اللـــيل أمــسى

يجد البعض متكأً في ترديد منثور الشعر .. الذي لم يكن نثراً. وبعض يجد ملاذاً في تمثُّل ما تناقلته الرواة عن ثقافة أمريكا اللاتينية وهو لم يرها حتى في أحلام يقظته. وبعض آخر هامت نفسه بحب الترحال المستدام وذمّه في آنٍ معا. وبعض خارت عزيمته فصار ينوح مع كل نائح في حيه. وبعض تملكته روح القفز على إرثه وأصله وظن أنه قد بلغ من العلم منتهاه وانتمى قلباً وقالباً الى العالم الأول. وبعض ظن أن الخالق قد ملّكه عصا موسى لحل معضلات الكون .. وهو في ضلال مبين إن فَطِن. وبعض يسعى جاهداً، على غير هدىَ، لبناء سودانٍ خالٍ من السودانيين، كما توحي تعبيراته اللافظة لكل طائفي تقليدي متخلف بسيط أمي .... الخ .. وما علم هذا النحرير الشاطح أن السودان كله هكذا. وبعض ضاع بيْنَ بيْن. وبعض يحاول تلميع نفسه إرضاءً لجهة ما. وبعض مازال يردد مأثورات لينين وروزا لكسمبورغ ويسعى بين الناس كرجال الـ كي.جي.بي. المتمرسين ظاناً أنه ممن انتخبهم الله لتخليص السودان من آفاته. وبعض غدا والخبث ملء إهابه. وبعض يظن أنه أصبح محور الكون وهو لا يسوى جناح بعوضة. وبعض أقرب الى أبناء الحرام .. يميلون حيث مالت الريح الدولارية
وسط كل هذا الموزاييك الغريب .. ألجأ الى مسارب القيعان الأولى

الليل أمســى والْبِلْ حَرّرَنْو مَشيهِن
عَقَبَنْ مويَة والجبل أب قرود راجيهن
الخلاني فَرْض الخمسة ما اقضّيهن
رزْق الدنيا والمِحَن البصارِع فيهن

هو الطيب ود ضحوية .. شيخ المسارب النقية .. ومسارب القيعان الأولى

ملاحيض: الفضل يرجع لصديقي الاديب الريح عبد القادر عثمان صاحب ديوان مسارب القيعان الأولى .. وإعجابي بهذا النحت اللغوي

ما بطال.....بس صلح فيهم دي الي فيهن

شكراً لك يا سجيمان .. والله هذه غلطة مطبعية .. من المفترض أن أكسر بسببها الكي بور وأقطع أصابعي العشرة

شكراً ليك .. ودي ما بتروح على الناس العارفين المقصود شنو

انا واثق انها مطبعية عارفك شيخ عرب

يا سلام يا ولدى شنتير
تعجبنى ثوراتك على الثورة
بالله ممكن قصيدة من الحردلو سيد الاسم

اخوي شنتير
التامل في حديقة متشاكلة الزهور والالوان
افضل من النظر الي وردة واحدة بلون واحد
انظر الي الصورة التي اخترتها ووضعتها شعار تحت اسمك
كم لون تحمل!؟

نحن مثلك نطرب لود ضحوية وود شوراني والحردلو
وتيراب اجمل صوت واجمل نم اسمعه في حياتي،من عربك ناس شمال كردفان والي اللمين ود ام سيالة
وغيرهم كثيرون
ومع ذلك نطرب الي اليوت ويتس ولوركا وادونيس وعبدالصبور وامل دنقل وعاطف خيري ومحمد سبيل والريح عبدالقادر في مسارب قيعانه،بالمناسبة اين هو،بالله ممكن تنزل لينا شي منها
نطرب كذلك لجورج امادو وماركيز بنفس القدر الذي نطرب للطيب صالح
والمتنبي وامري القيس وابو تمام وشوقي والعباسي والبارودي وابو ماضي

