Post: #1
Title: هدوا اللعب شوية...طفشتوا الناس
Author: zola123
Date: 10-01-2003, 02:03 PM
اعزائي ناس سودانيز اونلاين
ما عارفة اقول ليكم شنو
عملت دعوة لاثنين من اعز اصدقائي للانضمام للبورد
وطبعا هم من زمان بتاوقوا ومعجبين من بعيد
وما لقوا فرصة يفاتحوني في الموضوع
قصدي يطلبوا عضوية عشان مافي زول فكره يروح لبعيد
 
عملت فيها ظريفة وارسلت في طلب عضوية عنهم
الان ما عارفة اودي وشي وين, من ما اجيب سيرة البورد واسأل وين كتاباتهم
يقولوا ما لاقين حاجة مناسبة, بوردكم ده كله شكل , الا كان ندخل نحجز في واحدة منها
والمصيبة لقوني انا زاتي باتشاكل
يا عيب الشوم
عندي بس طلب خاص,
الناس الحلوة القدام والجداد وما بينهم يمسكوا نفسهم شوية
البورد صنع من الكثير منا مشاهير دون قصد
والكثير يراقبون ويصفقون من بعيد
كما ان الكثير بدأوا ينفرون ويشردون
يشردون دي زيادة من عندي
فشوية رقابة على كتاباتنا
وتركيز على ما يفيد الاخرين
الكتابة لمن نعرف ومن لا نعرف, ولكل سوداني او عربي تحمله فارته للدخول الى هذا الموقع
تحياتي
زولة123
|
Post: #2
Title: Re: هدوا اللعب شوية...طفشتوا الناس
Author: Hozy
Date: 10-01-2003, 08:10 PM
Parent: #1
الرائعة نوسة
كيفك كده؟
عارفه المشكلة مافي الناس
المشكلة في النت
بحسه دايما ما بدي الصورةالحقيقة لمضمون
التعابير والكلام
يعني في كلام كتييييييير عااادي شديد
الناس بيقولوها في وش بعض كل ثانية
بس في النت او البورد
اذا الواحد قال اي كلام او أي قصة
يمسكوا ليه على الحرف والكلمة
وينسخوها ويفندوها
ويطلعوه كافر (مثلا) مافي احتمالات
ولا بياخدوا بالخلاصة
والمشكلة تجي اوركسترا تعزف وراه
والشكلة تدور ويكون ليها عجاج عديييل كده
فعلا ياريت الناس تروق كده
وتكون واقعية
وتدور جواها على الكلمة الطيبة
تمنياتي
|
Post: #3
Title: Re: هدوا اللعب شوية...طفشتوا الناس
Author: cantona_1
Date: 10-01-2003, 11:46 PM
Parent: #2
يازولة يا بتي أهلنا البقارة بقولوا: الدواس عمار دار, طبعا الدواس هو الشكل بكلام ناس الخرتوم والمشاجرة بلغة ناس الخليج والله أعلم
يعني المكان البكون الدواس فيهو كتير بعمر. دي تربية ريفيه يا بتي. عشان كدا البورد عامر والناس عاوزة تدخل وكمان لأنه مقفول بقى ليهم حلو ولمن دخلوه لقوه شئ عادي ما عنده فرق من أي شارع في حي سوداني أو فريق عرب رحل في بوادي كردفان
عشان كده كلما الدواس كتر كلما البورد عمر واخونا بكري استفاد وافاد
فخليهم يا بتي يداوسوا زي ما عاوزين بس ما تقومي تداوسي ليك واحدة ما عندها شعر تقوم تمعط ليك شعرك ... دا باعتبار أنك انت عندك شعر ليه قررت كدا ما عارف لكن برضه اهلنا بقولوا الشعر ما قعر
ألمي البارد بقد الدلو
|
|