Post: #1
Title: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-20-2003, 12:11 PM
Parent: #0
الخميس والليل يرخي سدوله على شاطئ هذه المدينة الساحرة
وفي درتها الجميلة حيث سحر وطلاوة مكان تحس انه شاطئ اوروبي
اطربنا ذلك الشاب القادم من رحم الابداع ...المولود فنانا
فاذا غنى اشجى واطرب واذا رسم تنطق اللوحة جمالا وفن ....رافقته لاشد على يده مشجعا فاذا به يشدني الى آفاق ابداع وسماوات من الطرب الاصيل ...نثر على الجمع عطر فنه وعبق صوته الجميل فتجاوب الجمع والليل ..وطرب البحر وتدافع موجه محييا فيصل عبد العزيز....فنان يتقدم بقوة لينثر الفرح في ليل المدن الحزينة
غنى للوطن وللحبية ...عرض الجمع وتمايلو طربا ...
فهنيئا للمدينة مقدم هذا الشاب الفنان
وقبلها هنيئا للمدينة رفقة هشام يازول يازول ذلك الشفيف المتفرد
فالجلوس للرجل متعة لا تحدها حدود فهو حامل للمسك فان لم تبتاع منه اكتفيت بزاكاوة العطر
وهنيئا للمدينة ان يقود لقاءاتها شاب ينبض حيوية ونشاط ...ناصر الليندي..رفيقنا في المنبر ...
وهنيئا لي وللمدينة رفقة كولا وصداقته ...وانسه وجمال روحه
هه
لقد فاجانا الصباح
|
Post: #2
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: brakat
Date: 09-20-2003, 06:04 PM
Parent: #1
قرجة الرائع
تحياتي
والله الواحد بحسدكم على تلك الأمسية الرائعة والصحبة الأروع
|
Post: #3
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-20-2003, 06:23 PM
Parent: #2
صديقي بركات
رب صدفة خير من الف ميعاد
هكذا التقى الجمع دون ميعاد
فاختلطت الدهشة بود مضمور مطمور
ليتك كنت هناك...وليتنا نلتقي دون ربطات عنق
مشنقين العمم ...وبارمين الطواقي
|
Post: #4
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-21-2003, 05:00 PM
Parent: #2
الحب الهرانا وخلانا قلنا الروب
محمد معانا ما ننجدع بالطوب
شوفو السنتمانا جاب الكلام مقلوب
شان الحمبكانةفى منديلو راسما قلوب
وبرى منكم
برى
هذه آخر ما جادت بها قريحتى فى بوست فايروس خطير لكاتبه خالد أبا وهى دعابة مع سنتمنتال الذى افتقدناه فى تلكم السهرة الجداوية - جدة غير - كما تعلمون
أتدرى ما هو الحب الذى أعنيه هنا يا قرجة?
هو حبكم وحب اللقاء بكم وحب التعلق بأمثالكم من كرام القوم فقد ولى عهد حبنا الأول الذى كنا نتصابى فيه ونهيم عشقا فى الحسان ثم كبرنا فكبر حبنا ليشمل دائرة الأصدقاء والأقرباء والأحباب أينما حلوا او ارتحلوا
هكذا يكون الحب لمثلى ومثل أقرانى العجائز ولندع التصابى لسنتمنتال وأشباهه فنحن منه براء
ولك قبلتين من أخ أكبر ووالد
تاه فيك حبا
أوع تكون اتعقدت
|
Post: #5
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-21-2003, 06:02 PM
Parent: #4
هشام اخوي
دحين نقيزك ...وعرضتك ديك حقت زولا عجوز
يازول ها انا قربت اشيل ليك السقف لانو كان معاكسك
يازول واحد من اولاد الزمن ده ينط نطة واحدة زي حقتك ديك الا يقع
مفرتك ضلفة ضلفة ...ونلملم سنونو سنه سنه...ده لو ماكان مع الوقعة رايش
يازول انت من ناس كانو بيقومو بقزازة السمن قرطعك قرطعك قرطعك دل تختها فاضية ...الا جا عليك زمن قبل ما تشتري الحاجة بقيت تشوف نسبة الكلسترول والدهون
زمن ؟؟
|
Post: #6
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-21-2003, 06:27 PM
Parent: #5
يازمن الأعاجيب والدهون والشحمة
زمان المايونيز وحاجات تسوى التخمة
نقرقش فى البطاطس بى صوت يسوى اللخمة
والعجب الإيسكريم يا حليل طبالى الرحمة
مكدونالد سخيف ختانّا بس فد لحمة
وقال وجبة كبار وين الرجال الضخمة؟
