للأماكن ذاكرة ، ولنا الحنين : لوزان / سويسرا ...

ألي نصرالدين عوض , حزينا حتي مطلع الأمر

والي زوجته أميرة ,

ألي فيصل السناري ,

عبد الباقي ,

خالد أميري ,

ياسر عثمان

والي ساتي ...

وقبل ذلك ألي أصدقائي في كل المنافي .


.

الصباحات في لوزان شديدة البرودة , يدخل فيك البرد حتي ليلامس العظام .

عند ذلك تصطك الذكريات بالذكريات ولا ينقذك من وجع يخرق القلب غير صوت طارق ابو عبيدة يحترف العميري :

دي حتي الأغنيات قبلك

حروف أبياتا كانت ساي ...


.

والمكان الذي استوحشته عند حلولك فيه صار الآن اليفًا ويغري بالبقاء , يغريك المكان بالبقاء حين تقدح فيك ذاكرة الرحيل نحو البلاد

التي ابتلاك الله بها وطنًا , عائد أنت أذن للمشاوير العدمية كل صباح وكل مساء , للحرارة التي ما انفكت تشعل فيك التساؤلات التي ما

فارقتك يومًا عن جدوي البقاء , علي الأخص حين يشعل فيك أولئك الذين اختصروا الحقيقة في شعيرات خفيفة تنبت عند الفك الأسفل ، يشعلون

فيك احساس الدودة بالدجاجة , انه وطن لا يساوي كل هذا الحنين . لكن السودانيون هنا لا يملون من مشاهدة تلك القناة , يعرفون ما يحدث

داخل الوطن أكثر حتي من اولئك الذين لم يغادروه أطلاقًا , وتمامًا كمجوسيين مجتهدين كانوا يبقون جذوة الحنين متقدة فيهم علي الدوام ,

بالسلطات المغطاة بزيت السمسم, والعصيدة في امتزاج القراصة في مساءات رمضان الأوروبية , الفرق الوحيد هنا أن اميرة قطعت الدجاجة

مستعملة المقص وأنهم هنا يتناولون البليلة وبقية الأشياء مستعملين الملاعق والشوك .

كانت الشوكة في قلبي أنا , تنكأني تلك الشوكة حال رؤية العاشقين هنا يتبادلون القبلات في شوارع لا تشابه غير أنفسها من بهجة الخضرة

وغناء الزهور , تنكأك الشوكة فلا تملك أن تفعل غير أن تبدو مثل أهل روما .



.

وهذا الليل قارس !!
وحدي وصرير الريح علي نافذتي الخشبية
ولوزان وذاكرة الأماكن والحنين
والحال المائل !!
وحدي أتجرعك الآن يا صاحبي
واصل فما أجمل أن تقرأ منفرداً


سلمت صاحبي وكل عام والفأل فألك

خضر يا صديق الكتابة والوجع المقيم ...

تعرف لما باتذكر الزمن داك واعاين لي حالي هسه في البلد دي ملرات باحس اني كنت باحلم ...


ياخي نحن مساكين خلاص .


مودتي يا صديق .

في المحاضرة يتحدث ذلك الولد الصغير عن تجارب لقاح الأيدز ويحدثك الاخرون عن ال Toll Like Receptor ،

وغير ذلك مما لا يخطر في بال البلاد التي لا تسمع عنها غير دارفور .

تفتح سودانيزاونلاين – وشكرا لبكري أبو بكر – فتجد أولئك السودانيون ينزفون جراحات حنينهم علي فضاء السايبر , تكتب إحداهن عن

مشاهداتها في الخرطوم فيساعدها الآخرون بالبكاء , قالت مرة أن الكثيرين عاتبوها علي وضع صورتها الشخصية في البروفايل وأخبروها أن

ذلك لا يليق ببنات الناس ! أي ناس ؟ أي ناس ؟ ليت أولئك السودانيون يعلمون أن لا أحد في هذا العالم يأبه لهم وأنهم في الحقيقة خارج

اهتمامات الناس .

كيف يمكن لك أذن أن تعلم عن كل ذلك وأنت قابع هناك في البلاد التي خصصت رجالاً أو نساء يرابطون عند بوابات الجامعات يسألون الصبيات عن

مصدر الحليب في النهد وعن طول كم القميص .




.

