Post: #1
Title: هل البكا فقط للنسوان؟؟
Author: bushra suleiman
Date: 10-02-2003, 10:14 AM
Parent: #0
لما كنا صغار وتحصل حاجه الواحد يتعوق مثلا او يودوه للدكتور ويشوف راس الابره تقوم الدمعات ناطة وهات ياثكلى، رد الفعل الطبيعى يقولوا ليهو انت ماك راجل؟عيب البكا للنسوان
وشبينا على كده،لكن بعد طلعنا من السودان شفنا فى الدول الاوربيه انو البكا ده حق كل الناس راجل،مره،كبير وصغير وهو عباره عن تعبير طبيعى فى حالات الحزن والفرح الواحد بقى يشك هل نحنا فى السودان ماعندنا مشاعر؟
اها اليومين ديل فى السودان حتى النسوان بطلن البكا يعنى الواحدة تجى بيت البكا(المكان الوحيد للبكا)متعنكشه بالدهب وتياب اخر موضه مع المكياج وايييي طبعا مافى دموع عشان مايخرب الآى لاينر،طبعا لاحظتو انو اعراس الشهيد مافيها بكا انما احتفالات
هل حيجى يوم وينقرض البكا فى السودان؟؟
|
Post: #2
Title: Re: هل البكا فقط للنسوان؟؟
Author: Saad A.Ragab
Date: 10-02-2003, 10:31 AM
Parent: #1
يا استاذ بشري فعلا الكلام اللي كتبته ده حقيقة لكن انا شخصيا بقت دموعي تنزل بمناسبة او غير مناسبة وما عندي مرض في العيون لكن الظاهر اصبيبت بحاله نفسية واللي يمكن يقولوا عليها من القرف والوجع الحاصل شر البلية ما يضحك واوجع الضحكات ما ينتهي بالدموع واصبحت حالة مزمنة شنو ليك؟؟؟
|
Post: #3
Title: Re: هل البكا فقط للنسوان؟؟
Author: انا بنت النيل
Date: 10-02-2003, 01:35 PM
Parent: #2
اخي الفاضل..
كما ذكرت البكاء تعبير حقيقي ..عن حالة..يعني مشاعر تنبع ..من الداخل يمكن ان تكبت فلا تري..ولكن يظل أثرها باقيا.. مرارة يكاد يتذوقها الإنسان ..كطعم الدموع تماما..
ظلمتنا اخي في التعميم.. نحن في السودان ..في حالة بكاء صامت شبه دائم ..من ومن ....وعندما نفقد عزيز..يقتلنا الحزن واذا لم نبكي ..متنا كمداً ..اكيد..ومن تتزين ..وتتبهرج خصيصيا لبكاء وفقد ..لعمري تعاني نقصا ما..
|
Post: #8
Title: Re: هل البكا فقط للنسوان؟؟
Author: bushra suleiman
Date: 10-02-2003, 10:53 PM
Parent: #3
معذرة بنت النيل على التعميم والذى لم يكن فى القصد ولكن يبقى السؤال هل اصبح الرجال بدون مشاعر؟ولماذا هذا التعالى الذكورى فى تناول المشاعر الانسانية التى لاتفرق بين المرأة والرجل؟ لابد من وقفة واعادة صياغة لتلك العقلية
وعذرا مرة اخرى وسلمت
|
Post: #5
Title: Re: هل البكا فقط للنسوان؟؟
Author: bushra suleiman
Date: 10-02-2003, 06:37 PM
Parent: #2
حقيقة يادكتور سعد الدموع كتيرة ورغم ذلك بنقول شر البلية مايضحك،وربنا مايوقعك فى البلاوى
|
Post: #4
Title: Re: هل البكا فقط للنسوان؟؟
Author: sama7-au
Date: 10-02-2003, 02:06 PM
Parent: #1
الاخ بشرى
ردا على السؤال ... بسؤال
هلى البكا علامة للضعف؟
حين التصق البكاء بالمرأة كان ذلك لانها "حنينة" ولها مشاعر مرهفة فهي "ألام" التى تعطي كل الحنان في الوقت الذي يربي الاب بكل صرامة
ولكن
قد يكون الضحك بكاء
ومن المشاهد ان دموع المرأة تتدفق بسهولة وسرعة لمجرد انها تشاهد فلم مؤثر ...
