حاكمنا ما سليمان وللهدهد ما راجين

ياحليل خرطوم الفيل

ما حام حداها عميل

ياحليل تمساح النيل

الكان للقوة دليل ...

.................

صِبح الورل قدال

معاهو القرد طبال

وإنت يا قرنوق خد ليك كم شبال

والثعلب الماكر رافع شعارو نضال

صقُرك الطاير أترصد الاحوال

فيك الذئاب تنهش وتقطع الاوصال

فيك الكلاب تنبح تغير الاقوال

شعبك الغلبان إحكي في الجوال

مابتسمعوا الرادي!! الرادي ما شغال؟؟

ورجعوا للقصة..قصة النبي سليمان

وسلطان زمانوا الطال..

وأصحوا يا حالمين ...أصحوا يا غافلين

حاكمنا ما سليمان وللهدهد ما راجين

حكمونا بالكهنوت..خدعونا باسم الدين

جونا جيعانين وكانوا عريانين

آخر الاحسان نعتونا شحادين!!!

أكلونا أكل السحت ولسه ماراضين

قسموا البلد كيمان وزادو بل الطين

حلبوا النعاج التسعة ..وإتقسموا التسعين

طاولتوا في البنيان جاوزتوا سور الصين

بسياسة التمكين زدتوا في الذرية..

ونكحتوا حور العين...

عددتوا في النسوان..

أدمنتوا للفيتامين!!

يا ساسة يا عاطلين

ياساسة يافاشلين

جاتكم الغارة عملتوا زي نايمين..

عرفوا الخبر دسوا الخمسة في الاتنين...

صبحوا محتارين!

ندفنوا في الواطة؟ نمسكوا عاد لمتين؟؟

عورتكم إنكشفت كل الخلق شاهدين...

قصّوا الدرب شوفوا أعرفوا الضربكم مين..

وحاكمنا ما سليمان وللهدهد ما راجين...