Post: #1
Title: الرجل الذي......اشتريت بكا ابوهو
Author: سجيمان
Date: 09-02-2003, 08:26 AM
Parent: #0
دائما لما تكون ضارباني فلسة.....اقعد افكر في طرق انحرافية لجلب المال....انا اصلا عندي عادة زي الزفت....كل ما اشوف زول يعد ويحسب في قروش كتيرة..... يتخيل لي بعد ما ينتهي من الحساب يجدعهن لي....يعني بالواضح كدا يتخيل لي كدا انو القروش دي حقتي.....والراجل بارك الله فيهو داير يحسبن لي بس..وانا ظنايتني عندي رغبة دفينة في العقل الباطن بتاعي للتسول..الحالة دي قاعدة تجيني في البنوك بالذات.... اكون واقف قدام الكاشير وافتح خشمي واقعد احسب معاهو.... ولاّ....امد رقبتي..واعاين للمكنة المشلهتة ديك وتعد القروش...
فكرت مرة...... انو اكون طفيلي من الدرجة الاولى.....امشي أي بيت عرس.... واقعد باللوال....اوزع العشاء مع الجماعة....وانظم الناس.... لحدي ما اقنع اهل العروس اني من اهل العريس واقنع اهل العريس اني من اهل العروس.....وبعد شوية.... اقعد في خشم الخيمة....واجيب لي دفتر وقلم وامسك الكشف....واي زول يغسل ايديهو...ويجي ماشي بي عندي ادفر التربيزة..وتقع وهو يتلف وانا الم الدفتر من الواطة....واكون خاتي لي فيهو شوية قريشات...طُعُم.....وبشتتن والقطن....زولي هنا يكون خلاص عرف دا الكشف...ويروح يدفع.... وبعدين البي يدفع شوية..... احاول اقنعو... انو القروش الدفعها دي ما بتجيب حق صحن الكوكتيل الاكلو....وحقو يصلحها شوية...والله يا ابن العم ماك طالبني حليفة....البيض الفي الكوكتيل دا حاجزنو....وهو دابو في بطن جدادو... قبال شهر.... وكلفنا والله... وبعدين انت قريشاتك دي ما بتجيب لها بيضة واحدة...وبعدين انت ماكلك صحنين...شوف عيني....زولي هنا يخجل شوية ويدفع..... اها الناس البعدو وسمعو النضم دا ما بيحوجوني في نضم تاني.....
القط قريشاتي واتوكل على الله وارجع اهلي.........
معانا عصابة هنا....... كل اول شهر فيهم واحد يا ميت لو ابوهو يا اخوهو يا عمو....والله بسعالني... الواحد فيهم يشيل معاك الفاتحة...وطابي دفتر الكشف في اباطو....ويزح لك عشان تقعد جنبو....ويفتح الدفتر ويقعد يعد في الناس وفي القروش..يمسخ عليك كباية الشاي.........
قبل فترة..... جاني تلفون....قالو لي كلم فلان انو ابوهو مات..... وفلان دا عضو كبير في العصابة... الحقيقة انا ما هميت كيف اكلمو..... لكن فكرت استثمر البكا حق ابوهو دا.....لفيت عمتي..ومشيت ليهو..... قلت لو يا فلان..... ابوك مات....والفاتحة....وبعد الفاتحة...قلت لو ما نكتر كلامنا يا زول...... رايك شنو اشتري منك البكا دا؟..... يعني انا بديك تلاتة الف ريال كاش داون....وانت تبعد بعيد من الكشف....انا امسك الدفتر..والبي يجيبها يجيبها...... الراجل وافق......
لكن .....البقت عليّ تبقى علي كلاب الحله..... البكا الاشتريتو خسرت فيهو النص بالضبط......وزولي بعد تلاتة يوم جاني قال لي اسمع....الوالدة قالو حالتها خترة وفي الاستيببالية....اها تشتري بكم؟
|
Post: #2
Title: Re: الرجل الذي......اشتريت بكا ابوهو
Author: خالد
Date: 09-02-2003, 08:58 AM
Parent: #1
والله يا سجيمان حيرتنا عديل كدة يا زول نعمل معاك شنو قول لينا
اسمع والله انا داير اعرس اكتب رقم حسابك ونزلوا في بوست واعمل لي كشف اليكتروني وحول لي 3 الف ريال رايك شنو تشتري
|
Post: #4
Title: Re: الرجل الذي......اشتريت بكا ابوهو
Author: سجيمان
Date: 09-02-2003, 08:21 PM
Parent: #2
خالد اخو...... كشف العرس ما بنشتريهو.....علا حق بكا معليش....مضمون يا اخوي
|
Post: #3
Title: Re: الرجل الذي......اشتريت بكا ابوهو
Author: alfatih
Date: 09-02-2003, 10:26 AM
Parent: #1
دكتور سجيمان سلامات
حاول استثمر البكاء وجيب ليك واحدة من
الدلاليات ديل وخليها تسوط ليك النسوان
فى الثياب وتحلف انو دة ثوب الصحاف
اخر موضة ....