اولادنا الصغار دايرين محنة ورحمة
مافيش سندوتش بساوى كيلو اللحمة
ولا لبن علب مشيولة منو الشحمة
يمطقوا فى اللبان والبسكويت فى الزحمة
حليل العنقريب والكسرة فيها الرحمة
يازمن المهازل أريت نعود للفحمة
|
Post: #7
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-21-2003, 06:54 PM
Parent: #6
حليل قرجتنا في الكتوف مشيولة
حليل سكينا في الرجول محمولة
حليل ضرعاتنا للهدوم تشرط تقول قولا
حليل عرضاتنا والسمحة تجر عليك شبولا
حليل وكتنا في المليان وما بكفي لي حولا
حليل حتتنا ورمال حلتنا نجيض ونسنا مدنكل فولا
|
Post: #8
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: cola
Date: 09-21-2003, 08:16 PM
Parent: #1
سلام يالحبااااان من صغيركم كولا
انا من ولاد هســــــع بينى وبينكم كم وكمين حولا
علا كبرني الهم وبهنااااااك بالى مشغولا
هشااام نجضت النضم نجيض
غربلته الشمار دقاق ختيت
بدورلو فولا ماهو قرموشي فول بيت
عمو قرجة حليل سكينك بالجمال والحن مسنونه
وحليل .........
|
Post: #9
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-22-2003, 08:14 AM
Parent: #8
وحليل غدواتنا كسرة في ام لايووق تمام معطونة
وحليل كورتنا من عصرا بدري شتنا غلبنا او غلبونا
حليل جمال بحري وناس بحري بحبهم ماااااا كتلونا
******
دحين اخوي فتحت الوجع بقيت مشتاق للبراق سنونة
بدور لامع الخدود راضية ورزينة واقولك سر كمان حنونة
مشتاق بدور ارجع ملعون ابو الغربة ياخي دي اياما ما مجنونة
والا ما كده ؟؟؟
|
Post: #10
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-22-2003, 08:40 AM
Parent: #9
كيفن ما كدة وانت بتكد الدوم
ام فتفت مظبطة والحلة دكوة وتوم
ده غير الكوارع والتقلية فيها نعوم
وعصيدة السرور واللحم مردم كوم
نشوى وننجعص ونركب حمار كلتوم
فى حلفاية الملوك شوف الجمال مردوم
نقزقز بالتمر والشية شطة وتوم
والروب بالطشت والبيرة فى الخرطوم
|
Post: #11
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-22-2003, 09:04 AM
Parent: #10
هشام اخوي البيرة ما بعرف كيف طعما
علا بسكر من نضم الحلوة بجن بفهما
بتامل حسن الجمال مكمل رماي سهما
بحب دلالا وخجلا وحلللو زي العسل نضما
|
Post: #12
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-22-2003, 09:32 AM
Parent: #11
ات زول ريدة سااااى مازول شرابن وخمرة
تسكرك العيون وبرميك جمال السمرة
وتترتع عديل من القوام الضمرة
وحبها فى قليبك نارن بيوقد جمرة
وشها بضوى نور والله زى القمرة
شوف ذاك القوام بس التقول النمرة
ولا غزال جفل ساكاه لبوة ونمرة
ده البسكر عقولنا ويملاها عرقى وخمرة
بى حب الجمال قلوبنا دايمن عامرة
أخير نستغفر الله وباكر نجيب العمرة
ونسأل ربى يحفظ كل بيضا وسمرة
|
Post: #13
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-22-2003, 09:55 AM
Parent: #12
جراي ايامك يازول الحق وكتير استغفر
علا حب الجمال حلال وكمان فيهو يمكن تؤجر
كعب جفا الحبيب وصدو جرحو منسر
عفصنا قلوبناعلا ضلام الليل فيهو نجعر
تعال يازول اوعك تمش
|
Post: #14
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: aba
Date: 09-22-2003, 09:56 AM
Parent: #12
سلام للناس الحلوة *** الفي الجمال مندحرة
جابنا الدرب وحتلنا تب *** نجري ونكوس للخدرة
في درب الشباب نتشابا *** وفي الخدود الشاربة حمرة
ناس قرجة كولا وزول حنين *** مكتول دوام في السمرة
|
Post: #15
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-22-2003, 10:38 AM
ابا الحنين جانا
