كبير من بين 3 الى ( الـ 40 مليون ميل و هوى ) ما عارف حكاية ( نسمة ) دي جابوها من وين ؟ ( نسمة ) يعني شنو ذاتو ؟ كان نسمة ديل كتاحات دغري كدا . . . كل واحد عامل فيها مقددا اهو جمهور علماء و السلام . . . حد واخد منها حاقة ! المهم قلنا الجمهور يرجح الاخيرة لانعدام الثقات او حتى صفاتهم ساي في سلسلة الرواة في رواية ( الانقاذ ) و اكدت التجربة و البرهان زيف الادعاء . . . هي لله هي لله لا لسلطة و لا لجاه . . . و لما تجي الحارة كل واحد ببقى على رويحتو و مصالحه . . . تعظيم شعيرة الصلاة . . . ساقونا الى المساجد . . . و تفرغوا هم للسوق الجكة دي لله . . . الصلعة دي لله . . . و كل شئ لله . . . كل شئ لله . . . حتى تغبير الرجلين في المسيرات و جكات الصباح في المعسكر برضو لله بالمناسبة ذاتو و الله كان رجعتونا محل ما انقذتونا على قولكم يكون خير و بركة و التاريخ ح يسجل ليكم كل دا مش التاريخ بس الحساب ذاتو ح يسجل ليكم و الحساب ولد و بت و المحاسبة قيد مزدوج و بي كدا رصيد حسابكم بدفاترنا ح يظهر برصيد صفر و الصفر نمرة كويسة و العهدة على نظام الامتحانات " السلي امستيك " . . . و العملتوه دا مهمن اختلفنا او اتفقنا و بغض النظر عن دافعكم " واظ بق مستيك " و سلي خالص و استمراره لعشرين سنة خلاهو سلسيون عديل و زي ما الارقام بعلامات جبرية مختلفة بتعمل مقاصة مع بعضها و بتلغي بعض ان كان قيمها متساوية الانقاذ + الانكاس = 0 . . . مادام مصرين انكم انقذتونا اها انكسونا على وشنا محل ما انقذتونا منه . . . و يا دار السودان ما دخلك شر . . . و عم عبد الرحيم ذاتو يصحي الموت سلام و ما يغشاه شر نحن جماهير " اسامة بن زيد 2 " و هي الدفعة التانية دفاع شعبي . . . دفاع شعبي ؟! رافعاً حاجبي الدهشة كدا قالها عسكري التفتيش في الكوبري " بوليس الكوبري " و لبوليس الكوبري رسالة طريفة لقائده قبل ما يبقى بوليس كوبري . . . و هي طلب نقل محيث : " حيث انني محمول و امي و ابي يعيشون معي الرجاء نقلي لبوليس الكوبري " سبب دهشتو انو العرف او القانون او الآداب المرعية او الما مرعية لكن بسبب سكاتنا المستمر من اعتداء الكاكيين على ألواننا ما اكتر . . . الكان بقتضي نزول ركاب كل الحافلات مع شنطهم و بقجهم و اكياس الورق و النايلو الهواء الشايلو ينزلوا جميعاً للتفتيش الا من قال انا قوات نظامية او كان صديقي مرتضى اب راساً قوي . . . كسفير و ممثل فوق " الحافلة " لينا . . . قدر ما حاولت اقنعو يا مرتضى شيل شنطتك انزل اصرّ انو قوات نظامية . . . قلت سمح سميناها رضينا . . . النشوف اخرتا بعد ما دقونا فتاشة نحن ناس الالوان . . . مائيين و خشبيين و شمع ساكت و فتشوا علبنا - اقصد شنطنا - قبلوا على السادة اللذين استنكفوا ملَكيتنا - و الملكية غير انها حي في جوبا و فريق كورة هي وصف محمل مضامين دونية من مطلقية على المدنيين اقل مراتبه عدم الانضباط و النظام - ما علينا المهم قلنا جا دور السادة المصرّين على تميزهم و المتمسكين بالنظامية . . . و قع فيهم بوليس الكوبري يراجع اوراقهم ورقة ورقة . . . رق او راقَ طلعت الدهشة بكل استهجان الدنيا الممكن و بقدر عليهو العسكري و بعرفه لما صديقنا " مرتضى " اخرج بطاقة الدفاع الشعبي الكان بعتقد انها و سامه الرفيع . . . متأكد لحد هنا بكون بقى صديقنا كلنا لتضامنكم العالي معاهو بالجد يا شباب وكت هي ما بتأهلنا للشرف العالي دا طيب الفكرة كلها كدا على بعضها مقصود منها شنو ؟ بس يذلونا و يجوعونا و نضرب الصقط في بيداء القطينة و بيادة ما عارف لشنو ذاتو ؟ و لا قايلين بي قيقم و عبد الله الدقوشي ( ولدنا ) و محمد بخيت بتاعين اللواء 21 و شوية حنك من هندسة الصافي جعفر و الكاروري ح يبقونا كيزان ؟ ياخ هو غسيل مخ و لا غسيل عجلة ؟ ياخ اعتبرونا لوري . . . سمح ادلقوا مزيد من الكيزان و ادوها ميا تديكم طراوة البخل ليكم شنو ؟ و لا نحن ما بنستاهل ؟ ما انتو مائيين من بديتوها بالبحر مروراً بالمرق البودر الشمار و الموية تمومة الشعار. . .
Post: #92 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-15-2009, 06:26 PM Parent: #90
لا الاحلى ضرب النار . . . قال كراع كديس قال ؟! و كراع كديس لغير الناطقين بها هي بصمة رجل القط - ان صح انو القطط بعملوا ليها فيش و تشبيه - و بوصفوها بشكل اليد الناهشة ليها حاجة ، يعني اتخيل انك بتهبر في فتة كدا و قبّل يدك اتجاه وشك ، الخمس نقاط البتمثلها اطراف اناملك دا الشكل المفروض يكون عليه وضع مساقط طلقاتك الخمس في الدروة علي بالحلال دروتي لقيناها نضيفة كما ولدتها امها الدروة بت حاج حسن . . . دون كيشوت طلع اعقل مني على الاقل كان بقاتل عدو موجود . . . ياخ لحدي اسي بكونوا بدرسوا معركتي المتخيلة ! . . . كانت مع منو ذاتو ما معروفة ؟ دا كيس بكون لسه مسار بحث و دراسة في العلوم العسكرية لاول مرة تكون المعركة فيها من طرف واحد و ما يفسرها الا مجاز مبدع من جنس " المستجد عدو نفسه " . . . يا الادبين دا مجاز مرسل ؟ مرسل وين ؟ مالو بقت عليهو البقت على خطابات وردي البوديها " تقول لا بتمشي لا حاجة ! " و قاموا ودوا ليهو زول مرسال قام المرسال ذاتو مشى و ما جا . . . اها ديل خمسة طلق بتاعت الدروة بقت عليها حال المجموعة - و ديل برضهن خمسة بفكوها سوا الحمد له ما فيها دروة هنا كان اتفضحنا - و مرسال الشوق بتاع وردي . . . في احتمال اكون شاركت مع جاري في مهمة كراع الكديس بتاعو هو ( الاشتراكية ما كعبة و ان كانت في كراع كديس زي الناس ) لكن كدا عدد الفاشلين بزيد لانو جاري ذاتو عندو 3 طلقات و الباقي ما معروف وين بلدو ! ما زعلان ياخ كلٍ لما كسبت يداه ميسر ياخ . . . يا زول احسن ذاتو منو القال ليهم دايرين نبقى قاتلين مأجورين ؟ نحن طلاب ياخ ما عساكر . . . لا مستجدين كهن . . . لا مقددنها . . . ما دايرين ياخ . . . اطلعوا من راسنا بس و شيلو معاكم قاموسكم دا . . . تتك . . . لشنك . . . دروة . . . تجريف . . . و اهم خمسة حاجة التلاتة ديلك و بالله اعفونا من حصصكم دي : الحصة اعلمكم بيادة بالعدد جماعة واحد . . . واحد-أتنين . . . تحضيرات عشاني و عشان الدرس : مشمعات فرش على قدر الجماعة . . .استخدم الساتر عدو خلف . . . عدو امام . . . عدوا و لقوها فارقة ! ياخ نحنا مالنا و مال كدا ؟ . . . نقعد نتخلّع اليوم كلوا و لا في عدو و لا حاجتين ! . . . قدر ما تصنقع تندنقر ما تلقى عدو غايتو الا أكان العدو ياهو الخدار الحولنا دا كان اللعوت و المسكيت او يكون هو التعلمجي القدامنا و بغشغش فينا دا ذاتو !! . . . غايتو السنس اوف هيومر بتاعو دا لسه ما وقع لي . . . كان طلع هو العدو ! ما عافين ليهو . . . الحلو ليهو شنو في خلعتنا ؟ و كان اصلوا القصة لعب ما نلعب حاجة بنحبها . . . قدم مثلاً . الحصة اعلمكم صيانة بندقية آلية كلاشنكوف : بندقية آلية كلاشنكوف مكوّنة من حديد و خشب . . . أي سؤال ؟ ياخ سؤال واحد بس ؟ مالك يا خ انت ظالم كدا ؟ راسنا دا ما اتفرطق عديل من كترت الداتا الاديتنا ليها لحدي اسي دي ذاتو . . . و الكهن ديل ضجوا بالاسئلة الوجودية الكبيرة يقبلوا بيها وين اسي ؟ دي معرفة عظيمة ياخ و حصل لينا الشرف بالغالية " كلاشنكوف المن حديد و خشب مرة واحدة دي " زينا بالضبط في ( الشمال ) في ازدواج الانتماء . بس ان شاء الله تكون حاسمة في مقاربتها في مسارب التوق و الترميز احسن من حالنا و يكون الهجين في هويتها ما نيئ و هي ان شاء الله تكون متحلية بنضج يخليها تستوعب نفسها كأحسن ما يكون و تكون ممتنة لثراء تكوينها مش زي حالنا الا من رحم ربي " ذات منشطرة " او قل متشظية راسا عديل . . . و يكون في مساحات تفاوض ثقافي بين مكوناتها و ما تبقى الشغلة مجرد مساكنة مفروضة او استعلاء و فرض هوية احد المكونات على الآخر . مع انو ما بشبع جوعنا المعرفي لكن طيب نلتزم بالسؤال الواحد : الخشب قدام و لا وراء ؟ ما تقول لي عندي ماجستير ! . . . حتى لو عندك ملاريا ذاتو تندرش هنا دا . . . كهن مرض بيدعوا المرض . . . انتباه يا كهنة . . .
Post: #93 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-15-2009, 06:53 PM Parent: #92
في تصعيد خطير لاحق نقيب اعتقد اسمه ابراهيم ضرب طالب ( كهنة ) بعصاه على بطنه تخيلوا ليه ؟ لانو بطنوا ما كان ماخدة حذية مع بطن الجمبه . . . طيب ياخ بطني كبيرة خلقة ! . . .عندي فوفاية او استسقاء عديل انتوا مشكلتكم شنوا يعني و الحذية ح تفيد البلد بشنو ؟ طبعاً الطالب انفلت و في حمى فورة غضبه سب للضابط . . . فجأة و اظني كنت بجاسف لي في عيش من الفرن - محدثكم حريف طبعاً بلبد محل المأكلة - مالو ما برضو سد خدمة و سد حنك في القِر العلينا دا و إن بقيت مجاسفاتي خالص ممكن يبقى ليك سد مال بخشم الباب او فتح خشم و الله عندنا جنس تفاصيل للعرس مع السد و الفتح دي ؟! تمحن !! تفتح خشمك تدفع . . . حكمة الله العدوى في فتح الخشم ما في التثآؤب بس هنا برضو يفتحو خشمهم ( مجاز ) . . . و تاني يفتحوا خشمهم ( حقيقة ) يقولوا خير تدفع برضو ! . . . و بي كدا تكون ورطت نفسك في سد مال عشان تاني ما تفتح خشمك دا يا تسد خشمك يا تسد مال . . . السد السد . . . الرد الرد آسف خلونا من السد نرجع لموضوع السب و منادي الجمعون و ما ادراك ما الجمعون . . . دائماً الجمعون يعني في كفوة حاصلة . . . الكفوة دي تتسع و تضيق على كفية قلب المنادي . . . ياخ مرات يصحونا ساعات الصباح الاولى عشان ايه في ناس بتعملها ( نمرة 2 ) في المسكيت او ( نمرة 1 ) في ارض التمام يا خ ارض التمام دي ارض الميعاد . . . ما ارض زيها و زي أي ارض اسي دي ونسة تصحونا ليها من النوم ؟ ونسة تطمم البطن غايتو لكن نعمل شنو ؟ المهم المرة دي كبيرة النداء واضح الجمعون ما في ارض الميعاد اقصد المحشر سوري ياخ ارض التمام الما عاوزنها تتدنس بمياه غير موزونة بالاوزون . . . الجمعون المرة دي في الهنقر . . . و الهنقر يا ملكية معناها في زائر كبير من نوع العباس القائد العام للدفاع الشعبي او اي واحد احتمال يكون من شمع خايفين عليهو من لهب الشمس في ارض التمام . . . الاشاعة اقتربت من التحقق قاب قوسين او ادنى و بقت حقيقة راسا عديل " جايي قاضي من القطينة ( المدينة) عشان يعملوا محكمة للطالب السباب دا جاء مولانا و اجتمع الجمعون و الهنقر فاض و امتلأ بـ 3000 كهنة و كل العسكر و الضباط و حكمت المحكمة الهنقرية بجلد الطالب السباب كم جلدة ما عارف او ما سمعت كويس . . . ما مهم لانو ما اظن زول اهتم هل اتنفذ الحكم و لا الامور جاطت قبل نهاية الحكم ؟ حيث علا هتاف : لا للظلم و ردد كل الهنقر : لا للظلم و تعالت الصيحات و انتشر و باء الهتاف : لا للظلم انا شخصياً ما عارف كنت بهتف ضد ياتو ظلم ؟ العلي و لا العلى السباب دا كان قرايتي الانية وكتها زول سب دين و جلدوه . . . بح لكن لو فاجأتكم انو القاد الهتاف دا - اللحظة دي حاضرة تماماً كأنها امس - قام على حيله مخالف كل التعليمات العسكرية و هادي احد اهم شروطها و صفاتها ( الانضباط الصارم ) بدون استئذان و بدأ الهتاف ، المدهش حقاً انو القراية المتقدمة دي من رجل متدين و ملتزم جداً يتم تصنيفه دائماً لتيار سلفي مشهور زي ما اتكدنا لاحقاً في الجامعة . . . الوضع دا كان بنتهكنا و بدخلنا في حرج ناس انحنا ديل. تفجر الوضع بعدها و انفلتت الامور و الهتاف صار اكثر صخباً و ضجت الساحة بالتنادي للخروج من المعسكر و قد كان . . . هاصت المسألة خالص و اختلط الحابل بالنابل و تحول المعسكر لحالة فوضى عارمة و تحول الكهن الما كان بملكوا لنفسهم شيئاً لكتل من غضب و تصميم لانهاء القصة لحد هنا لتحرق الجامعة ذاتو و تحول الانضباط و التنظيم لمظاهرة و مسيرة انتهت في ابو جنزير في قلب الخرطوم . . . بالجد دا الحصل الناس كداري و تهتف لحدي الخرطوم ما قادر اقدر المشوار بالكيلو متر ، لكن طول المشوار بين كوستي الخرطوم 320 كيلو و القطينة اقرب للخرطوم و اعتقد انو ود الزاكي هي منتصف عادل للـ 320 كيلو دي ، من كترة المساسقة ايام الجامعة و خاصة السنتين الاوائل كنت بسلي نفسي بتقسيم المشوار دا لاربعة ارباع الربع الاول بنتهي بالقطينة بعدين الدويم قصاد البنطون " ابو حبيرة " الدويم بالغرب طبعاً ثم الكوة ، و اخر محطة كوستي ذات نفسها . مليون سؤال دارو في رأسي وكتها . . . بالجد حكاية انو الزول الاتجلد دا بستاهل الجلد دي بقت لي انو فعلاً بتدخل القراية دي ضمن المهتوف عليهم ( الظالمين ) الضالين الطريق لاستقامة صراط التفكير . . . يعني زول طالب اصلاً الشغلة ما شغلته لكن ظروف الجامعة جبرته يجي يتهان و يتبهدل كدا لانو ما حذية . . .
حذية حصان ؟
هذا ما كان عن الناس المشت الخرطوم . . . انا ما مشيت الخرطوم ح اجيكم اوريكم ليه ؟ و حصل شنو في المعسكر ؟ و كيف قضينا الليلة الاولى و الصباح الكان رباح حصل فيهو شنو ؟
Post: #94 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: محمد مكى محمد Date: 04-15-2009, 07:20 PM Parent: #92
قيقا يا بايت جيت أعاين من الطاقه ,ومعى عقلى الآخر,الذى يرى الأشياء بمنطق مختلف وربما لامتطق أيضا..يمكن شيزوفرينا.ولكنها ممتعه وتخدل بك عوالم نيرفانا السودان..طاقه وتوب كرب وفرده ام زيق ونقاده ..وشندى تحترق..حتى سندوشات الطعميه وسلطه الاسود..طعهم زى الذره النيه..وخربت ذمة شباك القطر..وقطار الشوق ونسايم عطبره .سوط المطر موية الطين,لارائحة زفاره من سلخانه وزيت راجع ..والابرول يلمع ممسوح بزيت الفول..والقطر إنكسر وتشرب شاى الصباح فى أبوحمد..وحمد غايب فى الركايب.البسكويت مصرى ,الحصيره ليبيه..وقبالو فى العبيديه ,سائق لورى واللورى حل بى ,بيقسم الاتاوه مع ضابط جمارك.وبعدالمعلوم تخف الهموم,فى المحطه نمره سته.ياسلام على القراصه بالرمله,وسعيد الحظ يلقى فى الفشفاش عضم.المراره إختراع موسمى وفرض كفايه فى نمره سته.وجكسا فى خط سته من أساطير الأولين فى سنة سبعين.ولما تشوف مصنع صينى فى راس جبل تعرف أنك فى حلفا.والله قالت بى قولك يا شيخ لو ماكنتيش من عندينا.ونحن أخوه كالبنيان المرصوص. وكمان بنعرف نرص هاجات تنايه.إنتى بس إغلطى علينا. نواصل الرحله بكره.. أمسك جر ليك نفس..وتعال
Post: #95 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-15-2009, 09:12 PM Parent: #94
حباب الفنانين المن شكلهم باينين لكن يا قريبك قصيدة ساي تجيب تايمك ؟ بالغت ياخ
خليك معانا هنا طوالي
Post: #96 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-15-2009, 09:31 PM Parent: #95
نسيت اكلمكم عن اشخاص بالجد كانو بنالوا احترام كل الناس زي ما بقولوا عليهم في بيئتهم " عسكريتهم نضيفة " و على راسهم طبعاً مقدم النوّ قائد ثاني معسكر الشهيد عيسى بشارة - و دا اسم المعسكر شمال مدينة القطينة - رجل جدير باحترام اي زول يتعامل معاه . لاحقاً اعتقد انو اترقى لعقيد قبل ما نتخرج . . . حضرة الصول ( مساعد ) السر بتاع " في مستجدين ابتبول في ارض التمام " و هو رجل و الرجال قليل بس كان مكرهنا بجملتو دي كأنوا الناس دي اتت امراً نُكراً . . . طيب ما ما كان في حمامات قبل الثورة دي ياخ يودوه وين ؟ . . . مساعد / الجاك ضرابة ( البقاري ) الكلس دا الهيبة ذاتا و عمك رقيب اول خميس اظرف زول في المعسكر بس لانو معانا عوائل هنا ما بقدر احكي ليكم لما جا يختبر تصرفنا " و العسكرية تصرف " في استخدام الساتر و جانا النداء و نحن مجموعة و الساتر الله و ما كان في ساتر ارضي غير تلة رمل و اتكومنا خلفها كل المجموعة ( 11 مستجد نفر ) و دي اصغر حلقة في التشكيلات العسكرية تليها الفصيلة ثم السرية فالكتيبة فاللواء و بعدين الديش. . . المهم تعليقوا كان اعتقد عن قنبلة بذيئة جداً ح تعمل شنو كدا لام اهل افتراضية مفروض تكون ولدتنا كلنا كدا مع بعض . . . قمنا اتنفضّنا و ضحكنا . . . ما زعلنا منو لانو زول لطيف ثم اساساً افتراضو ما ليه فرصة انو يبقى على ارض الحقيقة ، مجموعتنا كلو زول من بلد بعدين ناس عمرنا واحد كيف تجي دي ؟ الاهم من كدا و من وجهة نظر عسكرية نحن غلطانين غلطانين نعمل شنو ياخ قلنا ليكم طلاب . . . و عسكريتنا ذاتا ح تكون بذاكرة طلبة ما اكتر الناس ديل و كتار زيهم ما اسعفتني الذاكرة باسماءهم و اكيد كتير غيرهم ما عرفتهم اصلاً ناس كأجمل ما يكون و حاسي بيهم زينا بالضبط و بتحس بيهم حاسين بينا و فاهمين لكنه الأمر الواقع نعمل شنو كلنا ؟ يعني شغلة الجلالات الاوفر بتاعة : امريكيا روسيا قد دنا عذابها - لاحظ Both of Them مرة واحدة كدا . . . و كثير من احلام المشروع الحضاري - ذاك المشروع غير المفكر فيه جيداً - المجانية متجاوز معانقة سقوف النخيل الى عوالم غيب ، كلها كان حدها سور المعسكر . جكات الخارج كلها بجلالات الديش المعروفة عن بت الصول و زنداوية و طبنجات و حاجات كدا كلها توق و ترميز لحضارة قريبة . . . ارضية تماماً و ممكنة . . . قريبة جداً . . . زماناً و مكان . . . على بعد خطوات مننا كنا اهلها نفهمها و تفهمنا و تم حرماننا منها لشنو ما عارفين ؟
يا سارة علي الاغتراب حالة وجدانية و عزلك من محيطك الحضاري نفي مهما كانت الجنة الانتهيتي ليها . . . و تحررك منها بعودة حتمية لا محالة . ما المنفى و ما هو الوطن ؟ جاوبي على السؤال دا بسكت جرحك بعودة لوطنك زي عودة القمرا لي وطن القماري . . .
دا تداعي جرجر كتير لمّا تهت في الاشواق و فتح شجن قديم كفاكم كدا و برجع ليكم لي ليلة منقوشة في ذاكرة مهمة و مخزنة جيداً في رامات كم قيقا كدا . سعتها تفوق واحد قيقا راوي اتمنى انو الحكي دا يستفز ذاكرة دفعتنا في جامعتي الخرطوم و السودان و انعاش ذاكرة الايام الاخيرة من العام 1991 م تحديداً علي جهات القطينة و الخرطوم . . . خصوصاً البزانسة منكم لأنو احدهم و هو بوردابي كان لاعب خطير في احداث اليوم التالي . . .
Post: #97 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-15-2009, 11:17 PM Parent: #96
اها وقفنا وين ؟ نحنا ذاتنا ما الحكي ؟ . . . دا كان سؤال ما للاجابة . . .
