محمـد ســواق الأمجــــاد

العزيزة ميادة


اولا دى قصة حقيقية وإلا من ملاز افكارك المهم حأوريكى رأى

انا بعتبر البنت دى عاقلة وموضوعية جداً , يعنى صاحبنا بتاع الامجاد كان داير يعرسها متين ؟ بعدين لو لاحظتى فارق السن بيناتهم قريب خالص ، حقو يفتش ليهو واحدة يادوب دخلت اولى جامعة على بال ما يكون نفسو ، بعدين الفلقصة اللى عليهو شنو وجيبو فاضى ، فى الزمن ده عشان تحب لازم يكون عنك معدات الحب اولاً.

كويس يا ميادة....... مافي عوجة..انا اعتقد ممكن يتزوجو...وبكل بساطة....طالما هم الاتنين عندهم رغبة...

ترهاقا...... كيف الما عندو قروش ما يعرس ولا يحب.......انت كدا بتساعد على انقراض النوع

يا سجيمان
كلما تشوف ليك سيرة شاكوش ول جرسه تجي جاري
اركز يا زول قالو السترة و الفضيحة متباريات
الاخت مياده
الزمن اصبح ما زمن مثاليات و البت تلحق زمنا قبل ما يجي الولد للجد يقول ليها امي منعتني

وانت قايلها ما بتحصل والله انا بعرف لي ناس حصل ليهم نففففففففس الموقف دة

شي عجيب

سجيمان يا خوي الله يعطيك العافية (زي ما بقولو الجماعة الطيبين الهنا) منو ديل البعرسو بكلللل بساطة انت قايل روحك وين وفي ياتو زمن..شكلك زي الشالتك نومة...صح ولا ما غلط؟؟؟

طبعا اي بت بتحلم انها تعرس ليها راجل شبه كامل ويريحها ويسعدها من كل النواحي لكن كمان ما جابت ليها طيارة عين...

أعتقد ان هذه السارة شخصية مادية بحتة ومن الصنف الذي يبحث على المظاهر .. وتلاقيها الآن هي أتعس مغتربة .. مرمية في شقة ولا تسوى وزوجها كل يوم مساهر في الجمعية ويجيها بعد منتصف الليل ..

واحلامها بالدهب البيملأ الإيدين وبيت في المعمورة كلها أصبحت أحلام ظلوط !! وتلقيها لابسة العراقي (بتاع القش ) يعني بناطلين وإسكيرتات ما في ..

أما الزول محمد بالفعل أمه داعية ليه ... وإلا كان هيتورط مع السريرة ..

والخسران الأول التعيسة سارة ثم عريس الغفلة ودة طبعا من وجهة نظري انا...

الحل فى تعدد الزوجات
و اقترح على المغتربين المتزوجين ان يتبنوا المشروع ده
ده طبعآ اذا " النفوس تطايبت " .... و بدون زعل

أهاااااااااااا يا كوستا دة الكلام البجيب الهوا

بس انشالله انت تبقى قدرو ومااااا تنط بعدين

محمد بعمل دورين كل يوم
الخرطوم امدرمان وبالعكس

الله ليكم من الامجاد

دورين بس يا سنتي!!!والله كان كدي ليها حق البنية تشوف غيرو..دورين ديل يسون شنو!!!!!شي عجيب

خط ام درمان طويل يا ميادة دورين كل يوم بغطن معاهو ومعاها اذا صبرت علي رزقها
طبعاالدور الواحد ماشي وجاي في حساب الراكب بعملوا حسبة ما بطالة

اها أكان كانو كل الراكبين طلبة...شنو تسوي!!!!تقعد ترجى لبتين

يا ميادة

امجاد مافيها طلبة ودايما الدفع مقدماولا ما بتحرك لي قدام

والله كان ترضي بيهو زول بيعمل دورين بامجاد في ناس ما لاقين شغل زاتو

Quote: قالصلى الله عليه وسلم : ((ثلاثة حق على الله عونهم : المجاهد في سبيل الله والناكح الذي يريد العفاف والمكاتب يريد الوفاء )).

اذن هو ضعف في الايمان وقنط من عون الله

احييك اختي مياده على هذا الطرح الواقعي والشجاع
ناقشنا نفس هذهالنقطه في بوست قديم
و كثير من الاخوات في البورد كان رايهم معاكسا للواقع
وهذه المشكله هي السبب الرئيسي في تغير اخلاقيات الشباب
و عدم جديتهم في علاقتهم لانو عارفين انو البيع ممكن يحصل في وقت
و بابخس الاثمان

اكيد محمد ما خسران
والعريس ما خسران
خسرانه البضاعه
الزواج اعمق مفهوما و ارقى ابعادا من تلك

كل الود والتحايا

يا عريس ازيك والف مبروك وبيت مال وعيال انشالله..