لا تكن: الانسان ذوالبعد الواحد-عنوان كتاب لهربرت ماركوز،في نقد تجربة الاتحاد السوفيتي الاشتراكية، ذلك النبي الذي
نصح القوم،فلم يستبينوا النصح الا ضحي الغد :بعد خراب سوبا
فاتهموه بالخيانة والعمالة للمخابرات الاميريكية،هكذا كان ديدنهم
مع كل الناصحين
مالي خرمت من الموضوع،ايوه كنت داير اقول ،يعني ما نكون مثل الذين ننتقدهم ونرميهم بالقصور:احادي النظرة
نقدم البديل الذي يتيح لكل الازهار ان تتفتح
وقديما قالت العرب:الادب هو الاخذ من كل شي بطرف
فهيا ناخذ من كل شي بطرف حتي لا نسجن انفسنا في زاوية ضيقة
فالحياة افسح مما نتصور

اخوك عبد المنعم عبدالله عجب الفيا

كرماً وطاعة يا د. بيان .. نديك من الحاردلو سيد الإسم .. والاختيار غير موضوعي البتة .. فقد أوردت ما أحب شخصياً من شعره .. و لو عتّرت ليك اي كلمة هنا قولي غووووووك

عََقَبَنْ وَدْ دَعولْ بِجْرَنْ شَفَاقَة عْدَالْ
وُنَطَحَنْ مِقْرِحْ الحَرْبة الـ جُبالُو طْوَالْ
قَلْتْ أمّاتْ قِرودْ وَرَدَنْبُو بي القُبَّالْ
خِلَقَنْ كيفْ بِرَمُّولْهِنْ دَمِيرْ حَبَّالْ

شنتير اخوى يامصور البلور

العجب قالك خلى الحياة زهور

دا الجننى وخلانى فى كل ناحية ادور

فهم الجماعة التحكروا فى الصنقور

ود ابقوتة

الأعز بين الأعزاء .. عبد المنعم عجب الفيا
مِثْلك مِثْلي ومِثْلي ِمثلك .. مع تباين الذخيرة المعرفية التي قد تفصل بيني وبينك شيئاًً ما (بحكم اختلاف الروافد) .. لكنّ هَوَانا أقرب الى التوافق. المرء يا ود العجب في تكوينه البيولوجي كَمٌّ من العناصر وليس عنصراً واحداً .. فكيف بميوله أن تستوعبها الاحادية؟
أبغض الأحادية في التفكير وفي التأمل وفي التذوق. أحب الجمال .. واستولده من العدم أحياناً .. كما استوْلَد يوسف مصطفى التنيْ الجمالََ من الصخور، صخور جبيت التي رأيت. وقبل يوسف التنيْ .. فإن أهلي حتى الآن يستشفون من كل شيءٍ جمالا .. وإلا لما أبدعوا شعراً عن الجبال الجرداء أو البلقع القاحل في نظر البعض. الجمال بالنسبة لي موفور لكل من يحمل الجمال في داخله .. وأزعم أن في دواخلي شيئاً من جمال .. أستعين به في وحدتي .. التي أحبْ
لكن يا عزيزي .. ماذا نفعل مع الاحاديين؟ شعب الله المختار عنوةً .. ومن ينصّبون أنفسهم آلهةً في زمن عز فيه الامتثال للإله الواحد؟
انا زاتي خرّمت .. وأديك تخريمة إضافية. طبعاً مشيتي الفاتت دي للسودان بحثت عن الريح عبد القادر .. وتلقيت أخباره من أصدقائه المقربين .. ولم ألتقيه شخصياً .. لأنه موجود في بُرام .. مواطن عادي يعني

ولك الود .. والأمنيات بأن تزيح عن كتفك هذه النجوم العسكرية .. يا جناب المُشير أركان حرب. والله أنا بعد ده ح اضطهد ناس كتــــــــار .. شيل شيلتك