نحنا المامشينا الخرطوم و اغلبنا من اولاد كوستي او النيل الابيض عموماً و تحديداً ناس خيمتنا الكان فيها عشرة 8 منهم من كوستي و عز الدين ابو ضراع الديامي الجميل و كان فعلاً مديها نكهة لانو غير مكان الاقامة الدائمة كان برضو من جامعة السودان و امير مصطفى عضو البورد الجداوي و حكمدار السرية الاولى الكتيبة الاولى و لترتيب كتيبتنا المذموم و موقع سريتنا فيها إشارة واضحة لمرقتنا او بقاءنا في المعسكر لانو استيعاب العائدين تم في تراتب يتناسب طردياً مع مقدار الشغب الكتيبة التانية ثم التالتة الاكثر شغباً و تمرد و الاكثر جزاءات و ادارات ليلية المهم وقفنا في الغابة المقاصدة المعسكر في الضفة الشرقية لطريق كوستي الخرطوم مترددين بين المواصلة مع المظاهرة و بنتناقش في جدواها و البعض بحاولوا الحصول على ملحة تودينا لي اهلنا . . . العربات ما كان بتقيف لانهم متوجسين من المظاهرات الجو مارين بيها في طريقهم و ما قادرين يستوعبوا الحاصل شنو ؟ هو قول لي انتو الكنتوا جوة الحاصل دا كنتوا مستوعبين ؟ و رفضنا العودة للمعسكر مهما كانت الاسباب و دا كان الاتفاق قبل ما يجينا المقدم النو بذات نفسه و يتفاوض و يعقد اتفاقية معانا بدا بحنك هنا المكان خطر جداً و كله دبايب و انو نخش نبيت و الصباح يتم نقاش كل الحاصل بعد تقديم ادانة واضحة للضابط من قبله و وعد بالاستماع لطلباتنا و تنفيذ المعقول منها فوراً و تثبيت : " اننا في الجيش ما بنحل مشاكلنا بالمظاهرات " . . . كان الرد اللقاهو : " بس نحن ما جيش و الطلبة بحلوا مشاكلهم بالمظاهرات . . . الجديد شنو في كدا ؟ " و الله اتنين منك يا سعادتو النو و هي تعمر . . . بالضبط دا من يستحق لقب القائد العظيم المربوط بكلية القادة و الاركان و العلامات الحمر على ياقة بدلة الضباط . تصدقوا اوفى كل الوعد بيهو و اتعمل جمعون لمن تبقى داخل المعسكر في صبيحة اليوم التالي بعد مبيت دلع و الليلة الوحيدة الما كان فيها تمام و لا ادارة بالليل و لا قلق و شبعنا فيها لما ابينا الاكل . . . اول المتحدثين بعد ادوا الفرص للناس تتكلم : " دي حلقة في سلسلة الصراع التاريخي بين المثقفين و العساكر " اندهشت جداً بل ذهلت لما الزاوية الحادة لمثلثات حواجبي اختلطت بشعر الراس و استغربت في آن لكم سبب . . . لكم الشجاعة و الغباء بتاع المتكلم دا . . . دا رأي تقولوا و في معسكر انت فيه مجرد كهنة ؟ . . . ممكن تنسحق زي النملة بطريقتك دي يا زول . . . اقعد البد، ساي سردب بس و استغربت اكتر لتمرير النو و بقية القادة لكلام زي دا بدون رد حتى و توالى المتحدثين و قليلاً قليلاً تحول و هدأ نفس الثورة و صار المتحدثين من ثوار الى مطلبيين و الواحد كأنه نقيب الطلاب المستجدين الكهن ، و شوية شوية بقوا المتحدثين شاكين : البرد شديد و لبس البيادا قصير . . . و الردا بتاع الرياضة ما شرعي مع البرد الشديد بتاع الصباح دا . . . وحي ووب و دا حار و دا ما بنكوي بيهو و ضاعت الثورة . . . و فلول الكهن الوصلوا الخرطوم جابوهم ناس الامن و الما جابوا الامن اهلوا جابوه بالغصب خوفاً من تضييع فرصته في الجامعة و في ناس ما في زول هببوا ليهم جوا براهم عليك امان الله فِرِد يومين اتنين و المعسكر اكتمل بكامل عدتة و عتادة من الكهن و التعلمجية و الضباط و النو و الجاك ضرابة و عمك خميس و العريف علاء الدين ود كوستي الكان بجي بحقر بينا يجينا الساعة واحدة صباحاً - بالمناسبة الصحيان مع الفجر و مافي نوم لحدي التمام الصباحي - يجي يصحينا و يوقفنا ادارة قال ايه عشان يتونس معانا لانو صاحبنا . . . و الضابط منو داك العندو نواة دومة كلو يوم بتكون عند معاقب . . . البتكون معاه الدومة الله قال بي قولوا و الحلا بله ما بحله . . . ما يحله الا واحد تاني يأخد جِزاء ( بكسر الجيم هكذا تنطق ) و برز علي حمودي و زمراوي و طبقت شهرتهم آفاق المعسكر كمجنونين بمشوا يشربوا شاي المغرب مع الضباط و يحضروا معاهم الكورة و يونسوهم و بعد شوية يقوم الضباط يعاقبوهم واحد يشيل التاني في ضهروا و يلف بيهو المعسكر كلو او يلفوا المعسكر الاتنين كل واحد بكرعينوا براه و يكورك انا خروف و نحنا رجعنا لجننا و غبانا و اتعلمنا قد السلك من خمسة لحدي مواعيد ادارة الليل . . . و يا سوق القطينة ما جاك بلاء استقر الحال و دانت السيطرة للنظام و عاد الانضباط للديش و عاش المعسكر في ثبات و نبات لمدة تلات شهور تاليات و اتخرجنا و اتصافينا و اتعافينا مع التعلمجية و بقية الضباط . . . نسيت اقول ليكم انو واحدة من انتصارات ثورة الكهن دي انو الضابط الضرب الطالب طيروا حجروا من المعسكر استجابة لمطالب الكهن و جابوا لينا ملابس ساترة و نص كم و استعدل الاكل و هم ذاتم استعدلوا معانا و اهم حاجة كلنا اتفقنا لا الطلبة ممكن يبقوا عساكر و لا العساكر ممكن يبقوا طلبة واحدين اليبقوا العسكر . . . و واحدين اليبقوا الطلبة . . . بس ابداً ما فينا حرامي دا براه . . . و دا براه . . . و في كلٍ خير في الآخر الايام بتمر مشيناها خُطاً اتفرضت علينا من أجل عيون ام نخيل و هي تجربة فيها ما فيها من خسائر و ارباح اهمها تعلم قيمة الصبر و المثابرة و انو المعركة طويلة و سكان الضفاف البي غادي اكثر استعداداً لكن كل شئ ممكن
Post: #98 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 04-15-2009, 11:23 PM Parent: #97
هي لكن ذكائها ذكاء نصاح...... والأغرب انها ماجبدتك... (:
Post: #99 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-15-2009, 11:26 PM Parent: #98
انا قلتا يا ربي اشراقة مالا بتقول علي بليدة؟؟؟؟
حنين؟؟
Post: #100 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-15-2009, 11:33 PM Parent: #99
Quote: في الآخر الايام بتمر
انا حامسك في الكلمة دي قوي يا قيقراوي..
ايام وبتمر.. ايام وبتمر..
Post: #101 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-15-2009, 11:54 PM Parent: #100
وانتا بتحكي بي قصص وطرائف المعسكر..اتذكرتا نضمي..
ايام الامتحانات في الجامعة بنمشي نقعد في الداخلية..الفكرة انو نقرا ونستعد للامتحان..لكن البيحصل شئ غير..ضحك وهزار وونسة ومقالب.. الداخلية فيها السكن العام والسكن الخاص..قعدنا فيها نهايات السنة الثالثة والرابعة ...بديناها بالسكن العام ونهيناها بالخاص مجبرين عشان الساكنين في العام طردونا وقالوا ما قادرين يستحملونا..انحنا اربعة صحبات.. من المقاالب انو في يوم من الايام الجوع قرصنا ومفلسين وحالتنا كربة جدا..اتخيل معاي داخلية وفلس وجوع وامتحانات..طيب نعمل شنو..طوالي التفكير مشا لي ناس الخاص..ديل لي التلاجات عندهم والتلفزيونات جوة الغرف والمكيفات تلعلع بي برة..انا بعرف لي واحدة بتاعت شهادة عربية ساكنة في السكن الخاص..بقت التاريقت(الهدف) بتاعنا..ومافي مدخل غير القراية..لكن تخصصاتنا مختلفة ..القراية المشتركة البينا مواد اسمها مطاليب الجامعة اللي هي دين وعربي وانجليزي..مشيت ليها وهي شهادة عربية وقلتا ليهاانو في محاضرات هي ما حضرتا معانا وانا عندي ليها شيت وقلتا ليهارائك شنو نقرا مع بعض الدين وانا اشررح ليك..اتخيل معاي جاية البت شهادة عربية من السعودية وانا اشرح ليها..واتخيل معاي انو زول يشرح لي زول دين..واتخيل معاي انو الدين بدرسو لينا من الروضة لي الجامعة!!!! الخطة كانت كالاتي ..انا امشي ليها في الغرفة المكيفة ..واجيب معاي صحباتي التلاتة واختها امام امر واقع..واكيد هي حتعزمنا اقلاها شاي بي لبن بي بسكويت ..منها نكون طفينا الجوع ..وطفينا سخانة الحر بي التكييف..خطة بسيطة صح؟؟
لكن الحصل غير..
Post: #111 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-16-2009, 06:19 PM Parent: #101
Quote: لكن الحصل غير..
اها الحصل شنو ؟
Post: #115 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-16-2009, 07:00 PM Parent: #111
الحصل اننا من ما دخلنا لحدت ما مرقنا البت اتغاتت علينا وحلفت ما تضيفنا ..وانحنا مقههين وخشمي وجعني من الشرح الانا ذاتي ما فاهماهو...قريت معاها لا حمدة لا جميلة...لا عضة صحباتي قنعوا لكزوني وقالو لي نتخارج...اقلاها هم ساكتين واتفرجو في التلفزيون..انا الخسرانة... اول ما مرقنا فكرنا في التاااااار..يعني ننتقم منها عشان بخلها..سبحان الله من اليوم داك اقتنعتا بي نظرية انو المرتاحين اكتر ناس جبارين..خاصة الشهادة العربية.. ربك رب الخير حس بينا ..اختي جات بالليل زيارة لي وجابت لينا معاها سمك كميات من الشوايات..ومع عشوة السمك طلعنا بي خطة الانتقام..بعد ما ضربنا السمك لمينا البواقي يتاع السمك علي اي تراش اكل في الداخلية ولميناهو في جريدة ومشينا بالليل زي الساعة 12 ختيناهو قدام غرفتها..ما فضلت كديسة حايمة في الداخلية والمباني المجاورة ما اتلمت قدام غرفتها... بعد داك اتخيل ...شهادة عربية وكدايس...
يا حليل صحباتي
Post: #102 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-16-2009, 00:08 AM Parent: #100
قيقراوي... انا اسفة..بلخبط ليك في نضميك.. تم حقك..وبعدين حاتم حقي
Post: #103 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-16-2009, 06:32 AM Parent: #102
الأخ العزيز قيقراوي: أنا كلمتك قبل كده اني سعيده جدا بالبوست ده؟ طيب يا قيقا أنا مبسوطه جدا جدا انه في منفذ في الدنيا نقدر فيهو نطلع الوجع المتراكم جوانا ده, ونحكي ياصاحب بدون نقاش وحوار ياقولك, طالما جدراننا مضروبه بوهيه تمام ..
Quote: لكن اسوي شنو اماني صديقة عزيزة و بالجد فقدتها و ما خاب حدسي . . . طلعت مغبونة ( مع اني ما عارف من منو لي اسي ؟ )
وأنا كمان ماخاب حدسي انك حسيت انه غيابي وراهو زعله قويه .. أوريك ياسيدي مغبونه من منو.. من مجتمعنا السوداني .. اللي البورد نموذج مصغر منه .. المفروض فيه انو البت تسكت وماتتكلم.. وماتعبّر عن نفسها مع الرجال .. الظاهر فكر المرأه زاتو عوره ونحن ماعارفين !! نفس الوجع الخلاّني أكتب أول بوست لي عن الهيمنه الذكوريه في المجتمع السوداني.. خلاّني أفكر بجديه أسيب البورد قبل ماأبدأ كويس .. ياقيقراوي نقاش الرجال للأسف هو نفس طريقتهم البيحضروا بيها الكوره, أو بيتشاكلوا بيها في الصالون وللا في الشارع, خشونه ومضايقات واساءه, بس طبعا بين الرجال الرد علي الاساءه بيكون بالمثل غالبا لو ما أزيد, الراجل اللي بيستعمل الطريقه دي في خطابه لامرأه, بيكون واحد من اتنين ياقيقا, يااما دي طريقته وما قادر يسيطر عليها ويغيرها, يا اما هو قاصد يقصي المرأه من الحوار بتعمّد الخشونه معاها.. يعني نفس فهم يابت خشي جوه, أو يابت أسكتي ساي .. وهي مابتقدر بطبيعة الحال ترد بالمثل,عشان تربيتها وعشان هي مااتعودت علي كده, يبقي الحل شنو؟ تنجرف مع التيار وترد بالمثل وتمارس نفس الخشونه, أو تنسحب عشان تحافظ علي اسلوبها .. طبعا مافي حل وسط, لو واصلت بنفس أسلوبها حتكون زي البتأذن في مالطا .. الاتنين حارّين ياقيقا, لكن التاني أخفّ بالنسبه لي ..
Post: #104 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-16-2009, 06:50 AM Parent: #103
دلوش :
Quote: .تلف وتلف في البور وتخاف تدوس على لغم ..والخوف ما من اللغم ..الخوف عليهو .. تضطر تسكت وما تتكلم وجواك وضميرك بقول ليك ...كتمت الحق ..تخاف تقول كلام ..يتحكم عليك بالتنظير ..ثم تولي هاربا ولسان حالك بردد ...انا مالي ومال كدة ..
وصفتي حالي تماما.. الظاهر ده وضع جماعي.. زمان قبل الباص وورد كنت بقرأ البوستات وكلي حماس.. وأفكر لو كنت عضو كنت حأعلق في الحته دي وأقول كده.. وكنت ما حأسكت علي الكلام ده أبدا .. وكنت .. وكنت .. وكنت..... طبعا انت ست العارفين الحال اختلف تماما لما بقيت عضو .. الألغام ماليه البورد ومحل ماتعفصي الانفجار حاصل .. رجعت قارئ تاني ياداليا.. كلمة الحق هنا بتجيب مشاكل وعايزه زول وقته ملكه عشان يتفرغ للردود .. وكمان زول مابيحس ولابيزعل .. يعني تقّل دمك تعيش مرتاح .. مشكلة الوقت مصيرا تتعالج, لكن عدم الاحساس ده الله أعلم .. المهم لو لقيتي حل وريني معاك ..
سلام كتير ..
Post: #105 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-16-2009, 07:04 AM Parent: #104
الحبيبه ساره علي:
Quote: المشكلة هسة في الغربة الجواي دي..اعمل ليها شنو يا اماني؟؟
الوتر الحساس..!! في داعي ياساره تفتحي لينا الباب ده ..
Quote: بسكت جرحك بعودة لوطنك زي عودة القمرا لي وطن القماري . . . غايتو !! عليكم بالرجعة بس
أول حاجه أوعي تصدّقي كلام قيقا ده .. الغربه جواك وجواي وماعندها أدني علاقه بالمكان والزمان .. كنت فاكره زي قيقا انه الغربه مكان وبتتحلها بالرجوع .. رجعت وجيت ياقول وردي .. ولا هو ماقال كده ..؟ مش وردي قال كل الأرض منفي .. صااااح ياساره كل الأرض منفي .. مش رجعت وجيت والغربه لسه جواي .. يبقي كل الأرض منفي .. وهسي راجعه والغربه لسه معاي .. ومهجّسه بي جدا .. عارفه اخر أيام قبل الرجوع, خوف مابعده خوف .. لو الغربه فضلت معاي أمشي وين ؟ جيت هنا هروب من نفسي.. وأهو نفسي قااااعده معاي .. يبقي الحل شنو؟ أبحثي عن وطن ياساره .. ولما تلقيهو ما حيفرق معاك وين ومتين.. طبعا دي قناعه وصلت ليها أمبارح يادوب .. فهمي متأخر صاح؟
Post: #106 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-16-2009, 08:01 AM Parent: #105
قيقراوي : حكيك عن الدفاع الشعبي أو الخدمه الألزاميه كما تسمي عندنا الان .. ممتع جدا .. في زمننا بقت الخدمه الالزاميه قبل الدخول للجامعه .. يعني أولاد صغار يادوب خلّصوا المدرسه يعلّموهم السلاح .. أحلي قصه بتحضرني هسي عن أخوي وصاحبه.. بعد ما خلًصوا مدة التدريب في حاجه اسمها ماعارفاهو شنو بلغة الجيش, المهم انهم مفروض يمشوا عدد معيّن من الكيلومترات يوم التخريج,, لغاية مايصلوا مكان التخريج .. هم الاتنين صحّوهم لصلاة الصبح لبسوا جيش عديل عشان يوم التخريج, وسلّموهم السلاح, المهم كانوا لسه نعسانين بعد صلاة الصبح مسافة مالمجنّدين يتلموا ويطلعوا رقدوا جوّه الجامع بيييي لبسهم وسلاحهم .. وأخدتهم نومه لغاية مالمعسكر بقي فاااضي والناس كلهم طلعوا التخريج .. يازول نحن نسأل عليهو في التخريج وهو مافيش, والمسئولين عنهم قلبوا الدنيا قالوا في مجنّدين شردوا بالسلاح وحيعملوا مصيبه.. غايتو كان يوم عصيب, زول عارف مكانهم مافي وجابت ليها تفتيش ومساءله من كل المسئولين عن المعسكر, وهم ياعيني في سابع نومه .. لكن أدوهم جزاء تمام.. الحكوا عنوا حلاقة صلعه من الأول وجديد, وأكلّوهم فول المعسكر كلّه في الفطور هم الاتنين .. وما خفي كان أعظم ..
مش هسي الكلام ده بقي يضّحك, ياخ زمان كان حار خلاّص .. تسأل روحك أنا مش مواطن مدني ساكت .. وماعايز أبقي غير كده .. لييه لازم أبقي زي ناس الجيش بالقوه.. مش هي الزاميه, يبقي بالقوه صاح؟ والأهل ديل ناقصين,؟ كانت أيام سودا والله, الأهل يعني يلقوها من وين وللا من وين ؟
الله غالب ياصاحبي ..
Post: #107 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Hala Hassan Date: 04-16-2009, 08:28 AM Parent: #106
كل الموجودين،
سلام،،
أمانى، قيقراوى،،
سلام خاص مؤقت كدة، لغاية ما نجيكم برواقة لكلامكم اللذيذ دة،،،
مشتاقين،،،
Post: #108 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-16-2009, 11:09 AM Parent: #107
عارف يا قيقراوي واحده من الحاجات اللي كانت بتوجع قلبي جدا في أم نخيل, البنات اللي كنّا بنسميهم حرسويات.. الحرس الجامعي البنات اللي بيقعدوا في المدخل ويعاينوا للبنات من فوق لتحت في لبسهم .. ولو حكمت يمنعوهم من دخول الجامعه .. يعني ياقيقا الواحده أبوها يجيبها ينزلها بعربيته قداااااام بوابة الجامعه, عشان الحرسويات يتلموا فيها ينّظروا ليها في لبسها ويمنعوها الدخول !! طيب هي الجامعه دي أولا كده دخولها باللبس ؟ وياتو قانون البيمنع طالب من دخول جامعته ؟ ولييه البت المسيحيه مجبره تلبس لبس المسلمين وهي داخله الجامعه ؟ ولييه من حق واحده أيا كانت تمنع طالبه لا شايله سلاح لا متفجرات لا مخالفه لأي قانون, من انها تدخل تحضر محاضراتها ؟ غايتو يا قيقا ده كان استفزاز ما بعده استفزاز, وياريت لو بيوقفوا البنات في لبس شاذ فعلا .. ما أفتكر !! كان غالبا تعسف وتدقيق حتي البت نفسها ما بتكون انتبهت ليهو!! الألم النفسي اللي البت بتحس بيهو لما حرسويه توقفها وتنظّر ليها في لبسها وتمنعها من دخول الجامعه شديد.. تسلط ومبالغه في التنفيذ!! فرض وصايه ومبالغه في التعنّت .. ده مايعني اني بشجع الحريه الزايده في اللبس, لكن ياقيقا الاهانه والقمع لطالبه لبسها داخل حدود المعقول لزومو شنو ؟
وبعدين عايزه أسألك سؤال, انت الناس ديل كانوا زعلانين مننا في شنو ؟
بجيك راجعه انشاء الله, بس ربنا يبارك في الوقت ..
Post: #153 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: مها عبد الله Date: 04-24-2009, 11:09 AM Parent: #108
Quote: عارف يا قيقراوي واحده من الحاجات اللي كانت بتوجع قلبي جدا في أم نخيل, البنات اللي كنّا بنسميهم حرسويات..
غايتو يا أماني ضحكت كميه من الضحك ما عادي ، الله يديك العافيه وإتذكرت ليك ( الحرسويات ) بمناسبة الحكي المدهش الجميل ح أحكي ليكم قصتي مع ( الحرسويات ) لازم تلبسي طرحه علشان تخشي الجامعه ، بجي لغاية باب الجامعه بدون طرحه أها بأدخل الطرحه جوه الشنطه وببدأ بلبسها عند وقوفي أمام ( الحرسويات ) الحاجه دي بتستفزهم شديد ويبدأ الجدال !! وممكن يصل الموضوع لمدير الحرس الجامعي فور إظهاري لبطاقتي والسماح لي بالمرور داخل ( حرم الجامعه ) أقوم أطبق ليك الطرحه وأدخلها داخل الشنطه وينادوني ولا ألتفت لهنً ، الحاجه دي كنت بعملها وبضحك شديد ويومي بيكون روعه لكن خلت صديقاتي يتجنبوا الذهاب معي صباح الأربعاء يوم محاضرة العميد والبيتأخر دقيقه من مواعيد المحاضره أكيد مطرود !! ويقولوا لي عليك الله يا مها ما عاوزيين مشاكل ختي الطرحه ولا ما تبارينا من هنا ياخي بحكيكم رجعتونا لأيام جميله برضو رغم مرارة ( النضم ) في سيرة الأسي
Post: #110 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-16-2009, 06:10 PM Parent: #107
Quote: أمانى، قيقراوى،،
سلام خاص مؤقت كدة، لغاية ما نجيكم برواقة لكلامكم اللذيذ دة،،،
مشتاقين،،،
اوو هندسة ياخ و الله كميات من الشوق
وينك ؟ و الله فكرنا نمشي نفقدك بهناك في اليوم الحار ياخ جيتك بالدنيا تعالي في رجاك
Post: #124 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-17-2009, 01:42 PM Parent: #105
Quote: يا سارة علي الاغتراب حالة وجدانية و عزلك من محيطك الحضاري نفي مهما كانت الجنة الانتهيتي ليها . . . و تحررك منها بعودة حتمية لا محالة . ما المنفى و ما هو الوطن ؟ جاوبي على السؤال دا بسكت جرحك بعودة لوطنك زي عودة القمرا لي وطن القماري . . .
