Post: #1
Title: أمس صلينا العصر مع كاكا ورونالدينهو على أنغام فرفور !!
Author: صلاح أبودية
Date: 04-01-2009, 09:43 AM
أمس لظروف مناسبة واحد قريبنا ..
صلينا العصر فى مسجد فى الحاج يوسف !
وما أن كبّر الإمام تكبيرة الإحرام ..
إنطلق من مكان ما فى المسجد صوت المغنى جمال فرفور !
وباءت محاولات صاحب الموبايل بالفشل فى إيقاف صوت المغنى !
وعند السجود شاهدت فى الصف الأمامى خمسة شباب فى عمر الزهور !
أحدهم يلبس فنيلة رونالدينهو بالرقم 10 ويربط خلف عنقه ضفيرة مثل سيد الإسم !
وبجانبه صاحب الرقم 22 كاكا بشحمه ولحمه !
وليس بعيدا منهم جلس رونالدو الكبير وآثار السمنه ظاهرة عليه !
وبجانبه جلس تاليا التشهد بكل خشوع مولانا ديفيدبيكام بالرقم 7 !!
ومع .. السلام عليكم ورحمة الله !
وجدت يمينى زين الدين زيدان شخصيا !!
السلام عليكم ورحمة الله !
الحمد لله كنت بصلى لصق الحيطة ولو ما كان كده ..
كان لقيت العجب سيدو شمالى !
ولغاية الباقيات الصالحات ..
فرفور مستمر فى غناو ..
قال التلفون علّق ..
الله يعلقك من محل ماإنت عارف !
غايتو ..
ربنا يتقبل !
|
Post: #2
Title: Re: أمس صلينا العصر مع كاكا ورونالدينهو على أنغام فرفور !!
Author: صلاح أبودية
Date: 04-01-2009, 10:17 AM
Parent: #1
والله العظيم يا أخوانا ..
حكاية التلفونات فى الصلاة دى جننتنا !!
نحن برانا ما ناقصين !
من الزول يقول الله أكبر وهاك يا سرحى ..
شى فى الإمتحانات ..
وشئ فى قروش الكهرباء ..
وشئ فى الكورة !
وما عارف السلفية فضل فيها كم ؟
والإيجار (زمان) !
|
Post: #3
Title: Re: أمس صلينا العصر مع كاكا ورونالدينهو على أنغام فرفور !!
Author: صلاح أبودية
Date: 04-01-2009, 10:56 AM
Parent: #2
تانى ياجماعة ..
فنايل لعيبة الكورة ديل ده ما محلها !
فنايل الكورة للكورة ما للصلاة !
وحكاية الفنايل دى طويلة جدا !!
كتير من الشباب تلقاهو لابس فنيلة تسئ لدينه ولعرقه !
وواحد تلقى لابس فنيلة مكتوب فيها كلام بذئ بلغة وضيعة !
ده غير صور المغنيات الخليعة !
ولو سألت الواحد قلت ليهو الفنيلة دى مكتوب فيها شنو؟
يقول ليك : مكتوب فيها بالإنجليزى !
ولو قلت ليهو ده منو المصور فى فنيلتك ده !
يعاين ليك بى إزدراء ..
ويقول ليك : ده 50cent ما بتعرفوا ؟
بعرفوا لكن الزول ده مصور عريان ما تجى بيهو الجامع !
يقول ليك : هو العريان ما أنا !
|
|