مرسلنى ليكم بكرى سيد البيت...لموضوع هام وعاجل...ممكن تتفضلوا بالدخول؟؟؟

ولانو كريم...وفاضل...

ما حب يلح عليكم...

فرسلنى ليكم...

داير المهرجان ينجح...شهر سبعة نحن نكون فى السودان...ونقدم عمل مميز... ما عابر

نخت بصمة...

بصمة جهود...ووكت وشوق وبذل عمرناه سوا هنا ..بمساهماتنا وشيل هموم وطنا وارتباطنا الروحى ببعض...وبانسان السودان...الجميل..

داير اللجان تشتغل...بطريقة مسئولة...وجادة

والتبرعات تكون سخية...

يعنى باختصار ما دايرين الآبرى يعوسوهو يوم خك الرماد...ولا الخبيز يوم الوقفة

داير تخطيط...من بدرى...ووضع اعتيارات...لتذليل كل المشاكل من بدرى...قبل ما تعوق..انجازنا


وكما قال الشاعر: سألتها "الوصلة" قالت

ياها دى:

فتح باب التبرعات لدعم مهرجان سودانيز اونلاين


الغريبة البيت الاصلى بقول:


سالتها الوصل قالت لاتغر بنا
من رام منا وصالا مات بالكمد

لكن داك طبعا بيت ما اصلى...بس الموضوع جاد

لكم الشكر

ولبكرى سيد البيت الشكر على "وش القباحة" الادانى اشيلو...

ما مشكلة...المهم الشغل يمشى

بكم الحب وكل الورود

Quote: "وش القباحة" الادانى اشيلو...

يا ربي ليه!!

Quote: الشكر على "وش القباحة"

كدة عشان نوضح انو تشريف...


مع انه السؤال..كان....للرب فى العلياء

نحن ناس تبرع ساكت قولي لينا القروش بيودوها لي منو..

الباشمهندس بكري والاخت تماضر

لكما التجلة والتحية

سبق ان تم طرح عدة بوستات من الاخ الباشمهندس بكري ويبدو انو شفقان
علي نجاح البرنامج وهو حرص نهنيه ونشجعه عليه...لا زالت هناك المزيد من الامور لم تتبلور بعد... ولما نصل الي موضوع التبرعات ارجو ان يروج له كتذاكر... قيمة التذكرة خلينا نقول 300 دولار كحد ادني ونحصر الماشين والمشترين.. وان نقصت باب التبرعات يفتح.. وما اقصده هو ان يكون الامر اجباري مش يا محسنين... وكل من يود ان يشارك او يتبرع يجب ان يكون همه نجاح البرنامج... انا هنا وحيد وليس معي رابطة او بورداب وما يتفق الناس علي اقراره لن نقصر منه

وزي ما بقولو اهلنا يا بكري قرر ونحن شرحو... بس كمان ما تقوم تمغاها لينا الف دولار.. يا ها الطفشت عليك الزبائن انتو قاعدين لينا محل طباعة ابصلعة .. ونحن هنا... عيييييييك رايحة,,, دي دايرين يشلقوها وداك عندو غسيل
وفلان ماشي العمرة... وواحد عايز يعرس.. ورسل لي ساعة سيكو.. لاقننا قريبين..


لكن لن نقصر منك كان بي تبرعات كان بي شغل هناك... نحن ناس ضراع ساااكت نوع جيبو الكراسي ورصو الكراسي والناس ديك ما اتعشو... يا كافي البلا لا بنعرف لينا مسعول جمارك يخفض ولا ضابط يأشر ولا فنان يقح

الا اكان هسسسسسسسسسع تية الموصلي وحمزة سليمان وانور وهي دي زاتها معرفة سلوك ساكت.. ليقيتك لي الواحد تقولو انا عضو معاكم في سودانيز اونلاين يقول ليك ايواااااااااا بلاي وبس..

قرر يا بكري وما تتردد والما بدفع اطردو

اي زول هنا يحل غنمو بي طريقتو....

اوع تكون الزول البخجل داااك... انت الناس دي تمدد في الحوش ده بي
لحافاتا ماكلة شاربة طربانة لا متين....