وعشان ما اطلع من الموضوع
العالم من حولنا كله مناحة
تستدعي النحيب لا البكاء فقط
من منا فقد الإحساس بالتفاعل مع المجازر التى تحدث في كل ارجاء المعمورة وفي كل ساعة من الزمان.. تتناقلها اجهزة الإعلام في اليوم اكثر من 100 مرة ...
وفي سوداننا
تعودنا على الحزن
فصار البكاء ممارس بصمت عجيب
مرسومة في عبرات الناس
في ملامحهم
في الهروب
وعندما تبكي المرأة تتحطم مقاومة الرجل : هكذا يقال
ولكن في يومنا هذا .. حينما تبكي المرأة يبكي الرجل معها
وتكف هي عن البكاء لتعلو وجهها علامة دهشة بلهاء
سماح
|
Post: #6
Title: Re: هل البكا فقط للنسوان؟؟
Author: aba
Date: 10-02-2003, 06:50 PM
Parent: #4
أستاذنا بشري
سلام
تعرف يا أخي البكا ده الحاجة الوحيدة البتخليني أحس إني لسه بني آدم خاصة مع الرزم بتاع الحياة في الغرب الواحد بقي مبرمج الشغل البيت النت السرير الشغل البيت النت السرير ويا زول حكاية ما تبكي البكا مو حق الرجال دي كانت زمــــــان والله تشوف أخوك قاعد يتفرج في المسلسل ويتنخج بي البكا تقول ميت لي عزيز ولو لا دموعنا البنزلها دي كان إتفقعنا بالمغسة دحين يا زول أتخمج دموع ساكت الله يفش مغستك
|
Post: #10
Title: Re: هل البكا فقط للنسوان؟؟
Author: bushra suleiman
Date: 10-03-2003, 10:05 AM
Parent: #6
انت ياخالد ياخوى قاعد تشوف افلام هنديه واللا شنو؟على كل ماعندنا غير البكا فى الغربة دى بيهو نطرد الهموم ونرجع شوية الحنية الفضلت لينا
|
Post: #9
Title: Re: هل البكا فقط للنسوان؟؟
Author: bushra suleiman
Date: 10-02-2003, 11:08 PM
Parent: #4
الاخت سماح
لااعتقد ان البكاء نوع من الضعف بل هو شعور انسانى نبيل،مرات البكاء بيجى من شدة الفرح،وعلى كل المشكلة انو الرجال بيعتقدوا انو ده مابيليق بى مقامهم والمفترض ان تتغير هذه النظرة المتعاليه وانا معاكى انو العالم حولنا لاينبئ باى احساس بالفرح
|
Post: #7
Title: Re: هل البكا فقط للنسوان؟؟
Author: SAMIR IBRAHIM
Date: 10-02-2003, 07:47 PM
Parent: #1
حقائب البكاء
--------------------------------------------------------------------------------
إذا أتى الشتاء..
وحركت رياحه ستائري
أحس يا صديقتي
بحاجة إلى البكاء
على ذراعيك..
على دفاتري..
إذا أتى الشتاء
وانقطعت عندلة العنادل
وأصبحت ..
كل العصافير بلا منازل
يبتدئ النزيف في قلبي .. وفي أناملي.
كأنما الأمطار في السماء
تهطل يا صديقتي في داخلي..
عندئذ .. يغمرني
شوق طفولي إلى البكاء ..
على حرير شعرك الطويل كالسنابل..
كمركب أرهقه العياء
كطائر مهاجر..
يبحث عن نافذة تضاء
يبحث عن سقف له ..
في عتمة الجدائل ..
