عبدالمنعم الجزولى مساءً وَخْـرِى..وكعادته، اتصل تاج السر الملك يسأل: - كيف حال برايان؟ - البركة فيكم ياخ. - مات؟! - صباح اليوم...
وبرايان، امريكى اسود، كان كاكاوى اللون، قبل ان يستحيل سواده الى فاجعة لونية. طويل القامة بشكل لافت،وقيل انه كان رياضيا من النوع الذى تتعشقه النساء ( نحن لنا الله وعيشة السوق!! ) ووسيم بما يثير الشبهات، ومصاب بالايدز....ولله الحمد.
قادتنى المقادير لكى ارافقه فى المستشفى، كجزء من عملى الجديد.... انا الآن تمرجى كامل الدسم!!
تطلع من بيتك حزين.. تلقى الفرح عند مين ( مثل سودانى مصرى مشترك )
وهكذا، عندما لفظتنا اوطاننا الى المنافى، ودون سابق انذار، ولم نكن مستعدين لذلك، ففقدنا فجأة نعمة الاختيار، ولم نعد نملك خياراتنا. فى الواقع .. لم نعد نملك اية خيارات. وصرنا ( متملطشين ) ذات اليمين وذات اليسار و...وذات مابينهما. ننهض من حفرة لنقع فى اخرى. بالطبع..فان الكثيرين منا استطاعوا ان يحولِّوا حجر الطاحونة الى تورتة بالمايونيز!! فطابت لهم ( طابت ). اما التعساء من أمثالنا، وخائبى الرجاء، والذين لاصبر لهم على عَـوَر الدرس، ولا على عَوارة الدرَّاس، فقد اكتفينا بشهادة محو الامية الحضارية، مع شهادة لا اله الا الله، ثم انطلقنا فرحين بما أُوتينا، نكنس شوارع الامبريالية ونلمعها لهم، وننقل متعلقاتهم من بناية الى أخرى، وزبالتهم، من برميل الى آخر. فلم تتسع مواعيننا لاكثر من غسل مواعينهم. والله اكبر والعزة للسودان!!
فقدت وظيفتى فى الفندق، نتيجة من نتائج ازمة الرأسمالية الاخيرة ( العبد لله، ولافخر، مسجل كأول ضحايا الانهيار الاقتصادى العالمى! ) ومثل الكثيرين غيرى، كدت ان أضيع بين الرجلين، حتى قيض الله لى ( نصرانيا ) رحيماً، ألبسنى لبوس التمرجية، واتخذنى تمرجيا فى شفخانة من شفخانات واشنطون الكبيرة. وهكذا وبدون مقدمات، رأيت فيما يرى الصاحى، اننى ارافق المرضى من أجزخانة الى أجزخانة، ومن أدبخانة الى أدبخانة. وأشرف على طعامهم وشرابهم ( وأنا نفسى احتاج الى من يشرف على طعامى وشرابى ) ثم وجدتنى اعتنى براحتهم وبموعد نومهم وموعد ادويتهم بل وقد اضطر مستقبلا للتغوط نيابة عنهم ان دعا داع الفدا!!! فأكل العيش صعب.
كان برايان هو مريضى الاول. وما الحبُّ الا للمريضِ الاولِ! من مواليد مايو 69 ( لا أعرف بالضبط هل هو مريض فى الاصل، أم أنه انقلاب فى شكل مريض ). وقد التقط البذرة من صديقته الشقراء، الهيفاء، الميساء، الفاتنة، سليلة الحسب والنسب والذى يمكن ان يمتد نسبها فى التاريخ حتى يوحنا عم المسيح ( هل للمسيح عمٌ يُنتـَسَـبُ اليه، كما العباس عم الرسول صلعم؟ ).
عند السسترات الخبر اليقين!! ( مثل طبى ) قلن انها كانت تعمل فى شركة من كبريات شركات الطيران فى وظيفة مرموقة ( لم يتحدد بعد درجة مرموقيتها ) ويبدو انها كانت تسافر كثيرا جدا. وكما فى فوائد السفر الكثيرة، ففى كل بلد ( سوَّالو وِلاد ). وقطع شك، فان واحدا من هؤلاء ( الولاد ) قد سواها، ولايخاف عقباها. فضاعت الفاتنة ضيعة ابدية. وتحولت الى مجرد تصويرة داخل برواز انيق، موضوع على المنضدة الصغيرة، بجانب سرير برايان، بعد ان سبقته الى الابدية ببضعة اشهر، وانا لله وانا اليه راجعون.
منذ رحيلها الفاجع، وبرايان فى حالة اكتئاب مزمن، لايتحث الى أحد، ولا يأكل ولايشرب ولايطيق الحياة نفسها، وقد حاول الانتحار عدة مرات!! وهذا بالضبط هو سبب تعيين تمرجى مرافق له. فوظيفة التمرجى المرافق اقرب الى وظيفة ضابط المراقبة، منها الى اى شئ يمت الى الطب بصلة. برايان لم يعد يطيق الماء العذب!!! يفضل عليه الكحول العذبة!! لهذا اخترعوا له نظاما غذائيا يعتمد على الكحول كمكون اساسى!! ولابد ان الدكتور قال لذات نفسه ( الراجل ميت.. ميت ).