Otherwise

لموضوع بلحق علاج عبد الرحمن عبدالله لي ستة شهور مستني شرايط تنطبع
وتصلني اوزعها وحددت قيمة الشريط... لي يومك ده ما وصلتني بعد ان هيأت الناس... وهسع اعتبروني كضاب.. والمشروع كان زنقة قروش بسبب ولادة بتي... يعني نصاب اها شفت الموضوع وصل وين...

بلاي لامن خليتو...

عزيزى نزار حسين

شكرا على مساهمتك المفيدة ...خفيفة الظل


رايك شنو يا بكرى...نقول 300$

اجبارى لكل مشارك؟؟؟ والتبرعات...على كيفهم؟؟؟

وما راى البقية...

لو فيها لم قروش...الله معاكم ...حألمها...ولا تفكروا انسى الموضوع...بس نتفق الاول

اسمع صدى؟؟؟

الاستاذة تماضر ..

رغم اني غير ملم بالموضوع .. من ناحية كافية ..
لكن عندي مداخلة بسيطة ..
وهي اقتراح 300 دولار .. في بند التبرعات ..
اتمني ان يكون تصنيف معين .. لتحديد فئات التبرع ..
فمبلغ 300 دولار .. مشكلة لمن هم بالسودان ..
وعناء شاق بالنسبة للطلبة ..
واحسبهم شريحة مقدر في البورد ..
وهناك ايضا من يستطيع المساهمة باكثر من ذلك ..
وجود دراسة جدوي .. وحسابات منطقية لمتوسط المبلغ ..
تريح جميع الافراد .. البداية ببرنامج ..
ونحنا السودانيين .. ناس علاقات .. فهناك امور تحل بطريقة شخصية ..
ولا يكون ذلك الا بتحديد البرنامج ..
ووضع ميزانية معينة .. وتقسيم الادوار ..
هناك رؤية لبورداب جدة .. سيطرحها الاستاذ هشام شيخ الدين ..
اتمني ان تجد القبول ..


معليش علي الازعاج ..

تماضر والجمع الكريم
لكم التحية
أرى والرأي الفصل لما تراه الأغلبية ، أن تقوم اللجنة المالية بوضع تقديرات معقولة لحجم المصروفات ، وبالتالي توقعاتها للتبرعات المطلوبة ن يعني يا ناس الاقتصاد والمحاسبة وإدارة الأعمال ، اللجنة المالية مطالبة بإعداد ميزانية تقديرية ، تعرض بنود الصرف فيها خلال المنبر وتقترح على ضوئها الإيرادات ( التبرعات ) إذا كانت ستطرح على الأفراد أو على جهات الإقامة ، وأنا أفضل جهة الإقامة لأن الأفراد ليسوا متساويين في إمكانياتهم ، ولكن أن تتم إحصاء المنتمين للسعودية مثلا ونناقش معهم نصيبهم وذلك بعد منحهم الفرصة لجمع الهضوية وحصر إمكانية كل مشارك ، وبهذا تكون لدينا عدة مجموعات من عدة مناطق أو دول وبالنسبة للذين يعيشون منفردين في دول المهجر يمكنهم أن يقدموا مساهماتهم مباشرة وأن يخطروا اللجنة المالية بها لتضعها في الاعتبار ، ويمكننا بالتالي حصر إمكانياتنا
وأعتقد أن هذا العمل يجب أن تكلف به اللجنة المالية وهو ليس عمل بكري ولا عمل تماضر ، وأعتقد أن اللجنة المالية يمكن أن تقدم لنا ميزانية تقديرية معقولة خلال شهرين ، وطبعا ستضع اللجنة في حساباتها بنود مثل
مصروفات غير منظورة
احتياطي
إيرادات غير منظورة
من جانبي وجهت دعوة لبورداب الرياض للاجتماع لمناقشة الموضوع ويمكن للجنة المالية التنسيق مع بورداب الرياض بما تراه من وسائل .
وتلتزم اللجنة المالية بأن تقدم تقارير وتوجيهات وإعلانات وقرارت عبر البورد وعليها أن تبدأ فورا .
وأفضل أن تكون اللجنة المالية كلها من المقيمين في أمريكا لقربهم من بكري ، ويمكن أن يكون لها ممثلين ( جباة ) في كل المناطق .
تاني يمكن أجيكم

حميدة وود قاسم

منتهى الموضوعية...خصوصا حكاية التبرع حسب البلد، ومستوى دخل الافراد


طيب محاسبين ديل وين...انا محاسبة لكن بفتكر اته ناس السودان هم الاعرف بموضوع التكاليف والتقديرات... ويكون المحاسب مفين من الهيئة المنظمة...للاحتفالات...

