عـزيزي الأب : مبـروك ، إبنتك صارت إمرأة

في جو تسوده السكينة ، نظراً لغياب أهل البيت الأصليين (أولادي وأمهم) كنت أتابع برنامج يتحدث فيه أهله عن كيفية التعامل مع البنت في مرحلة المراهقة، وضرورة معالجة مشاكل المرحلة بوسائل متحضرة وكدا .. المهم الكلام جاب الكلام والكلام تاني جاب الكلام إلى أن نطت إحدى المشاركات وقالت ، والله عندنا في الغرب (بسكون الراء) بعض الأسر تقيم حفلاً خاصاً للفتاة في أول يوم تدخل فيه مرحلة النضج حيث يتم في ذلك الحفل حاجات كتييييرة ، هنايات وهنايات إلى أن يقال للبنت والله عاادي ، ومبروك وبوسة في الخد الأيمن وأخرى في الأيسر .. وشرح وتحليل ونكات وضحك وقرقراب وفي النهاية يشاركوها في أكل التورتة وكل قرد يطلع جبلو .

أها في الحتة دي (بعد إذن حسين) قلت بالله يعني المفعوصة دي لامن تبقى مرا ، يعني أن أقوم اتصل علي سجيمان والرحمابي وبدر الدين شنا وأقول ليهم تعالوا الليلة عندنا حفلة في منزلنا الكائن ، عشان بتنا دخلت مرحلة المروية (بقت مرا يعني)؟ ولا نسمي المناسبة شنو؟ ثم ما هو موقفي لو كان الجماعة المعزومون عندهم أولاد كبار ؟ نفضي ليهم الديوان حق النسوان؟ ولا نشترط عدم اصطحاب الأولاد الكبار .. ولو كانت المناسبة عندهم هم ، نشيل شنو معانا هدية للبنية؟ ولا نكتفي بالمعنويات ؟

أهل العوض
التحايا و السلام بالكوم
مالك يا زول داير تخوفنا ، نحن أبوات بنيات ، و لو دخلتْ قصة الإحتفال بدخول الفتاة مرحلة المروية ، الضحك بيشرطنا لغاية الأضان.
باقيلك الحكاية دي بتبدا في السودان؟
طمني الله يطمنك

أبا جهينة
والله ياخ الدنيا دي غريبة خلاص
عليك أمان الله أنا كنت أفاخر بأني هناك من دفعتي من لم يتزوج
وهو في الحقيقة بت واحدة
لكن بعد البرنامج دا !!! غايتو الله يجازي مقدمة البرنامج
كان بتدور تسوي لي الخلعة

وبعدين نسوان السودان ياخوي قعدن يتونسن بي الإل بي سي والام بي سي والسي إن إن .. والله الباقي ليهن شراب السجار بس

أهل العوض

إجازي محنك

يا زول خليتني زي المجنون أقرقر براااي
ياخي تاني ما تقعد براااك كتير
ههههههه

صدقني ما قادر اتمالك نفسي تب

أها ونحن زي ما قال الدكتور –تبكي ساااي

واحد صاحبي هنا ، عندو خمسة بنات ربنا يحفظن ليهو ، الجماعة قالوا ليهو انت اصلو ما تفكر في تمن قطعة الأرض ولا العربات ، لم سااااكت ، عشان بعدين تشتري ليك ( هيلكوبتر ) تراقب بيها مصاحلك بين الجامعات ( وحفلات ) بلوغ المراتية
الله يحفظكن آضحوية .. وصغوية

قلت لي هدايا والذي منو .. سترك يا رب

تسلم بنيتك يا أبو حميد

أبو جهينة

أركز يا زول؟؟؟؟؟

الرحمابي
عزيزي و أخي
نركز وين يا زول ؟ إنت ما سامع كلام أهل العوض. ؟ فكرة الهليكوبتر دي سمحة بالحيل. مافي هليكوبتر مستعمل رخيص ؟
و الله يا جماعة ، ربنا يستر.