فى زيارتى الأخيرة للسودان طلبت منى الصديقة ايمان عبد الغفور، ان اكتب لهم تمثيليات قصيرة لصالح منظمة تعمل فى مجال التوعية بمرض الايدز وسط معسكرات النازحين. يريدون بها ( التمثيليات ) ان تساعد على ترسيخ معارف الناس فى شأن انتقال العدوى، وطرق الوقاية، وضرورة الفحص الطوعى، وما إلى ذلك من طرق التعامل مع المريض. وهكذا، توفرت لدى مادة طيبة من الكتيبات والنشرات، استزدت عليها بعضا مما توفر لى فى الانترنت ( جزى الله اهل النت خير الجزاء ) فصارت لدى بعضا من المعارف النظرية!! بشكل عام....ولكن!!
بعد كل الدروس العسكرية والتدريبات على اطلاق النار والطرق النظرية فى الاقتحام والالتحام مع العدو، وكيفية أخذ الساتر ( والساتر الله ) ..و..فجأة تجد نفسك وجها لوجه امام العدو بشحمه ولحمه وكافة اسلحته الفتاكة... وكما يقول الشاعر البنا الحربُ صبرٌ واللقاءُ ثباتُ والموتُ فى شأنِ الالهِ حياةُ
والبحر خلفى والايدز امامى...ضاع الطريق الى السلامة مرة والى الابد... اللهم ارحم عبدك الضعيف، واسكنه فى جنانك يا أرحم الراحمين، آمين يارب العالمين.
يقول المتفائلون: الضربة التى لاتقتلك، تقويك!! ( مثل مجهول الاصل ) ويقول المتشائمون: الثعبان الوحيد الذى لايعض، هو الثعبان الميت!! ( مثل غالبا صينى )
جاءونى بحمولة قندران من القفازات البلاستيكية، وحمولة مماثلة من المرايل البلاستيكية والكمامات البلاستيكية وأطنان من الدعوات البلاستيكية الصفراء، وغمرونى بمشاعر بلاستيكية فياضة، وصفقوا لى كثيرا جدا وهتفوا باسمى فى محافلهم البلاستيكية ثم ادخلونى الى عرين الاسد!!
الاسد لم يكن اشحم من قشة الكبريت الا قليلا! هده الداء، ونال منه الإكتئاب، فتحول الى شبح نائم اغلب الوقت، ويكح الاغلب الباقى، فاذا توفر له بعد ذلك اى وقت فهو يقضيه فى تجرع الفودكا من زجاجة على جانب السرير. لا ماء ولاثلج ولا صودا!! لاطعام ولاشراب الا الفودكا. اما لماذا الفودكا تحديدا وليس الكحوليات الاخرى فهذا مما ليس لى به علم. وأدركت عندها كيف ان الطب قد تقدم بخطوات حثيثة نحو الشعشعة!!
براين لم يكن يتغوط!! كان كثير التبول ( والبول واحد من أهم المحظورات فى مثل هذه الحالة، مع الدم واللعاب ) ويفعلها فى السرير!! عمدا أم سهوا، لست أدرى. وكانت التمرجية ( ست الاسم ) تأتى ثلاث مرات فى اليوم لحقنه بمادة لا أعرف ( بالطبع ) ماهى ولكنها على كل حال حفظته حتى فجر السبت، وحين حضرت فى ذلك الصباح الى المستشفى أحمل بقية من نعاس، وقليلا من الزاد الذى ازدرده على عجل خلال اليوم، وبعضا من الامل فى ان تبتسم لى الحياة.. كان السرير عاريا من أية آثار للفراش أو الاغطية. فلم اسأل بالطبع، وغدوت من توى الى مكتب منسقة البرنامج على أمل ان تلحقنى بمريض آخر انفق فى مرافقته بضعة ساعات كل يوم اتقاضى مقابلها الاجر الذى يؤمن لى دفع قيمة الايجار الشهرى، وبعضا من الفواتير المتراكمة. والجاتك فى صحتك سامحتك ( مثل حداثى، من امثال مابعد الانهيار الاقتصادى ).
Post: #3 Title: Re: بهجات مجانية ....البنسلين ياتمرجى Author: Emad Abdulla Date: 04-04-2009, 00:17 AM Parent: #2
عن الفورأوول - الحقوق محفوظة . أحييييي يا كراعي .. الود نظام " حكيم " و كده .. و جنباوي . ( تكية يا السمحة أم عجن ) .
.... أنا لو من أهل برايان ده بمشي البوليس أشتكي .. يجيبو الزول يشرحوه تاني .. الدنيا ما معروفة .. يكون ود الناس ده ما مات إيدز و لا طيارة .. مات مغسة ساكت من الكلوجة المتحمداهو كل يوم .. و البنطلون برج الدلو و خرتاية . شفت الكريعات يا عصام ؟ يا خالقنا ما تعولقنا .