اقلع الشي الفوق راسك ده وافتح اضنيك طبق
وابرم شنيباتك ربع كريعاتك شان تطق الحنك
|
Post: #16
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: الجعلي
Date: 09-22-2003, 07:36 PM
Parent: #1
عمو العزيز قرجة
برضو تقول لي صدفة ، دي يا اخوي خيانااااااات ظاهرة
ياخي كان تدونا سلك ونجيكم حاملين الأشواق ودافرنا الحنين
|
Post: #17
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-23-2003, 04:15 PM
Parent: #16
الجعلي صدقني كان لقا الاحبة صدفة
انت عارف حابين رفقتك كتفة بكتفة
اريتك جيت وفي البحر الوسيع تاخدلك جدفة
وان قامت بيك جعليتك تاخدلك عومة وراهاغطسة
بررم الطاقية وللعمة لفها كم وكم لفة
جهز شعورك يا الحبيب اتكيف دردم لك سفة
|
Post: #18
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: hanouf56
Date: 09-23-2003, 07:11 PM
Parent: #17
العزيز قرجة
كنا فى تلك الامسية
وحقيقة اطربنا الفنان فيصل عبد العزيز
ولكن كنت اتمنى ان تتحدث عن الحفلة بصورة اكثر وضوحا
وتتحدث عن اللجنةالمنظمة التى بذلت مجهودا مقدرا لانجاح تلك الامسية فى درة العروس
وعن الفنان الاساسى فى تلك الامسية الذى اطربنا بروائع العملاق وردى
المستحيل
نور العين
هجرة عصافير الخريف
اصبح الصبح
وغيرها من الاغانى الخالدة للعملاق وردى بصوت الفنان مدثر ياسين .. الذى اختلف معه فى الاسلوب الذى انتقد به الاستاذ الموصلى .. ولكنه اطربنا فى تلك الامسية الجميلة
اتمنى التقيكم فى جدة
|
Post: #19
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-23-2003, 07:13 PM
Parent: #17
الجعلى الظريف أريتو كان رافقنا
فى تلك المرابع والله كان أتحفنا
بى حسو الغليد والحكمة عنده سحنة
زى راجل الكريبة صارمن بزيدك شحنة
أكان يعرض معاى وسط البخور والدخنة
ويتعكر معاى من نوع ثيابو السخنة
والفنان بجيب أنواع حسان اللحنة
وردى أكان معانا يطرب يمين للحنا
سودانا الحبيب فى الدره جانا وتهنا
فى ربوع الوطن يلاك نفك الرهنا
وننسى الإغتراب والهم يروح والمحنة
سلام يا المنتدى كل ما مشينا ورحنا
سلام يا المنتدى فى اللمة نحن ارتحنا
ولول لوووووووووووووووووووووووول
|
Post: #20
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-23-2003, 07:22 PM
Parent: #19
دحين يا هنوف 56 أنا شفتك فى الحفلة ديك
طيب مادايم عايز تفاصيل هاك منى الكلام الواضح وما فاضح
انا كنت معزوم غداء اليوم مع الحبيب اللندى لمناسبة سارة واختلسنا بعض لحظات تكلمنا فيها عن منتدى جدة وياريت ناس رابطة البورد لو ينضموا لمنتدى جدة (وأنا ممكن أديهم بريف عبر هواتفهم) لأنه والله شىء عظيم فى عضويته الكثير من أحبابنا من الأطباء والمهندسين والقانونيين والموسيقيين وكل فئات مغتربى جدة ممثلة فى هذا المنتدى وبه اتجاهات حزبية مختلفة اذ أن المنتدى ليس حكرا لحزب انما هو تكامل سودانى رائع سيكون قريبا جدا مضرب مثل فى الشغل الوطنى الخالص وهو يشبه جمعيات الدناقلة بس بطريقة أكثر تقدمية ولا أقصد شيوعية
الدخول كان بقروش 50 ريال للعائلة لكن والله أحضروا لنا ولأولادنا عشاء يفوق الخمسين التى دفعناها وأمنوا لنا وضعا مطمئنا جعلت كل جعليتنا مسرجة عند مدخل درة العروس
المهم شغل نضيف
ولنا عودة
|
Post: #21
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: hanouf56
Date: 09-24-2003, 08:10 AM
Parent: #20
الريس يا زول يا زول
انا كنت اتمنى اشوفك
لكن جدة صغيرة ومدام انتلاقنا فى الدرة اكيد حنتلاقى تانى
انا برضو كنت فى المناسبة السارة بتاع ناس اللنيدى بس ما عرفتك برضو ...