أخوي أهل العوض .. مودتي موصولة
والله أنا مع رأي صديقي أبو جهينة .. لأنه الحال من بعضه
ولا أكون زي جدنا الذي كان يركز بابه بعكاز أكبر من مرق العنقريب
ولما الكوع يحمى ينادي البت
يا بت أبقن لا داخل وناوليني المطيرق دي .. يقصد المرق إياه
معزتي للجميع .. سيف كلي

بسم الله الرحمن الرحيم

محبوبي الفنان الفارقني وزادني جنان
أهل العوض والعرض (بكسر الراء أو العين) على كيفك

سؤال لو سمحت هو أول يوم تدخل فيهو مرحلة النضج دا بعرفوهو بي الهنايات والهنايات بالله؟؟؟
والله أنا قايلو بالعمر
وإنت لمن تجي تبارك بدل تجي مدلدل يديك فاضيات جيب معاك بتاعات
أنا البرنامج دا حضرت منو جزء
تحياتي وزي ما قال ليك الرحمابي ما تقعد براك

أهل العوض
سلاااام

تحضر برنامج لا يعنيك تسمع ما لا يرضيك
البرنامج إسمو للنساء فقط وليس النساء والرجال الوليداتهم مافيشين

اهل العوض
والمشاركين /ات
صحيح ان البوست خفيف
ولايحتمل سغالتي
لكن ما قدرت اعدي بالضحكة واوفوووووووت لازم اقدكم شوية
انت ما تشيل روح الفكرة .. ما ضروري هداية مادية .. ولو انها ما شينة يعني
فعلاً البنية في السن دي بتكون محتاجة مؤازة وتطمين خاصة من ابويها
وتطمين الاب بكون ليهو وقع خاص
أحد أصدقاءنا يحكي دائماً .. قصة طفلة في الثالثة عشر من العمر وجدها جالسة تبكي وحيدة بزيها المدرسي (ايام الكحلي ) في محطة الباص وهي غارقة في رعبها ودم اثونتها المبكرة المذبوحة بنصل الجهل .. والتربية السيئة .. استأجر لها تكسي .. ولا زال يدمي قلبه منظر الصغيرات المرعوبات .. اللائي لم يجدن من يطمئنهن ..

اذكر الآن وانا على عتبات الخروج من مرحلة المروية والدخول إلى حيث القواعد من النساء
اذكر تماماً رقة ابي وتطمينه لي .. وكيف كان يجلسني في حجره ويمسك يدي بين كفيه ويونسني .. بدون وعظ يطفش .. كان ينزل هلكوبتر المراقبة من سماوات الرعب والتجسس ليؤسس وحدة مراقبة حية في وجداني ليس فقط لاجله واخوتي وذكور العائلة .. بل لأجلي ..لإنسانيتي لأكون كما اشتهي ويشتهي هو لي ان اكون .. له الرحمة كان فذاً .. ادعو الله ان يهبني بعض قدراته في تربية اولادي وبنتي
وامنياتي لكم جميعاً بالنجاح في المهمة .. ودعواتي ان يكرمنا الله جميعاً في عيالنا أولاد وبنات .

اخوي اهل العوض

والله موضوعك ده قدر ما زازيت منو لقيتو واقف لي في حلقي
زي العشراقة ولعلها بعض نوازع اهل العوض الكامنة من قديم التي تتاور الواحد فينا احيانا زي الضرس

ومع اني قررت اصوم لفترة من التعليق ولكن لحرقص في بطني قررت وباعتبار ما ساكون عليه بعد تلاتاشر سنة ان الله مد في الايام
وبعد ان تكبر البنت يارا في هذا الزمن السايبيري

واري نفسي هناك بنظارتين سميكتين ونازل المعاش

اتعلم ما فاتني من فروض العلم من تلك اليافعة

وسأجدها متكفلة بمروريتها لوحدها

هذا الزمان يا صاحبي اسرع منا نحن جيل الشرك هبر والقمرية عششت
والنبق طلع وحمد اكل ولبد

ذا الجيل سيعلم نفسه بلا كراريس

وسيهدينا نضجه

هذا ما اراه بائنا امام عيني فنحن يا صديقي الآن نستعين ببنت صغيرة عمرها لم يتجاوز الخمسة سنين في برمجة الرسيفر والفيديو والكاميرا

فهل هذه تحتاج لان نعلمها كيف تبرمج نفسها عند اعتاب المروءية
وهل محتاجة لتطمين ما
انت اجبني

