Post: #1
Title: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-01-2009, 01:49 PM
Parent: #0
ربما يكون قد أصابكم القلق على أبناء الجالية السودانية بدولة الإمارات العربية
المتحدة من جراء الإشاعات المغرضة التي تزعم بأن الإمارات تعرضت لإعصار جوي
وأن الأحوال الجوية سيئة تنذر بالأخطار.
عليه أؤكد لكم أنا العبد الفقير لله، أصالة عن نفسي ونيابة عن أبناء وبنات الجالية
السودانية بدولة الإمارات، بأننا جميعاً بخير ولم يصب أيُّ واحدٍ منا بأذى، وأننا أحياء
نرزق بحمد الله، ونتعهد لكم بالاستمرار في دفع الضرائب طالما أنفاسنا تطلع وتنزل،
وسيأتيكم المعلوم حسب الأصول وعبر الطرق الرسمية، فنرجو ألا تقلقوا علينا أبداً
ونرجو كذلك بأن تطمئنوا حكومة الوحدة الوطنية وجهاز السودانيين العاملين بالخارج
وناس الخدمة الإلزامية بأننا بخير وصحة ولا نفقد سوى (عدم) رؤياهم الغالية، ونستمتع
هذه الأيام بطقس صحو وأمطار غزيرة تهطل علينا آناء الليل وأطراف النهار، والجو عندنا
هنا حاجة ما تخلص، ويمكن أن تطلقوا عليه بأنه جو (سجارة، فول، باتا) وكل ما تسمعونه
من مزاعم عن الأعاصير والعواصف هو مجرد إشاعات ليس إلا..
والله لا يضيع أجر من دفع ضريبة...
ابنكم العزيز هناي
ع/ أبناء وبنات الجالية السودانية بدولة الإمارات
|
Post: #2
Title: Re: المغتربون بدولة الإمارات يُطمْئنون ناس الضرائب
Author: معاذ منصور
Date: 04-01-2009, 02:08 PM
Parent: #1
طمأنكم الله بالصحة والعافية
وان يجعل امطاركم امطار خير وبركة وعم بها سائر ارجاء البلاد
اما ضرائبكم فقد يتم تعديل الميزانية بعد تصريحهكم هذا
ودمتم
|
Post: #14
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-03-2009, 07:58 PM
Parent: #2
Quote: طمأنكم الله بالصحة والعافية
وان يجعل امطاركم امطار خير وبركة وعم بها سائر ارجاء البلاد
اما ضرائبكم فقد يتم تعديل الميزانية بعد تصريحهكم هذا
ودمتم |
العزيز معاذ
ربنا يستجيب منك ويبارك لينا وليكم..
الميزانية حيتم حسابها معتمدين على الضرائب كبند أساسي بعد أسعار البترول الأخيرة..
لكين ناس القنصلية قالوا في تسهيل في الدفع وممكن تدفع بالتقسيط من خمسين إلى ألف درهم..
أي واحد عاوز يدفع بالتقسيط يدفع لي أنا ومافي داعي يمش القنصلية..
|
Post: #3
Title: Re: المغتربون بدولة الإمارات يُطمْئنون ناس الضرائب
Author: Mohd Ibrahim
Date: 04-01-2009, 02:09 PM
Parent: #1
اتلومت لكين.....
ناس ذكاة الدولار ماسلمت عليهم
|
Post: #4
Title: Re: المغتربون بدولة الإمارات يُطمْئنون ناس الضرائب
Author: Alshafea Ibrahim
Date: 04-01-2009, 03:50 PM
Parent: #3
أخي نصر الدين
حفظكم الله في حلكم وترحالكم وأعاصيركم وأمطاركم وتجوا راجعين بالسلامة وتلقوا الشبابيك في المغتربين زادت وعمرت والفئات كبرت وتضاعفت .. والإعفاءات ألغيت .. وجواز سنة واحدة لو نقص شهر تجديد كمان ... ورسوم المغادرة اصبحت مليون عديل ... ياالله وما يجي واحد بالبحر وخاصة ترب تكت يخلي عربيتو ويمشي ويجي يدفع عليها اجرة أرضية قدر قيمتها أو يتنازل ويشيل لوحاته ويتخارج ...
