بدا العد التنازلى لندوه طراوه: حول الغناء الاوركسترالى

يدعوكم التجمع الوطنى الديمقراطى للسودانيين بفلادلفيا إلى
ندوه كبرى يقدمها
د. احمد طراوه الباحث في تاريخ ثقافة و غناء السودان
في محاضرة غنائية بعنوان
المُقومات و العناصر التاريخية لمدرسة الغناء الاوركسترالي الثانية
تتضمن المحاضرة سرد و تحليل تاريخي لعوامل نشأة و تطور
فن الغناء السوداني مدعوم بنماذج غنائية واسعة و متنوعة

المكان :
قاعة السكند مايل سنتر
214South 45th Street
Phila PA 19104
الزمان:الساعه السابعه مساء السبت
04,04,2009

الأخت إقبال
تحيتي

الزمان و المكان لو سمحتي


نصر هجام

الصبر يا نصر

نصر الدين إزيك
عليك الله يا نصر الدين تلم لينا ناس حلتكم..
ما دايره أقول ليك (الخرد)

سلامى للأسره ودى مناسبه نشوفكم

الشاعرة التي ترسم الكلمة وتنحت الشكل
Egbal Elmardi
لك التحية
وللدكتور أحمد طراوة
وللجالية السودانية هناك
التي حتمًا ستسعد بالطرح العبقري المميز للدكتور طراوة
والجالية هنا في مسقط مازالت تجتر دسامة تلك الليالي
التي تستعيد الآن ذكرياتها مع بداية يوم المرأة العالمي
حتى عيد الأم وتتواصل الفعاليات هذه الأيام ...

أطيب المنى وبالتوفيق .

التحية للدكتور طراوة

في انتظاركم لما تجونا راجعين عايزنها بضبانتا

عبد اللطيف سلام
طلبك على العين والرأس
ح أعمل ليها محضر عديل وأنزل اى كلمه إتقالت...


إقبال

سميه سلامات
كيفك وكيف ناس مسقط...
شكراًً ليك على الكلام الجميل يا مبدعه

فعلاَ طراوه زول أكثر من متميز...
ونحنا فى إنتظار الندوه دى على أحر من الجمر

كل الود

.. و عند مطلع ثلاثينات القرن الماضى، تمكن ذاك الفتى السوداني - الافريقي
عبد الكريم عبد الله مختار (كرومة) ، تمكن من تفكيك و إعادة تركيب مجمل
تراث الجُملة اللحنية لامة السودان، و إعادة صياغتا و طرحها على نحو جديد




كان كرومة جسر العبور نحو اوركسترالية السودان .. و إعلانا صريحا ببدء دورة
الكوكب الفضى في سماوات الغناء السوداني

بالإختصار، غنانا صار فوق الجميع .. بهجة و طرب و شغل بديع

- مواعيدنا معكم تحت مظلة ذاك المساء
مساء اسمعيل حسن ، المساء الفارد جناحو من مسقط
في خليج العرب ، حدود شاطي امريكا الشرقي .. المساء ال لملم مصابيج النهار
و جاب الشوق و المحبة .. و عميق الحوارات حول ثقافة و ادب و تراث الوطن العزيز

مودتي لكي يا إقبال .. و لكل من حركته هذه الدعوة الكريمة

..

إقبال سلامات،
والله يا أمريكا رمتك مسقط بصناجاتها،
غايتو ، نحمدالله على الرجعوا لينا بعد السنين المره،
طراوه ، كفايه على الناس ديل ، تعال راجع.
تحايا عاليه يا إقبال وسلام يغشى الأهل والصحاب.

يا مرتضى إزيك...
خلى الحساده يا أخوى...
يجى ليه..دى الدنيا الجديده ...
نحنا كان لقينا طريقه ح نجيب الشيخ المنقورى كمان
خلى ناس مسقط يمتوا بى شوقهم

. و عند مطلع ثلاثينات القرن الماضى، تمكن ذاك الفتى السوداني - الافريقي
عبد الكريم عبد الله مختار (كرومة) ، تمكن من تفكيك و إعادة تركيب مجمل
تراث الجُملة اللحنية لامة السودان، و إعادة صياغتا و طرحها على نحو جديد

أيوه يا دكتور ...قطر ليهم من حسى عشان تشحتف أروحهم...

لسه التقيل جاى يا جماعه.


كتب صاحب أمتى...الاستاذ محمد المكى إبراهيم عن وردى:
فى طفولته البعيده سمع طنين الموسيقى فى أذنيه مع اصوات العالم وإنتخاباته
مع هدهدة الام..وإهتزازات السعف فى زؤابات النخيل
وجؤار النيل وهو يحاور صخره تعترض مجراه
مع اصوات الحقل والناس
مع الغناء العميق الذى ينطلق من عمق الذات النوبيه
حيث ترفد تحت الرمل والصخورمنابع ارواحنا الحضاريه
ثم عاد واكتشف عشا للبلابل فى حنجرته...
فعرف أنه منذور للتعبير بالمسيقى عن الأعماق البعيده

سلام يا اقبال
وتحياتي
طبعا بختكم وحاسدنكم عدييييل كده
طراوه ياخ ما تختف كراعك علينا جاي
نحن ما بعيدين كلها كم وعشرين ساعة طيران !!
وبث!



في زيارتي الاخيرة للسودان يا اقبال
كنت حريص ان ازور المدرسة العالمية
وقابلت نجوى المرضي
حيث كنت اعمل في نفس المدرسة
ياخ دي زولة حبوبة شديد

يا خالـــد إزى الحال

خلى الحساده قبل ما أختك فى قائمة ناس مسقط....

أنا برضو سألت نجوى منك...قالت لى ده زول رقيق كيف...
قلت ليها بعد البسوى فيه فى الإنترنت ده...
واقف للناس ديل عديل الف أحـــــــــــــــــــــححمر...........

كل الود

كنت واحده من الملايين التى حضرت تنصيب أوباما
وعندها تذكرته إنتفاضة أبريل وذلك الدفق الشعورى الذى إجتاحنا كما الطوفان فى ذلك اليوم
كانت المشاعر جياشه لدرجة إننا لم نعر ذلك البرد اللعين أدنى إهتمام...
درجة الحراره كانت 18 درجه فهرنهايت...يعنى تحت الصفر بمراحل..
ده ما الموضوع....
الموضوع هو...إنه كل الناس ديل كجمع كانوا عايزين يغنوا ....
أى حاجه تثير الحماسه...
أى حاجه تعبر عن الفوران الوجدانى حق اللحظه...
فى الثقافه الامريكيه مافى غنا زى ده...!!!
الناس قعدت تغنى أغانى القاسبل(اغانى دينيه زى المديح عندنا)
البدأو يغنوا كانو سود ..والبيض كانو واقفين ساكت بعد دقايق بداوا يغنوا معاهم
السود فى تاريخهم خلال سنوات العبوديه الغنا كان وسيلهم فى توصيل الرسائل..
وبرضوا بفرقوا بيه عن مشاعرهم

فى قلبى قلت يا حليل الملحمه...
ويا حليل أصبح الصبح...
ويا حليل العطبراوى بحنجرته الداويه تخترق سهول بلادى كقطار بخارى...
ويـــا حليلك يا سودان..

