شحاد وبى قرعه يا الجدك اسماعيل!!!!شعر عزمي احمد خليل

شعر عزمي احمد خليل*** واشنطن الاربعاء 24/ 3/2009

غير الله مابنشحد وبس ليهو نتعبد
لابننكسر لى زول ولايوم نمد اليد
مرفوع دوام راسنا ولابنخاف من حد
ومن سنة ستة لضرعنا نتوسد
وان متنا من الجوع فى السر بنشهد
*** *** *** ***
شوف البيشحد مين عشان تقول عنو
وخليكا عند قولك واوعك تحيد منو
وقبال تقول حقو تعرف تقول فى شنو
لاانت لاغيرك ماكنا خايفينو
ونحنا سودانا فى قلوبنا شايلينو
*** *** *** ***
سويتنا شحادين اخر الزمن نحنا
وتاريخنا كلو نضال من عهد ناس دقنه
والليله جيت بالزور بالشحده توصفنا
سكر شنو القلتو ولى طعمو بيك ضقنا
والله الزمن اقلب وبتضحك المحنه
*** *** *** ***
اسال علينا الناس فى كل بلد بره
سيرتنا سمحه دوام وسمعتنا جد حره
وحاشانا مابنشحد لو نعدم الكسره
ومابيملى عينا المال لو ليهو نضطره
ومهما يكون عزرك مابتسلم الجره
*** *** *** ***
القلتو كان اكبر من كل مناصبك ديك
والجيبتو لى روحك ماظن شويه عليك
خم وصر نتاج قولك وبادر دوام بالفيك
الشحده من اصلك وكتر النفاق ماليك
شيل شيلتك انت خلاص من باكر الراجيك
*** *** *** ***
مابيترفع لى فوق المرمى من الله
وطريقه ليك مافى كتر الكلام او قله
انكر كلامك كلو وكان السكوت ليك احلى
جواكا بان من قولك وجاب ليك فى اخرو مذله
ومابتجدى تانى الحيله والعاده مابتتخلى
*** *** *** ***
من العملتو زمان الشحد كانت ارحم
قايلنا ماعارفين وماخفى كان الاعظم
نحنا شحادين !!! ومن الحرام تسلم
والبيتو كلو قزاز ماحقو يتكلم
قصدت او ماقصدت البادى دائما اظلم
*** *** *** ***
شحاد وبى قرعه يالجدك اسماعيل
الشحده للزيك .. ولسواك مابتخيل
وعلى العليك كذاب ومر اللسان وطويل
الراجل اصلو كلامو مابخاف يقولو عديل
حرام تكون سودانى وخساره اسمو تشيل
*********************

أقدر زعلة السودانيين مما توفه به هذا العي
لكن برضو عملتوا للزول دا رأس وقعر ساكت

أعملو حسابكم وقرطوا علي كدا
لأنو إذا ناس الحكومة شافوا زعلة الناس دي، حيكبر في عيونهم
وممكن جدا يجيبوه لينا وزير دفاع ولا حتي نائب رئيس

وإذا زي دا بقي حاجة مهمة كدا، الشحدة ذاتها ما حتلموا فيها

السلام عليكم ورحمة الله وبركاته .
الاخ ياسر ...... شكراً على هذه الاطلالة الرائعة من خلال الشاعر الفز عزمي خليل
وشكرأ للشاعر الانسان الفنان على الشعر الذي اعتقد انه عبر عن كل سوداني وصلته الاهانة من ذلك الدبلوماسي الغير دبلوماسي
وشكراً مرة تانية للشاعر عزمي خليل

Quote: حرام تكون سودانى وخساره اسمو تشيل

ناصر موسى

up

فوق

اخى ياسر
اولا لنا عظيم الشرف للتعرف على شخصكم من خلال ماقمت
به لنشر هذه القصيدة العصماء لشاعرناالرقيق عزمى
فى الرد على هذا المدعى الدبلوماسية وتهان كرامة
السودانى على لسانه انا هنا لست بصدد الرد عليه
ولكن استميحك عذرا اخى ياسر فى الرد عليه بلسان
دبلوماسى اخر اصيل و يجرى حب السودان فى عروقه وهو
سيد احمد الحردلو فى قصيدته المشهورة ... نحن ...
وهى قصيدة طويلة بالعامية السودانية .
ا..الى السائل الذى استوقفنى يسالنى من اين ؟ ثم تساءل
السودان ده وين: اليه ولا اعرف اين هو الان.
2..الى اخوى عمر الحاج موسى ..الذى اجاد..وجود فى هذا المجال.
3..الى اخوانى شعراء الشعب..الذين كتبوا عن هذا..بلاقلم..ولاقرطاس..فاجادوا .
4..والى كافت.. يازول..وياانسان .. من جملت اهالى السودان ناس نحن.. سلام ..
من المحترم..ادناهو
سيد احمد الحردلو.. كنشاسا 1975

تقولى شنو وتقولى منو انحنا الساس ونحنا الراس
ونحن الدنيا جبناها ووبنيناها بويت فى بويت
و اسعل جدى ترهاقا وخلى الفاقة والقاقا
تقول لى شنو وتقولى منو
تالا ابوى بعنخى لزم وتالا اللم..ابوى اولباب
وامى مهيرة بت عبود واخوى المهدى.. سيد السيف
والخلى النصارى تقيف هناك ..... فى القيف
تقول لى شنو وتقول لى منو
ونحن الشين ونحن الزين ونحن العقبة والعتمور
ونحن القبلة..والقرعان ونحن الشان ونحن النان
اتينا عشان نسوى الدنيا للا نسان
تقول لى شنو وتقول لى منو
ونحن الصافى والوافى ونحن الشافى والكافى
ونحن الذاد ونحن العينة والزينة
ونحن يمين اهالينا اهالى سرور
ووكتين ينزل المستور ترانة النور
تقول لى شنو وتقول لى منو
ونحن الجبنة واللبريق ونحن قداحنا ساوات ضيق
ونحن بيوتنا مفتوحات مساى ... وصباح
ونحن وشوشنا مطروحات مساى ... وصباح
ونحن السمحة والقمحة ونحن الطلة واللمحة
ونحن الصير ونحن العيد
تقول لى شنو وتقول لى منو
ونحن عزاز ونحن حراز ونحن هشاب ونحن قموح ونحن تمور
ونحن عيوش ونحن النيل
وكضاب يازول من قال انك تانى لينا متيل
تقول لى شنو وتقول لى منو

مازالت القصيدة طويلة وان شاتم سوف ننشرها تباعا
على جويلى

تقولى شنو وتقولى منو انحنا الساس ونحنا الراس