الاجازه والشمارات

بالرغم من قصرها ولكنها حلوووووووه مرررررررررره والاحلي انها بين الاهل وسماحتهم وطيبتهم المتناهيه.....مرارتها في الانقضاء السريع... اشراقات... محاربت الباعوض في فصل الخريف... طائرات رش... افراد مجهزين بمضخات يدويه يرشون كل بركه بكل جد واجتهاد...عربات نقل المخلفات تعمل بجديه ... ثم ماذا اترك الباقي للذين قضوا اجازة الصيف في البلد الحبيب ونواصل ودمتم احبتي

Fighting mosquitos in Sudan???? get out of here

الحبيب ناصر انته اعتراضك في شنو جد انا شاهد عيان وده الشفته اثناء الاجازه

ياجماعه شي تاني كمان .... العرس ..... العرس .... بقه شي ساهل شديد... تصورا في خلال اسبوع واحد ووسط الاسره الضيقه ثلاثه اعراس... اختلاف الاماكن... الثقافه.. الدراسه... الفنانين والنسايب كمان... بس زي المتفقين علي شي واحد ... العشاء الكوكتيل... ويحضر العريس والعروس من الكوفير حوالي الساعه عشره ونصف والساعه حداشر تنتهي الحفله وتم العرس ... بالله شوف ما ابسط مراسيم العرس اليومين ديل... يالله الما عرس .. يعرس قبل الناس ما ترجع للقديم واركبو الموجه

معقوله بس .... الظاهر لسه الناس في الاجازه .... غايتو حا اغيب وارجع يمكن القي الناس رجعت من الاجازه او فضلت البقاء في رحاب الوطن والا شنو الحاصل... قال شمارات قال

والله كلامك صاح انا برضو رجعت بعد اجازة حلوة شديد وبرضو ما تنسى ظاهرة الموبايلات - والله يا جماعة تلقى في البيت 5 موبايلات رغم انو في البيت في تلفون - المهم لازم كل زول يكون عندو وبعدين احدث نوع منهم بضحوا فيك لو جيت شايل 3310 بقولوا ليهو تلاتين حشرة - المهم -اجازة حلوة واحلى ما فيها انو الناس رغم الظروف لكن كل زول مجتهد في مجالو وعملو او قرايتو والناس اكثر طموح وما عاد ضيق الحياة يسبب هاجس لهم المهم بتعاملوا معاهو كواقع - وامر شي لمن تجي راجع من الاجازة كاره البلد الماشي ليها وما تقدر تتاقلم معاها وينتابك السوال المقلق لمتين نحن بعاد؟؟؟؟؟؟؟؟؟؟؟؟

شكرا ليك يا ستي ام سهي علي المداخله الموباليه اللذيذه قلتي شنو تلاتين ... والله ضحكتيني شديد فعلا ...الموبايل الموبايل... ما يسمعونا ناس نوكيا يمكن يطالبوا بتعويضات بس جد الناس فعلا .. اكثر جديه وواقعيه ويمكن انتاجيه ويحليل زمن الاغتراب .. لانو جد الشغلانه خسرانه من كل النواحي .. وبمناسبة الاغتراب والمطارات... وقت الوصول شي ما عادي زحمه حتي في الطائرات المرابضه .. اشكال وانواع واحجام... ام البشر غايتو يوم الوصول زي يوم السفر لاتعرف الناس دي مسافره والا جايه والا مودعه وتختلط الامور ويمكن تلقه نفسك راكب في جزمة اخوك او اختك والعجب لو كعب عالي يمكن تقوم تتكوم كمان من الدور العالي وهواء ناس فوق..جد وباختصار المفارقات متباينه بس اقول شنو خلينا ننتظر الناس لما ترجع من الاجازه ونشوف الناس حتتكلم عن شنو والا شنو ... قال تلاثين و.............. والله وموتيني من الضحك

اها يا جماعه.. وخاصتا مغتربين الخليج.. تعرفوا لاني امدرماني وبيراوضني الحنين للشريط القديم بعيد الذكريات في مختلف المحطات.. وواحده من المحطات المتغيره نسبيا... ابو رووف ياناس ابو رووف بقت عباره عن ورشة حداده كبيره فيها مهاره متناهيه لاعمال ورش الحداده وفنها.. بس ده ما الموضوع اكيد ياناس ابو رووف بتعرفوا الصنعه المشهور في زمن فات وما زالت هي صناعه المراكب الكبيره والشراعيه منها.. وبرضو ده ما الموضوع لانو النيل كان زايد زياده كبيره طردت حتي اصحاب الصنعه ده.. بس ما تستعجب لو لقيت عربيه عليها لوحات سعوديه او اماراتيه الخ.. والراجل والاولاد مستمتعين بالمناظر الخلابه خدار شمبات والسواقي هناك والمراكبيه في العصير... طيب وين الست المصون.. ايوه هي هناك بتسعر وتفاوض في اجود الانواع والاسعار...اها ياربي .. المدام كانت بتشتري في شنو اها يا ناس امدرمان المدام كانت بتشتري في شنو للتصدير....