قلت يا حليلنا نحنا صناع الثورات بنعرف كيف نغنيها..

*

اشتقت ليك - محمد ميرغني

أضغط هنا للاستماع

معـاويه سلامات
شكرا ليك على اللنك..
محمد ميرغنى ما رهيب

إشتقت ليك لما المساء فرد الجناح
ولملم مصابيح النهار...
فى اللحظه ديك مديت معابر شوقى ليك
وحنيين حنينى الطاقى ليك

وفى اللحظه ديك نحنا ما بنقول .يــا الله
يا الله منك يا محمد ميرغنى يا فنان

شكرا ليك تانى

ياسلام يا اقبال
ويامراحب د. احمد طراوة
وحكاوى الغناء والسمر
والفكر والطرب
وحتى .....
ينوحن ليل حماماتن
حمن عيني غماماتن
بريدن شوقي لي لماتن
أياب رعاب جمال فاتن
ولاشئ في الأدب فاتن
تتوق الروح لشوفاتن
وأرجف حين موافاتن
تحياتى

د. احمد طراوة

الأخت اقبال المرضي

تحياتي

نحن نعرف دكتور طراوة وكما يقول صديقنا الهادى هباني

In and Out

ولقد ترافقنا ردحا من الزمان (فهو موسوعة في كل شئ)

وخاصة جانب الغنا ء (فهنالك القليلون) الذين يلمون بتفاصيله

لذلك استغربت لزميل المنبر الذى قال للدكتور (أمشي يا بتاع الغناء)

واعتبرها (مسبة)

في حين انه ان استمع الي طراوة وهو يتحث في السياسة أو الاجتماع أو الاقتصاد ....الخ

كان سيصدم في قولته تلك

نحن عاشرناه ونعرف امكانياته ......ونعرف أنه صنديدا لم تهده (مخابرات أكبر دولة عربية)

فهنيئا لناس فلادلفيا (لأنني لا أعتقد بأن في أمريكا كلها من يتكلم في هذا الجانب أحسن من د. طراوة)

عاطف إزيك

الفهم ما قسم يا عاطف...
نحنا قايلنا راجعيين لى ورا بالساهل..
عشان الناس تمشى لى قدام لازم الناس تحترم الفنون بأنواعها
لانه الفنون عنوان نهضتنا وحضارتنا
أول ما قامت دوله الظلام قامو بتكسير التماثيل فى كليه الفنون بحجة انها اصنام..واعجبى
والتدمير المتعمد الحصل لمكتبة الاذاعه حاجه تورثك ورم القلب...
الفنانين والمثقفين عندنا بيموتو معدمين حق الدواء فى تلتله..
نحن امه ما بتحترم مبدعيها يا عاطف ,عشان كده الزول ده فاكر إنه نبزه بالعباره دى..

خليك من نضال طراوه الدخله من أبواب معرفه واسعه بجدلية العلاقات السياسيه الاجتماعيه فى السودان
وتنظيره الفلسفى بعلم فى واقعنا السودانى وربطه بالعالم من حولنا
ومواقفه الثابته ضد كل ما يراه غير صحيح..

الدكتور طراوه لو كان ما بعرف أى حاجه غير العرفه عن الغنا
ما كان بقل إحترامى ليه قطره

عشان كده قالو ...الما بعرفك بجهلك

كل الود

والله لولا ارتباط سابق كنت وصلتكم وحضرت معاكم
يستحق هذا الانسان الجميل الحج اليه

اقبال ,..سلامات

انا جايي مع طراوة كراع بكراع, هذا الفتي ذكي الفؤاد لمثله تضرب

اكباد الابل لديه زوايا نظر غير مطروقة وبه (( حاسة شوف)) مجلوة ولاعجب

فهو احد بدائع صنعة امدرمان التي قال علي المك عن سمارها من اهل

المغني والطرب في زمان لم يكن يعرف المايكرفون ولا شدو الالات

( يبدا الحفل والهواء ينشر الصوت في تسفاره الابدي,يشي به, يحرك العشاق

فيتجهون بارشاد الهواء الي موضع الحفل).

مودتي

يا هشــام مرحب بيك...
فى زمنا دا الانتر نت قرب المسافات ..وكثيراً...

نشـوفك

كل الود

راويه كيفك

مافى طريقه يا راويه تغيرى لينا فى جدولك ده شويه؟؟؟
كدى باصريها...

الكاشف
يتدفق صوته السلسبيل
رقراقا..
يعمد مواسم الفرح فينا

حبيبى أكتب لى وانا اكتب ليك
بالحاصل بى
والحاصل بيك
الحاصل بى أنا شوق وحنين
اقيم الليل آهات وانين
فارقنى حبيب فارقنى سنين

ما ليك امان يا دا الزمان

يا عمر شفت الكلام ده كيف..
الاغنيه دى بتذكرنى جامعه القاهره

شكرا اقبال..
معاكم...
بكرى

احمد طراوة ، اشراقة الندى و طلة الزمن الجميل
كم كنا نتمنى أن نكون بينكم
لكن
ما كل ما يتمنى المرء يدركه
و خاصة فى هذا الزمن الردئ

لهذا الرجل صاحب الذكرى العطرة و لكم خالص التحايا

.. من جميل ذاك الليرك الجديد الذى اعلن تبدل احوال الشعر الغنائي
و استدعى بالضرورة جملة لحنية جديدة ،

كتب (عبد المنعم عبد الحي) رائد رومانس الواقعية - الجمالية مطلع خمسينات القرن الماضي :




الغرام ما بخير :: ما بين كبير و صغير
من زمان الحب :: امرو فينا يحير

* لن نسمح بإحالة السودان إلى محرقة و إقصاء و تقتيل، لن نسمح بتحويل الوطن إمبراطورية
للمهرجين و ( بيت بُكاء لجماعة الإجرام و الخطايا و الهروب من العدالة ) .. نواصل إعلان
السودان جمهورية ديمقراطية، جمهورية جديدة لسيادة العقل و التسامح ونهضة العمل و الإنتاج،
و موطنا للحب و الغناء الجميل

زرعوك فى قلبى
يا من كسانى شجون..
.وروك من دمى
يا الادن العرجون

الناس ديل كانو فى حالة كسيره شديده
وكانت الناس فى حالة تسامح مع الذات عشان كده أبدعو..

