Post: #1
Title: عينيك بداية شوق
Author: MOHDY
Date: 09-26-2003, 05:02 PM
Parent: #0
للغايبة الطالعه من رؤي الحقيقة
================================
تاخدني لي عينيك
فرحة مزارعية
خدر سنبلهم
علي نية قمحية
شوق المسافر اللي انقطع
في صحرا املو و بهاتي
يا امي يا ابويا
غنا الولهان
دميعتو تسيل
وقلبو يميل
علي المريود
بصفي النيه
تاخدني لي عينيك
فرحة عليل
ضاق الشفا
ودمعة فرح
حر البكا
و كل القبيل
بس، عينيك كيف تشرق
لعينيا
و تديرلي السواقي الباقية فوق
ارض المزارعية
و تاخدني بحنانها رضيع
من جوع الشقا الفيا
و تسرجني علي البريق الرايح
شان المسافريرتحل
يصل بلدو الرضية
شان مريود غناهو نتغنابو
لوعة و قليب ميال
افراح و عيدية
|
Post: #2
Title: Re: عينيك بداية شوق
Author: Rawia
Date: 09-26-2003, 06:41 PM
Parent: #1
ربنا يرد ليك الغايبين
ويردنا لي احبتنا
|
Post: #3
Title: Re: عينيك بداية شوق
Author: 3mk-Tango
Date: 09-27-2003, 00:52 AM
Parent: #1
.
MOHDY
ها انت تعيدنا مرة اخري الي ايام المصطبة ..
و تسرجني علي البريق الرايح
شان المسافر يرتحل
يصل بلدو الرضية
اين لنا من تلك الايام يا مهدي ..
ولكن
" غدا ..ستكبر زهرة عباد الشمس
وتدير راسها الاصفر الصغير في كل الاتجاهات
ذاهلة مرتبكة ..فثمة اكثر من شمس ..
وعندما لا تجد خيارا او ملاذا
ستلقي بنفسها بين يديك
لتغفو ...
تغفو ..تغفو .. " عدنان الصايغ... مرة اخري
لوعة و قليب ميال
افراح و عيدية
غنينا يا كروان ...ولك الود
تنقو
|
Post: #4
Title: Re: عينيك بداية شوق
Author: MOHDY
Date: 09-27-2003, 01:53 PM
Parent: #1
معليش يل شباب كان في خطأ مطبعي نبهتني اليه احدي الاخوات في البورد في كلمة "سنبلهم" حيث انها كانت مكتوبة "سبلهم" ...
الاخت راوية
لن تنتهي سبل الوصول لعشقنا
و سيعبر النيل الفيافي
ليسقي بعض هذا الجفاف
فيا غريب
هب لنا سعة في القمح ِ لعلنا
نجلب بعض هذا الطير الذي هاجر أرضنا
امين و قولو ياااااااااااا رب
الغالي عمك تنقو
ها أنت تجعل التفاصيل أجمل بلحن الكروان، فترتقي بنا سلما في الحلم يعيدنا بالفعل الي ايام " شوعا" و "ود ميمونة" و " الحجر" و الود "خوصة" و "المقصرة" و ضهب " اب فلجه" و نمنمات "ود اسحق" و روائع الرائع ذو الصوت الشجي الحنين " عكاشه"..