بعدين تعال هنا انت البدخلك في مواضيع العزابة شنو!!!

بعيدن وييين الود الفاهم ولا البنية الفاهمة البفكرو قدر دة !! اذا اتلقت البت الود بكون مخو فاااارغ والعكس صحيح..واذا كانو هم الاتنين فاهمو بخشو الاهل ويخربو الموضوع...غايتو بس الله يكون في عون البايرات والعزابة

الله يبارك فيك يا مياده

كيف البدخلني شنو
في فرد كميات عزابه عايزينهم يتخارجو
LOoOOooOoOooOoOoOOoOoLZ

صدقيني كلو ممكن بس الزول يكون مؤمن بي اختيارو
والصبر طيب
بعدين كيف الزول يحب زوله تفكيرا في وادي وهو في وادي او العكس
اساس الحب التفاهم والانسجام في الافكار والاحاسيس في ان واحد

عندي سؤال يا جماعة
هو لازم أي حب يقود إلى الزواج ؟
وإذا لم يقود فهل لابد أن نبحث عمن ندينه ؟
أعتقد أن الحياة الجامعية حلوة ، وتكون أحلى إذا كانت بصحبة من تحبه ، وبعدين اللي يسويه ربنا كلو خير
بس وسعوا صدوركم
أنا شايف كده
يعني مرحلة لذيذة تقضيها فإن أثمرت لك فبها وإن أثمرت لغيرك فهي القسمة

ايواااااا قلت لي كدي يا ود قاسم..

بس اوووعى تكون من نوع جكسوية للجامعة وواحدة للحلة وواحدة للمواصلات وواحدة لزرة الامتحانات وواحدة لـ...لكن ما لقيتك تكنولوجيا وكدي

الاخت ميادة ;وبقية الحاضرين

لكم التحية وانتم تسبرون اغوار الوقائع الماثلة والحاضرة فى الزمن السودانى الاليم

ظاهرة الشاكوش تعبر عن مرحلة متقدمة من مراحل التطور الاجتماعى ، هذا يؤكد ان البنت تدخل فى علاقة عاطفية بكامل وعيها وارادتها الى درجة اصبح فيها من الممكن ان تقول الفتاة وبحضور اقاربها انها تحب الشخص الفلانى هنيئا لنا بهذه التطور

اما اذا قررت الفتاة ان تبيع الشاب او تديه شاكوش كما تحلو التسمية، فقد تتباين الاسباب ما بين ما هو اقتصادى / عدم القدرة فى الراهن والمستقبل/ وماهو اجتماعى / مثل عدم توافق الاسر/ وما هو ثقافى/ الخلافات القبلية نموذجا/ وهنالك ما هو ذاتى / انتهاء احساس الطرفين ببعضهما البعض/ وهنالك ما يمكن ان يدرج تحت بند طيارة العين/ لازم يكون البيت ملك وعربية خاصة

مهما تكون الدواعى فكان للبنت شرف المحاولة وعليه يحب قراءة كل شاكوش حسب مسسبباته، لكن تعالى يا ميادة نشوف وين التطور

اولا حتى يومنا هذا المراءة فى اغلب الاحيان مابشاوروها حتى وان فعلوا فليس ذلك سماع رايها الذى قد يكون بالرفض طبعا ولكن تشاور بصيغة اخبارية، وما زالت المراءة مضطهدة و مفعول بها ومازالت ما بتشق الراس وما زالت شهادتها نصف شهادة الرجل حتى ولو كان معتوها ومازال للذكر مثل حظ الانثيين،

فكونها تصبح فى موقع ان تختار وان تترك وان تحب وان تكره وتنسحب بشاكوش فيا له من تقدم وهنيئا لنا به لمحمد سواق الامجاد الشرف فى ان يكون احدى الشموع المحترقة فى كيمياء التغيير كما كان لنا الشرف من قبله وقولى ليه كثر هم من يقول : كلنا فى الهوى سوى وما يقتلنى يقوينى

احييك يا ميادة على نقل هذه الصورة الدرامية الحية وربنا ما يوريك شينة فى عزيز ليك

بكرى الجاك

أسمح لي أخونا بكري أدخل في الخط وأهنيئك على النظره إلى الجانب المشرق من القصة.... ومزيدا من التطور للسودانية