الصباحات ندية في لوزان , أنه بلد جميل . لكن النظام هنا صمم لأناس غيرك , هذه الطرقات الأنيقة ليست لك , أخال أنها الآن تستنكر وقع

خطواتك عليها , والهواء , كما قال نزار عثمان : تتنفس هواء خلق لغيرك . أنك الآن هنا تقاسم الناس أشياءهم و لكنك لا تستطيع الدخول

الي ذكرياتهم وحكاياتهم . ستظل دائما مثل دمل علي وجه المكان . وأقول أنني أستطيع البقاء هنا للأبد , أنني الآن مغرم بهذا المكان ,

ولتذهب الي الجحيم – أو الي الخرطوم, فالخرطوم هي الجحيم – كل بكاءات الحنين ألي الوطن .

أنها المرة الأولي التي تصل فيها الي قناعة الرحيل عن وطن لا يقبل غير التقدم للوراء , وطن الفتاوي المستديمة عن حرمة كشف غطاء

الرأس وعن جواز نكاح ما ملكت أيمانكم , أنهم يهيئون الحياة بالطريقة التي تروق لهم , ومأساتك أنها لا تروق لك , أذن ما عليك سوي

مغادرة تلك البلاد , ما عليك سوي التنازل عن أحلام الطفولة بالسودان العظيم وفي القولد التقيت بالصديق ومنقو قل معي ... أنه وطن ليس

لنا , فلا أحد هنا يتحدث عن حكم الفقر ولا أحد هنا يتحدث عن حكمة الجوع .

.

-يتبع-

انه وطن ليس لنا , إنك الآن في قلب الوطن , تفتح صندوق بريدك الالكتروني فتحدثك تلك الصبية من كوبا عن كيف أنها ظلت تبكي كامل ذلك

المساء بعد سفركم , ثم أنها ترفق بالرسالة صورتها وزوجها الحبيب كما ذكرت في الرسالة , قالت أنها تفتقدكم جميعا وهي الآن في المانيا

لأسبوع ثم ألي هافانا الجميلة حيث العجوز فيديل كاسترو الذي رفضت هي – كارين- نتعك له بالدكتاتور مكررة لفظة نو بالانجليزية علي

طريقة أهل أميركا اللاتينية . أنه عالم جميل , ولكنك حين حاولت فتح الصورة أخبرك أحدهم بأن ذلك محظور عليك : أخي الكريم , أختي

الكريمة : هذا الموقع تم حجبه بواسطة .... الخ , حسنا , سوف تخبر كارين أن صورتها كانت جميلة وأن زوجها يطابق في بالك صور شخصيات

جورجي أمادو وغابرييل غارسيا ماركيز الوسيمة , ثم تخبر كل اولئك الاصدقاء الذين كونتهم في أيام لوزان الجميلة أنك الآن في عمق الوطن

وأنك الآن كما هم تماما وكما ذكروا جميعا في رسائلهم الالكترونية سعداء بالرجوع الي حضن الوطن , انهم الان يحدثونك عن كيف وجدوا

الوطن وعن خططهم للسنين القادمات , ولسوف لن تخبرهم انك الآن حزين ومستلب في الوطن , لن تخبرهم أنك لا يمكن لك التخطيط لبعد الغد في

بلاد لا تعرف ما سوف يحدث فيها صبيحة يوم الغد , فأنت أن نجوت من جند المرور ومن سائقي الحافلات فلا منجي من انقطاع الكهرباء ومن موظفي

لاستقبال ومن ضباط الجوازات ومن صباح قادم ليس لك حتي في مناماتك ان تتنبأ بما قد يحدث فيه كان ذلك من جهة الشرق أو جهة الغرب أو

جهة الجنوب أو حتي من جهة الشمال .

.

أنه وطن ليس لنا, ولسوف تنكأك الشوكة مرة مرة حين يلقاك ذلك الحنين المخادع والمخاتل في عيون الناس , الكلمات الطيبات الكاذبات ,

النساء المستهبلات المتسربلات بضعف الحال والشوق الكذوب وبما لا يساوي من القطيعة والونسات .

انه وطن من كذب , فالناس هنا مهووسون بالجنس وبالجنس وبالجنس , الرجال الخؤونون والصبيات اللواتي لم تنجح مقصات القابلات الصديئة

وأفكار آل فرعون في كسر شهوتهن البليدة , أنه جسد مترهل ككل الاشياء هنا .