دا يا اماني كلامي و البي الاحمر دا كتاب للستاذ / المرحوم الخاتم عدلان . . . والكتاب عبارة عن مجموعة مقالات تم جمعها بعد وفاته و الخاتم بالمناسبة عاش آخر ايامه في جدة دي ذاتا . . . و اكيد بوفاته توقف عقل سوداني عظيم عن التفكير
و جدة المدينة الانثى قيل فيها و عنها ما قيل و اعتقد انو هواءها ملبد بئ ما مستفز للتفكير و سبر اسباب العشق لكن تصدقي انها ما ممكن تكون هي الوطن البنتكلم عنه او عشقنا ليها يكون معادل موضوعي لحب بلدنا . . . اجمل ما قرأت عن جدة
Quote: قيل عنها "غير" ..وقيل إنها المدينة التي تعرف كيف تحدث عاشقيها وتختبر طالبي ودها وقيل أنها نجحت في كل دروس المحبة والاحتواء ..إنها تمطر عكس الريح وتعشق ليلا بتوقيت المتعبين الموغلين فيها انتظارا من خلف النوافذ التي تثرثر سرا وعلنا عن قلق الشعراء و خجل الصبايا الحالمات بالزهر والمراجيح . لجدة شيء في القلب ..ووعد بالمجيء ..وحكاية عاشق لم يقرأ فنجان الوعد ولكنه سكب روحه في " الحواري القديمة " والأسواق العامرة بالوشوشات و الخطى الناعمة ، وعبير الكثير من الحكايا التي تقولها : " الأماكن " و" اختلفنا " و " ايووه " والكثير الذي لم تجهش به الأغنيات ولكن قالته المدينة مساء لكل الذين يمضون إليها بمحض شوق أو غواية . لجدة شيء في الروح .. عصيّ على النسيان ، كبيرٌ بحجم وطن، عميق الانعطاف نحو اللاغياب ..من مَرّها ذاهلا في حنين.. كمن لامس النور بشيء من بهجة الأطفال وعبق الأمهات الطيبات .. لها ذاكرة في القلب لا تضمحل .. وعليها ذنب استلابي من بين كل المدن الشاهقة ..لأكثر من عذر ولآلاف الأسباب أبسطها أنني لم أطأها يوما إلا عابرة في سحر مداها ..ولاهثة خلف أسرارها التي لم تبح بها لاحد ..وإن عليها ذات وعد أن تفي لي بحقي الشرعي في حبها عن قرب .. تماما كمطر يجيء فجأة بعد قيظ طويل ..! فسلام عليها ..على الحب فيها ..على الغيم والأرصفة .. سلام على الشجن البهي في وشوشات مساءاتها ..سلام على كل صبح لا يهتف إلا بها .. بــ" جدة ". سلا م على قلبها " الغيييير " .
شفتي ورطتنا دي كيف ؟ و ( جنات بو منجل ) صاحبة الكلام الفوق دا اتورطت في حب كبير قدر دا و هي مجرد عابرة على حسب قولها اها نحن ارتبطنا بعلاقة عاطفيةمعقدة جداً معاها . . . كلامي دا بنفي فكرة الغربة المكانية لكن ما بحلني من شقاءنا بتورطنا بحب عظيم لوطنا الاصل و لا بنفي بأي صورة من الصورة الغربة الداخل حدوده . . . آي وطنا داك العامل كيف كيف داك ذاتو . . . و هو موغل في الاغتراب ذات نفسه . . . و الله يستر من عتمة النفق الداخل فيهو داك . . . جنود . . . قبائل . . . عمامات انيقة تحملها رؤس فارغة بتحكمنا . . . دا البلخيني اكره السادة . . . اي انا صوفي لكن السادة لما يستغلوا المسآئل دي لبيع صكوك الغفران لمريديهم و و ياخدوا حصاد جناينهم مقابل ثمرات الجنة ببقى يستحقوا النصح هم ذاتهم في عكس للمراجع مش مجرد تخطي مراجع حتى في الالوان السادة ما سمح ياخ ازهى صورة البتكون متعددة الالوان و الابهار ما بقبل بأقل من فتنازيا لونية
مع كمية الحب دا و برغمه ح اجي احكي ليك عن معاناتنا في البلد دي البيرسخ لينا فعلاً فهم المنفى . . . و توهاننا وسط مئات لشعوب
Post: #125 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-17-2009, 02:00 PM Parent: #124
<font face="Simplified Arabic" size="4" color=blue> كان وعدتك يا صحبتي بحكي عن الغربة و تعاملنا الغريب مع اصلنا و مرتبتنا البيولوجية في شئوننا الاجتماعية خصوصاً في مناطق التداخل اللغوي . . . ح احكي ليك تلاتة مواقف سون لي قرنين و ضنب كمان . . .
القرن اليمين :
جاني واحد بنغالي بشتكي من سوداني انه قال ليه " غنماية " . . . و لما سألت الزول قال البنغالي قال ليه حمار !! ختيتها في وش البنغالي انه دا اقتصاص ما اعتداء . . . رده قوّم لي القرن الاول : " لكن انا معلوم هدا غنماية سيم سيم هيوان " . . . و الحمار شنو ؟
القرن الشمال : جابو لينا بنغالي جديد في الشغل . . . طلبت منه يعمل حاجة و كعادة الشعوب دي في الغتاتة البشك في انها مرتبطة بالشطة البياكلوها الناس ديل لاني لاحظت التناسب الطردي بين الشطة و الغتاتة . . . كل ما كتّر الشعب في الشطة كل ما زادت درجة غتاتة افراده . . . مرة عازمني عشاء لقيتم ليك طابخين ملاح شطة اي و الله المكون الرئيسي الفلفل الاخضر و مطعمنه بي بصل و شوية خضروات بعرفوها براهم . . . لما سألتهم الصغار بعملوا ليهم حلة براهم يوم يكون عندهم " الايدام " دا و لا كيف ؟ قالوا لي سيم سيم نهنا اها انتو كيف ؟ قالو : تاكل و تبكي بس . . . ( عين بي قطرة و عين بي مس ) . . . و الاخيرة دي مني - شايف بيان عاجبها الشطر الاول من الرجزة الشعبية دي
ما علينا نرجع للزول الغتيت دا . . . المهم لما سألته ليه ما سوا الشغل الطلبته منه داير يلعب لي دور الضحية يهوزز في رويسه " انا ما في معلوم " . . . قلت ليه لما ما في معلوم ليه ما في سؤال ؟ و ضربته ضربة تعزيرية في دقنوسه . . . و جاني الاقتصاص في شكل قصاص شرعي : " حمــــــــــــار " طنشت طبعاً لاني البادئ و البادئ اظلم زي ما معروف . طناشي غاظة اكتر من الضربة . . . مسكني من يدي و قال لي : صديق . . . انا كلام انت حمار !! سدرت في غيظه و قلت ليه سمعتك . . . و لسان حالي البقول ليه موت بغيظك اغناني عن طليع لساني !! الحالة دي خلته ينزل كل اسلحته لارض المعركة للحسم بسؤال مباشر : صديق . . . انت معلوم ايش حمار مينينغ ؟ قلت ليه لا . . . امعاناً في الهزيمة النفسية ليه او احتمال ليأسي من قصة احراز نقاط في المعركة دي و قلنا نشوف آخرتا رده طلّع لي القرن التاني و ادا اللوحة ملامح ازدواجية القرون ما القراية رده كان : صديق حمار هدا سوي " هَوّ . . هَوّ . . هَوّ " يا ربي لا تمحنا لا تبلانا في الحمير كمان بنهوهو !!!
استعماله لكلمة " صديق " هي في حد ذاتها اقتصاص ، لما يكون عاوز منك حاجة بناديك مدير حتى لو ما شغال معاك في نفس الحتة ، بعكس الخواجات لما يقول ليك صديق معناها انك زول جيد ، و لما يقول ليك اخ بعدم فيك . . . و بلعب دور الضحية بانك مفروض عليه و انه مضطر يتعامل معاك مكرهاً لا بطل !!
الضنب : دكتور حساس محمد حساس عنده مقولة لمستخدمي المواقف العامة للسيارات " دلل على وعيك المروري . . . بان المواقف لنا و لمن سوانا " و و الله من قريت الكلمة دي في " سلامات " و انا بعمل بيها و حتى في اللقاءات الكانن اخواتنا بعملنها معانا و في الجمعيات الادبية كان اجابتي على السؤال التقليدي : حكمة تؤمن بها . . . العبارة الفوق دي . حتى قبل ما يكون عندي عربية بتاعة صلص وله جوالين ذاتو . في جدة - البلد - منطقة ضاجة بالناس موظفين و باعة و ناس بتشتري و ناس ماشين و ناس ماشين ساي و مواقف السيارات سيدة الموقف تماماً . . . و في البلد دي تحديداً اتضح لي اني ما عندي موقف محدد من قضايا كتير . . . و دي معضلة لابد من حلها او التعايش معاها اللهم احسن وقوفنا بين يديك بالنسبة لي الخيارات ثلاث لا رابع لها يا اما تستخدم مواقف الايجار بنص مرتبك ، يا تسرق الموقف و تجازف باحتمال تلتلة 90 % و فيها مية ريال غرامة ، يا اما تستخدم المواقف العامة البعيدة و تديها كدرة مستخدماً 11 خ و قد كان الخيار الاخير . . . و حافظت على المبدأ و انا زول مبادئ نانو شنو ؟ و يوم اتفاجأت ليك بورقة في مقبض باب السواق - شفتوا حرص الرسول على بلوغ رسالته - " يا حيوان الله لا علمك . . . ما تعرف توقف ؟ مسكر على الناس الطريق ؟ الله ما اعطاك عقل " لحظتها تحسست ضنبي لقيتو زاد شبر !!! البغيظ في الموضوع شغل العقارب دا " انو لسع لسعته و زاغ حتى ما خلا رقم تلفون للنقاش " ليه حكم بانه انا القفلت الطريق انا لما وقفت الموقف كان فاضي يميني و يساري
اسي الكلام دا كان اكان هنا ساي كان الواحد برد بطنو برد او ابتدار ( نقاش ) او ( دعوة نقاش ) و شبع ليك ( نقد ) فيهو</font>
Post: #109 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-16-2009, 12:20 PM Parent: #102
Quote: قيقراوي... انا اسفة..بلخبط ليك في نضميك.. تم حقك..وبعدين حاتم حقي
ابو السا يا فردة
اكيد امك ما جبدتك زي ما جبدت اخوك . . . ياخ كامل تضامني مع حنين للبلد في بحثها عن الجبدك منو ؟
كرهتينا الحساسية ذاتو حليلو قبلو . . ما قنا اتدفقي . . . اتدفقي ياخ ياخ البوست دا انا اشتريتو ؟ ما طلعت فوق لقيت موضوع جديد افتكرتو للقراية قام ما طلع كدا . . . اكتشفت ليك انو الزول ممكن يكتب هو ذاتو توش رحت كاتب و كتب و كتبت و كتبت و لما فترت و ما خلصت حكاوينا المغصة شديدة ياخ
انت و حنين عندكم حق الفيتو . . . هنا . . . و في اي مكان لي عند الحق في الدم اها نشرح ليك و كت طلعتي من ناس القفلة حنين عندها 5 اخوان و مرة و الممرات كثيرة قالت لي سادسهم و ان صادف عندي خمسة اخوات فرديت عليها يا ستهن بعد ما بقن ستة هن و قع ليك اها انت جاية السادس مشترك مع حنين ينفع ؟ في البوست دا اماني موافقة و ما عندها مانع . . . تاني شنو ؟ الحساسية لزوما شنو ؟
-------------------- لو راجية نضمي يخلص واطاتك اصبحت شوتي ساي يا فردة
Post: #112 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Rihab Khalifa Date: 04-16-2009, 06:38 PM Parent: #109
Quote: يا رحاب تعالي ياخ اعتبريهو بوست الهترشة بتاع رمضان داك ياخ يا سلام ياخ و الله متقريف لهترشتك انت و الملك ديك . . . زمن ياخ !
العين بصيره يا صاحب نجي نريض عيونا و نمشي رمضان قرب!
Post: #113 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-16-2009, 06:53 PM Parent: #112
Quote: يبقي الحل شنو؟ أبحثي عن وطن ياساره .. ولما تلقيهو ما حيفرق معاك وين ومتين.. طبعا دي قناعه وصلت ليها أمبارح يادوب .. فهمي متأخر صاح؟
دايرة الحقيقة يا اماني؟؟؟ بالجد اتاخرتي شديد.. حقيقة انو الوطن ما بالزمان والمكان..بالمحيط الحولي واحساسي الداخلي..الحقيقة دة وصلتا ليها زمااااان.. عشان كدة اتصعبت علي زيادة وبقيت عايشة الغربة جوة وبرة....
موضوع الهيمنة الذكورية وفرصة المرأة انها تعبر بكل عفوية واريحية..الموضوع دة هو المجنن بوبي.. بوبي= انا لانو بكل صراحة البوست دة مديني احساس باني شخص غير وقاعدة افضفض..بعتبرو زي العيادة النفسية...لكن لو قلتا حاجة عفوية ساي حتتحسب ضدي..وانتي عارفة انا قاصدة شنو..ما لاحظتي يا اماني اني في حالة الفضفضة في الصفحة الاولي جبتا سيرة الحب ..نفسي يا اماني احكي عن حالة الحب العشتها قبل كدة واقول..لكن ماااافي طريقة لاي عفوية مع المجتمع السوداني..تسكت و....تسكت
Post: #114 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: rosemen osman Date: 04-16-2009, 06:58 PM Parent: #113
أمانى، قيقراوى
لكما التحية والتقدير
والف مبروك البنية يا قيقراوى
Post: #117 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-16-2009, 07:21 PM Parent: #114
Quote: أمانى، قيقراوى
لكما التحية والتقدير
والف مبروك البنية يا قيقراوى
الله يبارك فيك يا روزمين و مبروك صدور " الى رجل قد يأتي " عجبنا و سر بالنا و ياريت نشوفه في مكتباتنا هنا في البلد الحرام فيها حاجات كتيرة دي و ياريت يساعد سارة علي في فك عقدة كيبوردها و تفتوا زي ما هي عاوزة
اكيد طلتك الباهية دي ح تفرح ناس كتار جداً بضمن ليك نفسي و سناء خالد " المختفية مننا" 100 %
شكرن روزمين
Post: #122 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Sana Khalid Date: 04-17-2009, 10:25 AM Parent: #117
Quote: اكيد طلتك الباهية دي ح تفرح ناس كتار جداً بضمن ليك نفسي و سناء خالد " المختفية مننا" 100 %
أنا آمنت يا قيقا انو فيك شيء لله! ياخي انا كنت مشغولة مع الاولاد ..شوية نزلات وكدا جيت قبل شوية اشوف الاحوال في المنبر لقيت بوست حيدر و لقيت فيهو روزمين فرحت .. و طوالي مشيت في الماسينجر سلمت عليها (و جبت سيرتك) !
و الله يا قيقراوي من الماسينجر جيت هنا طوالي لقيت روزمين بجاي و انت كاتب الكلام دا و قلت سبحان الله
اها يا قيقا وقع ليك كلام الراجل الفي الحج : يا البتشوفوه
Post: #116 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-16-2009, 07:06 PM Parent: #112
Quote: العين بصيره يا صاحب نجي نريض عيونا و نمشي رمضان قرب!
العيون خليها
لكن عاد دا شوق بصبر لي رمضان ؟! استلافاً من القاموس الرئاسي : و المويه نبل بيها شنو طيب ؟ و لا رمضان دا ما فيهو آبري ؟
اها يا زرقاء اليمامة السنة دي فالها كيف ؟
ياسارة علي غيرت رأيي الايام ما بتمر بتجري جنس جري عجيب بالله رمضان قرّب ؟
Post: #118 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-16-2009, 07:24 PM Parent: #116
Quote: غيرت رأيي الايام ما بتمر بتجري جنس جري عجيب بالله رمضان قرّب ؟
هههههههههههههههههههه يعني ما عرفتا الا بي رمضان..من هسه بديت الجرس؟؟
Post: #119 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-16-2009, 07:51 PM Parent: #118
Quote: هههههههههههههههههههه يعني ما عرفتا الا بي رمضان..من هسه بديت الجرس؟؟
هو داب جرسة ياسارة ؟
السنة الفاتت فتحت لي بوست للترحيب
راح في غضب الله في واحدة من الهكرات ما بقى منه الا دي
لاحظي الحتة العليها اطار احمر " عضو جديد ابوي ميت الرجاء الترحيب . . ( لا توجد صور ) جيبوها معاكم " و لاحظي تاريخ التسجيل ! سئلي الله الكلام دا في رمضان يعني حوالي بعد الستة شهور في المنبر . . . و اسطوانة الولد اليتيم دي 22 سنة شغالة اظن قام بي الصيام بس اسي قام بيهو الهكر يتجازا وينجرح بقزازة و ان شاء الله ما ينفعوا
بمناسبة الهكرات تصدقي تاج السر جعفر ما رجعت ليهو باسويرده لحدي اسي ؟ دا الخالق وضع الورلات النحن فيهو و منه دا ما دام التماسيح برة البحر دا . . . اها النقدل ساي
يا اماني ما قلنا مافي نقاش هنا ! و هنا دي بتعني الاتنين في ( البورد و البوست ) و الاخيرة بفعل مبني للمجهول بعد غياب الفاعل في الاول كدي راجعي آراء اهل المدينة الفاضلة هنا كلمة ( نقاش ) يعني شنو هنا عندكم في سودانيز اون لاين ؟ ... توجد ( صور ) مقلوبة بالجد كانت محاولة لمقاربة فهم " نقاش " يعني شنو ؟ و الخلاصة الطلعت بيها انا كدرويش سوداني بوردابي شمولي تظل صحيحة بالنسبة لي الى ان تصطرع برأي مناقض ، على منهج الديالكتيك و بما يوفر متطلبات المحبة البعرفها و تفضي لرأي اكتر تقدماً . . . و لي وكتها القول ما قاله عماد عبد الله
او يكون ياهو قول حبيبنا البحب غيرنا
" نقاش " ما عندو معني يا اماني ياخ !!! . . . ما عندو . . . ( قيقراوي مركب مكنة حنين )
شايفك حاورتيني في مسألة الغربة و تفسير كلامي لسارة ؟ ( وش مبتسم )* ياخ ما عندك اي مشكلة مالو ياخ نتحاور نختلف نتشاكل ذاتو مالو ؟. . . لكن بكل محبة و صدقيني ممكن . . . كدي شوفي هنا Re: ما بنختلِف ..درسني بس قانون هواك ... استاذنا عبد الله الشقليني من اكثر الناس البحترمهم و بحبهم هنا ، لكن دا ما معناه نلغي اراءنا و نطمس هويتنا . . . و لا كان نكتفي بالقراءة زي ما قلتي و نقطعا في حنانا و ندفن راسنا في الرمل كاجمل ما يكون النعام . . . النعام ادم عديل . . . و نلجأ لذخيرتنا من التطمينات المريحة " نعمل شنو؟ " ما عندنا باسويرد " . . . و احييي ياخ لو كنت بقدر ارد. . . . و اوك ارروك العرب جوك . . . و دا موقف سلبي يا اماني انا شخصياً اسباب دخولي هنا نفسها اسباب دخولك لكن الفرق اني بشوف الرجوع لمقاعد المتفرجين و الاكتفاء بكلام الفي البر و حذقه للعوم ما راكب عدله. . . يا ها دي موية واقعناان بقت آسنة او عزبة ياهو الفي و اهلنا الطيبين بقولوا " الجود بالموجود " . و كونها كذّبت اي رواية متخيلة لينا عن قدراتنا الخارقة في العوم في مشكلتنا المفروض نواجهها بصرامة ببقى اي تراجع انهزام رسمي لمشروع " امة سودانية ديمقراطية موحدة " ( اشتراكية دا مشروع خاص مؤجل اسي ) ، حتى حال الجلوس في دكة الاحتياطي بقى ما ممكن بعد دا . . .غياب التماسيح انتهك حقنا فيه خلاص . . . اتورطنا يا اماني بدخولنا الميدان دا فيا نواصل يا نواصل الهزيمة . . . القبح بيحرز نقطة في كل انهزام من المعركة دي كيفية المواصلة و مقدارها متروكة لتقدير ذاتي . . . لكن المواصلة حتمية غايتو امشي في الدرب البطابق فيهو خطوك صوت حوافرك . . .