.... أحب منعم الجزولي كاتباً و ساخراً و مفكراً و فناناً و سائق تاكسي و تمرجياً و شجرةً كعكوليةً كبيرة .. و أحب السر الملك كاتباً و مصوراً لئيماً و شجرةً كبيرة أنا ياخ .
تعرف يا صاحب اول ما شفت الصورة قلت ودالجنرال و صاحبه الكراون ما كفاهم قطعو قلبنا بي قصة بريان كمان جايبين لينا صورتو!!! اتمعنت شوية لقيت الخلقة ما بتغبانى ... ياهو زولنا زاتو لكن "حسا" و "اضمحل" و اتكلوج
العجيبة النظرة الماساوية الطالعة من العيون مكسورة و مليانة هم دى , و لسان حالها يقول: "انعل ابو الكان السبب , انا الشربكنى في القصة دى شنو , الله لا كسب الارزاق و لا غزا فيها بركة . جابت ليها ايدز كمان؟ نحنا السيلان بيودينا خشم باب ود اللحد . اسه بريان ده لو هفت ليهو و قام "عضانى" و لا جلط فينى "دماية" بالغلط ما الرماد كال حماد, امانة ما رحت فيها يا زول , اخرتا تنقرض بي ... ايدز . و "الناس يقولو شنو" عليك؟ تقعد تحكى ليهم كلهم قصة بريان دى؟ العارفنك كويس حيقولو كضاب , مشيت هابشت مع النسوان بره بره , اما الوسخانين ناس عماد و عصام و بقية السفلة حيقولو عليك بتاع طين ... احسن حل تعمل حريف و تطلعا قصة ... الدنيا ما مضمونة يا اللخو ... ايوة: برايان مات!!"
Quote: تعرف يا صاحب اول ما شفت الصورة قلت ودالجنرال و صاحبه الكراون ما كفاهم قطعو قلبنا بي قصة بريان كمان جايبين لينا صورتو!!! اتمعنت شوية لقيت الخلقة ما بتغبانى ... ياهو زولنا زاتو لكن "حسا" و "اضمحل" و اتكلوج
لووووووووووووووووووول الله يصرفكم صرافا في عمركم دا كان دايرين تجيبوا لي طلقه تخمني بعد العمر دا واااااااااااااااااي يا فشفاشي
Post: #4 Title: Re: بهجات مجانية ....البنسلين ياتمرجى Author: سيف النصر محي الدين محمد أحمد Date: 04-04-2009, 00:22 AM Parent: #2
فعلا بهجة مجانية...و لأنها مجانية فجرعة البهجة كانت مضاعفة.. الزول ده و صاحبو تاج السر الملك مليانين صمغ..لكن كبرهم ما بعرفو.
Quote: أحب منعم الجزولي كاتباً و ساخراً و مفكراً و فناناً و سائق تاكسي و تمرجياً و شجرةً كعكوليةً كبيرة .. و أحب السر الملك كاتباً و مصوراً لئيماً و شجرةً كبيرة أنا ياخ .
عصام جبر الله و عماد و الضيوف ياخي انتو ما عندكم توقير للأطبا العظام؟؟ طوالى اتهامات بقتل المرضى بالله شوفو البراءة دي‘ براءة سفاح لا يزال في طور التسنين غايتو المريض التاني يعقوب شرد بعد ما بلع الصابونة ( و قيل بلعا ليهو منعم) اليومين دي انا لمن يضرب بقوليهم قولو ليهو مافي اتعلمنا الكضب و علمنا اولادنا المساكين و يا روح ما بعدك روح برايان ما مات بالأيدز.. مات بالأيد
تركت لكم الجمل بما حمل، وهجرت لأجلكم ( الاون لاين ) الى ملاذات ( الفور اول ) عل الله يريحنى من خِـلـَق الحبرتجية ولد عبد الله ( الكعب ) وولد جبر الله ( الأكعب منه ). ولكن ... انت تريد.. وانا اريد.. والله يفعل مايريد!
صاحبكما ( المصيبة ) لحق بى فى بلاد الواق الواق تلك. وكنت اظننى قد انعتقت من رفقته الى الابد، فجاء بكاميرته اللعينة، والمصممة خصيصا للنظر فى عيوب الناس وابرازها، والنظر فى محاسنهم وكعوجتها!! كاميرا حوصاء.. لاترى حسنا قط!! كاميرا شنـَّافة، كصاحبها ( فكَّ الله اسرى من صحبته ).
الحبرتجى ولد جبر الله، اقال الله عثرته، لم يكتف بالتشانيع الهاتفية!! بينه وبين صاحبيه، بل استل ( القالة ) برمتها وحام بها فى الحلاَّل والقرى الاسفيرية، جاعلا منها مادة للمشاط الاليكترونى!! ولم يكذب ولد عبد الله الخبر، فقد هطل بشاربيه كالحمم البر كانى يريد ان ينال من حسنى الظاهر وصباى الوافر وجمالى الدافر وبهائى المتناثر ولكن هيهات!
حتى انت ياريهان!!! حسبى الله ونعم الوكيل فيكم اجمعين!!