وكدة يكون الفراش جاب حقو مضاعف
بعدين النسعلك
الماسك ليك الاباريق منو ؟
|
Post: #6
Title: Re: الرجل الذي......اشتريت بكا ابوهو
Author: سجيمان
Date: 09-03-2003, 10:45 AM
الفاتح...اباريق شنو يا اخوي.......انا همي في الكشف...ان شاء الله يقشو ايدهم في طرف جلاليبهم
|
Post: #5
Title: Re: الرجل الذي......اشتريت بكا ابوهو
Author: ود عقاب
Date: 09-03-2003, 07:22 AM
Parent: #1
دكتور سجمان
والله الراجل بالغ معاك
لكن كلامك دا كان سويتو عندنا هنا
لا تلاته الف ولاعشره حا حلوك عشان بتطلع خسران
اصلو الفراش هنا مستمر لمده خمسه عشره يوما
يعنى التلمها يفرتكوها ليك فى السكر كمل جيب عيش
الليله التالته
وبكره السابعه
التقول النسوان حلافات ما يمشن الا قروش الكشف تكمل
وتطلع مطالب
ودعقاب
|
Post: #9
Title: Re: الرجل الذي......اشتريت بكا ابوهو
Author: سجيمان
Date: 09-03-2003, 10:17 PM
Parent: #5
يا ود عقاب....كشف البكا حلاتو في السعودية.... بالريال....وكباية شاي والمقاس الصغير
|
Post: #7
Title: Re: الرجل الذي......اشتريت بكا ابوهو
Author: maia
Date: 09-03-2003, 11:20 AM
Parent: #1
الاخ سجيمان
يعني بالعربي كده البكا ما جاب دخل
|
Post: #8
Title: Re: الرجل الذي......اشتريت بكا ابوهو
Author: ابو جهينة
Date: 09-03-2003, 11:39 AM
Parent: #7
سجيمان
عندنا واحد من عندنا ، في يوم فلراش ، قعد جنبي في جمعيتنا و قال لي بالله يا جلال سلفني ألفين ريال ، فقلت ليهو إنت ما شغال ، حتسدد من وين ؟ قال لى أخت حبوبتي واقفة على بعد خطوتين من القبر ، يعني تكلة و متوقعنها اليومين ديل ، أول ما تموت أفرش بديك قريشاتك.
|
Post: #10
Title: Re: الرجل الذي......اشتريت بكا ابوهو
Author: abuguta
Date: 09-04-2003, 00:16 AM
Parent: #8
الاخ سجيمان
تحياتى
انت حصل جربت اشتريت كشف خروج نهائى او كشف دية
كدى فكر فى دى شوية بالذات الدية مربحة جدا
|
Post: #13
Title: Re: الرجل الذي......اشتريت بكا ابوهو
Author: سجيمان
Date: 09-05-2003, 00:24 AM
Parent: #10
والله يا ابقوتة.....فكرة الدية دي بنت ستين الف كلب...وتقع الامراء.... وبس
|
Post: #12
Title: Re: الرجل الذي......اشتريت بكا ابوهو
Author: سجيمان
Date: 09-04-2003, 01:35 PM
Parent: #8
طيب يا جلال يا اخي.....كان تشتري منو الكشف..... في قعدتكم ديك.....صدق كان ربحت فيهو
|
Post: #11
Title: Re: الرجل الذي......اشتريت بكا ابوهو
Author: سجيمان
Date: 09-04-2003, 08:13 AM
Parent: #7
ايوا يا مايا.....خسران النص..... رايك شنو اجرب كشف النفاس؟
|
Post: #14
Title: Re: الرجل الذي......اشتريت بكا ابوهو
Author: KANDAKE
Date: 09-05-2003, 06:48 PM
Parent: #11
You are a wonderful, great humorist. thank you you left me in stitches. I have not laughed that much in weeks.
I think you should put your ideas into TV sitcoms (Sudanese that is), then you can count your losses.
Kandake
|
|