عشان كده ح نهزمهم بى غنانا...
قال محجوب شريف

لا مخير فيكىولانى
داير ابقى انا فيك مخير
كم زمن منك بعانى
ياتو يوم جيتك مغير

يا حنانى
ويا زمانى
ويا مكانى
يا صباى الاولانى
لا انا فلان الفلانى
ولا فوق ساس جاهى بانى
عندى بس حبة امانى
وحزمه ولا إتنين اغانى
بحترق قبال اوانى
ولمن يضحكو لى عيونك بشتعل
من تانى

لا مخير فيكىولانى
داير ابقى انا فيك مخير
كم زمن منك بعانى
ياتو يوم جيتك مغير

نواصل إعلان
السودان جمهورية ديمقراطية، جمهورية جديدة لسيادة العقل و التسامح ونهضة العمل و الإنتاج،
و موطنا للحب و الغناء الجميل

ده الكلام يا دكتور...
سنغنى مثلما غنى الخليل
مثلما غنت مهيره
تلهب الفرسان جيلا بعد جيل

سنغنى لحريق المك فى قلب الدخيل....

ونغنى لواعج الحب للمحبوبه الانثى
والمحبوبه الرمز...

يا جميله
ومستحيله
إنتى دايما زى سحابه
الريح تعجل بى رحيلها
عيونى فى الدمعات وحيله
اسمحيلها تشوف عيونك
اسمحيلا
انا لا الصبر قادر على
ولا عندى حيله

يا مراسى الشوق تعالى
لا اليالى تمر بدونك هى الليالى
من ضواحى الدنيا جيت وعلى رحالى
لى مداين فى عيونك يا محالى
ريحينى
استرى حالى
فريحينى
انا لا الصبر قادر على ولا عندى حيله

حدثت عنك نجمه جاره وزرعت إسمك
حاره حاره
فى مناديل العزارى
فى مشاوير الحيارى
فى لحى الاشجار كتبتو
نحتو فى صم الحجاره
وبحت للشمس البتقدل فى مدارا

عيونى فى الدمعات وحيله
اسمحيلا تشوف عيونك
اسمحيلا

أنا لا الصبر قادر على
ولا عندى حيله
وإنت منك لا بدايه
عرفت لسه ولا نهايه
مره اسرح
ومره أفرح
ومره تغلبنى القرايه
ولمن اكتب ليك وداعاً
آه
قلبى ينزف فى الدوايه
يا صبيه الريح ورايا
خلى من حضنك ضرايا

عيونى فى الدمعات وحيله
اسمحيلا تشوف عيونك
اسمحيلا
أنا لا الصبر قادر على
ولا عندى حيله

حزف للتكرار

إقبال

الاستاذ أسعد الريفى

احمد طراوة ، اشراقة الندى و طلة الزمن الجميل
كم كنا نتمنى أن نكون بينكم
لكن
ما كل ما يتمنى المرء يدركه
و خاصة فى هذا الزمن الردئ

نحنا برضو كنا بنتمنى إنك تكون معنا يا استاذ

لك الود

مرحب بيك يا بكرى
البوست نور

الأستاذة اقبال
التحية والتقدير

رواد البوست لكم الود

أحمد طراوة
الطبيب الانسان
تجاوز حدود أمدرمان والسودان
جمع الصفات الانسانية
مزج بين الفكر والابداع والجمال
وضعهم فى سلة واحدة
ارتقى بها شجرة الابداع الفارعة الطول
تميل فى هدوء ورقة
لينهل منها الجميع

لأحمد ولكم جميعا الرابط أدناه
http://www.youtube.com/watch?v=SJoJDsFKh9I

ويا أحمد لعلك تذكر هذه الأغنية وغيرها مما كنا نردده بالمحروسة
و مزيدا من الابداع والتألق

يحكي الرواة ان الشيخ قريب الله كان يجلس ليلة في خلوته يناجي ربه بعد

ان خلت الطرقات من السابلة وسجت امدرمان القديمة في سكونها الوادع,

حمل اليه النسيم وهو غارق في خلوته تلك صوتا ممتلئا بالشجو,كان صاحب

ذلك الصوت ينشد:( ياليل ابقالي شاهد) فماكان من الشيخ العالم التواب

الا ان ان امر ان يحضر اليه ذلك الشادي الصداح لينشده ماكان يتغني به

كان ذلك الشادي كروان ذلك الزمان وكل الازمنة كرومة, وكان ذلك هو حال

شيوخنا الذين تتكئ سماء بلادنا علي قبابهم كماقال د.منصور خالد.

كان يطربون لما يطرب له اهل السودان وياسون لمايصيبهم من اسي, ولا

يوغلون الابرفق في امور دينهم,قبل عهد اللوثة والهولاكوية الجديدة حيث

اخذ ورثاء التتار في السودان يبيدون التراث الغنائي في مكتبات الاذاعة

والتلفزيون هؤلا هم رهط الشر الذين ابتلي الله بهم عباده علي اخريات

الايام ,لايطربون لما يطربنا ولايفجعهم مايلم بنا من دواهي وفوق هذا وذاك

يبغضون الناس في دينهم.

salamat ya Igbal wa Dr Trawa

we will be there

good luck

يا عاصم كيفك وكيف ناسك..

منتظرنكم ...
ضرورى...

يا شـعباً تسـامى
يا هـذا الهـمـام
تفـج الدنيـا يـامـا
تطـلع مـن زحـامـا
زى بـدر الـتمــام
تـدى النـخلـه طـولـها
والغــابـاتـ طـبولـها
والايــام فصــولــها
والبـذره الغمــام

يا ليل ابقالى شاهد على نار حبى وجنونى

سلامات يا هشام

عليك الله الشيخ ده كان سمع شرحبيل بغنى الليل الهادى بيقول شنو!!!

الليل الهادى بذكرنى
حبيبى الغايب من بدرى
خلانى وحيد
نصيبى نحيب
سهدى وبعدك جننى


كل الود

الاستاذ ياسر شبيكه

تحياتى
شكرا على اللنك
وبرجع ليك

0

With Respect


Al-Salam Alycom

Eqbal said:((
الفهم ما قسم يا عاطف...
نحنا قايلنا راجعيين لى ورا بالساهل..
عشان الناس تمشى لى قدام لازم الناس تحترم الفنون بأنواعها
لانه الفنون عنوان نهضتنا وحضارتنا
أول ما قامت دوله الظلام قامو بتكسير التماثيل فى كليه الفنون بحجة انها اصنام..واعجبى
والتدمير المتعمد الحصل لمكتبة الاذاعه حاجه تورثك ورم القلب...
الفنانين والمثقفين عندنا بيموتو معدمين حق الدواء فى تلتله..
نحن امه ما بتحترم مبدعيها يا عاطف ,عشان كده الزول ده فاكر إنه نبزه بالعباره دى..

خليك من نضال طراوه الدخله من أبواب معرفه واسعه بجدلية العلاقات السياسيه الاجتماعيه فى السودان
وتنظيره الفلسفى بعلم فى واقعنا السودانى وربطه بالعالم من حولنا
ومواقفه الثابته ضد كل ما يراه غير صحيح..

الدكتور طراوه لو كان ما بعرف أى حاجه غير العرفه عن الغنا
ما كان بقل إحترامى ليه قطره

عشان كده قالو ...الما بعرفك بجهلك))

----------------

Eqbal Al-Marddi was 1000% right; Dr. Trawa one of the Sudanese high intellectual in Art and Social
changes

Eqbal words that mentioned Tarawa are true but less than him in reality my sorry for her is that she and no one can describe the Sun in details.