بنت الحسين

اللهم آميين يا ود الجاك...جمعا انشالله

والله يا مايا إنت زاتك بتاعت محن... الموضوع لزيز... والقصة ما بعيدة أبداً.. وبالعكس... لو كنت قلتي لي اتزوجوا كان اندهشت... العقدة يا عزيزتي في العين المليانه.... الواحدة كان دايره دهب.. وكان دايره تياب.. وكان دايره فشخره (ودي وجهة نظر أحترمها) ما ليهاإلا مغترب مليانه وعنده رصيد في كم بنك... لكن كان بعدين فلّس.. ومرض وبقت ما عنده التكتحه... بتقبّل وين.. وهو زاتو بقبّل وين..... القناعة والله كنز.. الزول يرضى بالعنده... والله بيديه أكتر مما يحلم بيهو...

بعدين يا مايا ياختي.. قصة عرس شرايط الأعراس ده كيفنّو.. ؟؟ هو شرا طماطم؟! تسلمي يا فاهمة على المواضيع الجميلة دي...
ولك الود

بنت الحسين

مريومة كيفنك..

مغترب شنو ياختي..انتي من زمن المغتربين..اسالينا منهم نحنا..والله (اغلبهم) كلام ساي..تلاقي الواحد منفوخ جنس نفخة انا وانا وانا واوووول ما تجي سيرة الجد تلاقيهو نفس طوالي

غايتو بس الله يدي العافية

عاد يا مايا عندنا نكته في البيت... في برنامج ما يطلبه المشاهدون.. الواحد يجي يهدي ليك.. يقول لي فلان ولي علان.. ولي محمد في السعودية... أخوي مستهبل... قال طوالي... حسي محمد ده تلقاه جاري وساكينه ناس الشرطة عشان الإقامة..... الأغرب إنه في فهم جديد في السودان يا مايا... يعني مغترب دي تجب ما قبلها.. لا قراية مهمة.. لا فهم مهم.. لا شخصية مهمة.. المهم مغترب.. ونقطة.... ده كلام يا جماعة...؟! غايته ياختي السترة والفضيحة متباريات.. الله يقسم لينا الخير... ويرضينا بالقسمة...

حالة سعبة والله يا العذابة

اذيكم يا وليداتى
تعالوا النكلمكم
عن ايامنا الواحدة بتعرس كيسها اللى بيتخرج ويشتغل طوالى وفى سنتين يكون اتخرجت تعرسو طوالى
يبنو بيتهم طوبة طوبة وعشهم قشة قشة وتسكن فترة مع اهله
وتلد الطفلين الاوائل فى ركن بين ناس الكيس
لغاية ما يرقو ل B
يقومو يرحلوا فى نص بيت براهم لغاية ما يخش المجموعة ياجرو بيت كامل
دا على ايامنا
اسع ذى محمد دا يقعد عاطل 6 سنوات وبعد 20 سنة ما يلم حاجة يتعرس كيف
بعد ولدتا بناتى حتى فهمتا ليه امى كانت دايرانا نعرس رجال تقال عشان بس بتحبنا وما عايزانا نبقى من آل طوبة طوبة
لانى اسع طوالى بقبض نفسى انى عايزة اعرس لبناتى ناس مركزين وما تبدأ حياتها بطوبة طوبة وقشة قشة
ذى يعنى تجنبهم المشاق
بس دا قلب الام المحب
ام البنات البغيرو رايهم عشان اسباب مادية طبعا عدم الوفاء بالعهد من علامات النفاق
من اصلو ما كانت ترضى تخش فى علاقة هى عارفة الزول ما بيقدر يحقق ليها احلامها
وبرضو فى بنات كتار بيحبوا باخلاص و يجوا يضربوا شاكوش عشان واحدة عندها جواز او اقامة
فيا وليداتى الزمن دا
الحب ما عنده مكان واى حاجة بحسابات
من الاول اى زول ما يشكح حبو ساكت
ومحمد الله مرقو لان الرفيق المادى
دا عقاب ربانى
يخليك تحس بالنقص عمرك كلو

هى لكن يا خالتى ما مسحتى بينا الارض عدييييل. خلاص انا شعرت باحباط ودبرسة شديدين وفى طريقى للانتحار وكده.