تاني ما تجيب سيرة البحر
خالص شكري
الشفيع
|
Post: #5
Title: Re: المغتربون بدولة الإمارات يُطمْئنون ناس الضرائب
Author: الزنجي
Date: 04-02-2009, 07:32 PM
Parent: #4
مرحبا ابا حازم
ياخي الامطار دي خلعتنا أسبوع كامل الواطة دي ما نشفت
قربنا نربط الشنط ونمقلب الجماعه ديل تاني يلموا فى ضرائب ؟؟؟؟
|
Post: #6
Title: Re: المغتربون بدولة الإمارات يُطمْئنون ناس الضرائب
Author: ALGARADABI
Date: 04-03-2009, 09:16 AM
Parent: #5
الحبيب نصر الدين
خلاص جريت عودك وقمتا على جنك؟
على العموم أبشرك بضريبة جديدة يتم دراستهاالآن اسمها ضريبة أوكامبو
بهدف تأمين رحلات الرئيس الخارجية
والمشكلة لو استمرت معدلات رحلات سيادتو بهذا المعدل ستكون الضريبة 100% من الراتب
وحينها سنستعين بخبرات العزيز صديق الموج (شحات دولي)
لتحقيق نبؤة أبو الدبلوماسية السودانية
|
Post: #7
Title: Re: المغتربون بدولة الإمارات يُطمْئنون ناس الضرائب
Author: jini
Date: 04-03-2009, 09:24 AM
Parent: #6
Quote: الحبيب نصر الدين
خلاص جريت عودك وقمتا على جنك؟
على العموم أبشرك بضريبة جديدة يتم دراستهاالآن اسمها ضريبة أوكامبو
بهدف تأمين رحلات الرئيس الخارجية
والمشكلة لو استمرت معدلات رحلات سيادتو بهذا المعدل ستكون الضريبة 100% من الراتب
وحينها سنستعين بخبرات العزيز صديق الموج (شحات دولي)
لتحقيق نبؤة أبو الدبلوماسية السودانية |
يعنى لينا أجر المناولة!
الله لينا
جنى
|
Post: #8
Title: Re: المغتربون بدولة الإمارات يُطمْئنون ناس الضرائب
Author: haider osman
Date: 04-03-2009, 09:39 AM
Parent: #7
سلام ....
زى ما قال جنى لنا اجر المناولة
وعشان خاطر السودان كل يهون
|
Post: #9
Title: Re: المغتربون بدولة الإمارات يُطمْئنون ناس الضرائب
Author: معاذ منصور
Date: 04-03-2009, 10:06 AM
Parent: #8
اخونا ابو حازم
الحق عوض (البوست )لقيناه
وتعال شوف الناس المنتظرنك هنا
بالمناسبة البوست كان رائح .. لم الله الشمل
وبعدين سمع اضاني قالو الاف الاسر المصرية غادرت الامارات
في من قال بسبب الازمة المالية الحالية
لكن ياربي خافو من الامطار دي ولا شنو
الله يطمنا عليكم كان دي ولا ديك
|
Post: #10
Title: Re: المغتربون بدولة الإمارات يُطمْئنون ناس الضرائب
Author: عبدالكريم أحمد الامين
Date: 04-03-2009, 10:49 AM
Parent: #9
الاخ نصرالدين
** بما أنو البترول سعرو فى النازل فلقد قررت الدوله إعادة الضرائب على الفئات التى تم إستثنائها من قبل ,, ومابعيد تكون بأثر رجعى ,, وعشان مانتعبكم فى الوقوف فى الصفوف يمكنكم الدفع حتى 2010 لتحقيق ربط موازنة الدوله السنيه وإن شاء الله فى ميزان حسناتكم..