شيخنا شنتير .. سلاماً واصل
ها زول والله لولا هذا التراث الأصيل .. لكان طوفنا إتحلَّ في الرحراح وشالتو الشيمة بلا وجيع .. نعم هذا الإبداع ربما يصعب على الكثيرين أن يسربوا وديانه .. لكن بفضل الله بدأت أخيراً وربما بسبب عرس الثقافة في العام 2005 بالخرطوم هو الذي أعاد لتلك البوادي صوت حاديها الذي تغني حتى للسفاية والمعيوقة والتربا وأما لبينة وحتما جمال ليالي البوادي والهرع والبروق البترف في القلوب قبل الوديان ... رسم الحلي على أعناق العربان فأتحفونا بتلك الروائع التي لا يمكن أن يكون تقييمها من باب النقد الأدبي المجرد أو الزمن الذي انقضى .. فلا الزمن فات ولا غنايا مات .. وستبقى لنقاء الأصالة فيها وسيأتي من يعطيها حقها حتماً ..فكلما ضاقت على الانسان الدروب .. توسع في تلك المسارب .. لأنها تجارب ناضجة ((صاغ سليم)) .. تعالوا الى البهجة
إنتي البهجة يا ست البدن والروح
وإنتي طبيبي لى قليبي العليك مجروح
مسيت طيف خيالك عقلي فيهو ســروح
جسيم الربــة .. عين الريل .. جبين مطروح

بعد سوق الردايف وعلى السدُر حِزامتي
دقيت المُقُـد تروة ونقـل فوق هـامتي
دابي مسكتَ في الدرب البيفـرِّح شامتي
عدم النقـدي فرق المنو رابطة قيامتي

مودتي .. سيف كلي

ود كلي .. وين حيّك آبوي؟
نحيا بحياة هذا النبع الأصيل في دمائنا .. ونموت كما مات غيرنا بزواله. أنا أعيش عليه .. أحمله في داخلي كالرقية. أعتز بهذا الفيض الصافي من أدبنا المُتَجاهَلْ. دع المتجاهِل يتجاهل .. ولكل ما حصد

كيفنك آ ود كلي؟

لك الود .. وبديع النميم والشاشاي

عزيزى شنتير

جنسك مو ململم برقه مو لطاع
نور فى نور كواكبك كلهن سطاع

إفتتاحا، إسمح لى أن أسرد عليك حكايتين، ومن بين ثنايا السرد، يسهل تماما ظهور الإشارة التى إعتادت، أو إعتاد اللبيب على الفهم منها، أعتقد أن منها أفضل من بها، هذا موضوع آخر دعنا منه الآن، حتى لا "أخرم" أنا أيضا كما قال أخونا عجب الفيا، المهم يا شنتير