أنك الآن في قلب الوطن ,و الخرطوم موحشة هذا المساء , الخرطوم موحشة كل مساء, ومافي الشوارع غير الرهق. تنبت عشبة اليأس في الكف

وبالقلب تنتشر الطحالب والحكايات والحنين الي حبيبات مؤجلات برسم القبيلة . ليس في القلب غير الخداع , ليس في النهد غير السرطان ,و

ليس في القلب غير العنصرية.

.

أنه وطن ليس لنا

!!!!


شكراً للشوف يا صاحبي

يا خضر

شوف الناس قنديل

زي ما قال عاطف خيري وغني مصطفي ....


ياخي شكرا ليك كتير ... لأسباب كتيرة أقلها انك في زمن البورد الاغبر دا بتجيني هنا دون سابق معرفة - الا بالكتابة دي والتزاماتا

الصعبة وحق الكلمة ,

واهو زي مانت شايف زول غيرك في الصالون بتاعي دا ما جا

لكن ليك علي يا صاحب اصلو ما افتح لي بوست بعنوان : باركوا لي شبطي الجديد زي ما قلت ليك بهناك ...


يازول في مقولة أظنها للأمام علي - لأنها بتشبهو شديد : أعرف الحق تعرف أهله .

شفت كيف ؟





مودتي التي تعلم .



.

عارف يا الوليد

قريت زمان في رواية ما عارف منيف ولا ماركيز ما متذكر
لكن متذكر الكلام كويس !! بقول :

ليس المهم أن تقرأ بل المهم أن تكتب
الكتابة هي مراقتنا الوحيدة ياصاحب
دخلت لوزان ! عفواً دخلتني لوزان
ياصاحبي وأنا في قمة مزاجي السيئ
بفعل تصاريف أنت أعلم بها!!
نسوي شنو ياخ ! نسوي شنو
أها أنا مستمتع للغاية كوني مشاركك الوحيد
هنا !! وياخينا أكتب بس
ومرق الكلام المغتغت دة وصدقني هناك
من يقرأ !! هناك من يقرأ يا وليد
ياخ إنت زول حلو في زمن ما حلو كلو كلو!


سلمت ياصاح

الوليد

خضر

جيت قبل بوست مباركة الشبط يمكن تغير رايك وما تشتريه

متابعين جنس الكلام ده اللى من جوه فواصل يا صاحب

بس يا وليد قد يكون الحنين ليس مخادعاوان كان هذا ما رايته بنفسك او احسسته,ولكن العدوى قد اصابتهم جميعا

فاختلط الامر فضعف الحال ديدنهم والتمثيل حرفتهم فوالله مغلوبون على امرهم انى اراهم هكذا .

ولكن يا وليد الا ترى ان العيب فينا ومنا

ولك انت يا خضر هون عليك فالكثرة غلبت الشجاعة

ودمتم

العزيز حامد

ياخي سعيد بوجودك هنا ...


وياخي كلامك دا فيهو حنين شديد واحساس بالآخ لدرجة عالية , ودي بالمناسبة حاجة بتكسرني شديد

عليك الله شوف البيت بتاع درويش دا :

وديك لا ينام

لأن في الدنيا دجاجات ...

Quote: فاختلط الامر فضعف الحال ديدنهم والتمثيل حرفتهم فوالله مغلوبون على امرهم انى اراهم هكذا

والله ياحامد - وما طالبني حليفة - دا نفس احساسي بيهم , لكن الواحد بيزعل شديد لما يشوف ناسنا المساكين ديل مهمومين بناس تانيين

وناسين مشاكلهم الذاتية ،

ياخي دا استلاب لدرجة غير محتملة ...

مودتي يا صديق ...



.

يا خضر

جاييك بمزاج يا صديق ...

دم بخير !

- الي حين عودة -

العزيز خضر

أها يازول تعرف المشكلة لمن تبقي الكتابة ذاتا واحدة من الازمات , في الحالة دي بيلازمك التساؤل عن جدوي الكتابة ذاتا !

يعني انت قاعد تكتب وتكتب وتحلم ... لكن في النهاية قلمك دا ما بيغير اي حاجة في الوجود ,

بالذات في عهد الصورة التلفزيونية دا !

كنت دايما باستغرب من محاولاتنا الحثيثة للانتشار عربيا , اعني الانتشار الثقافي : ياخي هو السودان دا براه فيهو كم زول ؟

30 لي 40 مليون ؟ طيب ياخي لو قدرنا نوزع كتاب والا مجلة والا حتي شريط كاسيت علي مليون واحد من الناس ديل دا ما براهو انجاز كبير !