الشفع بقوا شواطين يا اهل العوض ونحن زمان ضيعناها في شدت وحرينا
والفات الفات وعمي علي بياع الزيت والرمة وحراسها

هسي حارسين الانترنت والفيديو والفضائيات وبتعلموا دون ما نشعر بتعليمهم

ولان روحنا فيها قمع الكبار والقدرنا ما حا نصدق

نحن بطبعنا كذلك مستهينين بمعرفة الاصغر وهي بعض مما جبلنا عليه من زمان
من زمن يا ولد اسكت ساكت ويا بت اجري العبي وده كلام كبار ما فيه صغار

انا غايتو برمجت نفسي من الأن
ومن لا يفعل حا ياكلها يا صاحبي

مع تقديري

ابويارا

الرحمابي .. ياخ قطعت قلبنا .. كان تطمنا شوية .. والله في الحقيقة حكاية الجامعات المشتتة دي كانت فايتة علي ... وبعدين بعد العرس برضو الواحد بحتاج للهلكوبتر .. يرزقنا الما يعولقنا . غايتو الواحد بعد دا لو مشى المعارض أو التشاليح يخلي بالو من الصنف دا .

سيف كلي .. قلت لي مطريق ... طيب جدكم دا لو برسل البنية للمطريق (المرق) إنتو برسلوكم لي شنو وبعدين مطيرقو دي ما كان يختها تحت مخدتو عشان يستعملها عند اللزوم لمن تدخلوا عليه .

البدري .. إنت البخليك تعاين لي برامج النسوان شنو ، ولا تكون كنت لابس توب أم أواب . هي بسم الله إنتو كمان تياب ما عندكم . أنا كان سعلوني بقول فاتح التلفزيون عشان المرا كان جات داخلة تلقى برنامجا شغال .

الصول الجندرية ... حينما كنا في الصف السادس ، حصلت نفس قصة صديقكم .. لكن بكل أسف ما زلت أتذكر تفاصيل تلك الحادثة المؤسفة ، حيث كانت زميلتنا المسكينة مصب لسفه كل الزملاء الطائشين .. والله منظرا كان يحنن .. وكلنا كنا في دهشة وانحباس انفاس .. لم يتجرأ واحد أو واحدة لمساعدة تلك الزميلة التي سقط في يدها تماماً دون سابق إنذار أو تجربة . فأكملت يومها الدراسي كاملا حتى النهاية في تلك الظروف الموغلة في السخافة .

تحياتي لكم جميعاً

أهل العوض
سلامات
يا أخي أنا أبو بنيات وعايش في (الغرب) بتسكين الراء أريتها ما سكنت سويت لي الوجع دحين يا زول البنات حنينات معاي إلا الكبيرة ليها مدة خلت النطيط في ضهري واللعب تكون دي المرحلة المروية وعندنا هنا تشرب ما تروا الله يكون في العوون .. غايتو أنا الحفلة ماني ساويها والبنية حنيتي معاها ماني مخليها إلا كان لقيت النحل كتر جنب بيتي بستلف عكازة أخونا قرجة عديــــل كده

أبا يارا .. طمنتني الله يطمنك . لكن الجزء المحزن في المسألة إن هؤلاء الشفع طلعونا كيشة . الواحد تلقاه وزنو قدر وزن الكمبيوتر وفي نفس الوكت مضجم الكمبيوتر وينقاشك بي عقل .. والله مشكلة وزي ما قالوا أهل هذه الديار (يا من شرالا من حلالا علة) – يا من شرا له من حلاله علة . بالله هسع يارا دي لمن تبقى حبوبة بعدين حا ينادوها يا حبوبة يارا؟ ولا الزمن داك بخلوا الحاجات دي .

الأستاذ (ابا) خالد الحاج ... بالله إنتو قاعدين في البلد الملانة ديمقراطية ديك؟ وبعد دا كلو يطلعوا ليك في ضهرك؟ يا خوانا أمور الحنية والتخلف دا حقو تخلوهو في سودانكم دا .. لكن عكاز قرجة دا .. حقو ما تستعملو – دا عكاز مكتوب في جناح طيرة . الله يخليهم ويعليهم عيالكم . آمين يا الجندرية