** و (جاخ) إختصاراً (جزاءكم الله خيراً)..
(وكل مطره وجو جميل فى غربتكم وضرائبكم وزكاتكم ورسوم خدماتكم وجبايتنا مُسدده)
(ابو محمد فؤاد)
|
Post: #23
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-04-2009, 05:44 PM
Parent: #10
Quote: الاخ نصرالدين
** بما أنو البترول سعرو فى النازل فلقد قررت الدوله إعادة الضرائب على الفئات التى تم إستثنائها من قبل ,, ومابعيد تكون بأثر رجعى ,, وعشان مانتعبكم فى الوقوف فى الصفوف يمكنكم الدفع حتى 2010 لتحقيق ربط موازنة الدوله السنيه وإن شاء الله فى ميزان حسناتكم..
|
الأخ الكريم عبد الكريم أبو محمد فؤاد
لك عاطر السلام وموفور الاحترام
ربما تكون الأحداث السياسية الحالية شغلت المسؤولين عن الأزمة المالية العالمية والتي
أثرت بالتأكيد على السودان، فالحكومة الآن مشغولة بكسب التعاطف والتأييد من السودانيين
والمغتربون شريحة مؤثرة منهم، لكننا نتوقع بعد هدوء الأحوال السياسية أن تعود الدولة
لاستعمال نظام اللا رحمة الذي انتهجته وستعود الضرائب كما كانت بل وربما أكثر من الأول..
نسأل الله أن يصبرنا على الحمل الثقيل..
|
Post: #22
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-04-2009, 05:27 PM
Parent: #9
Quote: الحق عوض (البوست )لقيناه
وتعال شوف الناس المنتظرنك هنا
بالمناسبة البوست كان رائح .. لم الله الشمل
|
كتر خيرك يا معاذ
أنا في الأول قنعت من البوست وافتكرت إنو ضربتو طائرات بكري
وقلت حانملك الحقائق للرأي العام بعد شهرين بس ربك ستر..
|
Post: #21
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-04-2009, 05:15 PM
Parent: #8
Quote: زى ما قال جنى لنا اجر المناولة
وعشان خاطر السودان كل يهون |
تحياتي يا حيدر
نسأل الله أن يجنب السودان المصائب والمحن..
بس للأسف يا حيدر في ناس بتاجروا باسم السودان في الحرب والسلم..
|
Post: #20
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-04-2009, 05:08 PM
Parent: #7
Quote: يعنى لينا أجر المناولة!
الله لينا
|
ده إنتو الخير والبركة يا جني
وزي ما بقولوا العين ما بتعلى على الحاجب..
|
Post: #18
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-03-2009, 08:30 PM
Parent: #6
Quote: الحبيب نصر الدين
خلاص جريت عودك وقمتا على جنك؟
|
يا عمر بقولوا الجن بزيد مع زيادة البحر واليومين ديل كل شيء زايد..
Quote: على العموم أبشرك بضريبة جديدة يتم دراستهاالآن اسمها ضريبة أوكامبو
بهدف تأمين رحلات الرئيس الخارجية
والمشكلة لو استمرت معدلات رحلات سيادتو بهذا المعدل ستكون الضريبة 100% من الراتب
وحينها سنستعين بخبرات العزيز صديق الموج (شحات دولي)
لتحقيق نبؤة أبو الدبلوماسية السودانية |
أوكامبو اسمو ده بجيب ليهم حساسية.. الضريبة الجديدة اسمها (دمغة الرئيس)
وحياخدوها من أدمغتكم وأدمعتكم.. وبالتأكيد ناس ود الموج حانحتاج ليهم
بعد تطبيق قانون الضرائب الجديد...
وينك إنت ياعمر؟ موبايلك مغلق وما موجود في المكتب..
خليتني أشك إنو أوكامبو قبضك بدل عمر البشير..
قال كبش أقرن قال..
|
Post: #17
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-03-2009, 08:14 PM
Parent: #5
Quote: مرحبا ابا حازم
ياخي الامطار دي خلعتنا أسبوع كامل الواطة دي ما نشفت
قربنا نربط الشنط ونمقلب الجماعه ديل تاني يلموا فى ضرائب ؟؟؟؟ |
كيفك يا زنجي والبركة في الشوفة..
كمية الأمطار دي لو نزلت في السودان كان البيوت إتماصـت (وشربنا مويتها)..
لكن ربك كريم ورحيم علينا..