منتصف تسعينات القرن العشرين، كنا ثلاثة زملاء فى العمل فىمدينة الرياض بالمملكة السعودية، وقد تقاربت الرؤى بيننا وتعدد ما نشترك فى الإهتمام به ثلاثتنا دونا عن باقى الزملاء، وأينعت بيننا صداقة جميلة، أنا السودانى، هشام الفلسطينى وجراهام ديفس البريطانى
لإختار لنا هشام نجم، وهذا أسمه، مطعما لبنانيا شهى الطعم والشكل أيضا، وقد يعرفه المقيمون فى مدينة الرياض، إسمه مطعم الطربوش، وكنا نأكل لديهم بنظام القسائم الشهرية، وجبة الغداء فقط، وأصبحنا من الرواد الدائمين بالطبع، وكان هناك العديد العديد مثلنا ممن يتبعون نفس النظام، وجلهم من اللبنانيين، واللبنانيون كما يعرف الجميع، دائما ما يضعون أنفسهم فى أعلى مراتب الرقى والتميز على بقية أهلهم العرب، والأشد تطرفا منهم كما علمت، يدعون النسب الى الأقوام الفينيقية دون العرب
كان اليوم يوم جمعة، وكالعادة ترافقنا نحن ثلاثتنا وذهبنا لتناول وجبتنا فى ذلك المطعم، وفى ذلك اليوم كنت كما تعودت دائما، أرتدى الزى السودانى البهى، ويومها "جابت ليها تشنق طاقية كمان" أذكر أننا كنا نجلس فى مقدمة القاعة، والحيز المكانى للمطعم ليس كبيرا، وعلى بعد ثلاث أو أربع طاولات كانت تجلس ثلة من بنى فينيق، يأكلون ويتحدثون فى أمر فنى، كانوا أكبر منا سنا، أصغرهم ربما يكون فى بداية خمسينياته، كانوا يتحدثون تحديدا عن فريق البيتلز الغنائى الإنجليزى المشهور، والذى خلب البصار والعقول على إعتبار أنه كان نقلة غريبة فى الموسيقى والغناء وقتها، والقصة معروفة طبعا، كانوا يحاولون تذكر أسماء أفراد الفريق، وقد عددوا منهم ثلاثة، جون لينون، رينغو استار، بول مكارنتى وقد نسوا إسم العضو الرابع، وكل منهم يحاول أن يتذكره
فى ذات اللحظة كنت أنا قد فرغت من الأكل وفى طريقى الى حيث تغسل الأيدى
أذكر أننى كنت أمازح المعلم عفيف المسئول عن قسم الشواء فى المطعم، حين سمعت سرد الأسماء الثلاثة، ودون قصد منى وربما دون وعى أيضا، قلت لهم "جورج هاريس" وفجأة هاج القوم وفرحوا وكأنهم قد عثروا على كنز بتذكر إسم عضو البيتلز الرابع بعد أن "تشحتفت" أرواحهم بعناء التذكر
بعد أن قفلت عائدا فى نفس الممر، إستوقفنى أحدهم، وقال لى واله بالحرف الواحد
"أنت سودانى طبعا، كما هو ظاهر من اللبس، ولكن قل لى كيف عرفت إسماء البيتلز، هل حقا تعرف البيتلز، هل إستمعت اليهم من قبل" قلت له لا لم أستمع لهم إطلاقا ولا أعرف من هم أو ما هم، لكن فقط عندما كنتم تتحدثون، طاف على طائف من الجن وهمس لى بالإسم، فأنا من أرباب السحرة والجن، وقال لى إن أنت قلت لهم الإسم الضائع، فإنهم سوف يقدمون لك الدعوة لتناول عصير الخروب، وكان المطعم يشتهر به، فانفجر الجميع فى ضحك، واحتسيت أنا كل عصائر الأسى ومن بعدها الخروب
لم أخبرهم، وليتنى فعلت حينها والله يا شنتير، أن ما أملكه من تسجيلات لرباعى البيتلز، ربما لن يكون متوفرا حتى لدى يوكو أونو، زوجة جون لينون اليابانية، ترقد جميعها الى جوار تسجيل حى قمت به بنفسى ل "ود أحمر عين" فى كشك متسخ من أكشاك سوق ودراوة، وليس من حفلة فى "ألبرت هول" أو "أولمبيا" ولم أخبرهم أيضا، أنى وبعد عودتى من مطعهم ذاك، سوف أعود الى دارى، وأدخل جسمى فى "عراقى ساكوبيس" وأتكئ على السرير، أستمع أولا الى تسجيل من كرومة أو أولاد شمبات، تعويضا عن حقيبة الفن، فاليوم يوم جمعة، وبعد ذلك وبعد أن أتناول كأسا من الشاى، أجلس فى حضرة الأصيل، سيد الأوقات، وأستمع الى أى كونشيرتو للبيانو مع الأوركسترا، ويا حبذا لو كان من هايدن أو شوبرت

أترك إكتناه المغزى وفهمه، لتبصر من يقرأ هذا الكلام، دون تعليق منى أو حواشى

والقصة الأخرى، قد أرويها لك يا شنتير فى مناسبة أخرى، لأنى أرى أنى قد أخذت أكثر من "الكوته" المحددة لى اليوم، وهى أيضا ملهاة مأساة، كان مسرحها مدينة درسدن فى ألمانيا

خاتمة القول، ولتبليل المسارب، أهديك والجميع أبيات من الخليل، خليل فرح بدرى، من تم دوره اتدور عم نور وشال فات الحلة نور زى بدر التمام

