هوي يا جمال حسن سعيد..( زح صلعتك دي من زولتي)

زولة بتفتح الروح ضلفتين_ تخشك وتمرقك (عادي)
ما بتقفل الباب من وراها بس تساسق بين شفقتك وحرقتك
ما بتأذنك ما روحا نفاج غربتك...
هذي البنية الساكنة أسرار فكرتك هي الشايلة حسك وسترتك...
زولة كما النورس تجي تنزل شواطي الالفة في الزمن الشفيف...
وأنا زي مكتف في الرصيف
مربوط علي حبل السفن في الظلمة والليل المخيف...
بتجيني تدخلني وتقيف...
شلشلت تيبان السكات علي ارض رويانة وخريف...
زولة...بتعرف تدخلك... وتقفلك... وتغفلك...
تقعد علي ناصية هواك وتسجنك...
وانتا بتخلي الغمام كي تجعلك مطرة ودعاش...
طائر تحلق في السماء وارضك فراش
هذا الفراش بيطيرعلي نضرة رحيقا وخضرتا ومحبتا او ضحكتا وسخريتا ...
وتقعد تهضرب ياولد من حمتا... ولو تسألك وتحلفك في زمتك او زمتا...
والي متى هذا الجنون والي متي..كل التفاصيل لمتا...
هذه البنية قد اتت وانت زاتك كالورق..
كيف تنجو من زاك الغرق..
من زكرياتك تنجو وين وين مهربك..
من دفترك...من مظهرك...من حرقة الجوف والعرق..
هذي البنية تفتح الروح ضلفتين وعلي ضفتين...
في نهر احزان الزمن تقعد تلوح باليدين