***
إذا أتى الشتاء..
واغتال ما في الحقل من طيوب..
وخبأ النجوم في ردائه الكئيب
يأتي إلى الحزن من مغارة المساء
يأتي كطفل شاحب غريب
مبلل الخدين والرداء..
وأفتح الباب لهذا الزائر الحبيب
أمنحه السرير .. والغطاء
أمنحه .. جميع ما يشاء
***
من أين جاء الحزن يا صديقتي ؟
وكيف جاء؟
يحمل لي في يده..
زنابقا رائعة الشحوب
يحمل لي ..
منقول من موقع البكايين زينا كده......
|
Post: #11
Title: Re: هل البكا فقط للنسوان؟؟
Author: haneena
Date: 10-03-2003, 12:29 PM
Parent: #7
استاذ بشري
موضوع شيق
لكن والله كثير من الرجال بكاييين
البكا البلا دموع
ودة اصعب انواع البكا
اما اب دموع
فشايفاه كتر الايام دي
خاصة للناس الفي الغربة
الغربة دي بتخلي الزول رهيييف
واعتي الرجال واعصاهم دمعة
بيبكوا زي الاطفال في الغربة
رد الله غربتنا جميعآ
|
Post: #17
Title: Re: هل البكا فقط للنسوان؟؟
Author: bushra suleiman
Date: 10-03-2003, 04:43 PM
Parent: #11
حنينه الحنينه
اكيد زى ماقلتى الغربه ليها أثر كبير ولكن برضو الرجال بحاولوا يقطعوها جواهم،وده ليهو آثار نفسية ضاره على الانسان والسبب البخلى الرجال مايظهروا بكاهم هو التربية البتفرق بين الولد والبنت وحكاية خليك راجل،بتبكى ليه انت مره الخ
|
Post: #15
Title: Re: هل البكا فقط للنسوان؟؟
Author: bushra suleiman
Date: 10-03-2003, 03:25 PM
Parent: #7
العزيز سمير
يعنى الواحد لازم يقول الرووووب،ايه رأيك نعمل يوم للبكايين فى البورد وكل واحد عندو بكية محرقاهو وكاتمها يورينا ليها وبالمره يفش غلتو/بالتشديد
|
Post: #12
Title: Re: هل البكا فقط للنسوان؟؟
Author: 3azza
Date: 10-03-2003, 01:04 PM
Parent: #1
الاخ الفاضل بشرى
تحياتي
بجد موضوع جميل رغم الصمت حيالة من قبل الرجال ما عارفة بجد هو بنقص من احساسهم بقوتهم ؟؟؟؟؟ وده سوال موجه لي الرجال
لكن هنا انا عاوزة اقول ليكم سر نسوي جدا بس خلوه بيني وبينكم
النسوان بتأثروا بي دموع الرجال لدرجة عجيبة يعني لو بكيت قدام مرة وخصوصا في موقف خلينا نقول وانت بتحب فيها صدقني ما حتتخيل التأثير لي كده حيكون كيف ولا مليون كلمة حب ما حتعمله فيها
ونصيحة برضوا ممكن تستعمل الدموع في حالة جات المدام وقالت ليك المصاريف loooool
اكيد حتتخارج منها بدون ما تدفع
ولك الشكر دوما
|
Post: #16
Title: Re: هل البكا فقط للنسوان؟؟
Author: bushra suleiman
Date: 10-03-2003, 04:30 PM
Parent: #12
الاخت عزه
دى قوية خالص قصة البكا على المصاريف،كدى نحاول نجربها آخرالشهر،بس انتى مسئولة كان مانفعت
طبعا العقلية الذكورية السودانية عموما مسئولة عن الحاصل وماعارف لى متين الناس بتهرب من مناقشة اى حاجه بتنقص من الرصيد الذكورى؟
|
Post: #13
Title: Re: هل البكا فقط للنسوان؟؟
Author: Hozy
Date: 10-03-2003, 01:12 PM
Parent: #1
الاخ بشرى