الطريف الخور دمى ما بروح سيده ليش بتجور
هز شوقى نور يا نديم ازاى جرحى المخفى غور
يا قليب اتجبر قوم ورينى كيف الكرام تتصبر
نحن ما بنغير النفوس ان حبت تستحى تتكبر
ماك خبير تتخبر فى الزمان الفات والجديد اتدبر
أوعى لا تتشبر هل رأيت لك عاشق بالغرام يتنبر
نحن ما بنطفر ما بنهاب سفيه الا ما بنتزفر
قولو للبتنفر ما شالن قناع المعاك تتوفر

والسلام والتحية ليك يا شنتير يا بدر التمام

Quote: والله يا شنتير، أن ما أملكه من تسجيلات لرباعى البيتلز، ربما لن يكون متوفرا حتى لدى يوكو أونو، زوجة جون لينون اليابانية،

المطر .. المطووووووووور .. يوكو سان (بالياباني المهذب) .. إبنة سايتَما .. أقامت معرضين في مدينة سايْتَما .. وسافر شنتير لواحد منها وعجز عن حضور المعرض الآخر. مدينة سايْتَما .. موطن يوكو .. أحببتها لأنها المدينة الأولى التي استقريت فيها بعد التخرّج .. ومكثت فيها بضعة أشهر .. وأحببتها لما للبيتلز فيها من بقايا رسْم. زرت المعرض الأول يا أخي المطر .. حباً في "المدهشين الأربعة" .. ذا فور فابس
هذا المرأة تقيم المعارض بشكل دوري .. وإن أردت زيارتها في منزلها للتعرف على الإرث البيتلزي .. فتعالي إلى شنتير المسكين .. سآخذك من يمينك إلى مرابعها في سايْتَما
تعلم يا أخي المطر .. كنت قد أدمنت تلك الأغنية
I think am gonna be sad
I think it's today
The girl that's drivin' me mad
Is goin' away
She has got a ticket to ride
But she don't care
الإيقاع كان يستوعبني .. بكل ما يضج في ذاكرتي من دلاليك وشُتامة. أحب البيتلز. وأحب ود ضحوية
ولك ودي .. وفي انتظار قدومك الى اليابان يا عزيزي. علي الطلاق تجي هنا ضيف عزيز مكرّم وما تدخّل ايدك في جيبك .. بس انت تعال

الدكتورة بيان .. كيفنِّك
إنتي الظاهر عليك بتحبي شعر الحاردلو سيد الإسم .. وأنا والله يا الله يا الله حتين ألقى لي فيه حاجة تركب في راسي الغليد ده. أها واحدة تانية عجبتني .. لسيد الإسم

بِتْ الـ يَازمان جا بالقَماح قَنّّاصِكْ
لا بِهَجِسْ ولا بْضوقْ الغَميدْ جَسَّاسِكْ
في الزمن القِبيلْ عاجْبانا قُوَّةْ راسِكْ
شِنْ مَعَناكْ بِقيتي شْديرَة لــ مِنْ قاسِكْ

ولو عتّرت ليك حاجة قولي غوووووووووووك

كلامك جميل يا شنتير .. و استميحك عذرافي ان احى الاستاذ عجب الفيا وهو يملك قدرة بالغه فى توصيل ما لااستطيع توصيله ...
الانسان من الممكن ..بل ومن الجائز له الانتها ل
من أكثر من منبع اوالارتواء من اكثر من بئر والأنتماءالى اكثر من مدرسة..وهذالا يجب ان يعيبه.. بل على العكس .. الانكفاءعلي الذات ..ومن ثم رفضناللآخر .. هو اللذى يؤدي بنافى فى كثير من الاحيان الى الديماجوجيه فى التفكير )حلوه دي) واضاعةالفرصة على انفسنا للتعرف والأ ستقاء من تجارب ومعرفةالآخر ..
ولغاية هناوح اقول مع السلامه لأنوكيبورد بكري افسد على متعة الكتابة..

