Post: #1
Title: أغنية للسلام
Author: عبد الله أدروب
Date: 09-29-2003, 04:12 PM
الى : دينق ألور كوال .. رفائيل تكلا أبيم.. كليمنت
بيونج .. وكل الاخوة الأحباء من أبناء الجنوب الذين
سعدت بمعرفتهم وصحبتهم ، ولا يتسع المجال هنا لذكرهم ..
والى كل الذين سالت دماؤهم الزكية على ساحات المعارك
السودانية مهرا للسلام من أبناء جنوب وشمال وطني
الحبيب .. .أهدي هذه الأغنية للسلام .
عبد الله أدروب – جدة- سبتمبر 2003 م
ما نحن خلاص عقلنا
وللسلام أدركنا ووصلنا
وكلنا قبائل السودان رقصنا
وللسلام هتفنا وغنينا ورطنا
ورفعنا وحدة السودان شعار
وفي العيون والقلوب شلناه
السودان الحبيب وطنا
وعشان عيون الوطن النبيل
وخاطر الجنوب الجميل
رمت مراكب الوحدة الشراع
من حلفا لي نمولي تتبختر
تغسل بالحب وجه النيل
نغسل أجزانا أحقادنا دمانا
بطمي وموية النيل
ونقول للعالم أجمل كلمة
أجمل كلمة هي السلام
نعلمها أولادنا وبناتنا
من هنا ولا قدام
نعلمهم يرسموا أغصان زيتون
يشيلها في سما السودان الحمام
و يرددوا بكل الحب والاحترام
سلام سلام يا سلام
ما المسيح قال على الأرض السلام
ومحمد قال لما تتلاقو ابتسمو
وقولو سلام
سلام سلام يا سلام
خلاص يا اولادنا أبشروا
تاني أماتكم ما حا تترمل
تاني ما حا تعيشوا أيتام
عشان كلنا قلنا لا للحرب
ونعم ومرحبا بيك يا سلام
ولما نتلاقى نبتسم لبعض
ونقول سلام يا اخوانا سلام
تعالي يا مريم نغسل بموية النيل
عن أرض السودان الدم
وتحت مطر الجنوب نقيف
نغسل عن قلوبنا الأحزان والهم
وفي قلب الخرطوم نقيم تذكار
لكل جندي مجهول
روى أرض السودان بالدم
وهناك من توريت
من كبويتا من ملكال
وعبر قرن تور دينكاوي
يجينا صوت ملوال
حل مشاكل السودان بالبندقية
يا اخوانا محال
تعالو نقعد سوا
ونبقى ناس عقال
نرمي البنادق
نوقف حروب وقتال
وزي ما العالم المتحضر
خلونا نتحاور نتفاهم بي طولة بال
ونسخر لمشاكلنا العلم
ونرصد لمشاريعنا راس المال
|
|