بس يا زنجي الجماعة ديل ما حاتقدر تمقلبهم لأنهم غشوا الرجل الذي غش إبليس..
|
Post: #16
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-03-2009, 08:09 PM
Parent: #4
Quote: حفظكم الله في حلكم وترحالكم وأعاصيركم وأمطاركم وتجوا راجعين بالسلامة وتلقوا الشبابيك في المغتربين زادت وعمرت والفئات كبرت وتضاعفت .. والإعفاءات ألغيت .. وجواز سنة واحدة لو نقص شهر تجديد كمان ... ورسوم المغادرة اصبحت مليون عديل ... ياالله وما يجي واحد بالبحر وخاصة ترب تكت يخلي عربيتو ويمشي ويجي يدفع عليها اجرة أرضية قدر قيمتها أو يتنازل ويشيل لوحاته ويتخارج ...
تاني ما تجيب سيرة البحر
|
تحياتي يا الشفيع وعساك بخير..
إنت طبعاً جيت قريب من السودان عشان كده عارف آخر ما توصلت إليه الدولة من أجل تعذيب
أبناء شعبها المغتربين.. ربنا يكون في عون الجميع..
أتوقع عودة جميع أنواع الضرائب والزندية التي اختفت، بسبب الازمة المالية العالمية..
والمغتربين ليهم الله، معصورين من جميع الأطراف ومافي زول بسمع صوتهم..
|
Post: #15
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-03-2009, 08:02 PM
Parent: #3
Quote: اتلومت لكين.....
ناس ذكاة الدولار ماسلمت عليهم |
هازول كيفن ما اسلم عليهم؟
هو أنا الجابني البلد دي شنو غير ناس الزكاة..
جينا هنا في سبيل الله وعشان خاطر العاملين عليها..
|
Post: #11
Title: Re: المغتربون بدولة الإمارات يُطمْئنون ناس الضرائب
Author: فاروق حامد محمد
Date: 04-03-2009, 10:51 AM
Parent: #1
Quote:
ربما يكون قد أصابكم القلق على أبناء الجالية السودانية بدولة الإمارات العربية
المتحدة من جراء الإشاعات المغرضة التي تزعم بأن الإمارات تعرضت لإعصار جوي
وأن الأحوال الجوية سيئة تنذر بالأخطار.
عليه أؤكد لكم أنا العبد الفقير لله، أصالة عن نفسي ونيابة عن أبناء وبنات الجالية
السودانية بدولة الإمارات، بأننا جميعاً بخير ولم يصب أيُّ واحدٍ منا بأذى، وأننا أحياء
نرزق بحمد الله، ونتعهد لكم بالاستمرار في دفع الضرائب طالما أنفاسنا تطلع وتنزل،
وسيأتيكم المعلوم حسب الأصول وعبر الطرق الرسمية، فنرجو ألا تقلقوا علينا أبداً
ونرجو كذلك بأن تطمئنوا حكومة الوحدة الوطنية وجهاز السودانيين العاملين بالخارج
وناس الخدمة الإلزامية بأننا بخير وصحة ولا نفقد سوى (عدم) رؤياهم الغالية، ونستمتع
هذه الأيام بطقس صحو وأمطار غزيرة تهطل علينا آناء الليل وأطراف النهار، والجو عندنا
هنا حاجة ما تخلص، ويمكن أن تطلقوا عليه بأنه جو (سجارة، فول، باتا) وكل ما تسمعونه
من مزاعم عن الأعاصير والعواصف هو مجرد إشاعات ليس إلا..
والله لا يضيع أجر من دفع ضريبة...
ابنكم العزيز هناي
ع/ أبناء وبنات الجالية السودانية بدولة الإمارات |
أخونا أو ابننا نصرالدين .. لك خالص الود
هذا البوست من أخف "الدموم" (دموم: جمع دم) ـ بلغة أهلنا
في قرية الحديبة ـ التي قرأتها مؤخراً ويشي بخفة دم كاتبها ..
وهي صفة انعدمت في هذا الزمن الكحلي المنيّل بتمانين الف نيلة!!
ـ لا تجزع فقد ارتفعت كثافة النيلة من ستين ألف الى تمانين ألف نسبة
لظروف التضخم وكده !!! ـ ياخي واصل في الكتابة بنفس خفة الدم هذه
فقد نكسب كاتباً ساخراً كبيرا يمكن أن يبز د. الفاتح جبرا ذاااته ...