Salam
&
Good wishes

no one can describe the Sun in details.


ألأستاذ المنصور جعفر

سلامات
صدقت..مش ده وبس.. الشمس مافى زول بقدر يعاين ليها حتى

شكراً ليك على المداخله

إقبال

الشمس

الشمس

الشمس

لوموهو اللاهي - عبد العزيز محمد داؤود

أضغط هنا للاستماع

يا أستاذة اقبال

دكتور أحمد طراوة

زول أساسي في بوست (رفاق مصر)

ببوستك ده جهجتيه (من ذاك البوست)

شكيتك لي الله

------------------

أرجو أن لا تؤخذ شكيتي بأنني أعنيها

الاستاذ عاطف مكاوى

هى يا ود امى, انا شكية الله دى بقدر عليها
أشكينى للحكومه...البلد دى فبها حكومه ...ما تخاف...


إقبال

.. جنين الاوركسترالية الاول !

× عبقرية الحاج / محمد احمد سرور .. الولد راعي الغنم ، ثم عامل وابور الزلط لاحقا
بل قل و في احسن الاحوال سايق الفيات ، او اسطى ميكانيكي بورش عبد المنعم
محمد و ابو العلا




الزول القاعد اقصى يسار الناظر .. هو اول من دوزن كمنجة اوربا و التخت العربي
على نحو سوداني اصيل .. اللهم انزل شآبيب رحمتك على عبدك السر عبد الله

.. و كمان وهبة محمد سعيد : بمزيكتو اتحكرا !

* الاوركوريون ابو زراير القديم الجاب اوكورديون ود الحاوي .. هذا من ذاك وفقا لقانون
التراكم و القفزة

.. بالله شوفو سولو
و لزمة الاكورديون في أغنية المصير .. قوة تتحدى الصعاب .. بتقطع الليل المُخيم
و تمشى في الغفر اليباب ( يا معاوية .. كلام سيف الداسوقي )

أنها رحلة غناء السودان الاوركسترالي .. و صدق من قال :
يشغل قلبي حبك يا سودان .. على مر الزمان ..

الاعزاء

د. أحمد طراوه

ح نجي الندوه
و حكيت ل د.أمير خليل عنها
و أصر إني أحضرها بالنيابه عنه

رغماً عن المشوار اللي جبده شويه
لكن كلوا يهون
الندوات زي دي ما بتتوفر طوالي

معزه و سلام كتيرين للدكتور طراوه

الاستاذ محمد حيدر

مرحب بيك

يا استاذ معاويه سلامات

ليك كل الشكر على اللنك...
وأأسف على التأخير...

أبو داؤد ...وما أدراك ما أبو داؤد
ذلك الصوت المحير...
بعد كل تلك القوه والجبروت...يتكسر منداحاً ...ليعبر عن أدق مكنونات الريد
ولواعج الشوق...فينقلنا إلى بحور نمارقها لجه...
وتلك الكبريته ...آه من تلك الكبريته...أ هى سحريه أم مسحوره...


إقبال

Quote: ح نجي الندوه و حكيت ل د.أمير خليل عنها و أصر إني أحضرها بالنيابه عنه

العزيز محمد حيدر

ياخي ممكن ترسل لي ايميل

الدكتور الرائع (أمير خليل)

فلنا قرابة الربع قرن لم نلتقي

منذ أن اختطفه (عسس الأمن المصرى)

أو علي وجه الدقة التقيته بعد ذلك في بيتهم بالعباسية

اذا أنت تقصد الذى أقصده

وايميلي هو :

[email protected]

ويا أستاذه اقبال (معليش) للدخول شمال

وهذا يعني (بأننا نتابع كل مداخلة في البوست)

Quote: التحية للدكتور طراوة في انتظاركم لما تجونا راجعين عايزنها بضبانتا

مع الف تحيه للدكتور احمد طراوه وللاخت اقبال.

.. غناء البوادي القديم، شق العتامير عبر مجاهدات (الهدّاي)
جر النم على نهج الاوائل : حسان الحرك ، شغبة ، ود قلبوس

.. ثم من بعد ذلك ، الحردلو و كمان ود الفراش




مرورا ب : ود آمنة ، ود اب شوارب و كمان ود شوراني

او غنا الحمراني ( ود محلق ) في بت خالتو تاجوج :

فويطر العنجك الملح الرشيدي
تاجوج ما إتلقت يا خميلة زيدي .. المصادر التاريخية - الثقافية لغنائية السودان

المصير - ابراهيم عوض

أضغط هنا للاستماع

إنت يا قلبى المتيم كنت خالى
كنت خايف وما دريت سهد الليالى
كنت فاكر كل شئ فى الدنيا خالى
لقيت باب الريد فاتح ودخلت
وإبتديت تعشق يا مسكين
وإنشغلت

دى واحده من الأغانى الجميله لكن الذاكره أبت ...قاتل الله السنين والغربه..

حبيتك يا حبيبى
عشان إنت حبينى
ما إنت حياتى
وما إنت نصيبى
حبيتك لجمالك
وحبك تعذيبى

لا عايز إنت تحن
ولا ترحم حالى ليه

*-*-*

فضل إسبوعين

الســـــبت الــرابـــع مــــن أبــــــــريل 2009

نـــــــدوة الـــــــــغنــــــــاء الاوركســــــترالـــــى

بـــــــــقــــــــدمـــها : الــــــدكتـــــــــــور طـــــــــــراوه

بـــــقـــــاعة الســــــكنـد مــــــايـــــــــل

الــــدعوه عــامــــــــه

* إنبثاق فجر الاوركسترالية

The transition from Monophonic to polyphonic type of Melody"


[IMG]http://www.sudaneseonline.com/u1/hostat1.gif[/IMG



الإنتقال من واحدية اللحن الي تعدد اللحون داخل العمل الواحد : دي لا تزال بعض
من ازمة غناء السودان الباقية حتى اللحظة و الداخلة في عناصر الازمة الرابعة
الحالية : ازمة الهارموني و التوزيع الاوركسترالي و مجمل قضايا التأليف الموسيقي

.. إحساس كرومة بالرتابة خلاهو يلجأ للكسرة ، كرومة اول من جاب الكسرة
إستند كرومة بالاساس على تفعيلة عمر البنا الجديدة .. و اوزان عتيق وثيقة الصلة
ببحر المتدارك .. او قل، شعر التدويرة (السوداني) الرافع رايات المخارجة من بحور الفراهيدي

* الكسرة :

- كما في اغنية زيدني في هجراني لمن يقول في نهاية الاغنية : ما بسيب حبك حتى لو ضراني
- كما في اغنية اغنية نسيم سحرك لمن يقول في نهاية الاغنية : أغيثني يا الحبيب .. و اربح اجري
- كما في اغنية الرشيم الاخدر لمن يقول في نهاية الاغنية : احب غزال النيل .. يا جميل .. هم سبب آلامي