منعم
Post: #11 Title: Re: بهجات مجانية ....البنسلين ياتمرجى Author: أبو ساندرا Date: 04-05-2009, 07:53 AM Parent: #10
قال الدكتور زيفاجو
Quote: فيكم اجمعين!!
نبرأ ونستبرأ
تاني يا جزلوت ، ولا ايميليآ ما تقترب مني
العمر واحد ، وماهو بعزقة
Post: #12 Title: Re: بهجات مجانية ....البنسلين ياتمرجى Author: Emad Abdulla Date: 04-05-2009, 08:14 AM Parent: #11
أبو السُره .. ما تتبلو علينا ساكت .. يقوم " سارتانا " ده يطبق فيني نظرية المرحوم برايان .. وللّا الأظرط كمان نظرية الصابونة - و العياذ بالله - .. أها نبقى في جِنِس ده ؟!! أنا بي صراحة كلمني عصام .. قال إنه : ( حِسا ) .. عصام عِرِف كييييف !!! اللاهو اعلم .. الحِسا شنو !! علمي علمك .
هسه ده يكون شنو يا السر ؟ قصدي الحسيان ده ؟ بيعادي .. صاح ؟ نسأل اللاهو السلامة .
..... عاين عاين .. أمانةً في زمتك خيمة كزام الرابطها في صلبو دي .. ما شُغُل ( حسيانين ) ؟؟
Quote: الزول ده و صاحبو تاج السر الملك مليانين صمغ
لكن شحيحين و بخلاء ...
Quote: ..لكن كبرهم ما بعرفو.
ما قلتو ... مبتهجين .... كبرهم ده خلى علينا
يا ريهان
Quote: يبدو ان الاحصاء في تلكم الشفخانة ستلاحظ ارتفاعات في معدل وفيات النزلاء في الفترة المقبلة .. اللهم ارحم رعاياك
لا يبدو و لا حاجة , سمع اضانى انو الكونقرس زاتو كون لجنة تقصي حقائق لبحث اسباب الانقراض عالى الوتيرة في الشفخانة و المنطقة حولها .... ده اسمه ساحق ماحق و بلا متلاحق .. ميد ان سودان ... و كيف الحال لو ما كنت سودانى
Post: #17 Title: Re: بهجات مجانية ....البنسلين ياتمرجى Author: محاسن أحمد محمد Date: 04-05-2009, 08:27 PM Parent: #14
سلام يا شباب عصام عماد تاج السر اليكم اخــر الانباء :- قــررة إدارة المستشفى عدم إعطاء الممرض اعلاة أى مريض لانو بألطريقة دى المستشفى حتفلس وما حيكون فيها اى عيانين وقاعديين إموتو واحد وراء التانى فهو الان بلا عمــل نرجو المساعدة فى وجود وظيفة جديدة
ههههههههههههه مبالغة طبعاً ياعمك الدنيا باسطة عندكم لكن انا بعتبرا خطوة متفائلة في حقل ألغام! الله يديهو الفي مرادو
غايتو!!!
Post: #22 Title: Re: بهجات مجانية ....البنسلين ياتمرجى Author: Emad Abdulla Date: 04-06-2009, 09:05 AM Parent: #21
Quote: عنت منسقة البرنامج فى سرى. بنت الكلب هذى، سلمتنى كل المعلومات عن المريض، ودسـَّت عنى اهم معلومة!! الرجل حالج صامولة!! قلت لنفسى اصبر ياولد فالجن بيتداوى، وهو بالجزم افضل من الايدز!! وضعت مقعدى فى مواجهته مباشرة ورحت اراقبه. عملى هو مراقبته. انا احب مراقبة الآخرين. خاصة الذين لا اعرفهم، لأن ذلك يفتح على بوابة واسعة من التأمل وأنا ابنى لهم فى خيالى تاريخا وحاضرا وحياة كاملة. اصيب يعقوب بالتواء فى المصران. وقد خضع لعملية جراحية من نوع ما. هكذا تقول قائمة المعطيات الخاصة به. تخيلته وقد انحلجت احدى مواسير امعائه فاستعان بسباك من سوق بحرى، كان قد جاء الى البلاد بعد ان كسب اللوترى، والذى بدوره استخدم عبقريته عندما لم يجد الاسبيرات المناسبة، أو لم يعرف اسمها باللغات الصليبية، فاستعان بكيس من البلاستيك وعالج المشكلة. والا فما معنى وجود كيس البلاستيك، والذى وجده الجراحون يسد امعائه الغليظ!!؟؟ كيف وصل الكيس الى تلكم التخوم الموغلة فى النأى بنفسها عن كافة مشاكل الحضارة. لم اكن مقتنعا تماما بما جاء فى البيانات امامى،حتى تعاملت معه عن قرب. الرجل يأكل اى شئ تصل اليه يده!! ولهذا عينونى لكى امنعه من وضع اى شئ فى فمه. وقد ابليت ذلك النهار بلاء حسنا ويداىَّ تعافران بين اسنانه لانتزاع عشرات الاعاجيب من فمه. فمن الصابونة الى كيس المخدة،ومن الكوب الورقى الى غطاء الزجاجة المعدنى. كان يعقوب مضَّاغا محترفا!!