أشد على يدك .. كن دوماً بخير ولك صادق المحبة ..
"أبوناصر"
|
Post: #12
Title: Re: المغتربون بدولة الإمارات يُطمْئنون ناس الضرائب
Author: mahdy alamin
Date: 04-03-2009, 04:02 PM
Parent: #11
ابو حازم
ازيك
مختفي عن الانظار
المطر والاعاصير ولا شنو ؟؟؟؟؟؟
تحياتي
|
Post: #13
Title: Re: المغتربون بدولة الإمارات يُطمْئنون ناس الضرائب
Author: أسامة الفضل
Date: 04-03-2009, 07:06 PM
Parent: #12
أخونا
سرنا أنكم أحياء ترزقون و شايفك تفتح في أبواب المشاكل هسع في داعي لحكاية أحياء دي, الحكومة قاعدة تدفعنا على مسألة يرزقون مالك دايرها تعمل ضريبة على النفس الطالع و نازل ده .
شايف جرستك جابت ناس الحديبة , ادفع بالتي هي أحسن فلعه ينوبنا من الحب جانب بإعتبارنا فقراء و مساكين و مؤلفة قلوبهم.
تلفوني كما هو والإتصالات رخيصة وهنيالك يا فاعل الخير
|
Post: #19
Title: Re: المغتربون بدولة الإمارات يُطمْئنون ناس الضرائب
Author: عصام علي أحمد
Date: 04-03-2009, 09:31 PM
Parent: #13
يا ابو حازم
حازم دفع الضرائب والزكاة ولا لسه ؟
حركات الهجيج مع الفنانه .......
دي بس بتخليهو يدفع ضرائب ورسوم مغادرة
ورسوم مرور ودخول وخروج ودمغة شهيد وجريح
الله مايوريكم حازم في حفلة
حتشوفوا العجب
|
Post: #27
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-05-2009, 02:18 PM
Parent: #19
Quote: يا ابو حازم
حازم دفع الضرائب والزكاة ولا لسه ؟
|
وين أراضيك يا عصام لعلك بخير..
ناس حازم ديل الحكومة مخلياهم حتى تصل الضريبة 50% .
Quote: حركات الهجيج مع الفنانه .......
دي بس بتخليهو يدفع ضرائب ورسوم مغادرة
|
صاحبك شفتو حتاهو قرض مع الفنانة وما أداها فرصة وحتى بعد نهاية الفاصل
دخل معاها الغرفة .. شفت ليك عباطة..
ياسر تمتام ذاتو ما قصر معاهو وفي النهاية قال ليهو عاوز المايك عشان يغني..
ده ولد عجيب.. ربنا يديهو العافية..
|
Post: #26
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-05-2009, 01:56 PM
Parent: #13
Quote: أخونا
سرنا أنكم أحياء ترزقون و شايفك تفتح في أبواب المشاكل هسع في داعي لحكاية أحياء دي, الحكومة قاعدة تدفعنا على مسألة يرزقون مالك دايرها تعمل ضريبة على النفس الطالع و نازل ده .
شايف جرستك جابت ناس الحديبة , ادفع بالتي هي أحسن فلعه ينوبنا من الحب جانب بإعتبارنا فقراء و مساكين و مؤلفة قلوبهم.
تلفوني كما هو والإتصالات رخيصة وهنيالك يا فاعل الخير |
تحياتي يا أسامة وعساك والأسرة بخير
أنا راقد لي فوق راي من هذا البوست لأني زعلان من ناس القنصلية.. قبل سنة مشيت جددت
جوازي وفي الاستمارة سألوني سؤال نكير، بما في ذلك تفاصيل السكن والتلفونات، ولما جاتنا
الأمطار الأخيرة دي كنت متوقع يجي يزورني واحد من ناس القنصلية ويطمئن عليْ باعتباري راعي
من رعاياهم لكين ده ما حصل فعرفت المسألة مسألة منفعة وكده عشان كده حبيت أطمنهم على
إني حا دفع ليهم الضرائب لأنها أهم مني أنا ذاتي..