* كسرة كرومة بقت اغنية كاملة من بعد : على يد الكاشف و ابراهيم عوض .. كرومة هو شهبندر
الاغنية الخفيفة الجديدة مُبكرا .. عشان كدا كان كرومة ارتيست النقرزان الخفيف و ليس ذاك
النقرزان التقيل الظلل معظم غنائية الاوائل : عبد الله الماحي .. برهان، و سرور في غناهو الاول

* كرومة جاب اللزمة الموسيقية، كشكل و دليل على سعة مخزونو اللحني، و كونوا رائد المعالجات اللحنية
التي برع فيها لاحقا عثمان حسين و وردي ود الامين .. و إجمالا ناس عربي و محمدية و علي ميرغني

.. اساطين الغناء مداخل الاربعينات .. الفي الصورة اعلاه .. كلهم شالوا اثر كرومة و قبس جملتو اللحنية

كسرة كرومة بقت اغنية كاملة من بعد : على يد الكاشف و ابراهيم عوض .. كرومة هو شهبندر
الاغنية الخفيفة الجديدة مُبكرا .. عشان كدا كان كرومة ارتيست النقرزان الخفيف و ليس ذاك
النقرزان التقيل الظلل معظم غنائية الاوائل : عبد الله الماحي .. برهان، و سرور في غناهو الاول

* كرومة جاب اللزمة الموسيقية، كشكل و دليل على سعة مخزونو اللحني، و كونوا رائد المعالجات اللحنية
التي برع فيها لاحقا عثمان حسين و وردي ود الامين .. و إجمالا ناس عربي و محمدية و علي ميرغني


يا دكتور سلامات

غايتو منتظرنك تجى تثـقفنا
عشان ما يشبو لى الجماعه...ح أقول (أنا )
أنا ما جايبه خبر الكسرات دى عملوها متين...
ما حنكشه منى....لكن ناس سرور ديل ما لقيت زمن أسمعهم بيه...
الشىء البعرفه إنه الغنا كان كلام و الكاشف كان كلام براهه
وإنه ناس وردى ومحمد ألأمين...يا الله ..ديل ما غنوا الترجمه الحرفيه لكل إنفعالاتنا
عايز تحب..بتلقاهم قالو كل الإنت ما قادر تقوله...
عايز تناضل..بملو خياشيمك بعبق الثوره..ومعانى الوطن..
عايز تسترخى..وتحب البلد والناس والجمال..برضو بتلقاهم معاك...
تقول لى شنو!!!


.

Quote: فى قلبى قلت يا حليل الملحمه...

يا حليلا يا استاذة

وفي رجى توثيق

أهلاً بيك يا اٌستاذ أشرف

يا حليل الملحمه ساكت...
حتى رائعة مايكل جاكسون (we are the children)
بكل ما فيها من تضامن اٌممى مع أطفال أفريقيا ...
ما بتديك أحساس الملحمه...
يمكن لأنه نوع الإحساس مختلف
الملحمه بتخليك تحس بالـتـفرد...
بالفخر...
وبالإعتزاز...
ومهما طال الزمن ..وبعدنا من تاريخ الحدث
كل ما تسمعها بتجدد فيك الأحاسيس دى
وبتملاك أمل فى بكره...

الرائعة اقبال

كل الود

حتما سوف نعانعد ايقاع حياتنا الملئيه بالتعب وعذابات الاغتراب للحضور والا ستماع

لدكتور احمد طراوه ذلك المسجون بالابداع والانسان.

كل الحب والتقدير لكم.

عوض ابوجديرى

فرجينيا

الاستاذ عوض

بتشـرفنا جيتك...
وفعلاً الغربه اللعينه محتاجه زى دكتور طراوه عشـان يعيننا عليها...
عشان كده أفسح لينا مساحه للتواصل...
ومِساحه للزمن الجميل ...

كل الود
إقبال

0

غنائية بنات الفاشر ابو زكريا (عمتي حوا) .. الجابت مارش ود الشريف
نشأة الميلودي القديم الاول .. إنبثاق اول صولفيج ( غنا/موسيقة منوتة)

.. شوفو (خُدرة الورتاب) حبيبة سالم الارباب .. ومن ود الفحل الليلة
جانا جواب .. قصة و تاريخ الغنا في حزام السافنا الافرو - عروبي

http://www.youtube.com/watch?v=rSzlWuLX-uw&NR=1

شكرا يا كوستاوي
حاجزك يا (مُبدع) لحملتي الإنتخابية في الديمقراطية
الرابعة .. دائرة ( بيت المال/السيد المكي/ القماير/ ابوروف تحت)

.. حيقدمني في المحاضرة صحبك بتاع تالتة - جيم .. زمن الحريق كنكان و بنزين
.. و يا سلام على حوا بنزين (حوا فضل المولى ريحان) رائدة تم تم الدلوكة فيما بعد
قضاعة الخشوم و مستورة بت عرضو الكانت ساكنة في الشارع الوراكم
جوار ناس صديق مُوّلى

و ترباس بغني في حوش القزاز او حي البيان و بقول: يشغل قلبي حبك على مر الزمان !

يا أحـمـد سـلامـات

الديقراطيه الرابعه...يسمع منك رب البيت... إنشـــــــــاء الله الـلـيـله قبــل بكره...وتـكون ديمقراطيه ( مســتدامه ) كمان
آميييييين يـا رب الـعالمـين...

نصر الدين إزيك

شكراً ليك على الفلاير ..بالجد ح أعمل ليها برنت آوت وح نوزعها...
باالمناسبه ح تجو يوم الجمعه ولا يوم السـبت..؟؟

Quote: يدعوكم التجمع الوطنى الديمقراطى للسودانيين بفلادلفيا إلى ندوه كبرى

تحياتي وسلامي إقبال المرضي

تخريمة

لتسامحني الأخت الحبيبة رجاء العباسي لـ ( أشقلب ) مفهوم تخريمتها حيث كانت صاحبة براءة ( نجر ) المفردة ومفهومها الذي يعني إضافة معلومة مغايرة لما ورد في مداخلتها الأصلية .
الشقلبة تجلت في بدئي لمداخلتي الأصلية بـ ( تخريمة )
.
.
.

