Post: #1
Title: آي ... ما عندي موضوع
Author: Zaydoon
Date: 09-29-2003, 04:12 PM
Parent: #0
حذرتكم من الأول .. عشان ما يجي زول ناطي ومنطط عويناتو
يقول: إنت ما عندك موضوع
آي ... ما عندي موضوع ... داير شنو ... حوش بكري وانا حر فيه ... قال كلنا لينا الحق نكتب العايزنه وكل زول رقيب رقبته ... ولا ما كدي يا بكري؟؟
نخش في الموضوع
مالكم ياجماعة... بورضكم الليلة مسيخ ... لا شكلة ولا نكتة ولا شيتاً يفتح النفس
جيت من الصباح ... كعادتي ... فتحت باب الحوش ودخلت ... قلت يمكن نلقا لينا حاجة تفتح نفسنا للشغل
وله نلقى الولد السجمان داك ... مطلع لسانو لينا في السهلة ... والله حركاته دي بتعجبني ... وبضحكني من جوة
وله نلقى هببه ... كعادته آخر الشهر ... متعصب ونازل في الناس هبهبة .. ياربي هبهبتو دي علاقتها بآخر الشهر شنو ؟؟ ... يكون مفلس وزيته طالع ... وله ما لقى زول يسلفه
اها ... اقوم القى ليك الناس قاعدة تسوسو ... واحد بيتغزل في عيون قرنق والتاني ما عجباه العيون والتالت ماله ما تعرفو وحاجات كدة عجيبة ..
وناس تنضم في السلام البيسلموه لي بعض وناس تانية لاعجبها العجب ولا الصيام في رجب .. وناس كانت شمال وعكست اتجاها .. ماتعرف هسي مقبلة وين ... والله شي عجيب.
وعلى التعترني وقعت لي في بيان ... لا تعرف راسه من رجليه ... قال شنو الصحراء وما تعرف شنو كده ... المهم قلت النتمشى فيه شوية ... لكن رجعت في كلامي .. هسي كان تهت في الصحراء الجرداء دي .. منو البنجدني منها
وناس تانية تقلب في الحاجات القديمة وطلع لينا مواضيع ... ممكن تجيب لينا الهوا .. ولا هاميها .. وشغلات كدي عجيبة .. والعايز يعرس ليه اربعة ...والبفتش ليه في داية ... والكايس ليه غنماية ... غايتو ... الله يكون في العون.
المهم .. قلت يازول بدل ما تتلفت جاي ولا جاي أحسن شي ... تشد الكيبورد وتكتب لك شي.
اها ... وقعدت اهرش في راسي ... قلت أنخترع موضوع للجماعة ديل يمكن يطلعهم من حالة السبات القصري الهم فيها دي
وبيني وبينكم ... طق لي موضوع في راسي ... لكن لاوزت ... قلت يمكن يجيني سهم طاشي ... ولا يدخل زول يقول لي تعال لي كومنا زي ما حصل قبل كدة ... الله بسألني .. الكوم ده شنو لى هسي ما عرفتو ... وله يجيك زول يقول ليك أعمل حسابك... الناس دي عايزة تجندك ضد الخواض ... ولا يجوك ناس الدمقرطة ... يقولو ليك اركب معانا
وزول ببكي بيغادي .... وزول حالته صعبة
لكن ... صحي ... ما عندي موضوع ...
هوي ... ياجماعة ... الليلة ما براي ...
|
Post: #2
Title: Re: آي ... ما عندي موضوع
Author: Kudouda
Date: 09-29-2003, 04:24 PM
Parent: #1
سلام يا زيدون...
ولله ضحكتني عديل كده , لكن زي ما قالو الاعتراف بالذنب فضيله,وكلامك صح ميه الميه ما عندك موضوع ...