شنتير سان

إنت يا زول بتقرأ أفكارى ولا شنو

تصدق إحتمال كبير جدا فى شهر مارس القادم أجى بلاد الشمس، وتحديدا حأكون فى ناغويا شويه ويوكوهاما شويه، يعنى طوكيو زاتها يمكن ما اشوفها، ده طبعا بتوقف على بعض الأمور هنا، بو اكتملت حاجى مع الجماعة ولو كمان طرشقت يبقى مافى لزوم لى جيتى معاهم

انا طبعا لى "12" سنة ببحت مع اهلك ديل، والله مافى ناس زى اليابانيين اصلا يا شنتير، زمان كنت بقول الألمان احسن ناسن لكين طلاق على اليابانيين مافى زيهم

هى دومو

والله يا المطر سان حكايتك حكاية. طيب ناغويا خليناها .. يوكوهاما دي على مرمى حجر من مقري في طوكيو!!! أها بتطير وين عاد؟ يازول علي باليمين إنت نازل معاي نازل معاي .. طلاق علي .. طلاق يقع فوق راسي ده من السما .. وأنا زول عزّابي طبعاً .. بطلّق كرعيني بس. وبالمناسبة شهر تلاتة معاي زي العسل .. لو حتى بقيت في هوكّايدو وللا أوكيناوا أنا بنهض ليك وبجيب خبرك. الهمباتة آزول بسعلوهم من جيبة الخبر؟
والله الليلة جبت كلام كبار خلاس. المعنى يعني إت قاعد تهابش في أهلي ديل بيهناك وأنا ماني جايب خبر؟ وكمان أتاريك مودّر مرة واحدة آ المطر، شن جاب الألمان المتوحشين على أهلي الصُّفُر؟ يازول ها .. بس تعال .. عليك النبي تجي يا ود الزمزمي. يمين بالله راسك يدوش .. وتاني ما ترجع للبلد الشغال فيه زاتو
والله آ المطر .. قلت لي قاعد تبعبص معاهم؟ شنتير سان!!! هههههها والله حلوة شنتير سان دي يا المطر سان

في انتظارك

العزيز آوت كـاست
فعلاً الإنكفاء على الذات يقودنا الى الديماغوغية .. وأكثر من ذلك .. يقودنا إلى الوهم .. والتوهّم بأننا قد خرقنا الأرض أوبلغنا الجبال طولاً .. رغم فشلنا في تجاوز طور الحبْو. أعتقد أن المتواضعين وحدهم هم ملكة أسرار المعرفة .. ويقيني أن صديقي عبد المنعم عجب الفيا من المتواضعين. لذا أشيد معك بما أورده العزيز عجب الفيا .. والذي أؤمن به تماماً: الأخذ من كل شيء بطرف
تحياتي لك يا آوت كاست .. ومبروك الكي بورد العربي. وللا قاعد تنجر بالكي بورد بتاع بكري؟

الأخ العزيزشنتير .. صدقت .. اناقاعده انجر فى كيبورد بكرى اللذى من المؤكد سيصيبنى بمرض نفسى قريبا ...

أسمح لى بالأفصاح عن اعجابى الكثير بالعديد من اسهاماتك فى هذا البوردالتى استشفيت منها الكثير من النضج ,التمكن من اللغه والمضمون, مع سعة الافق.

ملحوظه صغيرة بس ..وهى ا ننى اخت اوتكاست... بالله ممكن تساعدنى على ترجمة هذا الأسم الثقيل

Oooooooooooops, Outcast is a sister.
والله العظيم يا آوت كاست متخيلك أخ وليس أخت. معليش يا أخت .. لان الإسم الذي اخترتيه لا يدل على النوع أوالجنس

أها يترجموه كيف يا ربي؟ والله علمي علمك يا أختي .. لكن اقول ليك .. غيريه بحاجة توحي بالنوع .. وده بقى عند بكري هناك في المكتب بتاعو.ه
أشكرك يا آوت كاست .. وأشكرك أكثر على إعجابك بخطرفاتي. وأوعدك يا أختي بأنني سوف لن أخطئ مرة ثانية في اختيار الضمائر التي قررتها اللغة للتعاطي معكِ كأخت

ولك الشكر مكرراً

هى، شنتير سان، سو ديسنى

أنووووو، كدى قول بس انشاء الله المشروع يتعمل ، لأنه ده مشروع بى قريب نص مليار دولار، عشان كده بيتطلب تجهيزات كتيرة جدا ، أنوووووو، فى واحد صاحبى والله يتخت فى الجرح عازمنى فى بلد اسمها قال لى ماتسوياما اظنها فى شيكوكو، لكين المشكلة انت عارف اليابانيين وال إشكيشوال، يعنى بالثانية البرنامج يتعمل، وبالمليميتر، انشاء الله تصدق