النقطة الاساسية في المسألة دي انت داير توصل شنو للناس ديل ، في بلد تاريخا بيبدا ويتغير مع كل حكومة ،

للأسف ذائقة الناس نفسها قاعد يتم تغييرا ببظء لصالح تيارات الانغلاق والخوف من الآخر ودي مسألة عامة او بتعم حاليا المنطقة النحن

منتمين ليها اقلو جغرافيا .

يا حبيب الكتابة في الظروف دي ذاتا صعبة خلاص ، والمفارقة هنا انها بالرغم من كدا واحدة من وسائل الخلاص - قصدي طبعا الكتابة

الكتابة .


دمت بخير وعشان الناس الزيك بنواصل !

وحدك ! كأم رهو ؟ وحدك تمضغ عشبة القهر وتشرب كأس هلاكك , فليس من أحد هنا ليشرح للنايات صوت بكاها ,و ليس من أحد ليفسر صوت الحمام

لانثي الحمام , وان يكن : فالماقي ماقيك وطعم دمعك لم يجربه سواك .

وحيدا تكابد طعم هذا العذاب , الهي , ان قلبي لا يحتمل .

الخرطوم عاهرة تحت نقاب , ومشاريع اعادة التوطين ليس تشمل المنهزمين من العشق ولا تمنح القنصليات حق اللجوء القلبي , أيها الاصدقاء

انني احد المنهزمين علي كل الاصعدة , من يبيعني قلبا بغير ندوب , من يبيعني وطنا بديلا وأحلاماً بديلة ....

متوحدا , كشجرة نيم قرب النيل في اماكن لم تفكر فيها الحكومات بعد ولا المستثمرون الاجانب , وحزينا حزنا يكفي كل العالم لو وزع ,

ومضطرا خوف الشفقة في عيون الاخرين لاظهار الصمود واللامبالاة , كان ذلك حالي في هذه الساعة من هزيع الليل الاخير , وتماما كما قالت

تلك الاغنية :

ما زلنا في أول ساعات الليل

لكنا في منتصف الويل

حسب التوقيت المأساوي

للمدن الصماء البكماء ....

وتماما كما قال مظفر النواب :

اواصل سكري بالكون

و يربكني ان اقوي الخمور الردئ

و اغسل حنجرتي بالنبيذ

ففي القلب حزن جبان

و حزن جرئ ...




ولا حول ولا قوة الا بالله .
- تمت -

للشاعر محمد لالواثق :



بدلت لندن بامدرمان تسكنها ؟

بدلت زهر الربي بالسدر والضال ؟


- يا لبؤس حالتنا .

العزيز الوليد
لك العتبى حتى ترضى
ياخى ماتتوجع والله امسكك مصران عصبى زى الجانا , يخليك لو اكلت حلاوة قطن بطنك توجعك
هذا هو حال بلادنا لانها منذ استقلالها لم تؤسس بشكل صحيح , كنا فى يوما سحيق نحلم بوطن متقدم . وطن حدادى مدادى وطن خير ديمقراطى , الا ان الوطن يادكتور مصاب بكلزار احشائى يفضى الى تضخم فى الطوحال والاقتصاد , وطن قائم على الجهوية والقبلية والتعصب القبلى , انا شايقى انت جعلى ساى , انا دينكاوى انت باريا ساى ,متلازمات لن تفضى الى حل فى يوما من الايام تسير فى شكل متوازى لن تلتقى ابدا .
انت عارف يادكتور رجعت لى وجع المصران تانى
سانسحب
وداعا

ياسر حسن المبارك

يا زول والله والله مشتاقين ، ياخي حاول اظهر ... معقول ياخي نكون في نفس المدينة واكتر من 3 سنين ما نشوفك ؟

بالله شفت حالتنا بقت كيف ؟

بخصوص المصران العصبي تعال اتفشي معاي هنا :


أستقلال السودان : نصف قرن من الخيبة !!!

*

اصدقائي بلوزان الجميلة

شكرا لكم .....

الوليد


جاييك في كلامك العضم دة
خلي النقاش شوية ومتعنا بي لوزان


ياخ شحتفتنا
والنقاش والمنضمة جاينها ياصاحب

العزيزة ايمان

شكري الجزيل لمرورك من هنا ...