عزيزي اهل العوض
و الله الكلام دخل حوشنا عديل كدة
انا ابو بنيات و شكلنا كدة باليين راسنا للحلاقة
لي صديق لدية خمسة بنات و لما يسألوه
عندك كم طفل بقول خمسة
ثلاثة بنات و بنتين
قال خايف من العين
المهم يا صحبي تعرف بنيات البلد دي
بدخلوا المرحله اياها قبل بنات السودان
تلقي الواحدة ملفلفة بالداهي الاسود داك تقول
حرمة عمرها عشرين سنه

صديقي وقع في المحظور في واحدة من الاجازات
جاه ليك واحد ياعمي انا عاوز
القرب منك
في منو يا ابو الشباب
في بنتك فلانة
صاحبنا عاين يمين و شمال
و قال للراجل و الله انا ما عندي استعداد
ابقي جد لسة.
تقول لي احتفال؟

بسم الله الرحمن الرحيم

أنا استاهل
هسع الوداني أرد قبال الجندرية شنو كان أخليها بعد تدخل وتستعدل البوست وبعداك أخش لكن الشلاقة بس

الاخ اهل العوض

والاخوان الرائعون جميعا هنا
كيفكم
كده

موضوعكم جميل والله ومهم شديد
انتم اخدتو الموضوع من ناحية فيزيائية بحتة

بس برضو في نواحي تانية للفتى او الفتاة المراهقة
ومفروض انه الناس بالجد تراعي الناس ديل
والتغيرات البتحصل في الفترة دي
وبالذات من الناحسة النفسية للفتى او الفتاة
ورغبتهما في الانفصال أو في التمرد
على المجتمع والاستغلال باحساس النضوج

وبالاخص عند الولد وانه عاوز يتشبه بابيه
ويعامل على هذا الاساس والناس تاخدوا برأيه
وغيره من الظواهر المعروفة للفتى

والفتاة ايضا لها تبعات نفسية كثيرة
وبعض الامور فعلا تؤثر عليها سلبيا وبالأخص
احساسها بانه نظرة المجتمع لها اتغيرت
او تعرضها للمساس بها من الرجل الخارجي
واحساسها ان مفاتنها الجديدة تقودها الى معترك
جديد وغريب ومخيف

فواجب التوعية من الاهل في الحتة دي

واحيانا الاهل بيزودوها شوية
بالأخص لما يبتدوا فجاة دون مقدمات او تدرج
بمنعها من اشياء تعودت عليها
كاللعب مع اصدقاءها اولاد
او عدم الاختلاط كثيرا
وفي امهات حتى بيمنعوا البنات بعدها من اللعب
مع اخوانهم او حتى اباءهم
وبالاخص بطرق معينه او انها تلعب بطريقة اولادية صعب
مع انه مافي مشكلة علمية في الموضوع ده

فبصراحة الاهل والاولاد معا
عاوزين توعية
والحديث طوييييييييييييييييل شديد في الحتة دي


والجندرية والله ابوك
الله يديه العافية

وتسلموا كلكم

فالكون .. والله لاكين ما بشارة ... قلت لي الولد قال ليه يا عم والله عندي موضوع ما عارف أبداه كيف؟ وداير القرب وكدا .. القربة الـ يشيليوها ليك رفاقتك إن شا الله .. بالله شوف الشفع ديل . لكن بيني وبينك نحن بعد دا بقينا ناس فواتح وعقد ووساطات وكلام في الاحتفالات .. والله عوجة كبيرة خلاس .. لكن كلو من ولادة البنات ، نحن المشكل دا عاد نشكيهو لي منو ، الله يجازيك يا البيتزا .

هوزي .. العروس .. إنتي الكلام دا ما لسة بدري عليك .. استمتعي ساااي في الفترة دي لكن بيلاقيك اللاقى بدر الدين شنا ..

بالنسبة للتعامل مع المراهقين والله راسنا مليان كلام سمح لكن ما بنعرف نقولو ، بنخجل . نسوي شنو .. قسمتهم كدي ، الله أداهم أبوات تنابل .