نسيت اقول ليكم اها البيجاوب اجابه صحيحه خاليه من الغبار ليه تذكره علي سودانير اير ون وي من الخليج لي ابو رووف اقصد الخرطوم اها قصرته ولكم حبي ومشاركتكم مهمه حسب النظر وقالوا كل واحد بيشوف العايز بيشوفه علي قول الست مادونا

أنا حاجاوب ليك يا وليم الست الهانم بتختار في حطب الشاف أو الطلح الما بكون قديم أو ماكلو السوس وعمك كعادته اما قاعد في العنقريبلايدلو بدلو او حارس العيال في العربية بالمناسبة الحطب بانواعه صار تجارة رابحة في دول الخليج ما عرافه باقي البلاد كيف وصدقوني عادة في السعودية تجي بنت صغيرة تدق ليك الباب تفتح تلقاها سودانية تقول ليك أمي دايراك بعد شوية تظهر ليك الام وتفتح البرقع من وجهها وتقول ليك والله عندي حطب للبيع أسوى شنو أبو الاولاد سعودوا وظيفتو وشالوهو من العمل وقلنا ندبر أمرنا طوالى تلقى روحك اشتريت منها كواجب وقبل ما تمشي تسألك (ما بتعرفي ليك سودانية هنا جارتك أو قريبة منك؟؟ ) عشان تواصل ايه رأيك - دي بالمناسبة حصلت لي أنا شخصيا الموقف دة

بسم الله الرحمن الرحيم

الحبيب وليم أندرية
سلاااااااااااااااام مكرَّب

أنا لي هسع ما قريت الموضوع لكن حبيبت أقول حمداً لله على سلامتك والبركة الشفنا حرفك يا ملئ (مليان) بكل أنواع الجمال
تحياتي

الله يديك العافيه يا ستي ام سهي تخوفي عديل... شكلك من ناس ابورؤؤف عديل بس اقول ليك يمكن يكونوا اكتر من تذكره ... غايتو عندي احساس انك من ناس السعوديه وكنتي قريب في ابو رؤؤف او العكس اها قلتي شنو نقلب الجائزه من الخرطوم وسودانير الي النقل الجماعي ومكه عديل لزوم العمره.. اها مع الوصيه بدعواتكم ياربي عوده لكل الاحباب سالمين غانمين..


الحبيب بدر الدين .. ازيك يالحبيب .. والله زي ما قلته تبقي الصلات الطيبه والله يديك العافيه

اها ياناس الاجازات اي مشاركه تانيه والا الناس ما بتعرف كمان ابو رؤؤف

قال شمارات قال

ياربي الليله ما في زول رجع من الاجازه ... غايتو وجد جد انا لو لقيت طريقه كنته رجعته هسي ... وعلشان كده قادر اتصور انو الناس مددت الاجازه كمان شويات... وطبعا الشمارات المقصود منها طرق كل تلك العناوين العريضه التي تعالج نوع ما امور الاغتراب والمغتربين والاجازات .. في انتظار طرق ومناقشة مواضيع اكثر عمق ودمتم احبتي

اها لسعه الناس... الظاهر الناس ما سافرت ولا شافت ...وخبر هنا وخبر هناك بس العارفه انا في كم زول من قبيلة البورد لسعه في ربوع البلد والا انا غلطان

وليام اندريه

حمد لله على السلامة
ما مشيت لقاء البورداب
ولا شنو

برضو كنا في ام درمان نفس الهواء يعني

بس شماراتك ما مدققة شديدة

لوول
تمنياتي

هلااااااااااااا والله بناس امدرمان .. جد لم يحالفني الحظ للقاء بس منتظر منكم الشمارات ... يمكن الفكره تكون في المشاركه والاهتمامات .. لانو انا عندي كميه من الشمارات والمغربله دقاقه و في مختلف المجالات بس قلته يمكن تكتر علي قبيلة البورد لانو فيهم الكبار الذي حالتي و الما بحبوا الملح خوفا من الضغط الموجهه وعلشان كده قلته اسمع واشارك مع ناس الاجازات اها قلتي شنو وبالمناسبه لوووووووووول علي لوووووووووووووولك ودمتي عزيزتي

خلاص المدارس فتحت في بلدان الاغتراب ومعناها معظم الناس رجعت والظاهر ما عندها شمارات تذكر ويمكن موفرينها لزوم رمضان .. والدليل ..... الناس البتاوق يعني فوق المئتين ولا مشاركه الا من ثلاثه .. خلاص قفلنا الباب حتي الاجازات القادمه وكل سنه وانتم طيبين احبابي ودمتم