ان كان ثمة من يقرأ هذا الكلام في لوزان الجميلة ، فأود منه أن يوصل تحاياي الي برهان : سائق التاكسي الاريتري الذي كان لا يزال يحن

لشوارع " نمرا 3 ".



ستجدونه هناك عند محطة القطارات .



.

احلى حاجة لما تقعد تقرا بس ...ماتكتب ...
لما تكتب بتكون فى مهب اشتعال الحرف
ياامتد بيك لاقصى الجنوح
يااما كمان وداك لادنى الخضوع ...
انت تقوم الان بارتكاب معصية الكتابة
وماعلى سوى القراءة ...والقراءة فقط
للذاكرة تلك التى ابقيناها زمنا بعيداااا
بعيدا جدا
عن متناول ايادى الحلم.....
لوزان نستحثها
تستحث صمتها لتخرج لك من عباءة باكر
ياصديق الحرف اتابع كتاباتك وانت تتجه بها
كقطار منتصف الليل نحو محطة تبدو كاخر المحطات
للمنطلق شرقا وكبدايات الترحال النازفة للمنطلق غربا
فبالله عليك لاتبطىء .....


اكتب
اكتبنا
خبىء ارتماءاتنا الزائفة نحو المغيب

Quote: اصدقائي بلوزان الجميلة شكرا لكم .....

مرحب بيك فى الزيارة القادمة,

وأصحابك ديل واللة انا كلمتهم بى البوست دا

و خاصة خالد اميرى رجع سأل نصر الدين حتى اتذكرك

انا اسمى ما مكتوب. لو جيت المرة الجاية أى واحد بجيبك البيت. وانا ماسـاكن بعيد من عبد الباقى,

وخالد أميرى

الاخ الكريم Adam Omer

أسعدتني بدخولك هنا

ياخي تحياتي الحارة لكل الجماعة هناك ...

وكنت اتمني لو اتلاقينا ...


أها يازول انا لوزان دي لو لقيت طريقة اقعد فيها تاني ما برجع البلد دي !

Quote: لو جيت المرة الجاية أى واحد بجيبك البيت

ياخي بلدكم الغالية دي نحن الا نجيها تبع ال WHO أو ال OMS زي ما بقولوا الجماعة هناك .


مودتي .

العزيزة ناهد

الكتابة قدرنا لو تسمح لنا هذه البلاد ...

ياخي قبل كم يوم قريت هنا في سودانيزاونلاين انو طلال عفيفي ح يسيب الخرطوم ...

قال ما قادر يكتب ولا قادر يصور : ياخي دي حالة بالله ؟ حتي طموحانتا الصغيرة الزي دي بقينا ما قادرين عليها ...

أتابع كتاباتك دائما بكثير من المتعة ...



مودتي .

الاماكن والشوق..
الذاكرة والرغبة فى النسيان

و الحنين اللعنة الذى يلاحقنا كظلنا..

شكرا ياوليد,,, قريتك هنا وهناك

فاقرانى هنا..

Quote: اشواق البن والأمكنة الى صديقتى النمساوية روز مارى سيدكوبار.... أمكنة تشتهى العودة اليها وتشتاق لفانوس {صغير} كان شاهدا على رعشة لهيبه فى قرية تسكننى وتخدر احزانى فتنام على شجرة ليمون مابقى غير جزعها، كانت شجرة الليمون نديانة وصفقها {بيدرش } احزان الشفع اللذين تعودوا النوم من غير حليب، شجرة تحكينى احلامهم وانين امهاتهم.... امكنة مثل غرفنا {الجالوصية} ، حجرة جدتى التى ربت الامل فى قلبى منذ كان الصباح يافعا حجرة ماعادت موجودة الآن وماعادت جدتى تشدو وتهدهد جراحاتى. كنت انام فى حضنها، اشم رائحة {كركار} شعرها ارقب انفاسها لاطمئن بانها فى الحياة باقية. انتباهاتى الأولى حددت مشاوير الشقى.. القلق والشوق، كبرت وكبرت اسئلة الشجن فى قلبى الصغير ومشطت دروب الحياة بضفائر اسئلتى التى ظلت ظمأى ولم ترويها الاجابات الشحيحة. تلك البدايات والطفولة الغضة بالامل النابته فى صفحة عمرى شجرة رغم ما تساقط من اوراقها الا إنها بقيت تقينى صهد الذات وتمنحنى ظلها وانا أغرس بزورى على سطح الجبل وانحت صخره، الماء تلوح والعشب أخضر... هكذا كان حلم جوعى الحياة الانتظار طويلا على بوابة لن ابنيها الى حين يلامس قلبى الطمى.