الأعزاء الأبهات
العزيزات الأمهات

أتمنى لكريماتكم الستر وأن يحفظهن الله

فقط أطلب منكم طلباً واحداً

دعواتكم الصادقة ،،، بأن يرزقني الله بأبنة

دعواتكم بالله

أهل العوض

قلت نختا البيتزا

أها .. نقع الروبيان ولا الرأي شنو؟؟؟


الجندرية
غايتو اعذرينا مرات مرات بندور الفرفشة
رغم أهمية الموضوع وجديته


الأخ ولياب

ربنا يرزقك ببنية حليوة ورزينة

والله البنات حنينات خلاس .. اسألني أنا

تسلموا

لووووووووووول يا بدر الحنين
تهرش ؟ !!!
هوزي ابوي الله يرحمه ويحسن اليه .. كان فذاً بحق

الرحمابي عذرك معاك
اعذورني انتو علي الثقالة

البدري .. والله معاك حق .. مداخلة الجندرية فعلا مميزة .. ما بنقدر عليها إلا كان نتماسخ ونتغتت عليها ساي

ولياب ، ربنا يديك دستة بنات .. ولو ماعارف الدرب أسأل الجماعة الفوق ديل .. لا سيما أبا

الرحمابي … أبقى فوق دربك دا ، لا تفكو . بعد كلام فالكون دا قطع شك إجازتك الجاية ياعم عبد الرحمن ترقد هبطرش .

الجندرية ، أبوكي دا النوع اللي نحن بنقنعكم بيه لمن تتكلمو كلامكم الكبار داك عن الجندر والبنوت والنسوان والحريم.

اشكرك يا الرحمابي ، وربنا يحقق الدعوات

شكرا أخوي أهل العوض ،،، قلنا واحدة بس ،،، الدرب خابرينو تب ،،، إلا القدر والمكتوب وين نفوت منو ،،، أصلا المدام عاملة عندنا في البيت زي ست الشاي ،،، ما شاء الله أنا والعيال بنتلمى حولها وقتين شاي الصباح

دايرة ليها بنية حنينة تساعدها وفي الكبر تسترها ،،، والبنية سترة لأمها عند الكبر

ومشكور يا أخوي

اكيد تفهم الوالدين والاسرة لهم دور كبير في خلق الثقة والطمانينة في نفس البنت
لكن المشكلة مجتمعاتنا بعيدة تماما عن الدخول في هذه التفاصيل بل هي اقرب للعيب منه للتفهم الكامل

غتدي تعليق بسيط بعيدا عن الموضوع : بدرالدين شنا قصته شنو كل يوم طالع بصورة غريبة ، حيرنا ذاتو
حسه الشواكيش دي لزومها شنو؟

بسم الله الرحمن الرحيم

العفيفة ميَّا
سلااااااااااااااام وإكرام

Quote: بدرالدين شنا قصته شنو كل يوم طالع بصورة غريبة ، حيرنا ذاتو حسه الشواكيش دي لزومها شنو؟

إنتي متعاطفة مع المسمار ولا شنو؟؟؟

, البوست ما هين بس اتخيلت امي قاعدة بدلى هنا وبترد عليكم وخلى الباقى ضحكت ضحك لووووول صراحة الجيل الجديد زي ما قال احد الاخوة جيل مميز ، والجيل الاتمقلب جد جيلنا ولدي عمرو عشرة سنين وبحكي عن الهنايات والبتاعات بدون اي حدود والفضل للاعلانات التى لم تترك للاباء والامهات اي فرصة وتصبحو على خير

اهل العوض وضيوفو الكراااام
سلام
والله مع انو الموضوع لا ليه فيه لا ناقه ولا جمل
لاني بعد لم اصبح بعل
ولم ارزق بعد بالبنيات البحلم بيهن
لكن بالجد الموضوع جميل وشيق
وافتكر قبل فتره شفت فلم بيتكلم عن الموضوع دا
وكان جميل جدا
واظن كمان عملية الاحتفال دي اتطرقو ليها
وكان الهدف منها انو يزيلوا الخجل من البنت
وبيعرضوا كم طريقه ممكن البنت تتعرض ليها
وكيف ممكن تتصرف
يعني ممكن الام تقعد مع بنتها في اول المراحل دي
لانها الاقرب اليها ..؟ وتوريها كيف تتصرف وتقعد تشرح ليها بطريقة مبسطه عن المرحله الجديده
والابو دا اليقعد بعيييييد لانو عندي احساس انو حيتبظه وممكن يعقده
خصوصاً الأب السوداني

واحتراماتي للجميع
ونسأل الله الستر والعافيه