------------------- * استمتعتجداً يومداك بمحاورة " الآنا " - بتاعة كبسولة الزمن ديك - لصديقي خضر و جبر الله حاورتهم محاورة و جابت فيهم قون بالبيضة كمان
Post: #121 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-17-2009, 10:08 AM Parent: #120
بالجد يا اماني قاعد اتخيل ليك الناس البنتجوا في المفاهيم ديل نفرين كدا قاعدين متقابلين في كراسي و خالفين رجلهم و ينظروا ليك زي ما قال مارسيل خليفة منو هو دا البحدد دا " عيب " و دا صاح و دا غلط ؟ . . . انا برضو " ما فرقانة معي " زيه . . . لكم مفاهيمكم و لي مفاهيم
خلونا نفرفش شوية مع خالد عباس الطاهر في حكاية المفاهيم دي و نفتح علبة الهندسة و نقرأ ما جاء في كتابها بصوته او زي ما في الدارجية المبينة بمجازاتها الخلاقة " بحِسو هو " . . . حكاية الصوت الحِس دي ما في ابدع منها الا " الكلام الساكت " او كما قال هيكل
تعريفات
( النقطة )
النقطة نقرة طائر السر في بياض الخليقة هاجس ثدى الأمومة بسن اللبن رسم المدينة في الخارطة نقطة باتساع السواد المعلم بالحبر وامية البياض الوطن طائر السر طار يا سادتي إذ تجي القرى بسنابل مشوية بالفوانيس مشغولة بالنواميس بالسادة السود والكادحين الحزام الذي يقلم المدينة كالظفر بالفقر والمعجزات العطاء طائر السر عاد يا سادتي كي ينقّر لوح البياض العظيم بالسواد الوطن
( الخط )
الخط رسمه واضح في الكتاب يتثني كافعى في الرسم والسحر لكنه في السياسة الخط يستحيل سنارة لاصطياد كراسيها العائمة في لجة الخلق وفي البرق يضي شفيفاً ومرتبكاً كامضاء الوزير الممارس في الحكومات والمشارك في المجزرة يضي شفيفاً ومرتبكاً ويتبعه اللظى والسخان ان لم تفي حالة الزمجرة
( المثلث )
المثلث معصرة القصب السكر في الليل والرجل مغلوب على امره وسرجاً لفارسة تمتطي شبقا وتلكز .. تلكز .. تلكز والرجل مقلوب على ظهره ودلتا خصيبة تلحن النبته بين فراتين وتغنى المثلث نافذة علىعالم الماء ورأساً لحراب الاعالى
( الدائرة )
الدائرة خاتم الحب ما قام أورق من حمائم البر يستدير حول انثاه حتى يكز على ظهرها ورقص الحسان على نعش أوسم العابرين الذين دانت لهم ضفائرهن بالحلم الشتائي الطويل لكنه مات قبل وهن اجتمعن في ماتم ريف طقوسي يودعنه ودارت الدائرة دارت الدائرة لغة الحرب والدائرة لغة التواصل بلا انقطاع والدائرة عقدة الحبل أعلى الشراع ومركزاً صارت مواثيقه عدماً وشعباً يحيط باحلامه له قطره وله بالصراع أنها صورة الثورة القادمة
( المربع )
المربع يعيش توازنه في تساوى اضلاعه وفي اقتسام المقادير بالقسط بالملميتر وفي الثروات اذا اتسعت مساحته اتسعت بالتساوى في الحق وإن ضاقت باوجاعه لا يتذمر ضلع على اخر أو جص على اجر والمربع نافذة القطار على المرج والصور المتحركة رغم أنف الحديد يستحث الاقاليم بالنبت والآدميين نحو افق بعيد
( المستطيل )
يستطيل على الطاولة بالطول والعرض ويستقر على الارض بلا قلق في الزوايا قيل كان اصلاً مربع لكنه شب بأمشاطه كي يرى أغوار الحزن فيّ دون أن يواجهني فاعترته لعنة الروح وصار يواجهنا بالزجاج الامامي للحافلة منبرياً كأنه سيد القافلة وله ما وشمته الجماهير بالثورات وشم الحجر
( المعين )
اسم لمفعول يعرب على بطش سيدة الفاعل الملك المرفوع عرشه الهيكل الادمي والشكل زخرفة الجص بالخزف المروي القديم كبصمة فلاحة في مزارع كوش تشتهى تعد الطعام في الاناء المذهب وليس لها في الطعام المذهب المعادن كلها اصدقاء الملوك إلا حديد السيوف ضلع المعين راحة العنق والمعين حاجب القصر ووصيفة الملك ونوط الجسارة والنصر غير أن المحب نديمي قال: المعين شكل العشيقة أن توج القلب لكنك صورته في حالة الحرب
( المنشور )
هو اللفظ المهجس بالاتقاء وراحة القلم الحكومي والمسألة وهو الشكل المراوح اوجهه والمشي للضو كالمقصله إذ تشيو اجداث من حمل لفظه كالبنوك هاجسنا جلنا غير أن المضى سيعود جل ناراً تكسرا في مرايا
Post: #126 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: محمد مكى محمد Date: 04-17-2009, 02:46 PM Parent: #121
تعرف ياقيقا أجمل ما فى البوست ده ,إنو كل واحد بيكتب كلام مختلف وبالرغم من كده بتلقى الموضوع واحد.. كلامى الفوق داك كان ملاحظات رحله بالقطار لوادى حلفا,لما رجعت السودان. الشى الطلعت بيهو بعد ما كل واحد حكى عن جيله,أننى من جيل الإندهاش..رجعنا السودان..أندهشنا ..ورجعنا تانى.. ............... بمناسبه( جيبة التايم),كلو مقبول ومن أى زول ..إلا داك
سلام ياصاحبى
Post: #127 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Rihab Khalifa Date: 04-17-2009, 07:43 PM Parent: #126
Post: #128 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-17-2009, 07:51 PM Parent: #127
الاغنية دي...
مجننااااااااااني...
حتسمعوها اجباري...
وبعدين حامسحا..
Post: #129 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-17-2009, 09:37 PM Parent: #126
Quote: تعرف ياقيقا أجمل ما فى البوست ده ,إنو كل واحد بيكتب كلام مختلف وبالرغم من كده بتلقى الموضوع واحد.. كلامى الفوق داك كان ملاحظات رحله بالقطار لوادى حلفا,لما رجعت السودان. الشى الطلعت بيهو بعد ما كل واحد حكى عن جيله,أننى من جيل الإندهاش..رجعنا السودان..أندهشنا ..ورجعنا تانى.. ............... بمناسبه( جيبة التايم),كلو مقبول ومن أى زول ..إلا داك
سلام ياصاحبى
مكي يا فنان تعرف عندنا في البلد الحالات الزي دي بقولوا عليهم ناس القلبة و هم ناس انقلب بيهم لوري
ما تخاف يا فردة كلنا في الهوا سوا انا الزولة الوحيدة الدفعة في البوست دا نكرتني
طبعاً هي الفكرة القائم عليها البوست فكرة قلبة ذاتا عاوزين نحت الذاكرة دي برانا و نخلص ياخ دي حاجة متعبة جداً ياخ و سرورة المبدعة جابتها من آخرا البوست عيادة نفسية
اها بعد ما ننزل محتويات الذاكرة دي سوفت ح نشوف ان كانت حاجة مفيدة فخير و بركة و الا ؟ . . . انا غايتو ماشي في طريق فرمتة الرامات ماشي فيهو الذاكرة دي ما بتباريني تاني الا سوفت كوبي و فلاش ديسك ( ريموفابل ) . . . دا حدها معاي ياخ اي معرفة جديدة اسي الا الزول يعمل دليت لكم لاعب كورة او كمين ممثلة امريكية حتن تشبّط معانا
سلام يا صحبي
سناء خالد جايين للكرامات شكلو ود المكي ذاتو عقدني من كترة النضمي لكن جاي احكي ليك و لي وقتها مشتاقين و سلامة العيال ياخ وصلي ليهم مني ( V )
سارة علي جهازي المخستك دا لسه ما خلاني اسمع اوع تمسحي حاجة
ينصر دينك يا رحاب خليفة ح اساهر ليك مع رحاب الهتراشة دي و الله ايام يا زمان لو رمضان قرب معناها ناس العذراء بختهم سارة علي و اميمة مصطفى سند معانا بالمناسبة
Post: #130 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-17-2009, 10:40 PM Parent: #129
مدخل الاغنية... مقطع من قصيدة عهد جيرون لمحمد سعيد العباسي.. ودي مقاطع...بقيف عندها كتير...
منيت نفسى آمالا يماطلنى بها زمانى من حين الى حين ألقى بصبرى جسام الحادثات ولى عزم أصد به ما قد يلاقينى ولست أرضى من الدنيا وإن عظمت إلا الذى بجميل الذكر يرضينى
برضو السؤال الجاي دة وقفتا عندو..
يا بنت عشرين والأيام مقبلة ماذا تريدين من موعود خمسين...؟
بعد داك الكابلي بيدخل لي الجندول ..لعلي محمود طه..
كتبها اثناء زيارة لي فينسيا ..وهناك عند الجندول..حبا من اول نظرة...حبيبته الايطالية..اتخيلا كيلوباترا
اين من عيني هاتيك المجالي ياعروس البحر , ياحلم الخيال اين عشاقك سمار الليالي اين من واديك يامهد الجمال موكب الغيد وعيد الكرنفال وسرى الجندول في عرض القنال
ومن اول نظرة الشاعر اكتشف انو ضيع عمرو في الاوهام..انا ذاتي اكتشفتا اني مضيعة نفسي في وهم..
أنا من ضيع في الاوهام عمره نسي التاريخ أو أنسي ذكره غير يوم لم يعد يذكره غيره يوم ان قابلته أول مرة
الكابلي دة بيجنني لمن يقول ٌآآآآآه دي.. آه لو كنت معي نختال عبره بشراع تسبح الأنجم اثره حيث يروي الموج في أرخم نبره حلم ليل من ليالي كليوبتره
عليك الله عاينو للشاعر دة..يشهيك في الرومانسية..للاسف الشاعر بي كل الرومانسية بتاعتو دي مااتزوج وتوفي في عمر مبكر..دي الخايفنا تبقي علينا ..اقلاها انو عبر وبرد بطنو..ومشا فينسيا..انحنا ديل نسوي شنو..؟؟
علي فكرة البوست دة حذروني وقالو لي اعملي حسابك عشان شكلك حتجيبي آخرك..
Post: #131 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: محمد عبد الماجد الصايم Date: 04-17-2009, 11:53 PM Parent: #130
البوست دا لمن بديت أقرا فيهو كنت يا دوب مولع الشيشة وفاتح التلفزيون فيهو كورة
لمن وصلت الحتة دي الشيشة لقيتا رمااااد والتلفزيون عامل الخطوط الملونة البتجي نهاية الإرسال ديكـ!
سلام ليكم كلكم والله
حنين .. الرهط رباط أخوي شديد .. ما فيهو فكاكـ! وبعدين شكلكـ ماشة محل ما نحن ماشين .. تكوني دقستي معاي
Post: #132 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-18-2009, 04:26 AM Parent: #131
صباح الخير عليكم جميعا.. يارفاق الاندياح الحر .. وزملاء العياده النفسيه المجانيه دي .. البوست كل ماليهو ماشي أجمل .. وأجمل مافيهو كلام قيقراوي:
Quote: كلنا في حلقومنا مغصة محتاجين ننبحها و نحتها برانا . . . احتمال نرتاح . . . احتمال
ده القاسم المشترك في البوست, الوجع اللي عايزين نفرغه هنا ونفضي الهارد-ديسك.. في أي اكستيرنال ونرميهو جوووووه الدرج.. ونشيل الذاكره الفاضيه نبدأ من أول وجديد, يمكن نرتاح زي ما قال قيقا .. يمكن .. سعيده بمرور أحلي ناس هاله وروزمين (مبروك الديوان الأول يا روز) .. سناء خالد أختي وحبيبتي مبسوطه برجعتك وحمد الله علي سلامة العيال.. سلامات لساره وحنين الحلوين .. سعيده بمرور ود الصائم وكل الأخوه, يللا شاركونا في الاندياح الحر .. وكل يغني علي ليلاه ..
Post: #133 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-18-2009, 04:59 AM Parent: #132
قيقراوي صاحبي.. صدقني كتابتك زاتها غير.. يعني مش جدّه بس الغير .. كل كلمه بمعني .. سامحني ياصاحب في موضوع الغربه.. العين ياسيدي ما بتعلي علي الحاجب.. كفايه انو سنه أولي غربه ليك كانت يادوب سنه أولي جامعه لي... وبعدين أنا غربتي دي مؤقته .. عرّضيه .. ده لو بنتكلم عن غربة المكان ..
Quote: كلامي دا بنفي فكرة الغربة المكانية لكن ما بحلني من شقاءنا بتورطنا بحب عظيم لوطنا الاصل و لا بنفي بأي صورة من الصورة الغربة الداخل حدوده . . .
مع ساره كان كلامي وانت سيد العارفين بالضبط الانت وصفته ده ويمكن أكتر شويه .. غربتك داخل وطنك وغربتك داخل نفسك .. وأنا وساره في الهوا سوا .. عشان كده فهمتها وفهمتني .. وانت يا أبو فادي سابقنا .. ويمكن خلاصة الرجوع دي تكون المرحله اللي لسه مافهمناها .. مش قلت ليكم أنا فهمي متأخر .. أنا انتهيت تقريبا من غربة المكان, باقي لي الغربتين القلتهم ليك فوق .. وببحث عن وطن .. عارف طبعا انه وطن يعني حاجات كتيييره .. أولها الاستقرار واخرها الأمل .. وبكره أحلي اللي بنقولها ونحن خايفين ..
Quote: حتى في الالوان السادة ما سمح ياخ ازهى صورة البتكون متعددة الالوان و الابهار ما بقبل بأقل من فتنازيا لونية ..
أجمل لوحه مقروءه, اللون الساده عندي يعني الفراغ .. والتوحد .. شوف لوحة عماد عبد الله الفنان دي: احتفظت بيها من بوسته الجميل بتاع المطر .. شوف القرق بين النص الفوق والتحت .. أحلي ما في الألوان امتزاجها وتداخلها .. هم في الطبيعه ممتزجين .. يعني لو خطوط متوازيه برضو ماحلوه ..!! حلوه وهي متداخله ومتمازجه كده .. وده كان وطّنا البي اسمه كتبنا ورطّنا .. بس هسي دخل النفق اللي قلته ياصاحب .. والنفق ده عندي زي الغسّاله .. بتدور وتدور من غير ماتقدر تتدّخل .. وفي النهايه يمكن الألوان تبهت ويمكن تختفي .. ويمكن لأ !! أهو نحن منتظرين التايمر بتاع الغسّاله.. ومتلهّفين نلقي الألوان زي ماهيّ ..
سلامات ياصاحب .. يا انسان ..
Post: #134 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-18-2009, 05:52 AM Parent: #133
ساره علي يارفيقه : رفيقه هنا يعني رفيقة الوجع والنواح ..
Quote: لكن لو قلتا حاجة عفوية ساي حتتحسب ضدي..وانتي عارفة انا قاصدة شنو..ما لاحظتي يا اماني اني في حالة الفضفضة في الصفحة الاولي جبتا سيرة الحب ..نفسي يا اماني احكي عن حالة الحب العشتها قبل كدة واقول..لكن ماااافي طريقة لاي عفوية مع المجتمع السوداني..تسكت و....تسكت..
ما حأقدر أقول أكتر من تعبيرك .. لازم الواحده تسكت ... عشان كده من أجمل ما قرأت شعر روضه الحاج لما قالت : باني لست الا كائن الضلع الضعيف يا انت يا بعض اتزانى فى مسارات التجلد والبكاء السر والبوح الشفيف فاق اصطبارى حد ما يمليه احساس التكتم والتخفى والرجاء ومللت من دمع تعود ان يزور مع المساء وسئمت من طيف يزاور سائلاً قلبي البقاء وكرهت انى جئت من جنس النساء!! وجعى على وجع النساء ..
وجع النساء ياساره كبير .. بيطلعوهو مره مره في البوح للصديقات .. مش قالوا صداقة البنات مساحة بوح وفضفضه ليس الا .. صاح .. بس ياساره الحب ياتو ؟!! ما كلمتك.. مش أنا عندي نظريه انو السودانيين مابعرفوا يحبوا .. ياساره عندي احساس انه كلّو تمثيل ووهم .. طالما الحكايه كلّها قيم كبير .. بيبدأ من البت اللي مفروض تمّثل انها ما بتحس ومابتشعر .. لأنها ببساطه لو عبّرت عن نفسها تبقي ساهله ومتدلقه .. وبعدين لازم تمثل انها مابتفهم عشان الولد يصرّح .. ماكفايه انها تحس بيهو .. ولازم ولازم .... وخلينا من الطرف التاني والقيم الكبير برضو اللي لاعبينو .. ياساره الحب عندنا هلال مريخ .. يعني ما مباراه وديه .. مباراه فيها مهزوم .. ومنتصر .. وجوه التمثيليه دي الناس بتصدق الوهم ده وبتجري وراهو ..
حأعترف بالحب ياساره لما أعرف لي علاقه صادقه تمت بدون القيم البلعبوهو كل الأولاد والبنات .. وبيستمر حتي بعد الزواج .. حأعترف بالحب لمّا أكون مامضطره ألغي عقلي وأمثّل غبيه, عشان البت مفروض تكون غبيه ومابتفهم !!
ما قبل كده ياساره , قبل كده حب ايييييييييييه !!
المهم قيقا وعدنا انو حنختم البوست بسيرة الحب .. ماعايزاك تمنعي نفسك من التعبير, شروط العلاج في عيادتنا المجانيه دي انك تعبّري بحريه .. وأهو نحن معانا روزمين صاحبة القلم الأنيق, وشعر المرأه الحر الصادق .. ياريت لو تساعدنا نفك العقد.. ونعبّر .. يمكن ساعتها تعرفي ترجعي تحبي زي زمان ياساره .. أكتبي ياساره وماتخافي ..
مستنياك يارفيقه ..
Post: #135 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-18-2009, 09:38 PM Parent: #134
لكن انتي يا اماني ما جبتي النضمي كلووووو لمن جبتي سيرة روضة الحاج.. ياخ دي بتعبر بي صورة عجيبة..
روضة الحاج..ربنا يحفظها..
ونرجع لي موضوع الغسالة..والالوان..
Post: #136 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-18-2009, 10:24 PM Parent: #135
Quote: أحلي ما في الألوان امتزاجها وتداخلها .. هم في الطبيعه ممتزجين .. يعني لو خطوط متوازيه برضو ماحلوه ..!!
عارفة كلامك دة لو طبقتو علي شخصيتي حارتاح...
يعني.. ما يكون عندي شخصية وطبع واحد.. شخصية جامدة= تساوي ابيض واسود بالالوان شخصية مرحة= تساوي الوان بهجة اقوم ادمج الشخصيتين..زي اندماج الالوان..مش انتي قلتي احلي في الالوان امتزاجها وتداخلها؟؟ منها اكون خاطف الوان بدل لونين..اقصد شخصتين..وكل زول بيتعامل معاي يختار اللون(الشخصية البتريحو)..طبعا اهم حاجة الواني دي تكون طبيعية ما صبغة.. ويا الله لو لقيت ضوء يضرب فيني..حابقي قوس فزح.. عارفين انو قوس قزح مرات بتشاف ومرات ما بتشاف؟؟ يعني يا اماني وقيقا لو انحنا واقفين التلاتة في نفس المكان..وفي قوس قزح...انا ممكن اشوفو بدرجة معينة واماني ممكن تشوفو بدرجة مختلفة مني تماما لكن انتا ممكن ما تشوفو نهائي..ودة بيتوقف علي الطريقة الانحنا بنعاين بيها لقوس قزح..وعلي شعاع الضوء..ومن هنا بيجي الاختلاف.. انا محتاجة للضوء دة يشع من(الزول الفي بالي) عشان يشوف الواني..
الضوء دة هو الررررررررررريدة.. ورجعنا لسيرة البحر..
Post: #137 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-19-2009, 00:27 AM Parent: #136
Quote: الضوء دة هو الررررررررررريدة.. ورجعنا لسيرة البحر..
هو نحنا طلعنا منها متين يا فردة تعرفي الاماكن البتتكلم عنها جنات بومنجل هنا دي مفروض تكون نشيد العلم حقهم عديل *:
Quote: " الأماكن " و" اختلفنا " و " ايووه " والكثير الذي لم تجهش به الأغنيات ولكن قالته المدينة مساء لكل الذين يمضون إليها بمحض شوق أو غواية .
(الأماكن)
الاماكن كلها مشتاقة لك والعيون اللي انرسم فيها خيالك والحنين اللي سرى بروحي وجالك ماهو بس انا حبيبي الاماكن كلها مشتاقه لك كل شي حولي يذكرني بشيء حتى صوتي وضحكتي لك فيها شيء لو تغيب الدنيا عمرك ما تغيب شوف حالي آه من تطري علي الاماكن ......الاماكن كلها مشتاقة لك *** الاماكن اللي مريت انت فيهاعايشة بروحي وابيها بس لكن ما لقيتك.. جيت قبل العطر يبرد قبل حتى يذوب في صمت الكلام واحتريتك.. كنت اظن الريح جابت عطرك يسلم علي وكنت اظن الشوووووووق جابك تجلس بجنبي شوي كنت اظن.. وكنت اظن وخاااااااااااب ظني ومابقى بالعمر شيء واحتريتك .. الاماكن .....الاماكن كلها مشتاقة لك. *** المشاعر في غيابك ذاب فيها كل صوت والليالي في غيابك عذبت فيني السكوت وصرت خايف لا تجيني لحظة يذبل فيها قلبي وكل اوراقي تموت آه لو تدري حبيبي كيف ايامي بدونك تسرق العمر وتفوت الامان وين الامان ؟؟ وانا قلبي من رحلت ماعرف طعم الامان وليه كل ماجيت اسأل ها المكان اسمع الماضي يقول : الاماكن كلها مشتاقة لك
احتريتك يعني انتظرتك مخلوطة مع شوية توق و كتير شوق و ترقب . . . او نحو ذلك اظنو دا نجدي . . . الحجازية حضرية لا تجيني دي ما نفي ! معناها خايف من تجيني . . .
ليه طوالي سيرة البحر دا بتجرجر ؟ انتو علاقة الذاكرة و المكان و العطر شنو ؟
Post: #138 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-19-2009, 02:07 AM Parent: #137
اماني و سارة
واصلوا و اني لكم من المتابعين و بي غبطة كبيرة و مبسوط منكن
بس يا سارة ما تفطي سطر سمح ؟
السرايا الصفراء طوالي
اها انا ماسك ورد و بفتش لي رحيق لباقي ليلتي دي و صاعد السلم دا ماشي احلق فوق سقف المجرة . . . بجيكم بكرامة او فتح نوراني . . . و بالعدم بجيكم فتح الرحمن
ليكن الفال و شوق و وعد
Post: #139 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: بابكر عثمان مكي Date: 04-19-2009, 09:10 AM Parent: #138
قيقر ..
شكرا علي الاتصال الجميل
استوقفني اسم الكتاب (الي رجل قد ياتي )
فجلبت الذاكرة هذاالنص بغية تشاؤم حزين مع وجع نساء بلادي المؤلم
Quote: . . .
ملصت ام مريم يديها من راحة ارجل زوجها الملطخة بالوحل .. وهى تغسلهما جيدا" وتمسحهما بفوطة نظيفة .. ثم تخطو الى دافور الجاز لتعلق على شاى الحلبة المقنن بسبب حلة الطلس المسجاة على الفحم كعقاب الهى .
هسع يابو مريم فى داعى تشتل .. فى جنس مطرة ؟؟؟
فاجاب : يام مريم ياتو يوم السما استاذنت من الارض ؟؟؟
ثم سال سؤال عابر ..وين مريم ؟؟؟؟
فاجابته مريم فى الحوش .. متنسمة نسمات خريف القبلى ده
فاجابته أم مريم القمر بان والسحاب انقشع والنسمة طيبة خليها عاوز تخنقها معانا هنا ..
ثم غمزت غمزة الرفيق الوفى ..تشتهى ظله قريبا" اكثر .
لم يفته مغزى انثى حلبت طين الارض من راحة رجليه قبل قليل وطوال سنين طويلة خلت ولكنه استيقن ان ابنته مازالت فى الجوار .. وان ثمة امر يتكرر فى موقفها ذاك ..
طيب يام مريم لمتين البت قاعدة كدة ذى شعبة البيت القديم ؟؟؟
فاجابته ام مريم ..الله عليك ؟؟؟ ناقص تدلل عليها فى السوق
قالها لو الامر مشروع افعل ؟؟؟ انت ماشايفه البت بقت تسرح وتتبسم براها ذى الراكبها شيطان .
كانت عينا مريم شاخصة فى اتجاه القمر الذى يفج السحاب تبحث عن حبيبها الغائب محيميد فيفتعل السفر فى عمق كل العيون الحزينة التى تترقب .
وعدها محيميد بالزواج قبل ان يرحل
كانت تعلم هم الاب .. وتدرك حنو الام .. وتعلم ان السنين سكاكين لاترحم
لم يعد محيميد ..
وسكت الاب من التساؤل الحزين وتشتت الام فى حنو خاطرها مابين اب لا يستطيع شيئا" وبين بنت نشفت بضاعتها على عروقها مثل كرز فاته سوق الخميس .
حتى جاء منتصف الشهر .. وخرجت مريم الى ساحتها المعهودة تلتمس قمر المساء .. كانت السماء صافية والقمر يتهادى كزورق مضاء فى منتصف البحر ..
رأته وجه محيميد يبتسم لها من داخل العمق .. ورات وجهه المضىء بلور زمانها القادم ومشتهى سعادتها وتقدمت تخوض فى الماء وتنظر اليه ..