-------------
من مقدمة {انثى الانهار} الجزء الاول والمتوقع صدورها هذا العام انشاءالله

بوست اضغته للمفضله عندى
شكرا على صناعة عافية الكلمة


اما طلال

احتار.... بين دوران البحر
وطمأنينة نفسه ...
ايهما اقرب الى صوته

تبوأ بعده
منصب النزوع المكتفى بالهروب



كم من طلال ....


اشراقة كيفك ...مشتاقين

د. وليد:

قرأت كلماتك وأصابتني في مقتل..

حين تغيب عن الوطن.. تظل روحك متعلقه بقدسيته الجميله..
تبحث عن رائحته العبقه في كل الأشياء..

وحين تعود ومعك الأشواق والحنين..

تتأمل في الأماكن والنفوس
تجد أن الأشياء كلها أدمنت عشق الثوابت..

لا شئ تغير سوي روحك التي أصبحت تائهه ضاله..
نفس السكون والاستسلام يخيم علي كل الأشياء...
وبداخلك بركان ورياح عاصفه تود التغيير..

تصبح غريبا في وطنك.. وغريبا خارجه..
الغربه قاسيه.. وكذلك البقاء..

أحيانا اشعر يقينا أن الحل للسلام النفسي الذي نبحث عنه
هو أن نرضي بأقدارنا وواقعنا
نتوقف عن عقد المقارنات والشعور بالاحباط..

كم عاما سنحتاج للتغيير ان بدأنا الان (ولا أري أننا بادئون)..
ومن يدري هل سيمهلنا الزمان لنري أنفسنا علي غير ما نحن عليه من حال..

اذا فلنبحث عن السر الخفي والوصفه السحريه التي جعلت الغالبيه من أهلنا..
يشعرون بالالفه والتناغم مع المعطيات.

ولنكف عن التحسر..


تحياتي,,,

************

ياأماني

القصة كلها وهم في وهم : نحن قوم لا بلاد لنا الا في الحنين :

Quote: حين تغيب عن الوطن.. تظل روحك متعلقه بقدسيته الجميله.. تبحث عن رائحته العبقه في كل الأشياء..

محض حنين , لكن الحقيقة انو وهم كبير , للأسف !


- بارجع ليك تاني -

أماني الامين :

Quote: اذا فلنبحث عن السر الخفي والوصفه السحريه التي جعلت الغالبيه من أهلنا.. يشعرون بالالفه والتناغم مع المعطيات.

ليس ثمة وصفة سحرية , ليس ثمة غير الخمول والقدرية البليدة والتفاسير الغبية للنصوص !

ياناهد

Quote: احتار.... بين دوران البحر وطمأنينة نفسه ... ايهما اقرب الى صوته تبوأ بعده منصب النزوع المكتفى بالهروب

المشكلة انو دا كلو ما بيحلنا ,

ياخي بقينا ما عارفين البحلنا شنو ذاتو ...


مودتي .

العزيزة الصديقة اشراقة

شفت الزمن بقي كيف ؟ شفت طموحاتنا اتقلصت لياتو درجة ؟

Quote: حجرة ماعادت موجودة الآن وماعادت جدتى تشدو وتهدهد جراحاتى. كنت انام فى حضنها، اشم رائحة {كركار} شعرها ارقب انفاسها لاطمئن بانها فى الحياة باقية. انتباهاتى الأولى حددت مشاوير الشقى.. القلق والشوق، كبرت وكبرت اسئلة الشجن فى قلبى الصغير ومشطت دروب الحياة بضفائر اسئلتى التى ظلت ظمأى ولم ترويها الاجابات الشحيحة

عارفة المشكلة وين ؟

المشكلة انو المقولة بتاعت : "انك لا تعبر النهر ملرتين " بتنطبق علينا تماما , يعني حتي لو رجع الزمن " نحن بقينا ما نحن "!



- في انتظار أنثي الأنهار يا صديقة -

Quote: المشكلة انو دا كلو ما بيحلنا , ياخي بقينا ما عارفين البحلنا شنو ذاتو ...

اذن هو السعى فى فلك المستحيل
عندما تطيش السهام
وتخيب رمايتنا
عندئذ


صدقنى ...لن اسالك المحاولة مرة اخرى ...
كى لااذيد التورم فى حاجبيك

يا ناهد

غايتو زي ما قال خضر الله في !



