الاغتراب ما نفع..... شغل في البلد ما جايب همو.....خسبتها براي.... لقيت اني من اشتغلت لي حسي ما دخلت علي قروشا يقولو عليها..... حق الكسرة والهديمات.....ودا زاتو بعد مرات في تلتله....اتخلعت وطيرت عويناتي....وانا اسمع انو القذافي داير يدفع عشرة مليون دولار للراس الواحد.... في لكوربي....... زعلتت زعل شديد واتحرقت...وكل مرة اقبل غلي الوليدات اشتمهم. انتو يا الفقر يا النقر.... يا الحظكم زي سجمكم يظهر عليهوا ابوكم داير يموت اوانطة ساكت..... مرمي الله اصلو ما بترفع....قلت في نفسي يا سجيمان يا داقس.... دا الاستثمار يا بلاش.....الواحد ليه من زمان ما فكر يركب طيارات الخواجات؟....وتتفجر واحدة ويعوضو اهلك عشرة مليون دولار....وانت تموت شهيد ما فيها اتنين تلاتة....بدل ما تموت فطيسه ساكت بالملاريا.... وحق الكشف ما يغطي تكاليف فراش البكاء....واهلك يقعدو يحلو في ديونك بالسنين..... ضربت تلفون لي امي....قلت ليها يا يمة الدعوة البتقوليها لي طوالي ديك... حقت الله يكفيك شر الحديد والشديد.... خليها.. ونادي بنتك وجيبو ورقة وقلم واكتبي الدعوات دي لي..وابقي قيها عشرة.....وعليك الله لمو نسوان الحلة واقعدو ادعو لي.....انشاء الله يا سجيمان يا وليدي.... ربنا يعدلها عليك.... ويركبك طيارة امريكية وتتفجر....وقدر ما تجي تركب طيارة غيرها ما تسهل و تتقفل في وشيك محل ما تدخل مكتب خطوط غيرها.......بركة المكاشفي و سيدك الحسن وعلي الطيار.....واعصري علي علي الطيار دا...انتي ما بتعرفيهو لكن دا فقير متخصص طيران... وساعة البكا.... اقلدي مرا مرا....وابكي وقولي....... الليله يا حليك .....
غايتو يا سجيمان نحن عندنا حزب جديد دايرين نكونو منو وجاي ... الفكرة بتاعة الحزب مبنية على المثل البقول بلاد أبوك كان خربت شيلك فيها شلية .. دحين نحن حا نسجل إسمنا في دفتر المتضررين من لوبيا دي .. مش براهم مشوا وقالوا نحن إرهابيين؟ أها نحن بنقول القذافي دا جاب لينا الضرر قبل كم سنة ، والجماعة موجودين الله يخليهم ، بمدونا بالمستندات ، دعم التمرد ، دعم المرتزقة ، دعم السكر ، وقرش الكرامة ، أها ، ونخلي القرعة تشيلك في الناس البجيهم التعويض .. بس ما تنسانا من التن بيرسنت .
08-19-2003, 05:28 PM
سجيمان سجيمان
تاريخ التسجيل: 10-03-2002
مجموع المشاركات: 14875
بركة الشيخ ملوال اكو مجواك يا سجيمان ما تقع فى محنة كلم امك قول ليها الشيخ دة شيخ قوى شديد وجايبنو ناس الحركة فى المفاوضات للتأثير على ناس الحكومة متافيزيقيا
عشان كدة هو شيخ قوى اوى اوى وما تنسى اديتك السر دة عشان تدينى 2% فقط
08-19-2003, 03:51 PM
خالد خالد
تاريخ التسجيل: 02-02-2003
مجموع المشاركات: 856
بعدين اريتوا يدغعها القذافي بعد ده العشرة مليون دولار دي والله تحانيس وتحانيس عشان تكون ما كاش ومرة يقول اقساط ومرة شيكات ومرة ياخروا الزمن وبعد ده الامريكان ما راضيين
08-21-2003, 06:45 PM
سجيمان سجيمان
تاريخ التسجيل: 10-03-2002
مجموع المشاركات: 14875
والله يا سجيمان الفكرة مغرية..لكن يا اخوي العيب في التنفيذ..كعب يطلع اسمك في الطيارة ويطلعوك انت الارهابي ..والسودان يدفع تعويضات وكمان يا اخوي التعويضات دي بدفعوها بعد كم سنة..يعني اولادك يكونو عجزو لمن يستلموها..يا اخوي اخير ليك الكفيل دا طال عمرك
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
سجيمان
Ahlalawad
مريم بنت الحسين
alfatih
خالد
فيس بوك
تويتر
انستقرام
يوتيوب
بنتيريست