تعرف انا قارنت ليك الألمان بالجماعة ديل فى النظام والدقة بس، لكين فى المشاعر والنواحى الإنسانية، طبعا الياباناب افضل بمراحل

وكارميشتا، دومو

ومع دخول الليل في عمق مسائه .. أتثاءب .. وأختم بقول شيخي العارف بمقتضيات الواقع المَعيش:ه
الليل أمسى والنعسان جرايْدو يدِحَّنْ
وكَبَسْ الهَمْ على الصُّلَّط قِلوبهن وَحَّنْ
كَضَم الْجِرَّة سَحَّار الغروب اتْمَحًّنْ
نعود سَلْمانة يا عُمَر الظروف إنْ صَحَّنْ

المطر .. يازول انت بتقول في شنو ها؟ نص مليار دولار؟ ده شنو ده؟ غايتو لو جيت هنا أنا بقنص ليك وبشيل آخر إيدك. الكتراااااااااااابل

雨様、今金曜日の朝、私は本当にすごく眠い。でもね、　少し話す事が出来る。

كده كويس معاك يا المطر؟ يازول الليلة غايتو دخلتي مدرسة مغزللة (والله مغزللة دي إلا يعرفها مولانا ود معدوف الله يطراه بالخير)ه

في مقارنتك لليابانيين بالألمان، كنت يبدو لي، مدفوع بتشابه تجربة الاحتلال .. والكثيرون يقعون في هذه الاشكالية .. لكن لا توجد مقارنة بالنسبة لي. ما في يا زول ها .. والله العظيم مافي. بس الله لماهم سوا ساي في الحرب العالمية التانية .. لكن علي بالدين ما في اي شيء بلمهم

دومو يوروشكو
شنتير تو مو شْمَس

الاخ شنتير

انا عرفت من البوست دا انك في اليابان و من الاخبار عرفت انو جاكم زلزال انا ما عارفاك في اي منطقه لكن اتمنى انك تكون بى خير

شكراً لك يا أختي راوية
الجميع بخير .. وأنا بخير وفي أمان الله. أنا موجود في طوكيو .. والزلزال كان بعيد خالص في الشمال .. يعني نحن شاهدناه زيكم في اخبار التلفزيون

شكراً لك .. وربنا يسلمِك

شنتير أخوي
كالعادة بوست أخر متميز وممتع
تدهشني كتابة الحروف في اللغة اليابانية و أخالها تحوج المتعلم لدروس في الفنون وأذكر عندما كنا طلاب في معهد الدراسات الأفريقية جامعة الخرطوم تقدمت لدراسة اللغة اليابانية إختيارا وكان من يدرسها هو القنصل الياباني بشخصه وذلك حتي يحل مكانه أستاذ متخصص وعدت السفارة حينها بإستقدامه ولم أستطع الإستمرار أكثر من حصتين وذلك أولا لشكل الحروف وعدديتها فقد علمت أنها تذيد عن الألف حرف وثانيا للأدب العجيب الذي كان يعاملنا به ذلك الياباني المدهش فقد كان ينحني كلما وجه لنا الحديث ونحن تربينا علي (ليكم اللحم ولنا العظم) فكان أدبه الممعن في التطرف لو جاز التعبير سببا أخر لهروبي

أبا .. ياخوي انت طلعت خالد الحاج .. وأبا الأنا بعرفو اسمو خالد الحاج .. دحين بطّل اللبط بتاعتك دي وما تنكر أنك خالد الحاج