محيميد ... انا مريم ... كيفك انت .. اشتقتلك ... كل صباح وكل مساء ..اشتقتلك
وكان القمر يذهب ومريم تمشى وراءه .. رافعة جلبابها الابيض .. تتنسمها طرحتها البيضاء فيلفحها نسيم الليل ... فى اتجاه النيل
لم يلحظ احد فى القرية تسرب مريم الى النيل عند ذات القيفة الهدامة ...
كل ماهناك مأتم صامد لرجال القرية اصحاب المناظير المقيدة ... كانت الام تولول وسط نساء القرية والاب واقف يتقبل العزاء حينما شعر بتربيت كتف لشاب جميل التقاطيع كالبدر ..او .. كالبحر ... يدعى محيميد ... تهامس الجلوس عن عودته صباح نفس اليوم الذى غرقت فيه مريم .
Post: #140 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-20-2009, 05:20 AM Parent: #139
العزيزه ساره : عفوا للانقطاع,,
Quote: انا محتاجة للضوء دة يشع من(الزول الفي بالي) عشان يشوف الواني.. الضوء دة هو الررررررررررريدة..
عارفه أمبارح باللييييييييل عثرت علي نسخه محفوظه في جهازي من رواية بنات الرياض كاتبتها اسمها رجاء الصانع .. أهدانيها صديق معجب بالروايه ولكن لقلة الزمن المتاح لي مؤخرا لم أقوم بقراءتها الا البارحه .. قضيت الليل بطوله وساعات الصباح الأولي في قراءتها ولم أتمكن من التوقف عن قراءتها حتي وصلت الصفحه 140 !! روعه !! أثارت هذه الروايه ضجه اعلاميه حتي قبل طباعتها لأنها تتحدث عن المحظور في المجتمع النسوي أو المسكوت عنه .. ممكن تقومي بتحميلها من الشبكه فهي متوفره .. وهي قصه واقعيه علي فكره .. اقتبست لك القطعه أدناه منها وهي نص شعري لنزار قبّاني:
Quote: سأكتب عن صديقاتي فقصة كل واحدة أرى فيها , أرى ذاتي ومأساة كمأساتي سأكتب عن صديقاتي عن السجن الذي يمتص أعمار السجينات عن الزمن الذي أكلته أعمدة المجلات عن الأبواب لاتفتح عن الرغبات وهي بمهدها تذبح عن الزنزانة الكبرى وعن جدرانها السود وعن آلاف , آلاف الشهيدات دفن بغير أسماء بمقبرة التقاليد صديقاتي دمئ ملفوفة بالقطن, داخل متحف مغلق نقود صكها التاريخ , لاتهدى ولا تنفق مجاميع من الأسماك , في أحواضها تخنق وأوعية من البلور , مات فراشها الأزرق بلا خوف سأكتب عن صديقاتي عن الأغلال دامية بأقدام الجميلات عن الهذيان , والغثيان .... عن ليل الضراعات عن الأشواق تدفن في المخدات عن الدوران في اللاشئ عن موت الهنيهات صديقاتي رهائن تشترى وتباع في سوق الخرافات سبايا في حريم الشرق موتى غير أموات يعشن , يمتن , مثل الفطر ! في جوف الزجاجات صديقاتي طيور في مغائرها تموت , بغير أصوات
أقريها ياساره حترتاحي .. ويمكن تتوجعي زياده .. حترتاحي لما تقري عن ماسي غيرك ويهون عليك حالك .. وحتتوجعي لما تشعري بالقاسم المشترك.. وجع النساء اللي ماعايز يفارقنا .. عننا الدمي التي يجب ألا تنطق ولاتشعر ولاتري .. تساؤلك الحرّاق أو امنيتك المشروعه أعلاه, أمنية للكثيرات .. كلهن يردن أن يراهنّ الحبيب كما هنّ .. والحبيب يبحث عن الدمي المصنوعه بعنايه لتناسبه !!
وبجيك تاني ياساره ..
Post: #141 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-20-2009, 05:38 AM Parent: #140
قيقراوي ياصاحب ..
Quote: اها انا ماسك ورد و بفتش لي رحيق لباقي ليلتي دي و صاعد السلم دا ماشي احلق فوق سقف المجرة . . . بجيكم بكرامة او فتح نوراني . . . و بالعدم بجيكم فتح الرحمن
أو بالعدم لازم تجينا من سبأ بنبأ يقين .. تعال ياقيقراوي عليك الله .. الوجع الفاتحه ده غوّر .. وماعايز يلتئم !! ساره بتجيب سيرة البحر وبتلعب بي أعصابنا .. كلّم ساره ترفق بينا شويه.. كده الرامات حتضرب قبل مانفضّيها ونرتاح .. وجع البلد والحكومات بتفرّغ في الاكستيرنال وبنحلم بي بكره أحلي حتي لو بكره جا وماباين عليهو أحلي !! لكن وجع الروح ده حار .. دي الذاكره المحرّمه !! ورم خبيث مختبئ بدهاء .. مجرد اكتشافه كارثه .. وازالته بداية النهايه, وعلاجه الوهمي كيميائي كان أو اشاعي أشد فتكا منه نفسه ..
مستنيّنك ياصاحب .. ماتغيب .. !!
Post: #142 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-20-2009, 05:55 AM Parent: #141
الأخ بابكر: شكرا لأنك شاركتنا حديث وجع النساء والهم الرابض علي صدورهن ..
Quote: وعدها محيميد بالزواج قبل ان يرحل كانت تعلم هم الاب .. وتدرك حنو الام .. وتعلم ان السنين سكاكين لاترحم لم يعد محيميد .. وسكت الاب من التساؤل الحزين وتشتت الام فى حنو خاطرها مابين اب لا يستطيع شيئا" وبين بنت نشفت بضاعتها على عروقها مثل كرز فاته سوق الخميس .
يالله علي النص !! معبّر حد التعبير .. الانتظار للغائب !! والعجز واليأس .. وموت البدن أقل ايلاما من موت الروح ..
شكرا ليك كتير ..
Post: #143 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-21-2009, 01:17 AM Parent: #142
Quote: أو بالعدم لازم تجينا من سبأ بنبأ يقين .. تعال ياقيقراوي عليك الله .. الوجع الفاتحه ده غوّر .. وماعايز يلتئم !! ساره بتجيب سيرة البحر وبتلعب بي أعصابنا .. كلّم ساره ترفق بينا شويه.. كده الرامات حتضرب قبل مانفضّيها ونرتاح .. وجع البلد والحكومات بتفرّغ في الاكستيرنال وبنحلم بي بكره أحلي حتي لو بكره جا وماباين عليهو أحلي !! لكن وجع الروح ده حار .. دي الذاكره المحرّمه !! ورم خبيث مختبئ بدهاء .. مجرد اكتشافه كارثه .. وازالته بداية النهايه, وعلاجه الوهمي كيميائي كان أو اشاعي أشد فتكا منه نفسه ..
مستنيّنك ياصاحب .. ماتغيب .. !!
ازيك يا اماني
مغيبني وجع اكبر يا صاحبة مغصة علي فضل الاتغيب و هو بحلم بينا و
خوفي يا علي يا ابن امك .. خوفي دمك من يضيع خوفي من غفلتنا اكتر .. ونحنا عزّل .. محض محضر بعض منشور .. عرض بوستر أو قصائد جوة دفتر الوتر بينن مدردر ميكرفونات .. صوت مودّر في زمن لاهوت وعسكر وانت زولك مستطيع خوفي يا على يا ابن امك .. خوفي دمك .. من يضيع وخوفي من عزلتنا عنو شعبنا الإنساني ظنو والتعالي الماهو منو خوفي اكتر .. من تواصل خطوة يفتر خوفي عذراً يا حبيبنا .. من ديالكتيك مدجّل سيل ضجيج الأيدولوجيا اللاّقِّي والليل المهرجل نهج عجّل ... بالتسامح والتصالح والتصافح ... والصراع زي المؤجل
يا اماني واصلوا الرجعة حتمية يا صديقة
ما تسمحوا لليأس يتسرب لجوة الروح كدا بكون هبش البروسيسر و دا ما عندو علاج الذاكرة هينة و اهو بنحاول نباصرا و بالعدم التعايش معاها ممكن زي ما اثبتت التجارب . . . في حزن كتل ليهو زول ؟ الحزن المسجون بالكتير بخلق مجنون زي كدا و زي ما قال علي المك البديت الخيط بكلامه وانا متخيله بيمط في زفرة طويلة طلع فيها هواء ساخن كان كاتمة جواه مدة طويلة بامتداد عمره و حلفه مع الاسى : هي سيرة اسى ليس فيها ما يُخجل لكن الما مفروض نفرط فيه ابداً هو نقاء المعالجات المركزية ( الدماغ و القلب ) . . . و هنا القضية و دا النضال
--------------- سارة علي عساك طيبة بس ؟ اتمنى ان تكوني باحسن حال طمنينا يا فردة . . .
Post: #144 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-21-2009, 01:49 AM Parent: #142
Quote: كل ماهناك مأتم صامد لرجال القرية اصحاب المناظير المقيدة ... كانت الام تولول وسط نساء القرية والاب واقف يتقبل العزاء حينما شعر بتربيت كتف لشاب جميل التقاطيع كالبدر ..او .. كالبحر ... يدعى محيميد ... تهامس الجلوس عن عودته صباح نفس اليوم الذى غرقت فيه مريم .
نص دسم يا زيكو عارف شهادتي مجروحة قلت ادي فرصة للشابات يعلقن
لقيتك كلك احساس طازج زي ما انت ايام الجامعة ياااااااه
يا زيكو محتاجك هنا جداً ياخ تعرف انك اكسبت الاركولجي البعمل فيهو و استرجاع اللحظات باحساسها ذاتو ، اديتو نكهتو الطبيعية المميزة الحاربت الـ 12 سنة في ازالتها و إئتلفت مناخات بحار لا تخصنا الا من سواحلها الغربية مع رطوبة جدة في اصابتنا بزكام في الروح ضيع كتير من عطرها
متذكر موقفك بتاع العرديب البااااااااارد و العشرين الف النجو من النصبة الكبيرة الوقعت في شركها ما تخاف يا صاحبي النصبة دي كبيرة خالص بحجم وطن عديل . . . و زي ما قال نقد كله ممكن يتصلح الا الاخلاق الذهبت مذ هبت الريح السوداء دي . . . اخوك برضوا باعو ليهو " بوصلة " اي و الله بوصلة ما ساهمت باي حال في هدي طريقو و لسة بوصلتو الداخلية طاشة و الحصيلة : - خسرت ساعتي السيكو فايف - و عشرة جنيه - و حصلت على سخرية زملاء الغرفة و اديتم موضوع لكم زمن كدا يفرقوا بيه بؤس ليالي " ترهاقا" - و بوصلة فيها اتجاه القبلة مرسوم عليها الكعبة . . . تصدق ؟!
اها تجي و لا نجي . . .
في مطار ابوظبي
Post: #145 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Sana Khalid Date: 04-21-2009, 04:33 AM Parent: #144
Quote: : يوم الليلة كل شيء غلا
و نحن بنرخص!
يا سناء..ركزتا في جملتك دي شدددددديد.. صحي الحاصل شنو؟؟ الناس ديل مالم؟؟ انحنا ذاتنا مالنا؟؟
نسيت اقول ليك.. قيقا قال مبسوط شديد خلاص لوجودك في البوست.. بس ما توريهو اني قلتا ليك..
لا بالجد..الحكومة دي زي المنومة الشعب تنويم مغنطيسي..
سارة السارة
جاني الخبر شايلو النسيم .. نسيم عطر لكنو حار
كيف حالك مع الأسى؟
شفتي قيقا دردقنا كيف؟!
قال طاقة حكي و سيرة اسى
يا امي دي بيبان لجحيم الذاكرة
و سير ..ما سيرة واحدة!!
شفتيها بتتدفق كيف؟!
على راي الاستاذ محمد مكي كل زول ينضم برااااه و بعد دا في هارموني عجيب
لكن رغم اي وجع طلع
في فرح..!!
على الأقل جواي
انو اهو نحن لسة بنأسى و لسة عروقنا لو فصدناها بشفرة ذكرى بتنزف
يعني ما كل الفينا موات!
_____________________________________
فاتني كتير من السير لكن دايرة اجي اقراكم بمهل
و دايرة لي زوادة
فاتحة ليك طرفي عشان تكبي لي حبة الوان بهجة
يا سارة جدا
Post: #146 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: بابكر عثمان مكي Date: 04-21-2009, 07:02 AM Parent: #145
Quote: متذكر موقفك بتاع العرديب البااااااااارد و العشرين الف النجو من النصبة الكبيرة الوقعت في شركها ما تخاف يا صاحبي النصبة دي كبيرة خالص بحجم وطن عديل . . . و زي ما قال نقد كله ممكن يتصلح الا الاخلاق الذهبت مذ هبت الريح السوداء دي . . . اخوك برضوا باعو ليهو " بوصلة " اي و الله بوصلة ما ساهمت باي حال في هدي طريقو و لسة بوصلتو الداخلية طاشة و الحصيلة : - خسرت ساعتي السيكو فايف - و عشرة جنيه - و حصلت على سخرية زملاء الغرفة و اديتم موضوع لكم زمن كدا يفرقوا بيه بؤس ليالي " ترهاقا" - و بوصلة فيها اتجاه القبلة مرسوم عليها الكعبة . . . تصدق ؟!
نحن في الاصل سلع مسروقة ..بيعت خلسة ياصاحبي
زمان قبل ما اتخرج من الجامعة كنت اعتقد انني ساصير وزيرا او رئيس دولة
فسرقتني المواني اجيرا في السعودية
انايا صاحبي اكبر منك بقليل .. لذا فانا مسروق اكثر منك
يسرقني الصباح الغريب .. وتسرقني إشارات المرور ويسرقني صاحب الشركة كل صباح حينما اجد كم هائل من المهام في انتظاري امام جهاز كمبيوتر ليس فيه بروتكتر
تسرقنا العاطفة كل راتب .. فنودع كل مانملك لاعز مانملك ونقبع هنا ..نقبع فقط نحتضن زوجاتنا .. ونبكي في صمت .. علي فكرة نحن ايضا حرامية نسرق زوجاتنا لنحتمي من الاسترس اليومي ونسرق لهو اطفالنا بسبب التعب .
ساعود لاحقا لقصة الكركدي (مش العرديب ) فقد سرقوني بابتزاز شهامتي لكوني غائب عن السودان فترة ولا اعلم الكم الهائل من التغيير الاجتماعي للقيم الذي حدث ذاك اكثر مايؤلمني فقد تمت سرقتي بسبب انني ايضا مسروق سلفا فقد انتشلتني الغربة من جيب المواكبة الخلفي فسرقت طعم الايام القديمة وتركت غصة المنصوب عليه ولازلت اعشق بنطال الجينز والتيشيرت .
زيكو
Post: #147 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-21-2009, 11:24 PM Parent: #146
Quote: ساعود لاحقا لقصة الكركدي (مش العرديب )
عرديب ؟ كركدي ؟ ما فرقت المهم مش باااااااااااااارد ؟ و بي كم الف كدا ؟ و الالف هنا قيمة و احساس لكن أيلطف النيران طيب هواءِ ؟
تعال يا زيكو تعال بكامل نقاءك كما العهد بك
Quote: علي فكرة نحن ايضا حرامية نسرق زوجاتنا لنحتمي من الاسترس اليومي ونسرق لهو اطفالنا بسبب التعب .
يا زول ما ورطتنا كدا ! . . . انت حالف قسم ؟ ما تخلينا نستمتع شوية بلعب دور الضحية ياخ ؟
بالمناسبة الموازنة حاجة صعبة جداً بين انك تكون نفسك اليوم حلمت بيها او كنتها و انك تكون زول صالح . . . صالح كامل او حتى صالح للتدوال كسلعة سرقت خصيصاً للبيع او الهلاك بالتقسيط المريح في البلد العاملة كيف كيف دي نحن ظالمين جداً و مظلومين جداً . . . المسألة خانقة خالص و كفيلة بتدمير الانسان جواك . . . و قدر معافرتنا لانقاذ مايمكن انقاذه بنرتكب مزيد من الظلم . . . الظاهر " انقاذ " دي لما ترتبط بالذاتية الاحادية الشمولية دائماً بتبقى سالب كبير لحدي ما تصل سلب بلد كامل وكت يبقى " المنقذ " " انقاذي "
الفهم دا عامل زي التحذير الفي صندوق السجائر . . . مع وافر علمنا بيهو ، لسه بنعافر . . . الظاهر انها بقت ادمان اهو بنكرف من لفافات الذكرى و نردد مخدرين مع " شوشتا " : لنا الله و اصدقاء
سلام يا صديقي
Post: #148 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-22-2009, 01:35 AM Parent: #145
في 2001 كنت راكب عربية اخوي لوحاتها افراج مؤقت لاني قلبت عربيتي و اتوسدت التقيلة في درديب بلا ثبات اجر لا ليها لا لي . . . احسن ذاتو فارقت دربي حرم ما قدرت اعرف دي عربية و لا سمكة حية دايرة موية ميت دايرة موية ؟ المصيبة دي كانت مدورة صارفة راقدة سلطة برضو صارفة . . . ما علينا. . . مشيت الديم بعربية اخوي البتخلي السائق منصوب عليه لا محالة باللوحة الحمراء البارزة في مقدمة و آخر العربية و كنت منتظر صديقي عاطف حسن كنا ماشين مشوار فقمت وصلته بيتهم في محطة التعاون ( حلتنا ايام البيبسي ) عشان يجيب غياروا اثناء الانتظار جاني واحد وبدون مقدمات دخل فيني لفت طوالي : آووووو ناس السعودية . . . !!! بتكلم و في ايدو ورقة بنكنوت ( فئة الفين ) كانت طالعة جديدة بتأوه ( بس زفرة مومس القال عليها محي الدين فارس ديك ) : انا ما بخلوني ادخلها السعودية دي . . . و بانفعال قطع الورقة حتة حتة . قلت ليهو : انت مجنون يا زول بعدين ما يخلوك تدخل السعودية ليه ؟ جمع الورقة مرة تانية وفركها بين يديه و فردها ورقة فئة مية دولار وعرضها في وشي و كان دا رده على سؤالي السابق : عشان الحركات دي ذاتو و الله يدخلوني ابقى مليونير في يوم واحد . عشان ما اطول عليكم المهم عمل لي كم وهمة كدى تاني لحدي ما ازال كل شكوكي و انتقل لمرحلة متقدمة و رمى القنبلة : انت يا زول عاملين ليك عمل باندهاش شديد سألتو : كيف الكلام دا يا زول ؟ في الايام الفاتت دي مش حصل ليك حاجة كبيرة ؟ المهم ما عارف كيف دردقني لتمليكه جزء من المعلومات و بدأ ينسج في تفاصيل في اغلبها مصادفة حقائق حصلت . . . كيف اتوفرت ما عارف ؟ لكن الدهشة اصابتني بهاء السكت و لاني تيراب صوفية و استعدادي للدقسة ألف آآآآآمنت ذاتو بالوهمات انتقل لمرحلة ثالثة و اقنعني بانو ح يبطل مفعول السحر و طلب انو اجيب بيضة نيئة و قزازة موية ابو 1500 جنية وقتها لما اشتريت الطلبات لقيت ليك شيخنا" ريكس " قاعد في نص الشباب و ماسك العود و آخر طرب المهم قام معاي و كان طلبو انو نمشي بعيد من الناس . . . و فعلاً مشينا بعيد . . . المهم ماسك البيضة في قبضة يدو و طلب مني انقرها بقوة لحدي ما تنكسر . . . و فعلت كما امرني و كنت من الصابرين من داخل البيضة طلعن عودين كبريت مربوطات ثلاث ربطات . . . فك الاولى و التانية و هو يردد في زهو بانتصار متوهم : و الله الناس ديل كانو ضيعوك عديل كدا . . . ؟ و بدا يدفن في العودين في التراب بي الربطة رقم 3 . . . . لاني شقي و مجنون و شليق كمان سالتو : دي ما تفكها طيب ؟ بنهرة المعلم العارف بما يجهله السوقة و الدهماء الزي حالتنا : يا زول دا شغلنا و نحن البنعرفو . . . ما على الحوار الا طاعة شيخه و سميانها رضينا . . . و انطمينا و بطلنا الجمجرة. . . لحدي اسي ما قادر افهم فلهمة شيخ ريكس المسطول دا الموية مشترنها كرستال بالف خمسمئة عشان يغسل بيها يدو بس ؟! المهم ركبنا العربية راجعين و قتها تذكرت صديقي المنتظرني او في الحقيقة كنت منتظره انا قبل ما امرض ؟ و و بقيت عاوز انهي الوضع دا باسرع ما يمكن . و بدات مفوضات الداخل ( داخل العربية ) و في جند مفاوضة البياض الشائكة . و غالباً مشاكوس استفادت مننا تكشف لي اني اندفعت في المغامرة دي و انا لا املك الا 13000 جنية فقط لا اكثر . . . المهم فكرت في تبييض نيتي بـ8000 و احتفظت بالخمسة حق البنزين . . . رفض الشيخ الطربان و تجهم و ارغى وازبد و انا ماسك بالـ 13000 جنيه سالني كم دي ؟ فواجهته بالحقيقة المرة . . . المعاكسة لما يتخيله عن الاغتراب و المغتربين . . . و بحركة بتاعة حاوي فعلاً القروش دي من يدي بقت في جيبه الفوق و تعلو وجهة ابتسامة مغيتة تشبه الترابي كدا و يتمتم : و الله ما قاعدين نشتغل بقروش زي دي لكن انت منكوب . . . !!! . . . لا بالله !! يا حنيّن انت !! يا حنين للبلد ذاتو ياخ لحظتها بقيت ما فاهم اي حاجة ؟؟؟؟؟؟؟ او صراحة كدا اترسخ يا دوب عدم الفهم كأبلد ما اكون انا ياخ بادرني بسؤال اسمع عاوز نعمل ليك طبلة ؟ طبلة شنو ؟ يا معلم دي بنظبتا بي زيت نمشي نجيبو من مايو ، يا معلم دي لو فتحتها و دخلت على اي زول ما بردك لو طلبت مليون . . . برضو مايو !! تطير عيشتنا نحنا ديل ياخ ! الزول دا مكشوف عنه الحجاب جد جد . . . كيف عرف انا شغال شحاد ؟ اظنها دي واحدة من كراماتو . . . مدد يا سيدي الطربان اب ابريقاً كريستال
Post: #149 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-22-2009, 02:04 AM Parent: #148
اها زي ما قالو الزول بستفيد من تجاربه و احب الفايدة انا ياخ و مال التاريخ دا بنقراهو بس وجع عيون في 2008 و انا ماشي في شوارع لا ننتمي لها و لا تنتمي لينا ، و ما بنجيها الا شاقين الدرب . . . شارع كم كدا مش عارف من شوارع العمارات و قفتني " غجرية " . . . غجرية جد جد ما شذى بله ياخ و قالت لي تعال يا المبروك ادي التومة البياض تديك دواك . ديشااااااك . . . طلعت عيان يا قيقا ؟ . . . مظلوم انت ياخ ، يتيم و عيان كمان ؟ وما جايب خبر ؟ اتكيفت ليها صراحة ، فارشة لبتها و خاتة جمبها علبة حلاوة ماكنتوش من الحجم الكبير ، مطرقعة كدا و قديييييييييييمة. يا التومة يا اختي المقعدك هنا شنو ؟ دي العمارات ياخ ؟ البلد دي حصل فيها شنو ياخوانا خلال غيبتنا ؟ المهم سألت عن مرضي الشافتو الفقيرة التومة المكشوف عنها الحجاب دي كمان . . . هو داب كشف ؟ ياخ دي زرقاء يمامة المكشوف عنهم الحجاب ، تكشف عليك و انت ماشي !! مش بارك قدامها . . . مدد يا ستي . . . مدد و دستوركم يا اولاد ماما . تحت تحت بتكون جاضمة قوانين الحركة و جاضمة نيوتن و اينشتاين ذاتو . بالاضافة لتبحرها الاكيد في الفيزياء الفراغية و الميكانيكا الكمية و كل اللذي منو من العلوم و الفيزيقيا و الميتافيزيقا و البراسايكلوجي و السايكولوجي سادة ساي . المهم . . . برضوا عصروني في البياض . . . المهم باصرت لي الفين و تعال شوف النقة . . . و الله اقل بياض بجيني مية الف . . . انت ادفع خمسين . . . كتيرات على عافيتك ؟ يا التومة انت اشتغلتي سياسة و لا شنو ؟ شنو الخطابات البتقردن دي ؟ و شئ حاسدنك و ما ادراك ما حاسدنك . . . على ايه يا روميو ؟ دول يبقوا عميوا ؟ صراحة كدا رفعت معنوياتي ياخ ! . . . و ارضت غرور البرستيج بتاع حناني ذاتو فكرة جميلة ياخ انك تكون محسود دي . . . معناها في شئ . . . انا محسود اذاً انا موجود المهم جاي جاي ّطلّعت عشرة الف . . . ما كمان لازم نحافظ على المبادي ياخ !! نانو شنو هو ؟ اهو قللنا النزيف من 13000 لـ 12000 ما كمان العافية درجات ياخ ؟ كلها كم دقسة كدا و الواحد يـchـيت ليهو فقير و ياخد علاجو ملح ساي . تصدقوا طلع برضو معمول لي عمل ؟ و من منو ؟ . . . الضكرين !! شاهد الله قدر ما حنستها ابت تفضح الضكرين ديل . . . خليهم يا اخوي التومة ما بتضر زول . . . بديك علاجك انت . . . الظاهر البلد دي كلها حنينين ياخ الا انا دا طيب يا التومة ضكور جديان و لا ضكور وديان و لا اجانب ساي هم ؟ خليهم هاك الدواء بتاعك . . . و الله لي يوم الليلة ما فرزت الشئ الادتني ليهو بـ 12000 دا شجر و لا حجر ؟! و كتبت لي روشتة شفهية و في فقرة الجرعة و طريقة الاستعمال : اها تقوم تخت معاها سكر و بن و تصرها في منديل . . . اها لما جيت هنا اكتشفت انو حكاية البن دي بالضبط زي : " ظعبوط العفريت " ، او " صوفة ضنب ضب ضكر اعزب عندو نفسيات " . المهم العسكرية تصرف جبت ليك منديل ورق و كبست الشئ داك ابو 12 الف داك مع ملعقتين سكر و ملعقة نسكافية من النوع الممتاز
قومي لفي يا التومة ياخ !! . . . اجيب ليك بن من وين ياخ ؟
Post: #150 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-22-2009, 03:12 PM Parent: #149
قيقراوي ياصاحب : سعيده بعودتك .. ذكري علي فضل تستحق الوقوف .. والظلم ظلمات ياقيقا .. روحه في الجنه انشاء الله .. وروحنا بتوجعنا لما نتذكر الظلم اللي اتعرّض ليهو .. ربنا يرحمو ويرحمنا أجمعين..