فهذا حال يعقوب .. ماذا عنك ؟ فضحتني اليوم داك و الناس الـ A CLASS يدلعون الشوكة و السكين و تلك الطيبات اللوامع في الكافتيريا العالية ، و لا يلوكون و يدغنون كما خلايق ربك .. لكنهم يتمزمزون اللقمة .. اللقمة ؟ ما كان في زول عندو لقمة ساعتئذٍ غيرك .. ديلاك بيدخلوا في خشومهم فتافيت متساوية الحجم و الشكل و .. بررررراحه كده و يهمسون ياخ .. يهمسون .. و إنت تلُخ لخخان .. سألت الله غدوتئذٍ و أنا أتلفت : ( يا واطه أبلعيني ) سألت العلي القدير أن يسهل عليّ أمري و يمرقني من الفضايح بركة جاه النبي . زول بياكل زغني أمهري .. و يلهط بلاوي مصدرها أحشاء البهائم نيئات ذات روائح ، بنفس المتعة التي " تلعق " بها لمياء محمود الآيسكريم بالإستروبري بتاع باسكن روبنز !!! .. البيدخلني معاهو المجتمعات المخملية دي شنو ؟ و أنا من ما جيت هذا المكان قاعد أرسم لنفسي صورة الزول الكلاس المتأنتك .. و الموضوع ظابط زي اللوز حتى حين حضور المذكور .. يجي يجلطها لي واحد كابوي من جهات أم درمان البلاقع حيث تموت السلاحف في ليالٍ سبع و يعمر الباعوض دهورا ؟ غلطان أنا .. و غلطان يعقوب الما عضاك في يدك الطالوش دي .. و برايان غلطان الما جلط فيك آآآتشوم أصلية إنتقاماً للجنس البشري الذي تحشره في كستبانه .
يا عصام .. هذا المواطن جاني في المكتب شايل ورق الدنيا و العالمين .. و معلق شنط و كاميرات .. و قد كان معانا ضيوف و سيدات و أجانب و أمم .. قال بعد أن قعد و تأمل في الخلق و سرح .. : ما عندكم مكنة تصوير ؟ .. قلنا في . وقف جنبها و قال : نظامها كيف دي ؟ و قعد يتأملها . قلنا توماتيك ياخ .. تدخل الورقة بي هنا تطلع بهناك نسخة أحلي من الأصل و من غير سؤ . قال هنا ؟ و أشار لحيث يجب وضع الورق .. قلنا : آآآآي .. ممكن برضو بي ورا .. تقنية جديدة كلو يشتغل فيها : ورا و قدام . عاين لي كدددددده .. و قال : حمانا الله .. أوعى تكون بتعمل حاجات تانية مكنتكم دي ؟ أنا لم أحر جواباً .. قمت جاري .
Post: #23 Title: Re: بهجات مجانية ....البنسلين ياتمرجى Author: ibrahim kojan Date: 04-06-2009, 09:53 AM Parent: #22
عصام صباح الخير
ياخ انا كنت اليوم كلو والويك إند في المستشفي بتكسب عيش من العبث باحشاء الادميين البيضاء والخضراء والمليانه دم.. وجيت راجع لمضجعي هذا الصباح فأجد ما فعلتوهو وقلتوهو في صديقي عبدالمنعم .. مصيبه الواحد يعرف ناس مجانين وملاعين زيكم
وكنت لابس نفس البجامه بتاعة منعم ونفس الحزاء اللامع من بياضه وبياض ان الصحه للجميع دون فرز او إفرازات أو لون.. غايتو حمدالله علي نعمته علي إذ ان بلاد الانجليز اللعينه ليس بها مصوراتي منعول زي تاج السر البياكل عيشو من كلوجة أرجل الناس ومساويكهم المبريه لانو اخوك ما فوتوجينك خالص مع كلوجتو وتاريخ مرضي من حصبه وشلل اطفال وجدري وحماك الله
(عماد شاف واحده من صوري وانا امارس مهنتي بي بمزاج) المهم لامن لاقيتو في السودان حلف ما ياكل معاي في صحن واحدوشال حسي ياخ حتي الست الوالده (امو) إستغربت !!
قال ليها والله ما باكل معاهو في صحن واحد كان جا منو داك؟؟ انتي يا يومه ما شفتو الزول دا بيعمل شنو بي يدينو الكبيره دي .بيحشرها في بطون الناس ساكت .. والله اكل مع مجزمين ولا مع الزول بتاع ام فتفت البشر!!
شفت يا عصام اتخيل لو في اللحظات ديك كان في كل الملاعين اللاميهم لي هنا..
اخوك كا اتهموهو بالكانيبالزم والله الحمد كما يقول منعم وكامل تضامني معه....
Quote: ماذا عنك ؟ فضحتني اليوم داك و الناس الـ A CLASS يدلعون الشوكة و السكين و تلك الطيبات اللوامع في الكافتيريا العالية ، و لا يلوكون و يدغنون كما خلايق ربك .. لكنهم يتمزمزون اللقمة ..
