Post: #1
Title: أيحدثُ كلَّ هذا في السودان ؟ و في هذا الزمان ؟
Author: منوت
Date: 08-20-2003, 07:13 PM
Parent: #0
قبل ساعة - فقط- من الآن ، اتصلت بأحد أصدقاء العمر و هو رجل بقامة الوطن .. قابض على الجمر ، مهدياً الآخرين كامل الود بينما هو يحترق - زولياً - ليهبنا التماسك و صافي الصداقة . إنه صديق يحاول مساعدة إحدى أخواتي في تسهيل إجراءات سفرها ، قائماً مقامي كأخ كبير .. و لأن المشغوليات كثيرة ، فقد نسي هاتفه المحمول (الموبايل) في مكان ما .. و بينما أنا أحاول الاتصال به ، جاءني صوت شخص آخر لا أعرفه ، فسألته عن صديقي ، فقال لي أنا (عاطف) و أسكن الثوره ، و لا أعرف صديقك هذا ، و قد وجدت هذا (الموبايل) و أنتظر اتصال من صاحبه ، و هاك رقم (موبايلي) و رقم البيت في الثوره لكي يأتي و يأخذ هاتفه ...
بكيت .. نعم و الله بكيت ، و أنا أعيش واحدةً من أخص خصائص (الزولية) ، ألا وهي الأمانة ، و نجدة الملهوف
لَكم أنا فخور بهذا الزول .. و لَكم أنت رائع و نادر يا أيها الإنسان السوداني .. برغم عاديات الدهر
و كما يقول عمي : الدنيا ما بتدي حريف
فأنت (حريف) الإنسانية يا أيها الزول (المحكر) في الأصاله
منوت السعيد بزوليته
|
Post: #2
Title: Re: أيحدثُ كلَّ هذا في السودان ؟ و في هذا الزمان ؟
Author: bayan
Date: 08-20-2003, 07:21 PM
Parent: #1
اى والله انا ذاتى اندهشتا
من سودانى ذى دا زول حتى النخاع
بالله فى هذا الزمان الترللى
يوجد مثل هذا الانسان
لانى فى حالة دهشة من سودانى متقلص
فى الزوليه
يبع الناس ببلاش
ويهدى ودهم وحبهم لمحرقة حقد شخص آخر
عماه الحسد والفشل
سبحان الله تعيش كتير تشوف كتير
|
Post: #3
Title: Re: أيحدثُ كلَّ هذا في السودان ؟ و في هذا الزمان ؟
Author: safwan13
Date: 08-20-2003, 09:37 PM
Parent: #2
والله يامنوت زعلتني شديد ...ايحدث كل هذا في السودان ؟وفي هذا الزمان؟تخيلت ان هناك عاده غريبه عن السودانين ظهرت في السودان
شوف يامنوت اي السودان تعبان وجعان وعينه طالعه لكن لازال يحتفظ بالقيم الجميله رغم كل الظروف المحيطه به
ممكن تستغرب اذا حصل عكس الحصل دا
|
Post: #4
Title: Re: أيحدثُ كلَّ هذا في السودان ؟ و في هذا الزمان ؟
Author: فتحي البحيري
Date: 08-20-2003, 09:50 PM
Parent: #3
الليموني سلام عليك
حاسين بيك وبما يعتريك
صاح لسا في سودانيين كتار لا زالوا ممسكين بهذه المواصفات الزولية
ولصديقك وللقا الموبايل الف تحية
وياريت يقدر يطلع على كلامك المؤثر دا؟
ولكن يا اسعد يا خوي حقو ما نغالط نفسنا
الايقاع الممعن في المدنية
والضغوط الاقتصادية الرهيبة
شوهت دواخل كثيرين ايضا من اهلنا
والله يسترنا غايتو
|
Post: #5
Title: Re: أيحدثُ كلَّ هذا في السودان ؟ و في هذا الزمان ؟
Author: safwan13
Date: 08-20-2003, 10:03 PM
الايقاع الممعن في المدنية....قلتها براك يافتحي المدينه وانا متاكد المدينه دي الخرطوم ماغيرا ... والسودان ماهو الخرطوم
لو مشيت زرتا اهلنا في الاقاليم بتحس انك في السودان السودان
وللا سف الصور الغبيه دي ماظهرت الا في سودانيي الخرطوم والمغتربين في بعض الدول
|
Post: #6
Title: Re: أيحدثُ كلَّ هذا في السودان ؟ و في هذا الزمان ؟
Author: bayan
Date: 08-21-2003, 03:27 AM
Parent: #5
| Quote: والمغتربين في بعض الدول |
ما قلتا الا الصدق
الغربة تصيب الناس بمنخوليا
فيصبون احباطاتهم وفشلهم الخاص
على الاخرين
دوم مراعاة لتقاليد السودان السمحة
زمن عشا البايتات ومقنع الكاشفات
فصار البعض يخطفون عشا البايتات و يهتكون مقنع الغير كاشفات