جاياك بمهل .. عندي Presentation قايم بي زي ما بيقولو .. لو ظبط, بجي برواقه انشاء الله .. كن بخير ..
-- ساره علي : مشتاقين حبيبه .. انت وين؟ انشاء الله أمورك كلها تمام .. مستنياك بكلام كتير .. حأضطر أبلغ السلطات كلها عن غيابك .. لو ما رجعتي لينا بسرعه وطمنتينا عليك .. بالجد مشتاقين ..
Post: #151 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-23-2009, 03:00 AM Parent: #150
قيقراوي واماني..
مشتاقة للونسة معاكم.. ومحتاجة للفضفة ...هنا
جاياكم..
Post: #152 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-24-2009, 01:56 AM Parent: #151
Quote: دي معرفة عظيمة ياخ و حصل لينا الشرف بالغالية " كلاشنكوف المن حديد و خشب مرة واحدة دي " زينا بالضبط في ( الشمال ) في ازدواج الانتماء . بس ان شاء الله تكون حاسمة في مقاربتها في مسارب التوق و الترميز احسن من حالنا و يكون الهجين في هويتها ما نيئ و هي ان شاء الله تكون متحلية بنضج يخليها تستوعب نفسها كأحسن ما يكون و تكون ممتنة لثراء تكوينها مش زي حالنا الا من رحم ربي " ذات منشطرة " او قل متشظية راسا عديل . . . و يكون في مساحات تفاوض ثقافي بين مكوناتها و ما تبقى الشغلة مجرد مساكنة مفروضة او استعلاء و فرض هوية احد المكونات على الآخر
سلام يا شباب و مشتاقين بالكوم اها وكت مافي حوار قلت احاور نفسي براي عجبتني فكرتك يا اماني في تشجيع سارة على القراية
Quote: رواية بنات الرياض كاتبتها اسمها رجاء الصانع ..
على غرار كدا و تحت شعار تعظيم فضيلة القراءة ، لي مدة مسيطرة علي رغبة احكي ليكم عن د. مروان حامد الرشيد و اليوم مصادف الذكرى الرابعة لرحيل القامة السودانية / الخاتم عدلان لقيتها فرصة مناسبة انزل ليكم كتابة للاخير عن كتاب للاول ( مندكورو - برق و هلال ) صدرت ضمن " ما المنفى و ما هو الوطن " :
Quote: بطل سوداني أحب الجنوب فقتله الشمال
مروان حامد الرشيد في روايته الثانية «مندكورو» يسجل فصولاً من تاريخ السودان الدامي
الخاتم عدلان «مندكورو» هي الرواية الثانية للروائي السوداني مروان حامد الرشيد وقد صدرت عام 2001 عن الدار الثقافية للنشر. وكلمة «مندكورو» كلمة سودانية تعني المتاجر بالبضائع. تدور احداث هذه الرواية على مسرحين: جغرافي هو جنوب السودان، ووجداني هو الذات الشمالية المنشطرة. وكلاهما حقل الغام، تواجهنا صعوبة اقتحامه منذ البداية. نلتقي بمعاوية، المتحدر من رهط الجلابة، والمنتمي للحزب الإسلامي الحاكم، والذي يعمل بمنظمة التكافل الإسلامي. كلفته المنظمة بالذهاب إلى بلدة جوبا بالجنوب وزيارة بعض الاقطار الافريقية المجاورة، لتفقد الاوضاع وسط اللاجئين الجنوبيين واحصاء المسلمين منهم لإغاثتهم ومنعهم من الوقوع في براثن المنظمات النصرانية. ولكن هناك بطبيعة الحال، بندا سريا يتعلق بالقضاء على حركة التمرد بتطويقها إقليميا، وزعزعة هذه النظم نفسها في إطار الإمتداد الإقليمي القاهر «للمشروع الحضاري». منذ همهماته الاولى يدخلنا معاوية الى تناقضاته المتعددة الوجوه. رجل «لحيم» يريد ان يطعم الجوعى، استشهادي يعاني من رهاب السفر بالطائرات، راشد لا يحن إلى طفولته او مراهقته او شبابه. ولذلك فهو غير راغب في الذهاب إلى جوبا، التي عاش فيها طفولته وصباه، ودرس في مدارسها، وباع فيها مع والده واشترى، لانه بالاساس غير راغب في مواجهة الذات التي شهدت انشطاراتها الاولى هناك. ولذلك يلخص حياته هناك بان «ليس فيها شيء يستحق الاستعادة». بمجرد هبوط الطائرة، يجد معاوية الماضي الذي ظل هاربا منه ثلاثين عاما، ماثلا امامه بصورة لا يمكن تفاديها. وندخل منذ هذه اللحظة إلى اعماق معاوية ونتعرف على اغتراباته المتعددة المستويات والوجوه. وربما تكون مصيبته الاولى هي تخطيه الحدود البيولوجية والثقافية الصارمة الفاصلة بين الرجولة والانوثة. ذلك التجاوز للحدود، الذي لا يمكن ان يكون معاوية مسؤولا عنه هو الاصل في اغترابه عن مجتمع اخطا، وما يزال، فهم الجدليات الدقيقة للظاهرات الجنسية، ففصل بينها فصلا مطلقا، تمييزا وتفضيلا. كره معاوية كل النساء، واغترب عن امه روحيا، إذ استولى عليه وهم قاهر بانها تراقبه في الخفاء باستنكار اخفته بصورة محكمة. وما كان يمكن لمعاوية ان يكره كل النساء، دون ان يكره نصيبه هو من الانوثة، متورطا بهذا القدر نفسه في كراهية الذات. معاناة معاوية من هذا (الميل) في الميزان الجيني فصلت بينه وبين محيطه الاجتماعي، جعلته ينسحب انسحابا كاملا الى عالم الاب، بكل ما يعنيه من حماية ودعم، ومن قوة رادعة. وهو امر له إغراءاته الشديدة في حالة معاوية، ولكن له ثمنه الفادح الذي سيدفعه من شخصيته ومن جوهره كانسان، وذلك لما يتطلبه ذلك الانتماء من الطاعة والإذعان ومن لعب ادوار تحددها مسبقا، ثقافة خفيفة الموازين في فهم النفس البشرية، ومجبولة من مواد المخاوف الوجودية الهائلة. ومن خلال هذيان معاوية نتعرف على الآخر، شقيقه ونقيضه و«وسواسه» المسمى عليا. وعلي هذا ممشوق، قوي، شجاع، منتم انتماء كاملا وحميما إلى امه، ومنتم إلى ابيه وفق شروطه هو، والى اشقائه الآخرين، وإلى اصدقائه آل سنداني، وإلى المدينة التي عاش فيها، فصار جزءاً لا يتجزأ من فضائها، من اشجارها وبيوتها وشوارعها، تراه يزرع هذه الشوارع وكأنه يوجد فيها جميعا في نفس الوقت. تعلم لغة الباريا ولغة الدينكا واجاد مع اشقائه وشقيقاته «عربي جوبا». اشترك في الرقص والمصارعة، ولعب للفريق المحلي، ودخل السينما لمشاهدة افلام رعاة البقر، التي كان يدعي لابيه انها افلام عن تاريخ العرب. ولم يكتف بكل ذلك بل شرب المريسة، وخرج مع الطلاب المسيحيين من حصة الدين. ولم يكن ممكنا ان يحدث ذلك دون صدام دائم مع الاب. وفي الحقيقة فإن مشاهد الصدام بين الاب بصرامته ومخاوفه الوجودية، وبين علي بكل ما يمثله من العنفوان الطبيعي والطاقة الحيوية المبدعة، هو من اجمل ما جاء في هذه الرواية التي تؤدي فعلها الروائي على اربع مستويات لغوية، وتخرج منها جميعا اقصى ما تملكه من مقدرات تعبيرية، وهي على هذا المستوى انجاز لغوي قائم بذاته. يصل الصدام بين عوض الله وابنه مراحل كاد الوالد فيها ان يقتل ولده عندما جاء علي مترنحا وثملا، ولكن عليا، المعتبر إبنا عاقا، انقذ اخاه من الموت المحقق غرقا، كما كفى اباه مهانة فادحة، عندما تحرش به، وبمعاوية، شاب جنوبي هو واني، وتواطأت المدينة كلها لتشاهد هذا الاشتباك الذي سيقوم فيه واني بالانتقام من الشيخ الذي يمثل مؤسسة الجلابة. ولكن عليا يظهر من بين غصون الاشجار ومن فوق السطوح لينقذ اباه في لحظة برهن فيها معاوية انه ليس اكثر من سقط متاع. وهنا ينهار القالب التربوي للشيخ عوض الله انهيارا كاملا، فيقسم الا يمد يده بعد اليوم على الإبن. ولكنه يعرف تماما ان ابنه ليس مجبولا من حما العقوق، كما كان يعتقد. وهي جدليات في المظهر والجوهر نجد لها امثلة لا حصر لها في ثنايا الرواية. يتزوج على من ماريا، شقيقة صديق عمره سنداني، من قبيلة الباريا، ويدخل الكلية الحربية، لا ليواصل تاريخ الجيش الذي تفرغ لقهر الشعب، بل ليبدأ مرحلة جديدة من الذود عن الشعب والوطن. ولكن عليا ينتهي الى حبل المشنقة لاشتراكه في انقلاب يساري، ولاتهامه زورا بقتل الضباط المحتجزين في نزل الضباط عندما فشل الإنقلاب. ولا تشك امه في براءته التي ثبتت لها قبل موتها، ولكن ماريا، زوجته تنفذ إلى جوهر الصراع حين تقول عن علي: «احب الجنوب فقتله الشمال». ومن خلال الشخصيتين الرئيسيتين نتعرف على عالم الجلابة، بشخصياته النابضة بالحياة، وبممكناته وحدوده في نفس الوقت. نجد فاعل الخير، مثل عمران، الذي يسميه التجار الآخرون «ابليس» مع انه اسعاهم للخير، ولكن في سرية «حتى لا تعلم شماله ما فعلت يمينه». ونجد عوض الله وهو يمارس ديمقراطية رضيعة لا تمتد إلى اسرته، ونجد «حاج قانون» الذي يهيم بحكم القانون، نجد الصادق الصريح «حاج لخمة»، كما نجد النذل مثل ود الداية، الذي انكر امه وادعى انها امرأة فقدت عقلها. ورغم نواقصها المعروفة، فإن إمكانيات تخطي هذه المؤسسة لذاتها تظهر بوادره بصورة لا تخطئها العين في الجيل الثاني من ابناء التجار، الذين ينتمون انتماء كاملا لهذه المدينة التي لا يعرفون لهم وطنا سواها. ولولا الانقطاعات الدموية لمسيرة التفاعل الإجتماعي في السودان لكان الحال غير الحال. ثم نتعرف على امام المسجد شمس الدين، إبن المؤسسة الدينية والخارج عليها. وقد تخلى شمس الدين عن الإمامة، وذهب يمارس الترجمة في بلد أفريقي، ومن ضمن مشاريعه التي شرع فيها ترجمة القرآن إلى السواحلية بالادوات المقتدرة لمن يجيد اللغتين، ويفهم الإسلام كرابطة راقية بين الشعوب. يلتقي معاوية بشمس الدين ويتعرف على ادلة براءة علي، ويبدأ في السيطرة على عقدته العميقة تجاهه. وتنفتح امامه سبل الخلاص فسيحة من خلال المواجهة الاليمة مع لحظات خزيه الشخصي ومهانته، وخاصة تبرؤه من اخيه الذي اعدم دون محاكمة. وتنتهي الرواية بمعاوية وهو يغير خطة سفره كلها، ويعود إلى جوبا عودة شفته من رهاب الطائرات ومكنته من الوقوف امام تلك الشجرة الضخمة التي حاول عبيد الله، مؤذن الجامع، ان يقضي فيها على نصيبه من الرجولة، لولا اخاه عليا، الذي هبط من اعلى الشجرة ككائن اسطوري وأخذ بتلابيب عبيد الله حتى فقد الرجل صوته وكاد يفقد حياته. إن مواجهة معاوية للحظات الهابطة في تاريخه الشخصي هي التي وضعت حدا لاغترابه عن العلاقات الحميمة والمعاني الإيجابية. ومن الواضح ان مثل هذه المواجهة مطلوبة ايضا في حالة الامم، ومن بين الامم جميعا هي مطلوبة في حالة السودان. وبهذا المعني فان مندكورو رواية سودانية (أي ليست شمالية فحسب) ولكنها تطرح قضايا وصراعات مرتبطة بالإنسان حيثما كان.
Post: #154 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-29-2009, 01:41 PM Parent: #152
Quote: ياخي بحكيكم رجعتونا لأيام جميله برضو رغم مرارة ( النضم ) في سيرة الأسي
مها عبد الله مرحب بيك يا برلومة في سيرة و انفضحت ، مع انك ما سلمتي علي سوري على التأخير بس كنت منتظر اماني تتصرف لكن شكلها كدا اسي في بلد طيروا عامل كيف كيف كدا ؟ دا الخلاني ما ارد
مرحب بيك كتير
و تحياتي للكل بدون فرز
--------------------
راجعين للحكي . . . برا فكر برا هلكوبتر !!
Post: #155 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: مها عبد الله Date: 04-29-2009, 04:11 PM Parent: #154
Quote: مها عبد الله مرحب بيك يا برلومة في سيرة و انفضحت ، مع انك ما سلمتي علي سوري على التأخير بس كنت منتظر اماني تتصرف لكن شكلها كدا اسي في بلد طيروا عامل كيف كيف كدا ؟ دا الخلاني ما ارد
مرحب بيك كتير
و تحياتي للكل بدون فرز
الأخ العزيز قيقراوي تحياتي وسلامي لك وللأسره وأعتزر ياخي والله بس البوست روعه و ذي ما قال زيكو هنا
Quote: يسرقني الصباح الغريب .. وتسرقني إشارات المرور ويسرقني صاحب الشركة كل صباح حينما اجد كم هائل من المهام في انتظاري امام جهاز كمبيوتر ليس فيه بروتكتر
بلقي نفسي ( مسروقه ) بحكي المتداخلون والمتداخلات البيوجع وفي نفس الوقت يحملك لأيام مميزه بالحياة يا سلام عليكم بالجد أمتعتونا وبوجود زيكو أكيد الحكي له مذاق ونكهه تانيه متابعه ومنتظريييين أماني حتي ظهورها وربنا يرجعها للبوست بالسلامه بس أكيد لسه ما أكتفت من ماما دومه يا أماني عليك الله أظهري مفتقدنك بشده
Post: #156 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 04-30-2009, 05:43 AM Parent: #155
قيقراوي صاحب الحكي الجميل.. والأصدقاء الأعزاء شركاء البوح والوجع .. الصديقه مها العزيزه .. أجدني في حوجه ماسه لهذا البوست وللفضفضه والقاء هذا الألم المتراكم عن كاهلي المتعب .. سعادتي بهذا البوح كبيره .. ولكنني في داخل معمعه حامية الوطيس .. علمت مؤخرا أن أصعب مراحل العمل اخرها .. التوصل لخلاصه والحرص علي انهاء العمل بأفضل النتائج الممكنه .. أنام وأنا أفكر في العمل, وأستيقظ لأهرع الي المعمل وعقلي وجسدي يشكوان من ازدحام اليوم وانهاكه .. مازلت في بلاد سورها من عجائب الدنيا القديمه .. وشعبها وقدرته علي العمل والانجاز من عجائب الدنيا الجديده .. ولكني أشد الرحال .. الي بلاد اللا مياه وان تعرّج نيلها فشق الغابات والصحاري بقوه وصخب وقسمها الي نصفين من أقصي جنوبها الي أقصي الشمال .. واللا كهرباء وان كثرت السدود ورقص مسؤولوها طربا وأوهمونا بدخولها حقبة الاناره الدائمه .. وبلاد لاتغيب عنها الشمس الا لتعود أقوي وأشد وأكثر مقدره علي الاحراق .. ولكنها بلادي وان جارت ..!! وجار عليها أولو أمرها ..
أعذروني علي الغياب .. قيقراوي مستمتعه جدا من قراءة حكيك الجميل ماتسنّي لي ذلك .. ولي عوده للعديد من المقاطع المؤلمه والجميله في ان واحد .. كما سأقوم بقراءة بوستك الفكري قبل العوده علّي أخرج منه بقبس .. عارف الحكي ده مرّ بمراحل صعبه خلاص .. انشغالك بهمس, وأرشفة البوست الثاني, ثم انشغالي بالسفر, لكن حنتمه يا قيقا انشاء الله, أنا غايتو محتاج لذاكره نضيفه عشان أواصل بيها لمّا أرجع السودان .. لازم ذاكره فاضيه .. لازم ..
مها لنا وعد جميل علي العوده بقوه انشاء الله .. ماما دوما أيضا تشكو مني وانشغالي التام عنها .. وأنا أركض وأركض علّي أظفر قريبا بساعات جميله أقضيها معها ..
ساره علي ماتطولي الغيبه ..
تحياتي للجميع ..
Post: #157 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 04-30-2009, 07:02 AM Parent: #156
Quote: مازلت في بلاد سورها من عجائب الدنيا القديمه .. وشعبها وقدرته علي العمل والانجاز من عجائب الدنيا الجديده ..
امانة ما مشتاقين يا اماني ياخ . . . كنت عاوز اتأكد بس انك لسه في البلد الناسا برسموا كتابتهم ديك ؟ زي بقول سيدنا عبد الغني كرم الله
اسمعي النسألك بالمناسبة دي في سؤال مجهجهني : في الصين الاسواق فيها بضاعة اصلية و لا كلو صيني ؟
حبيت ارحب بعودتك و لي بعدين
Post: #158 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 04-30-2009, 08:54 AM Parent: #157
سلامات يا ناس الدار,, وفاقدة الفضفضة بي جاي..
عارفين كل مرة انا بتاوق للبوست دة.. لكن ملاوذة من الكتابة فيه.. ويمكن برضو عشان الايامات دي انا فاقدة طعم اي شئ..
الساعة متجهة لي الرابعة صباحا..والنوم مجافيني..عملتا اي شي ممكن يتعمل عشان انعس..ومافي نتيجة..الغريبة مخي فاضي وبالي ما مشغول بي شئ يحميني النوم..سقد كبير انا الليلة.. الدنيا عاملة كييف معاكم؟؟ احكي لي انتا يا قيقا لانو اماني مشغولة..الحاصل عليك شنو؟؟ والفرمتة ماشة كيف؟
يعلم الله مشتاقة لي نضميكم
Post: #159 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: بابكر عثمان مكي Date: 04-30-2009, 09:29 AM Parent: #157
Quote: وبوجود زيكو أكيد الحكي له مذاق ونكهه تانيه
شكرا يا .. رفيقة الاركان الاربعة .. لصلاة الماضي الجميل
ساعود
قيقراوي ده يامها الكلام معاه .. بشبه ونسة العتبات علي باب الديوان الكبير عند الامسيات ..
Quote: في احدي اجازاتي قررت ان ازور صديقتي الجميلة في البنك لاستبدل مبلغ 1000 ريال بالسوداني ..كان هذا المبلغ آخر ماتبقي لي من اجازة عاتية المهام بحلول لاجندة ذات مشاكل متعددة ومزمنة ..
المهم .. جيت البنك والتقيت صديقتي وبرغم الزمن الا ان ابتسامتها لم تزل عالقة بعفوية بينما انطفأ بريق عينيها الأخاذ ..يبدوا ان المشاكل في هذا البلد تحسر سطوة الجمال في العينين بالذات بينما تبقي الروح كثيفة وجميلة ومرتبة قليلين هم من تتشوه ارواحهم بسبب الزمن الآسن .
