Post: #1
Title: الدكتـــورة....\ حوا الطقـطـاقة
Author: سجيمان
Date: 09-07-2003, 07:04 AM
لقيتها قاعدة فوق بنبرها....في ضل الضحى قدام خشم باب بيتها.....تنضم وتهرج.... تهرج وتقبل علي جيهة ايدها الشمال وتبصق...تهرج وتبصق.....سلمت عليها.... ردت علي بلا نفس....وطنشتني مسافة وانا واقف... حتين بعدين هببتو لي... سجيمان كيفنك؟ .....شفت البقت؟ البقت شنو يا حوا؟..... ناس جامعة الخرتوم....عزلو وردي من دون الفنانين ديل...وادوهو... شهادة الدكترة.....قلت لها لكن يا حوا وردي ما بيستاهل... راجلا مو هين... قالت لي... انا الليلة من صباح الله ومشيت الجامعة...دي دخلتي منها..... عاد يا سجيمان يا اخوي اسكت ساكت...... العميان شايل المكسر.. لقيت لك مكتب المدير جنس زحمة....قدر ما في فنان.... مشى وقال ...تف...علا يدوهو شهادة الدكترة...وزعلانين... اصلو بن البادية داك سوى البدع.... وحات سيدي اب دلوكة... البي يمدغ اللبانة ويلوكا. والجنبو تكورك الكوكا.. يا صلاح حتى من البكى جبت شي.... قال لهم انا استاهل... انا استاهل......ما دام انا واخوي الفاضل سعيد.. عشان نرفع اسم السودان عالي وسط الامم.... تلاتة شهور.. تلاتة شهور في مصر..حايمين بي مايوهاتنا..ونصور في فليم....والجري الجريناهو داك لي حسي جايب لنا... القطايع....اسكت اسكت يا سجيمان... بادي والقيقم.... قالو كان ما اديتونا شهادات الدكتره... وكملن.. ادونا شهادات تمرجية ساكت.....بنقبلها....والقيقم.وقت ما لقى شي..زعل ولما ليك الطلبة ديل....وقال لهم علي بالطلاق... اسمع لي واحد فيكم ساكت يغني قطار الشوق حتى لو في سرو علا عكازي دا يا باهو.....وجاك زيدان داخل...من خشم الباب يسكل... ومتحزم لو بي عمة....وقابل مدير الجامعة عينو في عين المدير... وبي طول حسو.... يغني........
في الليلة ديك... في الليلة ديك
جيت اوريك.... واماغسك
جيت اقول...... يخسي عليك
يا كوم.......... الحسادة
يا الاحميتني... الشهادة
ان شاء الله...... باكر
...........تتقلب..........عليك
..... الراجل يا سجيمان ... يغني ويبكي ويتمخت.....لمن حنيت عليهو....ما سكتو عديل..اسمع جوطة في الاول كنت قايلاها مظاهرة.....الا كان اشوف لك عوض الكريم عبد الله.... جاي بالكورس ويغنو................
ندعي عليه.....ولاّ دكتور
الغتاتة ليه...وا شماري انا
اربعين.... سنة
وا شماري انا
خبرة في الغنا
واشماري انا
غاية..... المنا
ابقى دكتور .... انا...
ندعي عليه...و..لاّ دكتور
..................قلت لها اها يا حوا..... انتي نعل ما زعلتي.؟ قالت لي منو دي؟....انا اختك يا عبدو تي.......انا هوووووي والله زي ديل ولا هامني...... بكار اقطع لي تزكرة بالطيارة.....وامشي فرنسا... بي دلوكتي ... وشيالاتي..... ونزلت الطيارة في باريس..... ادق الدلوكة...... واغني لهم الشحم دا واللحم دا..... ايتيمنت.... من مطاري يتلافوني لك الفرنسين.... ويقعدوني في اجعص فندق...وتاني يوم من الصباح... يجيبو لي شهادتي حقت الدكترة.... ممضية ومختومة من جامعة السربون......
علا يا سجيمان اخوي كدي النسعالك.....وردي ...دا بعد الشهادة دي بيخلي الغنا...ويمشي يفتح لو عيادة؟
|
Post: #2
Title: Re: الدكتـــورة....\ حوا الطقـطـاقة
Author: HOPELESS
Date: 09-07-2003, 07:12 AM
Parent: #1
علا ما قلت لي يا سي جي مان
الوليه دي كانت بتبزق مالا؟
كانت سافه ولا شنو؟
......