أزيك يا ابو الرجال .. قلت لي اليابانيين عقدوك؟ والله ديل شعب يبدو لي انهم انحدروا من آدم وحواء آخريْن. شعب يصعب فهمه .. ولغته تصعب كتابتها.ه
يروى أن ياسوهيرو ناكاسوني (رئيس الوزراء لمن كنّا صغار)، في أحد اجتماعات زعماء الدول الصناعية السبع الذي خصص لمناقشة تحرير التجارة وإزالة العقبات التجارية بين الدول الصناعية، ابدى شيئاً من عدم الرضا عن الجمارك التي تفرضها تلك الدول على الصادرات اليابانية. والكل يركز على التعرفة الجمركية ونظام الكوتة .. لكن المرأة الحديدية مارغريت تاتشر خاطبت ناكاسوني بأن اخطر عائق تجاري تواجهه الدول الصناعية مع اليابان هو اللغة اليابانية وليس القيود التجارية التقليدية المعروفة. يازول دي لغة برسموها رسم .. زي القليب الراسمو حنة
أها لو هربت من الآفرو إيشيان ماك خاتي تب

شنتير
و أبدأ بتحيتك عساك طيب
بس ما عارفه حكاية الزلازل و الأعاصير الطايحة في خلق الله في أمريكا و اليابان دي حكايتها شنو، ربنا يسهل و حمدلله على السلامة.
بالمناسبة شكرا على قول كلمة حق في البوست بتاعي السابق.

أزيك يا ندى. نغير التحية: نعلك بيخير
أولاً: ولا شكر على واجب. تعليقي في البوست الذي ذكرتيه كان واجباً .. لأني أحسست بأن الأخ مهاجر قد أساء الفهم .. ولم ينتبه كثيراً لقصدِك. وظننت أنني قد تفهمت مقاصد كل منكما .. واتضح لي عمق سوء الفهم الذي بدا من جانب الأخ مهاجر (في ذلك البوست بالتحديد، ولا علم لي بالبوستات الأخرى) .. بسبب اندفاعه، ربما

نجي للزلازل والأعاصير الأمريكية اليابانية. علمت أن اليابان جغرافياً تقع داخل ما يعرف بحزام الزلازل والبراكين. أها دي غلطتهم هم. لكن امريكا دي والله ما بعرف الحاصل فيها شنو أو سبب الأعاصير المميتة البتحصل فيها دي. أمريكا ليست معزولة عن العالم كالجزر اليابانية .. ويفترض أن ما يصيبها يصيب المكسيك وكندا .. وبعض القرى الواقعة الى جنوبها .. لكن كل كارثة تقع .. تقع في الولايات المتحدة. يبدو لي أحسن يتصلحوا معانا شوية .. نحن المساكين .. عشان ربنا (أو الطبيعة) تتصلح معاهم
والله أعلم

أعلن سعادتي البالغة بهذا البوست الذي أعاد لنا نفس راهب الهمباتة الأصيل .. قراءتي المتأخرة لأصل البوست ومداخلاته أجابت عدة تساؤلاتي كانت تتناقز في ذاكرتي قبل الدخول إليه ، فحمدلة ع السلامة ... شيخ العرب شنتير ... نكرر إعجابنا بفرائد الأوابد التي تتحفنا بها .. أعيد لك من بضاعتك هذا المربع الذي لصق بين لهاتي ومقدمة حلقومي .. شرقني خالس ..

شغل القوة يا أم قُرقُد عليه شداد
والسفر أب مساويكاً حجر غير زاد
العطا من عدم ندّي ونقول ما عاد
وصبّارين على الكاينات برا ميعاد

هذا أنت قطع شك .. وإن كنت القائل أو لم تكن .

وين يا اهل العوض .. أهل العوووووووض .. ماك طيب آ عيسي؟
اصلي يا اخوي الايام دي انا بقيت دخلتي للبورد ده زي الكَمْعَة .. لاني جاري .. وجاري في شنو؟ علي الطلاق ماني عارف. جاري بس. الشوق جبل .. إت وين بلدك؟

من أمّات رِميلة وقمْنا مِنْدَرْجين
شَقَاك يا القِرْد .. بِتَرْدَح بالسِكَكْ لا متين

باقيها ما في ليه داعي .. اللهم أرحم الطيب ود ضحوية .. واجعله مسماراً لقلوب الباكين على فراق السودان!!!!! قال غربة قال؟