لم تتزوج هي .. كان ذالك واضحا ولم اسالها ..
لم اجد صرف المبلغ فتذكرت فرندات برج البركة كانت تلك المنطقة منذ ايام الجامعة مكان لاستبدال العملة .. تجدهم يسالونك دون ان تسالهم دولار .. شيك .. ريال يهمسون لك بهكذا مصطلحات لم افهمها حين كنت في الجامعة لانني لم اكن تعلمت بعد لعنة المسافة ولم تكن لي لغة مع المال ابدا ..
فنزلت من البنك وذهبت الي هناك لاكون ضحية لشخصين وجيهين انيقين محتالين
كانت هناك غصة لم تطفئها الي مثلجات الكركدي من المحل المجاور للاحداث
.
ساعود لاحكي التفاصيل ان استطعت
زيكو
Post: #160 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 05-01-2009, 01:58 PM Parent: #159
ازيك يا صاحبة
Quote: كما سأقوم بقراءة بوستك الفكري قبل العوده علّي أخرج منه بقبس ..
يا صديقة هنا لا فكر مما يستوجب يحزنون و يحزنون و يحزنون . . . لاحظتي قاعدين نقتبس الاية الكريمة لتدعيم ما لا تدعمه ، الاية الكريمة تقول " لا خوفاً عليهم و لا هم يحزنون " استخدامي ليها فوق كان بظبط ؟
دا حال يتطلب بكائية بحزن يليق و بغضب جم بوست فكري . . ( لاتوجد حاجة ) ببلوها و بشربوها هنا نحن مأثورين و في اسمى آيات الانبهار بوافد قيم جمالية مستوردة و في حالة اعتلاف دون تمييز و بوست فكري على عكس دلالة المفردة معناها اجترار ما تم اعتلافه و كمان يتجشأوا ليك في وشك عديل
سلامي يا عزيزة و اتمنى ليك كل الخير و ما تشغلي بالك ركزي مع حاجاتك و الفنشينق مهم جداً يلا فرحينا بالشهادة الكبيرة . . . و ناس سارة ديل خليهم عليّ ببراهم ليك لحدي ما ترجعي بالسلامة . . .
Quote: راجعين للحكي . . . برا فكر برا هلكوبتر !!
سارة يا فردة مشتاقين شديد جاييك بري جدا . . . حدنا الاستيكة تعرفي قصة الهيلكوبتر الفوق ديك طبعاً اخت او ام او زوجة اي واحد فينا بتكون شايفاهو احسن زول في الدنيا مهما كان هو كعب و بتكون شايفة العيب في اصحابه ، كتطمين مجاني مريح ؤ كدا و ارضاء لغرور النقاء و الرفعة و كاجمل ما تكون نظرية المؤامرة في واحد( متزوج ) كان بمشي يسكر مع اصحابو ( العزابة ) ، اها يوم تقلوا العيار كتير ما شوية و بقوا في البوديهو بيتو . اها قريب الصباح واحد اتوكل و قام تطوع للمهمة . لانو عارفين انو مرتو ح تديهم محاضرة في الاخلاق و كيف انهم ناس ما بخافوا الله و هم افسدوا اخلاق زوجها ذاك الحمل الوديع . . . حمل شنو يا حاجة ؟ دا تور عديل المهم لما وصل البيت متكّل صاحبنا و بدق في الباب ، في هلكوبتر حايمة فوق راسو كامل تضامني مع " راس " الزول دا الباب : دق . . . دق . . . دق الهيكلوبتر : طق طق . . . طق طق . . . طق طق مرت السكران : نق. . . نق . . . نق . . . راجلي ما عارف فسدتوا اخلاقو . . . و اررررر را رررر و هو راسو اصلاً ما ناقص كورك ليك في المرا : امسكي السكران دا . . . بلا راجلك بلا هلكوبتر ؟!
دحين يا سرور يا اختي كان شفتيني بعمل في حاجة غلط اقطعي شك انو ديل اصحابي انا زول برئ زي ما انت عارفاني بالمناسبة دي امانة في ذمتك زي ما طردتيني من البوست اياهو تاني كان لقيتيني بتهايف في اي بوست اطرديني سمح ؟ خصوصاً ان بقى بوست ( فكري )
صديقي الجميل زيكو سلامي ليك و لي المعاك ياخ الا الجماهير تعمل مظاهرة عشان تجي ياخ ؟
Quote: يبدوا ان المشاكل في هذا البلد تحسر سطوة الجمال في العينين بالذات بينما تبقي الروح كثيفة وجميلة ومرتبة قليلين هم من تتشوه ارواحهم بسبب الزمن الآسن .
دا كلام منكّه و ليهو فليفر خاص في رجاك
Post: #161 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-03-2009, 01:26 AM Parent: #160
Quote: دحين يا سرور يا اختي كان شفتيني بعمل في حاجة غلط اقطعي شك انو ديل اصحابي انا زول برئ زي ما انت عارفاني بالمناسبة دي امانة في ذمتك زي ما طردتيني من البوست اياهو تاني كان لقيتيني بتهايف في اي بوست اطرديني سمح ؟ خصوصاً ان بقى بوست ( فكري )
لكن مش ضغطتا علي؟؟؟
ابشر عشان اعتمدت علي من دون الناس
Post: #162 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 05-03-2009, 02:01 AM Parent: #161
بوست جميل يااخي
حأعود ليكم بكرة بكثير نضمي
Post: #163 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 05-03-2009, 02:03 AM Parent: #161
Quote: لكن مش ضغطتا علي؟؟؟
ابشر عشان اعتمدت علي من دون الناس
الناس لبعضيها و نحن اخوات
انسألك الخوة دي ما عندها ضريبة ؟
خلاص يوم بجيبا ليكم ضقلا يكركب !!
عارفك ما بتردي العشم اختي
Post: #164 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-12-2009, 10:31 PM Parent: #163
جيتكم... عارفين ليه..؟؟ عشان كمية الاسي الجواي..يا اصحابي انا متضااااايقة..عارفة الدنيا ما بتستاهل والحياة كدة كدة ماشة..لكن انا ما عارفة بقيت مالي؟؟اي شئ بيأثر علي شدددددديد...
عارفين؟؟ لمن تدو زول مساحة ومن المفترض انو يقوم يملاها بي طريقة كويسة..يقوم يخيب ظنك؟؟ احساسكم بيكون شنو؟؟ ولمن حاجات كتيرررررررررررررررررة..
وما محتاجة انبهكم يا اصحابي قيقراوي واماني انو الموضوع ما عندو علاقة بالعلاقات العاطفية.. عندو علاقة بالعلاقات الانسانية..
الي لقاء
Post: #165 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-12-2009, 10:44 PM Parent: #164
اول ما حسيت بالاحباط خلاصني متجه علي..(وانا بخاف من جيتو دي) ..اول ما حسيت بيه جاي سالتا نفسي اها يا سارة الحل شنو؟؟..مع اني عارفة انو ما بلقي ليه حل بالسهولة دي..لكن قلتا اعمل العلي واحلول افتش في النواحي الايجابية في دنيتي وعيشتي دي..كمان انتي يا سارة ما تضيقيها علي نفسك شديد كدة ..لازم تلقي ليك حل لي احباطاتك دي..لانو مافي زول فاضية ليك عشان يمد ليك يد.. خلاص لقيتا..طاقتك يا سارة المكملاها دبرسة دي قومي فرفشي بيها ..والاحد الفات مرقتا من بيتنا حلفتا ما داخلة البيت الا وانا في حالة فرفشة عالمية..ويا ريتني ما مرقت من باب البيت..تيتي تيتي متل ما رحتي متل ما جيتي..لافا براي زي المجنونة وما قادرة اتمتع بي اي منظر حلو ولا اي اكلة طاعمة..جيت راجعة البيت اختي زادت لي الطين بلة بي شماتتا فيني...عشان هي حنستني اقيل معاها..جيت راجعة ما فيني حيل للدبرسة..اجلتها لي تاني يوم...
احمد الله علي النفس
Post: #166 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-13-2009, 00:34 AM Parent: #165
الغريبة قبليها بي اسبوع عشتا لي يوم جميل خلاص..المطرة صابة والدنيا هادئة..والجو جميل... قصة يوم حلو ويوم مر دي انا ما بتنفع معاي.. ماااااااااا بتنفع بعد ما اجرب اليوم الحلو اجي اضوق لي مرارة بتوصلني لي الحالة الانتو شايفيني فيها دي..
حالة النضمي..
جاياكم..
ويا اماني .. يعني حننتظرك لمن تصلي الخرطوم.؟؟؟ القصة شنو؟؟
Post: #167 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 05-13-2009, 02:41 AM Parent: #166
Quote: بعد ما اجرب اليوم الحلو اجي اضوق لي مرارة بتوصلني لي الحالة الانتو شايفيني فيها دي..
كتري من الحلو مر رمضان قرّب
ازيك يا سارة ما حبيت اقاطعك فرغي يا اختي اخدي راحتك خالص
Post: #168 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-14-2009, 05:34 AM Parent: #167
الأعزاء قيقراوي وساره: مشتاقييييييييين,
سروره صحبتي العسل, سلامتك وتبري من الضيق والزعل.. عاوزه أقتبس شوية جمل حسيت بيها شديييييد من فضفضتك الفوق:
Quote: اي شئ بيأثر علي شدددددديد...
وهنا
Quote: جيت راجعة ما فيني حيل للدبرسة..اجلتها لي تاني يوم...
وهنا
Quote: بعد ما اجرب اليوم الحلو اجي اضوق لي مرارة بتوصلني لي الحالة الانتو شايفيني فيها دي..
بتشبهيني شديد ياساره, ويمكن أنا اللي بشبهك .. لو حأفلسف ليك الكلام الفوق بس حأقول ليك انه حكاية يوم حلو ويوم مر دي طلعت المتعه زاتها في الدنيا .. عشان لما يجي اليوم الحلو تفرحي يا ساره وتعيشيه .. ولما يجي اليوم المر, تعرفي انه الحلو جاي, بس عايز صبر ..
وياساره حاسه بوحدتك وغربتك, الأيام حتعدي, وأحلي حاجه في بكره انو سر, بحلوه ومره ..
معليش ياسروره لكن صدقيني بخش الموقع بصوره سريعه جدا .. واصلي الفضفضه وجاياك بس استحمليني شويه اليومين ديل ..
وياقيقراوي سروره دي في عهدتك لغاية ما أستقر .. ومشتاقين يا صاحب .. سلام مربع للعيال وأمهم ..
Post: #169 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-14-2009, 04:19 PM Parent: #168
يا اماني.. بقيت الز هم اليوم ..لليوم البعدو..
حكمة اليوم:- أجل هم اليوم الي الغد..وارقد نوم
Post: #170 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-14-2009, 04:28 PM Parent: #169
حارجع ليكم تاني لي (عهد جيرون).. منيت نفسى آمالا يماطلنى بها زمانى من حين الى حين ألقى بصبرى جسام الحادثات ولى عزم أصد به ما قد يلاقينى ولست أرضى من الدنيا وإن عظمت إلا الذى بجميل الذكر يرضيني
وتاني..
يا بنت عشرين والايام مقبلة ماذا تريدين من موعود خمسبن؟؟
عهد جيرون لو ما كان لحنها الكابلي وغناها ما اظن كان حانتبة لي عمق الكلمات..
آآآآآآآآآآآآآح.. (علي قول ابوي)
Post: #171 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 05-15-2009, 12:25 PM Parent: #170
Quote: وياقيقراوي سروره دي في عهدتك لغاية ما أستقر .. ومشتاقين يا صاحب .. سلام مربع للعيال وأمهم ..
كدا ما عصرتي علي لكن يا صاحبة ؟ سارة دي عهدة تقيلة ياخ
يا زولة غيبي و تعالي تلقينا نحنا يانا نحن
و سارة انا ما بوصوني عليها الا بس هي شغالة خطوة لي قدام و خطوتين لي وراء ببراها ليكم تب ، بس راجيها تفتوا
سلام ليكن الجوز و كميات من الاشتياقات تحياتك وصلناه و رجع ليك في ماعونا تشكراتهم
Post: #172 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 05-15-2009, 01:14 PM Parent: #171
Quote: ببراها ليكم تب ، بس راجيها تفتوا
تفتوا اكتر من كدة هههههههه مرات بقرا كلام سارة علي هنا واشوف تفاعلك انت يا قيقا واماني العسل واقعد اضحك...سارة دي مشتتة ليكم جهودكم ساي بالمناسبة.. حسب قرايتي سرورة دي مما تسمع زول مسافر السودان ...الهلا هلا تقوم بيها، وهي ماعندها اي طريقة حاليا مع شغلها الجديد ده الا بعد 6 شهور...مش اخير تصبر وتقول بسم الله وتتوهط الواطة دي..ولا تقعد تجقلب كدة.. بخصوص الصدمة في الآخرين...تعرف الموضوع ده بقى اكتر من عادي عشان كدة ماتثق في اي زول للآخر وماتفتح تلقائية التعامل وعفويته لي اي زول قبل ماتختبره اكتر من المائة مرة...وسارة اظنهاآخر من يضع ثقته في اي كائن كان...حتى الصداقة يا قيقابقت الزمن ده في المحك.
Post: #173 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-15-2009, 04:47 PM Parent: #172
Quote: حسب قرايتي سرورة دي مما تسمع زول مسافر السودان ...الهلا هلا تقوم بيها
وماااااااا (تييييييييب)؟
Post: #174 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-16-2009, 09:56 PM Parent: #173
Quote: ولما يجي اليوم المر, تعرفي انه الحلو جاي, بس عايز صبر ..
\ اماني..
ربنا يصبرنا,, احمد الله.. علي الصحة.. علي الناس البحبهم وبيحبوني.. وعلي حاجات كتيرة ..موفرة لي ..وما موجودة عند غيري.. دة البقولو لي نفس دايما..ودي البيصبرني
Post: #175 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-20-2009, 12:27 PM Parent: #174
أصدقائي الأعزاء..
عبر الة الزمن سافرت من أقصي الشرق الي أوسطه .. رحلتي كانت زمانيه أكثر منها مكانيه .. فمن بكين ومنطقة أقاصي الشرق المدهشه من حيث استحداث النهضه والتحضر مرت الة الزمن العجيبه بأهل الخليج حيث استحداث النعمه وبريق المال .. ثم حطّت ببقعه حبيبه الي نفسي جدا .. ولكنها موغله في البعد عن مظاهر النعمه والحضاره .. رحلت من بكين وهي في عام 2009 قفزت بكين الجديده قفزات الي المستقبل ومازالت تتقافز.. ووصلت الخرطوم فوجدتها حبيسه في عصرها الحجري الأزلي .. كان وصولي الي الخرطوم اواخر العصر وبدايات المغرب .. فواجهتني مدينتنا من أعلي السحاب واقتربت مني أو دنوت منها بوجهها الحقيقي بدون مساحيق التجميل التي طالما طالعتني بها حال عودتي ليلا من أسفاري حين أجدها ملتفه بظلام خلّاب .. حين كنت أهمس لنفسي يالله علي روعة الخرطوم بالليل .. هذه المره طالعتني المدينه بوجهها النهاري الموجع .. يالبؤس العاصمه .. شعرت بالحياء حين تطلع الأجانب الكثر الذين اكتظت بهم الطائره ممن تستجلبهم المنظمات وشركات البترول الي مدينتي وعشوائيتها .. هل لنا دوله ؟ ما رأيته كان ينبئ أن لبلادنا حكما أهليا.. مشايخ وعمّد .. وليس دوله .. لا بني تحتيه ولا فوقيه .. لا تخطيط ولانظام .. فوضي ضاربه في كل مكان .. كل من أمتن الله عليه بقطعة أرض بناها كما أتفق .. لا شوارع لا تخطيط ولا جمال .. سألت نفسي سرا هل هذه الخرطوم حقا؟ .. ياتري كيف تكون "كرتون كسلا" اذا ؟!!
أسفي علينا .. علي شبابنا وهو يجلس باسترخاء المتقاعدين عن العمل في حدائق عامه تفتقر الي التشذيب .. وعلي جوانب الطرقات الترابيه بلا نشاط ولا همّه .. أم أني اعتدت علي رؤية الكل يركض في بكين .. علي حماس الاندفاع الي العمل وعدم الكلل أو التكاسل ؟؟
قلت لأخي وهو يقلّني بسيارته الي المنزل ضاحكه .. يبدو أن الكل أنجز مهامه في بلادنا لنري كل هذا الاسترخاء في حركة الناس ..
أسفي علينا .. مغبّرين بتراب شوارع لم تري الأسفلت حتي الان !! وعشوائيه ضاربه علي الأماكن كلّها .. واسترخاء مدهش ضارب علي الجميع !!
هل سننهض ؟
Post: #176 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-20-2009, 12:47 PM Parent: #175
قيقا وساره وحنين وكل الأصدقاء .. اعذروني علي عودتي بمدخل مباشر قبل السلام .. بس الوجع الكنّا بنغسل فيه, طلع أكبر من انه يتغسل, خصوصا لو كانت المحاوله من خارج أرض الوطن .. الوجع هنا .. في بلدنا .. مستنينا متي ما عدنا .. بيشتعل جوّانا لمّا نشوف حالنا ونبكي علينا ..
مشتاقه ليكم يا أصحاب وجاياكم بحكاوي الوجع اللي اتجدد جواي لما شفت بلدنا داخل قضبان العصر الحجري .. وماعندها وجيع ..
وجايه لحكي قيقا وجرسة ساره ومشتاقه لحنين ..
سلامات كتار ..
Post: #177 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 05-20-2009, 04:35 PM Parent: #176
العزيزة اماني حمد لله على سلامة الوصول
Quote: مشتاقه ليكم يا أصحاب وجاياكم بحكاوي الوجع اللي اتجدد جواي لما شفت بلدنا داخل قضبان العصر الحجري .. وماعندها وجيع ..
و الله انا جيت من الخرتوم دي ذاتا في نهايات اكتوبر 2008 م مبسوط منها!!! كان كدي الصينين ديل معناتا طاروا روّحوا يا ربي اوروبا ست اللسم تكون كيف أكان ديل صينيين ساي ؟!
عادي يا اماني بتتعودي على رتم الحركة و ترخيم شبابنا دا . . . بس النوصيك : لا تؤجلي عمل اليوم الى الغد . . . طالما في فرصة تؤجليه لبعد الغد ، او تزوغي منو عديل
مرحب بيك في سودانا اللذيذ و مرحب بعودتك لينا هنا و الشوق كيمان كيمان اها نبارك الشهادة الكبيرة ؟
Post: #178 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-20-2009, 09:26 PM Parent: #177
بي زيارتك بيتنا نور كلووو زينة..
شكرا يا اماني لانك رجعتي في وقت الحوجة..حوجتي لي نضميك دايراك تحكي لي اي شئ عن البلد بالتفصيل.. بلي شوقك وارجعي لينا..
والف حمد لله علي السلامة واكرر .. مشتاقين وازيد..شديد
واضيف..حنين حتكون في السودان الاسبوع الجاي.. بختها..بيك وبالسودان
Post: #179 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 05-20-2009, 09:28 PM Parent: #178
اماني يابت ياراقية وفاهمة الف حمد الله على السلامة ...ضروري جدا تديني تلفونك في الماسنجر لازم نتلاقى..انابعد ايام في السودان في اجازة سريعة...زي مقالات سارة بختي بيك..
Post: #180 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-21-2009, 03:17 AM Parent: #179
قيقا وحنين وساره ..
تشكرات كتيره علي الترحيب ..
ياقيقا
Quote: اها نبارك الشهادة الكبيرة ؟
لسه شويه, الشهاده من هنا .. من جامعة الخرطوم .. الفي بكين كان البحث, باقي لي الAnalysis والكتابه بتاعة الThesis .. ديل بتعملوا هنا انشاء الله, بس دعواتك ..
ساره وحنين قبل ما أحكي ليكم عن السودان الشفتوا .. السودان حقي ما حق قيقا المبسوط منه .. عايزه أقول اني حأتشرف بيك ياحنين شديد .. انشاء الله نتلاقي ونحكي كتيييييير .. طبعا عارفه المسنجر هنا ملّغم بالهكر ومن لف لفه .. حأضيفك في الFacebook وأرسل ليك فيه رقم تلفوني .. وفرّحتيني بخبر جيّتك شديد .. شديد ..
Post: #181 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-21-2009, 03:38 AM Parent: #180
الساعه في الخرطوم الخامسه صباحا .. وأنا أجلس علي الانترنت !! ومازلت أصحو وأنام علي توقيت بكين .. ساعتي البيولوجيه مازالت عالقه هناك .. لم تتأقلم علي فروقات التوقيت في رحلة الزمن هذه ..
خليني أحكي ليك ياساره عن السودان والشفتو وسمعتو في السودان في يومين ..
أول خبر محزن جدا .. الولد الشغال معانا في البيت .. أسمو بيتر .. شاب يمتلئ طيبه ونشاط .. مطيع ضحوك سريع الاستجابه لأي طلب .. مهذب لطيف .. نعرفه منذ طفولته .. يحضر الي منزلنا بصوره دوريه منذ سنوات عديده للقيام بمهام متفرقه, امتهن حرفة البناء مؤخرا وأعرض عن المهام المنزليه ولكن بقي يقضي أغراض أمي خارج المنزل. وأحيانا يساعد في المهام الصعبه داخل المنزل ..
مات بيتر ياساره ..
أصيب بمرض لم يعرف ماهو .. أحضر الأوراق الطبيه الي أمي فلم تعرف ما أصابه .. ولم يعرف شيئا عن الورق الذي يحمله .. كان مريضا جدا ويعمل في مهنة البناء الشاقه .. ليأكل ويتلقي العلاج, في دوله امتهنت الاستثمار حتي في الصحه !! تدهورت حالته بسرعه مذهله .. زاره أهلي في المستشفي مرّات عديده .. لم يكن له سوي أخت تعاوده .. ليس لها مال ولا تستطيع العنايه به ودفع مستلزمات العلاج .. كانت تتلقي الدعم من أهلي وتطمّئنهم علي صحته .. ولكن بيتر لم يصمد .. تهاوي أمام المرض الذي جعل دمه يحترق بسرعه .. وأستسلم للموت وارتاح .. مات مسلما ودفن في مقابر المسلمين .. وبكته أمي وأختي بحرقه في عناق صادق مع أخته التي نقلت لهن الخبر ..
بيتر وكل من هو مثل بيتر مسئولية من ياساره ؟
بيتر مات وهو لايعرف ماذا أصابه .. وهو لايعرف كيف يتلقي عنايه من دوله شردته بفعل الحروب .. ولم تدفع له ثمن الجهل والتعب والتشرد والمرض .. كم مثل بيتر استسلم للموت خيرا من الحياه في دوله ليس لمواطنيها حقوق .. ولهم الكثير من الواجبات !!
حزينه جدا ياساره علينا .. وعلي بيتر .. وعلي كل الزي بيتر ماعنده وجيع .. وزي ما قال أخوي نحن أمه بتقول كتير, لكن ما بتعمل أي حاجه !!
وجع جديد ياقيقا اتراكم في ذاكرتي.. وأنا لسه ما مسحت القديم ..