بيني وبينك من باب المساواة
كان يدوها ان شاء الله دفتر حساب
|
Post: #3
Title: Re: الدكتـــورة....\ حوا الطقـطـاقة
Author: HAMZA SULIMAN
Date: 09-07-2003, 01:33 PM
Parent: #2
الحبيب
انت لا سجيمان ولا حاجه
انت نصيحان
|
Post: #8
Title: Re: الدكتـــورة....\ حوا الطقـطـاقة
Author: سجيمان
Date: 09-08-2003, 04:17 AM
Parent: #3
حمزة.........شكرا لك..... يا جوهرة صدر المحافل
|
Post: #6
Title: Re: الدكتـــورة....\ حوا الطقـطـاقة
Author: سجيمان
Date: 09-08-2003, 03:31 AM
Parent: #2
....هوب لس يا اخوي هي قنعت منهم...وشايلة فرنسا
|
Post: #4
Title: Re: الدكتـــورة....\ حوا الطقـطـاقة
Author: Teeta
Date: 09-07-2003, 07:13 PM
Parent: #1
سجيمان ااااااخوى
تسلم
جنس الكلام ده ياهو البجيب ليك الهوا
دحين يا ود امى انت الافكار الظريييييييييييفه دى بتجيك من وين
ربنا يديك العافيه ويخلى لك بنيتك الحليوه ديك هى اسمها منو؟ وخلت اكل الورق ولا لسع
تحياتى يا مبدع يا ريحانة هذا البورد
ام الاء
|
Post: #5
Title: Re: الدكتـــورة....\ حوا الطقـطـاقة
Author: haneena
Date: 09-07-2003, 07:44 PM
Parent: #4
سجيمان
اللة يجازيك.. قطعت مصاريني بالضحك
امانة ما كلامك حكم لكن
قلت لي بالمايوهات؟؟!!...لوووول
زكرني اسم الفيلم... رحلة عيون مش كدة؟
وحوا الطقطاقة ليها حق تتنكت من بين الاموات للإحتجاج
مافيش حد احسن من حد
حنينة
|
Post: #10
Title: Re: الدكتـــورة....\ حوا الطقـطـاقة
Author: سجيمان
Date: 09-08-2003, 01:45 PM
Parent: #5
ايوااااااا يا حنينة رحلة عيون.....لما كان صلاح والفاضل طلبة في الجامعة.....كانو في سنة اولى......غايتو جنس محن.....زول عمرو فوق الخمسين سنة....وفي سنة اولى......الله يقدرنا خشمنا بس
|
Post: #9
Title: Re: الدكتـــورة....\ حوا الطقـطـاقة
Author: سجيمان
Date: 09-08-2003, 07:28 AM
Parent: #4
ام الاء.....ما في اي هوا جاء لي حسي.....والحمد لله الجو رايق....... البت اسمها فوفو......مشى فيفي........لانو ديك فيفي عبدو.....انتاية....ودي فوفو....لحدي الان ما حددت موقفهااذا كان ضكر ولاّ انتاية...... لو حددت ضكر نخليها في فوفتا دي....لو انتاية.... نفيفيها...........
|
Post: #7
Title: Re: الدكتـــورة....\ حوا الطقـطـاقة
Author: ALazhary2
Date: 09-08-2003, 03:42 AM
Parent: #1
ولله يا سجيمان حوار في غاية اللطافة والابداع
بعدين ياهوبلس التفاف الكتير دا نتيجة طبيعة لخلو الفم من الاسنان
بس ياريت حواء الطقطاقة كان تكمل لينا مواقف باقي الفنانين واحتجاجاتهم
|
Post: #11
Title: Re: الدكتـــورة....\ حوا الطقـطـاقة
Author: خالد
Date: 09-08-2003, 02:02 PM
Parent: #7
سجومي
ما تنسى حاجة أخونا ود الأمين لحق نفسوا سريع سريع ومشى لي الاتحاد العام للطلبة السودانيين قالوا دايرين يكرموهوا برعاية السيد السمين رئيس جمهورية المغفلين
|
Post: #12
Title: Re: الدكتـــورة....\ حوا الطقـطـاقة
Author: سجيمان
Date: 09-08-2003, 02:33 PM
Parent: #7
الازهري حبابك.............حوا مشت بدري وما انتظرت باقي الفنانين........
|
Post: #13
Title: Re: الدكتـــورة....\ حوا الطقـطـاقة
Author: Maged
Date: 09-09-2003, 06:21 AM
Parent: #1
الله إجازيك بالخير ياسجيمان ياالماك سجيمان
الواحد شوية وإقع فى الواطة من شدة الضحك
إديك العافية بس وإدينا نص خيالك وبراعتك
|
Post: #14
Title: Re: الدكتـــورة....\ حوا الطقـطـاقة
Author: سجيمان
Date: 09-09-2003, 08:17 AM
Parent: #13
ويجازيك انت بالخير يا ماجد
|
Post: #15
Title: Re: الدكتـــورة....\ حوا الطقـطـاقة
Author: Teeta
Date: 09-21-2003, 07:53 AM
Parent: #1
up
ده ليك يا دريمز
ام الاء
|
Post: #16
Title: Re: الدكتـــورة....\ حوا الطقـطـاقة
Author: abuguta
Date: 09-21-2003, 06:20 PM
Parent: #15
سجيمان
الله يديك العافية
الليلة على الفضائية السودانية
كان وردى بغنى يابلدى ياحبوب
لما جاء فى
يامرمى تحت الشمس للغيلة ضلية
وسرحت مع هذه القافية الى ان نسيت الغداء...وبقيت اتامل حال المغتربين عشان الضل بتاع الوطن ما واصلهم
لكن بجد الراجل دا مبدع وفى نطق الكلمات كمان
ياسحنة نوبية ياكلمة عربية ..يالكنة زنجية(بفتح الزين والنون وفتح اللحن كمان وقلت فى سرى وردى دا يستاهل الدكتوراه)
وزمان جامعة جوبا ادت عبد الله السريع الدكتوراة وصار بعدها د.السريع
وبعد كدا يصبح اسمه دكتور محمد وردى ..حظ المحس
شوف الدكتوراة عند عوض ابراهيم عوض خرج من السودان معارض ومشى ماليزيا وقعد هنالك 12 سنة ورجع تانى مزيع ايامه الاولى كان بستعمل كلمة دكتور وبعدها شافها ما لايقة مع المذيع
وايضا زى د.الجيلى عبد العال ...لما يجى يذيع اقوال الصحف شاف ايضا كلمة دكتور ما لايقة قامو حذفوها منهم....انا من راى بشوف لما تكون عندك درجة علمية كبيرة ابعد من الهومك..
وتسلم يامبدع
|
|