انت مصدق حركاتهم دي .. دي حركات ساكت .. بشر زيهم زيك واحد و ربما أضل سبيلا.
لم انم جيدا ليلة البارحة. البعوض حمانى النوم!! نعم.. بعوض فى واشنطون. وماذا فى ذلك؟ طالما انا موجود فى الجوار فتوقع كل مصائب الدنيا!!
خرجت من المصعد مرهقا من قلة النوم، وقلة الحظ، وقلة الشغلة.أحتقبت اغراضى بيد، بينما تحيط اصابعى بقوة على ثيرموس القهوة فى يدى الاخرى. لابد من القهوة للمساعدة على بقائى صاحيا طوال اليوم. والا لفقدت عملى.
أخذت اراجع ارقام الغرف على الابواب المطلة على الممر الطويل مثل فيلم هندى مسيخ، وقلبى ينبض بعنف، كلما رأيت فوق أحد الابواب العلامة الحمراء الكبيرة، والتى تدل على ان ساكن الغرفة من ذوى الامراض المعدية، مما يتطلب استخدام واقيات محددة تتوفر للداخلين عند الباب.
لدهشتى، لم تكن هنالك علامة حمراء فوق الباب رقم 22!!
- الغنماية دى جنت ولاَّ شنو!؟
قلت لنفسى، وانا انقر نقرات خفيفات على الباب الخشبى المصقول. ولم انتظر ردا، وبالطبع لم اكن اتوقع اى رد. فأهل الغرف عندهم من المصائب ما يلهيهم عن الاستجابة لنقرات على الباب، او حتى قنابل فى الممر!! فقرأت الاخلاص والمعوذتين سريعا ودخلت.
عندما نظرت الى الرجل النائم - فوق السرير الناصع البياض - قفز الى ذهنى – مباشرة - اسم " يعقوب"!!!
لماذا؟ لا أدرى.
قصير القامة، مربوعها، وله عنق، يحتاج لأكثر من سياف، للقيام بالمهمة ( هذا ان كان محظوظا ونال حكما مخففا بالاعدام فى السعودية ). لحيته مقطوعة بعناية انصارية موغلة فى الطائفية، وشاربه يتدلى على جانبى فمه فى صرامة بوليس السينما، وبينهما شفتان غليظتان كادتا ان تستقبلاننى بالهتاف الخالد " البلد بلدنا ونحن سيادها تشهد كررى مع الشكابة!!!)
كنت – بالطبع – قد قرأت اسمه على لافتة انيقة فى منتصف الباب من الخارج
- صباح الخير مستر يعقوب!!! اقصد مستر ويلز
نطر الىَّ شذرا ولم يقل شئ!! فاستبشرت اننى امام حالة برانويا مستعصية وعلى الفور احلت نفسى الى سورة يس!!
لعنت منسقة البرنامج فى سرى. بنت الكلب هذى، سلمتنى كل المعلومات عن المريض، ودسـَّت عنى اهم معلومة!! الرجل حالج صامولة!!
قلت لنفسى اصبر ياولد فالجن بيتداوى، وهو بالجزم افضل من الايدز!! وضعت مقعدى فى مواجهته مباشرة ورحت اراقبه. عملى هو مراقبته. انا احب مراقبة الآخرين. خاصة الذين لا اعرفهم، لأن ذلك يفتح على بوابة واسعة من التأمل وأنا ابنى لهم فى خيالى تاريخا وحاضرا وحياة كاملة.
اصيب يعقوب بالتواء فى المصران. وقد خضع لعملية جراحية من نوع ما. هكذا تقول قائمة المعطيات الخاصة به.
تخيلته وقد انحلجت احدى مواسير امعائه فاستعان بسباك من سوق بحرى، كان قد جاء الى البلاد بعد ان كسب اللوترى، والذى بدوره استخدم عبقريته عندما لم يجد الاسبيرات المناسبة، أو لم يعرف اسمها باللغات الصليبية، فاستعان بكيس من البلاستيك وعالج المشكلة. والا فما معنى وجود كيس البلاستيك، والذى وجده الجراحون يسد امعائه الغليظ!!؟؟ كيف وصل الكيس الى تلكم التخوم الموغلة فى النأى بنفسها عن كافة مشاكل الحضارة.
لم اكن مقتنعا تماما بما جاء فى البيانات امامى،حتى تعاملت معه عن قرب. الرجل يأكل اى شئ تصل اليه يده!! ولهذا عينونى لكى امنعه من وضع اى شئ فى فمه. وقد ابليت ذلك النهار بلاء حسنا ويداىَّ تعافران بين اسنانه لانتزاع عشرات الاعاجيب من فمه. فمن الصابونة الى كيس المخدة،ومن الكوب الورقى الى غطاء الزجاجة المعدنى.
كان يعقوب مضَّاغا محترفا!!
وحمدت الله ان يدىَّ قد سلمتا بفضل العناية الالهية اولا وبفضل حرفنة اكتسبتها للتو، اتاحت لى سحب يدى فى لحظة انهيار الفك الاسفل عليهما.