هل لا يزال يوجد ( في الواقع ) جسم يسمى التجمع الوطنى الديمقراطى ؟؟

نحن يا سيدتي الجيل الذي عاش بتفاؤل لا حدود له مع مؤتمر أسمرا للقضايا المصيرية
ونحن يا سيدتي من تفاءلنا أيامها بسودان جديد
ونحن يا سيدتي من كنا نرى أن إستبعاد التجمع الوطني الديمقراطي ( سيد الإسم ) من المفاوضات الجارية خطر عظيم يستحق حتى أن تتوقف المفاوضات بسببه . لم يقنعنا يومها تبرير أصدقاؤنا في الحركة الشعبية كما لم يخيفنا تهديد الغازي صلاح الدين " إن حضر التجمع لقاعة المفاوضات من الشباك خرجنا منها بالباب "
نحن يا سيدتي من عصفت خيبة الأمل بدواخلنا والحركة الشعبية تائهة الخطى بين إنزواء واستعصام بجنوبها الجغرافي ومائدة اللئام التي يفرشها لها شركاء اليوم أهل السلطة رغم أننا قد حمدنا لرئيسها صراحته المتناهية لشركاء نضال الأمس " أننا لا نستطيع أن نكون في السلطة ونكون معكم في المعارضة في ذات الوقت "
نحن يا سيدتي من ترحمنا على التجمع الوطني الديمقراطي ( سيد الإسم ) وانتهت مراسم عزائنا بجلوس أقطابه في برلمان الحكومة وتنسمهم المناصب التي تدعم وجود الحكومة بدلاً عن ( إقتلاعها من الجذور ) . ويوم أن أصبحوا اليد السفلى المتقبلة لعطايا السلطان بدلاً عن ( سلم تسلم ) قالة مولانا الميرغني التي ملأتنا ثقة ، أو ( سلم وما بتسلم ) كما بشرتنا القصيدة

تخريمة عاطفية ( عاطفية منسوبة لـ عاطف )
لا أود جرف بوستك لغير هدفه واعتذر مسبقاً إن كانت مداخلتي تؤدي لذاك
فللدكتور أحمد طراوة كثير إحترامي وقد قشع تبحره العميق في مجال الأغنية كثيراً من جهالات نفسي
لك مطلق الحرية للرد عليها بالكيفية التي ترين أنها تحافظ على الخط العام للبوست
أو حتى تجاهلها .

مع أكيد احترامي

نحن يا سيدتي من ترحمنا على التجمع الوطني الديمقراطي ( سيد الإسم ) وانتهت مراسم عزائنا بجلوس أقطابه في برلمان الحكومة وتنسمهم المناصب التي تدعم وجود الحكومة بدلاً عن ( إقتلاعها من الجذور ) . ويوم أن أصبحوا اليد السفلى المتقبلة لعطايا السلطان بدلاً عن ( سلم تسلم ) قالة مولانا الميرغني التي ملأتنا ثقة ، أو ( سلم وما بتسلم ) كما بشرتنا القصيد


ألاستاذ عاطف عمر

تحـيـاتى
بتفق معاك فى كل القلته عن التجمع...طفلنا الذى رفضنا دفنه...
لكن تجمع فلادلفيا هو ما عضو فى التجمع الأم.....والأحزاب السياسيه غير ممثله فيه..
والقياده خاضعه لرغبة العضو الشخصيه..سواء بترشيح نفسه أو ترشيح الآخرين له...بعد موافقة الجمعيه العموميه...
فى التجمع الأم فى شرط إنه القياده لازم تكون لحزب الامه والإتحادى...
وشروط العضويه مختلفه فى تجمعنا.....العضو بقدم طلب إنضمام بصفته الشخصيه..بغض النظر عن إنتماءه السياسى
الشرط الوحيد إنه طالب الانضمام يوافق على الحد الأدنى..يعنى يتفق مع الناس فى الخط العام..الدوله العلمانيه..الديمقراطيه
التعدديه...و ما يكون عضو فى الجبهه الاسلاميه...أو مساند للنظام بأى شكل من الأشكال

شكراً ليك على المرور
ومع كل الود

إقبال


وكل الود

نشأ تجمع فلادلفيا فى سنة 1995بمجهود مجموعه من الحادبين على الوطن فى منطقه فلادلفيا
وقد دار نقاش طويل حول الإسم والعلاقه بالتجمع الأم ...نتج عنه الإسم الحالى (( التجمع الوطنى للسودانيين بفلادلفيا))
وإتفق الاعضاء على أن لاتكون لنا صله مباشره بالتجمع الأم...ولكننا ندعم خطه ونسانده فى القضايا الوطنيه.
وفى الفتره الأولى كانت الدوره نصف سنوبه...يتناوب الأعضاء فيها على القياده...
وفى كل شهر تقدم دراسه أو ندوه بواسطة أى من ألأعضاء أو من خارج التجمع تتناول أى من المواضيع التى تهم الوطن..
وقد سجل التجمع حضوراً قوياً فى الساحه السياسيه فى المدينه والمدن المجاوره...بل فى كل أمريكا الشماليه..

إقبال

خالص تقديري يا عاطف،
أشكر ليك متابعتك لبوست تاريخ الغناء

وبعض من مواضيع محاضرة فيلي، هو تاريخ الدلوكة .. موضوع لا يكمن ان يخطر على بال
و اجندة التجمع الوطني الديمقراطي (لا نقد ، لا الصادق المهدي ، لا المرغني ) .. عشان كدا
إقبال قالت : تجمعنا بتاع فيلي حاجة غير .. لونية تانية للنضال السياسي - الوطني

للحق عاوزين نعرف : ايه علاقة دلوكة سلاح موسيقى الجيش الامريكي
المسماة بالتيمباني (Tympanic Membrane) كما في الصورة .. بدهلة حضارة نهر السند
و دلوكة السودان القديم القال عنها التونسي في تشحيذ الأذهان، إنها
جات و إستقرت في دارفور قبل ما تصل النيل



.. و اصلا تم تم السودان، وثيق الصلة بتعدد ايقاعات الدلوكة
و نجزم بأن ظهور الغناء الاوركسترالي كان في كامل الإرتباط بثورة التم تم تلك
عند مدخل اربعينات القرن الماضي

التيمباني/الدلوكة .. عنصر هام في منظومة البركاشن الاروركسترالي
البركاشن : الضرب الإيقاعي هو المدخل و المصدر الافريقي لغنائية السودان

.. و برضك البراسات ( آلات مزيج النحاس/الزنك )، دي برضك ما عندها اية صلة
بالموسيقى العربية اللي إعتمدت على (التخت العربي) .. طلائع السودان الموسيقية
تخارجت منذ منتصف ثلاثينات القرن الماضى من ضيق حيز التخت العربي

البراسات : زي الترمبيت اللي اتلقى في
حضارة مروي ( حضارة الحديد و النحاس ) .. دا الخلى جيمي كليف ذو الاصل الافريقي
يبكي من الدهشة و التأثر لمن زار السودان
و شاف الترمبيت ذو ال 3 الف سنة في المتحف القومي

نفس ترمبيت لويس آر مسترونغ (عبقري الجاز الامريكي ) .. الترمبيت العمل بيهو عثمان حسين
بلادي انا ، و محراب النيل و العمل بيهو ود الامين الملحمة

شغلني - أحمد الجابري

أضغط هنا للاستماع

أستاذ معاويه
سلامات

شكراً ليك أثريت البوست

كل الود

إقبال

عبد الله حامد عربي، شايل كمنجة السودان الدوزنا السر عبد الله مبكرا

و واقفا قرب كابلي و بعمل في صولو الكمنجة

أل Instrumental Solo

.. هو احد مقومات الأغنية الكبيرة القايمة على
فكرة التآليف الموسيقي، و التوزيع الاوركسترالي .. و هرمنة الميلودي



الميلودي الجميل بتاع الجابري البقول : شغلني الما إنشغل قلبو .. مخير هو في حبو
.. دا ميلودي كروود (خام) .. غير مهرمن .. غير خاضع لمعالجات و مراجعات النوتة

* هرمنة الميلودي : دا التحدي البواجه جماعة التجديد الموسيقي - الاوركسترالي
الهرمنة هي اللي حتطلق صراح عازفي الكمنجات الجُدد و حتثري موسيقانا
ب تلك التفانين و التنويعات التامة على اللحن الأساسي

الود - محمد وردي

نموذج لتوزيع أوركسترالي سوداني رائد

أضغط هنا للاستماع

شكراً يا معاويه

دى متعه ما بعدها متعه...
الكمانات بتعمل عمايل...
أفتكر إنه بحق لينا نقول نحنا جيلك يا وردى

التحيه ليك يا وردى
وربنا يديك الصحه...