أعذرني يا أسامة على التقصير وعدم الاتصال في الفترة الفاتت لكين بعمل ليك تلفون إن شاء الله..
|
Post: #25
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-05-2009, 05:22 AM
Parent: #12
Quote: ابو حازم
ازيك
مختفي عن الانظار
المطر والاعاصير ولا شنو ؟؟؟؟؟؟
|
تحياتي يا عريس وعساك بخير..
والله كنت مختفي عن النت لمدة طويلة وما كنت عارف الحاصل في الساحة والاختفاء بسبب
ضغط العمل، بس حا نواصل معاكم إن شاء الله ..
|
Post: #24
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-05-2009, 05:17 AM
Parent: #11
Quote: أخونا أو ابننا نصرالدين .. لك خالص الود
هذا البوست من أخف "الدموم" (دموم: جمع دم) ـ بلغة أهلنا
في قرية الحديبة ـ التي قرأتها مؤخراً ويشي بخفة دم كاتبها ..
وهي صفة انعدمت في هذا الزمن الكحلي المنيّل بتمانين الف نيلة!!
ـ لا تجزع فقد ارتفعت كثافة النيلة من ستين ألف الى تمانين ألف نسبة
لظروف التضخم وكده !!! ـ ياخي واصل في الكتابة بنفس خفة الدم هذه
فقد نكسب كاتباً ساخراً كبيرا يمكن أن يبز د. الفاتح جبرا ذاااته ...
أشد على يدك .. كن دوماً بخير ولك صادق المحبة ..
"أبوناصر"
|
الأخ الأكبر أبو ناصر
لك التحية والتقدير
أشكرك على الإطراء وأتمنى أن يكون في ما أكتب ترويح للقراء، فالسخرية عندي بمثابة
ترياق لهموم الحياة، وأتمنى أن أرقى لكتابات أخينا الفاتح جبرا الذي أعتبره أبدع
وأروع من يكتب المواضيع الساخرة ولا أفوت له موضوعاً..
على ذكر أهلنا ناس الحديبة، عمنا أمحمد ود قسم الله من أظرف الناس في الحديبة، شاف
واحد من ناس البوليس في مدني شايل قنبلة مسيلة للدموع، قام سألو: يا ولدي ده شنو؟
فقال ليهو دي قنبلة مسيلة للدموع بنفرتق بيها المظاهرات: قام قال ليهو: طيّب ما تديني
واحدة عشان أفرتق بيها سوق الحديبة..
لك الشكر يا فاروق وتقبل إعزازي ومودتي..
|
Post: #28
Title: Re: المغتربون بدولة الإمارات يُطمْئنون ناس الضرائب
Author: osama idris
Date: 04-05-2009, 03:02 PM
Parent: #24
أخونا العزيز نصر الدين البشير ( ابو حازم )
بالله الناس ديل نقول عليهم شنو
يعني قالوا تم الغاء الضريبة
ثاني يقولوا رجعوها
ما كفاية المغتربون من اكثر من ثلاثين عاما يدفعوا
والله احترنا ‘
الله كريم
|
Post: #29
Title: Re: المغتربون بدولة الإمارات يُطمْئنون ناس الضرائب
Author: Nasruddin Al Basheer
Date: 04-06-2009, 02:10 PM
Parent: #28
Quote: أخونا العزيز نصر الدين البشير ( ابو حازم )
بالله الناس ديل نقول عليهم شنو
يعني قالوا تم الغاء الضريبة
ثاني يقولوا رجعوها
ما كفاية المغتربون من اكثر من ثلاثين عاما يدفعوا
والله احترنا ‘
الله كريم |
حبيبنا أسامة
مسألة إعادة دفع الضريبة لن تكون بصورة مباشرة على المغتربين،
ولكي لا ترجع الدولة عن وعدها وكلمتها فستكون هناك أساليب أخرى
لتعويض دفع ما تم إعفاؤه مثل مضاعفة الزكاة (غريبة مش؟) أو
رفع الحد الأدنى للمساهمات الأخرى أو زيادة رسوم المعاملات
القنصلية للمغتربين.. هم متخصصين في أساليب التحايل والغش ولن
يعدموا الحيلة لمص دماء الغلابة.
غايتو ربنا يكون في عون المغتربين المساكين..
|
|