أول مرة اشاهد انهيارا من الاسفل للأعلى!! مما يجعل اسنانه تصطك فى كل مرة ببعضها البعض، الامر الذى يزيد من توتره ويرفع درجة سعارة فيروح يهمهم بما لا أفهم ولا أريد ان افهم. فليس هنالك وقت للفهم، الوقت كله مكرس للحفاظ على سلامة يدىَّ!!
الحمد لله على كل حال، فلم يتبق من قطار العمر سوى عربته الاخيرة. عربة الفرملة!!
والغريب ان المستر يعقوب، ورغم مواهبه المضغية العالية الا انه ما كان يمضغ الطعام قط!! كان يمضغ الهواء داخل فمه الخالى ثم يبتلع الطعام دون ان تلمسه اسنانه!! وكان لاينتظر حتى يضع الطعام فى فمه، او مثلا توضع الصينية امامه او حتى دخول الصينية الى الغرفة!! فبمجرد ظهور الفراَّشة التى تتولى توزيع الطعام، فى نهاية الممر، فان فمه يبدأ فى عملية المضغ بكامل طاقته الاستهلاكية.
مرة فى الحمام غافلنى، وحشر الصابونة فى فمه!! ظللت اصارع فيه ساعة من الزمن، وهو لاينى يمضغ، وقد اطبق شفتيه باصرار ثورى، فلاينفتحان.
كادت جيادى ان تتوقف فى منتصف المضمار، حين تذكرت حيلة ( اشلاقية ) قديمة، فاستدرت ولبعته ( ام دلدوم ) فى منتصف ظهره، ف... القى بالصابونة، نصف الممضوغة، الى الارض.
اربعة ايام وانا على هذه الحالة!! من السابعة صباحا وحتى السابعة مساء.
* محدش بياكلها بالساهل ( مثل سحاحيرى )
مرة زارته جاموسة فى بنطلون جينز. إما انها وُلدت بداخله، او انهم خاطوه حول جسدها!! يستحيل ان تكون قد ارتدته!! لايمكن لأى فازلين فى العالم ان يساعد على حشر كل هذه الجثة داخل تلك القطعة الصغيرة من القماش. يازول حوالى اربعة اطنان من اللحم!! انا لله وانا اليه راجعون.
حين اطلت... أطلت شنو.. حين هجمت جحافلها، ذهبت عيونى - وبلا وعى - الى اسنانها!! تبدو هى الاخرى مضـَّـاغة كبيرة!!
تركتها معه فى الغرفة حتى يجدان بعض الخصوصية، وكنت على مرأى وليس على مسمع، بينما انا اتجاذب الحديث مع السستر ذات الجمال المهمل.
- يا عبدول ( وهو اسمى بالامبريالية ) فلتعلم انها ضكرية!!
- ومالى انا وضكرنتها؟
- اراك تنظر لها بعين جائعة، وانتم الشرقيون تحبون النساء اللحيمات.
- انا لا أنظر اليها ياسستر، انا انظر الى علبة مناديل الورق، التى وضعتها بجانب الرجل على السرير، وأخشى ان يغافلها ويلتهم العلبة ومناديلها.
السسترات شكاكات بشكل عجيب!! ولاتفتر اعينهن عن الملاحظات الغميسة.
عصر اليوم الرابع خرج يعقوب الى اهله، على ان يعود بعد ثلاثة اسابيع.
فى مكتب المنسقة، ابلغونى بأنه ربما لن يكون علىَّ طلبٌ فى الاسبوع المقبل!! نحن نعمل بنظام التعاقد. اى انهم ان احتاجوك شغَّلوك، والا، فان عليك الجلوس فى الظل، والعمل على تنمية مهاراتك فى السيجة والصفرجت، الى ان يتم استدعاؤك، أو يقضى الله فى امرك، ايهما اسرع.
المنسقة النبطشية، كانت مغربية تشبه محمد الوزاني ( وهو أحد كبار تجار المخدرات فى المغرب، كان قد فر من السجن في ديسمبر عام 2007. وأدين 8 من حراس السجن بمساعدته على الهرب.) سألتها عن السر فى عدم وجود رغبة فى استئجارى الاسبوع المقبل.
قالت: - ان جميع المرضى المطلوب لهم تمرجية، هم من الجنس الناعم!!
قلت: - وماذا فى ذلك، نحن بتاعين كلو، ناعم.. دُراشة... اى شئ ندوس.
قالت: - لا.. ادارة المستشفى تطلب تمرجيات وليس تمرجية.
قلت: - ولكن هذا تمييز... وهو اجراء ليس دستورى.