المهم يا بكرى ولجان الدزل المختافة ...شيلوا الكلام دة وبلوروه ورجعوا لى الكورة فى الملعب دة...عشان اواصل " اللعب" بالالفاظ...هاهاها

زشكرا "كثيفا" للمتداخلين

تماضر سلام .. وربنا ينجحك فى مهمتك دى ويكتب للمهرجان النجاح التام .. بس بصراحة مسألة اقتراح الإشتراك المالى دى أظن كترتيها شديد فى رايى .. وده حيؤدى لتراخى كتيرين أكتر من حماسهم .. على كل حال البتبقوا عليهو انا معاكم فيهو .

مارد

دة ما رقم نهائى...دة اول رقم اقترحوه للمزاد العلنى..

وحتشوف يفتح الله ويستر الله بكرة بنزل لمن يبقى 3$

ما تشيل هم...

المهم المبادى

الأخت تماضر ،، و الكلام موصول لبكري
لكما التحايا
أنا أعتقد أن كل مدينة أو منطقة تكون لجنتها و من ثم تحدد حجم المساهمة و ترسل لحساب واحد في الخرطوم
نحن في الرياض لجنتنا جاهزة و حنجتمع يوم الخميس القادم بحول الله و سنقرر التبرعات و كيفية الجباية
وفقكم الله و متفاءلون بالنجاح
لي قدام

ابوجهينة...اتمنى لكم التوفيق...وارجو ان توافينا بموجز توصياتكم وانجازات اجتماعكم فى هذا البوست..

واوافق...على وجهة نظرك فىما يتعلق بالمساهمة المالية... واضح انها تتفق مع ما يراه الاخرون.


وخشمك فيه اللبن

الاقتراح كان في الاول انه الاشتراك للعضو في حدود 50 دولار
وعموما نحن تحت الخدمة
ولاهمية الامر
الرجاء من الجميع التوقيع هنا
ك المودة كلها يا استاذة
ولبكري قلائد العرفان والامتنان

بس قولو لينا هيا

وورونا الماسك الكشف منو

لكين أنا بدفع بعد ما أجى من السودان

أوعى زول يقول لى جيب هسه

ولو فى زول بضمنى يكون كويس

أرسل لحساب التبرع:

150 دولار(أمريكا وكندا واليابان وأستراليا والصين وروسيا وأفريقيا عدا السودان وما جاورها) أو
180 يورو (أوروبا) أو
600 ريال سعودى (للسعودية وما جاورها) أو
30,000 دينار (السودان)

يسمح للعضو ارسال التبرع على ثلاثة دفعات متساوية لفترة الستة أشهر القادمة (ومن غشنا ليس منا)

كده المسألة بكون فيها رحمة ونظرة الى ميسرة
(يعنى 50% دسكاونت) عشان شهر الخير والرحمة

قالت احداهن:

ماهو الفافنوس ماهو الغليد البوص
ود المك عريس خيلن بجن عركوس
أحى (عليه) سيفو البحد الروس

مادايرالك الميتة ام ردمادن شح
دايراك يوم (لوقا) بدميكا تتوشح
الميت مسولب والعجاج يكتح
أحى (عليه) سيفو البسوى التح

ياتماضر الشغلة دايرالا دلوكه دلوكه

السودانيين ديل دايرين ليهم شوية حماسة كدة وسريع سريع (خلص أمورك معاهم) عند النشوة
looooooooooool

ياخوانا ده اقتراح بتاع زول محنك وخبر الدنيا كثيرا ، بس عايزين التزام والتزام من الجميع ويا بكرى ضع رقم الحساب هنا وخلونا نتوكل على الله والعائد بكون محترم يعمل مهرجان مشرف لأمريكا فى السودان مش لسودانيز اون لاين وبس