أحبك ...
أنا أحبك
وشوقى الليك طول
ولسه معاى
ولى بكره لسه معاى...

سلامات للحبايب
الاخ طراوة قابلته مرة واحدة في مسقط مع اخ سوداني جاه لكشف وهو الاخ عمر عبد الله ادريس وهو الأن بالسودان ووقتها علي ما اظن د. طراوة كان ضارب التوت العماني جائزة حوالي 25 الف ريال عماني بس ما ادانا منها ريال واحد قال خاتيها للدراسة وكدة

نجيكم للموضوع وده موضوع شيق وعاوز تغطية اعلامية صورة وصوت وكتابة .. وما تنسوا موضوع الإيقاعات ولو مافي طريقة افردو ليها ندوة اخري

بسأل عن فنان سوداني مغترب اظنه حمزة علاء الدين لو لا تخونني الذاكرة وهو فنان نوبي مسكون بالالحان

وفي سالف العصر والأوان ونحن شفع صغار كان هناك برنامج تلفزيوني اسمه بيت الجاك لمقدمه التشكيلي البارع أخ من الذاكرة البقت خربة ايوه ابراهيم الصلحي قال لشرحبيل ياخي جيب ايقاعاتك دي وتعال هد فينا الاستديو ده ايام

عمر الفاروق عبد الله الشيخ
سلامات

شكراً ليك على الطله

تحياتي يا عمر
حنبحث في المحاضرة عن أفق الصولفيج التالت الجديد بتاع امة السودان





د. الفاتح الطاهر دياب ، رائد منظور و مُعتمد ، على صعيد مناجزة الصولفيج التالت الجديد، صولفيج
المستقبل و فك ازمة التنويت ( تدوين الموسيقة في النوتة بعد تسمية النغمات في
سياق السلالم )

الصولفيج الاول البسيط ظهر لمن صول التركية كتب غنوة بنات الفاشر و إتعمل بيها
مارش ود الشريف لاحقا ، الصولفيج البعديهو ظهر وسط طلائع موسيقى قوات
دفاع السودان و كمان على يد إسمعيل عبد المعين

In music, solfège is a pedagogical solmization technique for the teaching
of sight-singing in which each note of the score is sung
to a special syllable, called a solfège syllable (or "sol-fa syllable"). The
seven syllables normally used for this practice in English-speaking countries
are: do, re, mi, fa, sol, la, and ti
(with a chromatic scale of ascending di, ri, fi, si, ta and descending te, le, se, me, ra)

و بحذر، ممكن نترجم كلام ناس ريني لونج خبير السولفيج العالمي على النحو التالي:

" الصولفيج هو تنشئة و تسمية و كتابة السلالم الموسيقية على نحو منهاجي - مدرسي
بالتراميز الحرفية المستخدمة .. و هي :

دو، ري، مي، فا، سول، لا، سي ..

* السبعة ديل بمثلوا السلم السباعي (الدياتون)
* خمسة إضافات صاعدة او هابطة، بمثلوا السلم الكبير الغير كامل ( الكروماتيك) التاني عشر
* السودانين طلعوا درجتين من السباعي و عملوا الخماسي : زي مقام (فا) ميجر بتاع
عثمان حسين، او (دو) ميجر بتاع شرحبيل

* إنبثاق الصولفيج التالت العِلمي : بيعني إنو الميلودي القح الجميل بتاع ناس حسن عطية
و التاج مصطفى، و الجابري، ح ( يتهرمن و يتوزع ) بيعنى إنو الاوركسترالية تسير نحو مستقبلا
الجديد .. بيعني فك الازمة الرابعة

.. حنقتنع فعلا بأنو اجمل قرار / سؤال و إجابة ، و اجمل لحن اساسي ( Chorus and refrain ) .. في غناء
السودان هو كلام الجابري لمن يقول :

من طرف الحبيب جات اغرب رسائل ( سؤال القرار)
يحكي عتابو فيها قال ناسنو قايل   ( جواب القرار )

من طرف الحبيب
جات اغرب رسائل
يحكي عتابو فيها
قال ناسنو قايل

لو أنساك إنت
أكون غدار وخنت
أسأل عنى غيرى
وأحكم بى مصيرى

يا دكتور هى تاريها الحكايه فيها شغل نضيف...
وأنا أقول الأغنيه دى سمحه كده ماله....

في مناجزة الازمة الرابعة .. افآق الاوركسترالية السودانية

- نحو موسيقى متسعة إلي ما بعد السلم الخماسي
- نحو اغنية كبيرة ذات قالب موسيقي Musical Form
- نحو توافق لحني .. هارموني سلس و راسخ (هرمنة ميلودي السوداني)
- نحو النهوض مُجددا بإجتراحات موسى محمد ابراهيم علي صعيد الكاونتربوينت
- نحو توطين جملة السودان اللحنية داخل قالب موسيقي جديد .. و في إطار توزيع اوركسترالي جديد

.. فك الازمة الرابعة .. بإتجاه تأسيس المدرسة التالتة الجديدة

* الجاز الامريكي، صناعة الامريكان - السود، كان تمردا إثنيا تاريخيا على الهارموني
الاروبي ! كان تكسير - تجريبي شجاع لقواعد الهارموني اللي إتعملت بيهو
سيمفونية القدر بتاعت بتهوفن، و الدانوب الازرق بتاع شتراوس .. الوجدان الافريقي
الاقرب لموازير الإيقاع ، لن يقبل الهارموني الاروبي الراسي المبني على علم رياضيات
فيثاغورس هكذا على إطلاقو





لعب الدرامز بانواعو التلاتة ( Snare, Tenour, Bass )، دور حاسم في الخروج من نمط الهارموني
الاروبي الراسي و التوافق مع سلم خماسي امريكي و بعث موسيقى الجاز الامريكي

" دا نفس السبب الخلى الروك بتاع الفيس بريسلي، مختلف تماما عن روك اروبا، روك آند
رول البيتلز لمن وصل امريكا ! " الامريكان السود هم العلموا الفيس فنون الروك
.. الفيس هو مدرسة الامريكي - الاسود ( جيك بيري )