Quote: هى لكن يا خالتى ما مسحتى بينا الارض عدييييل. خلاص انا شعرت باحباط ودبرسة شديدين وفى طريقى للانتحار وكده

loOooOooOoOoOOoOoOlz

Quote: من اصلو ما كانت ترضى تخش فى علاقة هى عارفة الزول ما بيقدر يحقق ليها احلامها

دا الكلام الصاح

Quote: حسي محمد ده تلقاه جاري وساكينه ناس الشرطة عشان الإقامة

loOoOooOOOoOoOoOoooooooooolz

Quote: واوووول ما تجي سيرة الجد تلاقيهو نفس طوالي

loOoOooOoOooOoOooOoOoOoOOoOoOoOlz
حاله سعبه زي ما قال ابن منتل

يا ايهاب مش عشان عرست تمد لينا لسانك..شد حيلك شوية وادينا راي مفيد...يستفيدو منو الوليدات ديل

يادووووووووووب اسة شعرت بالاحباط..لكن ما بالغت!!!

دا هو الكلام المفيد

Quote: قالصلى الله عليه وسلم : ((ثلاثة حق على الله عونهم : المجاهد في سبيل الله والناكح الذي يريد العفاف والمكاتب يريد الوفاء )).

اما اللي تطلعاته اكتر من كدا فهذا هو الكلام المفيد

Quote: من اصلو ما كانت ترضى تخش فى علاقة هى عارفة الزول ما بيقدر يحقق ليها احلامها

لا استطيع ان اصف لكم مدى سعادتي كلما رأيت ردا على بوست اكتبه ، وخاصة التعليق المفصل و المداخلات الثرية ... وكم انا سعيدة بتواصلي مع ابناء بلدي الذي حرمتني الغربة من التعرف اليهم عن كثب ..

اعلم بأني اقسو بعض الاحيان على الآخرين ... ولكن ألا تتفقون مع بأن الزمان اقسى مني ؟؟ لا توجد قاعدة عامة وهناك دائماً شواذ ... و لكن هذه الشخصيات تعيش بيننا ومعنا وقد نكون سبب في وجودها بشكل او بآخر... فلما لا ننكئ الجرح القديم؟ ( مع الاحترام للفقيد مصطفى سيد أحمد).

دائما ما كانت الفتاة السودانية مثالاً في الثقافة والأدب الجم ... ولكن ألا تتفقون معي بأن 99% من بنات الجامعة هذا هو تفكيرهن ... ليس اللوم عليهم ولكن المجتمع ايضاً ملام ... على قولة المثل كده ووب وكده ووب ... لو تعلمت ونجحت البنت ، بيخافوا الرجال منها وبتبقى عانس ... لو اختارت الطريق الاسهل ، بتعرس بالطلبية على طريق as seen on TV! وتعيش زي حبوبات زمان لما كانوا بينادوهم من الشارع ويزوجهم مع الفرق في الظروف حيث انو البنت بتكون بترقص في حفلة !!... في حالات بسيطة جدا ... تتزوج بالطريقة الصحيحة و بتفيد عائلتها و مجتمعها من تعليمها ... وما قصدته بما الذي تتعلمه ، هو كيف تقبل انسانة متعلمة الا يكون لها حق الاختيار الذي كفله لها الشرع و تقبل ان تكون سلعة تعرض في الشاشات و تـُختار كرفيقة طريق لزوج لا تعلم ولا يعلم عنها شيئا غيرتسريحة شعرها او فستانها في حفلة زواج !!!! إذا اردنا ان نتقدم كمجتمع لا بد ان نتطور كأفراد أولاً ونطور مؤسسات الزواج لدينا لان المجتمع اساسه فرد و الفرد نتاج اسرة و الأسرة اولا واخيرا أم.

صح الكلام دة ولا ماااااغلت؟؟؟

حاشاك الغلط



يلا تانى ما تدبرسى وتدخلى الناس فى ورطة الذنب

الاخت ميادة وبقية الاعزة
اود افادتكم على حسب تجربتي وكمحارب قديم ، رجل كنت فى السابق مفعم بالرومانسية والاماني الوردية ، بان الزمن العلينا دا الحب صار اكذوبة كبرى والبنات صاروا واقعيات جدا" والتفكير الواقعي يعتبر مصلحي ، والحب حاليا فى نظرى هو الاحترام وليس الا كاى علاقة انسانية اخري . ولو الواحد وجد انسانة مثالية بمعنى الكلمة يتزوجهاعلى طول وبالعدم زواج بنت الاهل هو الخيار المناسب فى الزمن العلينا دا ، وليس هذه وجهة نظر شرقية متطرفة ولكن واقعية من انسان جامعى ومتفهم للحياة وشرب الكثير من مقالبها وقيل قديما" هن رحمة لنا وهن كيدهن عظيم واحزروا الكيد .....الكيد ياشباب