والحسد والحقد صار هو المحرك الاساسى لبعض الشخصيات
التى أختفى وخرس وجيعها
حيث كان القريب والصديق ينصحك ويردعك عندما تسير فى طريق خاطئ ولكن فى هذا الزمن صار المفترض ان يكون وجيعك يشجعك و يساعك على النيل من الآخرين
و ابك يا وطنى الحبيب
دموع الدم
|
Post: #7
Title: Re: أيحدثُ كلَّ هذا في السودان ؟ و في هذا الزمان ؟
Author: منوت
Date: 08-21-2003, 06:50 PM
Parent: #1
الإخوة و الأخوات
بيان
و
صفوان
و
فتحي البحيري
ما قصدت تشويه صورة السودانيين ، و لم تنازعني أو تساورني أية دوافع للحط من أسمى ما يملكون .. و لكنها (حكاية) حدثت لي و أنا في البعيد .. أقاسي الأمرين .. غربة عن الأهل و البلد و الأصدقاء ، و واقع (يتعولم) بكل ما تحمله (العولمة) من اخفاقات .. و السودانيون - كبشر - مثلهم مثل غيرهم ، يتغيرون إلى الأحسن ، أو إلى الأسوأ .. فكلاهما سنة الحياة .. و كما يقول أحد اصدقائي (الحكماء) : كل شيء في هذه الدنيا يتغيّر ، إلاّ ( ميكانيزم) التغيير ، قإنه من ثوابت هذا العالم المتعولم
و دعونا نواصل الحكي -فقط- بروية و إحسان و طيب خاطر
|
Post: #8
Title: Re: أيحدثُ كلَّ هذا في السودان ؟ و في هذا الزمان ؟
Author: yasiko
Date: 08-24-2003, 07:53 AM
Parent: #7
سلام يا منوت
لما لا يحدث هذا ؟
التحية عبرك لهذا الرجل
وهو بالطبع أصل من اصول سودانية لم يمسه مس
وأما عن الزمان فلا يتغير إلا (مزعزع)هـ
ونسأل الله أن يحفظ القيم والأخلاق
|
Post: #9
Title: Re: أيحدثُ كلَّ هذا في السودان ؟ و في هذا الزمان ؟
Author: dreams
Date: 08-24-2003, 10:24 AM
Parent: #8
الشعب الحر
أب لحماً مُر
فى الزمن المُر
البسمع فيهم يا ابو مروة
بى فرارو ينط من جوه
يبادر ليك من غير تفكير
.
.
.
ده الشعب السودانى
هدمو مترّب وقلبو نضيف
تسلم يا ليمونى
|
Post: #10
Title: Re: أيحدثُ كلَّ هذا في السودان ؟ و في هذا الزمان ؟
Author: انا بنت النيل
Date: 08-24-2003, 11:50 PM
Parent: #9
لك التحية أخي
استغربت لإستغرابك..ماتتحدث عنه في بلدنا الحبيب ..هو الأصل وغيره الإستثناء..فنحن ..والله ..والله ..والله ..مازلنا بخير ..وماأسمعه في كثير من تعليقات المغتربين ..والمهاجرين .فيه كثير من المبالغات..نحن الآن في السودان..وبلدنا بخيرها ..رغم بعض المفاهيم الدخيلة علينا..أحكي ليك مشهد بسيط جدا ومعبر حدث خلال الأيام الفايته ايام فيضان القاش ودماره..لكسلا..مشهد ظهر في التلفزيون لعل الكثيرون لاحظوه..وهو لوحة تجسد من نحن بكل الصدق"الصورة تحكي أحد احياء كسلا المدمرة تماما ..عائلة تجلس فوق اكوام حطام بيتها..وفي العراء..والصورة مأساوية..يمر شحاذ..في هذه الأثناء ..والكاميرا لا تزال تصور..يمد السائل يده ..يقوم احد افراد الأسرة بمناولة السائل شي ..ويذهب الشحاذ مغتبطاً..تخيل..في أي وضع هو ..لامأوى..وغد مظلم ..واهل بيته في "السهلة" ويعطى ..السائل.اي سماحة هذه ..واي امل كبير في الله ..وفي الفرج ..هذا هو السودان ودونك الواقع..تعال ..وسترى اننا لسه بخيرين والحمدلله
|
Post: #11
Title: Re: أيحدثُ كلَّ هذا في السودان ؟ و في هذا الزمان ؟
Author: الاميرة98
Date: 08-25-2003, 08:36 AM
Parent: #10
وآخر أعرفه حق المعرفة
يستغني عن مصروف يومه الجامعي الذي لا يملك غيرة فيبات دون عشاء
فيدع للبنت ثمن المواصلات حتى لا يركبوا الملح في منتصف الليل
والله اني لفخورة بك يا أستاذي رغم كل شيء
وانني لافخر بوطني في كل مكان رغم كل شيء
انها القاعدةفي بلادي وغيرة استثناء
|
|