البكا مش فقط للنسوان
لكن البكا في النسوان
لووووووووووووووووووووووول
|
Post: #18
Title: Re: هل البكا فقط للنسوان؟؟
Author: bushra suleiman
Date: 10-04-2003, 02:38 PM
Parent: #14
الاخت هوزى
بكا النسوان وعرفناهو،اها كيف يكون البكا فى النسوان؟غلبنى عديل
|
Post: #19
Title: Re: هل البكا فقط للنسوان؟؟
Author: 3azza
Date: 10-04-2003, 10:16 PM
Parent: #1
الاخ الفاضل بشرى
حكاية على كمسئوليتي كتيرة شوية لانه قد تكون انت ما بكاي او ما عرفت تضبط بكيه كويسه ومقنعه لي المدام وتقوم القصة تخسر .... لكن ما عندك مشكلة جربها الشهر ده وورينا الحصل شنو ونحن معاك قلبا وقالب
الاخ سمير جرب قصة البكا والنتيجة مضمونة جدا وخصوصا دموع من الاعماق كده بتكون مؤثرة واااااااثرة جدا وبرضوا نحن معاك جرب وورينا النتيجة وحتكونوا تجربتين لي الدموع الحيه في البورد ده وتتسجل باسمكم النتائج الباهرة
وتحياتي واحترامي لكل دمعة من قلب صادق دوما
|
Post: #20
Title: Re: هل البكا فقط للنسوان؟؟
Author: bushra suleiman
Date: 10-05-2003, 07:15 PM
Parent: #19
الاخت عزه،ولايهمك ماحنحملك مسئولية الفشل رغم انى زول بكاى بس مافى الحاجات دى وعندى سجل حافل بالبكا حتى فى الايام دى والقصائد النزلت بالبورد شاهد
غايتو النجرب ولو انو اناعارف الستات بكايات وعندهن الخبره على كشف هذه اللعبات بسرعة
|
Post: #21
Title: Re: هل البكا فقط للنسوان؟؟
Author: 3azza
Date: 10-05-2003, 08:24 PM
Parent: #1
الاخ الفاضل بشرى
تحياتي
حكاية النسوان بكيات دي حقيقة لانهم عرفوا سحر الدموع ودرجة تاثيرة في عملية غسل ما بالنفس من هموم واحزان وكان دايما معاهم عذرهم بانهم ضعيفات ورقيقات المشاعر (باضافة طبعا لي دورها في التأثير على الشخص المطلوب التأثير عليه )
لذلك برعت النسوة في استعمالها وكانت دايما النتائج باهرة
والبكا لحظة حقيقة في حياة الرجل بالتاكيد مما يمنحها خصوصية واحترام ولا تنقص من قدرة او مكانته بل تلبسه الثوب الانساني الجميل وتمنحه روعة الوجود وعمق الحس والمشاركة وفي اعتقادي ان الرجل يخسر روعة المشاركة والمواساة في لحظات الضعف الانساني بي مظهر القوة المفتعل
فيا عزيزي الرجل دع مشاعرك تعبر عنك
وترسم ملامح الجمال في شخصيتك
وتمحو احزان العمر
وتريح ما يضعه الزمان على كاهلك بلحظة بكاء صادقة تضيف الى رصيدك ولا تنقصه
دوما لكم السلام
|
Post: #22
Title: Re: هل البكا فقط للنسوان؟؟
Author: bushra suleiman
Date: 10-06-2003, 09:56 AM
Parent: #1
Quote:
فيا عزيزي الرجل دع مشاعرك تعبر عنك
وترسم ملامح الجمال في شخصيتك
|
العزيزه عزه
انا معك فى ان على الرجل ان ينزل من برجه العاجى ويشارك فى رحلة العمر بكل شئ،واولها دموعه فالمشاركة بالغالى النفيس،وهو هنا الدموع،لهااثرها الكبير على النصف الآخر،ولااعتقد أن ذلك ينتقص من رجولته فى شئ
|
|