وتسلم
غازي
|
Post: #3
Title: Re: آي ... ما عندي موضوع
Author: bayan
Date: 09-29-2003, 05:05 PM
Parent: #2
| Quote: الكوم ده شنو لى هسي ما عرفتو |
يا زيدون اها دا الكوم
بعد قعدة متواصلة فى البورد
لمعرفة عمق العلاقات
بين الناس فى البورد دا
خرجنا بالاتى:
1- اذا فى اى زول دور معاك شكلة بدون سبب وبقى كلامو كلام شكل وغبن ولف ودوران طوالى تراحع بو ستاتك وتشوف انت هبشتا منو من كومو
و العكس بالعكس الحب بالكوم و الكره بالكوم
2-
اذا نويت يوم تعارض زول ولا تنتقدو لازم تشوف موقع الزول دا من كومو
وين لو كان الرأس خلاص الله معاك لانه حتلقى نفسك فى مواجهة كوم بحالو
3-
وجود اكوام مصاحبةبعض تهبش زول واحد تلقى نفسك فى مواجهة كومين او اكثر
4 تقسيم ادوار افراد الكوم الواحد
لازم يكون فى واحد شاكال و احد عامل موضوعى و الباقين نص نص
ومن ثم الما عندو كوم الله معاه فى كل الترشيحات يلقى نفسو فى ذيل اللست ولا ما يذكر خالص
كيفية معرفة مين يكون كوم مين1- لما تلقى زول كتب كلام خارم بارم
والردود وصلت لمية فى خلال ساعة
كل الناس ديل كوم واحد
2اذا اعترضتا على كلام زول قام طوالى لقيت زول مباريك زى الكديسة ام خيط من بوست لبوست لو قلتا الله واحد وهو يصر انه الكلام دا ما صاح
3- بعدين اذا غلطتا فى زول من كوم ما طوالى يجيبوا زول يدعى انه بيعرفك وانك ما كيت و وماكيت ينفى كل المحاسن و ينجر قصص سيئة عنك ويقول انت كيت وانت وكيت
4-اذا فجأة لقيت اى بوست فى البورد بيعرض بيك وفيه مطاعانات تعرف طوالى انك هبشتا صنم كوم كبير وتطاولت حيث لا ينفع التطاول ويحلك الحلا بلة
مش قلتا ليك علاقات مترابطة ومتشابكة دايرة ليها وداعية لسبر اغوراها
لوووووووووووووووووووووول
مطلوب وداعية لكوم قيد الانشاء
|
Post: #5
Title: Re: آي ... ما عندي موضوع
Author: Zaydoon
Date: 09-29-2003, 05:21 PM
Parent: #3
يادكتورة
أحجزي لي كرسي
موافق على كل الشروط ... وإن شاء الله نسبرا ليكي
|
Post: #4
Title: Re: آي ... ما عندي موضوع
Author: Zaydoon
Date: 09-29-2003, 05:16 PM
Parent: #2
الله يسلمك يا غازي
مشكور على الطلة
حذرتكم من الأول
|
Post: #6
Title: Re: آي ... ما عندي موضوع
Author: aba
Date: 09-29-2003, 05:21 PM
Parent: #4
زيدون
يعني جات عليك إنت ووقفت
غازي معاهو حق ما عندك موضوع لكن ولا يهمك فضفض يا زول ومحل رهيفة تتقده
|
Post: #7
Title: Re: آي ... ما عندي موضوع
Author: Zaydoon
Date: 09-29-2003, 05:29 PM
Parent: #6
منو ؟؟ خالد الحاج
وله خالد الحاج
اقوليك ابا احسن
| Quote: يعني جات عليك إنت ووقفت |
ما ياهو ده السبب ذاتو البفتش عليه من الصباح
|
Post: #8
Title: Re: آي ... ما عندي موضوع
Author: فتحي البحيري
Date: 09-29-2003, 08:42 PM
Parent: #7
أستاذي الممعن في الجدية والروعة والموضوعية
لا كما تزعم عن نفسك في هذا البورد
صدقني كنت اليوم أسائل نفسي
لماذا لا يطرح الأخ طارق أبوزيد
(زيدون )
بوستات في البورد
ومنشأ السؤال أنني أعلم علم اليقين
(موضوعاتك اللليك )
الكثيرة جدا والتي تحوي مقولات واجبة السماع
حول الوضع السياسي
وفي محبة الوطن العزيز
وحول أوضاع البورد
كما أعلم انك مشارك بالكتابة في بعض الصحف
لماذا يبخل زيدون على بورده
كان عنوان بوست وددت طرحه
لكن قد سبقتني
وعموما
أشكر لك كرمك الفياض معي
أنك منحتني الكثير من وقتك وحكمتك
وآراءك
لا سيما
(أيام المحنة)
وعسى
يا صديقي لا أكون قد فتنتك
من حيث لم أقصد
مع
الأحباء اللدودين
في الكيمان الأخرى
|
Post: #10
Title: Re: آي ... ما عندي موضوع
Author: Zaydoon
Date: 09-30-2003, 02:00 PM
Parent: #8
الأخ والأستاذ الفاضل/ فتحي البحيري
عليك الله ... لزومو شنو الفضايح والفتن والإحراج ده؟؟؟
وينك غايب ليك يومين ؟؟
|
Post: #9
Title: Re: آي ... ما عندي موضوع
Author: sentimental
Date: 09-29-2003, 09:19 PM
Parent: #1
زيدون اى انت ما عندك موضوع
لكن السبب شنو .. تعال نتفاهم
|
Post: #11
Title: Re: آي ... ما عندي موضوع
Author: Zaydoon
Date: 09-30-2003, 02:06 PM
Parent: #9
نتفاهم ؟؟؟
نتفاهم في شنو ؟؟
لما تسمع الكلام في اللول
بعدين نتفاهم
|
Post: #12
Title: Re: آي ... ما عندي موضوع
Author: sentimental
Date: 09-30-2003, 03:04 PM
Parent: #1
زيدون قول بسم الله
النعرف الكلام فى اللول بعداك نسمعو
|
Post: #13
Title: Re: آي ... ما عندي موضوع
Author: Zaydoon
Date: 09-30-2003, 03:42 PM
Parent: #12
بسم الله
العرفة بتجي الأول وله السمع
|
Post: #14
Title: Re: آي ... ما عندي موضوع
Author: sentimental
Date: 09-30-2003, 04:08 PM
Parent: #1
جننتنى وجيبت لى انشخارية فى الاستيكوزا المنقعرة يا زول
|
|