وعلى بركة الله
وببركة هذه الليالى الطيبة

عمكم يازول

الحلقوم جاهز وفورا

طيب انا بقترح يا اخوان انو في منطقة الخليج هنا تكون في لجنة للاشراف علي كيفية المشاركة في المهرجان وفي اوربا ايضا تكون هنالك لجنة مماثلة وفي امريكا

وكل لجنة مكلفة بجمع التبرعات من الاعضاء الموجودين في منطقتها وايضا جمع المقترحات والمواضيع وطرحها علي اللجنة الام للمهرجان وذلك حتي انها اللجنة الام ما تدخل في مشكلة انها عاوزة تسمع للجميع

ولكم الشكر

وايضا بقترح علي الاخوه بورداب الامارات اننا نتلاقي في اجازة العيد ونتدارس كيف انو احنا بنقدر نشارك في المهرجان

up

أب

أبدوا الشغلانة
أبيتونا مالكم؟
أبتفكروا يا الحبان؟ (بضم الحاء وتشديد وفتح الباء)
أبدعوا لينا شوية
أبهرونا
أبزغوا الشينة
أبقرشين
أبزرد فيكم منو؟؟؟
أبيت اللعن
أبهذا الحديث أنتم مدهنون؟؟؟
أبسطونا معاكم
أبدا ليكم من أول
أبخل بعد جود؟؟؟؟
أبيت الناس وأبيت خلانى خاسمت الكل علشان حبانى
أبجيكم صاد

العزيزة طماطم والغالي بكري (ع/طماطم) الفكرة جميلة ومقبولة من ساسها لي راسها . ومبدئيا نحن ناس مسقط حا نتلما في العيد في مهرجان مصغر كدة وممكن تكون فاتحة للنقاش حول الموضوع .لكن انا بقول انو فتح الكلام عن تبرعات دون ان يكون هناك تصور واضح لشكل البرنامج فيهو شوية خلل (ولا حانمشي نشتري خروف العيد علي قدر قروشنا ) اقترح ياتماضر ان يجتع بورداب كل منطقة مع بعض ويضعو تصور للفقرات او الفعاليات الحايتكون منها المهرجان وتطرح هنا في البورد ومن ثم نتناقش ونخت الشكل النهائي وبعد داك تجي مسالة الكراسي والخيمة ومساهمات الفنانين والممثلين والذي منه .



الهام عبد الخالق

الحبيبة تماضر،،
لي عودة..

أوافق الأخ طه-إلهام على أننا استعجلنا مسألة المساهمات المالية هذه. وقد ألهمني كلامه عن لقاء بورداب مسقط في العيد أن يحاول أهل كل منطقة التلاقي، ولو هاتفياً في العيد. وأن يحدد أهل كل منطقة قدرتهم على المساهمة وكيفيتها وحجمها بمفردهم، لا أن تحددها لهم قدرات واستطاعات آخرين من مناطق أخرى.
هذا العمل لا يجب أن يعالج كما تعالج الأمور التجارية، أو أمور المساهمات المالية في الانتخابات السياسية. فهو أكبر من ذلك بكثير. هذا المنبر يحمل هم وطن بأسره، وهو بكل أطيافه، يمثل قدرأً غير يسير من حالات الإشراق والتوهج في الذات السودانية البهية. ولهذا فإننا لا يجب أن نقدم أمر المال وجمعه على أمر المحتوي.

هناك من قد لا يستطع المساهمة المالية. ولكن مساهمته ستكون أكبر بكثير من أي قيمة مالية محتملة. تصوروا معى أن يقدم الأستاذ الموصلى خدماته مجاناً، وكذلك الأستاذة تماضر لنا وللجمهور. كم تعدل مساهماتهما هذه من الناحية المالية البحتة؟ إنها تعدل الكثير! وإن لم يدفعوا مليماً واحدأ.

لي عودة، فقد حان موعد الإفطار.

ياجماعة والله اخجلتو تواضعنا بمساهماتكم القيمه...واراءكم السديدة الجادة


طيب ما فى زول فى المساهمين هما بتفرغ شوية وينظم معاى المقترحات دى ويغربلها وكدة.؟؟؟


يكون ظريف...واظننا تقريبا متفقين على الاثل على حاجتين:

تدويل اللجان " يعنى فى كل دولة لجنه " وفى كل لجنه زهرة"

"تضريب" المساهمات حسب:

عملة الدولة الواحدة
مستوى دخول الافراد
المقدرة

زفى البداية وقبل كل حساب يجب ان ناتى بتقديرات اوليه للتكلفة...

