خليك مع الزمن

كان الجو صحوا الاخضرار على مدى البصر والندى
يعلو هامات العشب والحافلة وثيرة المقاعد
تتهادى في شارع الإسفلت الذي تحزمه مياه
الخريف من جانيه، دخل ذلك الشاب الفارغ
القوام بعطره الفواح وملبسه الأنيق وحيا
الجميع واتخذ مقعده واخذ يستمع مع الآخرين
لصوت ترباس المنطلق من مسجل الحافلة
يا نسيم شبال يا فرح ضحاك زى عيون
أطفال ... يا كلام الريد لي ما بتقال
واظهر الشباب انسجامه مع النغم
واخذ يحرك في أصابعه على ركبتيه
مشكلا إيقاعا داخليا لنفسه وفجأة
انطلقت أنغام هاتفه الجوال
وكانت عبارة عن موسيقى أغنية
(( الحبيب قلبو طيب العوازل ضللوه
فأخرجه وتركه لمدة دقيقة كأنما
أراد أن يسمع اللحن بقية الركاب .
ثم بدا المحادثة (( اللو ..
مبارك .. دقيقة
ثم وجه كلامه لسائق الحافلة
(( لو سمحت صوت المسجل
.دى مكالمة مهمة ومن بعيد ))
بالفعل قام السائق بتخفيض الصوت
ولكن وبصورة ظريفة قال الشاب
(( لا لا يأخى اقفلوا نهائي عشان بعد
المكالمة نسمع معاكم ترباس يا أخي
أنت ما عارف أغنية بعيونك
تقول لي تعال وتعال
وبقليبك تقولي لي لا ما في مجال
بتعمل فينا شنو )) ضحك الركاب
وناصروه فى مطلبه وعاد لمكالمته
(( الو مبارك كيف بخير وبدأت محادثة
طويلة وبصوت الشاب المسموع
كان الكلام عن خطوبة مبارك
الموجود في السعودية فأتضح إن هذا
المبارك متعلق قلبه بشابة ولكن والدته
ا غير موافقة عليه وكان صاحبنا
ينصحه بتركها واخذ يرشح له عدة أسماء
من حسناوات البلد وإثناء حديثه
انسربت منه عبارة (( يا آخى البنات كلهن
واحد ما تعقد الأمر ساكت )).
بعد المحادثة قال الشاب للركاب معتذرا
(( معليش يا جماعة دخلنا كم فى فليم
ما بخصكم لكن معليش دا زمن الشفافية
ولا مش كده ؟ )) قال عبارته الاخيره
وهو ينظر الى شابة كانت جالسة
بالقرب منه ، ثم وجه حديثه الى السائق
(( يلا يا أخى ادينا ترباس دا اصلو الزمن
دا المسافة بين قلب البنات وعيونن
أصبحت كبيرة جدا )) ثم التفت
إلى الشابة قائلا : ولا مش كده))
وهنا انبرت الشابة للرد عليه قائلة
وبصوت مهذب ووجه لا يخلو من الابتسامة
قائلة (( لا ما كده .. يا اخى يا ظريف
ولا بتظارف ومستهتر ولا وبتستهتر
يا آخى ماخد الأمور بصورة غريبة
دى مسائل فى غاية الخطورة بتناقشها
باستخفاف شديد وبعدين شنو البنات
كلهن واحد والمسافة شنو كده ما
عارفة ...وبعدين كل دقيقة والثانية
ولا مش كده اها انا بقول ليك ما كده ))
رد عليها مبتسما (( يا اختى أنت نزلت
فيني نمرة أربعة طوالى
،شوية،شوية وبعدين ولو شايفانى زول
مسطح برضو انا بحترم رأيك لكن بس
داير اقول ليك الدنيا دى ما بتسنأهل
القومة والقعدة ، انتى ما سمعتى
رمضان زايد الله يرحمو ، خليك مع الزمن
، ثم اخذ النقاش يتداعى بين الاثنين
وبقية الركاب يتابعون في غاية الاستمتاع
،وفجأة وبدون مقدمات انبعث صوت
من مؤخرة الحافلة وكان صوتا غضبا
(( يا جماعة قلة الأدب دي شنو؟
هل الحكاية وصلت الدرجة دى؟
يا جماعة دى مركبة عامة
ولا حديقة عشاق؟ ما فى اى احترام
ولا حياء لا حول ولا قوة دا زمن شنو دا؟
ساد صمت رهيب وانزوى كل ذلك المناخ
الفرائحى وبعد عدة دقائق انفجر
الشاب ضاحكا وهو يقول (( والله يا جماعة
الاستجابة للنكد أصبحت عالية جدا
ما معقول زول مزاجو معتل
يسيطر علينا بالسهولة دى))
رد عليه الرجل الغاضب قائلا :
مزاجي أنا معتل ولا أنت القليل أدب
يا آخى مما دخلت في الحافلة استلمتها
وحطمت كل التقاليد أنت قايل ما في
راجل غيرك ولا شنو ؟ والله اقدر
اصلك الا أوريك )) أجاب الشاب قائلا
مش الحافلة أنا خليتها ليك)) ثم قال مخاطبا
السائق (( يا اسطي لو سمحت نزلني هنا))
وهنا انبرت الشابة قائلة وبإصرار
(( والله ما تنزل تنزل لي شنو أكان
ما عاجبو خليهو الينزل هو))
ثم وجهت كلامها للسائق (( أتحرك يا زول ))
فانطرب السائق لكلامها وداس على
البنزين ورفع صوت المسجل
(( وتسبنى فى عز الجمر وانت من حولى بتمر...))
عبد اللطيف البونى
الصحافة

الأخ المهندس ســلامات

و مشتاقين شـكرا ليك يا خوي و الله دكتور عبداللطيف البوني مقالاته حـلـوه جـدا

و ذكرتنا رمضان زايد الله يرحمو كان زول فنان بحق و حقيقة و الله حفله ليهو بي

تساوي حفلات سنة كاملة راجل ضاحك و مضحك و حفلتو رابة من قولة تيت لغاية لمليم

الكراسي . و كمان المواصلات في السودان بقت مسرح متنقل فيها مسرحيات حلوة شديد


تسلم يا هندسة .

الاخ ابوحسين
وينك يارجل
زمن طويل
تسلم