رَفـَعَتْ حاجبا من الدهشة، وخفضت آخراً من قلة الحيلة، وقالت:
- يعنى تريدنى ان اتركك فى غرفة مغلقة، مع امرأة عريانة!!؟؟
قلت وقد لاقت الفكرة استحسانا واسعا من جماهير القطاع شبه الصحراوى بداخلى:
جملة مفتاحية في حيوات ضكور و حديات الجديان و مجتمعات المراقبة الشبيهة و الشقيقة ... و لها اخوات و اخوان : كلام الناس , اكل لى روحك و البس للناس ... الناس: تولد و تقطع سرتك و يستعاض عنها باجهزة المراقبة الطبيعية هذه تكبر و تكبر معك العبارة ... تتمدد داخلك لتصير عين و اذن و انف و رادارات علنية و سرية "الناس يقولو شنو!!!"
سلا م للجميع هنا .. من زوربا اليونانى مرورا بعبدالمنعم انتهاءا بالمضيف عصام جبرالله وكل الزوار الكرام .. وعاجبانى يا جزالوت ترصد عدسة تاج السر ليك وساره بالى وياريت كل واحد منكم اكون مصورو معاو .. زي مسئولين الانقاذ اول ايامهم الواحد ما يعمل اي حاجه .. حتى لو كان سحب حجر اساس لانهيار مشروع كان ماشى كويس اوخصخصصتُه لو ما جو المصورين ..هسى يا جماعة الخير لو ماعدسة تاج السرام كاميرة ً بره دي .. صور عبدالمنعم بالذات الراقصه وفى الفالنتاين كمان كنا نلقاها وين ! هسى اشهر راقصين انت والرئيس شخصيايا جزالوت .. طبعا ديك عرضه ودي عباسيه مورده الله اطراك بالخير ياتوم جونز كما اطلقها صديقنا قرنى على صديقنا الاستاذ .. ناصر الشيخ الذى كان يعلمنا الرقص الحديث والصباح نعسان حتى تعرق منا الجسوم ويطير من غير رجعه عن عيونا النوم .
ساعود كان الله هون بخصوص البنسلين يا تمرجى يا عجيب
لقد ادبنى ابى فـأحسن تأديبى!! لهذا لن ارد على احقادكم باعتبار انكم اجميعا اقل منى درجة!!
فانا تمرجى بشهادة!! وانتم ليس فيكم ولا ( داية ) حتى!!
ولكن مكانتى العلمية تفرض على التوجه بالنصح الى بعض الصغار بينكم.
قولو لابى ساندرا ان ( البـُرْجـُم غير جايز فى العجايز ) مثل حبشى
وقولوا لخدر اننى كنت انوى ان اتعطف عليه ببعض اغنياتى ولكن بعد قوالته اعلاه فقد قررت التعاون مع ( حمادة بت ) .
التوقيع:
ت. منعم
Post: #40 Title: Re: بهجات مجانية ....البنسلين ياتمرجى Author: خضر حسين خليل Date: 04-08-2009, 12:16 PM Parent: #39
ومن هذا المنطلق
فوالله يا منعم انا متضامن معاك تضامن شديد ! وبلا شك فجنس كتابتك دي من شأنها أن تلحق أي (برايان) في الدنيا دي للرفيق الأعلي فالرجل كما ورد في مداخلات الحبرتجية وضكور الجديان زهج عديل ربما من المرض لكن اغلب الظن من التمرجي !
أما الحتة دي
Quote: من مواليد مايو 69 ( لا أعرف بالضبط هل هو مريض فى الاصل، أم أنه انقلاب فى شكل مريض ).
فبالغت فيها شديد الله يجمل أيامك يامنعم ويرد عنك كيد الكائدين والمرضي وأبناء السبيل وتاج السر زاتو ياخ
يا زول يا خطاب مصوراتي شنو و مرافق شنو؟؟ دي ليلة ناس الصالة ضربو لى قالو لى عندكم سوداني هنا عامل غاغة و نصحوني اجيب الكاميرا للتوثيق كان جابت محاكم و لا كدة مشيت لقيتو الجزلوت طلعت فووووق اظني طلعت فوق ( سبيكرز)، لأنو كان في بيز فك رباط جزمتي و الجالوة المميتة شغالة، شى كنغولي و شي ( ترم ترم) و شي ( اوسيبيسا) و شي ( ماماكو.مماسا..ماك ماكووسا)، عرفت طوالي انو ( مرجان) راح في داهية و بالذات لمن الجزلوت يكون لابس البدلة القرمزية دي ما بجي من وراها خير كوركت منعم منعم رفع عينو، و كانت تشبه عين ( مايكل جاكسون) في الشريط الطلبو واحد قريبنا من استيريو الأضواء زمان قال لى هاشم قسم السيد ( عندكم شريط مايكل جاكسون البتقلب فيهو بعاتي)؟؟؟ اها عين البعاتي مرقت ووراها طوالي (مكوسا مكوسا مكوسا ييه) اها الكجور ما نفع و لا نفع التحسر الصورة الأخيرة في القصة القصيرة أعقيتها فترة تحول فيها الجازالوت الى مديدة حلبة و عندما افاق قالي..تاج السر انت الجابك هنا شنو؟؟ من متين قاعد؟؟ جني و جن ( التوايلايت زون) دي بعداك طوالي طلب طحنية ( نون الكهوليك)، و بيرة دايت تقولي مرافق؟؟
(مثل امريكي)