.. محاور هذا الصراع مثلت تأسيسا لنهج ( الإثنو - ميوزكولوجي) علم الموسيقى الإثني
اللي حيكون عندو بالغ الاثر في المدرسة السودانية التالتة المُعلِنة خروجا من
قبضة المركزية - الاوربية Euro-Centerism

* المدرسة السودانية التالتة ( المدرسة الفيما بعد الحاج / عبد الحميد يوسف و احمد المصطفى )
.. المدرسة التالتة المُرتقبة حتكسر برضو قواعد الهارموني الاروبي الراسي The Vertical Harmony ، و
حتأسس نهجها السوداني - العِلمي الخاص  ، خارج إطار ضربات الدرامز الجنونية ، و دون
بقاءا ملزما في تلك الحدود ، حدود آلات النفخ النحاسي كما فعل آرمسترونغ و ديوك آرلنجتون ( ترمبيت،
ترمبون، و ساكسفون باص و تِنور )

مدرسة السودان التالتة حتجيب بالاساس العود متكاملا مع بقية عناصر الاوركسترالية !
العود كآلة اوركسترالية لاتوجد في سيمفوني و كونسرفتوار اروبا، العود بوصفوا :

- حامل للخماسي السوداني القادر يشق طريقو لملامسة تخوم السلم الكبير السباعي
- كما فعل ود الامين في ( مراكب الشوق و حروف إسمك و شال النوار )
- كما فعل ود الامين بالعود وهو ياتي بخماسي غير مطروق في ( يا معاين من الشباك )
- العود بوصفو اساس الحُليات و الإرتجال الجميل المُتحرر من قيود النوتة كما فعل
الهاوي لمن لحن ما شقيتك .. ، او برعي في غنائية سيد خليفة (ربيع الحب)
او ود الامين في اغنية ( وحياة إبتسامتك يا حبيبي )

* مدرسة السودان الاوركسترالية التالتة .. مدرسة الكونقا  ( دُمبة عبد العزيز قسم الله )
و بنقز خميس جوهر .. تامبورين (رق) كرومة كما إستخدمه وردي في الود .. و بالضرورة
هي ليست مدرسة : درامز لويس آر مسترونغ

الأخت اقبال

سنبذل جهدا مضاعفا لحضور هذه الندوة الهامة بأذن الله

أحمد المرضي

يا ريت يا (ملك) تجوا تحضروا معانا تفاصيل قصة (الكونقا) الآتينية
البقت في السودان دُمبة عبد العزيز قسم الله البديعة، المُتجلية في أغنية
انا فاكرك معايا .. رق محمد احمد عوض .. لونية فلاح ( لونية الغناء الشعبي )





.. شرحبيل، و كامل حسين، و صاحبم علي نور الجليل وظفوا الكونقا على خط التم تم
بتاع العِزو هات ، وبت العقاب و ربوحة ! ايقاع التم تم كان مدخل و سلاح شرحبيل
لإنتزاع البوب السوداني من قلب علاقات مزيكا هاري بلافونت و ري شارلز

البوب السوداني المتوافق مع التم تم اوضح مايكون في غنائية : البهجة في عينيك فسر
عليك الله .. غنى شرحبيل ليس جازا .. رغم وجود الساكسفون و البراسات (آلات النفخ
النحاسي) .. السبب في ذلك هو جيتار حوض نهر الكنغو .. و تعدد طيف الإيقاعات السوداني
البستخدمو شرحبيل

* يا كوستا : في المحاضرة انا مني صورة للكاشف مكتوب عليها جديد الفن
حتكون لوقو للمحاضرة .. الإستاند بتاع الصورة تشيلوا لينا من الآرتيست
احمد المرضى .. كان يرضى كان يآبى .. نبني لي بيت في حي الجلابة
المجد لعشة موسى (الفلاتية) .. و اختها جداوية موسى عازفة العود القديرة

تاج السر سلامات

أهلاً بيك...تشرف
وكمان العصفوره كلمتنى قالو إحتمال تكون فى مفاجأه...
خالاها فى سرى..وآم كيبق ماى فنقر كرس.!!!

إقبال

موسيقي فتنت بيه لابراهيم الكاشف
أداء : فرقة السمندل

أضغط هنا للاستماع

موسيقي الحزن القديم لمحمد وردي

أداء : فرقة السمندل


أضغط هنا للاستماع

أنا مجنونك

أحبك أحبك
أنا مجنونك
ساكن فينى هواك وبريدك
جوا القلب النبض يصونك

أحلى فصول العمر حنانك
أجمل حته لقيتها مكانك
أجمل سكه مشيتها عيونك

معاكى معانى حياتى بتبدأ
وأفتح باباً ياما إنسد
ليالى طويله
وأشوف العالم ربوه جميله
عليها نسيم الصبح مخده

وبينى وبين النهر عشانك عشره بتبدأ
وبين عينى وخد الورده
بتبقى موده
واصالح روحى
وتبرأجروحى
وأبشر بإسمك
أهلك ...أغنى
وأقيف أتحدى

أديتينى مشاعر حيه
عوضتينى الزمن الماضى
زمن الجرح الأكبر منى
وقاسى عليى
وبيك صادقنى
ولقى عنوانى
رذاذ الفرح الخلا الجيه
أريت صادقنى حنانك بدرى
ولو لاقيتك بدرى شويه

أحبك أحبك
أنا مجنونك
ساكن فينى هواك وبريدك
جوا القلب النبض يصونك

الوردة الحمراء
القيتها بجوار مقعدنا الخالي .. حزينا إذ تخلفتي !





كيف إنتقل الميلودي البسيط الوارد في ببكي و انوح
كيف إنتقل الليرك الاشد بساطة الوارد في جدي العزاز الجيدو قزاز

كيف تحولت غنائية الوطن الي ذاك الزخم الاوركسترالي الضاجي بإجتراحات الهارموني
و التكثيف الآلي الاوركسترالي و نهضة التوزيع كما في غنائية (ليلة السبتِ)

.. آه ، ثم أه .. صار غنانا مساءا" ورديا باكيا .. و نجوم مرتعشة عشية السبت
بالله كيف حدث كل ذلك .. نتلاقى يا كوستا في زوايا التاريخ .. لفة النيل في ابوحمد
.. مواعيدنا فيلي .. منبر الحِوار و النقاش لفهم هذا الموضوع الشائك ..

سلام يا حبايب
الليله وصلنا نقطة الصفر فى مشوار إنتظار طال فملأنا المسافه مداد...
اليوم ندوة الغناء الأوركسرالى...
اليوم دكتور طراوه سيفكك طلاسم غنانا الأوركسترالى...

يتم الفرح بلغياكم فى فيللى اليوم 04/04/2009 الساعه السابعه مساء
قاعة السكند مايل
الصور ما زى الشوفه

رجاء

كل البشوف البوست ده يرفعه عليكم الله...لأنه انا ما ح أكون فاضيه...

كل الود

إقبال