انا بفترض انه لجنة بكرى والناس الفى السودان هم المفروض يجونا بمثل التقديرات دى...

بكرى جيناك راجعين...وين لجنتك الاوليه...؟؟؟ عشان نسالهم؟؟؟

اها الناس عندهم حماس ما تحبطونا يا ناس اللجنه


وفى بالى نفكر فى عمل المهرجان فى جوبا.......حسب اقتراح جه من احدى البوردابيات الكريمات...رايكم شنو؟؟؟

تماضر
وبكرى سيد البيت
والجميع سلامات
معاكم فى كل ما تقترحون
اها النساعدك شوية

*بورداب الخرطوم عليهم تحديد فترة زمنية قصوى ولنقل 15/12 لمدنا بميزانية تقديرية
*بورداب الشتات ..كل منطقة تحدد اجتماعاتهالحصر عضويتها ومعرفة متوسط مساهماتها مبدئيا تزيد او تنقص حسب تقديرات لجنة الخرطوم

*كل دولة تحدد مندوبين عنها للجنة عليا او تمهيدية
*لا زلت اقدم اقتراحى بان يتم لقاء فى البالتالك لمناقشة التصور العام والخرو بتكاليف محددة لاى عضو او عضوة
*نحن ناس امريكا وكندا وبما انه لمتنا صعبة يبقى يلمنا البالتالك فى اجازة عيد الشكر الاسبوع القادم ..تماضر اعملى لينا بوست لناس امريكا وكنداوما جاورها ..(فى ناس فى كوبا مش كدة) نحصر فيهو الناس وننسق للبالتالك


هالة

يا جاعة كدي روقو واحلو وانشا الله بعد رمضان نتفق بس حسى خلونا النخبز لا خبيز العيد خبيز املهرجان دا علي ناس السودان ، وفي كل الاحاول ردي بس بعد الجمعة اليتيمة عشان الافكار ما تكون عقيمة

تماضر
بكري
والجميع
بعد حوالي ساعتين من الآن سيجتمع بورداب بعض من بورداب الرياض في منزل شقيقهم ودقاسم ، وستتم مناقشة الموضوع بالتفصيل ، وسيحدد المجتمعون سلسلة لقاءات يمكن أن تثمر وتمنحنا الكثير مما نبحث عنه إذا كان على مستوى البرامج أو الدعم المالي ،
من له الرغبة الاتصال بنا في مواعيد الاجتماع تلفون البيت 96614053210
وسنقدم لكم عرضا لما نتفق عليه .

ود قاسم النمرة دى زيدها لينا شوية فيك الخير

ان شا الله كود كودين...

سلامات
ياتماضر

وياسلام علي مثابرتك

أنا شخصيا بحاول أشوف ناسنافي بريطانيا
ممكن نعمل شنو بصدد جمع التبرعات للمهرجان

وللتتنسيق الرجاء الاتصال
Tel: 02073519160
Mobile: 07930691575
Email: [email protected]

رن جرس تليفونا رنات جديدة..ولما قلنا الو..كان فى الخط ودقاسم وفوزية...يااااااه

قال انه الاجتماع تم

وحيتم حصر العضوية بعد العيد مباشرة

وحيتدارسو قيمة الاشتراكات حينها

وسيساهموا مساهمات مادية وادبية

وحيستقطبوا شبكة من الشركات والجهات لدعم المناسبة مما يعرف باصدقاء السودانيين فى الرياض

ولهم حماس يكفى لدفع دفة العمل للامام

تانى شنو؟؟؟

شكرا ناس الرياض...وحنخلى ود قاسم وفوزية يكونوا خط نواصلنا ...بكم الشكر وللجميع التوفيق...

والله حاولت كم مرة اضرب لكن تليفونكم كان مشغول.(تيلفونك ما بيك خبور).وشكرا على الرنه السعيدة

جاياك يا لندن واحمد امين