أظنني بعد كل هذا سأعود وحيدا الي المسطبة فذنبي الوحيد انها مسطبة بيتنا ..يعني مافي حل مافي حل
غايتو البركة في الود "حودة"
أروع جمالك و بسمتك
و الدر رصين القول بيدر من
منازل حكمتك
وريني كيف الشوق لمن يحرحر
بهادن ملامح تشبهك
و الشوف بهاو وهج العيون
لمن تلاوع العين محاور تفهمك
|
Post: #5
Title: Re: عينيك بداية شوق
Author: 3mk-Tango
Date: 09-28-2003, 09:47 PM
Parent: #4
MOHDY
اذا كان في العمر بقية اعتقد انه سوف يتلم الشمل انشاء الله .حتي ولو في العطلات المرتبة..كلما افكر في ذلك ياتيني صوت عشماوي و(صدق من اطلق عليه هذا الاسم ) ..اتذكرة وهو معلقا بعد ان قام بتكبير صورة تضم معظم اعضاء العقد ..وبصوته المعروف لديك ( قلت اكبرها واعلقها من اسة قبل ما يبدو ينقرضو واحد واحد )تخيل معي هذا الرجل الذي ابتلاني به الله في الغربة..لوول
عموما وكما قال الحجر ..يا جيتوني لقيتو حودة دا اتكلم ولا جيتو لقيتوني ساكت زيو..ما تبقي عليك واحدة من الاتنين لوول
لي عودة
تنقو
|
Post: #6
Title: Re: عينيك بداية شوق
Author: THE RAIN
Date: 09-29-2003, 06:50 AM
Parent: #1
مهدى
لو كان الشوق رجلا
لقتلته
ولكنه يستمتع هو الآن بقتلنا
|
Post: #7
Title: Re: عينيك بداية شوق
Author: MOHDY
Date: 09-29-2003, 06:24 PM
Parent: #1
الغالي عمك تنقو
الود عشماوي ده ما اصلو براهو.....الود داير يدخلنا القبور قبل يومنا...شكيتو لي ألله....غايتو دواهو عند ود ميمونة و هو الوحيد البعرف ليهو علاج
المقصرة سألني من الود هيما و قالي لي كيفن حالو و صحتو...قلت ليهو كويس و صاحبك بقي سمين ما شا الله عليهو....قالي لي اوعي يكون ببلع حبوب و للا كده يا دكين...قلت ليهو ابدا..دي بس اثار الشاكوش...صاحبك ضحك و قال لي : معقول يكون الشاكوش فتح الغدد
بالمناسبة دي، لو لقيت اغنية سيد خليفة " ولي المساء" جيبها لينا في لحن الخميس..انا لقيتها في واحده من صفحات الانترنت لكن تسجيل قديم و متهالك...اذا اتصلت علي ظوحا اكيد بكون معاهو تسجيل ود عكاشة فيا ريت لو تقدر تعمل كده
و تسلم يا ملك
|
Post: #8
Title: Re: عينيك بداية شوق
Author: Hozy
Date: 09-29-2003, 10:05 PM
Parent: #1
محمد
ايوه كده اظهر وبان عليك الأمان
|
Post: #9
Title: Re: عينيك بداية شوق
Author: MOHDY
Date: 09-29-2003, 11:37 PM
Parent: #1
المطر
كانت احدي الاخوات في البورد بتسألني ايه حكايتك انت و المطر مع الشوق؟
افتكر بقتلنا دي اجابه كافية
في ضي عيونك
بوهط رويسي
و أبادلك دلال
غلبني البيغلب
فوارس القبيلة
و اسود الجبال
ماأصلك فريدة
و مأصل جمالك
شبيهك محال
|
Post: #10
Title: Re: عينيك بداية شوق
Author: MOHDY
Date: 09-30-2003, 09:54 PM
Parent: #1
سلامات هوزي
شكرا علي الطلة
و نحنا ظاهرين...بس انتو فتحو عيونكم
|
Post: #11
Title: Re: عينيك بداية شوق
Author: dreams
Date: 09-30-2003, 10:05 PM
MOHDY
سلامات
ومسا الخير بتوقيت الخرطوم
بمناسبة الشوق دى ما اظن فى وصف ابلغ من وصف مصطفى سيد احمد
شوك الشوق للشوفة آخى ..ضارب فينى النسج الحى
.
.
.
لولا الشوق لما كانت الاشواك
لكن ايضا
لولاه لما كنا
.
.
.
زد فى اشتياقك لتمنحنا المزيد من الكلمات الرائعة
تسلم
ويسلم كل مشتاق
|
|