مودتي ...

Quote: غايتو زي ما قال خضر الله في !

خضر تارة يأتينا ممتطيا اعصار جنونه ...,نحشد وقتها
كل كلماتنا وتفاؤلنا ونجلس فى حضرة من نهوى ونهوى ونهوى
لا ننتظر منه اذنا بالدخول....
وتارة اخرى ......ياتينا عابرا للقوانين المسيجة
ولانسمع طرقاته كالعادة على الابواب

خضر احب كتابته اجلس اليه كما اجلس الان اليك
وانت المفعم بجميل الكلم
الذى يصطرع دواخلى حقيقة بحزن منديلى الدموع
لا عليك
فنحن هكذا دوما لانجد نصحا....وان وجدناه نعبث به ...


فقط علينا ان نزعج جيراننا بصراخنا
فجيراننا هم






نحن .....

لمزيد من الحسرة سأحاول انزال بعض الصور ....

علي بريدي الالكتروني [email protected] وصلتني الرسالة التالية من الاخ الكريم عمر الذي لم تكن لي به سابق معرفة ,

يالبؤسنا : ها قد صار يوحدنا الأسي !!!!!

Quote: دكتور الوليد سلامات وكيفنك ياخي مالك مقوم علي العصبي من الصباح ولوزان شن جابا للبلد التعيسه دي أه واوه وكل كل كلمه قالتها العرب للتوجع تصور كيف يكون الحال لو ما كنت سوداني , تاني في كلام يا دكتور بعد كلام اسماعيل ود حد الزين دا وبعد دا نحن احسن ناس ,اكثرالناس عروبه , ونحن البنينا الخليخ وخططناه, ونحن اطهر ناس واشجع ناس ( ناس حاره), ووكت الكوع يحر نحمي العروض ونصينها. . . . . يا اخوي نحن اتربينا بالكذب والخداع والوهم وبقت الحاجات دي جاريه في دمنا وانا عندي كلام كتير في تركيبه شخصيتنا السودانيه وانشاء الله انت قاعد في البلد دي سلامات ولي قدام Omer Musa Abbas Construction Engineer

Quote: وانا عندي كلام كتير في تركيبه شخصيتنا السودانيه

اهلا بالاخ عمر موسى
فى انتظارك لمناولة الدكتور وليد عن تركيبتنا
السودانية ....
فى الانتظار




عفوا وليد للتطفل .....
لكن خلى شباكك فاتح
الشىء عمر جايبه

سلا م يا وليد وللاصدقاء الاروع هنا

نقاش خلاق الذى يدور هنا .. يتعدى كثيرا ً
المكان .. الذاكره
والحنين
ينفتح على المقارنه بين واقع وواقع اّخر
يحاول ايضاً ملامسة تركيبتنا السودانيه
رفضنا للسالب فيهااو الاضطرار لمعايشته على مضض
وهذا على سبيل الحصر فقط
وقد يمضى الى اكثر واعمق
لذا هو خلاق .. حتى فى حيرته ..
..
الناس ماعارفه تعمل شنو او البحصل بكره وبالتالى الفرد
وهذا المحيط الذى يسير معصوب العينين !!
فلا يمكنك الى حد كبير ان تكون منظما فى واقع غير ..!
..
لذا جذبنى ما يدور هنا
ولقد حضرنى هذا الجذء .. قصيده اسمها..
تعب نهايات العام
..

الزول فى كل المكان
واحد
يظل فى حتتُه ذاتها
او تتعدد
محلا ت ُ
والفرح هو المُفرده
النجحت فى الافلا ت
من الايد
مطاريد الضحكه
والنغمه
مواعيد الحنين
فرقت
براحات الصدف
أحلى
..

خالص ودى وساكون قريباًَ حتى لايفوتنى
مثمر الكلا م

.

Quote: عفوا وليد للتطفل .....

يا ناهد ...

وجودكم هنا ومحبتكم عصمتي .....

خطاب العزيز ...

Quote: الناس ماعارفه تعمل شنو او البحصل بكره وبالتالى الفرد وهذا المحيط الذى يسير معصوب العينين !! فلا يمكنك الى حد كبير ان تكون منظما فى واقع غير ..! ..