اتمنى انو نتلاقى
الملتقى الاسرى ماشى لقدام
ونتمنى انكم تنضموا ... واكيد ناس الملتقى الاسرى ما حيكون عندهم مانع
ولكم الود
|
Post: #22
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-24-2003, 09:44 AM
Parent: #21
الاخ العزيز
هنوف56
تحياتي ليك واخوك بصراحة بعد فيصل مشيت النادي
ولم احضر باقي الحفل ....فلك العذر وللفنان مدثر يسن العتبى حتى
يرضى .....وارجو ان نلتقي في مناسبات اخرى
|
Post: #23
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-24-2003, 09:09 PM
Parent: #22
هنوف 56 مصير الحى يلاقى
|
Post: #24
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: مهاجر
Date: 09-24-2003, 09:37 PM
Parent: #23
الاحباب قرجة
والريس يا يا زول
حقيقي اتحفتونا بهذه القطعة الفريدة
لكن دي حفلة فنانا جني ولا شنو
وحضورا مضني
نرحب بالانضمام الي المنتدي
قرجة اليوم ادق عليك من تلفون المكتب وتطنش
شكلك بقيت من ناس جدة
لسة العمرة يا دووب بدت
تحياتي لكم
|
Post: #25
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: الليندي
Date: 09-25-2003, 02:10 PM
Parent: #24
الاعزاء يا زول يا زول - قرجة - كولا - هنوف - وكل المداخلات
شكراً لكم كثيراً ومن الليلة العضوية مفتوحة لكل ناس البورد وبالمناسبة يا قرجة وكولا نحن بقينا نسايب دي كيف لما نتلاقي حتعرفوها
|
Post: #29
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: hanouf56
Date: 09-27-2003, 04:30 PM
Parent: #23
والتقينا
وانا سعيد بلقاءك يا عزيز دنيايا
|
Post: #30
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-28-2003, 02:18 PM
Parent: #29
وأنا كمان والله يا هنوف 56 حصل لى الشرف رغم أنى ما لقيت فرصة كافية أكلمك وأدردش معاك
هو انت كنت فاضى لى مع جنس السماحة ديك؟؟؟؟
|
Post: #26
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: cola
Date: 09-25-2003, 08:33 PM
Parent: #1
الاخ العزيز اللندي
حقيقي مجهود طيب ومقدر ما قمتم به لجمع شمل السودانيين
بالمدينة وبصراحة النجاح كان مؤكد لانكم تقفون وراء هذا العمل الكبير الحفل كان رائعا واستمتعا به كثيرا .
وتهانينا والف الف مبروك وعقبالك
والى ان نلتقى
لك خوالص المحبة
|
Post: #27
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: يازولyazoalيازول
Date: 09-25-2003, 09:00 PM
Parent: #26
شوف كولا الظريف لابد يبحبت بى جاى
الناس فى البحر وواحدين بيسمعوا ناى
وواحدين باب شريف رامين مع الرماى
وواحدين فى الشوارع لافين وحايمين ساى
بس كولا الحريف العارفينو زول سواى
يقلب فى المواضيع فى المنبر العطاى
ياريتنى كنت حداه وياريتو كان بحداى
|
Post: #28
Title: Re: بين طرب فيصل عبدالعزيز وانس هشام وكــولا والليندي اشرق الصباح
Author: garjah
Date: 09-27-2003, 09:57 AM
Parent: #27
الحبيب الليندي
تحياتي ياغالي
والف مبروك وعقبالك
العزيز مهاجر
تلفونك مالو مشغول
|
|