والحل يا صاحب؟
Post: #182 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-21-2009, 03:52 AM Parent: #181
جارتنا ياساره .. أم عادل .. مسنه تحمل شلوخا تدل علي سنوات عمرها التي ناهزت السبعين .. لكنها نشطه وبصحه جيده .. حتي حدث أن أصبحت ترتاد المشافي مؤخرا .. استشعرت وجود حبه متورمه في ثديها .. فذهبت الي الطبيب لمعرفة نوع الورم وعلاجه .. أخذ الطبيب منها عينه وأخبرها أن الورم خبيث.. ولابد من ازالته .. هم وحزن وقلق وخوف اعتصر قلبها, وقلب الجميع عليها .. خضعت لعمليه جراحيه تم فيها ازالة الثدي بأكمله .. وعانت من الجرح والعنايه به .. وكان الأكبر جرح الروح وخوف المستقبل .. وجسدها الهرم الضعيف الذي لايتحمل الجراحه وتبعات العلاج .. كتب لها الطبيب جرعات علاج اشعاعي لازالة أي بواقي ممكنه للورم بعد الجراحه .. ذهبت الي العلاج بالأشعه , فقال لها خبير الأشعه أنه لايري أثرا للورم .. وأن عليها مراجعة طبيبها مره أخري .. حين ذهبت للطبيب وبعد فحص عينة الثدي التي تحصل عليها بعد الجراحه .. صرّح لها الطبيب أن الورم لم يكن خبيثا .. وأن ازالة الثدي كانت خطئا طبيا ..
السؤال هو هل تفرح أم عادل ياساره أم تحزن .. وهل أفرح أنا حين أسمع الخبر أم أحزن ؟
أفرح لأنها لن تمر بتجربة العلاج الاشعاعي القاسيه؟ أم أحزن لأنها وغيرها تزال أجزاء من أجسادهن ويمررن بألم تجربه نفسيه قاسيه .. ولا يوجد من يحاسب أحدا علي الأخطاء !! أم عادل لن تقاضي الطبيب .. ولكني من غضبي أفكر أن أقوم بذلك نيابة عنها .. حتي لاتسقط نساء أخريات ضحية الاهمال وعدم المهنيه .. وحتي عدم تحمل مسئولية الخطأ !!
لسه جاياك ياساره أحسبي معاي ..
Post: #183 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-21-2009, 04:11 AM Parent: #182
جارنا ياساره وبعض أفراد أسرته .. ماتوا موت جماعي في حادث حركه .. في الطريق الي المدينه التي تقطن فيها أمه .. حين ذهب لزيارتها .. الحادث كان حسب رواية الشهود.. في منطقه معروفه بتكرار الحوادث المروريه فيها منذ سنوات عديده منصرمه .. طريق به منطقه معروف عنها أنها حصدت الأرواح بشده .. ولم يفكر أحد من المسئولين عن دراسة الخطأ بالطريق .. أو تلافي حصاد الأرواح المستمر هذا ..
أظني سمعت يوما حديثا عن بغلة عمر والعراق والطريق .. ولكنا بشرا ولسنا بغالا .. فكيف سيكون سؤالهم بين يدي الله ياعمر .. عن لم لم يسووا لنا الطريق ؟؟!!
ومازال الانسان ياساره في بلادنا بأرخص الأثمان .. يسلم الروح لباريها ويرجو عدل العادل الأوحد .. وانتزاع الحقوق يوم الموقف العظيم .. ولايري أملا قبل ذلك يشفي غليل النفس .. ويذهب ألم الروح ..
حبيبتي ماما دوما أخبرتني يوما أنها تعتقد أن الله غفور رحيم وسيدخل الجميع الي الجنه .. ولن يعذب أحدا في النار .. أحتججت بعنف علي مقولتها اللطيفه .. لأ ياماما دوما ما عايزين الناس كلّهم في الجنه .. عايزين ناخد حقّنا علي الأقل يوم القيامه .. من اللي ظلمونا .. وخلونا متأخرين في مرتبة الانسانيه حتي عن البغال ..
ساره محتاجه شديد للفضفضه معاكم .. ومشتاقه ليكم كميات كميات ..
تعالوا نفضفض وذلك أضعف الايمان ..
تحياتي ,,
---- نسيت أقول ليك ياساره انه في ناس كتار شديد عرّسوا أثناء غيابي .. ماعارفه العرس بقي ظاهره, ولا موضه وللا الحاصل شنو؟ لكن دي الحاجه الوحيده الماشّه بمعدل سريع وما قاعده تقيف في السودان !!
مستتنيه ألاقيك بشوق يا حنين ..
وتاني سلام مربع يا قيقا ..
Post: #184 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: حنين للبلد Date: 05-21-2009, 04:49 AM Parent: #183
اماني
وجعتيني بي خبر موت بيتر...البركة فيكم وفينا.. هو في شنو بالضبط....لي اسبوع ماعارفة احدد احساسي شنو بالضبط من سفرتي للسودان دي..يوم اصحى فرحانة دون سبب"فرح زايد عن اللازم" ويوم اصحى زهجانة وشوقي الكان ملتهب داك فتران وكسلان...خايفة امشي القى الناس زادت جفوة... كل ما اشوف كيف الانسان هنا عنده قيمته هنا غي امريكا "رغم كل الإدعاءات المعلوطة عن الشعب الأمريكي" بقول العزة دي كان يستاهلوها السودانيين,,,ياخي الشعب السوداني ده عزيز لكن اتذل كتير،كل الحكومات المتعافية من الاستقلال ماقدرت تدي حقه.... الناس تعبانة يااماني ، جارتكم تعمل غصة مزدوجة في القلب وفي العقل...معقولة بس..ليه الهوان ده..لي الطب اتدهور للدرجة دي وبقى بيزنيس اكتر من اي شييء.. يا اماني....لقيتي ناس بيتكم كيفن..وحوشكم ..لسه الناس بتتلم تتونس بالليل...ولا كل زول مقبل يناضم في الهواء...ياخي الشعب السوداني كله بقى ينضم براه انا قصة الموبايلات دي بالجد محيراني..كل واحد عنده موبايلين..ومافي زول بشبعك ونسة...تتخيلي عادي اكون قاعدة في نص تسعة انفار واكون براي...كل واحد بناضم في موبايله ..وانا بناضم في روحي.. مشتاقين يا موني...قلتي لي الفيس بوك...طيب حتعرفيني كيف..انا هناك باسمي الحقيقي..ورعم الريدة انتي مابتعرفي اسمي...عموما الحي بلاقي..انا المرة دي غصبا عن عينها الاجازة دي حاستمتع بيها...
Post: #185 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: صديق الموج Date: 05-21-2009, 05:19 AM Parent: #184
قيقراوى.....سلام سلام سلام ما حا اقول ليك اكتر من انك زول فقرى وضنين وحاسد.... اللهم انى قد بلغت المتداخلين اشهدوا،،،
Post: #186 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 05-21-2009, 01:18 PM Parent: #185
Quote: قيقراوى.....سلام سلام سلام ما حا اقول ليك اكتر من انك زول فقرى وضنين وحاسد.... اللهم انى قد بلغت المتداخلين اشهدوا،،،
فقري و مقرم ممكن ضنين بالوعد ؟ .. . احتمال
لكن ما حاسد انا بغران ساي
عمنا صديق و الله هلت البركة و اشرقت الانوار ليك مدة ما بنت و انا في اشتياق لي شوفتك يا حبيبي
Post: #187 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-21-2009, 06:22 PM Parent: #186
حنين العسل: مريت بنفس تخوفك من العوده.. وقادره أتفهم التناقض اللي انت حاسه بيه .. عادي ياستي .. ناس بيتنا بخير ياحنين شكرا لسؤالك.. أضيفي لحكاية الموبايل انه كل واحد عمل ليه لاب توب .. العالم الافتراضي في الانترنت جميل, أجمل من الواقع الصعب .. اللي بيعيش بره السودان بيلجأ للعالم ده عشان يكون مرتبط بالسودان والسودانيين .. وناس الداخل هاربين من التواصل الواقعي الي التواصل الافتراضي بشده .. يعني ناس البيت الواحد بيعرفوا معلومات عن بعض عن طريق الصداقه في الفيس بوك .. مدهش صاح؟
بمناسبة الفيس بوك, أظني عرفت اسمك ورسلت ليك ..
سلامات ..
Post: #188 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 05-22-2009, 10:45 AM Parent: #187
Quote: مات بيتر ياساره .. ..
و قبل نحو سنة برضو - 14 مايو 2008 م - مات نزار يا اماني . . . عبور نزار دا الاسى الامو بت أعم ابوه جد جد ح تقولي لي نزار دا منو ؟
إذاً أنتَ مُرتحلٌ عَن دِيارِ الأحِبَّةِ في زّوْرَقٍ للنجاةِ. على سَطْحِ بحرٍ أُسمّيهِ يا صاحبي أَدْمُعَكْ وَلولا اعتصامي بحبلٍ مِن الله يدنو سريعاً ولكنْ ببطءٍ. . . لكُنتُ زَجَرْتُكَ: خُذني مَعَكْ وخُذني مَعَكْ خُذني مَعَكْ . . .
" سميح القاسم "" **
خبروني الصحاب عن تفاصيل الرحيل لكنهم للآن على باب الذهول حيث لا كفنٍ يليق غير دمعة تبلل تراب الوطن سامر حسن : ارسل الرسالة ملؤها ايمانه المعهود و لم ينس ذكر الاسم رباعي ليغالط ذهول التشكيك علاء شنكل : مازال في انتظارك بشاي المغربية . . و يجاهد في تكثيف اللحظة ليقف عندها الزمن شرف : على حد تعبيره في انتظارك لترفع رأسك شاهراً ابتسامتك المعهودة لتغيظهم : انتو صدقتوا ؟ بخاري اخانا الذي في الديم ذاك ابن امك و ابيك : مازال يوصيني بأن اتصبر و " هو امر الله ". . . و مازال بيننا عزاء معلق علنا ندركه. خالتي بشرية : بتردد في مر صبرها " نزار عزيز على الناس لكن ما كتير على ربه " اخلاص : تحدثني عنك كأنك في البقالة محمد : هو رسولنا في البدء و سميه رسولك لنا و نعاهدك على رسالتك و المحبة بقى اخيراً ان اذكرك بأن الموت ما له فرصة معك و أن اتاك من حيث منحتنا كل الحياة . . . تصور باغتنا من حيث قلبك لكن هيهات . . . ما غاب صدى صوتك . . . و ما غيب ملامحك موت . . . فنم هانئاً حبيبنا
----------------------
* محجوب شريف " مرثية للقدال " د. محمد سعيد القدال " ** سميح القاسم بخاطب من ترك الحصان وحيداً ، بعد ان ايقظ الجيتار
بالجد الموت نقاد و في ايدو الجواهر و بنقي كويس جداً : نزار عثمان ، نازك احمد عبد القادر ، زهير فيصل راسخ . . . 14/5/2008 ، 11/6/2008 ، 8/7/2008 م محمد خلف الله ( شقيقي ) 12/12/2008 م حيرّة عظيمة في فجاعيةالـ 2008 م و الرحيل المر ! : مصطفى سند ، محي الدين فارس ، عثمان حسين ، محمد سعيد القدال ، محمود درويش ، يوسف شاهين
*** يا حنين و بقية الحنينين التانين بستأذن حزنكم- رغم ان الحزن عمرو ما دقالو باب - عاوز انزل صور لنزار و فادي نزار و محمد نزار ؟
Post: #189 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 05-22-2009, 12:01 PM Parent: #188
ماكنت قايل نفسى يوم أرثيك يا أصدق خليل أنا كنت بتخيّل أكون قبلك أسافر غنوة فى الوتر الجميل زى ما عبرت معاك صروف زمن المسافة وجينا للى الحزن النبيل أنا كنت داير الدنيا تمهلنا ونغنى الفرحة لى الزمن الخرافى .. المستحيل ورحلت ما كان ده الأوان رحت وحرقت حشا الغنا خليتنا لى الزمن الهوان والإرتهان لى خيول زمان الشنشنة كل المطارات والموانى وشفع البلد الفتارى ... لسة بارين القطارى يسألوا الناس عن خبر زولاً مسطّر إسمو فى قلوب العذارى وفى عيون كل المساكين ... الحيارى زول بيطلع من نفس طورية ضامة الطين تكابد طول نهارا زول بيسكن فى عيون أطفال تأمّل ديمة يديها البشارة ياخى والله الفرقة حارة وفقدك أكبر من محيط الدنيا وأكوانها ... ومدارا طليتنا زى حلماً جميل فجأة فى غفلة أنسرق أسطورة تحكى أمانى جيل فى حب غناك كان ليهو حق أديتو فى الدنيا الأمل وريتو كيف فى الحق يقيف من غير وجل أو إنبهار علمتو بى حس النغم إنو الكلام لازم يكون واضح كما شمس النهار صدقك ملاهو حماس .. يقين بالخير وبالحق .. والنضار والإفتخار إنو الحبيبة هى الأرض والتضحيات عشان عيونا هو الفرض والدنيا ورّاثا الصغار وعرفنا يازول قسوة الضنا والتعب والإرتحال فى غفلة الزمن الصعب وقولة الوداع بالضبط والسفر الأبيد من غير رجوع أو غير متاع وبكت عليك كل الشوارع فى المدينة ناحت عليك كل الفواصل فى الغنيوات الرصينة وإنكتم نبض الغنا جلل سواد حزنك سنا وإتوشح المنا بالضياع وكان بدرى يازول الوداع لا سكة لى درب الرجوع بعدك أغانيك إلتياع مسكونة بالأسى .. والخشوع لكن بريقك ما خبا أبداً بريقك ماهو ضاع ساطع كما نور الشعاع منو قال هو فات زولاً وهب كل الحياة للأغنيات منو قال هو فات ما أظنو زيّك يقولوا فات يامن وهب كل الحياة للأغنيات يا من ترك فى قلوبنا أنبل ذكريات يا من ترك أحلامو فى كل الجهات وخلّد معانى الروعة بى كل الصفات ما أظنو زيّك يقولوا فات يامن وهب كل الحياة للأغنيات ورحلت ما كان الأوان رحت وحرقت حشا الغنا خليتنا لى زمن الهوان والإرتهان لى خيول حروف الشنشنة
Post: #190 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-22-2009, 06:23 PM Parent: #189
قيقا يا صاحب:
Quote: نا كنت داير الدنيا تمهلنا ونغنى الفرحة لى الزمن الخرافى .. المستحيل ورحلت ما كان ده الأوان رحت وحرقت حشا الغنا خليتنا لى الزمن الهوان
يسكننا الراحلون .. تصبح صورتهم والفجيعه مطبوعان بوضوح في ذاكرتنا المتهاويه يوما بعد يوم .. تلسعنا ذكراهم ما فرحنا أو عاودنا لهم الحنين .. ذهبوا كأن لم يكونوا !! وتركونا في صف الانتظار للحاق بهم و الانطباع كجزء من ذاكره متهاويه أخري ..
أي جنان تحلق فيها روحك الطيبه يا بيتر .. تري من يذكرك الان .. من يبكي لفقدك ؟ لن تقام لمثلك مراسم تأبين وذكري سنويه .. لن تتوقف فرق كرة القدم حزنا عليك لدقائق معدوده .. لن تنكس الدوله أعلامها, ولن يخرج الجميع لوداعك .. رحلت في صمت كحياتك القصيره .. لم تفقدك سوي أختك المكلومه, ولن يذكرك أحد ... ما أتيت فيها لجاه وسلطان, وانما لتعيش منسيا علي هامش الحياه .. وتمنحنا الألم كلما شعرنا أنك كنت هاهنا .. بهدوء الراحلين .. هل ستسامحنا علي التقصير في حق روحك البريئه .. هل ستسامحنا لأن مثلك أعطي ولم يأخذ الا الفتات .. سامحنا فقد تهاوت انسانيتنا بفعل تراكم الأحزان.. وطرقاتهم المتواصله علي جبيننا .. سامحنا لأننا مثلك ضحاياهم, من جعلوا أرواحنا أشباحا عاجزه .. وجثثا متحركه ..
------- قيقا ياصاحب.. البوست بوستك زي ماعارف.. عيش الحزن وخلينا نتوجع معاك .. يمكن روحنا تصحي من موتها الطويل .. نزل صور, وأكتب مرثيات .. خلي الوجع يتحدث عننا ويحكينا .. لنا الله يا صاحب .. والبركه فيك في فقدكم وفقدنا ..
Post: #191 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 05-22-2009, 06:31 PM Parent: #190
عاجبني كلامك ده يا قيقا ..
Quote: اقامة سرداق لبكائية تليق على ما ضاع بين محن الشمولية و احن الديمقراطية و سبر الاماني الاتسربت ما بين كوارث الطبيعة و كوارث البني آدميين و ما مات من اغنيات و نشوف كمين طفل جميل راح . . . ضاع . . . او مات او ماتت امنياته . . . سيان . . هل في فرق ؟
سيّان ... سيّان ..
Post: #192 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 05-23-2009, 02:40 AM Parent: #191
وقفي يا اماني..
كفاي.. طاقة الاحزان دي ..واريها
بيتر الله يرحمو.. بالجد حاسة وجعك بي خبر وفاته.. وجارتكم..الله يعوضا.. واقيفي عند كدة
Post: #193 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 06-05-2009, 02:16 PM Parent: #180
Quote: ياقيقا
Quote: اها نبارك الشهادة الكبيرة ؟
لسه شويه, الشهاده من هنا .. من جامعة الخرطوم .. الفي بكين كان البحث, باقي لي الAnalysis والكتابه بتاعة الThesis .. ديل بتعملوا هنا انشاء الله, بس دعواتك ..
علم و الله لكن شن عرّف العرب بغسيل الصابون ؟! و الله انا كنت قايلم طوالي في آخر يوم بعملوا ليكم طابور كدا نص النهار يوزعوا ليكم فيهو الشهادات
غايتو لحقت امي في الشغلة دي ! ما ناقشة اي حاجة عن قرايتنا كان حكيت ليها حاجة مقرفة تقوم طوالي تقول لي : انتو بقروكم شنو في المدرسة دي؟ هي مدرسة العلوم الادارية و لا مدرسة الإتيكيت و البرستيدج العامة ؟
بمناسبة امي دي شوفي بيتنا ما سمح ؟
غايتو بيت جيرنا داك سمح قطع شك . . . لكن سحابنا كيف مش حلو ؟
يا عزيزة صادق الدعوات و جميل الاماني الحلوة فالك طيب
و الشوق للجميع بهذه الديار
Post: #194 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: Amany Elamin Date: 06-05-2009, 08:59 PM Parent: #193
اهلاااااااااااااااااا
قيقراوي صديقي الاسفيري (دي علي وزن صديق أساسي الاسفيري بتاع الصور) .. سعيده بطلتك ومشتاقييييييين يا صاحب .. والليله أنا سعيده أكتر لأنك غيرت صورة البروفايل بصورة أصحابي الحلوين فادي ووعد.. أولادك حلويييين ماشاء الله ربنا يحفظهم ياقيقا ..
Quote: و الله انا كنت قايلم طوالي في آخر يوم بعملوا ليكم طابور كدا نص النهار يوزعوا ليكم فيهو الشهادات
عادي ياصاحب, قصة التمساح دي مما جيت الخرطوم بحكي فيها, أنا مسجله في جامعة الخرطووووووووووم علي وزن مشيت البحححححححر هههههههههههههه ..
بعدين انت الليله كريم معانا اخر كرم .. جايب لينا صورة بيتكم في الخريف :) أول حاجه حظكم ماساكنين في الصحراء الاسمها الخرطوم دي.. هنا ياصاحب لا عندنا سحاب, لا نجيله في الشارع, هنا تراب بس .. في الواطه ونازل من السماء كمان .. تاني حاجه شكلك الليله مشتاق لبيتكم وحلتكم خالص .. ياسيدي ربنا يخلي ليك الوالده ويطراها بالخير .. وحأرجع انشاء الله أحكي ليك عن الرجوع من الغربه والاستقرار في السودان ..
---- عارف البوست ده لسه عندي فيه كلام كتير, لكن كل ما أجي أرفعه أتذكر هرشة ساره علي الفوق ديك, أقوم أغير رأيي :) وانت ذاتك مختفي لمن قرررربت أفتح ليك بوست اسمه قيقراوي مشتاقين ههههههههه أو قيقراوي تعال نتم باقي النضم في سيرة الأسي :)
Post: #195 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: قيقراوي Date: 06-06-2009, 09:08 PM Parent: #194
Quote: بعدين انت الليله كريم معانا اخر كرم .. جايب لينا صورة بيتكم في الخريف :) أول حاجه حظكم ماساكنين في الصحراء الاسمها الخرطوم دي.. هنا ياصاحب لا عندنا سحاب, لا نجيله في الشارع, هنا تراب بس .. في الواطه ونازل من السماء كمان .. تاني حاجه شكلك الليله مشتاق لبيتكم وحلتكم خالص .. ياسيدي ربنا يخلي ليك الوالده ويطراها بالخير ..
الصورة فيما بعد الخريف . دي آواخراكتوبر 2008 م و دا جمال كوستي و قباحتا في نفس الوكت
دي بحيرة الـ " غاغ غاغ " دائمة الخضرة و النغيغ . . . مربنهم مخصوص الضفادع و ابجندب ديل لمآرب ليلية و أغراض موسيقية
معليش اتحلتك في قصة " الشهادة الكبيرة " او طاري تمساح البحر ياخ النكتة دي مرتبطة لي بذكرى المرحومة الحية فينا حباً " أميرة كرار " الله يبشبش الطوبة التحت راسا وهي زوجة زملينا سامر حسن الراحلة في 2004 م اثر حادث حركة أليم، هي وصغيرها محمد سامر جعله الله خير سلف لخير خلف .
المهم نرجع لموضوع القرف و الغيبة سبب الغياب بعمل في ميزانية ، و اخيراً اكتشفت العلاقة بين القشرانية دي و ملاح الكمونية ياخ تعمل ميزانية كأنك بتغسل ليك في كرشة خروف ، قدر ما تقول خلصت تلقى ليك طبقة جديدة دايرة غسيل .
و الله مشتاقين كتير يا اماني وين بقية القوم ؟ ياخ سارة اشتلت معانا بمعكوس النص يا سرورة قلنا ليك اطردينا من البوستات التانية ما دا . . . لووووووووووووووووول
Post: #196 Title: Re: اماني الامين يا بت يا فاتحة طاقة الحكي . . تعالي نتم باقي النضم في سيرة الاسى . . Author: سارة علي Date: 06-06-2009, 10:42 PM Parent: #195
يا قيقا.. انا بقيت ذاتي محتاجة لي الينبهني ويطردني... الانا الايامات دي ماضية كونتراكت مع النوم.. نظامي بقي كالأتي:- أكل شرب قام مشي الشغل رجع نام..
وما بين الحاجات دي لو لقيت لي فرقة بعمل اعادة تقييم لي الحاصل لي..
لو سالتكم عن احسن طريقة الواحد يعاقب بيها نفسو ممكن تكون شنو؟
وعرضها في وشي و كان دا رده على سؤالي السابق : عشان الحركات دي ذاتو و الله يدخلوني ابقى مليونير في يوم واحد . 