والله دا بالضبط الحاصل في البلد دي ... ياخي تمشي المكتبة تلقي الجرايد كلها نفس العنوان بصيغ مختلفة , كلام الناس ذاتو ...

غايتو !!!!


ياخي شكرا للقصيدة .


مودتي ...

متابعة وإندهاش لكل ما كتب هنا من حرف وتصوير جميلين

اكتب يا الوليد فقراءتنا لما تكتب تساعد في شفائنا

سلامات يا انعام ,

في بيت شعر قديم كدا ما متذكر الشاعر بتاعو منو بقول ليك :

أن البكاء هو الشفاء

لما بين الجوانح

من جوي .....


سنواصل الكتابة حتي ضحي الغد .....

عاليا الي حين عودة

.


.

.

لوزان
لوزان يا الوليد شكلك نسيت !

يا خضر

هو دي حاجة بتتنسي ؟




الله في يا صاحب !

لكأنه كان حلما ....

الاخ الوليد
تحياتي
فعلا لوزان بلد جميلة وطبعتها خلابة وناسها من السودانيين متميزين بعلاقاتهم الطيبة
امس قايلت معظمهم ناس لوزان في زواج صديقنا التشادي محمد عبد الكريم وزوجته تشادية والعرس والحفلةسودانيه 100% الفنان سوداني الحضور أكثره سوداني
سأكتب عنها لاحقا بالصور ... شئ عجيب دولتين وشعب واحد

انا اسكن في مدينه بيان لو جيت سويسرا مرة اخري اغشاها فيها ناس حلوين زي ناس لوزان
مع ودي

الاخ العزيز بابكر


تحياتي

اول مرة اطلع بره السودان واتمني ما ارجع كانت في لوزان دي !

Quote: انا اسكن في مدينه بيان لو جيت سويسرا مرة اخري اغشاها فيها ناس حلوين زي ناس لوزان

الله يرجعنا تاني يا بابكر ... الله كريم علي المساكين والسودانيين !

واجعني في البحر السكات

وسكتني في الوجع البحر ...

- عاطف خيري -


صحي يا عاطف ... صحي !

.

من شعر محمد الواثق :

بدلت لندن بامدرمان تسكنها ؟

بدلت زهر الربي بالسدر والضال ؟






يالل ....

.

وليد
سلامات

Quote: اول مرة اطلع بره السودان واتمني ما ارجع كانت في لوزان دي

!
والجابك شنو ياوليد؟
والله انا الحق امرق الا اجي في صندوق
ياخي مالي ومال عساكر الحركه والحافلات والحقد والحسدالذي طغى على كل شي

وزيد وجعنا

تحياتي

غايتو تقول شنو يا عمر


عوارة بس !!!!!!!!!!!

Quote: وزيد وجعنا

اكتر من كدا يا عمر ؟



ربك كريم !

الاخ وليد كيفينك.


أزيد شوقك شوية!


فى شهر 7 القادم هناك فيست فال الجاز العالمى فى مدينة (M0ntreux )

وفى الشهر هناك فيست فال الريقى, زيقى مارلى جيمى كىليف الشاب خالد ومجموعة من مشاهير الريقى.

وهذا فى مدينة (nyon ) اضافة الى احتفالات مدينة جنيف فى شهر 8 وهذا العام حيكون الاحتفال.

بدى شوية عشان عرب الخليج نسبة لى شهر رمضان هذا العام يصادف نص 8

Quote: فى شهر 7 القادم هناك فيست فال الجاز العالمى فى مدينة (M0ntreux ) وفى الشهر هناك فيست فال الريقى, زيقى مارلى جيمى كىليف الشاب خالد ومجموعة من مشاهير الريقى. وهذا فى مدينة (nyon ) اضافة الى احتفالات مدينة جنيف فى شهر 8 وهذا العام حيكون الاحتفال. بدى شوية عشان عرب الخليج نسبة لى شهر رمضان هذا العام يصادف نص 8

يا ادم عمر ،

نحن في شهر 7 القادم عندنا مطرة خفيفة كده ح تقفل الشوارع وتعطل المواصلات وتجوط البلد ،

بعدو عندنا الكهربا ح تقطع عشان الطمي والمويه ح تتعكر وشنو كده ما عارف ،

بعد شوية عرب الخليج ح يجو يشتروا البلد دي من الوالي الجديد ويمنعوا الغنا ذاتو !

.

.

للأماكن ذاكرة ،

وكذلك للروائح !

اكاد اشم رائحة لوزان .